1. ¿Ambeksï jatsiski para úni Jeobaeri marhuaricha paraksï kʼamarhukuni karrerani?

JEOBAERI marhuarichachi uiriaxaka parachi tsípikua andani. Ia sea engachi apenasi uénaka ochi ióni páni jarhania, jatsiskachi para seguirini uiriani asta kʼamarhukuni. Ambe enga apostuli Pablu arhiapka Filipusi anapuechani, uátijtsïni jarhuatani parachi kʼamarhukuni karrerani. Enga Pablu karakuapka kartani, máru engaksï imani kúnguarhikuarhu japka primeru sigluni iónksï páxaptia marhuakuni Jeobani. Nájkirukaksï sési marhuani japka, Pablu arhiaspti eskaksï no jámapiringa kuatantani. Uékasïrendi eskaksï májkueni úpiringa eska ima paraksï seguirini jánguarhintani asta kʼamarhukuni (Filip. 3:14).

2. ¿Andisï xáni marhuakuapi Filipusi anapuechani ima konsejuecha enga Pablu íntsaapka?

² Pablu jiáni íntsaaspti indeni konsejuechani engaksï meru uétarhinchani japka. Desdeka Filipusi uénapka jarhani kúnguarhikua imecheri ikiatspitichaksï kánikua no sési kaaspti. Inde ambe uéxurhini 50 jimbo ísï úkuarhispti, jiáni enga Pablu ka Silasi indeni ireta jimbo niárapka engaksï na jiókuarhipkia Tata Diosïri pʼímarperakuani para Masedonia nirani (Uku. 16:9). Filipusiksï uarhiitini ma exentaspti enga Lidia arhinhenga ka Jeoba úspti eska uékapiringa kurhaani ambakiti aianhperakuani (Uku. 16:14). Ísï tátsekua, itsï atakuarhisptiksï Lidia ka iáminduecha engaksï imeo irekapka. Peru Noambakiti no ísku pakaraspti. Imani iretarhu, máru achetichaksï antsikupaaspti Pabluni ka Silasini paraksï juramuticha jingoni paani ka uandasptiksï eskaksï imecha no sési ambe úxapka, ambe ma enga no ísïpka. Ini ambe jimbo, Pabluni ka Silasinksï ataaspti, ónhaani ka arhiasptiksï eskaksï uéakuntapiringa iretarhu (Uku. 16:16-40). ¿Kuatantaspiksïa? Méntku nómbe. ¿Ka ima erachichaia engaksï imani kúnguarhikuarhu japka enga apenasi úkuarhipka? Ískujtsïni pakatasïndi jimbokaksï imechajtu tekaantaspka, ambakiti ejempluksï máesti. Seguru eska Pablueri ka Silasiri ambakiti ejemplu uinhaperantaapka.

3. ¿Ambe mítespi Pablu, ka náki kurhamarhikuechanchi mókuantaua?

 ³ Pablu eratsitixapti no kuatantani (2 Kor. 4:16). Peru mítispti eska para úni kʼamarhukuni karrerani jatsispka para sési marhuakuni Jeobani asta kʼamarani. ¿Ambechi jorhenguarhisïni Pablueri? Ini jurhiatikuecha jimbo, ¿náki ejempluechaksï jarhaski ambakiti erachicheri engajtsïni jorhendajka eskachi uáka tekaantani nájkirukachi uandanhiata ambe jatsiaka? ¿Ka nénajtsïni jarhuatasïni ambe engachi erokuarhini jaka enga sánderu orhepani úkuarhiaka parachi no méni kuatantani?

4. ¿Ambe úspi Pablu nájkiruka no sési nitamakuarhini japka?

⁴ Ju je exeni ambe enga nitamakuarhini japka Pablu enga Filipusi anapuechani karakuapka kartani ka na enga xáni jánguarhintenga. Kʼumanchikua ma jimbo ónhakata jarhaspti Roma, jimbosï no uéndi nirani aianhpini. Peru no jurajkuspti aianguani imechani engaksï nirenga pʼorhembini ka kartechani karakuani kúnguarhikuechani engaksï iauani japka. Májkueni, ini jurhiatikuecha jimbo uánikua erachicha engaksï no újka imeo uérani, predikarikuasïndiksï imechani engaksï nirajka pʼorhembiani. Ístuksï kartechani úkuasïndi kʼuiripuechani engaksï no exeantajka imeo.

5. Eska na arhijka Filipusʌ 3:12-14, ¿ambe jarhuataspi Pabluni para úni kʼamarhukuni karrerani?

⁵ Pablu no jurajkuspti eska ójkutapiringa ambakiti ambe ni no sési ambe enga antesi úpka. Sánderu sési, uandaspti eska mirikurhini imani “ambe enga nitamakia” kánikua jukaparhakuespka para andani imani ambe enga orhepani japka, kʼamarhukuni kristianueri karrerani (arhinta je Filipusʌ 3:12-14). ¿Ambe úpirini ójkutani? Orheta, enga niárapka ambakiti ambe úni komu judiu ma. Peru iámindu imani ambe ísï exesïrendi “eska basura” (Filip. 3:3-8). Tsimani úni jámani, enga no sési pʼikuarherenga jimboka no sési kaaspka kristianuechani. Peru no jurajkuspti eska i ambe ójkutapiringa. Ka tanimu úni jámani, ambakiti ambe enga úpka para Jeobani marhuakuni. Pabluni kánikua sési nikuspti aianhpikuarhu nájkiruka ónhanhapka, atanhapka ka asta tsakapkueranhani, someni no sési nikuspti marirhu ka no ma ambe jatsispti para arhani ni para jukani. Peru no méni eratsispti nóteru xáni jánguarhintania marhuakuni Jeobani (2 Kor. 11:23-27). Nájkiruka ambakiti ambe úpka ka ístu no sési nitamakuarhini, mítespti eska jatsispka para seguirini jánguarhintani. Ka juchajtuchi jatsiska para májkueni úni.

6. ¿Ambe úpirini jindeni ima “ambe enga nitamakia” ka engachi jatsipiringa para mirikurhini?

⁶ ¿Nénachi uá mirikurhini imani “ambe enga nitamakia” ísï eska na úpka Pablu? Jamberichi útasï no sési pʼikuarherajka imani ambe jimbo engachi ióntki no sési úpka. Engachi ísï pʼikuarherajka, ¿andichisï no jirinhantajki sánderu informasioni enga Jesusiri uarhikueri ambe uandajka? Jorhenguarhini, eratsintani ka kómarhini ini xáni ambakiti ambe jimbo, jarhuataatijtsïni nóteru no sési pʼikuarherania jimbokachi kurhanguaka ka jiókuarhini eskajtsïni Jeoba puáchintaskia engachi no sési ambe úka. Ju je exeni máteru ambe engachi jorhenguarhijka Pablueri. Máru Testiguechaksï jurajkusti imecheri ánchikuarhitani nani engaksï sési maiamunhenga paraksï sánderu marhuakuni Jeobani. Jiájkani engachi jucha indeni ambe úka, mirikurhini imani ambe enga nitamakia arhikuekasïndi no pʼamondakuarhini imani ambe jimbo engachi úpiringa jatsini (Núm. 11:4-6; Ecl. 7:10). Ístu ima “ambe enga nitamakia” úpirindi jindeni ambe engachi xáni úkia para Jeobani marhuakuni o tsʼéjkukuecha engachi nitamakuarhiakia. Ísïsti, sánderuchi andarhierasïnga Tata Diosïni engachi miájka na engajtsïni ióntki újchakurakia ka jarhuatani. Peru nóchi jatsiska para eratsini eska  sésku jarhaskia engachi iónisï sési marhuakukia Jeobani (1 Kor. 15:58).

7. Eska na arhijka 1 Korintu 9:24-27, ¿ambe uétarhisïni úni para kʼamarhukuni karrerani? Jatsiku je ejemplu ma.

⁷ Pablu sési kurhangusïrendi arini ambe enga Jesusi uandapka: “Jánguarhi je” (Luk. 13:23, 24). Apostuli mítetixapti eska jatsispka para jánguarhintani asta kʼamarhukuni jamberi, ísï eska Kristu. Jimbosï karrera ma jingoni terukutantapti kristianueri irekuani (arhinta je 1 Korintu 9:24-27). Imecha engaksï karrera ma jimbo uiriani jarhajka, soluksï eratsini jarhasïndi andani ka nóksï exesïndi imani ambe enga úpiringa ójkutaani. Por ejemplu, imecha engaksï karrera ma jimbo uiriani jarhajka kʼéri ireta ma jimbo, jamberiksï jimesïsï nitamaati engaksï kʼérati tiendecha jaka ka máteru ambe enga úpiringa ójkutaani. ¿A no eska no nema enga uiriani jaka anhaxurhipiringa tiendarhu ma para exeni ambe enga íntspikuarhinhajka? Nómbe jimboka uékasïnga andani. Májkuenisti, parachi úni jatsini tsípikua, jatsiskachi para no jurajkuni eskajtsïni ójkutaaka ambe ma. Engachi méntku eratsini jauaka kʼamarhukuni karrrerani ka jánguarhintanchi na engachi xáni uáka ísï eska Pablu, uákachi jatsini tsípikua para méntkisï.

8. ¿Ambe tanimu ambechi exea?

⁸ Ju je iásï tanimu ambe exeni engajtsïni úpiringa pʼínguni parachi nóteru májkueni jánguarhintania. Ióndani jarhani kumplirikuarhini ima ambe engachi erokuarhini jaka, juchari kuerpu nóteru xáni uinhapinia ísï eska antesi ka tsʼéjkukuecha engachi ióni jamberi nitamakuarhiajka. Exeni ambe engaksï úka máteru Tata Diosïri marhuaricha, kánikuajtsïni marhuachiati (Filip. 3:17).

9. ¿Ambe úpirini úkuarhini engachi ísï exepiringa enajki ióndani jaki kumplirikuarhini ambe engachi erokuarhini jaka?

⁹ Ióndani jarhani kumplirikuarhini ima ambe engachi erokuarhini jaka. No no sési jarhasti engachi uékani jakaia eska úkuarhiaka ambe enga Tata Diosï aiatspika. Enga profeta Abakuki uandapka na enga xáni uékani japka eska Juda nóteru japiringuia no sési jásï ambe, Jeoba arhispti eska jingontku japiringa (Hab. 2:3). Jo, juchajtuchi uáka nóteru xáni jánguarhintania engachi ísï exejka enajki ióndani jaki kumplirikuarhini ima ambe engachi erokuarhini jaka. Asta jamberichi uáka chkeni (Prov. 13: 12). I ambe úkuarhispti uéxurhinisï 1914. Imani jurhiatikuecha jimbo, uánikua erachicha engaksï erakukatepka erokuarhixaptiksï auandarhu nirani indeni uéxurhini jimbo. ¿Ambeksï úspi ambakiti erachicha enga no ísï úkuarhipka ambe engaksï erokuarhini japka?

10. ¿Ambe úspi temungurhiri ma enga no ísï úkuarhipka ambe engaksï erokuarhini japka?

¹⁰ Ju je exeni nénaksï orhepani uéraspi ini ambe jimbo tsimani erachicha, Royal ka Pearl Spatz. Erachi Spatz 1908 jimbo itsï atakuarhispti enga 20 jatiripka. Seguru jarhaspti eska no ióni jimbo nipiringuia auandarhu. Ísï jimbo, enga arhipka Pearlini para uambuchani imani jingoni uéxurhini 1911 jimbo, arhispti: “Míteskaria ambe enga úkuarhiaka 1914 jimbo. Engachi uéjka tembuperani, sánderu sésiuati eskachi sóntku ísï úaka”. ¿Jurajkuspiksï karrerani i temungurhiri engaksï no nipka auandarhu 1914? Nómbe, jimbokaksï uékasïrenga méntkisï marhuakuni Jeobani ka no jimbokaksï uékaenga andani ambe ma. Eratsitixaptiksï tekantskua jingoni marhuani, ka ísïksï úspti. Útasïksï ióni jamberi marhuakuspti Jeobani astaka kʼamakurhipka imecheri tsípikua ixú Echerirhu. Meruchi uékaxakaia exeni enga Jeoba pímbinhajkuntaaka imeri nombrini ka xarhatani eska imajkusï újka sési juramuni ka eska kumpliriuaka iámindu ambe enga aiatspeka. Uákachi seguru jarhani eska iámindu ambe úkuarhiaka jiáni enga Jeoba exerini jakaia. Enga jamberi ísï úkuarhiaka, ju je seguirini marhuakuni Jeobani ka no méni jurajkuni eskachi chkeaka o nóteru májkueni jánguarhintania jimbokachi ísï exesïnga enajki ióndani jaki kumplirikuarhini ambe engachi erokuarhini jaka.

11, 12. ¿Andichisï uá seguirini jarhani jánguarhintani nájkirukachi nóteru xáni uinhapikia ísï eska antesi? Jatsiku je ejemplu ma.

¹¹ Enga juchari kuerpu nóteru xáni uinhapikia ísï eska antesi. Parachi úni seguirini mintsikani Jeobani ka sési marhuakuni, no uétarhisïndi eska juchari kuerpu uiuinhasï jauaka komueska ima kʼuiripueri enga meru uiriani jarhajka karrera ma jimbo. Asta uánikua engaksï nóteru xáni uiuinhasï jakaia ísï eska antesi, eratsitixatiksï seguirini sánderu sési marhuakuni Jeobani (2 Kor. 4:16). Ju je exeni erachi Arthur Secordiri ejemplu. * Ma jurhiani enga sinkuentaisinku uéxurhini andangutapkia Beteli ka 88 jatirinia, enfermera ma enga kuidariuenga eratispti ka uékperakua jingoni arhispti: “Erachi Secord, ióntsï marhuakuskia Jeobani”. Peru erachi Arthur no méntku eratsini jarhasïrendi na enga xáni marhuakupkia Jeobani. Eratispti enfermerani, tsípikuspti ka arhini: “Jo, ísïsti. Peru ambe engachi úkia, no jindesti ambe enga sánderu jukaparhakueka sino ambe engachi uáka úni ixú para orhepani”.

 ¹² ¿Iónichi marhuakuskia Jeobani ka iásï juchari kuerpujtsïni nóteru xáni jarhuatasïnia ísï eska antesi? Enga ísïka, ju je no kuatantani. Uákachi seguru jarhani eska Jeoba kánikua jukaparharasïnga ambe engachi xáni úkia ióntki (Ebr. 6:10). Ka ambe engachi úni jaka iáiasï, ju je miáni eska na engachi xáni marhuakujka Jeobani no arhikuekasïnga na engachi xáni xénchajka. Sánderu sési, xarhatakusïngachi eskachi xénchasïnga juchari ambakiti jángua jingoni ka engachi jánguarhintajka na engachi xáni uáka (Kol. 3:23). Jeobajtsïni kurhanguchisïndi ambe engachi újka úni ka ambe nómbe ka nójtsïni kurhachisïndi sánderu jamberi engachi no uáka úni (Mar. 12:43, 44).

13. ¿Ambeksï nitamakuarhispi Anatoly ka Lidiya ka nénajtsïni jarhuatasïni imecheri ejemplu parachi no kuatantani nájkirukachi ióni jamberi no sési nitamakuarhiaka?

¹³ Tsʼéjkukuecha engachi ióni jamberi nitamakuarhiajka. Máru Tata Diosïri marhuarichaksï ióni jamberi tekaantasti tsʼéjkukuechani ka engaksï juchari ikiatspiticha no sési kaapka. Ju je exeni erachiri Anatoly Melnikiri ejemplu, * Moldavia anapu. Ima apenasi 12 jatirispti engaksï imeri táti jembani ónhapka ka Siberiaksï páni enga 7,000 kilometru (4,000 millas) ísï iauani pakarenga jima uératini enga imeri familia japka. Ísï ma uéxurhini jimbo, ístuksï Siberi paaspti Anatolyni, amambani ka tata kʼéri jembechani. Ísï tátsekuaksï úsïrendia nirani tánguarhikuecharhu, peruksï jatsisïrendi para 30 kilometru (20 millas) ísï xanharani jimesïsï enga niebi jarhenga ka kánikua tsʼirakuarhini. Ísï sáni ióni jimbo, erachi Melnik tanimu uéxurhini jarhaspti ónhakata, ióni no jarhaspti imeri témba Lidiya jingoni ni imeri nanaka sapichu jingoni enga apenasi ma uéxurhini jatiripka. Nájkiruka Anatoly ka imeri familia ióni jamberi no sési nitamakuarhipka, seguirisptiksï marhuakuni Jeobani. Iásï erachi Anatoly 82 jatiristia ka grupurhu jarhasti enga Betelini orhejtsïkujka jini Asia central. Ísï eska Anatoly ka Lidiya, ju je jánguarhintani marhuakuni Jeobani na engachi xáni uáka ka ju je tekaantani ísï eskachi na úkia iónisï (Gal. 6:9).

14. ¿Ambe mítetixapi Pablu eska úpiringa para úni kʼamarhukuni karrerani?

¹⁴ Pablu seguru jarhaspti eska kʼamarhukupiringa karrerani ka eska niárapiringa andani. Jimboka ima erakukata máespka, erokuarhixapti andani indeni premioni enga jimbo Tata Diosï ioarhipka auandarhu uératini. Peru mítespsti eska para úni indeni ambe andani, jatsispka para jánguarhintani (Filip. 3:14). Ambakiti ejemplu ma úraspti para jarhuataani Filipusi anapuechani paraksï no jámani kuatantani.

15. ¿Náki ejemplu úraspi Pablu ka néna jarhuataaspi Filipusi anapuechani paraksï seguirini jánguarhintani orhepani uérani?

 ¹⁵ Pablu miátantaaspti Filipusi anapuechani eskaksï imecha auandarhu anapuespka (Filip. 3:20). ¿Andisï xáni jukaparhakuepi eskaksï no mirikurhipiringa indeni ambe? Jimboka imani jurhiatikuecha jimbo kánikua sésisïrenga Roma anapueni. * Peru kristianuecha engaksï erakukatepka sánderuksï ambakiti lugari ma jimbo anapuespti, jimbokaksï úpiringa sánderu ambe jatsini. Roma anapueni, no xáni kʼéri ambespti eska auandarhu anapu juramukuarhu anapueni. Jimbosï Pablu uinhaperantaapti Filipusi anapuechani arini uandakuecha jingoni: “Jáma je eska na terokuntajka Kristueri ambakiti eianhperakuani jingoni” (Filip. 1:27). Iásï, erachicha engaksï erakukateka ambakiti ejempluksï máesti jimbokaksï seguirixaka jánguarhintani paraksï úni andani tsípikua para méntkisï jini auandarhu.

16. Eska na arhijka Filipusʌ 4:6, 7, ¿ambechi jatsiski para seguirini jarhani úni, iá sea engachi auandarhu niuaka irekani para méntkisï o Paraisurhu ixú Echerirhu?

¹⁶ Jatsiskachi para seguirini jánguarhintani astachi andani, iá sea para auandarhu nirani irekani para méntkisï o Paraisurhu ixú Echerirhu. No arhiparini ambe engachi nitamakuarhini jaka, ju je no miáni imani ambe enga nitamakia ni jurajkuni eskajtsïni ambe uéjki ójkutaaka parachi marhuakuni Jeobani (Filip. 3:16). Úpiringachi ísï exeni enajki ióndani jaki kumplirikuarhini ima ambe engachi erokuarhini jaka ochi jamberi nóteru xáni uinhapinia ísï eska antesi. Jamberichi tekaantaka engachi ióni jamberi no sési nitamakuarhika ochi no sési kánhani. Ambe uéjkichi nitamakurhini jarhani, ju je no ma ambe jimbo uandanhiani, sánderu sési, ju je aiangukuarhini Tata Diosïni iámindu ambe engajtsïni uandanhiatajka ka eskajtsïni jarhuataaka. Ima uáti eskachi kánikua sési pʼikuarheraaka ísï engachi jamberi no újka jánhaskani (arhinta je Filipusʌ 4:6, 7).

17. ¿Ambechi exea máteru artikulu jimbo?

¹⁷ Ísï eska na jánguarhintajka nema para karrerani kʼamarhukuni, ju je jánguarhintani parachi kʼamarhukuni karrerani parachi andani tsípikua para méntkisï. Nani engachi jamberi uáka úni ka seguni ambe engachi nitamakurhini jauaka, ju je seguirini sánderu sési marhuani ka jánguarhintani na engachi xáni uáka parachi andani imani ambakiti ambe enga sánderu orhepani úkuarhiaka. ¿Ambechi jatsiski para úni parachi seguirini jarhani tekaantani? Máteru artikulujtsïni jarhuataati exeni ambe engachi orheta jatsika para úni ka imani ambe enga sánderu jukaparhakueka (Filip. 1:9, 10).