1, 2. a) ¿Andijtsïnisï Jesusi jorhenda eskachi no jatsiska para uánikua ambe úni para imeri uarhikuani miántani? b) ¿Náki Jesusiri kualidadichanchi jorhenguarhiaua?

¿ÚAJTSÏ uandantani ambe engachi mándani uéxurhini újka engachi tata Jesukristueri uarhikuani miántajka? Jo, jimboka ambe engachi újka, no úkua jukaska. Peru nema úati kurhamarhikuarhini: “¿Andisï ambe ma enga xáni jukaparhakueka, no úkua juka para úntani?”.

² Enga Jesusi Echerirhu japka, méntkisï jorhentpespti jurhimbikua ambe enga jukaparhakueka, enga sési ka sóntku kurhangukuarhienga (Mat. 7:28, 29). Ísïjtsïni jorhendasti parachi úntani Konmemorasionini, * no uánikua ambe úparini, peru enga kánikua jukaparhakueuaka. Ju je jorhenguarhini íri ambe, exeparini ambe enga Jesusi úpka ka uandani. I ambejtsïni jarhuataati sánderu sési kurhanguni kaxumbikuani, balori ka uékperakua enga Jesusi xarhatapka. Ístuchi exeaka ambechi jatsiski para úni, parachi májkueni jámani eska ima.

3. Engachi arhintajka Mateu 26:26-28 (TNM), ¿andichisï uandajki eska no uánikua ambe uétarhispka imani Miántskua jimbo enga Jesusi uaxastapka, ka ambe arhikuekasïni kurhinda no xarhiperakua jukari ka binu?

³ Enga Jesusi imeri onse apostulicha jingoni japka, juramukuaspti eskaksï miántapiringa imeri uarhikuani. Para indeni ambe úni, solu kurhinda no xarhiperakua jukari úraspti ka binu enga Paskua jimbo pakarapka (arhinta je Mateu 26: 26-28, TNM). Arhiaspti imeri apostulichani eska ima tsimani ambe engaksï úrapka, arhikuekasïrengaksï imeri kuerpu perfektu ka imeri iurhiri, enga no ióndani íntspepiringa imechani jimbo. Apostulichani no ísku pakataapti enga imani sena jimbo no uánikua ambe uétarhipka para úni. ¿Andi nómbe?

4. ¿Náki konseju enga Jesusi Martani íntskupka, jarhuatasïntsïni kurhanguni andisï Konmemorasioni jimbo no uánikua ambe uétarhijki?

⁴ Ju je miántani ambe enga úkuarhipka máru mesi antesi, enga Jesusi tanimu uéxurhini páni japkia eianhpini. Enga imeri amiguechani pʼorhembiani japka, Lasaruni, Martani ka Mariani, uénaspti jorhendaani. Nájkiruka Marta kʼumanchikuarhu japka, masi arhixapti tʼirekua úmantani enga kánikua úkua jukapka, para ima kʼuiripu enga kʼéri ambepka. Peru Jesusi uékperakua jingoni arhispti eska no méntkisï uétarhisïrenga kʼéri tʼirekua ma úmantani (Luk. 10:40-42). Tátsekua, enga sánderku kueratani japkia para imeri tsípikuani íntspini, úspti ambe enga Martani arhipka. Prepararispti tánguarhikua ma enga no uánikua ambe uétarhipka. ¿Ambejtsïni jorhendasïni i ambe Jesusiri?

5. Enga ísï no uánikua ambe uétarhijka Konmemorasioni jimbo, ¿ambejtsïni jorhendasïni Jesusiri ambe ka inde ambe néna terokuntasïni Filipusʌ 2:5-8 (TNM) jingoni?

⁵ Iámindu ambe enga Jesusi úpka ka uandani, xarhataspti eska kaxumbitispka. Jimbojtsïnisï no ísku pakatajti eska ima chúri ante de uarhini, xarhatapiringa kaxumbikua (Mat. 11:29). Mítispti eska no ióni jimbo, kʼéri sakrifisiu ma úpiringa enga no méni úkuarhini japka ka eska Jeoba tsítantapiringa ka Rei úni auandarhu. Nájkiruka ísïpka, no úspti kʼéri kʼuínchikua ma para imeri uarhikuani miántani, paraksï máteruecha kʼéri ambe exeni. Sánderu sési, arhiaspti imeri chúxapatichani eskaksï ma xanhari miántapiringa mándani uéxurhini, no uánikua ambe úparini ka enga sési japiringa (Juanu 13:15; 1 Kor. 11:23-25, TNM). Ísï úparini, xarhataspti eska no kʼéri ambe exekuarhisïrenga. Xáni engajtsïni sési pʼikuastajka mítini eska juchari auandarhu anapu Rei, kaxumbitiska (arhinta ja Filipusʌ 2:5-8, TNM).

6. ¿Nénachi úa májkueni kaxumbitini eska Jesusi engachi no sési nitamakuarheni jauaka?

⁶ Ma ambe engachi úaka úni parachi májkueni kaxumbitini eska Jesusi, jindesti sánderu uandanhiani máteruecha jimbo ka eska juchari ambe jimbo (Filip. 2:3, 4). Ju je eratsintani  ambe enga úpka ima chúri ante de uarhini. Nájkiruka mítipka eska kánikua kómu nitamakuarhepiringa imeri uarhikua jimbo, sánderu uandanhiaspti na engaksï xáni no sési pʼikuarherapiringa imeri ambakiti chúxapaticha. Ísï jimbo, ima últimu chúri jorhendaaspti, uinhaperantaaspti ka sési pʼikuastantaani (Juanu 14:25-31). Xarhataspti eska sánderu uandanhiaxapka paraksï máteruecha sési jarhani ka eska imajkumindu uandanhiakuarheni. Xáni ambakiti ejemplu ma engajtsïni xarhatachika parachi kaxumbitini.

7. Enga Jesusi na uaxastapkia Tateeri Senani, ¿néna xarhataspi eska kánikua balori jukaspka?

⁷ Enga na uaxastapkia Tateeri Senani, Jesusi xarhataspti eska kánikua balori jukaspka. ¿Néna? Úspti ambe enga Tata Diosï uékenga, nájkiruka mítipka eska indeni ambe jimbo no sési nitamakuarhepiringa, jimboka arhinhapiringa eska no sési ambe uandaspka Tata Diosïri ambe ka uándikunhapirindi (Mat. 26:65, 66; Luk. 22:41, 42). No méni jurajkuspti Jeobani ka kʼéri ambe arhispti imeri nombrini, uandaspti eska Tata Diosïjkusï jukanchaka para juramuni ka ústi eskaksï kʼuiripuecha engaksï moantaaka imecheri pekaduecheri, jatsiaka tsípikua para méntkisï. Ístu, preparariuaspti imeri chúxapatichani paraksï úni orhepani uérani imani ambe jimbo engaksï sánderu orhepani nitamakuarhepiringa.

8. a) ¿Ambe arhiaspi Jesusi imeri ambakiti apostulichani? b) Imani uéxurhinicha tátsekua enga Jesusi uarhipkia, ¿nénaksï xarhataspi imeri apostulicha eskaksï seguirixapka balori jukani ísï eska Jesusi?

⁸ Ístu Jesusi xarhataspti balori enga no imeri uandanhiatechani eratsiani japka, sánderu sési, jingontku jarhaspti ambe engaksï imeri apostulicha uétarhinchenga. Enga arhipkia Judasïni eska uéntapiringa jima engaksï japka, no uánikua ambe úparini uaxastaspti Tateeri Senani, enga miátantaapiringa  imeri chúxapatichani engaksï erakukatepiringa, na enga xáni marhuapiringa Jesusiri iurhiri ka ístu jimbanhi pakatperakuarhu jarhani (1 Kor. 10:16, 17). Para úni jarhuataani imeri disipuluechani tekantani ka únksï imani jingoni jarhani auandarhu, arhiaspti ambe enga ima ka imeri Tátemba uékenga eskaksï úpiringa (Juanu 15:12-15). Ístu eianguaspti imani tsʼéjkukuechani engaksï jatsipiringa para orhepani uérakuani. Tátsekua arhiaspti eskaksï balori jukapiringa májkueni eska ima (Juanu 16:1-4a, 33). Uánikua uéxurhini tátsekua, imeri disipuluechaksï seguirixapti májkueni balori jukani eska Jesusi ka jingontkuksï jarhani paraksï iáminduecha jarhuajperani, nájkirukaksï no sési nitamakuarhepiringa (Ebr. 10:33, 34).

9. ¿Nénachi úa májkueni balori jukani eska Jesusi?

⁹ Ini jurhiatikuecha jimbo, ístuchi májkueni balori xarhatasïnga eska Jesusi. ¿Néna? Por ejemplu, jarhuatapariani imani erachichani engaksï no sési kánhajka imecheri jakajkukua jimbo. Ménisï, máruksï ísku jatini ónhanhasïndi. Enga inde ambe úkuarhiaka, jatsiskachi para kuájpiani ka jarhuataani xáni eskachi xáni úaka (Filip. 1:14; Ebr. 13:19). Máteru ambe engachi úaka úni parachi xarhatani eskachi balori jukaska, jindesti seguirini eianhpini “no sáni chéparini” (Úku. 14:3). Májkueni eska Jesusi, juchajtuchi seguiriuaka Reinueri ambe eianhpini, nájkirukaksï máteruecha no uékaaka ojtsïni no sési kámani. Peru ¿ambechi úa úni engachi ménisï pʼikuarheraska eskachi no káni balori jukaska?

10. Máru semana ante de Konmemorasioni úkuarhini, ¿ambechi jatsiski para úni ka andi?

¹⁰ Ambe ma engajtsïni jarhuataaka para sánderu balori jukani, jindesti eratsini erokuarhikuani engachi jatsika Jesusiri uarhikua jimbo (Juanu 3:16; Efes. 1:7). Semanecha ante de Konmemorasionini, úsïndiksï eskachi sánderu agradeseriuaka pʼímutantskuani. Imani jurhiatikuecha jimbo, ju je arhintani Bibliaeri arhintskuani ka sési eratsintani iámindu ambe enga úkuarhipka ante de Jesusi uarhini. Ísï, engachi tánguarhintaaka para Tateeri Sena, sánderuchi sési kurhanguaka ambe enga xáni arhikuekajka kurhinda ka binu, ka Jesusiri uarhikua enga xáni kʼéri ambeka. Engachi kurhangujka ambe engaksï Jesusi ka  Jeoba úka juchantsïni jimbo, ka na engajtsïni marhuachijka juchantsïni ka ístu imechani engachi xáni uéajka, niárasïngachi sánderu jakajkuni ambe enga úkuarhiaka sánderu orhepani ka inde ambe úsïndi eskachi balori jatsiaka para úni tekantani kʼamarhukuni jamberi (Ebr. 12:3).

11, 12. Asta ixú jamberi, ¿ambechi jorhenguarhiskia?

¹¹ Ixú jamberichi exeskia eska Tateeri Sena, no solujtsïni miátantasïnga andisï xáni jukaparhakue pʼímutantskua, sino ístu na enga xáni kaxumbitika Jesusi ka balori jukani. Mintsita jingonchi jeiapanhikuntasïnga enga seguirini jaka xarhataani ini xáni ambakiti kualidadicha, iásï enga Kʼéri Saserdotika auandarhu ka engajtsïni kómarhijpichijka parachi pʼímutantskata uérani (Ebr. 7:24, 25). Parachi meru xarhatani eskachi agradesidu jarhaska, jatsiskachi para méntkisï kurhajchani ambe engajtsïni juramuchika, eskachi jatsiska para miántani imeri uarhikuani (Luk. 22:19, 20). Mándani uéxurhinchi ísï úsïnga, imani jurhiatikua jimbo enga terokuntaaka jurhiatikua 14 de nisani seguni judiuecheri kalendariu ka juchari kalendariu jingoni, i jindesti fecha enga sánderu jukaparhakueka iámu uéxurhiniri.

¹² Engachi eratsintajka na enga no uánikua ambe uétarhijka Tateeri Sena jimbo, ístuchi exesïnga kualidadi ma enga úpka eska Jesusi uarhipiringa juchantsïni jimbo. Jiáni enga ixú Echerirhu irekapka, indeni kualidadini sánderu xarhataspti. Ju je exeni nákiski.

13. Ambe enga Juanu 15:9 ka 1 Juanu 4:8-10 arhijka, ¿nénaksï xarhatasïni Jeobaeri ka Jesusiri uékperakuani, ka néchani marhuakuasïni inde uékperakua?

¹³ Ambe enga xáni úpka Jesusi, sési xarhataspti na engajtsïni Jeoba xáni xénchajka (arhinta je Juanu 15:9; 1 Juanu 4:8-10). Uékperakua, úspti eska íntspepiringa imeri tsípikuani juchantsïni jimbo. Ia sea engachi erakukateka o máteru karichicheri, marhuachisïndijtsïni uékperakua engajtsïni Jeoba ka imeri Uájpa xarhatachika ini sakrifisiu jimbo (Juanu 10:16; 1 Juanu 2:2). Ístu, ju je exeni na enga ini tánguarhikua jimbo, enga jindeka Tateeri Sena, Jesusi xarhatakuajka eska uékaasïnga ka kurhangukuani imeri disipuluechani.

14. ¿Néna xarhatakuaspi Jesusi imeri disipuluechani eska uékasïrenga?

¹⁴ Eskachi na exekia, Jesusi no juramukuaspti erakukatechani eskaksï uánikua ambe úpiringa, sino sena májku. Eska na nitamaka tiempu, jatsistiksï para mándani uéxurhini miántani Jesusiri uarhikuani, ambe uéjkiksï nitamakuarhini jarhani, ménisï asta engaksï ónhakata jarhajka (Jaŋ. 2:10). ¿Úxakiksï úni ambe enga Jesusi juramukuapka? Jo.

15, 16. Máru erachicha engaksï kánikua no sési nitamakuarheka, ¿nénaksï úski úntani Tateeri Senani?

¹⁵ Ambakiti kristianuechaksï méntkisï jánguarhintasti para miántani tata Jesukristueri uarhikuani ka seguirixatiksï ísï úni. Jánguarhintasïndiksï xáni eskaksï xáni újka paraksï ísï úni eska Kristu na juramuka, ménisï asta jamberi enga kánikua úkua jukajka. Ju je exeni ambe enga erachi Harold King nitamanchapka. Komu China anapu kárselirhu ma jimbo japka, no nema jingoni úsïrendi uandontskuarhini, jatsispti para jirinhakuntani néna jámapirini para úntani Konmemorasionini. Sïpatikuarku prepararisïrendi kurhinda ka binu, imani ambejku úraparini enga jatsipiringa. Ístu, jánguarhintasïrendi tantiarikuni fechani. Enga niárengia para úntani, jandiajku piresïrendi, kómarhisïrendi ka nitamatarasïrendi diskursu ma.

¹⁶ Ju je exeni máteru ejemplu. Enga Segunda Guerra Mundiali jarhani japka, máru pirenchicha engaksï kampurhu ma ónhakata japka, úpirindiksï uándikunhani, jimbokaksï  úntaspka Tateeri Senani. Komu miántskua jimbo no uánikua ambe úkuarhijka, úsptiksï sïpatekuarku úntani. Uandantasïndiksï: “Banku ma jimbo engachi takusï urapiti ma pérapka ka kurhinda ka binu, ma uirhipandanchi anhandetixapka. Komu lusi jimbojtsïni úpiringa exeni, kandelachi ma etskuspka para kuarturhu tʼíntskani. [...] Ménderuchi aiakuspka juchari Tátini eskachi úrapiringa iámindu juchari uinhapikuani para imeri nombrini pímbinhajkuntani”. ¡Xáni engaksï kʼéri jakajkukua ma jatsipka! Ka engachi újka úntani Konmemorasionini, nájkiruka kánikua úkua jukaaka, inde ambejtsïni xarhatachesïndi eskajtsïni Jesusi kánikua xénchasïnga.

17. ¿Ambe sési jarhaski parachi kurhamarhikuarhini?

¹⁷ Enga niárani jauakia para Konmemorasioni úkuarhini, sési jarhasti eskachi kurhamarhikuarhiaka: “¿Néna úa sánderuni sési xarhatani uékperakua ísï eska Jesusi? ¿Sánderuni uandanhiasïni imani ambe jimbo engaksï erachicha uétarhinchajka ka eska juchiti ambe jimbo? ¿Jukari jamberi erokuarhisïni erachicheri ambe o exesïni nani engaksï jamberi úaka úni ambe ma?”. Ju je méntkisï májkueni úni eska Jesusi ka kurhangukuani (1 Ped. 3:8).

18, 19. a) ¿Amberichi úa seguru jarhani? b) ¿Cha ambe jánguarhinta úni?

¹⁸ Nóteru ióndani, nóteru uétarhiatia eskachi miántaaka Jesusiri uarhikuani. Enga Jesusi “junguaka” grani tribulasionirhu, auandarhu páuati “erakukatechani” engaksï útasï Echerirhu jauaka. Jiáni uératini, Miántskua nóteru únhantaatia (1 Kor. 11:26; Mat. 24:31).

¹⁹ Úakachi seguru jarhani eska asta jiáni enga nóteru úkuarhiakia Tateeri Sena, sésichi pʼikuarheraaka miántani ini tánguarhikuani komu sánderu ambakiti ejemplu ma kaxumbikueri, baloriri ka uékperakueri enga no ma kʼuiripu xarhataka. Seguru eska imecha engaksï méni nika Konmemorasionirhu, aianguauatiksï imechani engaksï jiáni irekaaka. Kurhaani ini ambe, kánikua marhuakuauati. Jimajkani, parajtsïni iásï marhuachini Konmemorasioni, jatsiskachi para jánguarhintani májkueni kaxumbini, balori jukani ka uékpini ísï eska Jesusi. Engachi ísï úska, seguruchi jarhaska eskajtsïni Jeoba újchakuraaka (2 Ped. 1:10, 11).