Juchiti táti John Mills, 25 jatiri itsï atakuarhispti 1913, jini Nueva York. Erachi Russell nitamataraspti diskursuni itsï atakuarhikueri. Ísï tátsekua, táti mótsispti isla de Trinidad, jima tembuchaspti Constance Farmer jingoni enga ambakiti Bibliaeri Jorhenguarhiri máepka. Jima jarhuataspti imeri amigu jembani William Brown * para exerpini “Foto-Drama de la Creación”, asta 1923 jamberi enga erachi Brown ka témba África Occidental axanhapka. Juchiti táticha engaksï erakukatepka, pakarasptiksï isla de Trinidad.

Juchiti tátichaksï nuebe sapiichani kaaspti. Ima enga kʼéripka arhinhatarasptiksï Rutherford, jimboka ísï arhinhasïrenga erachi enga jiánisï orhejtsïkuenga Betelini de Estados Unidos. Tátsekua, ji andajpenuspka, 30 de disiembrini 1922. Arhinhatarasptijtsïni Woodworth (xéncheperakua jimbojtsïni arhisïrendi Worth), jimboka ísï arhinhasïrenga erachi Clayton Woodworth, enga artikuluechani úauenga para rebista The Golden Age (enga iásï jindekia ¡Tsinharhi!). Iáminduechachi niraska eskuela, perujtsïni táticha sánderu jarhuataspti parachi Jeobani marhuakuni. Nándi sési mítikuspti parajtsïni jorhendani ambe ma Biblia úraparini. Ka táti tsitisïrendi mámaru ambe úni parajtsïni aianguani Bibliaeri istoriechani parachi úni jánhaskaani.

Marhuaspti ima ambe. Tanimu de sinku ermanuechachi niraspka Eskuela de Galaadi ka tanimu juchiti pirenchichaksï ióni marhuaspti komu prekursorecha jini Trinidad y Tobago. Ambe engajtsïni jorhendapka ka imecheri ambakiti ejemplu, ísïspti enajkijtsïni Jeobaeri kʼumanchikuarhu ikarapi, ísï eska na arhijka Salmo 92:13. Na engaksï xáni jánguarhintenga, jarhuatasptijtsïni parachi no jurajkuni Jeobani ka tsïpani imeri ekuaru jimbo.

Juchiniu tánguarhinhasïrendi para aianhpikua. Prekursorichaksï jima tánguarhisïrendi ka somenksï uandantani jarhasïrendi ambe ma erachiri George  Young, Canadá anapu misioneru ma enga pʼorhembipka isla de Trinidad. Ístu, tátichaksï tsípikua jingoni miásïrendi erachi ka pirenchini Brown engaksï imecheri kompanieruepka, engaksï jiánisï África Occidental japkia. Iámindu i amberini jarhuataspti uénani eianhpini engani 10 jatiripka.

Jiánisï, juchari rebistechaksï arhisïrendi eska no sési jarhaspka ambe engaksï relijioni no jurhimbiticha, empresecha ka juramuticha úenga. Iglesiarhu anapuechaksï úspti eska ima enga juramuni japka ma tiempu jini Trinidad, nóterujtsïni jurajkupiringia íntspiani publikasionichani engaksï Watch Tower únhenga. Jískaspkachi, peru seguirixapkachi úraani astakachi kʼamajkuapka. Marcharispkachi para Reinueri ambe aianhpini ka desfilarini bisikletecha jingoni engachi tratadu ka letreruechani páuenga. Niáraspkachi imani lugaricharhu engaksï sánderu iauani japka islarhu Tunapuna anapu grupu ma jingoni engaksï karruni ma páenga enga bosina ma jukapka. Ambe engachi úenga para aianhpini, úspti eskani itsï atakuarhipiringa engani 16 jatsiripka.

Ambe engajtsïni familiarhu jorhendapka ka iámindu ambe engani úpka, úspti eskani tsitipiringa misionerueni. Seguirixapka tsitini engani 1944 nípka isla de Aruba parani erachi Edmund Cummings jingoni aianhpini. Sési pʼikuarheraspka engachi úpka eskaksï diesi kʼuiripuecha nipiringa Miántskuarhu uéxurhini 1945 jimbo. Ísï ma uéxurhini jimbo, úkuarhispti primeru kúnguarhikua imani islarhu.

Ísï tátsekua, ánchikuarhitarhu kompanierani ma predikarikuspka enga arhinhenga Oris Williams. Ima kánikua kuájpisïrendi ambe enga jakajkuenga. Peru Bibliaeri jorhenguarhikua jingoni, niáraspti mítini ambe enga sési jimbo arhijka Tata Diosïri Karakata ka itsï atakuarhispti 5 de eneruni de 1947. Enga tiempu nitamapkia, tembuperaspkachi. Nobiembrini de 1950 jimbo prekursora úkuarhispti. Tsimarhanchi ambakiti ambe nitamakuarhispka.

Uéxurhini 1955, pʼímarhisptijtsïni parachi Eskuela de Galaadi nirani, ísï jimbo, jurajkuaspkachi ánchikuarhitechani, atarantaspkachi kʼumanchikuani ka máteru ambe engachi jatsikuarhipka ka jurajkuspkachi Aruba. Jurhiatikua 29 de Juliuni 1956, graduarikuarhispkachi klase 27 de Galaadi ka axanhaspkachi Nigeria.

Ísï ióni jimbo, Oris uandaspti imani tiempuni miántaparini: “Jeobaeri espiritukini jarhuatasïndi parari p’indeni engari úkua jukanchajka jiáni engari misioneruejka. No májkueni eratsisïrenga eska juchiti achati, ji no méni tsitispka misionereni, sánderuni tsitisïrenga kʼumanchikua ma jatsini ka sapiichani kaani. Peruni nóteruni ísï eratsisïrengia engani kurhangupka na enga xáni uétarhijka aianhpini ambakiti aianhperakuani. Ísï jimbo, engachi graduarikuarhipkia Galaadi, sési mítitixapkia eskani nipiringa aianhpini komu misionera ma. Engachi barkuni Queen Mary jatani japkia, erachi Worth Thornton enga erachi Knorriri ofisina jimbo ánchikuarhenga, arhisptijtsïni eskajtsïni sési nichepiringa ka eskachi Beteli ánchikuarhipiringa. No sési pʼikuarheraspka jimbokani no inde ambesïni erokuarhenga. Peruni no ióndaspka pʼindeni imani asignasioni jingoni ka niáraspka kánikua tsitini. Beteli, mámaru jásï ánchikuarhita úska. Engani sánderu tsitipka, jindespti jima jarhani nani engachi eropienga. Tsitisïnga kʼuiripu jingoni jarhani ka indeni ánchikuarhita jingoni, úsïrenga erachi Nigeria anapuecha jingoni uandontskuarhini. Uánikuaksï tʼupuri jásï janosïrendi, kuataratini, kʼarhimakua jingoni ka kʼarhichanksï. Kʼéri tsipikuarhita máespti sési eroani ka úni eskaksï agustu pʼikuarherapiringa. Indeni ambe jingonchi Jeobani marhuakuxapka, jimbosïni xáni sési pʼikuarherenga”. Ísïsti, nani engachi xáni marhuaka, jarhuatastijtsïni sánderu sési marhuakuni Jeobani.

Uéxurhini 1961 jimbo, engachi tánguarhintapka komu familia jini Trinidad, erachi Brown aiagusptijtsïni maru ambakiti eksperiensiechani enga Africa nitamakuarhiapka. Ka ji aianguaspka na enga sánderu kʼéni jaka ánchikuarhita jini Nigeria. Erachi Brown kamajchakusptirini ka arhispti tátini: “Johnny tʼuri no méni niraska Africa, peru Woodworth kʼoru jo”. Ka táti uandaspti: “Seguiri ísï Worth, seguiri ísï”. Na engajtsïni xáni uinhaperantapka imecha engaksï xáni sési marhuakuni japka Jeobani, úspti eskani sánderu uékapiringa sési marhuakuni Jeobani.

Jatsispka sésikua parani nirani klase 37 de Galaadi uéxurhini 1962 jimbo, nani engani intsïnhapka  sánderu kapasitasioni diesi mesesi jimbo. Erachi Wilfred Gooch enga orhejtsïkuenga Beteli de Nigeria, niraspti klase 38 jimbo ka Inglaterra axanhaspti ka ji niáraspkia imeri lugari jimbo. Ísï eska erachi Brown na úpka, jíjtuni uapurisï niraspka, engani jimbo úpka mítiani ka xénchaani erachichani imani paisiri. Nájkirukaksï uánikua ambe no jatsikuarhipka komu ima paisi anapuecha engaksï iámindu ambe jatsijka, sésiksï xarhatasïrendi eska para tsípikua jingoni irekani, no uétarhisïnga kánikua tumina o jatsikuarhikua ambe. Exeparini na engaksï irekapka, kánikua sésispti exeani tánguarhikuecharhu sési morhekuarhitini ka limpiu. Uánikuaksï niárasïrendi kʼéri tánguarhikuecharhu kamionicha jingoni ka bolekajas, * autobusini jásï ma enga no ójtsienga ka kánikua úrakuarhini imani paisi jimbo. Uánikua i autobusichaksï ini járhati uandakuechani jukasïrendi: “Uánikua gota sapirhatichaksï kʼeri oseanu ma úsïndi”.

¡Ka indeksï uandakuecha méru ísïsti! Na enga xáni jánguarhintajka mándani kʼuiripu, marhuasïndi; ka juchachi jarhuajpisïnga. Uéxurhini 1974, Nigeria niáraspti segundo lugarirhu jarhani 100,000 aianhpiricha jingoni, ka Estados Unidos primeru lugarirhu jarhaspti. Ánchikuarhita meru sési niraxapti.

Jiáni enga sánderu uáninhani japkia, uénaspti guerra jini Nigeria enga 1967 uénapka ka 1970 kʼamakurhispti. Maru mesicha jimbo, erachicha engaksï Biafra ladu jimbo japka, iauanksï pakaraspti Beteli uératini. Nóchi úpiringa ísku pakarani, jatsispkachi para publikasionichani pákuani. Eskani na uandaka uénani jámani, uánikua xanharichi parhikuspka ríuni, kómariparini ka kánikua mintsikaparini Jeobani.

Ísï miásïnga enajki uitsindikuepi. Uánikua peligruechaksï jarhaspti: Soldaduecha engaksï listu jarhenga para kʼuanirpini, pʼamenchakuecha... Méni engachi parhikuenga, úpiringachi uarhini. Kánikua úkua jukaspti nitamani jimesï engaksï paisirhu anapu soldaduecha japka engaksï iámindu ambe exeni jarhenga. Peru sánderu chékuarhispti nitamani imani ladu jimbo enga Biafra japka. Ma chúri, parhikuspka ríuni kanoa ma jimbo, Asaba uératini asta Onitsha ka niraspka Enugu parani uinhaperantaani sirkuitueri orhejtsïkutichani. Máteru xanhari, niraspka Aba anapu orhejtsïkutichani uinhaperantaani, nani engaksï no jurajpenga para lusi étskuni chúrikuechani. Jini Port Harcourt, jatsispkachi para sóntku kʼamarani tánguarhikua ma kómarhikua jingoni, jimbokaksï paisirhu anapu soldaduecha xanharu ma úspka Biafra uéramani.

Imaksï tánguarhikuecha meru jukaparhakuespti para jarhuataani erachichani miáni eska Jeoba xénchasïrenga ka eska kuidariuapiringa, ka para íntsaani konsejuechani eskaksï no jámapiringa politikarhisï inchamukuni ka paraksï májku kʼéri jarhani. Erachi Nigeria anapuechaksï no jurajkuspti Jeobani ka orhepanksï uérakuspti imani xáni kʼéri problema. Ima uékperakua sánderu kʼéspti ka eska ikiatapu ka nóksï jurajperaspti. Sési pʼikuarheraspka imecha jingoni jarhani jiáni engaksï xáni no sési nitamakuarhini japka.

Uéxurhini 1969, erachi Milton Henschel jindespti enga orhejtsïkupka Kʼéri tánguarhikua Internasionalini “Paz en la Tierra” enga Estadio de los Yankees (Nueva York) úkuarhipka. Ji jindespka imeri jarhuajpiri ka uánikua ambe jorhenguarhispka imeri ambe. Kánikua sési jarhaspti ambe engani nitamakuarhipka, jimboka 1970 jimbo Kʼéri tánguarhikua Internasionali ma úkuarhispka “Hombres de Buena Voluntad” jini Lagos (Nigeria). I kʼéri ánchikuarhita úspti úkuarhini Jeobaeri jarhuajperata jimbo, jiáni enga na kʼamakurhipkia guerra. Tánguarhispkachi 121,128 kʼuiripuecha, ka 17 idiomecha jimbo nitamataranhaspti, sánderu eska antesi. Erachi Knorr ka erachi Henschel, ístu máteruecha engaksï abionicha jimbo niárapka Estados Unidos ka Inglaterra ueratini, exesptiksï eska desde Pentekostesirhu uératini, nóteru méni xáni uánikua itsï atakuarhinhaxapkia eska jiáni engaksï 3,775 itsï atakuarhipka. Peekani no méni xáni okupadu japka eska jiáni, engani exeni japka néna enga úkuarhipiringa ima kʼéri tánguarhikua. Meruksï sánderu uánisptia ainhpiricha.

Jukari treinta uéxurhini engani Nigeria irekapka, ménisï marhuaspka komu sirkuitueri orhejtsïkuti, ístuni pʼorhembispka África Occidental anapu Betelini. Misioneruechaksï kánikua jeiapanhintasïrendi engachi jarhuatauenga ka uinhaperantaani mandani arhini. Ji sési pʼikuarherasïrenga arhiani imani erachichani eskachi miáuasïrenga. I ánchikuarhitarini jorhendasti eskaksï erachicha uétarhinchasïnga eska ma pendienti jauaka mándani arhini imecha  jimbo paraksï úni Jeobani marhuakuni ka paraksï úni eska kúnguarhikua sési jauaka ka májku kʼéri.

Solu Jeobaeri jarhuajperata jimbochi úspka orhepani uérakuani problemechani jiáni enga guerra japka ka pʼamenchakuechani. Méntkisïchi exespka na engajtsïni Jeoba újchakurapka. Oris uandantaspti:

“Tsimarhanchi uánikua xanhari bakteriechani jatarhaspka (paludismo). Ma xanhari, Worth mirikurhitini niáraspti ospitali ma jimbo jini Lagos. Arhisptijtsïni eska jamberi úpiringa uarhini, peru úspti sési pʼikuarherantani. Enga miántapkia, aianguspti Tata Diosïri Reinueri ambe enfermeruni, tata Nwambiwe, enga atenderini japka. Sánderu tátsekuachi niraspka pʼorhembini parachi seguirini Bibliaeri ambe jorhendani. Jiókuarhispti jurhimbikuani ka niáraspti orhejtsïkutini jini Aba. Jíjtuni uánikua kʼuiripuechani jarhuataaska, asta musulmanichani paraksï tsípikua jingoni marhuakuni Jeobani. Kánikuachi sési pʼikuarheraspka mítiani ka xénchaani Nigeria anapuechani, na engaksï irekaka, imecheri pʼindekuechani ka idiomani”.

Ini ambejtuchi jorhenguarhiska: parachi sési marhuani juchari asignasionirhu máteru paisirhu, jatsispkachi para xénchaani erachichani, no arhiparini engaksï máteru jarhati pʼindekuechani jatsiajka.

Uéxurhini 1987, máteru asignasionichi intsïnhaspka. Engachi Beteli de Nigeria ánchikuarini japka, iásïchi nipiringia aianhpini isla de Santa Lucía enga Caribe jaka. Ambakiti asignasioni máespti, peru ístu úkua jukapirindi máru ambe. Jini África, problema jindespti eskaksï tatakecha uánikua nanakecha jingoni tembuchasïrenga, peru Santa Lucía, jindespti eskaksï temungurhiricha márku irekani jarhasïrenga sinksï sibilarikuarhitini jarhani. Tata Diosïri Karakata jarhuataaspti uánikua juchari estudiantichani paraksï mójtakuni ambe enga xáni uétarhipiringa.

Tiempu jingoni, nóteruchi úsïrengia xáni uánikua ambe úni. Jiájkani, Grupu enga Orhejtsïkuajka iámindu kúnguarhikuechani, 2005 jimbo, móskusptijtsïni Beteli de Brooklyn (Nueva York). Oris 2015 uarhisti ka ma no úsïndi uandani na enga pʼikuarherakuarhijka nemani uarhiranchani. Seguirixaka meiamukua íntskuntani Jeobani Oris jimbo. Ambakiti pampiri máespti ka témba ma engarini kánikua xénchenga. Mintsita jingoni xénchaska imani sesentaiochu uéxurhini engachi márku irekapka. Kuenta intskukuarhispkachi eska para tsípikua jingoni irekani temungurhirikuarhu ka kúnguarhikuarhu, jindeska janhanharhini imani enga juramukua jatsika, méntkisï puátspintani, kaxumbitini ka xarhatani ambe enga espiritu santu úrpijka.

Engachi no sési pʼikuarherani jarhenga, kurhakusïrengachi Jeobani eska újchakurapiringa ambe engachi úni jarhenga. Jeobajtsïni seguirixapti jarhuatani parachi sánderu ambakiti kʼuiripuecheni ka méntkisïchi exesïrenga eska sánhani arhisïrenga sési uérani ambe ma. Ka sánderu ambakiti ambe úkuarhiati no ióni jimbo (Is. 60:17; 2 Kor. 13:11).

Jini Trinidad y Tobago, Jeoba újchakuraasti táticheri ka máteru erachicheri ánchikuarhitani. Seguni sánderu jimbanhi informichaksï xarhatasïndi eska 9,892 sánderu kʼuiripuechaksï andaparhakueraskia relijioni jurhimbitirhu. Jini Aruba, uánikua erachichaksï jarhuapesti para sánderu kʼéni ima kúnguarhikua engani orheta marhuapka. Iásï, i isla jimbo jarhastiksïa 14 kúnguarhikuecha nani engaksï erachicha sési marhuani jaka. Nigeria, niárastia 381,398 aianhpiricha jarhani. Ka isla de Santa Lucía jimbo, 783 kʼuiripuechaksï apoiarixati Jeobaeri Reinuni.

Jukarini 90 jatiriskia. Salmo 92:14 arhisïndi eskaksï imecha engaksï Jeobaeri kʼumanchikuarhu jaka, seguirinksï jauaka sési jarhani, nájkirukaksï jatiriuakia ka eskaksï seguirini jauaka uinhapikua jatsini ka sapichku pʼikuarherani. Kánikua agradesidu jarhaska na engani marhuakuka Jeobani. Ambe engajtsïni jorhendaka Tata Diosïri ambe, úspti eskani iámu mintsita jingoni marhuakupiringa. Jeobaeri uékperakua jimbo, úska tsïpani imeri ekuaru jimbo (Sal. 92:13).