1. ¿Andiksïsï máru erachicha úkua jukanchajki estudiarini?

INI jurhiatikuecha jimbo, kánikua úkua jukasti orhepani uérani. Uánikua erachichaksï kánikua ánchikuarhisïndi paraksï solu imani ambe konseguirini enga imecheri familia sánderu uétarhinchajka. Máteruksï jatsisïndi para kánikua tiempu úrani paraksï jima niárani engaksï ánchikuarhijka ka ístu paraksï kʼuanhatsintani. Ístuksï jarhasti erachicha engaksï kánikua kuatarajka ánchikuarhitarhu paraksï úni tumina andani. Enga chúrijkia, erachichaksï xáni kuataratini jarhasïndi engaksï jamberi nóteru uéjkia estudiarini.

2. ¿Cha na jandora arhutasïni tiempu para estudiarini?

² Ísïsti, jatsiskachi para tiempu arhutani para estudiarini Tata Diosïri Karakatani ka juchari publikasionichani, peru kʼóru meru estudiarini. Solu ísïchi uáka jatsini ambakiti pájperakua ma Jeoba jingoni ka irekani para méntkisï (1 Tim. 4:15). Máru erachichaksï pauani pauani xarhintku jauarasïndi paraksï estudiarini enga no ma ambe kurhaakuarhini jauaka kʼumanchikuarhu ka jimbokaksï mintsikuarhiskia, úsïndiksï sánderu sési eratsintani. Máteruksï chúrikua arhutasïndi tiempu para estudiarini enga nóteru ambe ma kurhaakuarhini jauakia.

3, 4. ¿Ambe úkuarhiski informasioni jingoni enga uérajka ka andi?

³ Iáminduechachi exesïnga eska uétarhisïnga tiempu arhutani para estudiarini. Peru ¿ambechi estudiariua? Jamberichi eratsijka eskachi uánikua ambe jatsiska para arhintani ka eskachi úkua jukanchasïnga iámindu informasioni arhintani engajtsïni Tata Diosï pauani pauani íntskujka. Máruksï no úkua jukanchasïndi, peru uánikua erachichaksï kʼóru jo. Grupu enga Orhejtsïkuajka iámindu kúnguarhikuechani kurhangusïndi indeni ambe, jimbosï uandati eska nóteru xáni informasioni uéraakia ni para imprimirinhani ni Interneti jimbo.

⁴ Por ejemplu, nóteru uérasïndia Anuario de los testigos de Jehová, jimbokachi úsïnga uánikua eksperiensiauechani exeantani juchari  pájina Internetirhu jw.org^® ka programecharhu engaksï mándani mesi uérajka ixú JW Broadcasting^®. Ístu, iásïksï solu tanimu rebistecha Aianhpiri, enga jindeka para kʼuiripuni jurajkukuni, ka tanimu rebistecha ¡Tsínharhi!, uérasïndia mándani uéxurhini. Enga i ambe mójtakurhika no arhikuekasïndi eskachi sánderu tiempu jatsiaka para máteru ambe úni, sino parachi imani ambe orheta úni “enga sánderu ambakitiika” o jukaparhakueni (Filip. 1:10). Ju je exeni ambechisï jatsi para sánderu jukaparharani ka nénachi uá ambakiti ambe jorhenguarhini engachi Bibliani estudiariuaka.

5, 6. ¿Ambechi jatsiski para sési jorhenguarhini?

⁵ ¿Ambechi jatsiski para sánderu jukaparharani? Ísïsti, kurhangusïngachi eskachi jatsiska para pauani pauani arhutani tiempu para estudiarini Tata Diosïri Karakatani. Iásï, nóteru xáni kánistia programa Bibliaeri arhintskua semaneri para kúnguarhikua. Ísïchi sánderu tiempu jatsisïnga para eratsintani ambe engachi arhintajka ka jirinhantani sánderu informasioni. Nóchi solu jatsiska para kapituluechani arhiantani enga programarhu arhijka, sino eskajtsïni mintsitarhu niárachiaka ambe enga Biblia uandajka ka eskachi sánderu andarhieraaka Jeobani (Sal. 19:14).

⁶ ¿Ambe máteru ambechi jatsiski para sési jorhenguarhini? Jatsiskachi para prepararikuarhini imani artikulurhu enga jorhenguarhinhaaka Aianhpiri jingoni, ístu Bibliaeri jorhenguarhikua kúnguarhikua jingoni ka enga xáni exenhajka tánguarhikuarhu enga semanarhu jarhajka. Ístuchi jatsiska para iámindu rebistechani arhiantani Aianhpiri ka ¡Tsínharhi!

7. ¿Jatsiskichi para no sési pʼikuarherani engachi no uáka exeni ni arhintani iámindu ambe enga xáni uérajka juchari pájina Internetirhu ka programarhu JW Broadcasting?

⁷ Peru nema úpirindi uandani: “¿Néna uá iámindu ambe exeni enga xáni uérajka juchari pájina Internetirhu ka programarhu JW Broadcasting? Jimboka uánikua ambeska...”. Ju je eratsini arini ejempluni. Merkaduru ma enga mámaru jásï tʼirekua ataranhantajka. Imecha engaksï nirajka piáni, nóksï uáti iámindu jásï tʼirekua piáni, ísï jimbo, jatsistiksï para erakuni. Májkueni, ju je no no sési pʼikuarherani engachi no uáka iámindu ambe exeni ka arhintani enga xáni uérajka Interneti jimbo. Ju je exeni ka arhintani na engachi xáni uáka. Peru ¿ambe arhikuekasïni estudiarini ka nénachi uá ambakiti ambe jorhenguarhini?

8. a) ¿Ambechi jatsiski para úni engachi prepararikuarhini jámaaka para Jorhenguarhikua Aianhpiri jingoni? b) ¿Nénajtsïni marhuachia ini ambe úni?

⁸ Estudiarini no jindesti arisku sani arhintani informasionini ka kuirutsiani mókuntskuechani. Arhikuekasïndi arhintani ambe ma kurhanguntaparini ka jorhenguarhini ambe ma. Ju je exeni nénachi uá ísï úni engachi prepararikuarhini jámaaka para Jorhenguarhikua Aianhpiri jingoni. Uénani jámani, ju je exeni ambe enga arhijka partirhu, ambe engachi exeaka, enga uénakuarhu jarhajka. Tátsekuachi exeaka tituluni, subtituluechani ka kurhamarhikuechani repasueri. Tátsekua, ju je iátsitakuarhu arhiantani párrafuechani ka kurhanguntaparini. Ju je exeani imani uandakuechani engaksï sáno méntkisï primeru renglonirhu jarhajka mándani párrafuecharhu, jimbokachi imeri ambesï jorhenguarhiaka. Engachi arhintani jauaka artikuluni, ju je exeni néna terukuntasïni mándani párrafu subtitulu jingoni ka ístu iámindu artikulueri tema jingoni. Ju je karaani uandakuechani engachi no kurhanguauaka ka imani ambe engachi uékapiringa sánderu sési mítini.

9. a) ¿Andichisï jatsi para sési kurhanguani Bibliaeri karakatechani engachi jorhenguarhiaka Aianhpiri jingoni ka nénachi jatsiski para úni? b) Eska na arhijka Josué 1:8, ¿ambechi jatsiski para úni aparte de arhiantani karakatechani?

⁹ Jorhenguarhikua Aianhpiri jingoni, estudiarisïngachi Bibliani. Ísï jmbo, ju je sési  kurhanguani Bibliaeri karakatechani, sánderu imechani engaksï arhinhantaaka jiáni enga kúnguarhikua exeaka artikuluni. Ju je exeni na enga terukuntajka Bibliaeri karakata ma imani ambe jingoni enga párrafu eksplikarijka enga jukaparhakueka. Ístu, ju je arhutani tiempu para eratsintani ambe engaksï Bibliaeri karakatecha arhijka ka nénachi uá úraani juchari irekuarhu (arhinta je Josué 1:8).

10. Miáparini ambe enga arhijka Ebreu 5:14, ¿andiksïsï táticha jatsi para imecheri familieri jorhenguarhikuarhu jorhendaani sapiichani estudiarini ka sánderu informasioni jirinhantani?

¹⁰ Iásï, ju je exeni familieri jorhenguarhikueri ambe. Tátichaksï uékasïndi eskaksï uájpecha tsípikuarhiaka engaksï familieri jorhenguarhikuani jatsiaka mándani semana. Ka nájkirukaksï táticha méntkisï eratsitini jarhajkia ambe engaksï exeaka, no uétarhisïndi eskaksï mándani semana kʼéri ambe uáka. Ísïsti eskaksï uáka exeni programani enga mándani mesi uérajka JW Broadcasting jimbo o ménisï kʼéri ambe úni, komu maketa ma enga Noeri arkaeni jásïaka. Peru ístu kánikua jukaparhakuesti eskaksï táticha jorhendauaka uájpechani estudiarini. Sapiichaksï jatsisti para jorhenguarhini prepararikuarini para tánguarhikuecha o paraksï sánderu informasioni jirinhantani imeri ambe engaksï eskuela nitamanchaka (arhinta je Ebreu 5:14). Engajtsï kʼumanchikuarhu arhutaska tiempu para sánderu informasioni jirinhantani ambe máeri enga Biblia jorhentpijka, sánderu no úkua jukaati paraksï jingontku jarhani tánguarhikuecharhu ka kʼéri tánguarhikuecharhu enga no méntkisï xarhatanhajka bideu ma. Buenu, jatsiskajtsï para miáni na engaksï xáni jatirikia chári sapiicha ka na engaksï jásïka parajtsï xáni tiempu arhutani para jorhenguarhini.

11. ¿Andisï jukaparhakue eskachi jorhendauaka juchari estudiantichani inbestigarini ka sánderu ambakiti ambeksï jorhenguarhini Bibliaeri ambe?

¹¹ Imecha engachi jorhendaajka Bibliaeri ambe, ístuksï jatsisti para jorhenguarhini estudiarini. Engaksï uénani jarhajka jorhenguarhini Bibliani, juchachi tsípisïnga engaksï imecha solu kuirutsiajka mókuntskuechani para jiáni engaksï Bibliaeri ambe jorhenguarhiaka o para tánguarhikuecha. Peru jukaparhakuesti eskachi jorhendauaka inbestigarini ka sánderu ambakiti ambe exentani jiáni engaksï jandiajku estudiariuaka Bibliani. Ini ambe úparini, jiáni engaksï problema ambe jatsiaka, nóksï jirejiresï kurhakuauati erachichani jarhuajperata, sánderu sési, mitiatiksï jirinhantani juchari publikasionicharhu informasioni enga marhuakuauaka.

12. ¿Ambe ka ambe jimbochi úpirini estudiarini?

¹² Engachi no tsitijka estudiarini, jamberichi  eratsijka eskachi no méni niáraaka tsitini. Peru uákachi. Uénani jámani ju je maratitu arhutani tiempu ka sánhani arhiakachi sánderu arhutani para estudiarini. Ju je eratsini ambechi uékasïni jorhenguarhini. Ísïsti, ambe engachi sánderu uéjka úni, jindesti eskachi sánderu ambakiti pájperakua ma jatsiaka Jeoba jingoni. Peru ístu ambe engachi úpiringa úni, jindesti mókuntani kurhamarhikua ma engajtsïni nema úchika o jirinhantani informasioni imani problemeri ambe engachi jatsika.

13. a) ¿Ambe ka ambe uá úni tumbi ma para aianguani imeri eskuelarhu anapu kompanieruechani ambe enga jakajkujka? b) ¿Nénari uá ísï úni ambe enga Kolosasi 4:6 arhijka?

¹³ Por ejemplu, ¿tumbi máeskiri o uátsï ma engari eskuela nirajka? Jamberiksï iámindu chíti kompanieruecha jakajkujti eska kʼuiripuni no nema kueraaska, sino eska ísku úkuarhiska. Uékapiringari xarhatani ambe enga Biblia jorhentpijka, peruri ísï pʼikuarherasïnga enajkiri no uá ísï úni. Ísï jimbo, jatsiskari para inbestigarini. Úpiringari tsimani ambe jimbo ísï úni. Orheta, segururi jarhani eska Tata Diosï kueraska iámindu ambe. Ka tsimani úni jámani, sánderuri sési jorhenguarhini néna aianguani máteruechani ambe enga Biblia jorhentpijka (Rom. 1:20; 1 Ped. 3:15). Ambe engari orheta jatsika para úni, jindesti eskari kurhamarhikuarhiaka andiksïsï chíti kompanieruecha imani ambe jakajkujki. Ka tátsekua, iatsitakuarhu jirinhantani sánderu informasioni juchari publikasionicharhu enga imeri ambe uandajka. Kuentari íntskukuarhiaka eska no úkua jukaska aianguani máteruechani ambe engari jakajkujka. Sáno iáminduechaksï jakajkusïndi eska kʼuiripuni no nema kueraska solu jimboka nema enga kʼéri ambeka ka janhanharhinhani uandasïnga eska ísïska. Peru engari exentaska ma o tsimani ambe enga jukaparhakueka, uákari mókukuntani nemani enga meru uékaaka mítini Bibliaeri ambe (arhinta Kolosasi 4:6).

14-16. a) ¿Ambechi úpirini úni parachi sánderu sési mítini Bibliaeri libruni ma engachi no káni mítika? b) ¿Nénajtsïni uá jarhuatani Bibliaeri karakatecha engaksï párrafurhu jaka parachi sánderu sési kurhanguni libru de Amós? (Ístu exe je rekuadruni “Ju je sánderu sési mítiani kʼuiripuechani enga Biblia uandaajka”).

¹⁴ Ju je eranhaskani eskachi máteru tánguarhikua jimbo exeaka Bibliaeri libru sapichu ma enga profesiauecheri ambe uandajka, jamberi ma engachi no káni mítika. Ambe engachi orheta jatsika para úni, jindesti uékani sánderu sési mítini ambe enga profeta karaka. ¿Nénachi uá ísï úni?

¹⁵ Uénani jámani, ju je kurhamarhikuarhini ambechi mítiski imeri ambe enga libruni karaka: néspi, nani irekaspi, ka ambe ánchikuarhisïreni. Ini ambe mítini, jarhuataatijtsïni kurhanguni andisï imani uandakuechani o ejempluechani úraapi. Engachi arhintani jauaka Bibliani, ju je exeani imani uandakuechani engaksï xarhatajka na enga jásï kʼuiripu máepka ima enga libruni karaka.

¹⁶ Tátsekua, ju je exeni káni karanhaspi ima libru. Para indeni ambe mítini uákachi exeni “Tabla de los libros de la Biblia”, enga uénani jámani jaka Traducción del Nuevo Mundo de las Santas Escrituras (con referencias) jimbo. Ístuchi uáka exeni profeta ka reicheri ambe rekuadrurhu enga parti 3 jimbo jaka foietueri Guía para el estudio de la Palabra de Dios. Komu ima libru engachi estudiarini jaka profesiauecheri ambe uandajka, sési jauati eskachi ístu exeaka na jánhaskuarhixapi jiánisï enga libru karanhapka. Ambe uékasïreni profeta eska kʼuiripu úpiringa o mójtakuni ka ístu néchaks irekaspi jiánisï. Parachi sánderu sési mítini iámindu ambe, jamberichi ístu jatsiaka para máteru Bibliaeri libruechani exeani. Por ejemplu, parachi sánderu sési kurhanguni ambe enga úkuarhini japka  profeta Amosiri jurhiatikuecha jimbo, uákachi arhiantani libruechani de 2 Reyes ka 2 Crónicas engaksï referensiasi marjinalesicha jimbo jaka de Amos 1:1. Ístujtsïni jarhuataati parachi libru de Oseas arhintani, enga jamberi Amosiri jurhiatikuecha jimbo irekapka. Iámu i informasioni jimbo, jarhuataatijtsïni mítini na enga jánhaskuarhipka jiánisï enga Amosi irekapka (2 Rey. 14:25-28; 2 Crón. 26:1-15; Os. 1:1-11; Amós 1:1).

17, 18. Úraa je ejempluechani engaksï párrafuecharhu jaka o máteru, parajtsï uandantani nénajtsïni jarhuatasïni sánderu tsitini arhintani Bibliani engachi jingontku exejka imani ambe enga ísï xarharajka enajki no jukaparhakua ambe.

¹⁷ Engachi arhintani jámaaka Bibliani, jatsiskachi para sánderu uékani jorhenguarhini ambe ma. Por ejemplu, ju je eranhaskani eskachi Sakariasiri profesiani arhintaxaka kapitulu 12 jimbo enga Mesiasiri uarhikueri ambe uandajka (Zac. 12:10). Engachi bersikulu 12 arhintani jarhajka, exesïngachi eska Nataniri kʼumanchikuarhu anapuechaksï meru no sési pʼikuarheraparini uerasïnga Mesiasiri uarhikua jimbo. Enbesi dechi no xáni jukaparharani indeni sapichitu ambe, úpiringachi kurhamarhikuarhini: “¿Ambespi Mesiasi Nataniri familia jingoni? ¿Náni uá exentani sánderu informasioni?”. Jiájkani, inbestigarisïngachi. Ma referensia marjinali, pasïndijtsïni 2 Samuel 5:14 jimbo, enga arhijka eska Natani Dabidiri uájpa máespka. Máteru tekstu jindesti Lukasʌ 3:31, enga arhijka eska Jesusi Nataniri desendientispka enga Mariaeri ióntki anapu parienti máepka (exe je rebista La Atalaya agostueri de 2017, pájina 32, párrafu 4). Ambe máesti engajtsïni ísku pakatajka, ¿a no? Mítispkachia profesiani eska Jesusi Dabidiri desendientipiringa (Mat. 22:42). Peru Dabidi jukari beinte sapiichani kaaspti. Engachi exejka ini ambe, kurhangusïngachi andisï Sakariasi uandapi eska solu Nataniri  familia jatsispka rasoni para uerani enga Jesusi uarhipka.

¹⁸ Ju je exeni máteru ejemplu. Lukasʌ kapitulu unu jimbochi arhintasïnga enga ánjeli Gabrieli pʼorhembijka Mariani ka aianguni máru ambe ima sapiiri enga Maria kánguarhipiringa: “Ima kʼéri ambeuati ka arhinhaati: ‘Imeri Uájpa enga sánderu kʼéri ambeka’, ka imeri Tata Diosï íntskuati Dabidiri juramukua enga jindeka imeri táti jemba, ka méntkisï juramukuauati Jakobueri desendienti jembechani” (Luk. 1:32, 33). Jamberichi orheta imeri ambe kuenta íntskukuarhipiringa ambe enga orheta ánjeli uandapka, enga arhijka eska Jesusi arhinhapiringa “Imeri Uájpa enga sánderu kʼéri ambeka”. Peru ístu ánjeli Gabrieli uandaspti eska Jesusi reipiringa. Ísï jimbo, úpiringachi kurhamarhikuarhini ambe kurhangupi Maria enga ánjeli indeni ambe arhipka. ¿Eratsipi eska nóteru Erodesi juramutipiringuia sino Jesusi o eska ísï tátsekua niárapiringa juramutini Israeli? Enga ísïpiringa, ¿eranhaskapi eska ima jindepiringa reiri amamba ka eska imeri familia kʼéri kʼumanchikuarhu irekapiringa? Biblia no nani arhisïndi eska Maria ini jásï ambe arhipiringa ánjeli Gabrielini. Ístu no arhisïndi eska Maria uékapiringa ambakiti lugari ma jimbo niárani Reinurhu, ísï eskaksï na uékenga niárani Jesusiri tsimani chúxapaticha (Mat. 20:20-23). I ambe enga ísï xarharajka enajki no jukaparhakua ambe, xarhatasïndi eska Maria kʼuiripu máespka enga kánikua kaxumbipka.

19, 20. Eska na arhijka Santiagu 1:22-25 ka 4:8, ¿andichisï estudiarijki?

¹⁹ Ju je miáni eska ambe engachi jimbo estudiarijka Tata Diosïri Karakatani ka juchari publikasionichani, jindeska parachi sánderu andarhierani Jeobani. Peru ístuchi uékasïnga kuenta intskukuarhini na engachi jásï kʼuiripu máeka ka ambechi jatsïski para mójtakuni parachi sési pʼikuastani Tata Diosïni (arhinta je Santiagu 1:22-25; 4:8). Ísï jimbo, méni engachi estudiariuaka Bibliani, jukaparhakuesti eskachi kurhakuaka Jeobani imeri espiritu. Ístu, uétarhisïndi eskachi kómarhiaka parajtsïni jarhuatani ambakiti ambe jorhenguarhini ka parachi ísï exekuarhini eskajtsïni ima na exejka.

²⁰ Eskachi iáminduecha ísïuaka komu ima ambakiti Tata Diosïri marhuari eska Salmo 1:2, 3 jimbo na uandajka imeri ambe: “Kánikua tsípikuarhisïndi Jeobaeri leini jimbo, ka chúrikua ka jurhiakua eratsintaparini arhintasïndi Imeri leini. [...] Ka iámindu ambe enga uáka sési uérakuati”.