¿Mítispijtsï?
Náksï jarhaspi sinagogecha primeru sigluni. I imajeni xarhatasïndi máru ambe na enga jáxepka sinagoga ma primeru siglurhu anapu enga Gamala japka, ma 10 kilometrisï (6 millas) mari de Galilea uératini. Exerasïndijtsïni masi o menusi na engaksï úkata japka ióntki anapu sinagogecha.
¿Nénaksï niáraspi jarhani sinagogecha?
SINAGOGA, uandakua máesti enga griegu jimbo arhikuekajka “kʼéri tánguarhikua” o “tánguarhintani”. Inde uandakua sési jarhasti, jimboka desde iónisïa, sinagogechaksï jindesti nani engaksï judiuecha tánguarhienga paraksï jorhenguarhini ka kʼéri ambe arhini Tata Diosïni. Karakata Ebreuecha jimbo, no nani arhisïndi sinagogecheri ambe. Peruksï Karakata Griegaecha arhisïndi eskaksï ima lugaricha para tánguarhini jarhaspkia primeru siglurhu.
Sáno iámindu inbestigadorichaksï uandasïndi eskaksï sinagogecha niáraspka jarhani jiáni engaksï judiuecha Babilonia pánhapka. Encyclopaedia Judaica uandasïndi: “Judiuecha engaksï nóteru uéngia nirani Templurhu, ka engaksï lugari ma jimbo japka engaksï no mítipka ka engaksï uétarhinchani japka paraksï uinhaperanhantani imecheri uandanhiata jimbo, ménisïksï tánguarhintasïrendi, jamberi sábaduechani, ka arhintasïrendiksï Karakatani”. Engaksï judiuecha nóteru Babilonia japkia, peekaksï seguirini japka tánguarhintani paraksï kómarhini ka arhintani Karakatani, ka úasptiksï sinagogechani nani engaksï pakarenga irekani.
Primeru sigluni, judiuecha engaksï Mediterráneo ísï irekapka, Medio Oriente ísï ka mismu Israeli anapuechaksï kánikuaksï úrasïrendi sinagogani para tánguarhini ka ístu para kʼéri ambe arhini Tata Diosïni. Profesori Lee Levine enga Universidad Hebrea de Jerusalén jaka, uandasïndi: “Lugari máespti para jorhenguarhini, para sábaduechani tʼireni o jiáni enga kʼuínchikua ambe japiringa, para juisiu ambe úni, para tumina íntspini para ireta ka para tánguarhikuechani úani para politika ambe ka ístu para máteru ambe”. Ístu uandasïndi. “Ka sánderu para marhuakuni Tata Diosïni”. Ísï jimbo, nójtsïni ísku pakatasïndi andisï Jesusi pʼindepi nirani sinagogecharhu (Mar. 1:21, Táta Diósïri Uandakua Tata Jesukristueri Aiatsperakua [TDU]; 6:2, TDU; Luk. 4:16, TDU). Jima jorhentpisïrendi, konseju íntspesïrendi ka uinhaperantaani imechani engaksï jima jarhenga. Enga na uaxastanhapkia kristianuecheri kúnguarhikua, ístu apostuli Pablu pʼindespti aianhpeni sinagogecharhu. Ka jimboka kʼuiripuecha engaksï uékenga jorhenguarhini Tata Diosïri ambe nirenga sinagogecharhu, ambe enga orheta Pablu uénga enga iretarhu ma niárenga, jindespti sinagogecharhu nirani aianhpini (Uku. 17:1, 2, TDU; 18:4, TDU).
