1, 2. a) ¿Néna támisï jánhastaxaki Noambakiti kʼuiripuni? b) ¿Ambechi exea ini artikulurhu?

NOAMBAKITI, “táti jemba chkuanderaricheri”, méntkisï támisï jánhastaasti kʼuiripuechani desdeka uénaka irenhani (Juanu 8:44). Máru imeri chkuanderakuechaksï jindesti ima jorhentperakuecha engaksï no jurhimbitika uarhiricheri ambe ka eskaksï uarhiricha tsípiti pákarasïnga máteru nani. I jorhentperakuechaksï úsïndi eskaksï uánikua pʼindekuecha jauaka ka i pʼindekuechaksï jupindaskata jarhasïndi jimbokaksï chérhiasïnga uarhiricheri espirituechani. Ísï jimbo, enga familiarhu o iretarhu anapu ma uarhijka, uánikua erachichaksï jatsisïndi para uinhapikuarhintani paraksï kuájpini ambe engaksï jakajkujka (Jud. 3).

² Enga nema afuersa uékaaka eskachi úntaaka pʼindekua ma enga no sési pʼikuastajka Tata Diosïni, ¿ambejtsïni jarhuataa parachi kuájpini ambe enga Biblia jorhentpijka uarhiricheri ambe? (Efes. 6:11). Ka enga erachi ma xásï tsʼéjkukua ma nitamani jauaka, ¿nénachi uá sési pʼikuastantani ka uinhaperantani? Ixúchi exeaka imani jarhuajperatani engajtsïni Jeoba íntskujka. Peru antesi, ju je exeni ambe uandasïni Biblia uarhikueri ambe.

3. ¿Ambe niáraski úkuarhini primeru chkuanderakua jimbo?

³ Tata Diosï no uékasïrendi eskaksï kʼuiripuecha uarhipiringa, sino eskaksï para méntkisï irekapiringa. Paraka ísï úkuarhipiringa, Adani ka Ebaksï jatsispti para kurhajchani Jeobani, ima enga solu arini ambe juramukuapka: “Anhatapu mímixekueri enga jindeeka sési amberi ka no sési amberi, nori jámaaka akuni, jimboka ima jurhiatikua engari akuaka, uarhiakari” (Gén. 2:16, 17). Peru jimajkani, Noambakiti akuitsini ma úraspti para arhini Ebani: “Nójtsï uarhiaka”. Xáni no sési enga Eba jakajkupka imani  chkuanderakuani ka arhani frutani ima anhatapuerini. Tátsekua, imeri uámbajtu arhaspti (Gén. 3:4, 6). Ísï jimbo, niárasti jarhani pekadu ka uarhikua (Rom. 5:12).

4, 5. ¿Néna seguirixaki Noambakiti támisï jánhastani kʼuiripuni?

⁴ Ísï eska Tata Diosï na uandapka, Adani ka Ebaksï uarhisti. Peru Noambakiti seguirispti chkuadirakua ambe uandani uarhikueri ambe. Ísï tátsekua, uénaspti máteru chkuanderakua ambe uandani, komu ima jorhentperakua eska enga kʼuiripu ma uarhijka, ma parti ima kʼuiripueri tsípiti pakarasïnga, jamberi espirituecha jingoni. Mámaru járhati i mismu chkuanderakueri ambe, uánikua kʼuiripuechani támisï jánhastaaxati asta iásï jamberi (1 Tim. 4:1).

⁵ ¿Andisï Noambakiti újki eska xáni uánikua kʼuiripu jakajkuauaka chkuanderakuechani? Jimboka mítiska na enga pʼikuarherajka kʼuiripu uarhikua jimbo ka úrasïndi indeni ambe parajtsïni támisï jánhastani. Nochi uékasïnga uarhini, jimbokachi kueraanhaska parachi méntkisï irekani (Ecl. 3:11). Para jucha, uarhikua enemigu máesti (1 Kor. 15:26).

6, 7. a) ¿Noambakiti úskia ójchakurani jurhimbikuani uarhikueri ambe? Eksplikari je. b) Bibliaeri jurhimbikua, ¿nénajtsïni jarhuasïni parachi no chérhiani uarhirichani?

⁶ Na uéjki enga xáni jánguarhintakia, Noambakiti no úsïndi ójchakurani jurhimbikuani uarhikueri ambe. Esmasi no méni jarhaxapti xáni uáni kʼuiripu enga mítika ka aianhpini ambe enga Biblia jorhentpijka uarhikueri ambe ka erokuarhikua enga jaka para uarhiricha (Ecl. 9:5, 10; Uku. 24:15). Ambe enga Biblia jorhentpijka, sésijtsïni pʼikuastantasïndi ka jarhuatasïndijtsïni parachi no chéni ka únchi mítini ambe enga úkuarhijka enga nema uarhijka. Por ejemplu, Jeobaeri testiguechachi no chésïnga eskajtsïni uarhiricha no sési ambe úchiaka. Mítiskachi eskaksï no tsípiti jarhaska ka eskaksï no nemani uáka no sési úkuni. Ísïsti enajkiksï uinhamu kʼuíni jaki (Juanu 11:11-14). Ka mítiskachi eskaksï no kuenta íntskukuarhisïnga eska tiempu nitamaxaka. Ísï jimbo, engaksï tsíntaaka, asta imecha engaksï ióni páni jakaia uarhirini, ísïksï pʼikuarheraati enajki solu ma ratu nitama.

⁷ ¿No ísïski eskachi úsïnga sési kurhanguni ka jánhaskani jurhimbikua ambe na engaksï jaka uarhiricha? Kánikua ménderuenisti Noambakitiri chkuanderakua ambe jingoni engaksï méntku no kurhangukuarhijka. Ka aparti de támisï jánhastani kʼuiripuni, no sési pakatasïndi juchari Kuerajpirini. Parachi úni kurhanguni na enga xáni no sési ambe úkia Noambakiti, exeakachi tanimu ambe enga xáni úkuarhikia imeri chkuanderakuecha jimbo. Primeru, no sési pakatasti Jeobaeri nombrini. Segundu, ústi eska kʼuiripu no jukaparharaaka tata Jesukristueri  uarhikuani. Ka últimu, eska kʼuiripu sánderu kómu nitamakuarhiaka.

8. Ísï eska na xarhatajka Jeremías 19:5, ¿andiksïsï no sési pakatajki Jeobaeri nombrini Noambakitiri chkuanderakuecha uarhiricheri ambe?

⁸ Noambakitiri chkuanderakuecha uarhiricheri ambe, no sésiksï pakatasïndi Jeobaeri nombrini. Ma i chkuanderakuecheri jindesti ima jorhentperakua eskaksï uarhiricha kómu nitamakuarhisïnga infiernurhu. ¿Andiksïsï no sési pakatajki Tata Diosïni i eratsikuecha? Jimbokaksï ísï xarhatasïnga eska Jeoba, Tata Diosï enga xáni uékpitika, xásï kʼuiripu máeska eska Noambakiti (1 Juanu 4:8). ¿Nénajtsïni pʼikuastasïni i ambe? Ka sánderu jukaparhakua ambe, ¿néna pʼikuastasïni Jeobani i ambe? Ju je miáni eska ima kurhunhisïnga iámindu ambe enga no sési útspijka (arhinta je Jeremías 19:5).

9. ¿Nénaksï úsïni Noambakitiri chkuanderakuecha eska no jakajkunhaaka tata Jesukristueri uarhikua enga Juanu 3:16 ka 15:13 uandajka?

⁹ Chkuanderakuecha uarhikueri ambe, úsïndi eska no jukaparharanhaaka tata Jesukristueri uarhikua (Mat. 20:28). Enga ísïpiringa eskachi kʼuiripuecha ánima ma jatsiska enga no uarhijka, i ambe arhikuekapirindi eskachi jatsiskia tsípikua ma para méntkisï, ka eska tata Jesukristu no jatsipiringa para íntspini imeri tsípikuani parajtsïni pʼímutantani. Peru ju je miáni eska Jesusiri uarhikua, jindeska sánderu ambakiti uékperakua engajtsïni Tata Diosï xarhatacheka (arhinta je Juanu 3:16; 15:13). Eranhaska je na engaksï pʼikuarherajka Jeoba ka Jesusi i jorhentperakuecha jimbo engaksï újka eskaksï kʼuiripuecha no jukaparharaaka tata Jesukristueri uarhikuani, enga xáni ambakiti intsïmperakua máeka.

10. ¿Noambakitiri chkuanderakuechaksï néna úsïni eska kʼuiripu sánderu kómu nitamakuarhiaka?

¹⁰ Noambakitiri chkuanderakuechaksï úsïndi eska kʼuiripu sánderu no sési pʼikuarheraaka ka kómu nitamakuarhini. Por ejemplu, jamberiksï arhiajti tátichani engaksï sapini ma uarhiranchajka eska Tata Diosï auandarhu páska, jimboka ánjelituni ma uétarhinchaxapka. ¿A no eska i Noambakitiri chkuanderakua sánderu no sési pʼikuastaasïnga, enbesi de sési pʼikuastaantani? Ístu, úranhasïndi infiernueri ambe paraksï xarhatani eska sési jarhaska kastigarpini, komu chpirirhu kurhiraani imechani engaksï no jakajkujka ambe enga Iglesia jorhentpijka. Seguni libru ma enga grupu relijioniri ma uandajka (Inquisición española), máru inde grupueri engaksï xáni no sési kámpienga, ísïksï exesïrendi eskaksï solu “xarhatakuaxapka na engaksï no sési nitamakuarhipiringa para méntkisï” imecha engaksï no májkueni ambe jakajkuenga eska relijioni Katolika, parakaksï moantapiringa ante deksï uarhini ka nóksï nirani infiernurhu. Ka máru lugaricha jimbo, kʼuiripu exesïndi eska jatsiska para kómarhiani imecheri ióntki anapu parientichani engaksï uarhikia, kʼéri ambe arhiani o úni eskaksï jarhuatauaka. Máteruechaksï jánguarhintasïndi no ikiataani uarhirichani paraksï icha no kastigariuani. Peru i chkuaderakuecha engaksï Noambakitirika, meruksï no sáni sési pʼikuastpentasïndi. Sánderu sési, ísku jatinksï uandanhiatpesïndi ka asta chérpini.

11. ¿Nénaksï úpirini úni parienticha o amiguecha eskachi afuersa uáka ambe ma?

¹¹ Xénchani Tata Diosïni ka imeri Karakatani, jarhuatasïndijtsïni parachi Jeobani kurhajchani jiáni engajtsïni parienticha o amiguecha engaksï ambakiti eratsikua ma jingoni afuersa uékaaka eskachi imecha jingoni úntaaka pʼindekua ma enga uarhiricheri ambeka ka enga no Bibliarhu pʼitakateka. Jamberiksï jánguarhintaati no sésijtsïni pʼikuastani, arhiparintsïni eskachi no xénchasïnga uarhirini ni janhanharhini. O jamberiksï uandani eska juchari kulpeuaka engaksï no sési ambe úkuauaka imechani engaksï tsípiti jaka. ¿Nénachi uá xarhatani ambe enga  Biblia jorhentpijka? Ju je exeani máru Bibliaeri prinsipiuechani ka nénachi uá úraani.

12. ¿Náki pʼindekuecha ka jakajkukuecha engaksï uarhiricheri ambeka xarhatasïni eskaksï no Bibliarhu pʼitakateska?

¹² Ju je méntku no jiókuarhiani jakajkukuechani ka pʼindekuechani engaksï no Bibliarhu jaka (2 Kor. 6:17). Paisi ma jimbo enga Caribe jaka, uánikuaksï ísï jakajkusïndi eska enga nema uarhijka, imeri ánima tsípiticha jingoni pakarasïnga para no sési úkuantani imechani engaksï no sési kámapka jiáni enga tsípiti japka. Seguni karakata ma, ánima asta jamberi “úsïndi no sési ambe úkuni iretani”. Máru iretecharhu jini África, pʼindenhasti ójchakuraani espejuechani uarhiriri kʼumanchikua jimbo ka imeri fotuechani paredirhu ísï eraatarani. ¿Andi? Jimbokaksï máru uandasïnga eska uarhiri no jatsiska para eratikuarhini. Jeobaeri marhuarichachi méntku no jiókuarhisïnga jakajkukua o pʼindekua ma enga újka eska Noambakitiri chkuanderakuecha sánderu etsakurhiaka (1 Kor. 10:21, 22).

13. Eska na arhijka Santiagu 1:5, ¿ambechi uá úni engachi no seguru jaka eska Jeoba no jaiapanhintasïnga pʼindekua ma?

¹³ Engachi no seguru jaka eska Jeoba no jaiapanhintasïnga pʼindekua ma, ju je mintsikaparini kurhakuni eskajtsïni íntskuaka jánhaskakua (arhinta je Santiagu 1:5). Tátsekua, ju je jirinhantani informasioni enga juchari publikasionicharhu jaka. Ka enga uétarhiaka, ju je kurhamarhiani kúnguarhikuarhu anapu orhejtsïkutichani. Ísïsti, imajtsïni no arhiati ambe engachi jatsika para úni, perujtsïni kʼóru exerauati máru Bibliaeri prinsipiuechani engajtsïni marhuachiaka, komu engachi ixú exeauaka. Ini ambe úparini, jorhenguarhisïngachi iámindu ambe jingontku exeni, parachi “úni mítini ambe enga jindeka ambakiti ambe ka ambe enga no sésika” (Ebr. 5:14).

14. ¿Ambechi uá parachi no úni eskaksï máteruecha pekadu ambe uáka?

¹⁴ “Ú je iámindu ambe para eska Diosï kʼéri ambe arhinhaaka. Ka asï jáma je úni ambe enga pekadu úrauaka [máteruechani]” (1 Kor. 10:31, 32). Engachi jatsiaka para erakuni sinchi úntaa o nómbe pʼindekua ma, ístuchi jatsiska para exeni máteruecheri konsiensiani, ka sánderia juchari erachicheri. Nochi uékasïnga úni eskaksï máteruecha pekadu ambe uáka (Mar. 9:42). Ístuchi no uékasïnga ísku jatini no sési pʼikuastaani imechani engaksï no Testigueka. Uékperakua uáti eskachi janhanharhikua jingoni uandontskuarhikuauaka, ka i ambe uáti eska Jeoba kʼéri ambe arhinhaaka. Ka nochi jatsiska para arhinchaani o arhirperani imecheri pʼindekuecha jimbo. Ju je miáni eska uékperakua kánikua jarhuajpesïnga. Engachi kurhangukuaska máteruechani ka  janhanharhiani, astachi uáka úni eskaksï imecha engajtsïni no sési kámajka, mójtakurhiaka.

15, 16. a) ¿Andisï sési jaki aianguani máteruechani ambe engachi jakajkujka? Jatsiku je ejemplu ma. b) ¿Ambejtsïni jorhendasïni ambe enga Pablu uandapka ixú Roma 1:16 jimbo?

¹⁵ Ju je aianguani juchari parientichani ka besinuechani eskachi Jeobaeri testigueska (Is. 43:10). Enga familiari ma uarhiska, chári familia ka amiguechaksï uáti kánikua ikiani engajtsï no úntaska pʼindekua ma. Sánderu fásiliuati orhepani uérakuni ini uandanhiatani engajtsï xarheni arhiaska ambe engajtsï jorhenguarhikia Bibliarhu. Francisco enga Mozambique irekaka, karasti: “Enga juchiti uarhiiti Carolina ka ji jorhenguarhipka jurhimbikueri ambe, aianguspkachi juchari familiani eskachi nóteru kómarhiapiringuia uarhirichani. Kánikua úkua jukaspti para ísï úni jiáni enga Carolinaeri jingonikua uarhipka. Jima engachi irekaka, pʼindenhasti uarhirini jikuarani para kʼéri ambe arhini. Ka nema enga meru familieka uarhiriri, jatsisti para tanimu chúri jima kʼuíni enga itsï tsïtanhaka. Seguni ini pʼindekua jingoni, uarhiriri ánima mintsikuarhini jarhasïndi. Carolinaeri familia erokuarhixapti eska ima kʼuípiringa jima”.

¹⁶ ¿Ambeksï úspi Francisco ka imeri témba? Francisco uandantasïndi: “Jimbokachi xénchasïnga Jeobani ka nochi uékasïnga no sési pʼikuastani, nochi uékaspka úni imani pʼindekuani. Carolinaeri familia kánikua ikiaspti. Uandasptiksï eskachi no janhanharhispka uarhirini ka arhisptijtsïni eskajtsïni no pʼorhembepiringa ka eskajtsïni nóteru méni jarhuatapiringuia. Jucha tʼuini aianguaspkia ambe engachi jakajkujka, ísï jimbo, nochi ambe ma arhiaspka jiáni engaksï imecha ikiani japka. Máru parientichajtsïni asta kuájpespti ka uandasptiksï eskachi tʼuini aianguaspkia ambe engachi jakajkujka. Tiempu jingoni, Carolinaeri familiarichaksï nóteru ikiaxaptia ka sésichi pájperantaspka. Máru astajtsïni pʼorhembisti parajtsïni publikasionichani euani”. Ísï jimbo, ju je no méni kʼuratseni kuájpini ambe enga Biblia jorhentpijka uarhiricheri ambe (arhinta je Roma 1:16).

17. Enga erachi ma uarhirakuarhiska nemani, ¿ambejtsïni jarhuataa ambakiti amigu máeni?

¹⁷ Enga erachi ma uarhirakuarhiska nemani, jatsiskachi para jánguarhintani ambakiti amigu máeni, meru ermanu ma “para jiáni enga uandanhiata  ambe jarhajka” (Prov. 17:17). ¿Ambejtsïni jarhuataa inde jásï kʼuiripu máeni, sánderia jiáni engaksï erachini afuersa uákaaka úrani pʼindekua ma enga no Bibliarhu jupindaskuarhijka? Ju je exeani tsimani Bibliaeri prinsipiuechani.

18. a) ¿Andisï uerapi Jesusi? b) ¿Ambechi jorhenguarhisïni Jesusiri ejemplueri?

¹⁸ “Uera je imecha jingoni engaksï uerajka” (Rom. 12:15). Jamberichi no mítiaka ambechi úpirini arhini imani enga kánikua no sési pʼikuarherani jaka. Peru ju je miáni eska uerani sánderu ambe xarhatasïnga eska uandani. Jiáni enga Lasaru uarhipka, Maria, Marta, ka máteruechaksï ueraspti imecheri ermanu ka amiguni jimbo. Jesusi tʼámu jurhiatikua tátsekua niáraspti ka ístu “pʼiaraspti uerani” nájkiruka mítipka eska no ióndani tsítantapiringa (Juanu 11:17, 33-35). Enga Jesusi uerapka, xarhataspti na enga pʼikuarherapka Jeoba Lasarueri uarhikua jimbo. Ístu, xarhataspti eska Jesusi kánikua xénchasïrenga imani familiani, seguru eska inde ambe kánikua sési pʼikuastantapka Mariani ka Martani. Májkueni, engaksï erachicha pʼikuarherajka eskachi xénchaasïnga ka pendienti páni imecha jimbo, kuentaksï íntskukuarhisïndi eskaksï no jandiajku jarhaska ka kánikuaksï sési pʼikuarherasïndi engaksï imecheri amiguecha xénchaajka.

19. ¿Nénajtsïni jarhuatasïni Eclesiastés 3:7 parachi sési pʼikuastantani erachini ma?

¹⁹ Jarhasti “tiempu para pínasku pakarani ka tiempu para uandani”  (Ecl. 3:7). Máteru ambe engachi uáka úni para sési pʼikuastantani erachini ma, jindesti solu kurhajchani. Ju je jurajkuni eska uenhikuarhiaka ka nochi jámaaka no sési exeni enga no eratsiparini uandaaka ka imani ambe uandani enga no jatsipka para uandani (Job 6:2, 3). Jamberi kánikua no sési pʼikuarherani jauati jimbokaksï imeri parienticha engaksï no Testigueka afuersaksï uékaaka úrani ambe ma. Ísï jimbo, ju je kómarhini imani jingoni ka kurhakuni imani enga “kurhauajka kómarhikuechani” eska íntskuaka balori ka jánhaskakua (Sal. 65:2). Engachi uáka úni, ju je imani jingoni arhintani Bibliani o artikulu ma juchari publikasionicheri, por ejemplu, ambakiti eksperiensia ma.

20. ¿Ambechi exea máteru artikulurhu?

²⁰ Kánikuachi sési pʼikuarherasïnga jurhimbitku mítini uarhikueri ambe ka ambe enga úkuarhiaka sánderu orhepani imecha jingoni “engaksï inchatsikurini jaka” (Juanu 5:28, 29). Méntkisï engachi exeaka eska sési jauaka, ju je juchari uandakuecha ka úkuecha jingoni kuájpini ambe enga Biblia jorhentpijka. Máteru artikulu jimbochi exeaka máteru ambe enga Noambakiti úrajka para kʼuiripu no mítini jurhimbikuani: sïkuamikua ambe. Exeakachi andichisï jatsi para no niátani ni tsípikuarhini iámindu indeni ambe jingoni enga Noambakiti úrajka.