SEMANA 8
Andisï jukaparhakue diosmeiamukua arhijpini
“Inde jimbo diosmeiamukua arhi je” (KOL. 3:15, Táta Diósïri Uandakua Tata Jesukristueri Aiatsperakua [TDU]).
PIREKUA 46 Diosmeiamu, Jeoba
AMBE ENGACHI EXEAKA *
1. ¿Néna xarhataspi Samaria anapu achati ma eska jukaparharaspka enga Jesusi tsinapka?
IMA diesi kʼuiripu lepraksï pʼamenchaxapti ka kánikuaksï no sési pʼikuarheraxapti. Mítisptiksï eska Jesusi úsïrenga kénditani na uéjki jásï pʼamenchakua ma ka seguruksï jarhaspti eska imechani úpiringa tsinaani. Ísï jimbo, ma jurhiani engaksï iauani uératini exepka, uinhachaparinksï arhispti: “Jesusi, Jorhentpiti, kóndintajtsïni sáni”. Jesusi kurhauaspti ka tsinaaspti iáminduechani. Seguru eskaksï iáminduecha kánikua jukaparharapka * ambe enga Jesusi úpka. Peru solu maechakuajkusï diosmeiamukua arhipti. Ima achati enga Samaria anapuepka, uinhachaparini kʼéri ambe arhispti Tata Diosïni (Luk. 17:12-19).
2, 3. a) ¿Ambe jimbochi úpirini mirikurhini diosmeiamukua arhijpini? b) ¿Ambechi jorhenguarhia?
2 Ísï eska ima achati, juchajtuchi uékasïnga xarhatani eskachi jukaparharasïnga engaksï máteruecha ambakiti ambe újka juchantsïni jimbo. Peru jamberichi ménisï mirikurhijka xarhatani o diosmeiamukua arhijpini.
3 Jorhenguarhiakachi andisï xáni jukaparhakue eskachi diosmeiamukua arhijpiaka. Ístuchi ménderu exeauaka máru Bibliarhu anapu ejempluechani engaksï ísï úpka ka máteruecheri engaksï no ísï úpka. Ístuchi exeaka ambechi úa úni parachi xarhatani eskachi jukaparharasïnga ambe engaksï máteruecha újka.
ANDISÏ JUKAPARHAKUE DIOSMEIAMUKUA ARHIJPINI
4, 5. ¿Andichisï jatsi para diosmeiamukua arhijpini?
4 Jeobajtsïni íntskusïndi ejemplu parachi diosmeiamukua arhijpini. Ísï úsïndi enga újchakuraajka imechani engaksï jeiapanherantajka (2 Sam. 22:21; Sal. 13:6; Mat. 10:40, 41). Ka Bibliajtsïni arhisïndi: “Terokukunta je Diosïni komueska imeri uájpecha enga ima xáni uéajka” (Efes. 5:1). Jiájkani, uékasïngachi diosmeiamukua arhijpini jimbokachi uékasïnga májkueni úni eska Jeoba.
5 Ístu, engajtsïni máteruecha diosmeiamukua arhijka, úsïndi eskachi sési pʼikuarheraaka. Peru engachi diosmeiamukua arhiajka máteruechani, úsïngachi eskaksï imecha sési pʼikuarheraaka. ¿Andi? Jimbokaksï exesïnga eskajtsïni kánikua marhuacheska ambe engaksï imecha úka parajtsïni jarhuatani o íntskuntsïni ambe ma engachi uétarhinchani japka. Indeni ambe jimbo, sánderuchi sési pájperasïnga imecha jingoni.
6. ¿Néna terukuntasïni diosmeiamukua arhijpini máru mansanecha orueri jingoni?
6 Kánikua jukaparhakuesti diosmeiamukua arhijpini. Biblia uandasïndi: “Ima uandakua enga jiáni uandanhajka enga meru uétarhini jarhajka, ísïsti komu mansanecha orueri engaksï plateri adornu jukaka” (Prov. 25:11). ¿A no eska mansana ma orueri enga plateri adornu jukaka kánikua sési jáxepiringa? Ka ístu kánikua jukaparhapirindi. ¿Nénachi pʼikuarherapirini engajtsïni nema inde jásï ambe intsïkuarhipiringa? Jiájkani, sési járhati uandakuecha jingoni diosmeiamukua arhijpini, úati májkueni jukaparhakueni. Ístu, ísï eskachi na sési patsapiringa mansana oruerini, jamberi ima kʼuiripu méntkisï miáni jauati engachi diosmeiamukua arhiaka.
TATA DIOSÏRI MARHUARICHA ENGAKSÏ JUKAPARHARAPKA AMBE
7. a) Eska na arhijka Salmo 27:4, ¿néna xarhataspi Dabidi eska jukaparharasïrenga ambe enga Jeoba úpka imani jimbo? b) ¿Nénaksï xarhataspi Asafiri desendienticha?
7 Dabidi jindespti ma ióntki anapu Tata Diosïri marhuaricheri engaksï diosmeiamukua arhijpienga (arhinta je Salmo 27:4). Úkuecha jingoni xarhataspti eska mintsita jingoni jukaparharasïrenga Jeobani marhuakuni. Por ejemplu, íntspespti uánikua ambe enga jukaparhapka para templu únhani. Máteru ejemplu, jindestiksï Asafiri desendienticha. Diosmeiamukuaksï arhispti Jeobani engaksï uántapka pirekuechani para kʼéri ambe arhini imani. Ma pirekua jimboksï diosmeiamukua arhispti Jeobani ka uandasptiksï eskaksï ísku pakaraspka imeri xáni sési jásï kueraakata ambe jimbo (Sal. 75:1). Xarharasïndi eska Dabidi ka ístu Asafiri desendientichaksï uékasïrenga xarhatani na engaksï xáni jukaparharenga imani kóntperatechani enga Jeoba íntsaapka. Ka ¿juchachi néna úa májkueni úni eska imecha?
¿Ambejtsïni jorhendasïni karta enga Pablu karakuapka Roma anapu kristianuechani parachi diosmeiamukua arhiani máteruechani? (Exe je párrafu 8 ka 9). *
8, 9. a) ¿Néna xarhataspi apostuli Pablu eska jukaparharaasïrenga imeri ermanuechani? b) ¿Ka nénaksï pʼikuarherapi imecha?
8 Apostuli Pablu jukaparharaasïrendi imeri ermanuechani, ka xarhataspti indeni ambe na enga uandenga imecheri ambe. Por ejemplu, imeri kómarhikuecha jimbo méntkisï diosmeiamukua arhispti Jeobani imechani jimbo. Ka imani kartecha jimbo enga axakuapka, karaspti na enga xáni jukaparharauenga. Ju je exeni ejemplu ma. Roma 16:1-15 jamberi, uandaaspti 27 kristianuecheri nombrichani. Por ejemplu, miáspti eska Prisila ka Ákila uékasïrengaksï “íntspini tsípikua” imani jimbo ka uandaspti eska Fébe “jarhuataaspka uánikua kʼuiripuechani”, asta imani. Ísï jimbo, Pablu arhiaspti imeri ermanuechani enga xáni xénchauenga eskaksï kánikua sési úxapka na engaksï xáni jánguarhintani japka.
9 Ima mítispti eskaksï imeri ermanuecha no perfektuespka. Nájkiruka ísïpka, imeri karta jimbo enga Roma anapu kristianuechani karakuapka, sánderu ambakiti ambe karaspti imecheri ambe. Ísï jimbo, enga karta arhinhantapka kúnguarhikuarhu, imaksï kánikua sési pʼikuarherapti kurhaani ambe enga Pablu uandapka imecheri ambe. Ka seguru eskaksï sánderu xénchapka Pabluni. ¿Ísïskichi eska Pablu ka somenchi diosmeiamukua arhiasïni kúnguarhikuarhu anapu erachichani imani ambe jimbo engaksï uandajka ka úni?
10. ¿Ambechi úsïni jorhenguarhini na enga Jesusi xarhatapka eska jukaparharaasïrenga imeri chúxapatichani?
10 Ambe enga Jesusi arhiapka máru Asia Menor anapu kúnguarhikuechani, xarhataspti eska jeiapanhintasïrenga imeri chúxapaticheri ánchikuarhitani. Por ejemplu, kúnguarhikua Tiatira anapuni arini ambe uénaspti arhini: “Mítiaska chíti úkuechani ka eskarini uékasïnga, ka ístu na engarini xáni marhuachini jaka ka mintsikandini, ka ístu na engari xáni tekantskua jatsika, ka chíti úkuecha engaksï iásï anapueka, sánderuksï ambarhaska ka eska engari uénapka úani” (Jaŋ. 2:19). Jesusi no solu uandaspti eskaksï sánderu marhuakuxapkia, sino ístu felisitariuaspti ambe engaksï jimbo ísï úenga. Ísïsti eska jatsispka para jurhimberantaani máru kristianuechani ima kúnguarhikueri, peru sési járhati uandakuechani úraaspti uénani jámani ka ístu kʼamarani jámani enga arhiani japka ambe (Jaŋ. 2:25-28). Jesusi orhejtsïkuasïndi iámindu kúnguarhikuechani, jimbosï újti juramukuani. Ísï jimbo, no jatsisti parajtsïni diosmeiamukua arhini ambe engachi újka imani jimbo. Nájkiruka ísïka, méntkisïjtsïni xarhatachisïndi na enga xáni jukaparharajka ambe engachi újka imani jimbo. Ísïsti, ambakiti ejemplu máesti para orhejtsïkuticha.
KʼUIRIPUECHA ENGAKSÏ NO JUKAPARHARAPKA AMBE
11. Eska na arhijka Ebreu 12:16, ¿néna exesïreni Esau Tata Diosïri ambe?
11 Peru xáni no sési engaksï máru no jukaparharapka ambe. Ju je exeni Esauri ejemplu. Nájkirukaksï imeri táti jembecha xénchenga ka janhanharhini Jeobani, ima no jukaparharasïrendi Tata Diosïri ambe (arhinta je Ebreu 12:16). ¿Néna xarhataspi eska no jukaparharaspka? Jimboka imani kóntperatani enga jatsipka komu orheta uájpa, jirejiresï mójtakuspti Jakobu jingoni ma platu lentejasïri jimbo (Gén. 25:30-34). Tátsekua, kánikua no sési pʼikuarheraspti imani ambe jimbo enga úpka ka kurhurjaxeparini no sési uandaspti enga no intsïnhapka kóntperatani komu orheta uájpa. Peru no jatsispti para ísï jámani, jimboka no jukaparharaspka ambe enga jatsipka.
12, 13. ¿Nénaksï xarhataspi israelitecha eskaksï no jukaparharaspka ambe enga Jeoba úpka imecha jimbo ka ambeksï niáraspi úkuarhinchani?
12 lsraelitechaksï uánikua rasonichani jatsiaspti paraksï diosmeiamukua arhini Jeobani. Ima, diesi plaga axakuaspti Ejiptu anapuechani para úni israelitechani petaatani jima uératini. Tátsekua, pʼímutaantaspti, úparini eska Ejiptu anapu ejersitu mari Charhapitirhu uarhipiringa. Imaksï xáni tsípispti engaksï pirekupka Jeobani jimbokaksï andaspka. Peru ¿na xánksï ióni jukaparharaspi ambe enga Jeoba úpka?
13 Engaksï israelitecha ménderu jatsiapka ójkutakuechani, mirikurhisptiksï ambe enga xáni úpka Jeoba imecha jimbo ka nóksï jukaparharaspti (Sal. 106:7). Biblia arhisïndi eska iámindu ireta uénaspka no sési ambe uandani Moisesiri ka Aaroniri ambe, inde ambe arhikuekasïrendi eskaksï Jeobanisï no sési arhini japka (Éx. 16:2, 8). Xánksï no sési pʼikuastaspti Jeobani enga ima niárapka uandani eskaksï desierturhu uarhipiringa, menusi Josue ka Kalebi (Núm. 14:22-24; 26:65). ¿Nénachi úa parachi no májkueni úni eskaksï i kʼuiripuecha, sino ísï eska imecha engaksï jukaparharenga ambe? Ju je exeni.
AMBE ÚNI PARA DIOSMEIAMUKUA ÍNTSANTAANI
14, 15. a) ¿Néna úa achati o uarhiiti xarhatakuni eska jukaparharasïnga ambe enga témba o uámba újka imani jimbo? b) ¿Nénaksï úa táticha jorhendaani imecheri sapiichani diosmeiamukua arhijpini?
14 Kʼumanchikuarhu anapuechani. Iámindu familiani marhuakusïndi enga mándani arhini familiarhu anapu jukaparharajka ambe. Enga achati o uarhiiti xarhatakuaka eska jukaparharasïnga ambe enga témba o uámba újka imani jimbo, sánderuksï májku kʼéri jauati ka no xáni úkua jukaati paraksï puátsperantani ambe engaksï no sési úaka. Achati enga jukaparharajka témbani, no solu exesïndi ambe enga uandajka o úni, sino ístu, sési jásï ambe arhisïndi (Prov. 31:10, 28). Ka uarhiiti enga jánhastika, arhisïndi ambe enga jimbo jukaparharajka uámbani.
15 Táticha, ¿nénajtsï úa jorhendaani chári sapiichani diosmeiamukua arhijpini? Miá je eskaksï imecha imani ambe úaka engajtsï cha újka ka uandani. Ísï jimbo, cha uéna je ísï úni, diosmeiamukua arhiparhiani imani ambe jimbo engaksï imecha úaka chánksïni jimbo. Ístu, jorhendaa je diosmeiamukua arhijpini engaksï máteruecha úaka ambe ma imecha jimbo. Jarhuata je kurhanguni eskaksï jatsiska para mintsita jingoni ísï úni ka eska ambe engaksï uandaaka, kánikua jarhuatauaka máteruechani. Por ejemplu, pirenchi ma enga Clary arhinhajka, uandasïndi: “Enga juchiti nándi 32 jatiripka, ma repentku jatsispti parajtsïni uénani jandiajku tʼarhexerani juchantsïni taniperani. Engani ji xáni jatiripkia eska nándi, uénaspka eratsintani na enga xáni úkua jukanchapka. Jimbosïni arhipka eskani kánikua jukaparharasïrenga iámindu ambe enga xáni úpka parajtsïni tʼarhexerani. Nótki iónisti engarini arhika eska mintsita jingoni miáuasïnga imani uandakuechani engani arhiapka, eska someni miáuasïnga ka eskaksï kánikua tsíperasïnga”.
Ju je jorhendaani juchari sapiichani diosmeiamukua arhijpini. (Exe je párrafu 15). *
16. Jatsiku je ejemplu ma na enga uinhaperantaajka erachichani engachi diosmeiamukua arhiajka.
16 Kúnguarhikuarhu anapu erachichani. Uinhaperantaasïngachi erachichani engachi xarhatakuajka eskachi jukaparharasïnga ambe engaksï imecha újka. Ju je exeni orhejtsïkutiri ma ejemplu, Jorge arhinhasïndi ka 28 jatiristi. Jimboka uinhamu pʼamenchaspka, ma mesi no úspti nirani tánguarhikuecharhu. Enga ménderu uéntapkia nirani, nótki úxapti diskursarini. Ima uandantasïndi: “Ísï pʼikuarherasïrenga enajkini no ma ambe marhuaueni, jimbokani no úsïrenga úni juchiti ánchikuarhitani kúnguarhikuarhu. Peru ma jurhiatikua enga kʼamarapkia tánguarhikua, erachi marini arhispti: ‘Uékasïngakini diosmeiamukua arhini jimbokari ambakiti ejemplu ma íntskusïnga juchiti familiani. Jamberiri no eranhaskajka na engachi xáni tsitiajka chíti diskursuechani. Kánikuajtsïni jarhuatasti parachi sánderu sési pájperani Jeoba jingoni’. Engarini ísï arhipka, uenhenchaspka ka nóteruni úspkia uandani. Meru imani ambesïni uétarhinchani japka kurhaani”.
17. Ísï eskajtsïni na arhijka Kolosasi 3:15 (TDU), ¿nénachi úa diosmeiamukua arhini Jeobani iámindu ambe jimbo engajtsïni íntskujka?
17 Juchari Tata Diosï intsïmpitini. Jeobajtsïni uánikua ambe íntskusïndi parachi imeri ambe jorhenguarhini. Por ejemplu, kánikuachi informasioni intsinhasïnga juchari tánguarhikuecharhu, rebistecharhu ka Internetiri pájinecha jimbo. Engachi kánikua tsitijka diskursu ma, artikulu ma o programa ma enga kanali JW Broadcasting jimbo uérajka, ¿a no eskachi eratsisïnga eskachi meru imani ambesï uétarhinchani japka? Jiájkani, ¿nénachi úa diosmeiamukua arhini Jeobani iámindu imani ambe jimbo engajtsïni ima íntskujka? (Arhinta je Kolosasi 3:15, TDU). Ma ambe engachi úaka úni, jindesti someni diosmeiamukua arhini engachi kómarhiaka (Sant. 1:17).
Jarhuajpini ambantskantani Kʼumanchikua Reinuerirhu, jindesti ma ambe engachi jimbo úaka xarhatani eskachi jukaparharasïnga ambe. (Exe je párrafu 18).
18. ¿Nénachi xarhatasïni eskachi jukaparharasïnga juchari Kʼumanchikua Reinuerini?
18 Máteru ambe engachi úaka úni parachi diosmeiamukua arhini, jindesti eska sési ka limpiu jauaka nani engachi tánguarhijka para kʼéri ambe arhini Jeobani. Jimbochisï someni jarhuajpijka aseu úni ka arreglarini ambe enga xáni uétarhiaka Kʼumanchikua Reinuerirhu. Ístu, imecha engaksï kúnguarhikueri aparatuechani úraajka, sésiksï úraasïndi. Engachi sési kuidariska Kʼumanchikua Reinuerini, ióni marhuauati ka no xáni uétarhiati eskachi arreglariuaka imani ambe enga jukaparhaka. Engachi ísï úska, sánderu tumina jauati para úani ka sési jájkuantani máteru Kʼumanchikuechani Reinueri interu parhakpini jimbo.
19. ¿Ambechi jorhenguarhisïni ambe engaksï nitamanchapka sirkuitueri orhejtsïkuti ma ka imeri témba?
19 Imechani engaksï kánikua ánchikuarhijka juchantsïni jimbo. Engachi xarhatakuaska máteruechani na engachi xáni jukaparharajka ambe engaksï újka juchantsïni jimbo, úati úni eskaksï no xáni uandanhiauaka imani ambe jimbo engaksï nitamakuarhini jaka. Ju je exeni ambe engaksï nitamakuarhipka sirkuitueri orhejtsïkuti ma ka imeri témba. Engaksï chúskutapka aianhpini enga kánikua tsʼirakuarhipka, kuataratinksï niántaspti jima engaksï pakarani japka. Xáni tsʼirakuarhixapti enga pirenchi abrigu jukarini nípka kʼuíni. Ísï pauandikua, arhispti uámbani eska nóteru úpiringuia seguirini imani jingoni pʼorhembiani kúnguarhikuechani. Ima mismu jurhiatikua tsípa, karta ma niáraspi para ima, sukursalirhu uératini. Karta, arhisïrendi eskaksï uékperakua jingoni felisitarisïrenga jimboka tekantaxapka ka sési marhuani, nájkiruka úkua jukapka mándani semana mótsini jarhani. Erachi uandantasïndi: “Mintsitarhu niárakuspti ambe enga karta arhienga, jiáni uératini, nóteru méni uandaspti eska jurajkupiringa ini ánchikuarhitani. Sánderu sési, imarinisï uinhaperantendi parani seguirini sirkuitueri orhejtsïkutini jiáni engani eratsienga jurajkuni”. I temungurhiri, sáno kuarenta uéxurhini marhuaspti komu sirkuitueri orhejtsïkuti.
20. ¿Ambechi jatsiski para pauani pauani jánguarhintani úni ka andi?
20 Ju je pauani pauani jánguarhintani parachi xarhatani eskachi jukaparharasïnga ambe. Ambe engachi mintsita jingoni uandaaka ka úni, úati jindeni ambe enga nema meru uétarhinchani jauaka para úni seguirini orhepani uérani ini parhakpini jimbo enga xáni no sési jánhaskuarheni jaka. Ístu engachi diosmeiamukua arhijpijka, sánderuchi sési pájperasïnga máteruecha jingoni para méntkisï. Ka ambe enga sánderu jukaparhakueka, jindesti eskachi májkueni úni jauaka eska juchari Táti Jeoba enga intsïmpitika ka jukaparharani ambe engachi újka.
PIREKUA 20 Axaskari chíti Uájpani
^ párr. 5 ¿Ambejtsïni jorhendasïni Jeobaeri ejemplu, Jesusiri ka samaritanueri enga lepra pʼamenchani japka parachi diosmeiamukua arhijpini? Ixúchi exeauaka ini ejempluechani ka máteru, ístu andisï xáni jukaparhakue eskachi diosmeiamukua arhijpiaka ka nénachi úa ísï úni.
^ párr. 1 JUKAPARHAKUA AMBE: Diosmeiamukua arhijpini, arhikuekasïndi jukaparharani ambe engaksï máteruecha újka juchantsïni jimbo ka arhijpini ambe engachi pʼikuarherajka.
^ párr. 55 AMBE ENGA XARHATAJKA IMAJENI: Kristianuecha engaksï Roma anapu kúnguarhikua jimbo jaka, kurhaasïndiksï enga arhinhantajka ambe enga Pablu karakuapka; Ákila, Prisila, Fébe ka máteru ermanuechaksï kánikua tsípisïndi engaksï imecheri nombrichani kurhauajka.
^ párr. 57 AMBE ENGA XARHATAJKA IMAJENI: Pirenchi ma jarhuataxati imeri uájpani para xarhatakuni pirenchini ma enga jatirikia, na enga xáni jukaparharajka imeri ambakiti ejempluni.
