1. I tanimu Testiguecha, ¿nénaksï xarhataski eskaksï kurhajchasïnga Jeobani?

JU JE eranhaskani ambe engaksï tanimu erachicha úpiringa nitamakuarhini. Ma pirenchi sapichku, eskuelarhu jarhasti ka maestru iáminduechani arhiasïndi eskaksï kʼuínchikua ma úntaaka, pirenchi mítisti eska Jeoba no jeiapanhintasïnga indeni ambe, jimbosï janhanharhikua jingoni arhijti maestruni eska ima no úaka imani ambe. Erachi sapichu ma enga aianhpini jámani jaka, exesïndi eska jimesï irekaska imeri kompanieru ma eskuelarhu anapu enga arhinchaajka Jeobaeri testiguechani. Nájkiruka chéjka, nirasïndi uámutani. Máteru, táti ma imeri ánchikuarhitarhu jarhasti ka imeri patroni arhisïndi eska úaka ambe ma enga no sési jaka. Mítiparini eska úaka tsïtani ánchikuarhitani, arhisïndi patronini eska no úaka imani ambe, jimboka jurhimbitku jámasïnga ka eska úsïnga ambe enga lei uandajka, jimboka Tata Diosï ísïsï uéjka eskaksï úaka imeri marhuaricha (Rom. 13:1-4; Ebr. 13:18).

2. ¿Náki kurhamarhikuechanchi mókuantaua ka andi?

² Ini ejemplurhu, ¿ambeksï xarhataski i tanimu Testiguecha? Jamberichi uandaaka eska balori ka jurhimbitku jámani. Peru jarhasti ambe ma engaksï sánderu xarhataka, eskaksï iámu mintsita jingoni marhuakusïnga Jeobani. Iáminduksï jánguarhintasïndi sési marhuakuni Jeobani ka úni ambe enga ima juramujka. Seguru eska Jeoba kánikua jeiapanhiantapiringa mándani arhini. Juchajtuchi uékasïnga eskajtsïni juchari Táti jeiapanhintaaka. Ísï jimbo, ju je mókuantani ini kurhamarhikuechani: ¿Ambe arhikuekasïni iámu mintsita jingoni marhuakuni Jeobani? ¿Andisï xáni jukaparhakue eskachi ísï úaka? ¿Ka ambejtsïni jarhuataa parachi iámu mintsita jingoni marhuakuni Jeobani ini jurhiatikuecha jimbo enga xáni úkua jukaka?

3. a) ¿Ambe arhikuekasïni iámu mintsita jingoni marhuakuni Jeobani? b) ¿Náki ejempluechajtsïni jarhuatasïni kurhanguni ambe enga arhikuekajka iámu mintsita jingoni marhuani?

³ Iámu mintsita jingoni marhuakuni Jeobani, arhikuekasïndi xénchani, no ma ambe jimbo jurajkuni ka méntkisï úni ambe enga ima jeiapanhintajka. Bibliarhu, uandakua enga ebreu uératini ísï tradusirikuarhijka “iámu mintsita jingoni”, úrakuarhisïndi para arhikuekani eska no ma ambe kuerataaka o eska sési jauaka. Por ejemplu, Lei uandasïrendi eska engaksï israelitecha animali ma kéjtsïtakupiringa Jeobani, animali jatsisïrendi para sési jarhani (Lev. 22:21, 22). * Tata Diosïri marhuarichaksï no jatsispti para animali ma kéjtsïtani enga no jukapiringa jantsiri ma, kutsïkua ma o éskua ma o enga pʼamenchani japiringa. Para Jeoba kánikua jukaparhakuespti eska no ma ambe kueratakupiringa animalini ka sési jarhani (Mal. 1:6-9). ¿Andisï Jeoba uéjki eska no ma ambe kueratakuaka ambe engachi íntskuaka? Ari ejemplujtsïni jarhuatati kurhanguni. Engachi fruta ma piájka, nochi uékasïnga eska pʼorhoarhaaka o eska pedasu ma kueratakuaka. Uékasïngachi eska iámu fruta sési jauaka. Sáno májkuenisti, Jeoba uékasïndi eskachi xénchaaka ka uékani kurhajchani peru iámu mintsita jingoni.

4. a) ¿Andichisï no jatsi para perfektueni parachi iámu mintsita jingoni marhuakuni Jeobani? b) Eska na arhijka Salmo 103:12-14, ¿ambejtsïni no kurhachesïni Jeoba?

⁴ Jimbokachi mítiska eskachi no perfektueska ka eskachi someni no sési ambe úsïnga, jamberichi kurhamarhikuarhiaka: “¿Uétarhisïni perfektueni para iámu mintsita jingoni marhuakuni Jeobani?”. Nómbe. Ju je exeani tsimani rasonichani. Uénani jámani, jimboka Jeoba no méntku exeni jarhasïnga ambe engachi no sési újka. Imeri Karakata arhisïndi eska enga Jeoba solu imani ambe exeni japiringa engachi no sési újka, no nema úpiringa tsípiti jarhani (Sal. 130:3). Ima mítisti eskachi no iámindu ambe úsïnga sési úni ka eskachi no perfektueska ka jingontku jarhasïndi parajtsïni puáchentani (Sal. 86:5). Tsimani úni jámani, jimboka Jeoba mítiska nani engachi jamberi úaka úni ambe ma ka nójtsïni kurhachesïndi sánderu ambe (arhinta je Salmo 103:12-14). Jiájkani, ¿nénachi úa iámu mintsita jingoni marhuakuni Jeobani?

5. ¿Andisï uékperakua jindee ambe ma engajtsïni jarhuatajka iámu mintsita jingoni marhuakuni Jeobani?

⁵ Ambe engajtsïni jarhuataaka parachi iámu mintsita jingoni marhuakuni Jeobani, jindesti uékperakua. Jimboka Jeoba jindeska juchari Táti auandarhu anapu, jatsiskachi para xarhatakuni eskachi iámu mintsita jingoni xénchasïnga ka eskachi no méni jurajkuaka. Engachi seguiriska májkueni xénchani Jeobani, nájkirukachi tsʼéjkukuechani nitamakuarhiauaka, arhikuekasïndi eskachi iámu mintsita jingoni marhuakuxaka (1 Crón. 28:9; Mat. 22:37). Ju je ménderu imani tanimu Testiguechani eratsiani engachi primeru párrafurhu exeaka. Mítiskachi eska pirenchi no uékasïnga kuatantani eskuelarhu, eska erachi no uékasïnga kʼuratsetakuarhini eianhpikuarhu ka eska ima enga tátika, no uékasïnga tsïtani ánchikuarhitani. Jiájkani, ¿andiksïsï indeni ambe újki? Jimbokaksï mítiska eska ambe enga Jeoba juramujka, sési jarhaska ka eska ambe engaksï sánderu jukaparharajka, jindeska imeri Táti auandarhu anapuni jaiapanherantani. Uékperakua engaksï Jeobani jimbo pʼikuarherajka, úsïndi eskaksï antesi de erakuni úni ambe ma, orheta exeaka na eratsisïni Jeoba ima amberi, ísïksï xarhatasïndi eskaksï iámu mintsita jingoni marhuakuxaka.

6. a) ¿Andisï xáni jukaparhakue eskachi mándani arhini iámu mintsita jingoni marhuakuaka Jeobani? b) ¿Nénaksï xarhataspi Adani ka Eba eskaksï no iámu mintsita jingoni xénchasïrenga Jeobani?

⁶ ¿Andisï xáni jukaparhakue eskachi mándani  arhini iámu mintsita jingoni marhuakuaka Jeobani? Jimboka Satanasi no sési uandasïnga Jeobaeri ambe ka ístu mándani arhini juchari ambe. Jardini de Edenirhu, inde ánjili enga no uékapka kurhajchani Jeobani, niárasti Satanasi úkuarhini, enga arhikuekajka “Tájpanharikpeti”. Ima niárasti no sési pakatani Jeobaeri nombrini, uandaparini eska ima no ambakiti juramuti máeska, eska no nemani jimbo pendienti pásïnga ka eska no jurhimbitku jámasïnga. Peru xáni no sési engaksï Adani ka Eba Satanasini kurhajchapka ka no Tata Diosïni (Gén. 3:1-6). Mientrasi engaksï Edenirhu irekani japka, uánikua ambeksï jatsispti engaksï jimbo úpiringa sánderu xénchani Jeobani. Peru jiáni enga Satanasi nóteru uékapkia kurhajchani Jeobani, xarhatasptiksï eskaksï no iámu mintsita jingoni xénchasïrenga Jeobani. Ka tiempu jingoni, Jobueri jurhiatikuecha jimbo, uétarhisïrendi mókuntani máteru kurhamarhikuani: ¿Japirinksï kʼuiripuecha engaksï uékperakua jimbo kurhajchapiringa Jeobani? O, ¿úaksï kʼuiripuecha iámu mintsita jingoni marhuakuni Jeobani?

7. Eska na arhijka Job 1:8-11, ¿na exesïreni Jeoba na enga Jobu marhuakuenga, ka na exesïreni Satanasi?

⁷ Jobu imani mísmu tiempu jimbo irekaspti engaksï israelitecha Ejiptu japka. Jiánisï, no ma kʼuiripu jarhaspti enga iámu mintsita jingoni marhuakuenga Jeobani, ísï eska ima. Ísïsti, no perfektuespti ka no iámindu ambe úsïrendi sési úni, májkueni eska jucha. Peru Tata Diosï xénchasïrendi, jimboka iámu mintsita jingoni marhuakusïrenga. Jamberi Satanasi tʼuini arhiptia Jeobani eska no ma kʼuiripu iámu mintsita jingoni marhuakusïrenga. Ísï jimbo, Tata Diosï arhispti eska exepiringa Jobuni. Na enga Jobu irekani japka, xarhatasïrendi eska Satanasi chkuandera máespka. Jiájkani, Satanasi arhispti Jeobani eska jurajkupiringa xarhatani eska Jobu no iámu mintsita jingoni marhuakusïrenga. Jeoba mintsikasïrendi imeri amigu Jobuni, jimbosï jurajkupti eska Satanasi tsʼéjkupiringa (arhinta je Job 1:8-11).

8. ¿Satanasi néna no sési úkuspi Jobuni?

 ⁸ Satanasi no sáni pʼamojpisïndi ka uándikpitisti. Úspti eska Jobu iámindu ambe tsïtapiringa, komu jatsikuarhikua ambe, uarhiranchaani jántspirichani ka eskaksï máteruecha no sési exepiringa. Ístu uándikuaspti imeri diesi uájpechani enga xáni xénchauenga. Tátsekua, úspti eska uinhamu pʼamenchapiringa, eska uxurhikuarhepiringa. Imeri uarhiiti enga xáni uandanhiani japka ka no sési pʼikuarherani iámindu ambe jimbo, arhispti eska nóteru jánguarhintapiringia, eska no sési arhipiringa Tata Diosïni ka eska uarhipiringa. Jobu niáraspti uékani uarhini, peru no méni jurajkuspti Jeobani. Jimajkani Satanasi máteru ambe úraspti para no sési úkuni. Tanimu imeri amiguechani úraaspti, engaksï uánikua xanhari pʼorhembipka, peruksï no méni sési pʼikuastantaspti. Masi úsptiksï no sési ambe uandani ka arhinchani. Arhisptiksï eska Tata Diosïsï úni japka eska kómu nitamakuarhipiringa ka eska no pendienti pásïrenga sini Jobu iámu mintsita jingoni marhuakusïreni o nómbe. Niárasptiksï arhini eska no sési jásï ma kʼuiripuespka ka eska sési jarhaspka ambe enga nitamanchani japka (Job 1:13-22; 2:7-11; 15:4, 5; 22:3-6; 25:4-6).

9. Nájkiruka xáni no sési ambe nitamakuarhipka, ¿ambe no uékaspi úni Jobu?

⁹ ¿Ambe úspi Jobu enga xáni no sési nitamakuarhini japka? No perfektuespti, jimbosï ikiapti ka xukaani imechani engaksï no sési ambe uandapka ka uánikua ambe uandaspti enga tátsekua kurhangupka eska no sési jarhaspka. Enbesi de sánderu uandani na enga Tata Diosï jurhimbitku újka iámindu ambe, sánderu imeri ambe uandaspti (Job 6:3; 13:4, 5; 32:2; 34:5). Peru asta jiájkani enga sánderu no sési nitamakuarhini japka, no uékaspti jurajkuni Jeobani. No jakajkuspti imani chkuanderakua ambe engaksï imeri amiguecha arhipka. Uandaspti: “¡Asï eratsi je eskani ji uandaaka eskajtsï cha jurhimbitiska! ¡Jiájkani jamberi marhuakuaka Tata Diosïni iámu mintsita jingoni astakani uarhiaka!” (Job 27:5). Ini uandakuecha jingoni engaksï xáni jukaparhakueka, xarhataspti eska eratsitixapka iámu mintsita jingoni marhuakuni Jeobani ambe uéjki nitamakuarhini jarhani. Jánguarhintaspti orhepani uérani ka juchajtuchi úaka májkueni úni.

10. Ambe enga Satanasi uandapka Jobueri ambe, ¿nénajtsïni pájtamasïni mándani arhini?

¹⁰ Ambe enga Satanasi uandapka Jobueri ambe, ¿nénajtsïni pájtamasïni mándani arhini? Ima inchandimisïndi uandani eskachi no mintsita jingoni xénchasïnga Jeobani, eskachi jurajkuaka jimbokachi niáraka sánderu jukaparharani juchari tsípikuani ka eskachi no iámu mintsita jingoni marhuakusïnga (Job 2:4, 5; Jaŋ. 12:10). ¿Nénajtsïni pʼikuastasïni i ambe? No sési, ¿a no? Peru ju je arini ambe eratsini: Jeobajtsïni xáni mintsinharhisïndi enga jurajkujka eskajtsïni Satanasi tsʼéjkuaka parachi xarhatani eskachi iámu mintsita jingoni marhuakusïnga Jeobani ka eska Satanasi chkuandera máeska. Ístujtsïni Tata Diosï aiachesïndi eskajtsïni jarhuataaka (Ebr. 13:6). ¡Kʼéri kóntperata máesti engajtsïni Tata Diosï enga Juramutiika iámindu amberi, mintsikajka! ¿Exesïnchi andisï xáni jukaparhakue iámu mintsita jingoni marhuakuni Jeobani? Jimbokachi ísï xarhatasïnga eska Satanasi chkuandera máeska ka pímbinhajkuntasïngachi Jeobaeri nombrini ka ístuchi xarhatasïnga eska ambakiti juramuti máeska. Jimajkani, ¿ambejtsïni jarhuataa parachi iámu mintsita jingoni marhuakuni?

11. ¿Ambechi úa jorhenguarhini Jobueri ambe?

¹¹ Satanasi sánderu no sési kaaxati Tata Diosïri marhuarichani ini “últimu jurhiatikuechani jimbo” engaksï xáni úkua jukaka (2 Tim. 3:1). Ísï jimbo, ¿ambejtsïni jarhuataa parachi iámu mintsita jingoni marhuakuni Jeobani ini jurhiatikuecha jimbo? Ístuchi úaka jorhenguarhini  máteru ambe Jobueri. Antesi de tsʼéjkukuechani jatsiani, uánikua xanhari xarhatasptia eska iámu mintsita jingoni marhuakusïrenga Jeobani. Ju je exeni tanimu ambe enga Jobu úpka ka nénachi úa májkueni úni.

12. a) Eska na arhijka Job 26:7, 8, 14, ¿ambe úspi eska Jobu kʼéri ambe exepiringa Jeobani ka janhanharhini? b) ¿Ambejtsïni jarhuataa juchantsïni kʼéri ambe exeni Jeobani ka janhanharhini?

¹² Sánderu xénchaspti Jeobani imeri kueraakata jimbo. Jobu, tiempu úraspti para eratsintani ambakiti ambe enga Jeoba kueraaka (arhinta je Job 26:7, 8, 14). Ísku pakaraspti enga eratsipka Echerini, auandani, nubechani ka enga charanchijka, nájkiruka jiókuarhipka eska no uánikua ambe mítispka ambe enga xáni Tata Diosï kueraaka. Ístu kánikua jukaparharaspti ambe enga Jeoba jorhendenga ka jimbosï uandapti: “Jukaparharasïnga ambe enga ima uandaka” (Job 23:12). Na enga xáni kʼéri ambe exenga Jeobani ka janhanharhini, úspti eska sánderu xénchapiringa ka uékani jaiapanherantani. Ka i ambe jarhuataspti para iámu mintsita jingoni marhuakuni. Ísï eska Jobu, jatsiskachi para tiempu úrani parachi eratsintani ambakiti ambe enga Jeoba kueraaka. Iásï, kʼuiripu sánderu ambe mítistia ambe enga Jeoba kueraaka ka eska Jobueri jurhiatikuecha jimbo. Ístuchi jatsiska Bibliani engajtsïni jarhuatajka sánderu sési mítini Tata Diosïni. Iámindu ambe engachi jorhenguarhiaka, úati eskachi sánderu kʼéri ambe exeaka Jeobani ka janhanharhini. Ka i ambe úati eskachi xénchaaka ka kurhajchani, ístujtsïni jarhuataati eskachi uékaaka iámu mintsita jingoni marhuakuni Jeobani (Job 28:28).

13, 14. a) Eska na arhijka Job 31:1, ¿néna xarhataspi Jobu eska kurhajchasïrenga Jeobani? b) ¿Nénachi úa májkueni úni?

¹³ Jánguarhintaspti méntkisï kurhajchani. Jobu mítispti eska para iámu mintsita jingoni marhuakuni Jeobani, jatsispka para kurhajchani. Méntkisï engachi kurhajchajka, sánderuchi uékasïnga iámu mintsita jingoni marhuakuni. Jobu jánguarhintaspti méntkisï kurhajchani Tata Diosïni. Por ejemplu, janhanharhikua jingoni kaasïrendi nanakechani (arhinta je Job 31:1). Jimboka tembuchatini japka, mítispti eska no jatsispka para xénchani nanakani ma enga no imeri témbepiringa. Irekaxakachi nani enga iápurisï ísku jándikueri ambe  xarharajka. ¿Ísïchi úa eska Jobu ka nochi jámani xénchani nemani enga no juchari uarhiitiuaka o achati? ¿Jánguarhintaachi no exeni ikichakueni jásï ambe o ísku jándikueri ambe nani uéjki xarharani? (Mat. 5:28). Engachi pauani pauani pʼíngukuarhiska, sánderuchi uékaaka iámu mintsita jingoni marhuakuni Jeobani.

¹⁴ Na enga exenga Jobu jatsikuarhikueri ambe, ístu xarhatasïrendi eska kurhajchasïrenga Jeobani. Uandaspti eska jatsikuarhikuani ambe mintsinharhini, kánikua no sési japiringa enga jamberi uétarhipiringa paraksï juesicha kastigarini (Job 31:24, 25, 28). Iásï, irekaxakachi nani engaksï sáno iáminduecha tsitijka jatsikuarhikua ambe. Engachi no xáni jukaparharaska jatsikuarhikua ambe ni tuminani, ísï eskaksï Bibliaeri konsejuecha na arhijka, sánderuchi uékaaka iámu mintsita jingoni marhuakuni Jeobani (Prov. 30:8, 9; Mat. 6:19-21).

15. a) ¿Náki erokuarhikua jarhuataspi Jobuni iámu mintsita jingoni marhuakuni Jeobani? b) ¿Andichisï jatsi para no mirikurhini ambe engajtsïni Jeoba aiachika?

¹⁵ Méntkisï miáspti eska Tata Diosï íntsaapiringa kóntperatechani. Jobu seguru jarhaspti eska Jeoba jukaparharasïrenga eska iámu mintsita jingoni marhuakupiringa (Job 31:6). Nájkiruka tsʼéjkukuechani nitamakuarhiapka, mintsikasïrendi eska Jeoba íntsaapiringa kóntperatechani ka i ambe jarhuataspti iámu mintsita jingoni marhuakuni. Jeoba xáni jeiapanhintaspti Jobuni enga kʼéri kóntperata ma íntskupka, nájkiruka no perfektuepka (Job 42:12-17; Sant. 5:11). Ka sánderu orhepani, sánderu kʼérati kóntperatechani intsïnhauati. ¿Ka juchaia? ¿Meruchi mintsikasïni eskajtsïni Tata Diosï íntsauaka kóntperatechani engachi iámu mintsita jingoni marhuakujka? Juchari Tata Diosï seguirixati májkuenini (Mal. 3:6). Miáni eska ima jukaparharasïnga eskachi iámu mintsita jingoni marhuakuaka, jarhuatatijtsïni mintsita jingoni seguirini jarhani mintsikani ambakiti ambe enga úkuarhiaka sánderu orhepani (1 Tes. 5:8, 9).

16. ¿Ambechi jatsiski para úni?

¹⁶ Jatsiskachi para eratsitini jarhani méntkisï iámu mintsita jingoni marhuakuni Jeobani. Jamberichi ménisï ísï pʼikuarheraaka enajkichi juchajkue engachi uéjki ísï úni. Peru nochi jandiajku jarhaska. Interu parhakpinirhu, uáni erachichaksï jarhasti engaksï ístu jánguarhintajka iámu mintsita jingoni marhuakuni Jeobani. Ístu, kuenta úkuarheakachi imecha jingoni engaksï ióntki kʼéri jakajkukua ma xarhatapka ka iámu mintsita jingoni marhuakuni Jeobani, nájkirukaksï niárapiringa uándikunhani (Ebr. 11:36-38; 12:1). Eskachi iáminduecha májkueni úaka ka ísï uandani eska Jobu: “¡Jiájkani jamberi marhuakuaka Tata Diosïni iámu mintsita jingoni astakani uarhiaka!”. Ka ju je méntkisï iámu mintsita jingoni marhuakuni Jeobani ka ísïchi kʼéri ambe arhiaka.