1, 2. a) ¿Ambechi uékasïni iáminduecha? b) ¿Amberichi úa seguru jarhani?

IÁMINDUCHI uékasïnga pʼikuarherani eskachi xénchanhasïnga ka eskachi jurhimbikua jingoni kánhasïnga. Engachi méntku úndaska no xénchanhani ka ísku jatinchi no sési kánhani, jamberichi nóteru jánhaskakia ambe úni ka eratsini eskachi no ma ambe marhuasïnga.

² Jeoba mítisti eskachi iáminduecha mintsita jingoni uékasïnga eskachi xénchanhaaka ka jurhimbikua jingoni kánhani (Sal. 33:5). Úakachi seguru jarhani eskajtsïni ima kánikua xénchasïnga ka eska uékasïnga eskachi jurhimbikua jingoni kánhaaka. Ka xarharasïndi imani Lei jimbo enga Jeoba ireta Israelini íntskupka Moisesini úraparini. Enga cha no sési pʼikuarherani jaka jimbokajtsï ísï pʼikuarherasïnga enajkijtsï no xénchanhajki o jimbokajtsï méni no sési kánhaska, kánikuaksïni sési pʼikuastaati jorhenguarhini ambe enga Moisesiri Leini * xarhatajka na enga Jeoba pendienti pájka imeri marhuaricha jimbo.

3. a) Eska na uandajka Roma 13:8-10, ¿ambechi jorhenguarhisïni engachi estudiarijka Moisesiri Leini? b) ¿Náki kurhamarhikuechanchi mókuantaua?

³ Engachi jorhenguarhijka Moisesiri Leini, exesïngachi na engajtsïni xáni xénchajka juchari Tata Diosï (arhinta je Roma 13:8-10). Ini artikulu jimbochi exeauaka máru leichani enga Jeoba íntsaapka israelitechani ka mókuantauakachi arini kurhamarhikuechani: ¿Andichisï újki uandani eska Lei xarhatasïrenga Jeobaeri uékperakua? ¿Andichisï újki uandani eska Moisesiri Lei úsïrenga eska jurhimbitku úkuarhipiringa ambe ma? ¿Nénaksï jatsispi para úraani imecha engaksï juramukua jatsipka?  Ka ¿néchani sánderu kuájpiasïreni? Mókuntskuechajtsïni sési pʼikuastantaati, úatiksï eskachi ambakiti ambe erokuarhiaka ka eskachi sánderu andarheraaka juchari Táti auandarhu anapuni enga xáni uékpitika (Uku. 17:27; Rom. 15:4).

4. a) ¿Andichisï újki uandani eska Moisesiri Lei xarhatasïrenga Jeobaeri uékperakua? b) Eska na arhijka Mateu 22:36-40, ¿náki mandamientuechani sánderu uandaaspi Jesusi?

⁴ ¿Andichisï újki uandani eska Moisesiri Lei xarhatasïrenga Jeobaeri uékperakua? Jimboka Jeoba uékperakua jimbo úsïnga iámindu ambe (1 Juanu 4:8). Ima jukari seisientu mandamientuecha engaksï jindepka Lei, uaxastakataksï jarhaspti tsimani mandamientuecha jimbo engaksï kánikua jukaparhakuepka: xénchani Tata Diosïni ka xénchaani máteruechani (Lev. 19:18; Deut. 6:5; arhinta je Mateu 22:36-40). Ísï jimbo, úsïngachi erokuarhini eska mándani arhini i juramukuecheri jorhendaakajtsïni ambe ma Jeobaeri uékperakueri. Ju je exeani máru ejempluechani.

5, 6. a) ¿Ambe uékasïni Jeoba eskaksï úaka temungurhiricha? b) ¿Jeoba ambe pendienti páni jarhasïni? Jatsiku je ejemplu ma.

⁵ Leicha paraksï temungurhiricha no jurajperani ka para sapiichani kuidariuani. Jeoba uékasïndi eskaksï temungurhiricha kánikua xénchperaaka paraksï méntkisï márku jarhani (Gén. 2:24; Mat. 19:3-6). Ísku jándikua ambe niátani ambe máesti enga sánderu no sési jaka. Jimbosï séptimu mandamientu uandendi eskaksï no jatsispka para indeni ambe úni (Deut. 5:18). Ísku jándikua ambe niátani májkuenisïndi komu no kurhajchani Tata Diosïni ka kánikua no sési úkusïndi témbani o uámbani enga no kulpa jatsijka (Gén. 39:7-9). Ka kánikua úkua jukasïndi paraksï úni mirikurhini indeni ambe.

⁶ Jeoba jingontku exeni jarhasïndi na engaksï kámberajka temungurhiricha. Ka sánderu pendienti jarhasïrendi eskaksï sési kánhapiringa Israeli anapu uarhiiticha. Achati enga kumpliriuenga leini, xénchasïrendi imeri témbani ka no diborsiarikuarhipirindi ambe uéjki jimbo (Deut. 24:1-4; Mat. 19:3, 8). Peru enga uámba niárapiringa diborsiarikuarhini témberi kʼéri problema ma jimbo, jatsisïrendi para sïranda ma diborsiueri íntskuni témbani. I sïranda marhuasïrendi para no chkuanderakua ambe arhinhani ísku jándikueri. Ístu, ante de íntskuni ini sïrandani, achati jatsiendi para orheta iretarhu anapu orhejtsïkuticha jingoni uandontskuarheni. Ísïksï orhejtsïkuticha úpirindi jarhuatani temungurhirini paraksï no jurajperani. Jeoba no méntkisï inchaakukuasïrendi enga achati ma ísku jatini diborsiarikuaripiringa témberi, peru exesïrendi na enga xáni uerenga témba ka kurhangukusïrendi na enga xáni no sési pʼikuarherenga (Mal. 2:13-16).

7, 8. a) ¿Ambe juramukuaspi Jeoba tátichani? (Exe je dibujuni enga uénakuarhu jaka). b) ¿Ambechi jorhenguarhisïni?

⁷ Lei ístu xarhatasïndi na enga Jeoba uéjka eskaksï sapiicha sési jauaka. Ima no solu arhiaspti tátichani eskaksï kéndaapiringa iámindu ambe, sino ístu eskaksï jorhendaapiringa Tata Diosïri ambe. Jatsisptiksï para méntkisï jorhendaani jukaparharaani mandamientuechani ka paraksï xénchani Jeobani (Deut. 6:6-9; 7:13). Ma ambe jimbo enga Jeoba kastigariuapka israelitechani, jindespti jimbokaksï táticha kánikua no sési jásï ambe úspka imecheri sapiichani jingoni (Jer. 7:31, 33). Israelita ma no jatsispti para ísï exeni uájpani komu ambe ma enga no uétarhienga kuidarini o enga úpiringa no sési kámani, sino komueska Jeobaeri intsïmperakua ma enga jatsipka para uékperakua jingoni kuidarini (Sal. 127:3).

⁸ Jorhenguarhikua: Jeoba jingontku exesïndi na engaksï kámberajka temungurhiricha. Uékasïndi eskaksï táti jembecha xénchauaka uájpechani ka kuenta kurhakuantasïndi na engaksï kájka.

9-11. ¿Andisï Jeoba íntsaapi leichani paraksï no jukari uékani jatsini ambe ma?

 ⁹ Lei para no jukari uékani jatsini ambe ma. Últimu mandamientu arhisïrendi eskaksï no jámapiringa kánikua tsitini ambe ma enga máteru nemaeripiringa (Deut. 5:21; Rom. 7:7). Ini lei jingoni, Jeoba ambakiti ambe jorhendaaspti imeri marhuarichani: jatsisptiksï para kuájchakuni imecheri mintsitani o ambe engaksï eratsienga ka pʼikuarherani. Ima mítisti eska no sési jásï ambe eratsini ka pʼikuarherani, úsïnga eska nema no sési jásï ambe niátaaka (Prov. 4:23). Enga israelita ma jurajkuenga para seguirini no sési jásï ambe eratsini, jamberi niárendi no sáni uékperakua xarhatakuani máteruechani. Inde ambesï úkuarhinchapti rei Dabidi. Ima ambakiti kʼuiripu máespti, peru ma xanhari, kánikua uékaspti uarhiitini ma, ka ambe enga pʼikuarherapka, úspti eska pekaripiringa (Sant. 1:14, 15). Dabidi ísku jándikua ambe niátaspti, jánguarhintaspti enganiarini uarhiitiri uámbani ka últimu úspti eska guerrarhu uarhipiringa (2 Sam. 11:2-4; 12:7-11).

¹⁰ Jeoba úsïndi mítini ambe engachi pʼikuarherajka ka eratsini, ísï jimbo, enga israelita ma jukari uékenga jatsini ambe ma ka no kumplirini leini, Jeoba mítisïrendi (1 Crón. 28:9). I lei jingoni, imeri marhuarichaksï exesïrendi eskaksï no jatsispka para no sési ambe eratsini paraksï no ísku ambe ma niátani. ¿A no eska Jeoba Táti jánhasti ka uékpiti máeska?

¹¹ Jorhenguarhikua: Jeoba no imani ambejkusï exejti na enga xarharajka kʼuiripu ma, mítisïndi ambe enga jarhajka juchari mintsitarhu (1 Sam. 16:7). Nochi úaka jískakuni ambe engachi eratsijka, pʼikuarherajka ni ambe engachi újka. Jeoba sánderu imani ambe exesïndi engachi sési újka ka jarhuatasïndijtsïni parachi seguirini ísï úni. Peru ístu uékasïndi eskachi sóntku kuenta íntskukuarhiaka engachi uénaaka no sési jásï ambe eratsini ka eskachi kénditauaka ante dechi no sési jásï ambe úni (2 Crón. 16:9; Mat. 5:27-30).

12. ¿Ambe máteru ambe xarhatasïreni Moisesiri Lei?

¹² Ístu, Moisesiri Lei xarhatasïrendi eska Jeoba xénchasïnga jurhimbikuani (Sal. 37:28; Is. 61:8). Ima meru sési xarhatasti na enga jindeka para jurhimbikua jingoni kaani máteruechani. Engaksï israelitecha kumpliriuauenga leichani, Jeoba újchakurauasïrendi, peru engaksï no ísï uénga, kómu nitamakuarhisïrendiksï. Ju je exeani máteru tsimani mandamientuechani.

13, 14. a) ¿Ambeksï arhisïreni orheta tsimani mandamientuecha? b) ¿Néna marhuakuasïreni israelitechani inde tsimani mandamientuecha?

¹³ Leicha para solu Jeobani kʼéri ambe arhini. Orheta tsimani mandamientuechaksï arhiasïrendi israelitechani eskaksï solu Jeobani kómarhipiringa ka no máteru diosï úkatechani (Éx. 20:3-6). Íksï mandamientuecha nóksï Jeobani marhuakusïrendi, sino israelitechani. Engaksï no jurajkuenga Jeobani, sési nikuasïrendi, peru no sési nikuasïrendi engaksï kómarhiauenga máteru iretarhu anapu diosïchani.

¹⁴ Ju je eratsini ambe engaksï Kanaani anapuecha úkuarhinchapka. Niárasptiksï diosï úkatechani kómarhiani, enbesi de Tata Diosïni enga tsípiti jaka ka jurhimbitini (Sal. 115:4-8). Ístu, paraksï kʼéri ambe arhiani diosï úkatechani, ísku jándikua ambeksï úsïrendi enga ikichakueni jásï ambeka ka kánikua no sési jásï ambeksï úsïrendi engaksï sapiichani kéjtsïtauenga. Májkueni, engaksï israelitecha nóteru kurhajchapkia Jeobani ka diosï úkatechanksï kómarhiani, no sésiksï úkuaspti imecheri kʼumanchikuarhu anapuechani (2 Crón. 28:1-4). Imecha engaksï juramukua jatsipka, nóteruksï úsptia ambe engaksï Jeobaeri juramukuecha uandenga, úrasptiksï imani juramukuani  engaksï intsïnhapka paraksï no sési kaani imechani engaksï no uénga kuájpikuarhini (Ezeq. 34:1-4). Jeoba arhispti imeri iretani eska kastigariuapiringa imechani engaksï no sési kaapiringa uarhiitichani ka sapiichani (Deut. 10:17, 18; 27:19). Peru újchakuraaspti israelitechani engaksï kurhajchapka ka jurhimbikua jingonksï jámani (1 Rey. 10:4-9).

15. ¿Ambechi jorhenguarhisïni Jeobaeri ambe?

¹⁵ Jorhenguarhikua: Jeoba no kulpa jatsisïndi enga nema enga uandajka imani marhuakuni no kumpliriuajka imeri leichani ka no sési úkuani máteruechani. Nájkiruka ísïka, imajtsïni xénchasïndi ka exesïndi engachi no sési kánhajka. No sési pʼikuarherasïndi engajtsïni exejka eskachi kómu nitamakuarhixaka, sánderu eska nándi ma enga exejka imeri charhakuni sufririni jarhani (Is. 49:15). Jamberi Tata Diosï no jirejiresï kastigariuati imani enga no jurhimbitku újka ambe ma ka no moantani, peru kʼóru ísï úati jiáni enga uétarhiaka.

16-18. a) ¿Ambe ka ambe jimbo marhuasïreni Moisesiri Lei? b) ¿Ka ambechi jorhenguarhisïni?

¹⁶ Moisesiri Lei, uánikua ambe jimbo jarhuataasïrendi israelitechani. Orhejtsïkutichaksï no solu jatsisïrendi para jarhuataani Tata Diosïri ambe jingoni, sino ístu engaksï problema ambe jatsipiringa oksï nemani uándikuni. Ísï jimbo, kánikua jukaparhakuespti eskaksï jurhimbikua jingoni úrapiringa leini. Ju je exeani máru ejempluechani.

¹⁷ Enga israelita ma uándikupiringa nemani, no jirejiresï uándikunhantasïrendi. Iretarhu anapu orhejtsïkutichaksï jatsisïrendi paraksï sési exeni iámindu ambe, antedeksï uandani eska jatsispka para uarhini (Deut. 19:2-7, 11-13). Máteru ambe, ístuksï orhejtsïkuticha jatsisïrendi paraksï mámaru járhati uandanhiatecha jingoni jarhuajpini, komu jatsikuarhikueri ambe ka asta temungurhiricheri ambe (Éx. 21:35; Deut. 22:13-19). Engaksï orhejtsïkuticha jurhimbitku úenga iámindu ambe ka israelitechaksï úni ambe enga lei uandenga, iáminduechani marhuakuasïrendi ka ireta kʼéri ambe arhisïrendi Jeobani (Lev. 20:7, 8; Is. 48:17, 18).

¹⁸ Jorhenguarhikua: Jeoba iámindu ambe jimbo pendienti jarhasïndi ambe engachi nitamakuarhini jarhajka. Uékasïndi eskachi uékperakua ka jurhimbikua jingoni kaauaka máteruechani. Ka exesïndi ambe engachi újka ka uandani, asta engachi jandiajku jarhajka kʼumanchikuarhu (Ebr. 4:13).

19-21. a) Orhejtsïkuticha ka juesicha, ¿nénaksï jatsispi para kámani Tata Diosïri iretani? b) ¿Náki leichaksï jarhuajpisïreni paraka iámindu ambe jurhimbitku úkuarhipiringa? c) ¿Ambechi jorhenguarhisïni?

¹⁹ Iretecha engaksï Israeli no iauani japka, no sánksï jurhimbikua jingoni jámasïrendi. Komu Jeoba no uékenga eska imeri ireta májkueni jámapiringa eskaksï imecha. Juramukuaspti orhejtsïkutichani ka juesichani eskaksï iáminduechani májkueni kápiringa. Ístu arhiaspti eskaksï no no sési kápiringa oksï no kurhangukuani, sino eskaksï iámindu ambe jurhimbikua jingoni úpiringa (Deut. 1:13-17; 16:18-20).

 ²⁰ Pʼamojperakua jimbo, Jeoba íntsaaspti leichani enga jarhuataapiringa paraksï jurhimbitku úni iámindu ambe. Ju je exeni ejemplu ma. Lei úsïrendi eska nema no ísku jatini chkuanderakua ambe arhinhapiringa. ¿Néna úsïreni? Uénani jámani, ima enga kulparinhani jarhenga, jatsisïrendi para mítini né enga kulparini jarhenga (Deut. 19:16-19; 25:1). Ístu, para kulpabli arhinhani, uétarhisïrendi sikiera tsimani testiguecha paraksï nirani uandantani ambe (Deut. 17:6; 19:15). Peru enga nema no sési niátenga ka máechakuajku testigu jarhani, ¿ambe úkuarhisïreni? Ima enga no sési niátenga, no jatsisïrendi para eratsini eskaksï no ma ambe úkupiringa, jimboka Jeoba iámindu ambe exesïrenga. Ka ístu máteru ambe, tátichaksï intsïnhasïrendi sésikua paraksï familiani juramukuni, peru no iámindu ambe jimbo. Por ejemplu, máru problemecha ambe jingoni engaksï familiarhu jarhenga, iretarhu anapu orhejtsïkutichaksï jatsisïrendi para jarhuataani ka exenksï ambe enga úkuarhipiringa (Deut. 21:18-21).

²¹ Jorhenguarhikua: Jeobajtsïni ambakiti ejemplu xarhatachisïndi, jimboka méntkisï jurhimbikua jingoni úsïnga iámindu ambe (Sal. 9:7). Újchakuraasïndi imechani engaksï no méni jurajkujka ka engaksï újka ambe enga ima juramujka, peru kastigariuasïndi imechani engaksï no sési kámpijka jimbokaksï juramukua jatsisïnga (2 Sam. 22:21-23; Ezeq. 9:9, 10). Jamberiksï máru no sési jásï ambe újti ka eratsinksï eskaksï no ma ambe úminhaaka, peru Jeoba jiáni jusgariuasïndi enga meru uétarhijka (Prov. 28:13). Ka engaksï no moantajka, nóksï ióndasïndi kuenta íntskukuarhini eska “chérpikueni jásï ambes[ka] para niárani kastigarinhani Diosïri jájkichani jimbo enga tsípitika” (Ebr. 10:30, 31).

22-24. a) ¿Lei néchani sánderu kuájpiasïreni? b) ¿Ambechi jorhenguarhisïni Jeobaeri ambe? c) ¿Ambejtsïni arhisïni Éxodo 22:22-24?

²² Lei, imechani sánderu kuájchakuasïrendi engaksï no uénga kuájpikuarhini komu uerandujupindichani, tsïndichani ka imechani engaksï uérakua anapuepiringa. Iámindu Israeli anapu juesi jatsisïrendi para kumplirini arini juramukuani: “Nori jatsiska para chkuanderani enga uérakua anapu ma o uerandujupindi ma jusgarinhani jauaka, ka nori jámaaka pakatakuarhini uarhiiti tsïndiri ma xukuparhakuani komu prenda” (Deut. 24:17). Jeoba sánderu uandanhiasïrendi imechani jimbo engaksï no jatsipka né enga kuájpiapiringa ka kuenta kurhakuantasïrendi imechani engaksï no sési kámpienga (arhinta je Éxodo 22:22-24).

²³ Para kuájchakuani familiechani, Lei uandasïrendi eska imecha engaksï mismu familiarhu anapuepiringa, no jatsispka para relasioni seksuali jatsini (Lev. 18:6-30). Máteru iretechaksï sési exesïrendi indeni ambe ka astaksï jurajkusïrendi eskaksï indeni ambe úpiringa. Peru Tata Diosïri ireta jatsispti para májkueni exeni indeni ambe eska Jeoba, komu ambe ma enga kánikua ikichakueni jásïka.

²⁴ Jorhenguarhikua: Jeoba uékasïndi eska imecha engaksï juramukua jatsika, pendienti jauaka máteruecha jimbo. Kurhunhisïndi ísku jándikua ambe ka uékasïndi eskaksï kuájchakuauaka ka jurhimbikua jingoni káuaka iámindu imeri marhuarichani ka sánderu imechani engaksï no jatsika né enga kuájpiauaka.

25, 26. a) ¿Andichisï újki uandani eska uékperakua ka jurhimbikua ísïska komu irekani ka jirejtani? b) ¿Ambechi exea máteru artikulurhu?

²⁵ Úpiringachi uandani eska uékperakua ka jurhimbikua ísïska komu irekani ka jirejtani, jimboka ma ambe no úsïnga jarhani enga máteru no jauaka. Engachi seguru jarhajka eskajtsïni Tata Diosï jurhimbikua jingoni kámasïnga, sánderuchi xénchasïnga imani. Ka engachi xénchajka Jeobani ka ístu ambe engajtsïni juramuchijka, xénchaasïngachi máteruechani ka jurhimbikua jingonchi kaasïnga.

²⁶ Leiri pakatperkua jimbo, Jeoba úsïrendi sési pájperani israelitecha jingoni. Peru i Lei mójtakunhasti sánderu ambakiti ambe jingoni, jiáni enga Jesusi íntspipka imeri tsípikuani (Rom. 10:4). Apostuli Pablu uandaspti eska Lei “kʼumandajkuesp[ka] imani juramukueri enga jupiringa” (Ebr. 10:1, Táta Diósïri Uandakua Tata Jesukristueri Aiatsperakua). Máteru artikulu jimbochi exeaka máru ini ambakiti ambe ka na enga xáni jukaparhakueka eska kúnguarhikuarhu jauaka uékperakua ka jurhimbikua