1. Eska na arhijka Kolosasi 2:4, 8, ¿néna jánguarhintasïni Noambakiti parachi ísï eratsini eska ima?

NOAMBAKITI uékasïndi eskachi no kurhajchaaka Jeobani. Jimbosï uékajti eskachi ménderueni eratsiaka. Meru jánguarhintasïndi parachi ísï eratsini eska ima na uéjka. Úrasïndi imani ambe engachi jucha tsitijka parajtsïni támisï jánhastani ka úni eskachi imani ambe uáka enga ima uéjka (arhinta je Kolosasi 2:4, 8).

2, 3. a) ¿Andichisï jatsi para ísï úni eska na arhijka Kolosasi 2:8? b) ¿Ambechi exea ini artikulurhu?

² ¿Meru kánikua no sésiski eskajtsïni Noambakiti támisï jánhastaaka? Jo, kánikua no sésisti. Ju je miáni eska ambe enga Pablu karapka Kolosasi 2:8 jimbo, no jindespka para imecha engaksï no kristianuepka, sino para imecha engaksï espiritu santu jimbo erakunhapka (Kol. 1:2, 5). Imani jurhiatikuecha jimbo, imechaksï úpirindi no sési ambe úkuarhinchani, ka sánderia jucha ini jurhiatikuecha jimbo (1 Kor. 10:12). ¿Andi? Jimboka Noambakiti Echerirhu kʼuanijpanhaska ka ima uékasïndi támisï paani Tata Diosïri ambakiti marhuarichani (Jaŋ. 12:9, 12, 17). Ístu, irekaxakachi ini tiempu jimbo enga kʼuiripu no sési úri “sánderu ka sánderu no sési jáma[ni]” jaka (2 Tim. 3:1, 13).

³ Ini artikulu jimbochi exeaka na enga Noambakiti jánguarhintajka parachi ménderueni eratsini, úraparini “chkuanderakua ambe [...] enga no marhuajka”. Ju je exeani tanimu trampechani enga Noambakiti úraajka (Efes. 6:11). Máteru artikulu jimbochi exeaka nénachi uá kénditani juchari eratsikuarhu no sési jásï ambe engachi niárapka eratsini imani ambe jimbo enga Noambakiti úrajka. Peru ju je orheta exeni néna úspi eskaksï israelitecha  ísï eratsipiringa eska ima engaksï imani Echeri jimbo japkia engaksï Aiaminhapka ka ambechi jorhenguarhisïni inderi ambe.

4-6. Eska na arhijka Deuteronomio 11:10-15, engaksï israelitecha na niárapkia Echerirhu engaksï Aiaminhapka, ¿ambeksï jatsispi para mójtakuni engaksï ikarapiringa ambe ma?

⁴ Noambakiti sési mítikuspti néna úni eskaksï israelitecha diosï úkatechani kómarhiapiringa. Para ísï úni, imani ambe úraspti engaksï imecha uétarhinchani japka, tʼirekua konseguirini. Engaksï Echerirhu japkia engaksï Aiaminhapka, jatsisptiksï para jorhenguarhini néna ikarani jima ambe ma. Engaksï Ejiptu japka, itsïksï ríu Nilu pʼitasïrendi paraksï úni ataatani nani engaksï ikarapiringa ambe ma. Peru imani Echeri jimbo engaksï Aiaminhapka, no jarhaspti kʼéri iorhekua ma engaksï úpiringa itsï pʼitani para úni ataatani jima engaksï ikarenga ambe ma, sinoksï imani itsï úrasïrendi enga xúmu jimbo úkuarhijka xarhintku ka imani itsï enga emenda jimbo jarhajka (arhinta je Deuteronomio 11:10-15; Is. 18:4, 5). Ísï jimbo, israelitechaksï jatsispti para jorhenguarhini ikarani ambe ma, peru ménderueni. Ka úkua jukapirindi, jimboka sáno iáminduecha engaksï mítipka echerini ánchitani, desierturhuksï uarhispka.

⁵ Jeoba aianguasptia eska nóteru májkuenipiringuia. Tátsekua arhiaspti ambe ma engaksï jimbo jatsipka para jingontku jámani, inde ambe úpirindi no sóntku kurhangukuarhini eska ístu jindespka para engaksï ikarapiringa ambe ma. Arhiaspti: “Jingontku jáma je parajtsï no jurajkuni eska chári mintsita sánderu tsitiaka máteru ambe ka támisïjtsï nirani ka máteru diosïchantsï kómarhiani ka tinguixurhikuani” (Deut. 11:16, 17). ¿Andisï arhiapi eskaksï no jámapiringa máteru diosï úkatechani kómarhiani, mientrasi enga imeri ambe arhiani japka néna ikarani ambe ma?

⁶ Jeoba mítispti eskaksï israelitecha uékapiringa exeani máteru iretechani engaksï  no marhuakuenga Jeobani paraksï jorhenguarhini néna ikarani ambe ma. Ísïspti eskaksï Kanaani anapuecha sánderu jorhenaspka ikarani ambe ma ka eskaksï Tata Diosïri marhuaricha ka israelitechaksï úpirindi imecheri ambe jorhenguarhini. Peru peligru ma jarhaspti. Kanaani anapuechaksï Baalini kómarhisïrendi engaksï jakajkuenga eska auanda Baalirispka enga uénga eska janipiringa. Jeoba no uékasïrendi eskaksï israelitecha indeni chkuanderakua ambe jakajkupiringa. Peruksï israelitecha méntku úndaspti Baalini kʼéri ambe arhini (Núm. 25:3, 5; Juec. 2:13; 1 Rey. 18:18). ¿Néna úspi Noambakiti eskaksï israelitecha imani ambe úpiringa enga ima uéjka? Ju je exeni.

7. ¿Néna tsʼéjkunhaspi israelitecheri jakajkukua engaksï imani Echerirhu japkia engaksï Aiaminhapka?

⁷ Ambe enga orheta úrapka Noambakiti, jindespti eskaksï imecha uékaxapka eska janipiringa ka kuakaakurhani echerirhu. Echerirhu engaksï Aiaminhapka solu kʼamarhukuni jámani abrilini asta septiembrini jamberkusï janiendi. Ka ambakiti pʼikuntskua jarhasïrendi solu enga oktubrini uénenga janini. Iretecha engaksï Israeli no iauani japka, eratsisïrendiksï eskaksï jatsispka para úni ambe ma paraksï diosï úkatecha íntsaani itsï, engaksï xáni uétarhinchenga. Noambakiti úspti eskaksï israelitecha jakajkupiringa eskaksï solu ísï úpiringa ambakiti irekua ma jatsini engaksï májkueni úpiringa eska máteru iretecha engaksï no kómarhienga Jeobani. Imecha engaksï no mintsikenga Tata Diosïni, eratsisptiksï eska solu indeni ambe úparini, sóntku janipiringa, ísï jimbo, kómarhisptiksï diosï úkata Baalini.

8. ¿Ambe máteru ambe úraspi Noambakiti? Uandanta je néna úraspi.

⁸ Noambakiti ístu úraspti imani ambe engaksï israelitecha tsitienga. Iretecha engaksï no marhuakuenga Jeobani, ísku jándikua ambeksï úsïrendi paraksï kʼéri ambe arhiani diosï úkatechani, máru ambe engaksï uénga, jindespti eskaksï nanakecha ka tatakecha ísku jándikua ambe niátapiringa templurhu. Ima iretechaksï no solu jurajkusïrendi eska tataka ma ísku jándikua ambe niátapiringa máteru tataka jingoni o nanaka ma máteru nanaka jingoni ka máteru jásï ísku jándikua ambe, sino ístuksï no no sési exesïrendi (Deut. 23:17, 18; 1 Rey. 14:24). Ísïksï eratsisïrendi eska inde ambe marhuasïrenga paraksï diosï úkatecha úni eska echeri kánikua tʼirekua íntspepiringa. Uánikua israelitechaksï tsitispti ísku jándikua ambe niátani ka uénasptiksï marhuakuani diosï úkatechani. Ísïsti, niárasptiksï Noambakitiri jájki jimbo jarhani.

9. Eska na arhijka Oseas 2:16, 17, ¿néna úspi Noambakiti paraka Jeoba mirikurhinhapiringa?

⁹ Máteru ambe enga Satanasi úrapka jindespti eskaksï no úpiringa míteni Jeobani. Profeta Jeremiasiri jurhiatikuecha jimbo Jeoba uandaspti eskaksï profeta no jurhimbiticha úspka eskaksï israelitecha mirikurhipiringa Jeobaeri nombrini Baalini jimbo (Jer. 23:27). Peekaksï jamberi israelitecha nóteru úrenguia Tata Diosïri nombrini, sino Baaliri enga arhikuekajka “dueniu” o “patroni”. Ini ambe jimbo, Tata Diosïri marhuarichaksï nóteru úsïrendia mítini andisï Jeoba no májkueni eska Baali, í ambe úspti eskaksï májkueni kómarhipiringa Jeobani ka Baalini (arhinta je Oseas 2:16, 17 ka nota).

10. ¿Ambe úrasïni iásï Noambakiti?

¹⁰ Iásï, Noambakiti májkueni ambe úraxati eska jiájkani. Úsïndi eska kʼuiripu imani ambe uáka enga tsitijka, úparini eska ísku jándikua ambe jauaka ka eska kʼuiripu no mítiaka néski Jeoba. Ju je orheta exeni ini últimuni.

11. ¿Néna úski Noambakiti paraka kʼuiripu úkua jukanchaaka míteni Jeobani?

¹¹ Noambakiti úsïndi eska kʼuiripu úkua jukanchaaka  míteni Jeobani. Engaksï na uarhipkia Jesusiri apostulicha, máru engaksï uandenga eskaksï kristianuespka uénasptiksï chkuanderakua ambe jorhentpini (Uku. 20:29, 30; 2 Tes. 2:3). Ima kʼuiripuechaksï sánhani arhispti úni eska no niárapiringa mítinhani néski Tata Diosï. Por ejemplu, nóteruksï úrasptia Bibliarhu imeri nombrini ka ísïksï úrani komu “Tata”, oksï máteru uandakuechani úraania. Indeni ambe jimbo, ima enga arhintenga Bibliani úkua jukanchasïrendi kurhanguni néspi Jeoba ka néspiksï máteru diosïcha enga Biblia uandaajka (1 Kor. 8:5). Úrasptiksï májku uandakua, “Tata”, paraksï Jeobani ka Jesusini arhikuekani, i ambe úspti eska úkua jukapiringa kurhanguni eska Tata Diosï ka imeri Uájpa no májkueniska ka eskaksï táchani jásï ánchikuarhita úsïnga (Juanu 17:3). Enga nóteru mítinhapkia jurhimbitku ambe, úspti eska uénapiringa jakajkunhani eskaksï tanimu kʼuiripuecha máechakua diosïska, ambe ma enga Biblia no jorhentpijka. Ini ambe jimbo, uánikuaksï eratsisïndi eska ma no uáka mítini Tata Diosïni ka eska no mítikuarhiska na enga jásï kʼuiripu máeka. ¡Í ambe kʼéri chkuanderakua máesti! (Uku. 17:27).

12. a) ¿Relijioni no jurhimbiti ambe jurajkusïni eska jauaka? b) Eska na arhijka Roma 1:28-31, ¿ambe niáraski úkuarhini?

¹² Noambakiti úrasïndi ísku jándikua ambe. Ióntki anapu Israeliri jurhiatikuecha jimbo, Noambakiti úraspti relijioni no jurhimbitini para úni eska japiringa ísku jándikua ambe. Iásïjtu májkueni úsïndi. Relijioni no jurhimbiti no no sési exesïndi ísku jándikua ambe ka asta úsïndi eska no no sési xarharaaka. Ísï jimbo, uánikua engaksï uandajka marhuakuni Tata Diosïni, nóksï ísï úsïndi eskaksï imeri juramukuecha na uandajka. ¿Ambe niáraski úkuarhini? Ima ambe niárasti úkuarhini enga apostuli Pablu Roma anapuechani karakuapka (arhinta je Roma 1:28-31). Máru ambe “enga nómindu terukuntajka”, jindesti ísku jándikua, ístu enga tataka ma nanakeni jámajka o nanaka ma tatakeni jámani (Rom. 1:24-27, 32; Jaŋ. 2:20). Ísïsti, kánikua jukaparhakuesti eskachi imani ambe uáka enga Biblia jorhentpijka.

13. ¿Ambe máteru ambe úrasïni Noambakiti?

¹³ Noambakiti imani ambe úrasïndi engachi jucha tsitijka. No no sési jarhasti ánchikuarhini para úni tumina andani para jucha ka para juchari familia. Ka uékasïngachi jorhenguarhini úni ambe ma para ísï úni (1 Tim. 5:8). ¿Nénachi úsïni konseguirini? Sáno méntkisï, jatsisïngachi para eskuela nirani ka ambakiti jorhenguarhiricheni. Peru jatsiskachi para jingontku jámani. Uánikua paisicha jimbo, eskuelechaksï no solu jorhentpesïndi ambakiti  ambe enga marhuatspiaka, sino ístu ambe engaksï kʼuiripuecha eratsijka. Úsïndiksï eska no jakajkunhaaka eska jarhaska Tata Diosï ka nóksï jiókuarhisïndi Bibliani. Arhiasïndiksï estudiantichani eska sánderu ambakiti jorhentperakua jindeska eska kʼuiripuni no nema kueraska, eska ísku niáraska úkuarhini (Rom. 1:21-23). Iksï jorhentperakuecha méntku no terukuntasïndi Tata Diosïri mímixekua jingoni (1 Kor. 1:19-21, Táta Diósïri Uandakua Tata Jesukristueri Aiatsperakua; 1 Kor. 3:18-20).

14. ¿Ambe niárasïni úni kʼuiripuecheri eratsikua?

¹⁴ Ambe enga kʼuiripu jorhentpijka, no terukuntasïndi Tata Diosïri juramukuecha jingoni engaksï jurhimbitiika. Nóksï úsïndi eskaksï xarharaaka ambe enga Jeobaeri espiritu úrpijka, sino ambe enga mintsita tamapu újka, o no sési jásï ambe (Gal. 5:19-23). Kʼéramakuarhini ka kánikua sési exekuarhini, í ambe úsïndi eska kʼuiripu jandiajkumindu pendienti pakuarhiaka (2 Tim. 3:2-4). Ísï jámani méntku no sáni terukuntasïndi eska na uéjka Jeoba eskachi kaxumbitiuaka (2 Sam. 22:28). ¿Nénaksï kʼamaraski máru kristianuecha engaksï karrera ma estudiarika? Ísï eratsini eska kʼuiripuecha ka no ísï eska Tata Diosï na eratsijka. Ju je exeni ejemplu ma.

15, 16. ¿Ambechi jorhenguarhisïni ambe enga pirenchi nitamakuarhipka?

¹⁵ Pirenchi ma enga jukari kinse uéxurhini páni jakaia marhuani tiempu kompletueri, uandantasïndi: “Ji itsï atakuarhispkia komu Testigu ma, ka arhintaspka ka kurhaani na enga xáni peligru jarhajka para karrera ma estudiarini. Peruni no kasu úspka. Uandaspka eskani ji no imani ambe úkuarhinchapiringa”. ¿Náki uandanhiatechani niáraspi jatsiani? Pirenchi uandasïndi: “Eskuelarhu anapu ambe estudiarini úsïrendi eskani kánikua tiempu úrapiringa ka jánguarhintani engani jamberi no uénga kómarhini Jeobani ísï eska antesi; chkeni pʼikuarherasïrenga  enga uénga eskani no xáni sési pʼikuarherapiringa Bibliaeri ambe aianhpini, ka kánikua kuatarasïrenga engani jamberi no uénga sési prepararikuarhini para tánguarhikuecha. Kuenta íntskukuarhispka eska xáni jánguarhintani karrera ma estudiarini, úxapka eskani nóteruni xáni sési pájperapiringuia Jeoba jingoni. Peruni jiájkani kurhanguspka eskani jatsispka para jurajkuni eskuelani. Ka ísï úspka”.

¹⁶ Karrera ma estudiarini, ¿ambe úspi eska ima eratsipiringa? Pirenchi uandantasïndi: “Kʼuratsesïnga jiókuarhini eska karrera ma estudiarini, úspka eskani solu imani ambe exepiringa ambe engaksï máteruecha no sési uénga, sánderia erachicheri ambe; erokuarhini eskaksï imani ambe úpiringa engaksï no úpiringa úni, ka niárani jarhareani. Ióndaspka mójtakuni na engani eratsienga. Ambe engani nitamakuarhika, exerastirini na enga xáni no sésika no úni ambe engajtsïni juchari Táti auandarhu anapu arhijka imeri organisasioni jimbo. Jeobarini sánderu sési mítispti eskani ji mismu. ¡Uánikua problemechani no niárapiringa jatsiani engani kurhajchapiringa Jeobani!”.

17. a) ¿Ambechi jatsiski para méntkisï erakuni úni? b) ¿Ambechi exea máteru artikulu jimbo?

¹⁷ Eskachi méntkisï erakuaka no méni jurajkuni eskajtsïni Noambakitiri parhakpini arhiaka ambe úni “mámaru járhati jorhenguechani jimbo ka chkuanderakua ambe jimbo enga no marhuajka”. Ju je méntkisï kuájchakukuarhini Noambakitiri (1 Kor. 3:18; 2 Kor. 2:11). Ju je no méni jurajkuni eskajtsïni Noambakiti mirikutaaka néski Jeoba ka na enga uéjka eskachi marhuakuaka. Ju je kumpliriuani Tata Diosïri ambakiti juramukuechani engaksï uandajka na engachi jatsika para jámani. Ka ju je no jurajkuni eska Noambakiti uáka parachi no kurhajchaani Jeobaeri konsejuechani. Peru ¿ambechi uá úni engachi kuenta íntskukuarhiska eskachi ísï eratsisïnguia eska parhakpini anapuecha? Máteru jimbochi exeaka nénajtsïni uá jarhuatani Tata Diosïri Karakata parachi méntku jurajkuni asta imani eratsikua ka pʼindekuechani engaksï uinhapitiika (2 Kor. 10:4, 5).