SEMANA 32
Eskachi sánderu ka sánderu uékperaaka
“I jindesti engani ji kómarhijka Diosïni, eskajtsï sánderu ka sánderu uékperaaka” (FILIP. 1:9).
PIREKUA 106 Ju je kánikua uékpini
AMBE ENGACHI EXEAKA *
1. ¿Néchaksï jarhuajpespi para Filipusi kúnguarhikua ma jarhani?
ENGA Pablu, Silasi, Lukasï, ka Timoteo Filipusi niárapka enga Roma ísï japka, exentasptiksï uánikua kʼuiripuni enga uékenga jorhenguarhini Reinueri ambe. I tʼámu ambakiti aianhpirichaksï jarhuajpespti para kúnguarhikua ma jarhani indeni iretarhu. Tánguarhintasptiksï iámindu kʼuiripuecha engaksï apenasi itsï atakuarhipka, jamberi pirenchi Lidiaeri kʼumanchikuarhu enga sési kámpienga (Uku. 16:40).
2. ¿Ambeksï nitamakuarhispi ísï no ióni jimbo imani kúnguarhikuarhu anapuecha?
2 Imani kúnguarhikuarhu anapuecha enga apenasi úkuarhipka, kánikuaksï no sési ambe nitamakuarhispti. Noambakiti úspti eskaksï kʼuiripuecha kurhunhiapiringa ka nóksï jurajkuani eskaksï ima tʼámu ambakiti kristianuecha aianhpepiringa Tata Diosïri ambe. Juramutichaksï jupikaspti Pabluni ka Silasini, pirimu jimboksï kʼuikirhiaspti ka ónhaanksï. Pauandikuaksï petantaaspti. ¿Ambeksï úspi imecha engaksï uéntapkia? Pʼorhempiasptiksï imechani engaksï apenasi itsï atakuarhipka ka uinhaperantaasptiksï. Tátsekua, Pablu, Silasi ka Timoteo uéakuntasptiksï iretarhu ka Lukasï jima pakaraspti. ¿Ambeksï úspi jimbanhi erachicha? Seguirisptiksï marhuakuni Jeobani espiritu santueri jarhuajperata jimbo (Filip. 2:12). Pablu kánikua sési pʼikuarheraspti imecha jimbo.
3. Eska na arhijka Filipusʌ 1:9-11, ¿Pablu ambe jimbo kómarhisïreni Jeobani?
3 Diesi uéxurhinisï tátsekua, Pablu karta ma karakuaspti. Engachi arhintajka exesïngachi na enga xáni xénchauenga Pablu erachichani. Arhiaspti eska kánikua jirinhantaasïrenga ka eska ísï uékaasïrenga iáminduechani eska Jesukristu na uékpijka (Filip. 1:8). Ístu arhiaspti eska kómarhijpikuasïrenga. Kómarhisïrendi Jeobani eskaksï sánderu uékperapiringa, jánguarhintani imani ambe úni enga sánderu jukaparhakueka, eskaksï pímbinhasï japiringa, no úni imani ambe engaksï jimbo máteruecha no sési ambe niátapiringa ka eskaksï seguirini japiringa ambakiti ambe úni. Ísïsti, eratsisïngachi eskajtsïni ístu marhuachiaka juchantsïni ima ambe enga Pablu uandapka (arhinta je Filipusʌ 1:9-11). Ini artikulu jimbochi exeaka imani ambe enga ima uandapka ka nénachi uá ísï úni.
ESKACHI SÁNDERU KA SÁNDERU UÉKPERAAKA
4. a) Eska na arhijka 1 Juanu 4:9, 10, ¿nénajtsïni xarhatachiski Jeoba eskajtsïni xénchasïnga? b) ¿Na xánchi jatsiski para xénchani Tata Diosïni?
4 Jeobajtsïni xarhatachesti na engajtsïni xáni xénchajka enga axaka imeri Uájpani ixú Echerirhu para uarhini juchari pekaduecha jimbo (arhinta je 1 Juanu 4:9, 10). I jásï uékperakua úsïndi eskachi juchajtu xénchaaka Jeobani (Rom. 5:8). ¿Na xánchi jatsiski para xénchani Tata Diosïni? Jesusi mókuntaspti ini kurhamarhikuani enga arhipka fariseuni ma: “Uékaakari chíti Tata Diosïni méntku iámindu chíti mintsita jingoni, ka iámindu alma jingoni, ka iámindu chíti eratsikua jingoni” (Mat. 22:36, 37). Uékasïngachi iámindu juchari mintsita jingoni xénchani. Eskachi pauani pauani sánderu xénchaaka. Pablu arhiaspti Filipusi anapuechani eska imecheri uékperakua sánderu ka sánderuepiringa. ¿Ambechi uá úni parachi sánderu xénchani Tata Diosïni?
5. ¿Ambechi jatsiski para úni parachi sánderu xénchani Tata Diosïni?
5 Parachi xénchani Jeobani, jatsiskachi para míteni. Biblia arhisïndi: “Ima enga no uékpijka, no mítisti Diosïni jimboka Diosï jindeska uékperakua” (1 Juanu 4:8). Apostuli Pablu uandaspti eskachi sánderu xénchasïnga Jeobani engachi mítejka ambe “enga ísïka” Jeobaeri ambe ka sésichi kurhanguni na enga exejka ima ambe ma (Filip. 1:9). Engachi uénapka Bibliani estudiarini, jorhenguarhispkachi máru ambe Tata Diosïri ka inde ambe úspti eskachi xénchapiringa imani. Peru sánhani arhispkachi sánderu ka sánderu xénchani engachi sánderu jorhenguarhipka imeri ambe ka na enga jásï Tata Diosï máeka. Ísïsti, kánikua jukaparhakuesti para jucha seguirini jorhenguarhini Tata Diosïri Karakateri ambe ka eratsintani ambe engachi arhintajka (Filip. 2:16).
6. Eska na arhijka 1 Juanu 4:11, 20, 21, ¿ístuchi néchani jatsiski para uékaani?
6 Na engajtsïni xáni xénchajka Tata Diosï, úsïndi eskachi xénchauaka erachichani (arhinta je 1 Juanu 4:11, 20, 21). Jamberichi eratsijka eskachi no úkua jukanchaaka uékaani erachichani jimbokachi Jeobanisï marhuakuni jaka ka jánguarhintasïngachi ísïni eska ima. Ístu, májkuenchi úsïnga eska Jesusi, engajtsïni xáni uékani íntspika imeri tsípikuani juchantsïni jimbo. Peruchi ménisï kánikua úkua jukanchasïnga uékperani máteru ka máteruni jingoni. Ju je exeni ambe enga úkuarhipka Filipusi anapu kúnguarhikuarhu.
7. ¿Ambechi jorhenguarhisïni Pablueri konsejueri enga Ebodiani ka Síntikini íntsaapka?
7 Ebodia ka Síntiki tsimani pirenchichesptiksï engaksï májku kʼéri marhuapka apostuli Pablu jingoni. Peru jamberiksï arhijperapti ambe ma, jimboksïsï nóteru sési pájperendia. Pablu nombri jimbo arhiasïndi imeri kartarhu ka ambakiti konseju ma íntsaasïndi. Arhiaspti eskaksï májku ambe eratsipiringa (Filip. 4:2, 3). Ístu, apostuli exespti eska uétarhisïrenga arini ambe arhiani iámindu kúnguarhikuarhu anapuechani: “Ú je iámindu ambe nómbe uandauandamiparini ka níjtu arhijperaparini” (Filip. 2:14). Ísïsti, Pablueri konsejuechaksï jarhuataapti paraksï sánderu uékperani ima tsimani pirenchicha ka ístu iámindu kúnguarhikuarhu anapuecha.
¿Andichisï jatsi para ambakiti ambe exeni máteruecheri? (Exe je párrafu 8). *
8. ¿Ambe jimbochi úpirini úkua jukachani xénchaani erachichani ka ambejtsïni jarhuataa orhepani uérani?
8 Ísï eska Ebodia ka Síntiki na nitamakuarhipka, engachi sánderu imani ambe exeska ambe engaksï no sési újka erachicha, sánderuchi úkua jukanchaaka xénchaani. Iáminduechachi pauani pauani no sési úsïnga ambe ma. Engachi imani ambejku exeni jámaska ambe engaksï no sési újka máteruecha, tátsekuachi nóteru xénchauakia. Ju je úrani ejemplu ma. Erachi ma mirikurhisïndi jarhuatantsïni aseu úni Kʼumanchikua Reinuerirhu, ísï jimbo, ikiakusïngachi. Peru engachi uénaska imani ambe miántani ambe enga no sési úka, sánderuchi ikiakuaka ka nóteruchi xáni xénchania. ¿Ini ambechi nitamakuarhixaki? Jiájkani, ju je miáni eska Jeoba exesïnga ambe engachi jucha no sési újka ka ístu imani ambe enga juchari erachi no sési újka, perujtsïni seguirixati xénchani iáminduechani. Ísï jimbo, ju je májkueni uékpini eska Jeoba ka imani ambe exeni ambe engaksï sési újka máteruecha. Engachi jánguarhintajka xénchaani erachichani, sánderuchi májku kʼéri jarhasïnga imecha jingoni (Filip. 2:1, 2).
AMBE ENGA SÁNDERU JUKAPARHAKUEKA
9. ¿Náki jindeski máru ambe enga jukaparhakueka enga Pablu uandapka imeri kartarhu enga Filipusi anapuechani karakuapka?
9 Espiritu santueri jarhuajperata jimbo arhiaspti Filipusi anapuechani ka iámindu kristianuechani paraksï “erakuni ambe enga sánderu ambakitika” o jukaparhakueni (Filip. 1:10). Máru ambe enga jukaparhakueka jindesti eska Tata Diosïri nombri pímbinhajkunhantaaka, eska kumplirikuarhiaka ambe enga ima uéjka ka eskaksï kúnguarhikuarhu anapuecha májku kʼéri jauaka ka pínandikua jingoni (Mat. 6:9, 10; Juanu 13:35). Engachi sánderu jukaparharajka ini ambe juchari irekuarhu, xarhatasïngachi eskachi xénchasïnga Jeobani.
10. ¿Ambechi uá úni parajtsïni Jeoba pímbinhasï exeni?
10 Pablu ístu uandaspti eskachi no uáka ambe ma engachi jimbo no jeiapanhinhantaaka. I ambe no arhikuekasïndi eskachi méntkisï sési uáka ambe ma. Nóchi uáka ísïni eska Jeoba enga no méni újka pekadu ambe. Perujtsïni Jeoba pímbinhasï exeati engachi jánguarhintaska sánderu ka sánderu uékpini ka imani ambe úni enga sánderu jukaparhakueka. Ma ambe engachi uáka úni para xarhatani uékperakua, jindesti no no sési ambe niátataraani máteruechani.
11. ¿Andichisï no jatsi para imani ambe úni engaksï jimbo máteruecha no sési ambe úpiringa?
11 Kánikua jukaparhakuesti ari konseju parachi no “tsimani mintsita jingoni jámani [o úni eskaksï máteruecha no sési ambe uáka, TNM]”. Ambe engachi jingoni tsipikuarhijka, na engachi xukuparhajka o asta juchari ánchikuarhita uáti eskaksï máteruecha no sési ambe uáka. Jamberichi no no sési ambe niátaaka, peru kánikua no sési japirindi eska imani ambe jimbo engachi erakuaka úni no sési pʼikuastapiringa nemani ka eska no sési ambe úpiringa. Jesusi uandaspti eska sánderu sési japiringa eskachi kʼéri tsakapu ma jójchakunhapiringa ka kʼéri japondarhuchi kʼuanimanhani enbesi dechi úni eska erachi o pirenchi ma nóteru marhuakupiringuia Jeobani (Mat. 18:6).
12. ¿Ambechi jorhenguarhisïni ambe engaksï nitamakuarhipka temungurhiri ma engaksï prekursorika?
12 Ju je exeni ambe engaksï úpka temungurhiri ma engaksï prekursorika paraksï no úni eskaksï máteruecha no sési ambe úpiringa. Imecheri kúnguarhikuarhu temungurhiri ma jarhaspti engaksï apenasi itsï atakuarhipka ka engaksï familiarhu ma tʼarhexepka engaksï no uénga uánikua ambe. I temungurhiri ísï eratsisïrendi eskaksï erachicha no jatsispka para sinerhu nirani ni pelikula ma exeni enga no no sési jaka. Engaksï mítipka eskaksï prekursoricha pelikula ma exespka, kánikuaksï no sési exespti indeni ambe. Ísï jimbo, prekursorichaksï eratsispti nóteru nirania sinerhu astaka ima temungurhirini engaksï apenasi itsï atakuarhipka sési jorhendapiringa imecheri konsiensiani paraksï míteni ambe sési jarhaski ka ambe nómbe (Ebr. 5:14). Indeni ambe úparini, xarhatasptiksï eskaksï no solu imani ambe jingoni xénchaasïrenga ambe engaksï uandenga sino ístu ambe engaksï uénga (Rom. 14:19-21; 1 Juanu 3:18).
13. ¿Nénachi úpirini nemani pakadu ambe úrani?
13 Ístuchi úpiringa nemani pekadu ambe úrani engachi afuersa uékapiringa eska uáka ambe ma. Ju je exeni néna úpirini inde ambe úkuarhini. Eranhaska je eska nema enga Bibliani jorhenguarhini jaka úsïnga ióni jimbo ka kánikua jánguarhintaparini jurajkuni kauikua ambe. Exesindi eska no jatsiska ni para sanititu arhani alkoli. No ióni jimbo kánikua mójtakurhisïndi ka itsï atakuarhini. Ma jurhiani, erachi ma imeo pʼímarhisïndi imani ka máteru erachichani. Erachi no no sési ambe eratsiparini arhisïndi: “Auari sáni kauikua, itsï atakuarhiskaria ka jatsiskari Jeobaeri espiritu. Miá eska Tata Diosïri espiritu úsïnga eskachi pʼíngukuarhiaka. Engari úska ísï úni, uákari sésku ísï arhani”. Úsïngachi eranhaskani ambe enga úkuarhipiringa enga ima erachi enga apenasi itsï atakuarhika kasu úkuska máteru erachini.
14. ¿Nénajtsïni jarhuatasïni tánguarhikuecha úni ambe enga Filipusʌ 1:10 arhijka?
14 Tánguarhikuechajtsïni mámaru ambe jimbo jarhuatasïndi úni ambe enga Filipusʌ 1:10 arhijka. Orheta, jimbokajtsïni miátantasïnga ambe enga exejka Jeoba eska sánderu jukaparhakueska. Tsimani úni jámani, jorhendasïndijtsïni néna úni imani ambe engachi arhistaminhajka ka ísïchi pímbinhasï jarhani. Ka tanimu úni jámani, úsïndi eskachi xarhataaka uékperakua ka ambakiti ambe úni (Ebr. 10:24, 25). Engajtsïni erachicha sánderu uinhaperantajka, sánderuchi xénchaasïnga imechani ka ístu Jeobani. Engachi iámu mintsita jingoni xénchaska Jeobani ka erachichani, jánguarhintaakachi xáni eskachi xáni uáka parachi no no sési ambe úrani nemani.
JU JE SEGUIRINI AMBAKITI AMBE ÚNI
15. ¿Ambe arhikuekasïni kánikua frutu jukani “enga jindeka ambarhati úkuecha”?
15 Pablu kómarhispti Jeobani eskaksï Filipusi anapuecha kánikua frutu jukapiringa “enga jindeka ambarhati úkuecha” (Filip. 1:11). Seguruchi jarhaska eskaksï ambarhati úkuecha ístu arhikuekasïrenga xénchani Jeobani ka imeri iretani. Ístu eskaksï aianguapiringa máteruechani eskaksï jakajkusïrenga Jesusini ka ambakiti ambe engaksï erokuarhini japka. Pablu uandaspti eskaksï ísïspka “komueska jóskuecha engaksï erajkutarpijka parhakpinirhu” (Filip. 2:15). Ambakiti ejemplu máesti, jimboka Jesusi uandaspka eskaksï imeri chúxapaticha jindespka “eramarhandikua parhakpini anapuecheri” (Mat. 5:14-16). Ístu Jesusi juramukuaspti imeri chúxapatichani paraksï jorhenguarheri úani ka arhiaspti eskaksï uandantapiringa imeri ambe “iapuru parhakpinirhu asta jima enga sánderu iauaniika” (Uku. 1:8; Mat. 28:18-20). Ambakiti ambechi úsïnga engachi kánikua ánchikuarhijka indeni ambe jimbo enga xáni jukaparhakueka.
Enga Pablu kʼumanchikua ma jimbo ónhakata japka jini Roma, Filipusi anapu kúnguarhikuani karakuspti kartani. Ka no jurajkuspti eskaksï kadenecha ójkutapiringa para no úni tsípikua jingoni aianguani Tata Diosïri ambe soldaduechani ka imechani engaksï nirenga pʼorhembini. (Exe je párrafu 16).
16. ¿Néna xarhatasïni Filipusʌ 1:12-14 eskachi uáka ísï meremerejkuni komu ima ambe enga erajkutarpijka nájkiruka kánikua úkua jukaaka? (Exe je dibujuni enga uénakuarhu jaka).
16 Ambe uéjkichi nitamakuarhini jarhani, uákachi meremerejkuni komu ima ambe enga erajkutarpijka. Ménisï ima ambe engajtsïni úpiringa ójkutani parachi predikarini, uátijtsïni jarhuatani parachi ísï úni. Apostuli Pablu indeni ambe nitamakuarhispti. Enga Filipusi anapu kúnguarhikuani karakupka kartani, kʼumanchikua ma jimbo ónhakata jarhaspti jini Roma. Peru no jurajkuspti eskaksï kadenecha ójkutapiringa para no úni tsípikua jingoni aianguani soldaduechani ka imechani engaksï nirenga pʼorhembini. Imeri ejemplu úspti eskaksï kristianuecha uinhapikuarhintapiringa paraksï uandantani Tata “Diosïri uandakuani nómbe chéparini” (arhinta je Filipusʌ 1:12-14; 4:22).
Ju je méntkisï jánguarhintani aianhpini na engachi xáni uáka. (Exe je párrafu 17). *
17. Uandanta je ambe engaksï újka máru erachicha paraksï seguirini aianhpini nájkiruka kánikua úkua jukaaka.
17 Uánikua erachichaksï úsïndi xarhatani eskaksï ísï balori jukaska eska Pablu. Imani paisicha jimboksï irekasti engaksï no újka predikarini kʼumanchikuecha jimbo ni xanharu jimbo, ísï jimbo, jirinhakuntasïndiksï paraksï úni aianhpini (Mat. 10:16-20). Paisi ma jimbo, sirkuitueri orhejtsïkuti ma arhiaspti aianhpirichani eskaksï aianhpepiringa nani engaksï úpiringa, komu eskuela, ánchikuarhitarhu, aianguani parienti jembechani, besinuechani o máteruechani engaksï mítiapka. Tsimani uéxurhini jimbo, sánderuksï uáni kúnguarhikuecha jarhasptia imani sirkuitu jimbo. Nájkirukachi jucha újka agustu aianhpini, ambakiti ambechi jorhenguarhisïnga i erachicheri, eskachi jatsiska para méntkisï jánguarhintani aianhpini na engachi xáni uáka mintsikaparini eskajtsïni Jeoba íntskuaka uinhapikua parachi úni orhepani uérakuni náki uéjki ójkutakuani (Filip. 2:13).
18. ¿Ambechi eratsitixaki úni?
18 Iásï sánderu eska no méni, ju je eratsitini jarhani úni ambe enga arhijka karta enga Pablu Filipusi anapuechani karakuapka. Ju je úni ambe enga sánderu jukaparhakueka, jánguarhintani pímbinhasï jarhani, no úni eskaksï máteruecha no sési ambe uáka ka ambakiti ambechi úni. Engachi ísï úska, sánderuchi uékpiaka, ka kʼéri ambechi arhiaka Jeobani, juchari Táti uékpitini.
PIREKUA 17 Uékasïnga
^ párr. 5 Ini jurhiatikuecha jimbo, jatsiskachi para sánderu uékaani erachichani ísï eska no méni. Karta enga apostuli Pablu Filipusi anapuechani karakuapka jarhuatasïndijtsïni exeni ambe engachi uáka úni parachi sánderu uékpini asta enga uandanhiata ambe jauaka.
^ párr. 54 AMBE ENGAKSÏ XARHATAJKA IMAJENICHA. Jiáni enga Kʼumanchikua Reinuerirhu aseu únhani jarhajka, Jose nóteru jarhuajpisïndia ka masi arhisïndi uandontskuarheni erachi ma jingoni ka imeri uájpa. I ambe kánikua ikiatasïndi Miguelini enga makina ma jingoni basura tántani jaka. Eratsisïndi eska Jose jarhuataani japiringa ka no uandontskuarheni jarhani. Peru tátsekua exesïndi Joseni enga uékperakua jingoni jarhuatani jaka pirenchini ma enga jatirikia. I ambe úsïndi eska Migueli miántaaka eska jatsiska para sánderu ambakiti ambe exeni Joseri.
^ párr. 58 AMBE ENGAKSÏ XARHATAJKA IMAJENICHA. Paisi ma jimbo engaksï Testiguecha no újka aianhpini, erachi ma exentasïndi kʼuiripuni ma enga míteka. Sïpatikuarku aiangusïndi Reinueri ambe. Tátsekua enga sáni mintsikuarhini jarhajka ánchikuarhitarhu, predikarikusïndi imeri kompanieruni.
