1. ¿Ambe arhiaspi apostuli Pablu erakukatechani eskaksï úpiringa?

“ASTERU jáma je terokukuantani parhakpini anapuechani”, ísï arhiaspti apostuli Pablu primeru siglurhu anapu kristianuechani (Rom. 12:2). ¿Andisï Pablu arhiapi eskaksï ísï úpiringa acheeticha ka uarhiiticha engaksï aiakukuarhitini japkia Tata Diosïni ka espiritu santu jimboksï erakukateni? (Rom. 1:7).

2, 3. a) ¿Ambe úsïni Noambakiti parachi no kurhajchani Jeobani? b) ¿Nenachi uá nóteru eratsini imani ambe engachi kánikua pʼindeka eratsini o úni?

² Apostuli Pablu uandanhiasïrendi jimbokaksï máru kristianuecha uénaspkia ísï eratsini eska ima kʼuiripuecha engaksï Noambakitiri jájki jimbo japka (Efes. 4:17-19). Juchajtuchi uáka indeni ambe úkuarhinchani. Noambakiti enga juramuni jaka ini parhakpinirhu, kánikua jánguarhintaxati mámaru ambe úraparini parachi jarhareni Jeobani. Ma ambe enga úrajka, jindesti eskachi meru tsitiaka úni ambe ma parachi juchajkumindu sési uéranchani o kʼéri ambeni. Asta uáti úrani imani ambe engachi nitamakuarhika, nani engachi anapueka ka jorhentperakuani engachi eskuela intsïnhaka para úni eskachi ísï eratsiaka eska Noambakiti na uéjka.

³ ¿Uáchi meru nóteru eratsini imani ambe engachi kánikua pʼindeka eratsini o úni? (2 Kor. 10:4). Ju je exeni Pablueri mókuntskua: “Xereanta[xakachi] kʼuiripuecheri eratsikuechani ka iámindu teparakuarhikua ambe engaksï jimbo nómindu uékajka míteni Diosïni, ka ístu para úni eska kʼuiripuecha janhanharhiaka Kristuni iámindu ambe ma jimbo engaksï eratsijka” (2 Kor. 10:5). Jo ísïsti, Jeobaeri jarhuajperata jingoni, uákachi kénditaani no sési járhati eratsikuechani. Májkueni eska medisina na marhuajka pʼamenchakua ma jimbo, Tata Diosïri Karakatajtsïni uáti jarhuatani parachi kénditani no sési jásï ambe enga Noambakitiri parhakpini jimbo jaka.

4. ¿Uánikuechachi ambe jatsispi para mójtakuni engachi jorhenguarhipka ambe enga Tata Diosïri Karakata arhijka?

⁴ Ju je miáni ambe engachi xáni mójtakuka engachi jorhenguarhipka ambe enga Tata Diosïri Karakata arhijka ka engachi erakupka marhuakuni Jeobani. Uánikuechachi jatsispka para nóteru únia imani ambe enga no sési jaka (1 Kor. 6:9-11). Xáni engachi agradeserikujka Jeobani engajtsïni jarhuataka indeni ambe jurajkuni.

5. Eska na arhijka Roma 12:2, ¿ambe tsimani ambechi jatsiski para úni?

⁵ Peru nóchi méni jatsiska para eratsini eskachi nóteru ambe ma jatsiskia para mójtakuni. Nájkirukachi nóteru újkia imani ambe engachi antesi de itsï atakuarheni uénga, komu kʼéri pekadu ambe, útasïchi jatsiska para jánguarhintani no úni imani ambe engajtsïni niárapiringa ménderu úrani kʼéri pekadu ambe. ¿Nénachi úsïni ísï úni? Pablu uandasïndi: “Ásteru jáma je terokukuantani parhakpini anapuechani, sino ménderueni jáma je, jimboka chári eratsikuecha jimbanheranhantaskia” (Rom. 12:2). Ísï jimbo, jatsiskachi para tsimani ambe úni. Orheta jatsiskachi para nóteru terokukuantania parhakpini anapuechani. Tsimani úni jámani, jatsiskachi para mójtakurhini jimbanherantaparini juchari eratsikuani.

6. ¿Ambechi jorhenguarhisïni imani ejemplueri ambe enga Jesusi úrapka ixú Mateu 12:43-45 jimbo?

⁶ Enga Pablu uandapka mójtakurhini, sánderu ambesï arhikuekani japti eska solu ménderueni xarharani. Jindesti mójtakuni iámindu ambe na engachi jásï kʼuiripu máeka (exe je rekuadruni “ ¿Méntku mójtakukuarhini o solu ménderueni xarharani?”). Jatsiskachi para meru mójtakuni na engachi eratsijka, i ambe jindesti ambe engachi tsitijka, na engachi jámajka ka ambe engachi mintsitarhu pʼikuarhinhijka. Ísï jimbo, iáminduechachi jatsiska para kurhamarhikuarhini: “¿Néna mójtakurhixaki parani májkueni úni ambe ma eska Jesusi? ¿Solu jindeski parajtsïni máteruecha ménderueni exeni? ¿O meru iámindu ambe jimbo mójtakurhixaki na engani jásï kʼuiripu máeka?”. Mateu 12:43-45, ejemplu ma  jarhasti enga Jesusi úrapka ka enga xarhatajka ambe engachi jatsika para úni (arhinta je). Í ejemplu xarhatasïndi ambe ma enga kánikua jukaparhakueka: no solu uétarhisïndi nóteru eratsinia no sési jásï ambe; jatsiskachi para imani ambe eratsini jarhani enga Tata Diosï jaiapanhintajka.

7. ¿Nénachi uá mójtakuni na engachi jásï kʼuiripu máeka?

⁷ ¿Meruchi uá mójtakuni na engachi jásï kʼuiripu máeka? Tata Diosïri Karakata arhisïndi: “Chájtsï Espiritu jimbo jorhendanhaska ménderueni eratsini ka ménderueni pʼikuarhinheni, ka jimbanhentantsï ísï eska Diosï na kuerajpejka, ka kaxumbini ka pímbinhaxentani ísï eska Diosï na uéjka” (Efes. 4:23, 24, Táta Diósïri Uandakua Tata Jesukristueri Aiatsperakua). Eskachi na exekia, uákachi mójtakurhini, peru no fásilisïndi. No solu jindesti pʼíngukuarhini para no úni o tsitini imani ambe enga no sési jaka. Jatsiskachi para mójtakuni ambe engachi eratsijka. I ambe arhikuekasïndi mójtakuni ambe engachi tsitijka, na engachi jámajka ka ambe engachi jimbo újka ambe ma. Ka parachi ísï úni, jatsiskachi para seguirini jarhani jánguarhintani.

8, 9. Ambe enga nitamakuarhika erachi ma, ¿néna xarhatasïni eska jukaparhakueska meru mójtakuni na engachi jásï kʼuiripu máeka?

⁸ Ju je exeni ambe enga nitamakuarhipka erachi ma enga no sési kámpienga, kauisïrendi ka tsitisïrendi uarhipini. Enga jurajkupkia indeni ambe ka niárani itsï atakuarhini, ireta sapichurhu anapuechaksï enga erachi irekapka, niárasptiksï ambakiti ambe exeni. Peru ma xanhari, ísï no ióni jimbo enga na itsï atakuarhipkia, juchari erachi nitamakuarhispti ambe ma enga no erokuarhienga: kauicha ma niraspti imeo para uarhipeni erachi jingoni. Uénani jámani, erachi pʼíngukuarhixapti para no uarhipeni. Peru no úspti tekaantani enga kauicha no sési ambe uandapka Jeobaeri nombriri ambe. Uéakuspti kʼumanchikuarhu ka ataspti kauichani. ¿Andisï ísï úpi? Jimboka, nájkiruka Bibliaeri ambe jorhenguarhini jarhuatapka pʼíngukuarhini para nóteru uarhipenia, útasï nótki mójtakuxapti ambe enga eratsenga, o sea, nótki meru mójtakukuarhixapti na enga jásï kʼuiripu máepka.

⁹ Nájkiruka indeni ambe nitamakuarhipka, seguirixapti jánguarhintani (Prov. 24:16). Orhejtsïkuticheri jarhuajperata jingoni, seguirixapti sési marhuakuni Jeobani ka ísï tátsekua, niáraspti orhejtsïkutini. Peru chúrikua ma jimbo, enga ima Kʼumanchikua Reinuerirhu uérakua japka, májkueni jásï ambe nitamakuarhispti eska máru uéxurhini antesi: kauicha ma máteru orhejtsïkutini atapirindi. ¿Ambe úspi juchari erachi? Iatsitakuarhu ka kaxumbikua jingoni uandontskuarhispti kauicha jingoni, úspti eska kauicha nóteru no sési jámapiringuia ka pántaspti imeri kʼumanchikuarhu. ¿Andisï indeni ambe úpi erachi? Jimboka mójtakuspkia imeri eratsikuani. Iásï kʼuiripu máestia enga tsitijka pínandikua jingoni irekani ka kaxumbitini, enga ísï mójtakukuarhika, ústi eska Jeoba kʼéri ambe arhinhaaka.

10. ¿Ambechi jatsiski para úni parachi meru mójtakuni na engachi jásï kʼuiripu máeka?

¹⁰ Mójtakurhini, no jindesti ambe ma engachi sóntku újka ka no jánguarhintaparini. Jamberichi jatsiaka para ióni jamberi jánguarhintani xáni eskachi xáni uáka (2 Ped. 1:5). Nóchi uáka mójtakurhini solu jimbokachi sáni ma tiempu marhuakuskia Jeobani. Jatsiskachi para meru jánguarhintani mójtakuni na engachi jásï kʼuiripu máeka. ¿Ambejtsïni jarhuata? Ju je exeni máru ambe engachi jatsika para úni enga kánikua jukaparhakueka.

11. Kómarhini Jeobani, ¿nénajtsïni jarhuatasïni parachi mójtakuni juchari eratsikuani?

¹¹ Ambe engachi orheta jatsika para úni,  jindesti kómarhini. Jatsiskachi para májkueni ambe kurhajkuarhini eska salmueri karari enga uandapka: “Ú eska juchiti mintsita pímbinhasïuaka, oh Tata Diosï, ka ú eskani jimbanhi espiritu ma jatsiaka, ma engakini no méni jurajkuaka” (Sal. 51:10). Jatsiskachi para jiókuarhini eskachi uétarhinchasïnga mójtakuni na engachi eratsijka ka kurhakuni Jeobani eskajtsïni jarhuataaka. ¿Andichisï seguru jaki eskajtsïni Jeoba jarhuataaka? Ju je exeni ambe enga aiatspipka Jeoba para israelitecha engaksï no kurhandirenga Esekieliri jurhiatikuecha jimbo: “Májku mintsita íntsauaka, ka jimbanhi espiritu ma íntsauaka; ka kénditakuauaka imecheri kuerpurhu mintsita tsakapuerini ka mintsita kʼuiripiteri ma íntsauaka”, i ambe arhikuekasïndi, mintsita ma enga kurhajchapiringa Tata Diosïni (Ezeq. 11:19). I uandakuechajtsïni sési pʼikuastantasïndi. Jeoba listu jarhaspti para jarhuataani israelitechani mójtakurhini ka ístu listu jarhasti parajtsïni jarhuatani juchantsïni.

12, 13. a) Seguni Salmo 119:59, ¿ambechi jatsiski para eratsintani? b) ¿Ambechi jatsiski para kurhamarhikuarhini?

¹² Tsimani úni jámani, ístu kánikua jukaparhakuesti eratsintani. Pauani pauani, jukaparhakuesti eskachi jingontku arhintaaka Bibliani ka arhutani tiempu parachi eratsintani ambe engachi jatsika para mójtakuni, komu ambe engachi eratsijka ka pʼikuarhinheni (arhinta je Salmo 119:59; Ebr. 4:12; Sant. 1:25). Ju je jánguarhintani exeni sinchi ísï eratsisïni eskaksï parhakpini anapuecha na jorhentpijka. Ju je sési mítikuarhini ka exeni sinchi imani ambe tsitisïni enga no sési jaka ka jánguarhintanchi no indeni ambe úni.

¹³ Jamberichi úpiringa arini ambe kurhamarhikuarhini: “¿Pʼikuarhinhisïni sánisï enbidia o selosi?” (1 Ped. 2:1). “¿Kʼéramakuarhisïni arini ambe jimbo, nani engani anapueka, jorhentperakua jimbo engani eskuela intsïnhaka o jatsikuarhikua ambe jimbo?” (Prov. 16:5). “¿Menosi uásïni imechani engaksï no májkueni ambe jatsikuarhika eska ji o engaksï máteru raseka?” (Sant. 2:2-4). “¿Tsitisïni ambe enga xáni parhakpinirhu jaka?” (1 Juanu 2:15-17). “¿Tsitisïni tsípikuarhini ísku jándikueri ambe jingoni ka enga atajperakueri ambeka?” (Sal. 97:10; 101:3; Amós 5:15). Engachi mókuantauaka ini kurhamarhikuechani, jamberichi kuenta íntskukuarhiaka ambe engachi jatsika para mójtakuni. Engachi nóteru úskia imani ambe engachi pʼindepka úni o eratsini, sésichi pʼikuastaaka juchari Táti auandarhu anapuni (Sal. 19:14).

14. ¿Andisï xáni jukaparhakue ambakiti amiguechani erakuani?

¹⁴ Tanimu úni jámani, ístuchi jatsiska para ambakiti amiguechani erakuani. Ia seachi kuenta íntskukuarhini o nómbe, niárasïngachi májkueni eratsini o jámani eska imecha engachi jingoni kúnguarhijka (Prov. 13:20). Eskuelarhu o ánchikuarhitarhu, kʼuiripuecha jingonchi jarhasïnga engajtsïni no jarhuatajka ísï eratsini eska Jeoba. Peru tánguarhikuecharhu, úsïngachi exeantani ambakiti amiguechani engajtsïni jarhuatajka uékperakua xarhatani ka ambakiti ambe úni (Ebr. 10:24, 25).

15, 16. ¿Ambe úrasïni Noambakiti parachi ménderueni eratsini?

¹⁵ Ju je no mirikurhini eska Noambakiti uékasïnga eskachi ménderueni eratsiaka. Ima mítisti eskachi imani ambe eratsisïnga engachi Tata Diosïri Karakatarhu jorhenguarhijka. Jimbosï úrajti iámindu jásï kʼuiripuecheri jorhenguarhikua para úni eskachi ménderueni eratsiaka ka eskachi nóteru xáni seguru jauakia ambe engachi jakajkujka.

¹⁶ Noambakiti seguirixati májkueni jásï kurhamarhikua útspini eska enga Ebani úkupka  jardini de Edenirhu: “¿Meruksïni Tata Diosï arhiski eskajtsï...?” (Gén. 3:1). Parhakpini jimbo enga Noambakiti juramuni jaka, uánikua xanharijtsïni imani ambe kurhamarhisïndi enga úpiringa úni eskachi uénaaka nóteru xáni seguru jarhania ambe engachi jakajkujka, komu arini ambe: “¿Ísïski eska Tata Diosï no jaiapanhintasïnga para tataka ma máteru tataka jingoni tembuchani o nanaka ma máteru nanaka jingoni? ¿Ísïski eskaksïni Tata Diosï no jurajkusïnga parajtsï Nabidadiri kʼuínchikua úntani o kumpleaniuechani? ¿Ísïski eska chári Tata Diosï no uékasïnga parajtsï iurhiri jatantani? ¿Ísïski eska Tata Diosï ma enga uékpitika, no uékasïnga eskajtsï kúnguarhiaka chári parienticha jingoni engaksï nóteru Jeobaeri testiguekia?”.

17. a) ¿Ambechi jatsiski para úni engajtsïni nema imani ambe kurhamarhiska enga úpiringa úni eskachi nóteru xáni seguru jauakia ambe engachi jakajkujka? b) ¿Ambe niáraa úkuarhini engachi ísï úska eska na arhijka Kolosasi 2:6, 7?

¹⁷ Jatsiskachi para seguru jarhani ambe engachi jakajkujka. Engachi no mókuntaaka imani ambe enga jukaparhakueka, uáti úni eskachi nóteru seguru jauakia ambe engachi jakajkujka ka inde ambe uáti eskachi imani ambe eratsiaka enga no sési jaka ka eskachi nóteru jakajkuakia Jeobani. Jimajkani, ¿ambechi jatsiski para úni? Tata Diosïri Karakatajtsïni arhisïndi eskachi mójtakuaka juchari eratsikuani parachi jucha mismu exeni ambe enga Tata Diosï uéjka eskachi uáka “enga ambakitiika ka enga jeiapanhinhantajka ka enga no ma ambe jimbo kueratajka jurhimbikueni” (Rom. 12:2). Estudiarini méntkisï, jarhuataatijtsïni seguru jarhani eska ísïska ambe engachi Bibliarhu jorhenguarhika. Ístu, meruchi seguru jauaka eskaksï sési jarhaska Jeobaeri juramukuecha. Engachi ísï úska, ísïuakachi komu anhatapu ma enga kʼérati sïranguechani jukaajka ka uinhamuchi jupikuarhitini jauaka, jakajkukua sési uaxastakata jauati (arhinta je Kolosasi 2:6, 7).

18. ¿Ambejtsïni jarhuataa orhepani uérakuni no sési jásï ambeni enga Noambakitiri parhakpinirhu jaka?

¹⁸ No nema uáti úni eska juchari jakajkukua sési uaxastakata jauaka; juchachisï uáka indeni ambe. Ísï jimbo, ju je seguirini mójtakuni na engachi eratsijka. Ju je méntkisï kómarhini Jeobani ka kurhakuni imeri espiritu. Ju je sési eratsintani, méntkisï kuenta íntskukuarhini na engachi eratsijka ka ambe engachi jimbo újka ambe ma. Ambakiti amiguechani jirinhaani; ju je imecha jingoni jarhani engajtsïni jarhuataaka mójtakuni juchari eratsikuani. Engachi iámindu ini ambe úska, uákachi orhepani uérakuni no sési jásï ambeni enga Noambakitiri parhakpinirhu jaka ka xereantauakachi “kʼuiripuecheri eratsikuechani, ka iámindu teparakuarhikua ambe engaksï jimbo nómindu uékajka míteni Diosïni” (2 Kor. 10:5).