Winston, ¿nénari uénaski jirinhantani Tata Diosïni?

Queensland (Australia) tʼarexeska, juchiti familia no ma relijioni jatsipti. Komuchi granjarhu irekapka enga iauanisï japka, kasi no jámaspka máteruecha jingoni engaksï no juchiti familiaepka. Desde 12 jatiri uénaspka jirinhantani Tata Diosïni. Kómarhispka pararini jarhuatani mítini jurhimbikua ambe imeri ambe. Tátsekua, jurajkuspka granjani ka ánchikuarhita ma exentaspka jini Adelaida (Australia Meridional). Engani 21 jatiripkia ka bakasioni jámani jarhani jini Sydney, Pameni mítispka. Inderini uandontskuarhichespti grupu ma relijioniri enga uandajka eskaksï ireta Gran Bretaña anapuecha, Israeliri tribuecha jimbo jurhaska engaksï tsïnchikata japka (israelismo británico). Seguni i grupu, íksï tribuecha jindesti ima diesi tribuecha engaksï norti anapu reinurhu japka ka engaksï uéakupka jima uératini siglu ochu jimbo ante de Jesusi. Engani kʼuanhatsintapka Adelaida, iri ambe uandontskuarhispka ánchikuarhiteri kompanieru ma jingoni enga uénapka Bibliaeri ambe jorhenguarhini Jeobaeri testiguecha jingoni. Engani sáni ióni uandontskuarhipkia imani jingoni, sánderumindu imeri ambe engaksï Testiguecha jakajkujka, kuenta íntskukuarhispka eskaksï juchiti komarhikuecha mókukuarhintaxapkia engani sapichuetini úkuarhiapka. Jorhenguarhixapkia jurhimbikua ambe juchiti Kuerajpiriri ka imeri Juramukueri. ¡Exentaspka perlani enga xáni jukaparhakueka! (Mat. 13:45, 46, TNM).

Pam, tʼujturi uénaspka jirinhantani i perlani engari sapichku japka. ¿Nénari exentaski?

Familiarhu ma kʼuiripeska enga tsitienga relijioniri ambe jini Coffs Harbour (Nueva Gales del Sur). Juchiti táticha ka juchiti tatitechaksï jiókuarhispti ambe enga jorhentpienga israelismo británico. Juchiti ermanu sánderu sapichu ka ermana sánderu kʼéri, uánikua juchiti primuechani ka jíndini, jorhendasptijtsïni eska Tata Diosï jiókuarhiasïrenga  imani kʼuiripuechani engaksï Gran Bretaña uératini jurhenga. Peruni no méni segura jarhaspka iámu ambe jimbo ka no pʼikuarherasïrenga eska Tata Diosï jíndeni jingoni jarhaspka. Engani 14 jatiripkia, uánikua iglesiecharhu niraspka engaksï jimesïsï japka, máruksï jindespti anglicanos, bautistas ka adventistas del séptimo día. Perujtsïni no jarhuataspti mítini Tata Diosïni.

Sánderu orhepani, juchiti familia Sydney mótsispti, jima mítispka Winstonini enga bakasioni jámani japka. Eska na uandakia Winston, engachi uénapka relijioniri ambe uandani, jiájkani uénaspti jorhenguarhini Bibliaeri ambe Jeobaeri testiguecha jingoni. Jima uératini, uánikua Bibliaeri tekstuechandini karachiasïrendi inderi kartecharhu. Uénani jámani uandanhiaspka ka ikiani. Peruni sánhani arhispka jiókuarhini eska ima ambe enga inde karaenga, ísïspka.

Uéxurhini 1962, Adelaida niraspka irekani parani no xáni iauani jarhani Winston jingoni. Inde, temungurhirini ma jingoni uandontskuarhispti engaksï Testiguepka parani ji imecha jingoni irekani. Arhinhasïrendiksï Thomas ka Janice Sloman, engaksï antesi misioneruepka jini Papúa Nueva Guinea. Solu 18 jatirispka, ka imajtsïni kánikua sési kámaspti ka jarhuatasptijtsïni parani sánderu andarherani Jeobani. Jimbosïni uénapka jorhenguarhini Tata Diosïri Karakateri ambe ka no ióndaspka kuenta íntskukuarhini eskani exentaspkia jurhimbikuani. Engachi tembuchapkia, Winston ka ji uénaspkachi tsípikua jingoni irekani Jeobani marhukuparini. Jatsiaspkachi uandanhiatechani, peru iámindu ambe engachi xáni nitamanchaka, jarhuatastijtsïni parachi sánderu jukaparharani perlani engachi exentaka.

Winston, ¿nénari uénaspi marhuakuni Jeobani?

Ísï no ióni jimbo engachi tembuchapkia, Jeobajtsïni uénaspti ambakiti ánchikuarhita íntskuni parachi marhuakuni (1 Kor. 16:9). Ambe engachi uénapka úni parachi sánderu marhuakuni, jindespti prekursori regulariini. Erachi Jack Porter ka imeri témba Roslyn, pʼímarhisptijtsïni parachi prekursorini. Erachi sirkuitueri orhejtsïkutispti enga juchari kúnguarhikua sapichuni pʼorhembienga ka iásïchi májku kʼéri marhuaxaka grupurhu enga Australasia anapu sukursalini orhejtsïkujka. Pam ka ji, tsípikua jingonchi marhuaska sinku uéxurhini komu prekursori regularicha. Ji 29 jatirispka engajtsïni pʼímarhipka marhuani komu sirkuitueri orhejtsïkuti jini islecharhu engaksï Pacífico sur jaka, enga jiánisï Fiyi anapu sukursali atenderiuani japka. Arinchi islecharhu niraspka Kiribati, Nauru, Niue, Samoa, Samoa Norteamericana, Tokelau, Tonga, Tuvalu ka Vanuatu.

Jiánisï, máru ima islecheri engaksï sánderu iauani japka, kʼuiripuechaksï no sési exeasïrendi Jeobaeri testiguechani, jimbochisï jatsipka para kuidarikuarhini ka jingontku jámani (Mat. 10:16). Kúnguarhikuechaksï sapirhaspti ka nanijtsïni no úsïrendi íntskuni nani engachi mintsikuarhipiriga. Ísï jimbochisï kurhamarhiauenga iretarhu anapu kʼuiripuechani sinchi úpirini imecha jingoni pakarani ka méntkisïjtsïni sési kámaspti.

Winston, tʼuri kánikua jukaparharasïnga traduksioniri ánchikuarhitani. ¿Nénari uénaski jukaparharani?

Imani tiempu jimbo, Tonga anapu erachichaksï solu máru trataduechani ka foituechani jatsiaspti Tonga jimbo, idioma ma enga Polinesia uandanhajka. Paraksï kʼuiripuni Bibliaeri ambe jorhendani, inglesi jimboksï úrasïrendi libruni La verdad que lleva a vida eterna. Ísï jimbo, ima tʼámu semana enga duraripka jorhentperakua ma para orhejtsïkuticha, tanimu orhejtsïkuticha engaksï jorhenapka sánisï inglesi, eratsisptiksï tradusirini i libruni Tonga jimbo. Pam, makina jimbo karantaspti iámu imani traduksionini ka tátsekuachi Estados Unidos anapu sukursalirhu axaspka paraksï imprimirini. I ánchikuarhita ochu semana jimbo kʼamarakuarhispti. Nájkiruka traduksioni no xáni sési japka, jarhuataaspti mítini jurhimbikuani uánikua kʼuiripuechani engaksï Tonga uandaenga. Pam ka ji nochi traduktoriska, peru inde ambe engachi nitamaka, ústi eskachi jukaparharapiringa traduksioniri ánchikuarhitani.

Pam, Australia jingoni terukutantaparini, ¿nénari irekaspi islecharhu?

Kánikua ménderuenispti. Máru lugaricharhu, uánikua sïpimuechaksï jarhaspti, aparhikuarhini, kuakandini, iuiricha ambe, pʼamenchakua ambe, ka ménisïchi sántku tʼirekua jatsisïrenga. Peru mándani jurhiatikua engachi kʼamarenguia iámindu ambe, mintskuarhisïrengachi marirhu ísï eraparini juchari  kʼumachikuarhu uératini engaksï samoano jimbo arhienga fale ka engaksï imani islecharhu pʼindenhapka jatsiani, soluksï paja jingoni ójtsïtaasïndi ka nóksï ótaasïndi. Chúrikuechani enga luna jarhenga, exeasïrengachi palmerechani ka lunani enga marirhu xarhamini jarhenga. I xáni ambakiti jandora, úsïrendi eskachi eratsintani japiringa ka kómarhini, ka ísïchi úsïrega ambakiti ambe eratsini ka no imani ambe engajtsïni no sési úchenga.

Kánikuachi xénchaasïrenga sapiichani. Kánikuajtsïni tsíperasïrendi ka ískuksï pakarasïrendi engaksï exenga máru uérakua anapuechani engaksï xáni urapepka. Engachi islarhu ma jámani japka jini Niue, sapi ma uénaspti pʼáxukuni Winstonini ka uandaspti: “Tsitisïnga chíti pʼunguari”. Sapi no méni exexapti nemani enga xáni tisïjkurhapka ka no mítispti néna uandani.

Kánikuachi no sési pʼikuarherasïrenga exeni na engaksï sáno iáminduecha pobripka. Jima uirhipandani sési jándespti, peru para atenderikuarhini pʼamenchakua ambe jimbo no xáni ambakitispti ka no káni jarhaspti itsï ambanharhi. Nájkiruka ísïpka, erachichaksï no xarharasïrendi eskaksï uandanhiasïrenga, pʼindesptiksïa. Tsípesïrendiksï engaksï familiani jimajku jatsipka, lugari ma para Jeobani kómarhini ka engaksï uénga kʼéri ambe arhini. Imecheri ejemplujtsïni jarhuatasti parachi imani ambejku úni enga sánderu jukaparhakueka ka arisku sáni irekani.

Pam, ménisïri jatsisïrenga para itsï konseguirini ka úmantani imani lugaricharhu enga kánikua ménderuenipka. ¿Nénari jámasïreni?

Diosmeiamukua íntskuntasïnga juchiti tátini iámindu ambe jimbo engarini jorhendapka, komu kurhikani, jima úmantani ka namunitu ambe jingotku irekani. Ma xanhari engachi Kiribati nípka, kʼumanchikua sapichu ma jimbochi pakaraspka enga paja jingoni ójtsïtakata japka, koraliri kakakuarhita ambe jatandini ka enga pʼatamueni járhaticha jingoni ótakata japka. Parani arisku jásï ambe úmantani, jarhakuspka ka kokueri jukaparhata jingoni kurhikaspka. Ka parani itsï jatsini, niraspka posurhu ma ka islarhu anapu uarhiiticha jingoni formarikuarhispka. Paraksï itsï pʼitani, chkariksï ma úrasïrendi enga sáno 2 metru ióskapka (6 pies) ka enga ma ladu jimbo sïndari ma jukarhupka komueska ima engaksï kurucha pʼitamatarajka. Peru enbesi de ganchu ma jukarhuni, boti ma jukarhuspti. Enga ma uarhiiti tokariuenguia, kʼuanimasïrendi imeri botini ka tátsekua chkapkurhantaparini úsïrendi eska boti menonhakuarhipiringa ka niárani itsï uinini. Fásili xarharasïrendi, astakani tokaripka. Uánikua xanhari kʼuanimaspka botini, peruni solu úsïrenga eska boti itsï jingoni uatatakuarhipiringa ka karakua pakarani. Iáminduechaksï uénaspti tsípeni ka engaksï nóteru tsípini japkia, uarhiitirini ma jorhendaspti. Islarhu anapuechajtsïni méntkisï jarhuatasïrendi ka sésijtsïni kámasïrendi.

Tsimarhantsï kánikua jukaparharaska chári ánchikuarhitani islecharhu. Aiangujtsïni je ambe ma engajtsï tsípikua jingoni miájka.

Winston: Ióndaspkachi kurhanguni máru pʼindekuechani. Por ejemplu, engajtsïni erachicha pʼímarhienga imecho, iámu tʼirekuajtsïni íntskusïrendi engaksï xáni jatsienga. Uénani jámani, nochi kurhangusïrenga eskachi jatsispka para jurajkukuani sáni imechani. Jimbochisï iámu arhaenga. Peru engachi kurhangupkia ambe enga úkuarhini japka, uénaspkachia jurajkukuani tʼirekua para imecha. Nájkirukachi no sési ambe uénga, erachichajtsïni kánikua kurhanguchisïrendi. Tsípisïrendiksï engachi exejperantenga sáno mándani seisi kutsï jimbo engachi nirenga pʼorhembiani komu sirkuitueri orhejtsïkuti. Jiánisï, no kuenta úpariani iretarhu anapu erachichani, juchajkuchi jindespka Testiguecha engaksï jingoni kúnguarhienga.

Juchari bisitechaksï ístu kánikua marhuakuaspti iretarhu anapuechani. Uánikua kʼuiripuechaksï eratsisïrendi eskaksï erachicha ísku úkuarhispka imecheri relijionini. Ísï jimbo, engaksï exenga eska juchari relijionirhu anapu ma ka imeri témba engaksï no jima anapuepka, jurhaenga erachichani pʼorhembiani, kurhangusïrendiksï eskachi relijioni máespka interu parhakpini anapu ka ískuksï pakarasïrendi.

Pam: Ma ambe engani sánderu tsípikua jingoni miájka, jindesti ambe ma enga Kiribati úkuarhipka, jima enga kúnguarhikua sapichu ma japka. Erachi Itinikai Matera, imajkusï orhejtsïkutipti, úsïrendi na enga xáni uénga parajtsïni sési kámani. Ma jurhiatikua, jimajkisï niáraspti kanimu ma jingoni enga blankiu ma jatapka ka uandaspti: “I jindesti para cha”. Imani tiempu ísï, tsikateri blankiuechaksï ambakiti ambespti para jucha. Inde sapichitu ambe,  peru enga xáni uékperakua jingonipka mintsitarhujtsïni niárachispti.

Pam, máru uéxurhinisï tátsekua, uarhirakuarhispkari chíti charhakuni ante de andajpenuni. ¿Ambekini jarhuataski orhepani uérani?

Engachi Pacífico sur japka 1973 jimbo, aiangunhaspka eskani embarasada jarhaspka. Eratsispkachi Australia kʼuanhatsintani ka tʼámu kutsï ísï tátsekua, tsïtakuarhispka juchiti charhakuni. Winston, ístu kánikua no sési pʼikuarheraspti. Tiempu jingoni, nóteruni xáni no sési pʼikuarherasïrenguia, peruni no méni meru sési pʼikuarherantaspka astakachi arhintapka partini “Preguntas de los lectores” rebisteri La Atalaya 15 de abrili de 2009 enga arhinhapka: “Si una criatura muere en el vientre materno, ¿volverá a la vida en la resurrección?”. I informasioni uandasïrendi eska i ambe, Jeobaeri jájki jimbo jarhaska ka eska ima méntkisï jurhimbitku ambe úsïnga. Ima tsinaati iámindu no sési jásï ambe engajtsïni úchika i parhakpini enga xáni no sési jándika, jimboka imeri Uájpani íntskuska ánchikuarhita para “xereantani Noambakitiri úkuechani” (1 Juanu 3:8). I informasionijtsïni ístu jarhuataspti sánderu jukaparharani xáni sési jásï perlani engachi Jeobaeri testiguecha jatsika. ¿Ambechi úpirini engachi no jatsipiringa erokuarhikua Reinueri?

Engachi tsïtakuarhipkia juchari charhakuni, ménderuchi uéntaspka marhuani tiempu kompletueri. Máru kutsï jimbochi Australia anapu Beteli jimbo marhuaspka ka sánderu orhepani ménderuchi sirkuitueri ánchikuarhita úspka. Uéxurhini 1981, engachi tʼámu uéxurhini páni japkia marhuani ireta sapirhaticharhu engaksï Nueva Gales del Sur ka Sydney jaka, Australia anapu sukursalirhujtsïni pʼímarhispti, enga jiájkanisï ísï arhinhenga ka nani engachi útasï marhuani jaka.

Winston, ima ambe engari nitamakuarhika islecharhu engaksï Pacífico sur jaka, ¿jarhuataxakikini chíti ánchikuarhitarhu komu parti grupueri enga exejka ánchikuarhitani Beteli Australasia anapueri?

Jo, kánikua. Uénakuarhu, Australia exesïrendi ánchikuarhita enga úkurhienga Samoa ka Samoa Norteamericana. Tátsekua, Nueva Zelanda májku kʼéri únhantaspti Australia anapu sukursali jingoni. Ka iásï Australasia anapu sukursali exesïndi ánchikuarhita enga úkuarhijka Australia, islecha Cook, Niue, Nueva Zelanda, Samoa, Samoa Norteamericana, Timor Oriental, Tokelau ka Tonga. Niáraskia jatsini kóntperata parani nirani uánikua i lugaricharhu komu sukursalirhu anapu erachi ma. Májku kʼéri marhuani xáni ambakiti erachicha jingoni engaksï i islecharhu anapueka, kánikuarini jarhuatasti iásï engani Beteli uératini májku kʼéri ánchikuarhijka imecha jingoni.

Parani kʼamarani, uékapiringa uandani eska imani ambe jimbo engachi jucha úka, Pam ka ji exeskachi eskaksï no solu kʼératicha jirinhantasïnga Tata Diosïni. Imecha engaksï sapichku jaka, ístuksï uékasïndi exentani perlani enga xáni jukaparhakueka, nájkirukaksï imeri parienticha no tsitiaka inde ambe (2 Rey. 5:2, 3; 2 Crón. 34:1-3). Tata Diosï Jeoba meru uékpitisti ka uékasïndi eskaksï iáminduecha, kʼérati ka sapirhaticha pʼímutantskata uéraaka.

Enga Pam ka ji uénapka jirinhani Tata Diosïni, jukari sinkuenta uéxurhinistia, nochi eranhaskasïrenga ambe engachi xáni úpiringa engachi ísï jirinhantapka. Sésichi mítiska eska jurhimbikua Reinueri ambe, perla máeska enga kánikua jukaparhakueka. Ka eratsitixakachi kuidarini xáni eskachi xáni uáka.