SEMANA 34
Néna pʼindeni jimbanhi ánchikuarhita ma jingoni Jeobaeri kúnguarhikuarhu
Tata Diosï jurhimbitku úsïndi, “ísï jimbo ima no mirikurhiauati chári úkuechani ka níjtu indeni ambe engajtsï úni jaka xarhataparini eskajtsï uékasïnga Diosïni” (EBR. 6:10).
PIREKUA 38 Jeobakini xénchasïndi
AMBE ENGACHI EXEAKA *
1-3. ¿Andiksïsï máru erachicha nóteru marhuajkia tiempu kompletueri?
ROBERT ka Mary Jo miásïndiksï eska engaksï beintiunu uéxurhini marhuapkia komu misioneruecha, tsimaraniri táti jembechaksï pʼamenchaspti. Uandantasïndiksï: “Tsitisïrengachi kuidariuani. Peruchi no sési pʼikuarheraspka jurajkuni imani lugarini engachi xáni tsitienga nani engachi pʼindepkia irekani”.
2 Máteru temungurhiri William ka Terrie, uandasïndiksï: “Engachi mítipka eskachi pʼamenchakua jimbo nóteru úpiringuia kʼuanhatsïnta jima engachi marhuani japka, ueraspkachi. Kánikuachi tsitisïrenga máteru paisi jimbo marhuakuni Jeobani, peruchi iásï nóteru úpiringuia”.
3 Alexéi uandasïndi: “Mítispkachi eskaksï juchari ikiatspiticha uékasïrenga eska imani Beteli jimbo engani ji japka nóteru ánchikuarhinhapiringuia. Nájkirukachi mítepka, kánikuachi no sési pʼikuarheraspka enga ísï úkuarhipka ka jatsipkachi para uéntani Beteli”.
4. ¿Ambechi mókuntaa ini artikulurhu?
4 Nóksï íjkuesti erachicha engaksï jatsipka para pʼindeni jimbanhi ánchikuarhita ma úni Jeobaeri kúnguarhikuarhu. Sáno májkueni jásï ambeksï nitamakuarhisti uánikua erachicha engaksï Beteli japka ka ístu máteruecha engaksï tiempu kompletueri marhuani japka. * Jamberiksï i erachicha úkua jukanchajti jurajkuni ánchikuarhita ma Jeobaeri kúnguarhikuarhu engaksï kánikua tsitijka úni. ¿Ambe uá jarhuataani? ¿Ambechi uá úni imecha jimbo? Mókuantaani ini kurhamarhikuechani, iáminduechantsïni jarhuataati enga niáraska mójtakukuarhini ambe ma juchari irekuarhu.
AMBEJTSÏNI JARHUATAA JIÁNI ENGA MÓJTAKURHISKA AMBE MA
Para erachicha engaksï kʼamakʼamasï úrajka imecheri tiempu para Jeobani marhuakuni, ¿andisï úkua jukajki engaksï iásï máteru ánchikuarhita intsïnhajkia? (Exe je párrafu 5). *
5. ¿Jamberichi néna pʼikuarheraa engachi jimbanhi ánchikuarhita ma intsïnhaska Jeobaeri kúnguarhikuarhu?
5 Iá seachi Beteli marhuani jarhani o máteru nani tiempu kompletueri, niárasïngachi xénchani kʼuiripuni ka asta tsitini imani lugarini engachi jarhajka. Ísï jimbo, engachi jatsijka para mótsini ambe ma jimbo, kánikuachi no sési pʼikuarherasïnga. Jirinhantaasïngachi imechani engachi jurajkuaka ka uandanhiauasïngachi, sánderu jiáni engachi jatsijka para mótsini jimbokajtsïni juchari ikiatspiticha nóteru jurajkusïnguia úni juchari ánchikuarhitani (Mat. 10:23; 2 Kor. 11:28, 29). Ístu, máteru nani uénani marhuani kánikua úkua jukasïndi pʼindekuecha jimbo. Asta engachi jima kʼuanhatsentajka nani engachi anapuejka. Robert ka Mary Jo uandantasïndiksï: “Nóteruchi pʼindespkia imani ambe úni enga juchiniu únhenga ka nóteruchi pʼindespkia juchari mismu idioma jimbo aianhpini. Ísïchi pʼikuarherasïrenga enajkichi no jima anapuepi”. Máteru ambe, jamberichi ménisï uétarhinchani jauaka tumima ka nóchi jatsini. Jamberichi no sési pʼikuarheraaka ka chkeni. ¿Ambejtsïni uá jarhuatani engachi indeni ambe nitamakuarhini jauaka?
Kánikua jukaparhakuesti eskachi no jurajkuaka Jeobani ka mintsikanchi. (Exe je párrafu 6 ka 7). *
6. ¿Nénachi uá no jurajkuni Jeobani?
6 No jurajkuni Jeobani (Sant. 4:8). ¿Nénachi uá ísï úni? Mintsinharhiparini, jimboka ima jindeska enga “kurhauajka kómarhikuechani” (Sal. 65:2). “Imani aiangukuarhi je iámindu ambe enga chári mintsita pʼikuarhinhijka”, ísï uandasïndi Salmo 62:8. Jeoba kánikua sánderu kʼéri ambe úsïndi ka eska engachi jucha kurhakujka o eranhaskani (Efes. 3:20). Ima no solu imani ambe úsïndi ambe engachi kurhakujka kómarhikua jimbo. Parajtsïni jarhuatani juchari uandanhiatecha jingoni imani ambe úsïndi engachi no méni eranhaskapiringa.
7. a) ¿Ambejtsïni jarhuataa parachi no jurajkuni Jeobani? b) Eska na arhijka Ebreu 6:10-12, ¿ambe úkuarhia engachi seguirini jauaka sési marhuakuni Jeobani?
7 Ístujtsïni jarhuataati pauani pauani arhintani Bibliani ka eratsintani ambe engachi arhintajka parachi no jurajkuni Jeobani. Erachi ma enga antesi misioneruepka, uandasïndi: “Uétarhisïndi eskachi seguirini jauaka jatsini familieri jorhenguarhikua ka méntkisï prepararikuarhini para tánguarhikuecha, ísï eskachi na uénga jiáni engachi máteru nani marhuani japka”. Ístu, ju je jánguarhintani aianhpini imani kúnguarhikuarhu anapuecha jingoni engachi iásï jakaia. Jeoba no mirikurhiasïndi imechani engaksï seguirini jaka sési marhuakuni nájkirukaksï nóteru májkueni újkia eska antesi (arhinta je Ebreu 6:10-12).
8. ¿Nénajtsïni jarhuatasïni arisku sáni irekani ambe enga 1 Juanu 2:15-17 arhijka?
8 Arisku sáni irekani. Ju je no jurajkuni eskajtsïni parhakpini anapu uandanhiatecha ójkutaaka parachi sési marhuakuni Jeobani (Mat. 13:22). Ju je no kurhajchaani amiguechani, parientichani o máteru kʼuiripuechani engajtsïni arhijka eskachi uétarhinchasïnga sánderu tumina andani parachi sési irekani (arhinta je 1 Juanu 2:15-17). Ju je mintsikani Jeobani engajtsïni aiachijka jarhuatani jiáni engachi meru uétarhinchani jauaka para juchari jakajkukua sánderu uinhapiti jarhani, parachi sési pʼikuarherani ka parachi jatsini imani ambe engachi uétarhinchani jauaka (Ebr. 4:16; 13:5, 6).
9. Eska na arhijka Proverbios 22:3, 7, ¿andisï jukaparhakue no ísku jatini jopchani tumina ka ambejtsïni jarhuataa sési erakuni ambe ma?
9 No ísku jatini jópchani tumina (arhinta je Proverbios 22:3, 7). Kánikua tumina úrakuarhisïndi para máteru nani mótsini irekani ka fásilisti kantspini. Ísï jimbo, ju je no kuenta euajpini ambe ma engachi no uétarhinchajka. Engachi uandanhiata ambe jatsijka engajtsïni kánikua no sési pʼikuastajka komu familiarhu anapuni ma kuidarini enga pʼamenchani jaka, jamberichi úkua jukanchaaka eratsini na xánchi tumina kuántpia. Engachi indeni ambe nitamakuarhini jauaka, miáni eska engachi kómarhiska Jeobani ka kurhakuni ambe engachi uétarhinchajka, jarhuataatijtsïni ambakiti ambe erakuni úni. Imeri pínandikua engajtsïni ima íntskujka, kuájchakuati juchari eratsikuani ka mintsitani ka jarhuataatijtsïni iatsitakuarhu sési eratsini ambe ma (Filip. 4:6, 7; 1 Ped. 5:7).
10. ¿Ambejtsïni jarhuataa jimbanhi amiguechani jatsiani?
10 Sési pájperani amiguecha ka familia jingoni. Ju je uandontskuarheni juchari amiguecha jingoni ambe engachi pʼikuarherajka ka nitamakuarhini, sánderia imecha jingoni engaksï májkueni ambe nitamakuarhika eska jucha. Inde ambe uáti eskachi sáni sési pʼikuarherantaka (Ecl. 4:9, 10). Nájkirukachi seguirini jaka sési pájperani imecha jingoni nani engachi antesi marhuapka, jatsiskachi para jimbanhi amiguechani jatsiani. Ka para ísï úni, uétarhisïndi sési pájperani máteruecha jingoni. Ju je aianguani sési jásï ambe engachi nitamakuarhika paraksï máteruecha exeni na engachi xáni tsípikua jingoni irekajka engachi marhuakujka Jeobani. Nájkirukaksï máru erachicha no niáraaka kurhanguni andichisï xáni tsitijki tiempu kompletueri marhuani, jamberiksï máteruecha uékaati sánderu ambe míteni ka niáranksï sési pájperani juchantsïni jingoni. Peru ju je exeparini jámani parachi no jukari uandani ambe engachi xáni úka ni imani ambe uandani enga no uinhaperpintajka.
11. ¿Nénachi uá seguirini tsípikua jingoni irekani juchari uarhiiti o acheeti jingoni?
11 Engachi iásï máteru ánchikuarhita intsïnhakia Jeobaeri kúnguarhikuarhu jimboka juchari uarhiiti o acheeti pʼamenchaska, ju je no imani kulparini. Ka engachi jucha jindeka engachi pʼamenchaka, ju je no no sési pʼikuarherani ni eratsini eskachi no úska apoiarini juchari acheetini o uarhiitini. Ju je miáni eskachi májku kuerpueska ka eskachi aiakuska Jeobani eskachi tsimarhani kuidarperaaka ambe uéjkichi nitamakuarhini jarhani (Mat. 19:5, 6). O engachi máteru ánchikuarhita intsïnhakia Jeobaeri kúnguarhikuarhu jimbokachi sapini ma kánguarhiska, ju je arhini sapini eska ima sánderu jukaparhakueska para jucha ka eska nani engachi marhuani japka. Ju je someni arhini eska ima Jeobaeri intsïmperakua máeska (Sal. 127:3-5). Ístu, ju je aianguni sési jásï ambe engachi nitamakuarhika jima engachi marhuani japka, inde ambe uáti para imajtu uékani tiempu kompletueri marhuani, ísï eskachi jucha.
NÉNAKSÏ UÁ JARHUAJPINI MÁTERU ERACHICHA
12. a) ¿Nénachi uá jarhuataani erachichani engaksï tiempu kompletueri marhuani jaka paraksï seguirini marhuakuni Jeobani? b) ¿Ambechi uá úni paraksï no úkua jukanchani ima erachicha engaksï iásï máteru ánchikuarhita intsïnhakia Jeobaeri kúnguarhikuarhu?
12 Jarhastiksï uánikua kúnguarhikuecha ka ístu mándani arhini erachicha engaksï jánguarhintajka jarhuataani imechani engaksï tiempu kompletueri marhuani jaka paraksï seguirini ísï úni. Por ejemplu, arhiasïndiksï eskaksï seguiriuaka marhuani nani engaksï jaka, tuminaksï íntsaasïndi o máteru ambe engaksï imecha uétarhinchajka, oksï kuidariuani imecheri familiarichani (Gal. 6:2). ¿Ambechi uá úni enga juchari kúnguarhikuarhu niáraska nema enga tiempu kompletueri marhuani japka? Ju je no eratsini eska iásï máteru ánchikuarhita intsïnhaskia jimboka no sési úska imeri ánchikuarhitani enga antesi uénga o eska no sési ambe niátaska. * Sánderu sési, uákachi jarhuatani para no xáni úkua jukanchani pʼindeni. Ju je uékperakua jingoni erokani ka sési jásï ambe arhini iámindu ánchikuarhita jimbo enga úka, nájkiruka iásï nóteru xáni uákia jarhuajpeni imeri pʼamenchakua jimbo. Ístuchi jánguarhintani sánderu sési míteni. Ju je jorhenguarhini iámindu ambe enga ima xáni míteka, arhistaminhaka ka na enga xáni sési jorhenaka úni ambe ma.
13. ¿Nénachi uá jarhuatani erachini ma enga jimbanhi ánchikuarhita ma intsïnhajka Jeobaeri kúnguarhikuarhu?
13 Uénani jámani, jamberi erachi uétarhinchaati jarhuajperata para exeni nani irekaa, néna uá nirani nani, ambe ánchikuarhia ka máteru ambe enga meru uétarhijka. Jamberichi jatsiaka para aianguni néna uá maiampini lusiri, itsïri o máteru ambe. Peru ambe enga sánderu uétarhinchaaka, jindesti eskachi kurhangukuaka ka no eskachi lastima uáka. Jamberi ima o imeri parienti ma pʼamenchani jauati. O no sési pʼikuarherani jarhani jimboka uarhirakuarhiska nemani enga xénchenga. * Ka nájkiruka no uandantaaka, jamberi kánikua no sési pʼikuarherani jauati jimboka imeri amiguechani jirinhantaasïnga. Tiempu uétarhisïndi para nóteru xáni no sési pʼikuarherania ka sánderia enga no nani máru pʼikuarherakuarhijka.
14. ¿Nénaksï jarhuataspi aianhpiricha pirenchini ma para pʼindeni nani enga iásï marhuani jakaia?
14 Engachi uéraska imecha jingoni aianhpini ka juchari ambakiti jángua jingoni, jarhautauakachi paraksï sóntku pʼindeni. Pirenchi ma enga ióni marhuaka máteru paisi jimbo, uandasïndi: “Nani engani antesi marhuani japka, pauani pauani jorhentpisïrenga Bibliaeri ambe. Ka iásï engani máteru nani marhuani jakaia, kánikua úkua jukanchasïrenga sikiera ma karakata arhikuantani kʼuiripuechani o bideu ma exeraani. Peru kúnguarhikuarhu anapu erachicha ka pirenchichajtsïni pʼímarhisïndi parachi nirani pʼorhembiantani kʼuiripuechani ka Bibliaeri ambe jorhentpini. Exeani ini ambakiti aianhpirichani [...] eskaksï jarhuataaxapka kʼuiripuechani Jeobani marhuakuni, úspti eskani ambakiti ambe eratsipiringa. Jorhenguarhispka uénani uandontskuarheni nani engani iásï marhuani jakaia. Ini ambe jimbo, ménderuni uéntaspkia sési pʼikuarherani”.
JU JE SEGUIRINI MARHUANI
Ju je exeni nénachi uá sánderu sési marhuani jima nani engachi anapueka. (Exe je párrafu 15 ka 16). *
15. ¿Nénachi uá tsípikua jingoni irekani engachi jimbanhi ánchikuarhita ma intsïnhaska?
15 Úsïngachi tsípikua jingoni irekani jimbanhi ánchikuarhita ma jingoni. Ju je no eratsini eska engachi iásï máteru ánchikuarhita jatsikia Jeobaeri kúnguarhikuarhu jindeska jimbokachi no sési úspka ambe ma o eskachi iásï nóteru xáni ambakiti erachi o pirenchi máeskia. Ju je jánguarhintani exeni nénajtsïni jarhuataxaki Jeoba ka seguirini aianhpini. Ju je májkueni úni eska primeru siglu anapu erachicha engaksï seguirini japka “uandantani ambakiti eianhperakuani nani engaksï nirenga” (Uku. 8:1, 4). Engachi seguiriska aianhpini, jamberijtsïni sési nicheati. Por ejemplu, engaksï máru prekursoricha petanhantapka paisi ma jimbo, imechaksï máteru paisi jimbo mótsispti nani enga ístu uétarhini japka aianhpinhani imani idioma jimbo engaksï prekursoricha jorhenapka uandani. Máru mesicha jimbo, grupuechaksï niáraspti jarhani engaksï sóntku uánini japka.
16. ¿Ambejtsïni jarhuataa parachi tsitini jimbanhi ánchikuarhitani Jeobaeri kúnguarhikuarhu?
16 Nemiasi arhiaspti judiuechani eska enga Jeoba tsípini jarhenga, ima ambesï uinhaperantauendi imechani (Neh. 8:10). No arhiparini na engachi xáni tsitijka nani engachi marhuani jaka, no jindesti inde ambe enga újka eskachi sési pʼikuarheraaka, sino eskachi ambakiti pájperakua ma jatsiaka Jeoba jingoni. Ísï jimbo, ju je no jurajkuni Tata Diosïni, mintsikani eskajtsïni jarhuataaka, arhistachiaka ka úni eskachi jánhaskatiuaka. Ju je miáni eska ambe enga úpka eskachi tsitipiringa imani ánchikuarhitani engachi antesi uénga, jindespka jimbokachi mintsita jingoni uékasïrenga jarhuataani kʼuiripuechani. Jeobajtsïni jarhuataati parachi májkueni pʼikuarherani iásï engachi mintsita jingoni úska jimbanhi ánchikuarhitani Jeobaeri kúnguarhikuarhu (Ecl. 7:10).
17. ¿Ambechi jatsiski para miáni ánchikuarhita jingoni engachi iásï úni jaka Jeobaeri kúnguarhikuarhu?
17 Ju je miáni eskachi méntkisï marhuakuaka Jeobani, peru nani engachi iásï marhuani jaka no méntkisïuati. Jamberichi jimbanhi parhakpinirhu máteru ambe uáka parachi Jeobani marhuakuni ka no ini ambe jingoni engachi iásï úni jaka. Alexéi engachi antesi uandaka exesïndi eska ambe enga iásï nitamakuarhini jaka, jarhuataaka para sánderu orhepani. Uandasïndi: “Desde iónisïa míteska eska Jeoba jarhaska ka eska jimbanhi parhakpini niáraaka jarhani, peruni ísï pʼikuarherasïrenga enajkiksï sáni iauani japi. Iásï sánderuni andarhieraskia Jeobani ka exesïnga eska axuterku jarhaskia jimbanhi parhakpini” (Uku. 2:25). Nani uéjkichi marhuani jarhani, ju je no jurajkuni Jeobani. Imajtsïni no méni jurajkuati; sánderu sési, nani uéjkichi jarhani jarhuataatijtsïni tsípikua jingoni irekani engachi jánguarhintaska marhuakuni na engachi xáni uáka (Is. 41:13).
PIREKUA 90 Ju je uinhaperperantani máteru ka máteruni jingoni
^ párr. 5 Ménisïksï máru Jeobaeri marhuaricha jatsisïndi para jurajkuni tiempu kompletueri marhuani oksï máteru ánchikuarhita intsïnhania Jeobaeri kúnguarhikuarhu. Ini artikulu jimbochi exeaka ambe engaksï nitamakuarhijka ka ambe uá jarhuataani paraksï pʼindeni ménderueni irekani. Ístuchi exeaka nénaksï uá máteru erachicha uinhaperantaani ka jarhuataani. Ka exeauakachi Bibliaeri karakatechani engajtsïni iáminduechani jarhuataaka jiáni enga juchari irekua mójtakuriska.
^ párr. 4 Ístu, uánikua erachicha engaksï jatirikia jurajkukuasïndiksï imecheri ánchikuarhitani erachichani engaksï sapichku jaka. Exea je artikuluechani “Erachicha engajtsï jatirikia, Jeoba jukaparharasïndi engajtsï seguirini jaka marhuakuni” Aianpiri septiembriri de 2018, ka “Néna seguirini jarhani sési pʼikuarherani, nájkiruka mójtakurhiska ambe ma” Aianpiri oktubriri de 2018.
^ párr. 12 Kúnguarhikuarhu anapu orhejtsïkuticha nani enga antesi marhuani japka erachi, jatsistiksï para sóntku úni karta ma nani enga erachiri informasioni ambe karakata jauaka para ima seguirini marhuani komu prekursori, orhejtsïkuti o orhejtsïkutiri jarhuajpiri.
^ párr. 13 Exe je ambe enga uandajka rebista ¡Despertad! “Ayuda para quienes están de duelo”, númeru 3 del 2018.
^ párr. 57 AMBE ENGA XARHATAJKA IMAJENI. Temungurhiri ma engaksï máteru paisirhu marhuani japka komu misioneruecha nóteruksï jima marhuauatia ka ueparinksï uandanuantaaxati kúnguarhikuarhu anapuechani.
^ párr. 59 AMBE ENGA XARHATAJKA IMAJENI. Temungurhiri kʼuanhatsentasïndi nani engaksï anapueka, méntkuksï úndasïndi kómarhini Jeobani para jarhuataani pʼindeni iásï ménderueni irekania.
^ párr. 61 AMBE ENGA XARHATAJKA IMAJENI. Jeobaeri jarhuajperata jingoni, temungurhiri ménderu uéntasïndi tiempu kompletueri marhuani. Uandasïndiksï imani idiomani engaksï jiáni jorhenguarhipka engaksï misioneruepka paraksï ima kʼuiripuechani predikarikuani engaksï no jima anapueka.
