1, 2. a) ¿Ambe exesïni Jeoba engaksï miioni jimbo kʼuiripuecha tánguarhintajka interu parhakpinirhu para Tateeri Senani miántani? b) ¿Ambechi exea ini artikulu jimbo?

¿AMBE exesïni Jeoba engaksï uánikua kʼuiripuecha tánguarhintajka interu parhakpinirhu para Tateeri Senani miántani? No solu exesïndi eskaksï uánikua jarhasïnga, sino mándani kʼuiripuni enga jima jarhajka. Por ejemplu, exeasïndi imechani engaksï mándani uéxurhini nirajka. Máruksï jamberi nirajti nájkirukaksï kánikua no sési kánhajka. Máteruechaksï no méntkisï nirasïndi tánguarhikuecharhu, peruksï exesïndi eskaksï jatsiska para nirani Konmemorasionirhu. Ístu, Jeoba exeasïndi imechani engaksï primeru xanhari uénajka nirani, jamberi jimbokaksï uékasïnga exeni néna úkuarhisïni.

² Seguru eska Jeoba sési pʼikuarherajka engaksï xáni uáni kʼuiripuecha nirajka Konmemorasionirhu (Luk. 22:19). Peru para Jeoba, ambe enga sánderu jukaparhakueka no jindesti na xánksï nirasïni, sino andiksïsï nirajki. Ini artikulurhu, exeakachi ambe ma enga kánikua jukaparhakueka: ¿Andichisï no solu Tateeri Senarhu nirajki enga mándani uéxurhini úkuarhijka, sino ístu tánguarhikuecharhu enga Jeoba preparariuajka mándani semana, para imecha engaksï xénchajka imani? Ju je exeni náki kualidadichaksï úsïni eskachi niuaka tánguarhikuecharhu.

3, 4. a) ¿Andichisï jurajki tánguarhikuecharhu? b) ¿Nákichi kualidadi xarhatasïni engachi jurhajka tánguarhikuecharhu? c) Arhintaparini 1 Korintu 11:23-26 (TNM), ¿andichisï no jatsi para kueratani Konmemorasionirhu?

³ Nirasïngachi tánguarhikuecharhu jimbokachi jima kʼéri ambe arhisïnga Jeobani. Ístu, jimbokajtsïni Jeoba jima jorhendasïnga. Kʼuiripu enga kʼéri pʼikuarherajka, ísï exesïndi eska no nema jatsiska  para jorhendani ambe ma (3 Juanu 9). Peru juchachi k’oru uékasïnga eskajtsïni Jeoba ka imeri organisasioni jorhendaaka (Is. 30:20; Juanu 6:45).

⁴ Engachi nirajka tánguarhikuecharhu, xarhatasïngachi eskachi kaxumbitiska ka eskachi uékasïnga eskajtsïni Jeoba arhistachiaka. Nirasïngachi Konmemorasionirhu, no solu jimbokachi eratsisïnga eska obligasioni máeska, sino jimbokachi kaxumbitiska ka uékasïngachi úni ambe enga Jesusi juramuka: “Ú je ini ambe jíntsïni miántsparini” (arhinta je 1 Korintu 11:23-26, TNM). I tánguarhikua, úsïndi eskachi sánderu jakajkuaka ambe enga úkuarhiaka sánderu orhepani ka miátantasïndijtsïni na engajtsïni xáni xénchajka Jeoba. Peru ima mítisti eskachi no solu mándani uéxurhini uétarhinchasïnga eskachi uinhaperanhantaaka. Jimbosï újti eskaksï jauaka tánguarhikuecha mándani semana ka juramuchintsïni eskachi tánguarhiaka. Kaxumbikua, úsïndi eskachi kurhajchaaka. Mándani semana, uánikua orechanchi úraasïnga parachi sési prepararikuarhini para tánguarhikuecha ka para nirani.

5. ¿Andiksïsï jiókuarhijki Jeobaeri pʼímarperakuani imecha engaksï kaxumbitiika?

⁵ Mándani uéxurhini, uánikua kʼuiripu kaxumbikua jingoni jiókuarhisïndi Jeobaeri pʼímarperakuani, para imeri ambe jorhenguarhini (Is. 50:4). Uánikua xanhari, orhetaksï Konmemorasionirhu nirasïndi ka tátsekuaksï uénania nirani tánguarhikuecharhu (Zac. 8:20-23). Jucha ka imecha engaksï jimbanhika, kánikuachi tsitisïnga eskajtsïni Tata Diosï, engajtsïni jarhuatajka ka pʼímutantani, jorhendaaka ka arhintsïni ambe úni (Sal. 40:17). Ísïsti, no jarhasti ambe ma enga sánderu sési jaka ka jukaparhakueni, eska jiókuarhini pʼímarperakuani para nirani tánguarhikuecharhu, nani engajtsïni jorhendajka Jeoba ka imeri Uájpa enga xáni xénchajka, Jesusi (Mat. 17:5; 18:20; 28:20).

6. Kaxumbikua, ¿néna jarhuataspi achatini ma para Konmemorasionirhu nirani?

⁶ Mándani uéxurhini, jánguarhintasïngachi pʼímarhini kʼuiripuni na engachi xáni úaka, paraksï Konmemorasionirhu nirani. Uánikua kʼuiripu kaxumbitichani, marhuakuasti jiókuarhini pʼímarperakuani. Ju je exeni ejemplu ma. Sáni iónistia enga erachi ma pʼímarperakua ma íntskupka achatini ma, peru ima arhispti eska no úpiringa nirani. Ima chúrikua enga Konmemorasionipka, erachi ísku pakaraspti enga exepka achatini Kʼumanchikua Reinuerirhu inchani jarhani. Achati kánikua tsitispti na engaksï erokapka, jimbosï uénapti nirani iámindu tánguarhikuecharhu. Ma uéxurhini jimbo, solu tanimu tánguarhikuecharhu kuerataspti. ¿Ambe úspi eska nipiringa konmemorasionirhu ka tánguarhikuecharhu? Ísï tátsekua, ima erachi enga pʼímarhipka, uandaspti: “Kʼuiripu máesti enga kánikua kaxumbitiika”. Xarharasïndi eska Jeoba úska eska inde achati niárapiringa imeri iretarhu jarhani. Iásï, itsï atakuarhestia komu Jeobaeri testigu ma (2 Sam. 22:28; Juanu 6:44).

7. Ambe engachi tánguarhikuecharhu jorhenguarhijka ka engachi Bibliarhu arhintajka, ¿nénajtsïni jarhuatasïni parachi kaxumbitiini?

⁷ Ambe engachi tánguarhikuecharhu jorhenguarhijka ka engachi Bibliarhu arhintajka, jarhuatasïndijtsïni parachi kaxumbitiini. Ima semanecha ante de Konmemorasioni úkuarhini, juchari tánguarhikuecha jimbochi sánderu Jesusiri ejemplueri ambe jorhenguarhisïnga ka kaxumbikua enga xarhatapka enga íntspipka imeri tsípikuani juchantsïni jimbo. Ka enga sánderku kueratani jarhajkia para Konmemorasionini, pʼímarhinhasïngachi para Bibliarhu arhintani ambe enga úkuarhipka ante de Jesusi uarhini ka enga tsíntapka. Iámindu ambe engachi jorhenguarhijka, jarhuatasïndijtsïni parachi sánderu jukaparharani Jesusiri uarhikuani. Inde ambe úsïndi eskachi uékaaka májkueni kaxumbitini eska Jesusi ka úni ambe enga Tata Diosï  uéjka, asta jiáni jamberi engachi úkua jukanchaaka (Luk. 22:41, 42).

8. ¿Néna xarhataspi Jesusi eska balori jukaspka?

⁸ Máteru ambe engachi uéjka ísï xarhatani eska Jesusi, jindesti balori. Ju je eratsintani na enga balori xarhatapka imani jurhiatikuecha jimbo ante de uarhini. Sési mítispti eskaksï no ióni jimbo imeri enemiguecha kʼuratsetapiringa, kʼuikirhipiringa ka eskaksï uándikupiringa (Mat. 20:17-19). Nájkiruka indeni ambe nitamakuarhipiringa, no chéspti asta uarhikuarhu jamberi. Enga niárapkia para inde ambe úkuarhini, arhiaspti apostulichani engaksï imani jingoni japka jini jardín de Jetsemaní: “Jauara je ka juia je, era ima engarini entregarpiaka janoxatiia” (Mat. 26:36, 46). Ka enga uáni kʼuiripu enga armadu japka nípka paraksï jupikani, orhepani niáraspti, uandaspti né enga jindepka ima ka arhiaspti soldaduechani eskaksï jurajkuapiringa paraksï imeri apostulicha níntani (Juanu 18:3-8). ¿A no eska kánikua balori xarhataspka? Ini jurhiatikuecha jimbo, kristianuecha engaksï erakukateka ka imecha engaksï máteru karichicherika, kánikuachi jánguarhintasïnga ísï balori jukani eska Jesusi. ¿Néna?

9. a) ¿Andichisï úa balori uétarhinchani parachi iámindu tánguarhikuecharhu nirani? b) ¿Néna jarhuataasïni juchari ejemplu imani erachichani engaksï ónhakata jaka imecheri jakajkukua jimbo?

⁹ Ménisï jarhajti ambe ma enga újka eskachi no úaka iámindu tánguarhikuecharhu nirani. Enga ísïka, balorichi uétarhinchasïnga. Máru erachichaksï pʼamenchasïndi, kánikuaksï kómu pʼikuarherani o desanimadu jarhani. Máteruksï kánikua tekantaxati engaksï imecheri familiaricha no sési kájka o gobiernuecha. Ju je eratsiani imani erachichani engaksï imecheri jakajkukua jimbo ónhakata jaka. ¿Ménisïchi eratsispi eska juchari ejemplu úaka jarhuataani? (Ebr. 13:3). Engaksï erachicha mítijka eskachi seguirixaka Jeobani marhuakuni nájkirukachi uandanhiata ambe jatsijka, úsïndi eskaksï seguiriuaka jakajkuni, balori jukani ka no jurajkuni Jeobani. Apostuli Pablu indeni ambesï úkuarhinchapti. Enga Roma ónhakata japka, kánikua tsípisïrendi enga méni kurhauenga eskaksï imeri ermanuecha seguirixapka Jeobani marhuakuni no sáni chéparini (Filip. 1:3-5, 12-14). Enga sánderku kueratani japkia o ísï no ióni jimbo enga nóteru ónhakata japkia, karta ma karakuaspti Ebreuechani. Imani karta jimbo, arhiaspti imeri ermanuechani eskaksï no jurajkupiringa tánguarhini ka ístu arhiaspti: “Méntku jauena je uékperani komueska májku ermanuecha” (Ebr. 10:24, 25; 13:1).

10, 11. a) ¿Néchanchi jatsiski para Konmemorasionirhu pʼímarhiani? b) ¿Náki rasontsïni íntskusïni Efesu 1:7 parachi ísï úni?

¹⁰ Ístuchi xarhatasïnga balori engachi pʼímarhiajka familiarichani, ánchikuarhitarhu anapu kompanieruechani ka besinuechani paraksï Konmemorasionirhu nirani. ¿Andichisï ísï újki? Jimbokachi meru agradesidu jarhaska ambe enga Jeoba ka Jesusi úka juchantsïni jimbo. Ístuchi uékasïnga eskaksï i kʼuiripuecha jorhenguarhiaka néna úa marhuakuani Tata Diosïri  kóntperata ini pʼímutantskua jimbo (arhinta je Efesu 1:7; Jaŋ. 22:17).

¹¹ Engachi nirajka tánguarhikuarhu, xarhatasïngachi máteru ambe. Jeoba ka Jesusiksï xarhatasti ini kualidadini kʼéri ambe úparini.

12. a) ¿Andiksïsï tánguarhikuecha újki eskachi sánderu xénchaaka Jeobani ka Jesusini? b) Seguni 2 Korintu 5:14, 15, ¿nénachi úa májkueni úni eska Jesusi?

¹² Uékperakua engachi pʼikuarherajka Jeoba ka Jesusi jimbo, úsïndi eskachi niuaka tánguarhikuecharhu ka íksï úsïndi eskachi sánderu uékauaka imechani. ¿Andi? Jimbokajtsïni tánguarhikuecharhu, someni miátantasïnga ambe engaksï Jeoba ka Jesusi úkia juchantsïni jimbo (Rom. 5:8). Ka sánderia enga Konmemorasionijka, jimajtsïni miátantasïndi na engajtsïni xáni xénchajka, asta imechani engaksï no jukaparharajka Jesusiri uarhikuani. Juchachi kánikua agradeserikuasïnga, jimbochisï jánguarhintajka pauani pauani májkueni jámani eska Jesusi (arhinta je 2 Korintu 5:14, 15). Ístu, ambe engachi mintsitarhu pʼikuarherajka, úsïndi eskachi kʼéri ambe arhiaka Jeobani enga ísï íntspika imeri Uájperi tsípikuani. Ka ma ambe engachi úaka úni para kʼéri ambe arhini, jindesti mintsita jingoni komentarini tánguarhikuecharhu.

13. Eksplikari je nénachi úa xarhatani na engachi xáni xénchajka Tata Diosïni ka imeri Uájpani?

¹³ Xarhatasïngachi na engachi xáni xénchajka Tata Diosïni ka imeri Uájpani engachi sakrifisiuechani úajka. Parachi úni tánguarhikuecharhu nirani, somenchi jatsisïnga para mámaru járhati sakrifisiuechani úani. Por ejemplu, uánikua kúnguarhikuechaksï inchatiru jatsisïndi tánguarhikuani enga semanarhu jarhajka, engachi jamberi kuataratini jarhajkia ánchikuarhita jimbo. Ka máteru tánguarhikua fin de semana jimbo úkuarhisïndi engaksï kʼuiripuecha mintsikuarhini jarhajka. ¿Kuenta íntskukuarhisïni Jeoba eskachi nirasïnga tánguarhikuarhu nájkirukachi kuataratini jarhajka? Jo. Engachi sánderu jánguarhintaaka, Jeoba sánderu jukaparharaati imani uékperakuani engachi xarhatakujka (Mar. 12:41-44).

14. ¿Náki ambakiti ejemplujtsïni íntskuski Jesusi?

¹⁴ Jesusijtsïni ambakiti ejemplu ma íntskusti ambe enga arhikuekajka listu jarhani para jarhuataani máteruechani uékperakua jimbo. Ka no solu jimboka imeri chúxapatichani jimbo uarhiska, sino jimboka pauani pauani, orheta imeri disipuluecheri ambe jimbo uandanhiasïrenga ka  no imeri ambe. Por ejemplu, nájkiruka kuataratini japka ka kánikua uandanhiani jarhani, tánguarhintaspti imecha jingoni (Luk. 22:39-46). Ka sánderu eratsisïrendi ambe enga úpiringa íntsaani máteruechani ka no ambe enga úpiringa intsïnhani (Mat. 20:28). Enga juchari uékperakua Jeoba jimbo ka juchari erachicha jimbo xáni kʼéka, kánikuachi jánguarhintaaka para nirani Tateeri Senarhu ka iámindu tánguarhikuecharhu.

15. ¿Néchanchi sánderu uékasïni jarhuataani?

¹⁵ Imani kúnguarhikua jimbochi jarhaska engaksï jurhimbiti kristianuecha jaka ka tsípikua jingonchi úrasïnga juchari tiempuni para kʼuiripuechani pʼímarhiani, paraksï imechajtu andaparhakuni kúnguarhikuarhu. Peru sánderuchi uékasïnga jarhuatani “imechani engaksï Diosïri kʼumanchikuarhu anapueka”, peru engaksï nóteru nirajkia tánguarhikuecharhu ni aianhpini (Gal. 6:10). Uékperakuachi xarhatakuasïnga engachi pʼímarhiajka paraksï ménderu jurhani tánguarhikuecharhu, sánderia paraksï nirani Konmemorasionirhu. Ísï eska Jeoba ka Jesusi, juchajtuchi kánikua sési pʼikuarheraaka engachi exeaka eska nema enga nóteru tánguarheguia, ménderu kʼuanhatsintaska juchari Táti uékpiti jingoni enga jindeka komu karichi eranguti ma (Mat. 18:14).

16. a) ¿Ambechi jatsiski para úni interu uéxurhini ka para ambejtsïni jarhuataa tánguarhikuecha? b) ¿Andisï sési jaki eskachi miántaka ini tiempu jimbo ambe enga Jesusi uandapka ixú Juanu 3:16 jimbo?

¹⁶ Máru semanecha jimbo, jatsiskachi para pʼímarhiani kʼuiripuechani xáni eskachi xáni úaka, paraksï imechajtu nirani Konmemorasionirhu enga biernesï chúrikua 19 de abrili de 2019 jimbo úkuarhiaka (exe je rekuadruni “ ¿Pʼímarhiauachi máteru kʼuiripuechani?”). Ka interu uéxurhini, ju je jarhuajperani parachi no kueratani tánguarhikuecharhu. Sánhani arhixati niárani ima jurhiatikua enga kʼamajkunhaka parhakpini. Jimbosï xáni jukaparhakueti eskachi niuaka tánguarhikuecharhu, engajtsïni jarhuataaka seguirini xarhatani kaxumbikua, balori ka uékperakua (1 Tes. 5:8-11). Ju je xarhatakuni Jeobani na engachi xáni agradeserijka imani uékperakua jimbo enga ima ka imeri uájpa pʼikuarherajka juchantsïni jimbo (arhinta je Juanu 3:16).