¿TSITIPIRINCHI ánchikuarhita ma jatsini kúnguarhikuarhu engachi iáiasï no újka úni? Úpirindi jindeni ánchikuarhita ma enga máteru erachi ma úni jaka o engachi antesi uénga. Jamberichi no újka úni indeni ánchikuarhitani engachi tsitijka jimbokachi jatiriskia, pʼamenchakua ambe jimbo, jatsinchi para sánderu ánchikuarhini o jimbokachi jatsiska para familiarhu anapuechani kuidariuani. O jamberi jimboka Jeobaeri kúnguarhikuarhu mójtakurhiska ambe ma, jatsipkachi para jurajkuni imani ánchikuarhitani engachi ióni úpkia. Ambe uéjki jimboeni, jamberichi ísï exejka enajkichi no ísï marhuakuni jaki Jeobani eskachi na uékapiringa. Indeni ambe jimbochi niárasïnga no sési pʼikuarherani. Jiájkani, ¿ambejtsïni jarhuataa orhepani uérani engachi kómu ka chkeni pʼikuarherani jauaka o ikiani? ¿Ambejtsïni jarhuataa parachi seguirini tsípikua jingoni irekani?

Juanu el Bautisteri ejemplujtsïni ambakiti ambe jorhendasïndi. I Tata Diosïri marhuari ambakiti ánchikuarhita ambe intsïnhaspti. Peru jamberi no méni eratsipti na enga mójtakurhipiringa imeri irekua, eska sánderu ióni ónhakata japiringa ka eska na enga xáni jámapiringa aianhpini. Nájkiruka inde ambe nitamakuarhipka, seguirispti tsípikua jingoni irekani asta enga uarhipka. ¿Ambe jarhuataspi? ¿Ka nénachi uá seguirini jarhani tsípikua jingoni irekani nájkirukajtsïni no ísï uérachiaka ambe ma eskachi na uékapiringa?

Abrilinisï uéxurhini 29 jimbo despuesi de Jesusi, uénaspti aianguni kʼuiripuni eska Mesiasi janopiringuia, ísï eska Jeoba na juramukupka. Arhijpisïrendi: “Moanta je jimboka auandarhu anapu juramukua janoxamkia” (Mat. 3:2; Luk. 1:12-17). Uánikuechaksï jiókuarhispti ambe enga ima aianguapka. Asta imechaksï niraspti engaksï iauanisï irekapka paraksï kurhaani ambe enga ima aianhpienga ka uánikuaksï moantaspti ka itsï atakuarhini. Ístu, Juanu balori jingoni arhiaspti relijioniri orhejtsïkutichani eskaksï kastigarinhapiringa engaksï no mójtakurhipiringa (Mat. 3:5-12). Ambe enga sánderu ambakiti ambe úpka Juanu jiáni enga aianhpini jámani japka, jindespti Jesusini bautisarini oktubrinisï uéxurhini 29 jimbo. Jiáni uératini, jarhuataaspti kʼuiripuechani paraksï Jesusini chúxapani, Mesiasi enga aiatspinhapka (Juanu 1:32-37).

Jimboka Juanu ambakiti ánchikuarhita ma úspka, Jesusi arini ambe uandaspti imeri: ‘No nema kánguarhinhasti ma enga sánderu kʼéri ambeka ka eska Juanu Bautista’ (Mat. 11:11). Seguru eska Juanu  jukaparharapka iámindu imani ambe enga úpka Jeoba jimbo ka tsipispti kóntperatecha jimbo enga intsïnhaapka. Ísï eska Juanu, iásï anapu erachi ka pirenchicha engaksï mintsita jingoni marhuakujka Jeobani sésiksï pʼikuarherasïndi ambakiti kóntperatecha jimbo enga Jeoba íntsaaka. Ju je exeni ambe enga nitamakuarhipka erachi Terry enga jukari sinkuenta uéxurhini marhuakia tiempu kompletueri imeri uarhiiti Sandra jingoni. Erachi uandasïndi: “Uánikua ambakiti kóntperatechani intsïnhaaska. Prekursori regularispka, Beteli marhuaska, prekursori espesialispka, sirkuitueri ka distritueri orhejtsïkutispka ka iásï ménderuni prekursori espesialiskia”. Sésichi pʼikuarherasïnga engachi indeni jásï ánchikuarhita ma íntsïnhajka Jeobaeri kúnguarhikuarhu. Peru ambe enga Juanu nitamakuarhipka jorhendaatijtsïni eska para tsípikua jingoni irekani no jindeska imani ánchikuarhita jimbo engachi Jeobaeri kúnguarhikuarhu újka ka eska parachi seguirini ísï irekani jatsiskachi para jánguarhintani.

Ma ambe jimbo enga Juanu el Bautista méntkisï tsípikua jingoni irekapka, jindespti eska méntkisï jukaparharaspka imani ánchikuarhita ambe enga intsïnhapka. Por ejemplu, enga Jesusi na itsï atakuarhipkia, nóteruksï xáni uánikua chúxapasïrendia Juanuni, ka Jesusinksï sánderu ka sánderu chúxapasïrendia. I ambe uandanhiataaspti Juanueri chúxapatichani engaksï arhipka: “Ima [...] bautisarpixati ka iámindu kʼuiripuecha nirasïndi andarhierani imani” (Juanu 3:26). Ka Juanu mókukuaspti: “Tembucha jindesti enga jatsijka imeri tembunhani, peru tembucheri amigu jemba enga imani jingoni anhaxurhitini jarhajka ka kurhajchani jarhani, tsípikuarhisïndi kurhajchani jarhani, ísï jimbo ji iásï kánikua tsípikuarhixaka” (Juanu 3:29). Juanu no ísï exesïrendi Jesusini kómu nema enga uékenga andani ni eratsipi eska imeri ánchikuarhita no jukaparhakuespka jimboka Jesusiri ánchikuarhita sánderu kʼéri ambespka. Sánderu sési, seguirispti tsípikua jingoni irekani jimboka jukaparharasïrenga tembucheri amigu jembeni.

Na enga exenga ambe ma Juanu, jarhuataspti para sési pʼikuarherani nájkiruka imeri ánchikuarhita úkua jukapka. Por ejemplu, ima nasareu máespti desdeka andajpenupka jimbosï no uéndi binu arhani (Luk. 1:15). Jesusi arini ambe uandaspti na enga arisku sáni irekapka: ‘Juánu ixu jámaxapti, ima enga no t’irempka ka ni kauikua ts’émuni’. Peru Jesusi ka imeri chúxapatichaksï no xáni ísï irekaspti eska nasareuecha (Mat. 11:18, 19, Táta Diósïri Uandakua Tata Jesukristueri Aiatsperakua). Ístu, nájkiruka Juanu no méni úapka milagruechani, mítespti eskaksï Jesusiri chúxapaticha úsïrenga uáni, asta máru engaksï antesi imeri chúxapatipka (Mat. 10:1; Juanu 10:41). Peru Juanu no solu imani ambejku eratsini jarhasïrendi ambe engaksï imeri chúxapaticha uénga úni ka ima nómbe, sánderu sési, jánguarhintasïrendi úni imani ánchikuarhitani enga Jeoba íntskupka.

Engachi juchajtu jukaparharaska ambe engachi újka para marhuakuni Jeobani, tsípikua jingonchi irekaaka. Terry, engachi antesi uandaka, uandasïndi: “Jánguarhintaska sési úni mándani ánchikuarhita engani intsïnhaka”. Enga miántajka na enga marhuaka tiempu kompletueri, uandasïndi: “No ma ambe jimbo pʼamondakuarhisïnga. Ambakiti ambejkusïni miájka”.

Uákachi tsípikua jingoni irekani engachi eratsintaska eska kʼéri kóntperata máeska jindeni Tata “Diosïri jarhuajpiricha”, ambe ma enga újka eskachi jukaparharaaka juchari ánchikuarhitani Jeobaeri kúnguarhikuarhu (1 Kor. 3:9). Ju je jatsikuni ejemplu ma. Engachi kuidariska ka sési jájkuntani ambe ma enga ióntki anapueka ka familierini, nájkiruka ióni nitamakia méntkisï májkueni mereauati. Májkueni, tsípikua jingonchi irekaaka engachi eratsintaska na enga xáni kʼéri kóntperata máeka Jeobani marhuakuni. Nóchi terukutantaaka na engachi marhuakujka Jeobani máteruecheri jingoni, nichi eratsini eska juchari ánchikuarhita no xáni jukaparhakueska komueska ima engaksï máteruecha intsïnhajka (Gal. 6:4).

Jamberi Juanu mítepti eska no ióni jámapiringa aianhpini, peru no méni eratsipti eska ma repentku uándikunhapiringa (Juanu 3:30). Uéxurhini 30 jimbo, enga seisi kutsï nitamapkia enga Jesusini bautisaripka, rei Erodesi ónhatarkuarhispti. Peru Juanu seguirixapti aianhpini (Mar. 6:17-20). ¿Ambe jarhuataspi tsípikua jingoni irekani nájkiruka mójtakurhipka imeri irekua? Sánderu jukaparharani Tata Diosïri ambe.

Enga Juanu ónhakata japka, mítespti ambe enga xáni úni japka Jesusi enga aianhpini jámani japka (Mat. 11:2; Luk. 7:18). Seguru jarhaspti eska Jesusi Mesiasispka, peru jamberi kurhamarhikuariendi sini  Mesiasi kumpliripirini iámindu ambe enga Tata Diosïri Karakata uandenga eska úpiringa. Por ejemplu, jimboka Mesiasi reipiringa, ¿sóntku uénapirini juramuni? ¿Petantapirini Juanuni kárselirhu? Ima uékasïrendi sánderu sési kurhanguni ambe enga Jesusi úpiringa, jimbosï axaapti tsimani imeri chúxapatichani paraksï kurhamarhini: “¿Tʼu jindeski ima enga jupiringa o erokaachi máteruni?” (Luk. 7:19). Engaksï kʼuanhatsentapka, seguru eska Juanu jingontku kurhajchaapka engaksï aiangupka eska Jesusi tsinaaxapka kʼuiripuechani ka eskaksï aiangupiringa eskaksï sieguecha éskataranhantaxapka, eska imecha engaksï no uénga xanharani, úsïngaksïa xanharani, ka ístu imecha engaksï lepra pʼamenchenga, ambakeranhantaxapka, ka ima engaksï no uénga kurhandini, úsïrengaksïa kurhandini, ka eska uarhiricha ístu tsítanhantaxapka, ka eska ima engaksï pobripka, aiangunhaxapka ambakiti eianhperakuani (Luk. 7:20-22).

Seguru eska ima ambe engaksï aiangupka Juanuni kánikua uinhaperantapka. Ima ambe xarhatasïrendi eska Jesusi kumplirixapka ambe enga uandakata japkia eska úpiringa Mesiasi. Nájkiruka Jesusi no petantapiringa karseliru, Juanu mítespti eska no ískusï ánchikuarhipka. Nájkiruka imani ambe nitamakuarhipka, jatsispti ambe ma enga jimbo tsípikua jingoni irekapka.

Engachi májkueni úska eska Juanu ka jánguarhintanchi Tata Diosïri ambe úni, tsípikua jingonchi tekantaaka (Kol. 1:9-11). Arhintani Bibliani ka eratsintani jarhuataatijtsïni ísï úni, jimbokajtsïni miátantasïnga eskachi no ískusï marhuakujka Tata Diosïni (1 Kor. 15:58). Sandra engachi antesi uandaka, uandasïndi: “Pauani pauani arhintani ma kapitulu Bibliaeri jarhuatastirini sánderu andarhierani Jeobani ka sánderuni imeri ambe úni ka eska juchiti ambe”. Ístuchi úaka exeni ambe enga xáni úkuarhini jaka Tata Diosïri Reinu jimbo. Ini ambe jingoni, nóchi xáni eratsiaka juchari ambe sino imani ambe enga Jeoba úni jaka. Sandra ístu uandasïndi: “Engaksï programecha mándani kutsï uérajka JW Broadcasting^® jimbo, sánderuchi májku kʼéri pʼikuarherasïnga Jeobaeri kúnguarhikua jingoni ka seguirinchi tsípikua jingoni marhuani”.

Juanu el Bautista no ióni jámaspti aianhpini “indeni Espirituni ka uinhapikua jimbo enga Eliasi jatsipka”. Ka májkueni eska Eliasi, Juanu kʼuiripu máespti “enga májku jásïpka eska jucha” (Luk. 1:17; Sant. 5:17). Engachi májkueni úska eska Juanu ka jánguarhintanchi Tata Diosïri ambe úni, juchajtuchi tsípikua jingoni aianhpiaka Reinueri ambe, ambe uéjki úkuarhini.