JAKAJKUKUA úsïndi eskachi uiuinhasï jauaka. Por ejemplu, nájkiruka Noambakiti no uéjka eskachi ambakiti pájperakua ma jatsiaka Jeoba jingoni, jakajkukua úsïndi eskachi patauaka “Noambakitiri lansechani engaksï chpiririka” (Efes. 6:16). Ístu jakajkukua úsïndi eskachi uáka orhepani uérakuani uandanhiatechani engaksï xáni kʼéjka komueska juátecha. Jesusi arhiaspti imeri chúxapatichani: “Engajtsï nomasi mintsikapiringa sikiera xáni eska xáni kʼénharhika ma semiia mostaseri, úpiringajtsï arhini ini juátani: ‘Késtaku ixú’, ka késtakupirindi” (Mat. 17:20). Jimboka jakajkukua úsïnga eskachi sánderu ambakiti pájperakua ma jatsiaka Jeoba jingoni, sésisti exeani arini kurhamarhikuechani: ¿Ambeski jakajkukua? ¿Na jásï ma mintsita jingonchi uétarhisïni xarhatani? ¿Nénachi uá para juchari jakajkukua sánderu kʼéni? Ka ¿nénchi jatsiski para jakajkuni? (Rom. 4:3).

Jakajkuni sánderu ambe arhikuekasïndi eska solu uandani eska ísïska ambe enga Biblia uandajka, jimboka jimini arhisïnga eska astaksï demoniuecha jakajkusïnga eska Tata Diosï jarhaska ka tsirintsirijkunksï (Sant. 2:19). Jiájkani, ¿ambeski jakajkukua?

Biblia arhisïndi eska jakajkukua tsimani ambe arhikuekasïnga. Orheta, arhisïndi eska jakajkukua o mintsikani jindeska “engachi jimbo seguru jatsijka indeni ambe engachi erokuarhini jarhajka” (Ebr. 11:1a). Engachi jakajkujka, seguruchi jarhaska eska ísïska iámindu ambe enga Jeoba uandajka ka eska ísï úkuarhiaka. Por ejemplu Tata Diosï arini ambe arhiaspti israelitechani: “Engajtsï cha úpiringa xerentani juchiti pakatperakuani engani úka para jurhiakua ka juchiti pakatperakuani para chúrikua, paraka no niaaraka erandini o chúrini ima jandora enga jindeka, solu ísï úpirindi xerekuarhintani juchiti pakatperakua engani juchiti jántspiri Dabidi jingoni úka” (Jer. 33:20, 21). ¿Ménisïchi eratsiski eska no andaraaka jurhiata o eska no inchajtsïkuaka para no jarhani jurhiakua ka chúrikua? Engachi no méni eratsijka eska Echeri nóteru seguiriuakia uantsïtani Jurhiatani, ¿jatsipirinchi para eratsini eska Kuerajpiri enga úka indeni ambe no kumpliriuaka ambe enga aiatspika? Nómbe (Is. 55:10, 11; Mat. 5:18).

Segundu, jakajkukua jindesti “engachi jimbo exejka indeni ambe enga no xarharajka”, i ambe arhikuekasïndi seguru jarhani eska jarhaska ambe ma engachi no exejka (Ebr. 11:1b). Ju je exeni arini ejempluni. Eranhaska je eskajtsïni sapi ma kurhamarhisïnga nénachi míteski eska jarhaska tarhiata. Nájkirukachi no méni exeka tarhiatani, no úkua jukasti uandontskuarheni sapi jingoni para exerani eska jarhaska, por ejemplu, jirejtani, ambe enga úkuarhijka enga tarhiajka ka máteru ambe. Enga sapi seguru jarhajkia ini ambe jingoni, jakajkusïndi eska jarhaska ambe ma enga ima no exejka. Májkuenisti, parachi úni jakajkuni, jatsiskachi para seguru jarhani eska ambe ma jarhaska (Rom. 1:20).

Orhetachi jatsiska para exeni ambe ma para úni jakajkuni; parachi jatsini jakajkukua, orhetachi jatsiska para “mítini [ambe] enga ísïka” o jurhimbitkueni (1 Tim. 2:4). Peru no inde ambejkusï uétarhijti. Apostuli Pablu karaspti eska mintsita jingonisï uétarhijka jakajkuni (Rom. 10:10). No solu jindesti eskachi jakajkuaka imani ambe enga jurhimbitkueka, uétarhisïndi eskachi jukaparharaaka. Solu ísïchi uáka xarhatani jakajkukua, o sea, imani ambe úparini enga Tata Diosï jaiapanhintajka (Sant. 2:20). Ima enga  no sáni jukaparharajka jurhimbikuani, jamberi no jiókuarhiati imani ambe enga ísïka enga inchandimiska uandani ambe enga jakajkujka o ambe uéjki jirinhakuntani para ísï jámani eska imeri kuerpu na tsitijka (2 Ped. 3:3, 4; Jud. 18). Ísï jimbo, ima kʼuiripuecha engaksï exeapka milagruechani Bibliaeri jurhiatikuecha jimbo nóksï iáminduecha niáraspti jatsini jakajkukua (Núm. 14:11; Juanu 12:37). Tata Diosïri espiritu santu úsïndi eskaksï solu imecha jatsiaka jakajkukua engaksï tsitijka jurhimbikuani ka kurhunhini chkuanderakua ambe (Gal. 5:22; 2 Tes. 2:10, 11).

Máru Tata Diosïri marhuaricheri engaksï ióntki kʼéri jakajkukua ma xarhatapka, ma jindesti rei Dabidi (Ebr. 11:32, 33). Peru nóchi uáka májkueni uandani iámindu imeri kʼumanchikuarhu anapuecheri. Por ejemplu, imeri ermanu Eliabi enga kʼéripka, no mintsikasïrendi Tata Diosïni jimboka xukaspka Dabidini enga ima uékenga sánderu ambe míteni ambe enga Goliati uandapka (1 Sam. 17:26-28). No nema jakajkuparini andajpenusïndi ni ambe máe enga táticha újka íntspeni komu erensia ma. Ísï jimbo, Dabidi niáraspti jakajkuni Jeobani jimboka ima ambakiti pájperakua ma jatsispka imani jingoni.

Salmo 27 jimbo, Dabidi uandantaspti ambe enga úpka para kʼéri jakajkukua ma jatsini (bersikulu 1). Eratsintasïrendi ambe enga nitamakuarhipka ka ambe enga úpka Jeoba imecha jingoni engaksï ikiakuenga (bersikulu 2 ka 3). Mintsita jingoni jukaparharasïrendi Jeobaeri kʼumanchikuani (bersikulu 4) ka jima kʼéri ambe arhisïrendi máteru israelitecha jingoni (bersikulu 6). Jánguarhintasïrendi kómarhini Jeobani eska jarhuatapiringa (bersikulu 7 ka 8). Ístu uékasïrendi eska Jeoba jorhendapiringa imeri xanharu jimbo jámani (bersikulu 11). Para ima kánikua jukaparhakuespti jakajkukua enga kurhamarhikuarhipka nani japirini enga no jatsipiringa jakajkukua (bersikulu 13).

Uákachi sáno májkueni jásï ma jakajkukua jatsini eska Dabidi engachi ísï eratsiska ka úni eska na arhijka Salmo 27. Jimboka míteni ambe enga jurhimbitkueka úsïnga eskachi jatsiaka jakajkukua, engachi sánderu arhintaska Tata Diosïri Karakatani ka juchari publikasionichani, sánderu no úkua jukaati xarhatani jakajkukua enga espiritu santu úrpijka (Sal. 1:2, 3). Engachi estudiariska, ju je arhutani tiempu para eratsintani, jimboka engachi ísï úska jukaparharaakachi indeni ambe. Engachi sánderu jukaparharaska ambe enga újka Jeoba juchantsïni jimbo, sánderuchi xarhataaka juchari jakajkukua engachi kʼéri ambe arhiska tánguarhikuecharhu ka engachi aianguaska máteruechani ambe engachi erokuarhini jaka sánderu orhepani (Ebr. 10:23-25). Ístuchi xarhatasïnga jakajkukua engachi no jurajkujka kómarhini ka nóchi kuatantani (Luk. 18:1-8). Jiájkani, ju je seguirini kómarhini Jeobani mintsikaparini eska ima pendienti pásïnga juchantsïni jimbo (1 Tes. 5:17; 1 Ped. 5:7). Jakajkukua úsïndi eskachi imani ambe uáka enga sési jaka ka inde ambe úsïndi eska juchari jakajkukua sánderu kʼéaka (Sant. 2:22).

Ima chúrikua ante de Jesusi uarhini arhiaspti imeri chúxapatichani: “Engajtsï Diósïni mintsikajka jíndentujtsïni mintsika je” (Juanu 14:1, Táta Diósïri Uandakua Tata Jesukristueri Aiatsperakua [TDU]). Ísï jimbo, jatsiskachi para jakajkuni Jesusini no solu Jeobani. ¿Nénachi uá? Ju je exeni tanimu ambe.

Uénani jámani, ju je euajpintskuani ísï exeni komu Tata Diosïri intsïmperakua ma. Apostuli Pablu uandaspti: “Irekaxaka mintsikaparini Diosïri Uájpani engarini xáni kánikua uékajka ka enga tsípikua íntspika jindeni jimbo” (Gal. 2:20). Engachi jakajkujka Jesusini, seguruchi jarhaska eska ima juchantsïni jimbosï uarhika, eskajtsïni Jeoba imani jimbo úsïnga puáchintani engachi no sési ambe újka, eskachi uáka irekani para méntkisï sánderu orhepani ka eska Tata Diosï xarhataska na engajtsïni xáni xénchajka (Rom. 8:32, 38, 39; Efes. 1:7). I ambe uáti eskachi no eratsiaka imani ambe engajtsïni no sési pʼikuastajka (2 Tes. 2:16, 17).

Tsimani úni jámani, ju je andarhierani Jeobani kómarhiparini, jimbokachi uáka ísï úni Jesusiri uarhikua jimbo. Euajpintskua jimbochi úsïnga kómarhini Jeobani parachi andajkuarhini “kóndinhantani ka intsïnhani jarhoajpikua imani tiempu jimbo engachi uétarhinchaaka” (Ebr. 4:15, 16; 10:19-22). Kómarhini, jarhuatasïndijtsïni pʼíngukuarhini parachi no no sési ambe niátani (Luk. 22:40).

Tanimu úni jámani, ju je kurhajchani Jesusini. Apostuli Juanu karaspti: “Ima enga jakajkujka Diosïri Uájpani, jatsisti tsípikua para méntkisï, peru ima enga no jakajkujka Diosïri Uájpani, no jatsisti tsípikua, sino Diosï méntkisï ikiaxati imani jingoni” (Juanu 3:36). Ju je exeni eska Juanu uandaspka eska méntku ménderueniska jakajkuni ka no kurhandirani. Ísï jimbo, xarhatasïngachi jakajkukua engachi kurhajchajka Jesusini. Ka kurhajchasïngachi engachi ísï újka eska “Kritueri mandamientu” na uandajka, enga iámindu ima ambeka engajtsïni jorhendaka ka juramuchini (Gal. 6:2). Ístuchi kurhajchasïnga engachi ísï újka eskajtsïni na arhistachijka “jantspiri enga mintsinharhikueka ka [jánhastini]” (Mat. 24:45). Engachi úska ambe engajtsïni Jesusi juramuchijka, jatsiakachi uinhapikua engajtsïni jarhuataaka orhepani uérakuani uandanhiatechani (Luk. 6:47, 48).

Ma xanhari, acheeti ma arhispti Jesusini: “Ji jakajkusïnga ¡Ka jarhuatarini jakajkuni sánderu!” (Mar. 9:24, TDU). I acheeti jatsispti sáni jakajkukua, peru kaxumbitispti ka exespti eska uétarhinchasïrenga sánderu. Ísï eska ima acheeti, ménisïchi uétarhinchasïnga jakajkukua. Ka iásïchi iáminduecha uáka úni eska juchari jakajkukua sánderu kʼéaka. Eskachi na exekia, ísïchi úsïnga engachi arhintajka Tata Diosïri Karakatani ka eratsintani inderi ambe, ka i ambe úsïndi eskachi sánderu jukaparharaaka ambe enga újka Jeoba juchantsïni jimbo. Juchari jakajkukua ístu sánderu kʼésïndi engachi kʼéri ambe arhijka Tata Diosïni juchari erachicha jingoni ka aianguani máteruechani ambe engachi erokuarhini jaka sánderu orhepani ka engachi no jurajkujka kómarhini. Engachi iámindu ini ambe úparini uinhapikuarhintaska juchari pímbinhasï jakajkukua jimbo, sánderu kʼéri kóntperatachi intsïnhaaka: Tata Diosïjtsïni seguiriuati xénchani (Jud. 20, 21).