SEMANA 14
¿Sésichi úxaki juchari ánchikuarhitani aianhpikuarhu?
“Eianhpi Diosïri ambakiti eianhperakuani ka ú sési indeni ambe engari enkargarinhaka para úni” (2 TIM. 4:5).
PIREKUA 57 Iáminduechanchi predikarikuasïnga
AMBE ENGACHI EXEAKA *
Enga Jesusi tsíntapkia, tanguarhintaspti imeri chuxapaticha jingoni ka juramukuaspti eskaksï nipiringa ka úani disipuluechani. (Exe je párrafu 1).
1. ¿Ambechi uékasïni úni iámindu ambakiti Tata Diosïri marhuaricha ka andi? (Exe je dibujuni enga uénakuarhu jaka).
TATA JESUKRISTU arini ambe juramukuaspti imeri chúxapatichani: “Ni je jorhendaani iámindu kʼuiripuechani” (Mat. 28:19). Iámindu ambakiti Tata Diosïri marhuarichachi uékasïnga jorhenguarhini sési úni ini ánchikuarhitani engachi intsïnhaka (2 Tim. 4:5). Ísïsti, i ánchikuarhita jindesti enga sánderu jukaparhakueka, ambakitini ka enga meru uétarhini jaka para úni. Peru jamberichi no uáka xáni tiempu úrani aianhpikuarhu ísï eskachi na uékapiringa.
2. ¿Ambe úpirini úni eskachi úkua jukanchaaka jánguarhintani aianhpikuarhu?
2 Ístu engachi máteru ambe úni jámajka enga jukaparhakueka, kánikuachi tiempu úrasïnga ka uinhapikua. Jamberichi jatsijka para kánikua ánchikuarhini parachi úni kéndani juchari familiani. O ístuchi jatsijka para orhepani uérani pʼamenchakua ambe jimbo, depresioni jimbo, engachi jatirijkia o engachi jatsijka para familiarhu anapuechani jarhuataani. ¿Nénachi uá orhepani uérani ini ambe jingoni ka ístu jánguarhintani aianhpikuarhu?
3. ¿Ambeksï arhikuekasïni Jesusiri uandakuecha engaksï Mateu 13:23 jimbo jaka?
3 Nochi jatsiska para no sési pʼikuarherani engachi no újka xáni tiempu úrani eskachi xáni uékapiringa para marhuakuni Jeobani. Jesusi mítispti eskachi no iáminduecha úpiringa májkueni xáni ánchikuarhini Reinueri ambe jimbo eska máteruecha (arhinta je Mateu 13:23). Jeoba kánikua jukaparharasïndi ambe engachi xáni újka para marhuakuni, peru eskachi kʼóru mintsita jingoni uáka (Ebr. 6:10-12). Ka ístuchi jamberi úpiringa eratsini eskachi no uáka sánderu ambe úni, imani ambe jimbo engachi nitamakuarhini jaka. Ini artikulu jimbochi exeaka ambechi uá úni parachi aianhpikuani orheta pérani, para arisku sáni irekani ka parachi sánderu sési aianhpini ka jorhentpini. Peru antesi, ju je exeni ambe arhikuekasïni jánguarhintani sési úni juchari ánchikuarhitani aianhpikuarhu.
4. ¿Ambe arhikuekasïni jánguarhintani sési úni juchari ánchikuarhitani aianhpikuarhu?
4 Jánguarhintani sési úni juchari ánchikuarhitani aianhpikuarhu, arhikuekasïndi nirani aianhpini na engachi xáni uáka ka ístu jorhentpini. Peru, para Jeoba, no solu jukaparhakuesti na engachi xáni tiempu úrajka para imani marhuakuni, sino ístu andichisï ísï újki. Engachi ísï úska jimbokachi xénchasïnga Jeobani ka kʼuiripuni, iámindu mintsita jingonchi ánchikuarhiaka aianhpikuarhu * (Mar. 12:30, 31; Kol. 3:23). Ka para ísï úni, uétarhisïndi eskachi jánguarhintaaka na engachi xáni uáka para sánderu sési aianhpini. Engachi exejka eska aianhpikua kʼéri kóntperata máeska, jánguarhintaakachi sánderu uánikua kʼuiripuni aianguni ambakiti aianhperakuani.
5, 6. ¿Néna uá kʼuiripu ma orheta pérani aianhpikuani nájkiruka no káni tiempu jatsijka? Jatsiku je ejemplu ma.
5 Ju je eranhaskani tumbini ma enga kánikua tsitijka guitarra kústani ka méntkisï enga újka, kústasïndi. Peru, para úni mantenerikuarhini, uénasïndi tiendarhu ma ánchikuarhini lunisï uératini asta biernisï jamberi. Nájkiruka sánderu ánchikuarhitarhu jarhajka, ima músikeri ambe eratsini jarhasïndi. Uékasïndi sánderu sési jorhenguarhini ka niárani ambakiti kústati máeni. Ka para ísï úni, jánguarhintasïndi jorhenguarhini nájkiruka ma ratitu tiempu jatsijka.
6 Sáno májkuenisti, juchachi no úsïnga xáni tiempu úrani aianhpikuarhu na engachi xáni uékapiringa. Ka indeni ambechisï meru tsitijka úni. Jánguarhintasïngachi sánderu sési aianhpini Reinueri ambe parachi mintsitarhu niárakuni kʼuiripuni. Peru komu uánikua ambechi jatsijka para úni, jamberichi kurhamarhikuarhijka nénachi uá orheta pérani aianhpikuani.
AMBECHI UÁ ÚNI PARACHI ORHETA PÉRANI AIANHPIKUANI
7, 8. ¿Nénachi uá májkueni exeni aianhpikuani eska Jesusi?
7 Na enga exenga Jesusi aianhpikuani, ambakiti ejemplu máesti para jucha. Ambe enga sánderu jukaparhakuepka para ima, jindespti Tata Diosïri Reinueri ambe aianhpini (Juanu 4:34, 35). Kánikua xanharasïrendi para uánikua kʼuiripuni aianguni na enga xáni úpiringa. Méntkisï jánguarhintasïrendi kʼuiripu jingoni uandontskuarhini imecheri kʼumanchikuecharhu ka jimesïsï enga uánikua kʼuiripu jarhenga. Méntkisï orheta péraspti aianhpikuani.
8 Uákachi májkueni úni eska Jesusi parachi Reinueri ambe aianhpini na uéjki jatini ka nani uéjkini. Listuchi jarhaska para jurajkuni imani ambe engachi tsitijka parachi úni jarhuajpini ini ánchikuarhitarhu (Mar. 6:31-34; 1 Ped. 2:21). Máru kúnguarhikuarhu anapuechaksï uáti prekursori espesialini, regularini o auksiliarini. Máteruksï jorhenguarhisti máteru idioma, oksï máteru nani ísï nirani aianhpini nani enga uétarhini jaka. Ka nochi mirikurhiasïnga aianhpirichani engaksï kánikua ánchikuarhijka para jorhentpini ka ístu engaksï jánguarhintajka xáni eskaksï xáni uáka. Ia sea engachi kánikua tiempu úrajka aianhpikuarhu o sánititu, Jeobajtsïni no kurhachisïndi sánderu eskachi xáni uáka úni. Ima uékasïndi eskachi tsípikua jingoni marhuakuaka engachi niuaka aianhpini “ambakiti aianhperakua enga xáni kʼéri ambeka Tata Diosïri enga felisika” (1 Tim. 1:11, TNM; Deut. 30:11).
9. a) Nájkiruka Pablu jatsipka para ánchikuarhini, ¿néna orheta péraspi aianhpikuani? b) ¿Ambe arhisïni Ukuecha 28:16, 30, 31, na enga exenga Pablu aianhpikuani?
9 Apostuli Pablu jindesti máteru ambakiti ejemplu. Enga Korintu japka jiáni enga imeri segundu biajini úni jámaenga para aianhpini, jatsispti para ma tiempu ánchikuarhini, úpariani kʼumanchikuechani sïkuiriri jimboka no kánikua tumina jatsispka. Peru ima no ísï exesïrendi eska inde ambe sánderu jukaparhakuespka. Ánchikuarhispti para mantenerikuarhini ka paraksï no Korintu anapuecha jatsini para meianhpikuni ambe enga ima uétarhinchapiringa ka ísï úni aianguani jimbanhi aianhperakuani (2 Kor. 11:7). Nájkiruka jatsipka para ánchikuarhini, seguirispti jukaparharani aianhpikuani ka mándani sábadu aianhpisïrendi. Enga nóteru xáni no sési nitamakuarhini japkia, úraspti sánderu tiempu para nirani aianhpini. “Pablu mintsita jingoni aianguaxapti Israeli anapuechani eska Jesusi jindespka Diosïri Mindakata” (Uku. 18:3-5; 2 Kor. 11:9). Ísï tátsekua enga tsimani uéxurhini japka ónhakata kʼumanchikua ma jimbo jini Roma, aianguasïrendi Tata Diosïri ambe imechani engaksï niraenga pʼorhembini ka kartechani uásïrendi (arhinta je Ukuecha 28:16, 30, 31). Eratsitixaptia eska no ma ambe ójkutapiringa para Tata Diosïni marhuakuni. Karaspti: “Jimboka ini sésikuani jimbo engaksï intsïnhaka para Diosïni marhuakuni [...], jucha no méni kuatantasïnga ísï úni” (2 Kor. 4:1). Májkueni eska Pablu, uákachi orheta pérani o sánderu jukaparharani aianhpini Reinueri ambe, nájkirukachi jatsiaka para ánchikuarhini.
Uánikua ambe jarhasti engajtsïni jarhuataaka sési úni juchari ánchikuarhitani aianhpikuarhu. (Exe je párrafu 10 ka 11).
10, 11. ¿Nénachi uá sési úni juchari ánchikuarhitani aianhpikuarhu nájkirukachi pʼamenchakua ambe kámaaka?
10 ¿Ambechi uá úni engachi jatirikia ochi pʼamenchakua ma kámani ka nochi úni nirani kʼumanchikuecha jimbo aianhpini ísï eskachi na uékapiringa? Enga ísïka, jarhasti máteru ambe engachi uáka úni para aianhpini. Primeru siglu anapu kristianuechaksï predikarisïrendi nani uéjkisï enga japiringa kʼuiripu. Méntkisïksï jánguarhintasïrendi aianguni kʼuiripuni jurhimbikueri ambe: kʼumanchikuecha jimbo, nani enga uáni kʼuiripu jarhenga ka nani uéjkisï engaksï jámani jarhenga (Uku. 17:17; 20:20). Ka engachi no újka iauani xanharani, jiájkanchi úpiringa jimesïsï uaxakani enga uáni kʼuiripu jámajka ka uandontskuarhini imecha jingoni. Ístuchi úpiringa telefonu jimbo predikarini, karta jimbo o nani uéjki engachi jámani jauaka. Uánikua aianhpiricha engaksï no újka predikarini kʼumanchikuecha jimbo, jimbokaksï kʼéri pʼamenchakua ma kámasïnga o máteru problema jimbo, sésiksï pʼikuarherasïndi ka agustu engaksï újka máteru ambe úni para predikarini.
11 Ísï jimbo, uákachi jánguarhintani sési úni juchari ánchikuarhitani aianhpikuarhu, nájkirukachi pʼamenchakua ambe kámaaka. Ju je ménderu exeni apostuli Pablueri ejemplu. Ima uandaspti: “Parani úni iámindu ambe, uinhapikua jatsiska imani jimbo engarini uinhaperantajka” (Filip. 4:13, TNM). Pablu uétarhinchaspti indeni uinhapikuani enga pʼamenchapka imeri biajiru ma. Arhiaspti Galasia anapuechani: “Jimbokajtsï cha mítiska na engani xáni malu japka jimajkani engaksïni uénaka aianguni ambakiti eianhperakuani” (Gal. 4:13). Májkueni, engachi pʼamenchani jauaka jamberichi uáka aianguani Reinueri ambe doktorichani, enfermeruechani ka máteruechani engajtsïni atenderijka. Uánikua i kʼuiripuechaksï ánchikuarhini jarhasïndi engachi nirajka imechio predikarikuani.
NÉNACHI UÁ ARISKU SÁNI IREKANI
12. ¿Ambe arhikuekasïni eska juchari éskua ambakitiaka?
12 Jesusi uandaspti: “Kuerpurhu anapu erajkutarakua jindesti éskua. Jimajkani enga chíti éskua ambakitiaka, iámindu chíti kuerpu eramarhandikuarhu jauati” (Mat. 6:22). ¿Ambeksï arhikuekasïni i uandakuecha? Eskachi jatsiska para arisku sáni irekani, i ambe arhikuekasïndi eskachi jatsiska para orheta pérani imani ambe engachi eratsitini jaka úni ka eskajtsïni no ma ambe ójkutaaka. Jesusi ísï úspti enga orheta pérapka aianhpikuani ka arhistakuaspti imeri chúxapatichani paraksï orheta marhuakuni Jeobani ka aianhpini Reinueri ambe. Ka májkuenchi úsïnga eska Jesusi engachi xarhatajka eska aianhpikua sánderu jukaparhakueska juchari irekuarhu engachi orheta jirinhajka “Diosïri juramukueri ambe ka para jámani eska ima na jeiapanhintajka” (Mat. 6:33).
13. ¿Ambejtsïni uá jarhuatani parachi sési úni juchari ánchikuarhitani aianhpikuarhu?
13 Ma ambe engachi uáka úni para sési úni juchari ánchikuarhitani aianhpikuarhu, jindesti arisku sáni irekani para sánderu tiempu arhutani para jarhuataani máteruechani mítini ka xénchani Jeobani. * Por ejemplu, ¿uáchi mójtakuni máru ambe jima engachi ánchikuarhijka ka ísï úni sánderu tiempu úrani aianhpikuarhu semana jimbo? ¿Uáchi menusi tiempu úrani tsípikuarhita ambe jimbo engajtsïni jamberi kánikua tiempu euajka?
14. ¿Ambe úspi temungurhiri ma para úni sánderu arhutani tiempu ka jarhuajpini aianhpikuarhu?
14 Ju je exeni ambe enga úpka orhejtsïkuti ma enga arhinhajka Eliasi ka imeri témba. Eliasi uandantasïndi: “Jiánisïchi no úsïrenga prekursori úkuarhini, peru jatsispkachi para úni ambe ma. Ísï jimbo, parachi úni sánderu aianhpini, úspkachi máru ambe enga ísï xarharenga enajki no kʼéri ambepi. Por ejemplu, nóteruchi xáni úrasïrenguia tumina; menusi tiempu úrani para tsípikuarhini, jimbokachi kuenta íntskukuarhispka eskajtsïni kánikua tiempu euasïrenga ka arhijpespkachi eskajtsïni mójtakuchiapiringa orechani ánchikuarhitarhu parachi úni sánderu predikarini. Ini ambe jimbo, úspkachi uérani aianhpini inchatiruechani, sánderuchi uánikua estudiu bíblikuechani jatsiaspkia ka astachi tsimani xanhari uérasïrenga aianhpini mándani mesi entre semana jimbo. Kánikuachi tsípixapka”.
NÉNACHI UÁ SÁNDERU SÉSI JORHENTPINI
Úni ambe engachi jorhenguarhijka tánguarhikuarhu enga semana jimbo jarhajka, jarhuataatijtsïni parachi seguirini jarhani jorhenguarhini sánderu sési aianhpini. (Exe je párrafu 15 ka 16). *
15, 16. Miáparini ambe enga arhijka 1 Timoteo 4:13, 15, ¿nénachi uá sánderu sési aianhpini ka jorhentpini? (Ístu exe je rekuadruni “ Metecha engajtsïni jarhuataaka sánderu sési úni juchari ánchikuarhitani aianhpikuarhu”).
15 Máteru ambe engachi uáka úni para sánderu sési úni juchari ánchikuarhitani aianhpikuarhu, jindesti sánderu jorhenguarhini para sési jorhentpini. Máru engaksï karrera ma estudiarika, arhinhasïndiksï para seguirini jarhani jorhenguarhini paraksï sánderu ambe mítini. Májkuenisti, juchajtuchi seguirini jauaka jorhenguarhini para sánderu sési arhistatspeni (Prov. 1:5; arhinta je 1 Timoteo 4:13, 15).
16 ¿Nénachi uá ísï úni? Ju je jingontku kurhaani ambe engachi jorhendanhajka tánguarhikuarhu Kristianuecheri Irekua ka Aianhpikua enga semana jimbo jarhajka. Indeni parti jimbochi ambakiti ambe jorhendanhasïnga enga újka eskachi sánhani arhiaka sánderu sési jorhentpini. Por ejemplu, erachi enga orhejtsïkujka tánguarhikuani ka konseju íntsaani imechani engaksï parti ma nitamataraka, ju je jingontku kurhaani imani konsejuni engajtsïni jarhuataaka sánderu sési aianhpini. Jiájkani, ju je úrani imani konsejuni engachi ménderu uandontskuarhiaka nema jingoni jurhimbikueri ambe. Máteru ambe engachi uáka úni, jindesti arhini erachini enga orhejtsïkujka juchari grupuni eskajtsïni jarhuataaka o eska niuaka juchantsïni jingoni aianhpini. Ístuchi uáka jarhuajperata kurhakuani imechani engaksï sánderu ióni páni jakaia aianhpini komu prekursorini ma o sirkuitueri orhejtsïkutini. Iámindu i ambejtsïni jarhuataati sánderu sési úrani imani ambe enga erramientecharhu jaka para jorhentpini. Ísïchi sánderu tsípikua jingoni niuaka aianhpini ka jorhentpini.
17. ¿Ambechi niárasïni pʼikuarherani engachi jánguarhintajka sési úni juchari ánchikuarhitani aianhpikuarhu?
17 Kʼéri kóntperata máesti engajtsïni Jeoba jurajkujka parachi jindeni imeri “jarhuajpiricha” (1 Kor. 3:9). Engachi asegurarikuarhijka imani amberi “enga sánderu ámbakitika [o jukaparhakueni]” ka orhetachi pérani aianhpikuani, tsípikua jingonchi marhuakusïnga Jeobani (Filip. 1:10; Sal. 100:2). Tata Diosïri marhuarichachi seguru jarhaska eskajtsïni ima íntskuaka uinhapikua engachi uétarhinchajka parachi sési úni juchari ánchikuarhitani aianhpikuarhu, no arhiparini náki uéjkichi problema ma jatsini o máteru ambe (2 Kor. 4:1, 7; 6:4). Ia sea engachi újka kánikua tiempu úrani para aianhpini o sánititu, marhuakuni Tata Diosïni iámindu mintsita jingoni, úsïndi eskachi sési pʼikuarheraaka (Gal. 6:4). Engachi jánguarhintajka sési úni juchari ánchikuarhitani aianhpikuarhu, xarhatasïngachi eskachi xénchasïnga Jeobani ka kʼuiripuni. Ka Biblia arini ambe uandasïndi eska niáraaka úkuarhini: “Jimboka engari ísï úska, tʼu mismu pʼímutantskateaka, ka ístu imecha engaksïni kurhajchaaka” (1 Tim. 4:16).
PIREKUA 58 Jirinhauaka imechani engaksï uéjka pínandikua jatsini
^ párr. 5 Jesusijtsïni juramuchisti aianhpini ambakiti aianhperakuani Reinueri ambe ka úani chúxapatichani. Ini artikulu jimbochi jorhenguarhiaka nénachi uá jánguarhintani aianhpini, asta engachi úkua jukanchaaka. Ístuchi jorhenguarhiaka sánderu sési jorhentpini ka néna sánderu tsípikua jingoni aianhpini.
^ párr. 4 JUKAPARHAKUA AMBE: Marhuakuni Jeobani, arini ambe arhikuekasïndi komu nirani aianhpini ka jorhentpini, uáni o kuidariuani kʼumanchikuechani engachi úraajka para Tata Diosïni kʼéri ambe arhini ka para erachichani jarhuataani enga desastre naturali ambe úkuarhijka (Uku. 11: 29; 2 Kor. 5:18, 19).
^ párr. 13 Arhinta je siete ambe engachi uáka úni rekuadrurhu “Cómo llevar una vida más sencilla”, rebisteri La Atalaya de juliu de 2016, pájina 10.
^ párr. 62 AMBE ENGA XARHATAJKA IMAJENI. Tánguarhikuarhu enga semana jimbo jarhajka, pirenchi ma xarhataxati néna pʼorhembintani kʼuiripuni. Tátsekua, foieturhu Jorhentpini, karaasïndi máru konsejuechani enga erachi íntspeajka enga orhejtsïkujka tánguarhikuani. Ka fin de semana jimbo, úrasïndi aianhpikuarhu ambe enga jorhenguarhika.
