SEMANA 3
Néna kuájchakuni mintsitani
“Kuájchaku chíti mintsitani, sánderu eska ambe uéjki engari kuájchakujka” (PROV. 4:23).
PIREKUA 36 Ju je kuájchakuni juchari mintsitani
AMBE ENGACHI EXEAKA *
1-3. a) ¿Andisï Jeoba xéncheni Salomonini, ka náki kóntperatechani íntsaaspi? b) ¿Náki kurhamarhikuechanchi mókuantaua ini artikulu jimbo?
SALOMONI kánikua sapichuespti enga niárapka reini Israeli. Enga uénapkia juramuni, Jeoba tsánharhikua ma jimbo xarhakuspti ka arhispti eska kurhakupiringa ambe enga ima uékapiringa. Ka Salomoni arhispti eska apenasi tumbi sapichu máespka enga no jánhaskatipka, ísï jimbo, kurhakuspti ambakiti mintsita ma (1 Rey. 3:5-10). Inde ambe enga kurhakupka, xarhataspti eska kaxumbitispka. Jimbosï Jeoba xáni xénchendi (2 Sam. 12:24). Komu Jeoba xáni jeiapanhintapka ambe enga Salomoni kurhakupka, úspti eska Salomoni mímixekua ka jánhaskakua jingoni jámapiringa (1 Rey. 3:12).
2 Mientrasi enga Salomoni kurhajchani japka Jeobani, uánikua kóntperatechani intsïnhaspti. Intsïnhaspti sésikua para templuni úni para Jeobaeri nombri, Israeliri Tata Diosï (1 Rey. 8:20). Salomoni kánikua mítikatespti imani mímixekua jimbo enga Jeoba íntskupka. Asta Tata Diosïri jarhuajperata jimbo, karaaspti tanimu libruechani engaksï Bibliarhu jaka, ma jindesti Proverbios.
3 Ini libru jimbo, sáno sieni xanhari úrasïndi uandakuani mintsita. Por ejemplu, Proverbios 4:23 arhisïndi: “Kuájchaku chíti mintsitani, sánderu eska ambe uéjki engari kuájchakujka”. Ini bersikulu jimbo, ¿ambe arhikuekasïni uandakua mintsita? Ini artikulu jimbochi exeaka. Ístuchi mókuantauaka máteru tsimani kurhamarhikuechani engaksï kánikua jukaparhakueka: ¿Néna jánguarhintasïni Satanasi támisï páni juchari mintsitani o no sési úkuni? ¿Ka ambechi úa úni para kuájchakuni? Kurhanguni ini ambe, jarhuataatijtsïni parachi no méni jurajkuni Jeobani.
¿AMBE ARHIKUEKASÏNI MINTSITA?
4, 5. a) ¿Nénajtsïni jarhuatasïni Salmo 51:6 parachi kurhanguni ambe enga arhikuekajka uandakua “mintsita”? b) ¿Néna sáno májkueniski kuidarikuarhini para no pʼamenchani ka kuidarini ambe enga juchari mintsitarhu jaka?
4 Proverbios 4:23 jimbo, úrasïndi uandakuani mintsita para iámindu imani ambe arhikuekani enga kʼuiripu no újka exeni (arhinta je Salmo 51:6). O sea, mintsita imani ambe arhikuekasïndi ambe engachi eratsijka, pʼikuarherajka, újka ka tsitini. No jindesti na engachi xarharajka, sino na engachi jásï ma kʼuiripueka.
5 Kuidarini ambe enga juchari mintsitarhu jaka, májkuenisti eska kuidarikuarhini para no pʼamenchani. Por ejemplu, engachi no uéjka pʼamenchani, jatsiskachi para sési tʼireni ka someni úni ejersisiu. Májkueni, engachi uéjka ambakiti pájperakua ma jatsini Jeoba jingoni, uétarhisïndi eskachi sánderu jorhenguarhiaka imeri ambe ka úni ambe engachi jorhenguarhiaka, ístu uandantani ambe engachi jakajkujka, úati eska juchari jakajkukua sánderu uinhapiti jauaka (Rom. 10:8-10; Sant. 2:26). Máteru ambe, úpiringachi ísï eratsini enajkichi sési jaki, jimbokachi sési xarharasïnga ka jinichi pʼamenchani jarhani. Májkueni, imani ambe jimbo engachi úni jaka para Jeobani marhuakuni, úpiringachi eratsini eska juchari jakajkukua uinhapiti jarhaska, peru jini uénani jarhani ikichakueni jásï ambe eratsini (1 Kor. 10:12; Sant. 1:14, 15). Ju je miáni eska Satanasi uékasïnga eskachi májkueni eratsiaka eska ima. ¿Ambe meru úrasïni para ísï úni, ka nénachi úa kuájchakukuarhini?
AMBE ÚSÏNI SATANASI PARA JUCHARI MINTSITANI TÁMISÏ PÁNI
6. ¿Ambe uékasïni Satanasi ka ambe úrasïni para konseguirini?
6 Satanasi no úsïndi ambe enga Jeoba juramujka, solu imeri ambejku uékasïndi konseguirini ka uékasïndi eskachi májkueni jámaaka ka eratsini eska ima. Peru komu nójtsïni újka obligarini, jimbosï mámaru ambe úrajti para ísï úni. Por ejemplu, úraasïndi imani kʼuiripuechani enga támisï pákia (1 Juanu 5:19). Satanasi uékasïndi eskachi tsitiaaka imani kʼuiripuecha jingoni kúnguarhini, nájkirukachi mítika eskachi niáraaka májkueni eratsini ka májkueni jámani eskaksï imecha (1 Kor. 15:33). Ini ambe úraspti para rei Salomonini támisï páni, enga tembuchapka uáni nanakecha jingoni engaksï no kómarhienga Tata Diosïni. Imaksï úspti eska imeri mintsita sánhani arhipiringa Jeobani jurajkuni (1 Rey. 11:3).
¿Nénachi úa kuájchakuni mintsitani enga Satanasi xáni jánguarhintani jaka parachi májkueni eratsini eska ima? (Exe je párrafu 7). *
7. a) ¿Ambeteru úrasïni Satanasi para úni eskaksï kʼuiripuecha májkueni eratsiaka eska ima? b) ¿Andichisï jatsi para jingontku jámani indeni ambe jingoni?
7 Satanasi úraasïndi pelikulechani ka programechani engaksï telebisionirhu uérajka, para úni eskaksï kʼuiripuecha májkueni eratsiaka eska ima. Mítisti eskaksï istoriecha no solu úsïnga eskachi tsípikuarhiaka, sino eskachi sánhani arhiaka mójtakuni na engachi eratsijka, pʼikuarherani ka jámani. Jesusi mismu úraasïrendi istoriechani para jorhentpini. Por ejemplu, enga uandantaapka ilustrasionichani ambakiti samaritanueri ka uájperi ma enga ísku ambenharhijka tumina (Mat. 13:34; Luk. 10:29-37; 15:11-32). Jimajkani, imecha engaksï májkueni eratsijkia eska Satanasi, úatiksï úraani istoriechani parajtsïni támisï eratsitarani. Ísï jimbo, ju je jingontku jámani. Ísïsti, jarhastiksï pelikulecha ka programecha engachi jimbo újka tsípikuarhini ka jorhenguarhini, sinchi niárani imani ambe eratsini enga no sési jaka. Ísï jimbo, ju je kʼuiripu jánhaskati máeni. Engachi erakuni jauaka ambechi exea, ju je kurhamarhikuarhini: “¿Jorhendaarini i programa o pelikula eskani sési exeaka ikichakueni jásï ambe úni?” (Gal. 5:19-21; Efes. 2:1-3). Engachi kuenta íntskukuarhiska eska Satanasiri eratsikuani jorhentpixaka, ju je jirejiresï kéndikukuarhini, ísï eskachi na uékapiringa kuidarikuarhini para no kérekuarhini pʼamenchakua ma.
8. ¿Nénaksï úa táticha jarhuataani uájpechani paraksï kuájchakuni imecheri mintsitani?
8 Táticha, chájtsï kʼéri responsabilidadi ma jatsiska para kuájchakuani chári sapiichani, jimboka satanasi jánguarhintaxaka paraksï chári sapiicha imani ambe tsitini enga no sési jaka. Seguru eskajtsï kánikua jánguarhintajka paraksï chári sapiicha no pʼamenchakua ambe kérekuarhini. Por ejemplu, limpiujtsï jatsisïnga chári kʼumanchikuani ka kénditasïngajtsï iámindu imani ambe enga úpiringa úni eskaksï chári sapiicha pʼamenchaaka. Májkueni, jatsiskajtsï para kuájchakuani pelikulecheri, telebisioniri anapu programecheri, bideojueguecheri ka Internetiri anapu pájinecheri engaksï úpiringa Satanasiri eratsikuechani jorhendaani. Jeobaksïni íntskusti responsabilidadi parajtsï jorhendaani chári sapiichani Jeobaeri ambe (Prov. 1:8; Efes. 6:1, 4). Ísï jimbo, asï ché je jatsikukuani reglechani engaksï Bibliaeri prinsipiuecharhu jupindaskata jauaka. Arhia je chári sapiichani ambe engaksï úaka exeni ka ambe nómbe, ka jarhuataa je paraksï kurhanguni andijtsïsï ísï arhiajki (Mat. 5:37). Eskaksï na kʼérani jauaka, jorhendaa je paraksï imecha mismu úni exeni ambe enga sési jaka ka ambe nómbe, seguni Tata Diosïri juramukuecha (Ebr. 5:14). Ka asï mirikurhi je eskaksï chári sapiicha kánikua jorhenguarhiaka imani ambe jingoni engajtsï cha uandaaka, peru sánderu imani ambe jingoni engajtsï cha úaka (Deut. 6:6, 7; Rom. 2:21).
9. ¿Ambe uékasïni Satanasi eskaksï kʼuiripuecha eratsiaka ka andisï xáni peligrosue?
9 Satanasi ístu jánguarhintasïndi parachi imani ambe tsitini enga no sési jaka, úparini eskachi jakajkuaka ambe enga kʼuiripu jorhentpijka ka no ambe enga Tata Diosï eratsijka (Kol. 2:8). Por ejemplu, úsïndi eskaksï kʼuiripuecha eratsiaka eska ambe enga sánderu jukaparhakueka, jindeska riku úkuarhini. ¿Andisï xáni peligrosue ísï eratsini? Jimboka, ia sea niáranksï riku úkuarhini o nómbe, imecha engaksï ísï eratsijka, úatiksï xáni jánguarhintani para tumina andani engaksï jamberi niáraaka no jukaparharani imecheri kuerpuni, familiani ka imecheri pájperakua Tata Diosïni jingoni (1 Tim. 6:10). Xáni engachi agradesidu jaka, engajtsïni juchari Táti jánhasti auandarhu anapu jarhuatajka no xáni jukaparharani tuminani (Ecl. 7:12; Luk. 12:15).
NÉNA KUÁJCHAKUNI MINTSITANI
Májkueni eskaksï ióntki anapu kuáricha ka engaksï puertarhu jarhenga, jatsiskachi para jingontku jarhani ka jirejiresï úni ambe ma, para juchari mintsitarhu no niárani ima ambe enga no sési jaka. (Exe je párrafu 10 ka 11). *
10, 11. a) Parachi úni kuájchakukuarhini, ¿ambechi jatsiski para sóntku úni? b) ¿Ambeksï úsïreni ióntki anapu kuáricha ka néna úa juchari konsiensia májkueni marhuani komueska kuári ma?
10 Parachi úni kuájchakuni juchari mintsitani, jatsiskachi para sóntku exeni enga peligru ma jauaka ka jirejiresï úni ambe ma. Uandakuecha engaksï Proverbios 4:23 jimbo jaka, kuárichantsïni miátantaasïndi engaksï rei Salomoniri jurhiatikuecha jimbo japka. Imechaksï bardecharhu karhakua jarhasïrendi paraksï iretani kuáni ka engaksï exenga peligru ma, jirejiresïksï uandantasïrendi. I ambejtsïni jarhuatasïndi kurhanguni ambe engachi jatsika para úni, parachi no imani ambe eratsini enga Satanasi uéjka.
11 Ióntki, kuárichaksï jarhuataasïrendi imechani engaksï ireteri puertarhu jarhenga (2 Sam. 18:24-26). Májku kʼériksï kuájchakusïrendi iretani, sési míkaapariani puertechani enga enemigu ma jurhani japiringa (Neh. 7:1-3). Juchari konsiensia enga Biblia jimbo jorhendakata jaka, * úati májkueni marhuani komueska kuári ma. ¿Néna? Jirejiresïjtsïni eianguparini enga Satanasi uékaaka támisï páni juchari mintsitani, o sea, enga jánguarhintaaka eskachi májkueni eratsiaka, pʼikuarheraaka, tsitini o úni ambe ma ísï eska ima. Méntkisï engajtsïni konsiensia peligru ma aianguni jauaka, jatsiskachi para kasu úkuni ka jánguarhintani eskachi xáni úaka para no úni imani ambe enga no sési jaka.
12, 13. ¿Jamberichi ambe uékani japirini úni, peru ambe sánderu sési jarhaski?
12 Ju je exeni ejemplu ma na engachi jatsika para kuájchakukuarhini Satanasiri. Jeobajtsïni jorhendasti eskachi jucha no jatsiska para uandani ni ísku jándikueri ambe ni imani ambe enga ikichakueni jásïka (Efes. 5:3). Peru ¿ambechi úa engaksï ánchikuarhitarhu o eskuelarhu anapu kompanieruecha uénaaka ikichakueni jásï ambe uandani? Mítiskachi eskachi no jatsiska para jiókuarhini ‘pekaduni, ka indeni jásï ambe engaksï parhakpini anapuecha tsitijka’ (Titu 2:12). Jiájkani, jamberijtsïni juchari konsiensia úati aianguni peligrueri ambe (Rom. 2:15). ¿Ambechi úa? ¿Kasu úkuachi juchari konsiensiani enga ísïka komueska kuári ma ka kéndikukuachi peligruni? Jamberichi uékaaka kurhajchaani ambe engaksï uandani jauaka o imajenichani exeani engaksï exerpiani jauaka. Peru ambe engachi jatsika para úni, jindesti máteru amberi uandani ochi kéndikuni.
13 Balori uétarhisïndi parachi pʼíngukuarhini engaksï kompanieruecha afuersa uékaaka eskachi úaka o eratsiaka imani ambe enga no sési jaka. Úakachi seguru jarhani eska Jeoba exexaka na engachi xáni jánguarhintajka parachi no ísï eratsini eska Satanasi ka eskajtsïni íntskuaka uinhapikua ka jánhaskakua parachi ísï úni (2 Crón. 16:9; Is. 40:29; Sant. 1:5). ¿Ambeteruchi úa úni parachi kuájchakuni mintsitani?
JU JE SEGUIRINI JINGONTKU JARHANI
14, 15. a) ¿Ambe uétarhisïni eskachi peerani juchari mintsitarhu ka nénachi úsïni ísï úni? b) Proverbios 4:20-22, ¿nénajtsïni jarhuatasïni parachi sési marhuatani ambe engachi Bibliarhu arhintajka? (Ístu exe je rekuadruni “ Ambe úni para eratsintani”).
14 Para mintsitani kuájchakuni, nochi solu jatsiska para no jiókuarhini no sési jásï ambe, sino ístu jiókuarhini imani ambe enga sési jaka. Ju je ménderu eratsintani ireteri ejempluni enga kʼérati bardecha jingoni ótakata japka. Ima enga puertarhu jarhenga, sési míkaasïrendi puertechani para enemigu no inchaakuni. Peru ménichanisï mítaasïrendi para úni inchaatani tʼirekua ka máteru ambe enga kʼuiripu uétarhinchenga. Engaksï no ísï úpiringa, kʼuiripuechaksï uarhipirindi kʼarhingua jimbo. Májkuenisti, jatsiskachi para jurajkuni eska juchari mintsitarhu ima ambe jauaka engajtsïni Jeoba jorhendajka.
15 Bibliarhu, úsïngachi arhintani na enga eratsijka Tata Diosï. Ísï jimbo, méntkisï engachi arhintajka, úsïngachi eskajtsïni jarhuataaka mójtakuni na engachi eratsijka, pʼikuarherajka ka jámani. Parajtsïni sési marhuachini ambe engachi Bibliarhu arhintajka, jatsiskachi para tsimani ambe úni. Orheta, uétarhisïndi kómarhini. Pirenchi ma uandasïndi: “Ante de Bibliani arhintani, Jeobani kurhakusïnga eskarini jarhuataaka ambakiti ambe exeni enga imeri Karakatarhu jaka” (Sal. 119:18). Ka tátsekua, jatsiskachi para eratsintani imani ambe engachi arhintajka. Engachi ini ambe újka, Tata Diosïri Karakatajtsïni meru mintsitarhu niárachesïndi ka niárasïngachi tsitini na enga eratsijka Jeoba (arhinta je Proverbios 4:20-22; Sal. 119:97).
16. ¿Nénajtsïni marhuachisïni exeni kanali JW Broadcasting? Jatsiku je ejemplu ma.
16 Máteru ambe engachi úaka úni parajtsïni jarhuatani na enga eratsijka Jeoba, jindesti iámindu ambe exeni enga kanalirhu jaka JW Broadcasting®. Temungurhiri ma uandasïndi: “Programecha engaksï mándani mesi uérajka, mókuntskua máestiksï juchari kómarhikuecheri. Sésijtsïni pʼikuastasïndi ka uinhaperantasïndijtsïni engachi jandiajku ka kómu pʼikuarherani jarhajka. Ka kʼumanchikuarhu, sómenchi kurhauani jarhasïnga pirekuechani, jiáni engachi úmantani jarhajka, ambantskantani o engachi solu té ma arhani jarhajka”. I programechajtsïni jarhuatasïndi kuájchakuni mintsitani. Jorhendasïndijtsïni ísï eratsini eska Jeoba ka parachi pʼíngukuarhini para no májkueni eratsini eska Satanasi.
17, 18. a) Seguni 1 Reyes 8:61, ¿ambe niárasïni úkuarhini engachi újka ambe engajtsïni Jeoba jorhendajka? b) ¿Ambechi jorhenguarhisïni rei Esekiasiri ejemplu jingoni? c) Májkueni eska Dabidiri kómarhikua enga Salmo 139:23, 24 jaka, ¿ambechi úa kurhakuni Jeobani?
17 Méntkisï engachi exejka na engajtsïni xáni marhuachijka úni ambe enga sési jaka, juchari jakajkukua sánderu uinhapiti jarhasïndi (Sant. 1:2, 3). Engachi újka eska Jeoba tsípiaka arhintsïni eskachi imeri uájpeska, sésichi pʼikuarherasïnga ka sánderuchi uékasïnga jaiapanherantani (Prov. 27:11). Mándani tsʼéjkukua engachi nitamanchajka, oportunidadi máesti parachi xarhatani eskachi iámu mintsita jingoni marhuakuxaka Jeobani (Sal. 119:113). Mintsita jingonchi xénchasïnga Jeobani ka meruchi uékasïnga kumplirini ambe engajtsïni ima juramuchijka ka úni ambe enga ima uéjka (arhinta je 1 Reyes 8:61).
18 Ísïsti, iáminduechachi niárasïnga no sési ambe úni, jimbokachi no perfektueska. Enga inde ambe úkuarhiaka, ju je miántani rei Esekiasiri ejempluni. Ima niáraspti no sési ambe úni, peru moantaspti ka seguirispti Jeobani marhuakuni iámu mintsita jingoni (Is. 38:3-6; 2 Crón. 29:1, 2; 32:25, 26). Ísï jimbo, ju je no jiókuarhini imani ambe eratsini enga Satanasi uéjka. Ju je kurhakuni Jeobani eskajtsïni jarhuataaka ambakiti mintsita ma jatsini (1 Rey. 3:9; arhinta je Salmo 139:23, 24). Engachi sánderu kuájchakuska juchari mintsitani eska ambe uéjki, nochi méni jurajkuaka Jeobani.
PIREKUA 54 “Í jindesti xanharu”
^ párr. 5 Satanasijtsïni tsʼéjkukuechani jatsikuchiasïndi para úni eskachi jurajkuaka Jeobani. ¿Jurajkuachi eskajtsïni enganiariuaka ochi méntkisï Jeoba jingoni jaua? Na engachi mókuntaaka ini kurhamarhikuani, no imani ambe jimboeuati na engaksï xáni úkua jukaaka tsʼéjkukuecha, sino na engachi xáni sési kuájchakuaka juchari mintsitani. ¿Ambechi arhikuekasïni engachi mintsiteri ambe uandajka? ¿Néna jánguarhintasïni Satanasi para támisï páni mintsitani? ¿Ka nénachi úa kuájchakuni? I artikulu mókuantauati ini tanimu kurhamarhikuechani engaksï xáni jukaparhakueka.
^ párr. 11 JUKAPARHAKUA AMBE: Biblia arhisïndi eska konsiensia, jindeska ima ambe engajtsïni Tata Diosï íntskuka parachi úni mítini sini sési jarhaski ambe engachi eratsijka, pʼikuarherajka ka úni, ka ístu parachi juchajkumindu jusgarikuarheni (Rom. 2:15; 9:1). Konsiensia ma enga Bibliani jimbo jorhendakata jaka, imaesti enga úraajka Jeobaeri juramukuechani engaksï imeri Karakatarhu jaka, para exeni sini ima ambe engachi eratsijka, újka o uandani, sési jarhaski o nómbe.
^ párr. 56 AMBE ENGA XARHATAJKA IMAJENI. Erachi ma enga itsï atakuarhikia, telebisioni exexati ka mátirku ísku jándikueri ambe xarharasïndi ka jatsisti para eratsini ambe úa.
^ párr. 58 AMBE ENGA XARHATAJKA IMAJENI. Enga kuári ma exejka peligruni, sóntku uandantasïndi. Ka imecha engaksï puertarhu jarhajka, jirejiresïksï míkaasïndi ka tanhaparhakuani iretarhu anapu puertechani.
