1, 2. ¿Andisï Jesusi kánikua uandanhiani japi?

ÚLTIMU jurhiatikua enga Jesusi irekapka komu kʼuiripu ma, kánikua uandanhiaxapti. Uénani jámani, mítispti eska nóteru ióni kuerataxapkia paraksï imecha engaksï ikiakuenga no sési kámapiringa astaksï uándikuni. Peru jarhaspti máteru ambe enga uandanhiatani japka. Jimboka kánikua xénchasïrenga Táti jembani, uékasïrendi jeiapanherantani. Ka mítispti eska enga no jurajkupiringa jiáni enga xáni no sési nitamakuarhipiringa, jarhuajpepiringa para Tata Diosïri nombri pímbinhaxentani. Ístu, xénchasïrendi kʼuiripuni ka mítispti eskachi solu jiáni úpiringa jatsini erokuarhikua parachi irekani para méntkisï enga ima no jurajkupiringa Jeobani asta uarhikuarhu jamberi.

² Nájkiruka Jesusi no sési nitamakuarhini japka, seguirixapti jatsini pínandikua. Sánititu antesi, arhiaspti imeri apostulichani: “Juchiti pínandikuani jíksïni íntskuaka” (Juanu 14:27). Jesusi jatsispti “Diosïri pínandikua”, i ambe arhikuekasïndi, sési pʼikuarherani ísï eska ima enga ambakiti pájperakua ma jatsijka Jeoba jingoni. Ísïsï pʼikuarherani japti Jesusi imeri mintsitarhu ka eratsikuarhu (Filip. 4:6, 7).

3. ¿Ambechi exea ini artikulu jimbo?

³ Juchachi no méni jatsiaka para xáni ambe aguantarini eska Jesusi. Peruchi iámindu imeri chúxapaticha no sési ambe nitamakuarhiaka (Mat. 16:24, 25, TNM; Juanu 15:20). Ka májkueni eska ima, seguru eskachi méni kánikua uandanhiani jauaka. ¿Ambechi uá úni parachi no jukari uandanhiani ka eskachi indeni jimbo no jatsiaka pínandikua? Ju je exeni tanimu ambe enga Jesusi úpka enga aianhpini jámani japka Echerirhu ka nénachi  uá májkueni úni engachi no sési ambe nitamakuarhini jauaka.

4. Eska na arhijka 1 Tesalonika 5:17, uandaa je máru ejempluechani engaksï xarhatajka eska Jesusi uánikua xanhari kómarhispka Jeobani últimu jurhiatikua.

⁴ (Arhinta je 1 Tesalonika 5:17). Últimu jurhiatikua, Jesusi uánikua xanhari kómarhispti. Enga arhiapka imeri chúxapatichani paraksï miántani imeri uarhikuani, kómarhikua ma úspti antesi de íntsaani kurhinda ka ménderu kómarhikua ma úspti antesi de íntsaani binu (1 Kor. 11:23-25, TMN). Ístu kómarhikua ma úspti imecha jingoni antesi deksï uéntani imani lugarirhu engaksï Paskuani úntapka (Juanu 17:1-26). Engaksï Olibusïri juáta jimbo niárapkia, uánikua xanhari kómarhispti (Mat. 26:36-39, 42, 44). Ka asta ambe enga últimu uandapka antesi de uarhini, jindespti kómarhikua ma para Táti jemba (Luk. 23:46). Eskachi na exekia, Jesusi kómarhispti Jeobani iámindu ambe jimbo enga xáni nitamanchapka imani jurhiatikua jimbo enga xáni jukaparhakuepka.

5. ¿Andiksïsï no balori jukapi apostulicha?

⁵ Ma ambe jimbo enga Jesusi aguantaripka, jindespti jimboka méntku kómarixapka Táti jembani para kurhakuni jarhuajperata. Peruksï imeri apostulicha no ísï úspti ima chúri ka nóksï balori jukaspti engaksï niárapkia tsʼéjkunhani (Mat. 26:40, 41, 43, 45, 56). ¿Ambechi jorhenguarhisïni? Eskachi no méni jurajkuaka Jeobani solu engachi méntku úndaska kómarhini, ísï eska na úpka Jesusi. Peru ¿ambe jimbochi kómarhia?

6. ¿Andijtsïnisï jakajkukua jarhuatajki no uandanhiani?

⁶ Uákachi kurhakuni Tata Diosïni parachi sánderu jakajkuni imani (Luk. 17:5; Juanu 14:1). Uétarhinchasïngachi jimboka Noambakiti tsʼéjkuauaka iámindu Jesusiri chúxapatichani (Luk. 22:31). Jakajkukuajtsïni  jarhuataati seguirini jarhani pínandikua jatsini, nájkirukachi méntku úndaaka problemechani jatsiani. ¿Andi? Jimboka engachi na uákia iámindu ambe engachi jucha uáka úni, mintsikani Jeobani, uáti eskachi imani jurajkukuaka ambe engajtsïni uandanhiatani jauaka. Mítini eska ima sánderu sési úsïnga úni ambe ma, uáti eska juchari eratsikua ka mintsita no uandanhiauaka (1 Ped. 5:6, 7).

7. ¿Ambechi jorhenguarhisïni ambe enga Robert uandantajka?

⁷ Kómarhikuajtsïni jarhuatasïndi seguirini jarhani pínandikua jatsini ambe úejkichi nitamakuarhini jarhani. Ju je exeni ambe enga Robert nitamapka, ambakiti orhejtsïkuti ma enga jukari 80 jatirikia. Ima uandasïndi néna úsïni para seguirini jarhani pínandikua jatsini: “Desde iónisïa, ambe enga Filipusʌ 4:6, 7 arhijka, jarhuatasïndirini orhepani uérakuani uánikua uandanhiatechani. Jatsiaspka problemechani tumina jimbo, ka ma tiempu jurajkuspka orhejtsïkutini”. Ístu uandasïndi: “Jirejiresï kómarhisïnga engani uénajka uandanhiani. Ísï exesïnga eska engani mintsitarhu uératini kómarhijka ka sánderu someni, sánderuni jatsisïnga pínandikua”.

8. Ísï eska na arhijka Juanu 8:29, ¿ambe máteru ambe úspi eska Jesusi pʼikuarherapiringa pínandikua jatsini?

⁸ (Arhinta je Juanu 8:29). Jesusi seguirixapti pínandikua jatsini, asta jiáni engaksï no sési kámapka. ¿Andi? Jimboka mítispka eska sési pʼikuastaxapka Táti jembani. Kurhandiraspti asta jiáni enga sánderu no sési nitamakuarhini japka. Iámindu ambe enga uénga, jindespti para Jeobani marhuakuni jimboka xénchasïrenga. Antesi de Echerirhu jurhani, Tata Diosïri ánchikuarhiri jánhasti máespti (Prov. 8:30). Ka enga ixú jupka, tsípikua  jingoni jorhentpespti jurhimbikua ambe Táti jemberi (Mat. 6:9; Juanu 5:17). I ánchikuarhita kánikua sési pʼikuastaspti (Juanu 4:34-36).

9. ¿Nénajtsïni jarhuatasïni seguirini jarhani pínandikua jatsini engachi okupadu jarhajka aianhpikuarhu?

⁹ Engachi kurhajchajka Jeobani, ísïchi úsïnga eska Jesusi ka méntkuchi jauenani “úni Diosïri úkuani” (1 Kor. 15:58). Kristianu enga “mintsita jingoni” úni jaka ánchikuarhitani aianhpikuarhu, ménderueni exeasïndi imeri uandanhiatechani (Uku. 18:5). Ma ambe jimbo jindesti, jimbokaksï ima kʼuiripuecha engachi jingoni uandontskuarhijka sánderuksï kʼérati problemechani jatsiasïnga eska jucha. Peru engaksï niárajka xénchani Jeobani ka únksï ambe engaksï jorhenguarhijka, niárasïndiksï sánderu sési irekani ka tsípikua jingoni. Méni enga ísï úkuarhijka, sánderuchi mintsikasïnga eskajtsïni Tata Diosï kuidariuaka. Ka engachi mintsikaska, jarhuataatijtsïni seguirini jarhani pínandikua jatsini. Ísïsï nitamakuarhini jati pirenchi ma enga depresioni kámajka ka enga ísï pʼikuarherajka enajki no ma ambe marhuajki. Ima uandantasïndi: “Okupada jarhani aianhpikuarhu, úsïndi eskani sési jauaka ka tsípini pʼikuarherani. Exesïnga eska engani indeni ambe újka, sánderuni andarherasïnga Jeobani”.

10. ¿Ambechi jorhenguarhisïni ambe enga Brenda uandantajka?

¹⁰ Ístu, ju je exeni ma pirenchiri ejemplu enga arhinhajka Brenda. Ima ka imeri nanakaksï kʼéri pʼamenchakua ma kámasïndi. Brenda siia de ruedasi jingoni jámasïndi ka sóntku kuatarasïndi. Méntkisï enga újka, nirasïndi aianhpini kʼumanchikuecharhu, peru sánderu kartecha jimbo aianhpisïndi. Uandantasïndi: “Engani kurhangupkia ka jiókuarhini eskani no úpiringa tsinakuarhini ini jurhiatikuecha jimbo, úspka sánderuni sési predikarini. Engani nirajka aianhpini, úsïndi eskani mirikurhiauaka juchiti uandanhiatechani. Úsïndi eskani sánderu eratsini jauaka néna jarhuataani imani kʼuiripuechani engani exeantajka kúnguarhikuarhu anapu territoriurhu. Ka méntkuni miáni jarhasïnga erokuarhikuani engani jatsika”.

11-13. a) ¿Nénaksï xarhataspi apostulicha ka máteru imeri chúxapaticha eskaksï ambakiti amiguechespka Jesusiri? b) ¿Nénaksï jarhuataspi Jesusini imeri amiguecha?

¹¹ Enga Jesusi aianhpini jámani japka, uánikua ambe nitamakuarhispti enga úkua jukapka. Peru ambakiti apostulichaksï xarhataspti eskaksï meru imeri amiguespka, ísï eska na arhijka Proverbios 18:24, “jarhasti amigu ma enga sánderu uékpijka eska ermanu ma”. Jesusi kánikua jukaparharaaspti. Ju je miáni eska jiánisï no ma imeri ermanu jemba jakajkusïrenga imani (Juanu 7:3-5). Ka jarhaspti ma tiempu engaksï imeri familiarhu anapuecha eratsienga eska loku úkuarhispkia (Mar. 3:21). Peru xáni engaksï ménderuenipka ambakiti apostulicha. Ima chúri ante de uarhini, Jesusi uandaspti: “Chájtsï jindeska engajtsïni no méni jurajkuka engani ji tsʼéjkunhaka” (Luk. 22:28).

¹² Imeri apostulichaksï ménisï no sési pʼikuastaspti. Peru ima no sánderu imani ambe exesïrendi engaksï no sési uénga, sino eskaksï jakajkusïrenga imani (Mat. 26:40; Mar. 10:13, 14; Juanu 6:66-69). Últimu chúri enga imecha jingoni japka engaksï no méni jurajkupka, arhiaspti: “Jíksïni arhiska eskajtsï jindeska juchiti amiguecha jimbokaksïni ji eianguska iámindu ambe engani kurhajchaka juchiti Tátini” (Juanu 15:15). Meru ísïspti eskaksï imeri amiguecha kánikua uinhaperantaspka. Kánikuaksï sési pʼikuastaspti na engaksï xáni jarhuatapka aianhpikuarhu (Luk. 10:17, 21).

¹³ Aparte de apostulichani, Jesusi jatsiaspti máteru amiguechani ka amigechani engaksï  jarhuatapka imani ambe jingoni enga marhuakupiringa Jesusini jiáni enga aianhpini jámani japka. Máruksï pʼimarhispti imecheri kʼumanchikuarhu para jatsini lugari ma para tʼireni (Luk. 10:38-42; Juanu 12:1, 2). Máruksï imani jingoni biajarispti ka úrasptiksï imecheri jatsikuarhikua ambe paraksï ima íntskuni (Luk. 8:3). ¿Andisï Jesusi xáni ambakiti amiguechani jatsiapi? Jimboka ima mismu ambakiti amigu máespka. Jarhuataaspti ka no kurhakuaspti imani ambe engaksï no úpiringa úni. Nájkiruka ima perfektuepka ka imechaksï nómbe, kánikua jaiapanhikuantaspti engaksï jarhuatapka. Ka seguru eskaksï jarhuatapka Jesusini seguirini jarhani pínandikua jatsini.

14, 15. a) ¿Nénachi uá ambakiti amiguechani jatsiani? b) ¿Nénajtsïni jarhuataa?

¹⁴ Ambakiti amiguechajtsïni jarhuataati no méni jurajkuni Jeobani. Ka ambe engajtsïni jarhuataaka ambakiti amiguechani jatsiani, jindesti eskachi jucha ambakiti amigu máeuaka (Mat. 7:12). Por ejemplu, Bibliajtsïni arhisïndi eskachi jarhuatauaka máteruechani nani engachi jamberi jucha uáka ka sánderu imechani engaksï uétarhinchajka (Efes. 4:28). Ju je eratsiani kúnguarhikuarhu anapu erachichani engaksï uétarhinchajka eskachi jarhuatauaka. ¿Jarhaski aianhpiri ma enga no újka uérani imeri kʼumanchikuarhu? Jamberichi uáka nirani piákuni ambe ma. Ochi jamberi úaka tʼirekua ambe piákuni familiani ma enga no káni jatsikuarhika tumina. Engachi jorhenaka úrani pájinani jw.org^® ka aplikasionini JW Library^®, uákachi jarhuataani máru kúnguarhikuarhu anapu erachichani paraksï úrani ambakiti ambe enga jimini arhijka. Engachi jarhuataaska máteruechani, jamberi sánderu segurueuati eskachi sési pʼikuarheraaka (Uku. 20:35).

 ¹⁵ Amiguechani engachi jatsiauaka, juchantsïni jingonksï jauati engachi uandanhiata ma jatsiaka ka jarhuatatijtsïni pínandikua jatsini. Májkueni eska Eliu na kurhajchapka Jobuni enga ima aiangukuarhini japka ambe ma, juchari amiguechajtsïni májkueni kurhajchaati engachi aiangukuarhiani jauaka juchari uandanhiatechani (Job 32:4). Ísïti, nochi erokuarhiaka eskaksï imecha erakuaka ambe ma juchantsïni jimbo, peruchi mímixetiuaka engachi ísï úska ambe engajtsïni arhiaka Biblia jingoni (Prov. 15:22). Ka engachi uétarhinchani jauaka ambe, ju je ísïni eska rei Dabidi, enga no jurajkupka eska kʼéramakuarhini ojkutapiringa para jiókuarhini amigu jembecheri jarhuajperata (2 Sam. 17:27-29). Seguru eskaksï i járhati amiguecha Jeobaeri intsïmperakueska (Sant. 1:17).

16. Eska na arhijka Filipusʌ 4:6, 7, ¿nénachi uá pínandikua jatsini ka andi?

¹⁶ (Arhinta je Filipusʌ 4:6, 7). ¿Andijtsïnisï arhijki Jeoba eskachi uáka jatsini pínandikua “Kristu Jesusini jimbo”? Jimboka parachi jatsini pínandikua para méntkisï mintsitarhu ka eratsikuarhu, kánikua jukaparhakueska eskachi kurhanguaka ambe enga Jesusi uáka para niárani kumplirikuarhini Jeobaeri eratsikua ka mintsikani imani. Por ejemplu, mítini eskajtsïni puachiantasïnga iámindu juchari pekaduechani Jesusiri uarhikua jimbo, kánikuajtsïni sési pʼikuastantasïndi (1 Juanu 2:12). Máteru ambe, ambakiti ambechi erokuarhixaka mítiparini eska Jesusi jindeska Rei Tata Diosïri Reinurhu ka eska kenditaaka iámindu kómu nitamakua ambe enga Satanasiri ka imeri parhakpiniri kulpa jimbo jaka (Is. 65:17; 1 Juanu 3:8; Jaŋ. 21:3, 4). Ka ístu, balorichi jukasïnga mítiparini eskajtsïni Jesusi jarhuataxaka ini últimu jurhiatikuecha jimbo úni ánchikuarhitani engajtsïni ima juramuchika (Mat. 28:19, 20). ¿A no eska kánikua jukaparakueska sési pʼikuarherani, ambakiti ambe erokuarhini ka balori jukani parachi pʼínadikua jatsini?

17. a) ¿Néna uá kristianu ma pínandikua jatsini? b) Eska na arhijka Juanu 16:33, ¿ambechi niáraa úni?

¹⁷ Ísï jimbo, ¿nénachi uá no uandanhiata ambe eratsini jarhani engachi no sési nitamakuarhini jauaka? Májkueni úparini eska Jesusi. Uénani jámani, kómarhini méntkisï. Tsimani úni jámani, ju je kurhajchani Jeobani ka tsípikua jingoni aianhpini nájkirukachi kánikua úkua jukanchaaka. Ka últimu, ju je jurajkuni eskajtsïni juchari amiguecha jarhuataaka. Jiájkani, Tata Diosïri pínandikua kuájchakuati juchari eratsikuani ka mintsitani. Ka májkueni eska Jesusi, uákachi orhepani uérakuni náki uéjki tsʼéjkukuani ma (arhinta je Juanu 16:33).