1. ¿Andichisï Jeobaeri marhuaricha jatsi para ísï úni eska na uandapka Jesusi?

ENGA Jesusi últimu jurhiatikuecheri profesiani aianguapka, uandaspti: “Xéparini je, ásïksï chári mintsitecha uéne [...] parhakpeni anapu ambe kánhchani”, enga jindeka, imani ambe engachi jimbo pauani pauani uandanhiajka (Luk. 21:34, Táta Diósïri Uandakua Tata Jesukristueri Aiatsperakua). ¿Andichisï Jeobaeri marhuaricha jatsi para ísï úni eska na arhijka inde karakata? Jimboka ini jurhiatikuecha jimbo, juchajtuchi májkueni járhati problemechani ambe jatsiasïnga eska iámindu kʼuiripuecha.

2. ¿Náki problemechanksï jatsiaski juchari erachicha?

² Menisïjtsïni uánikua problemecha ambe uandanhiatasïndi májku tiempu jimbo. Ju je exeani arini ejempluechani. Erachi ma enga Juanu arhinhajka * pʼamenchakua ma kámasïndi éjpurhu (esclerosis múltiple), kánikua no sési pʼikuarheraspti enga témba jurajkupka, jiáni engaksï tʼuini diesinuebe uéxurhini páni japkia temungurhirini. Tátsekua, imeri tsimani uájpechaksï nóteru uékasptia marhuakuni Jeobani. Bob ka Linda enga temungurhiri máeka, no sésiksï nitamakuarhisti máteru járhati problemecha jimbo. Tsimarhanksï nóteru jatsisptia ánchikuarhita ka sánderu tátsekuaksï tsïtaspti imecheri kʼumanchikuani. Ístu, Lindanksï pʼamenchakua ma exekuntaspti mintsitarhu enga úpiringa uándikuni ka ístu artritis kámasïrendi.

3. Eska na arhijka Filipusʌ 4:6, 7, ¿amberichi uá seguru jarhani?

³ Uákachi seguru jarhani eska Jeoba, juchari Kuerajpiri ka Táti uékpiti, kurhanguchisïngajtsïni na engajtsïni xáni no sési úchejka komu nitamakua. Ka uékasïndijtsïni jarhuatani parachi orhepani uérani problemecha jimbo (arhinta je Filipusʌ 4:6, 7). Imeri Karakatarhu, uánikua relatuechanchi exeantasïnga  engaksï uandajka na engaksï imeri marhuaricha orhepani uérakuapka problemechani ka uandantanksï na enga Jeoba jarhuataapka. Ju je exeani máru ejempluechani.

4. ¿Ambe xáni úkua jukanchaspi Eliasi ka amberi seguru jarhaspi eska Jeoba úpiringa?

⁴ Eliasi jiánisï marhuakuspti Jeobani enga no sési jánhaskuarhini japka ka uáni problemechani nitamakuarhiaspti. Akabi, rei ma enga no jurhimbitku juramupka Israeli, Jesabeli jingoni tembuchaspti, uarhiiti no sési úri ma enga Baalini kómarhienga. Tsimarhanksï úspti eska paisirhu anapuecha Baalini kómarhipiringa ka uandikuasptiksï uánikua Jeobaeri profetechani. Peru Eliasi úspti sïpakuarhini. Ístu jimboka mintsikaspka Jeobani, tsípiti pakaraspti enga kʼéri kʼarhingua ma japka (1 Rey. 17:2-4, 14-16). Ístu kurhakuspti jarhuajperata Jeobani jiáni enga tsʼéjkuapka Baaliri profetechani ka iámindu imechani engaksï imani kómarhienga ka arhiaspti israelitechani eskaksï marhuakupiringa Jeobani (1 Rey. 18:21-24, 36-38). Eliasi uánikua xanhari exespti eska Jeoba kuájchakuxapka ka jarhuatani imani jurhiatikuecha jimbo enga xáni úkua jukapka.

5, 6. Eska na arhijka 1 Reyes 19:1-4, ¿néna pʼikuarheraspi Eliasi ka ambe úspi Jeoba para xarhatakuni eska xénchasïrenga?

⁵ (Arhinta je 1 Reyes 19:1-4). Peru enga reina Jesabeli arhipka eska uandikupiringa, Eliasi chéspti. Ísï jimbo, Beer-seba niraspti sïpakuarhini. Xáni no sési pʼikuarheraxapti enga uékenga uarhini. ¿Andisï ísï pʼikuarherapi? Jimboka kʼuiripu máespka enga no perfektuepka “enga májku jásïpka eska jucha” (Sant. 5:17).  Jamberi niárapti kánikua uandanhiani jimboka méntku eratsixapka ambe ma ka kuataratini jarhani. Peeka niárapka eratsini eska no ma ambe marhuaspka ambe enga xáni úpka kómarhikua jurhimbiti jimbo, eska Israeli májkueni jánhaskuarhixapka ka eska imaterkusï marhuakuni japkia Jeobani (1 Rey. 18:3, 4, 13; 19:10, 14). Jamberijtsïni ísku pakatajti na enga eratsenga i ambakiti profeta, peru Jeoba kurhangukusïrendi.

⁶ Jeoba no xukaspti Eliasini enga aiangupka na enga pʼikuarherenga, sánderu sési, jarhuataspti para ménderu uinhapikua jatsini (1 Rey. 19:5-7). Tátsekua, uékperakua jingoni jurhimberantaspti, xarhatakuparini na enga xáni uinhapika Jeoba. Ístu, aianguspti eskaksï 7.000 israelitecha jarhaspka engaksï no kómarhienga Baalini (1 Rey. 19:11-18). Jeoba xarhatakuspti Eliasini eska xénchasïrenga.

7. ¿Andichisï uá sési pʼikuarherantani engachi eratsintaska na enga Jeoba jarhuatapka Eliasini?

⁷ ¿Uandanhiata machi jatsiski? Uinhaperantasïndijtsïni mítini eska Jeoba kurhangusïrenga na enga pʼikuarherenga Eliasi. Ka sésichi pʼikuarherasïnga mítini eska ístu Jeoba kurhangusïnga ambe engajtsïni uandanhiatajka. Mítisti ambe engachi no újka úni ka asta mítisïndi ambe engachi eratsijka ka pʼikuarherani (Sal. 103:14; 139:3, 4). Engachi juchajtu kurhakuska jarhuajperata Jeobani ísï eska Eliasi na úpka, imajtsïni jarhuataati orhepani uérakuni imani ambe engajtsïni uandanhiatajka (Sal. 55:22).

8. ¿Nénajtsïni jarhuataa Jeoba orhepani uérakuani uandanhiatechani?

⁸ Méntku eratsini jarhani ambe ma, uáti eskachi imani ambe eratsiaka engajtsïni no sési úchiaka ka no sésichi pʼikuarheraaka. Engachi indeni ambe nitamakuarhiska, ju je miáni eskajtsïni Jeoba jarhuataaka. ¿Néna? Imajtsïni pʼímarhisïndi eskachi aiangukuarhiaka ambe engajtsïni xáni uandanhiatajka ka asegurarichisïndijtsïni eskajtsïni mókuchiantauaka juchari kómarhikuechani (Sal. 5:3; 1 Ped. 5:7). Ísï jimbo, ju je someni aianguni ambe engajtsïni xáni uandanhiatajka. Nájkirukajtsïni no meru ima uandajpaaka, ísï eska Eliasini, úraati imeri Karakatani ka imeri organisasionini. Ejempluechani engachi Bibliarhu arhiantauaka, jarhuataatijtsïni parachi sési pʼikuarherantani ka jatsinchi ma erokuarhikua. Ka ístujtsïni uinhaperantaati juchari erachicha (Rom. 15:4; Ebr. 10:24, 25).

9. ¿Nénajtsïni uá jarhuatani ambakiti amigu ma?

⁹ Jeoba arhispti Eliasini eska máru ánchikuarhita ambe iásï Eliseu úpiringuia. Ísï, amiguni ma íntskuspti enga úpiringa jarhuatani jiáni enga no sési pʼikuarherani japiringa. Májkueni, engachi jatsika amiguni ma engachi mintsikajka, imajtsïni uáti jarhuatani engachi no sési nitamakuarhini jauaka (2 Rey. 2:2; Prov. 17:17). ¿Ka engachi ísï exejka eskachi no nemani jatsiska engachi uáka aiangukuarhini juchari uandanhiatechani? Jimajkani ju je kómarhini Jeobani eskajtsïni jarhuataaka exentani ambakiti erachini o pirenchini ma engajtsïni jarhuataaka jiáni engachi uétarhinchani jauaka.

10. a) ¿Ambe enga Eliasi nitamakuarhipka, juchajtuchi ambe erokuarhisïni eska úkuarhiaka? b) ¿Nénajtsïni jarhuatasïni aiatsperakua engachi Isaías 40:28, 29 jimbo arhintajka?

¹⁰ Jeoba jarhuataspti Eliasini paraka úpiringa orhepani uérakuani imeri uandanhiatechani ka para ióni jamberi sési marhuakuni. Ambe enga Eliasi nitamakuarhipka, úsïndi eskachi juchajtu uáka orhepani uérani. Jamberiksï jauati jurhiatikuecha engachi kánikua uandanhiani jauaka engajtsïni kuatajkuajka ka no sési pʼikuastani. Peru engachi mintsikaska Jeobani, imajtsïni íntskuati uinhapikua parachi seguirini jarhani marhuakuni (arhinta je Isaías 40:28, 29).

11-13. ¿Ambeksï nitamakuarhispi tanimu ióntki anapu Tata Diosïri marhuaricha?

¹¹ Bibliarhu, ístuchi arhintasïnga máteru kʼuiripuecheri engaksï kánikua kómu nitamakuarhipka. Por ejemplu, Ana jatsispti para tekaantani jimboka kʼuratsesïrenga enga no uénga kaani sapiichani ka enga xáni arhinchenga máteru Elkaná témba (1 Sam. 1:2, 6). Xáni uandanhiaxapti enga niárapka uerani ka nóteru kʼarhimania (1 Sam. 1:7, 10).

¹² Rei Dabidi ístu kánikua no sési nitamakuarhispti. Ju je exeni máru ambe. Ísï pʼikuarheraspti enajki nóteru úpirinia orhepani uérani uánikua imani ambe jimbo enga no sési úpka (Sal. 40:12). Jatsispti para orhepani uérani jiáni enga uájpa Absaloni nóteru uékapkia kurhajchani, enga tátsekua niárapka uarhini imani ambe jimbo enga úpka (2 Sam. 15:13, 14; 18:33). Ístu, Dabidiri sánderu ambakiti amigu ma jurajkuspti para Absaloni jingoni úkuarhini (2 Sam. 16:23–17:2; Sal. 55:12-14). Uánikua salmuechani enga karaapka, xarhatasïndiksï na enga no sési pʼikuarherani japka, peru ístuksï xarhatasïndi na enga xáni mintsikenga Jeobani (Sal. 38:5-10; 94:17-19).

¹³ Tátsekua, salmueri karari ma enga jamberi Asafiri desendientipka ka enga Tata Diosïri pímbinhasï templurhu marhuauenga, kánikua no sési pʼikuarheraspti. Uénaspti tsitini na engaksï irekani japka no sési úricha ka inde ambe úspti eska nóteru tsípikua jingoni irekapiringuia ka kómu pʼikuarherani. Asta uénaspti nóteru xáni jukaparharaani kóntperatechani engaksï Tata Diosïri marhuaricha intsïnhaajka (Sal. 73:2-5, 7, 12-14, 16, 17, 21).

14, 15. ¿Ambechi jorhenguarhisïni ini ejempluecheri enga Biblia uandaajka?

¹⁴ I tanimu Jeobaeri marhuarichaksï kómarhispti Jeobani paraka jarhuataapiringa. Aiangukuarhisptiksï na engaksï pʼikuarherani japka  kómarhikua jimbo. Jurhimbitkuksï aianguspti andiksïsï xáni uandanhiani japi. Ka méntkisïksï nirasïrendi jima engaksï Jeobani kómarhienga (1 Sam. 1:9, 10; Sal. 55:22; 73:17; 122:1).

¹⁵ Juchari Tata Diosï pʼamojpiti, mókukuantaspti iámindu imechani. Ana nóteru no sési pʼikuarherasptia (1 Sam. 1:18). Dabidi karaspti: “Uánikua ambe jimbo no sési nitamakuarhisïndi ima enga jurhimbitku jámajka, peru Jeoba iámindu ambe jimbo jarhuatasïndi” (Sal. 34:19). Ka salmueri karari ísï pʼikuarheraspti enajki Jeoba jájki jurhijkandani jimbo jupijtapi ka jarhuatani imeri ambakiti konsejuecha jingoni. Pirespti: “Kánikua sésisti para ji, Tata Diosïni andarherani. Úska eskarini Tata Jeoba, Kʼéri Juramuti, kuájchakuaka” (Sal. 73:23, 24, 28). ¿Ambechi jorhenguarhisïni ini ejempluecheri? Eska ménisïchi kánikua uandanhiauaka problemecha ambe jimbo. Peruchi orhepani uéraaka engachi eratsintaska na enga Jeoba jarhuataaka máteruechani, engachi kómarhiska ka kurhajchani iámindu ambe jimbo (Sal. 143:1, 4-8).

16, 17. a) ¿Andichisï no jatsi para jurajkuni Jeobani ni imeri marhuarichani? b) ¿Nénachi uá ménderu uinhapikua jatsini?

¹⁶ Ístuchi jorhenguarhisïnga máteru ambakiti ambe ini tanimu ejempluecheri: nóchi jatsiska para jurajkuni Jeobani ni imeri marhuarichani (Prov. 18:1). Nancy kánikua no sési nitamakuarhispti  enga imeri uámba jurajkupka. Uandantasïndi: “Uánikua jurhiatikuecha jimbo, no nemani uékasïrenga exeni ni nemani jingoni uandontskuarhini. Peru engani sánderu jarhariauenga, sánderuni kómu pʼikuarherasïrenga”. Jiáni uénaspti nóteru ísï pʼikuarherania enga uénapka exeni néna jarhuataani máteruechani engaksï problema ambe jatsipka. Nancy uandasïndi: “Kurhajchaasïrenga engaksï uandantani jarhenga na engaksï pʼikuarherenga. Kuenta íntskukuarhiska eska, engani sánderuni imecheri lugari jimbo niárenga, nóteruni xáni lastima úkuarhisïrenguia”.

¹⁷ Uákachi ménderu uinhapikua jatsini engachi niraska tánguarhikuecharhu. Indeni ambe úparini, úsïngachi eskajtsïni Jeoba sánderu jarhuataaka ka sésijtsïni pʼikuastani (Sal. 86:17). Tánguarhikuecharhu, úsïndijtsïni uinhaperantani imeri espiritu santu jimbo, imeri Karakata jimbo ka imeri marhuaricha jimbo. Ístu, tánguarhikuecharhuchi úsïnga uinhaperpintani ka eskachi uinhaperanhantaaka (Rom. 1:11, 12). Pirenchi ma enga Sofía arhinhajka, uandaspti: “Jeoba ka erachichajtsïni jarhuatasti orhepani uérani. Tánguarhikuechaksï sánderu jukaparhakuespti para ji. Exeska eska, engani sánderu predikarijka ka sánderu jarhuajpini kúnguarhikuarhu, sánderu no úkua jukasïndi parani orhepani uérakuani problemechani ka engani uandanhiani jarhajka”.

18. ¿Ambe uá úni Jeoba engachi no sési pʼikuarherani jauaka?

¹⁸ Engachi no sési pʼikuarherani jauaka, ju je miáni eska Jeoba no solu aiatspiska eska sánderu orhepani kénditaaka kómu nitamakuani para méntkisï, sino ístujtsïni aiachisïndi eskajtsïni jarhuataaka iásï. Ima úsïndi eskachi uékaaka ka ístu parachi uinhapikua jatsini para úni orhepani uérani engachi no sési pʼikuarherani jauaka o engachi nóteru jánhaskaakia ambe úni (Filip. 2:13).

19. ¿Ambejtsïni aiachesïni Roma 8:37-39?

¹⁹ (Arhinta je Roma 8:37-39). Apostuli Pablujtsïni arhisïndi eskajtsïni no nema uáka jarharetani na engajtsïni xáni uéjka Tata Diosï. Peru ¿nénachi uá jarhuataani erachichani engaksï jánguarhintani jaka orhepani uérani kʼérati problemecha jimbo? Máteru artikulu jimbochi exeaka néna xarhatakuani pʼamojperakua ka jarhuataani erachichani, ísï eska na újka Jeoba.