1, 2. a) ¿Náki ejemplu xarhatasïni eskachi kʼuiripuecha uétarhinchasïnga parachi sési pʼikuastanhantani ka ístu eskachi úsïnga sési pʼikuastpentani? b) ¿Ambe jimboksï no sési nitamakuarhisïni máru sapiicha?

IÁMINDU kʼuiripuechachi uétarhinchasïnga eskachi sési pʼikuastanhantaaka desdekachi andajpenujka ka ístuchi úni sési pʼikuastantaani máteruechani. Por ejemplu, enga sapi ma chʼanani jámani kuarhatsejka ka jurhintskuarhu atakuarhini, uiriapasïndi ueparini táti jemba o amambani jingoni. Táti jembechaksï no úsïndi ambakerantani jima enga atakuarhika, peruksï úsïndi sési pʼikuastantani. Kurhamarhisïndiksï ambe úski, kutsunharhikusïndiksï uekua, kamanharhisïndiksï ka sési arhini, ka jamberiksï kutsumakuni ka irhimakuni. Sapi nóteru uerasïndia ka asta ménderu nirasïndi chʼanani. Tiempu jingoni, nimasïndi jima enga atakuarhipka.

² Peru jarhastiksï sapiicha engaksï sánderu no sési ambe nitamakuarhijka. Máru sapiichanksï niárasïndi biolariuani, ia sea ma xanharijku o ióni jamberi. Néna uéjkini, í ambe méntku no sési pʼikuastaani jarhasïndi. Máru engaksï ini xáni no sési jásï ambe újka, jupinhasïndiksï ka kastigarinhani, ka ménisï úpirindi ísï xarharani enajkiksï no méni kastigarinhaa. Peru nájkiruka no sési úri jirejiresï kastigarinhaaka, ima enga no sési ambe úminhaka seguirini jarhasïndi no sési nitamakuarhini nájkiruka kʼériuakia.

3. a) Eska na arhijka 2 Korintu 1:3, 4, ¿ambe uékasïni Jeoba? b) ¿Náki kurhamarhikuechanchi mókuantaua?

³ ¿Ambe uá jarhuatani kristianuni ma engaksï ísku ambe ma úkupka jiáni enga ima sapipka ka jánguarhintani jarhani nóteru no sési pʼikuarherania? (Arhinta je 2 Korintu 1:3, 4). Jeoba meru uékasïndi eskaksï imeri marhuaricha xénchanhaaka ka sésiksï pʼikuastanhantani. Ísï jimbo, ju je mókuantani tanimu kurhamarhikuechani: ¿Andiksïsï uétarhinchajki eskaksï sési pʼikuastanhantaaka  imecha engaksï sapiitini ísku ambe ma úminhaka? ¿Né uá sési pʼikuastantaani? Ka ¿ambechi uá úni parachi sési pʼikuastantaani?

4, 5. a) ¿Andisï jukaparhakue mítini eskaksï sapiicha no májkueniska eska kʼératicha? b) ¿Ambe úkuarhisïni enga ima kʼuiripu enga sapi mintsinharhienga xáni no sési jásï ambe úkujka?

⁴ Nájkiruka ióni nitamaakia, máruksï seguirini jarhasïndi uétarhinchani eskaksï sési pʼikuastanhantaaka jimbokaksï sapiitini ísku ambe ma úminhaspka. Parachi úni kurhanguni andi, orhetachi jatsiska para miáni eska sapi ma kánikua ménderueniska eska kʼuiripu kʼéri ma ka sáno méntkisï, no májkueni no sési pʼikuastasïndi sapini ma eska kʼuiripu kʼérini ma engaksï ísku ambe ma úminhajka. Ju je exeni andi.

⁵ Sapiichaksï jatsisïndi para kánikua mintsinharhiani imechani engaksï tʼarhexerajka ka kuidariuani. Ini ambe jimbo, seguruksï pʼikuarherasïndi ka niárasïndiksï mintsikaani imechani engaksï xénchaajka (Sal. 22:9). Peru xáni no sési enga uánikua xanhari, inde ambe sapiri kʼumanchikuarhu úkuarhijka ka imecha engaksï indeni ambe újka imeri parientichenksï o familieri amiguecheni. ¿Ambe úkuarhisïni enga ima kʼuiripu enga sapi mintsinharhienga xáni no sési jásï ambe úkujka? I ambe úsïndi eska sapi úkua jukanchaaka mintsikaani máteruechani, nájkiruka ióni nitamakia.

6. Ísku ambe ma úkuani sapiichani, ¿andisï kánikua no sési jásï ambe?

⁶ Sapiichaksï no úsïndi jandiajku kuájpikuarhini ka ikichakueni jásï ambe úkuani, kánikua no sési úkuasïndi ka meru no sési jásï ambesti. Kánikuaksï no sési úkuasïndi sapiichani engaksï afuersa újka paraksï relasioni seksuali jatsini ante deksï kʼérani. Ísku ambe ma úkuani sapiichani, úsïndi eskaksï imani ambe jakajkuaka enga no ísïka seksueri ambe, imecheri mismu ambe o máteru kʼuiripuecheri ambe engaksï uékaaka imecha jingoni jarhani.

7. a) ¿Andisï para no sési úri fásilii enganiarini sapini ma, ka néna úpirini úni? b) ¿Ambe úpirini úkuarhini indeni chkuanderakua ambe jingoni?

⁷ Sapiichaksï nótki jorhenguarhisïndi sési eratsini, erakuni úni ambe ma, ni exeni enga peligru ma jauaka paraksï no no sési ambe úkuarhinchani (1 Kor. 13:11). Jimbosï para no sési úri, fásilijti enganiarini sapini ma. chkuanderakua ambe arhisïndi sapini enga kánikua no sési úkuaka, por ejemplu, eska sapi kulpa jatsisïnga enga ima ísku ambe ma úkujka, eska no nemani aianguaka, eska no nema kurhajchaaka ni jakajkukuni enga sapi uandantaaka, o eska relasioni seksuali jatsini kʼuiripu kʼéri ma sapi ma jingoni, arhikuekasïnga eska kʼuiripu meru xénchasïnga sapini. I ambe úsïndi eska sapi ióndaaka kurhanguni eska i ambe chkuanderakuespka. Jamberi sapi kʼuiripeati ísï pʼikuarheraparini eska no sési jáxeska, eska no ma ambe marhuasïnga ka eska no jukanchaska paraksï sési kámani ni xénchani.

8. ¿Andichisï uá seguru jarhani eska Jeoba úsïnga sési pʼikuastantaani imechani engaksï no sési ambe úminhaka?

⁸ Ini ambe mítiparini, nójtsïni ísku pakatasïndi eska ísku ambe ma úkuni sapini ma, ióni jamberi no sési pʼikuastasïnga. Kánikua ikichakueni jásï ambesti. Enga iásï xáni interu parhakpinirhu úkuarhijka inde ambe, xarhatasïndi eskachi últimu jurhiatikuecha jimbo irekaxaka, ini jurhiatikuecha jimbo engaksï uánikua kʼuiripuecha no uékpijka ka engaksï “imecha engaksï malueka ka engaksï kʼarhajpini jámajka [o enganiarpini]”, sánderu ka sánderuksï no sési jámani jaka (2 Tim. 3:1-5, 13). Ambe enga Noambakiti eratsijka úni, kánikua no sési jásï ambesti, ka xáni no sési enga kʼuiripu imani ambe uáka enga ima jaiapanhintajka. Peru Jeoba sánderu uinhapisti eska Noambakiti ka eska ima kʼuiripuecha engaksï imani ambe újka enga Satanasi uéjka. Ístu, Tata Diosï sési mítisti ambe enga újka Noambakiti. Ísï jimbo, uákachi seguru jarhani eska Jeoba pendienti jarhasïnga engachi xáni no sési pʼikuarherani jarhajka ka eskajtsïni uáka sési pʼikuastantani. Xáni engachi sési pʼikuarherajka  marhuakuni Tata Diosïni “enga uinhaperpintajka iámindu ambe jimbo. Ima jindesti engajtsïni uinhaperantajka para iámindu juchari mískuarhitechani jimbo, paraka juchajtu uáka uinhaperaantani imechani engaksï nákinterku ma jásï mískuarhita jatsijka, indeni mismu uinhapikuani jimbo enga jimbojtsïni Diosï uinhaperantajka juchantsïni” (2 Kor. 1:3, 4). Joperu, ¿néni úrasïni Jeoba parajtsïni sési pʼikuastantani?

9. Seguni ambe enga karapka rei Dabidi Salmo 27:10, ¿ambe uá Jeoba imecha jimbo engaksï imeri familiaricha jurajkuajka?

⁹ Jamberiksï imecha sánderu uétarhinchajti paraksï sési pʼikuastanhantani engaksï imecheri táti jembecha no ma ambe úka paraksï kuájchakuani ka niáranksï ísku ambe ma úminhani o imecha engaksï parienti jembecha ísku ambe ma úkuaka. Rei Dabidi mitispti eskachi uáka mintsikani eskajtsïni Jeoba méntkisï sési pʼikuastantaaka (arhinta je Salmo 27:10). Dabidi seguru jarhaspti eska Jeoba uékperakua jingoni kuidariuasïnga méntkisï imecha engaksï imecheri familiaricha niárajka no sési kaani. ¿Néna ísï úsïni? Úraasïndi imeri ambakiti marhuarichani. Kúnguarhikuarhu anapuechaksï juchari familiauesti. Por ejemplu, Jesusi uandaspti eskaksï jindespka imeri ermanuecha, ermanecha ka amamba engaksï imani jingoni kómarhienga Jeobani (Mat. 12:48-50).

10. ¿Ambe uandaspi Pablu na enga uénga imeri ánchikuarhitani komu orhejtsïkuti?

¹⁰ Ju je exeni ejemplu ma eska kúnguarhikua uáka ísïni eska juchari familia. Apostuli Pablu ambakiti orhejtsïkuti máespti ka ánchikuarhiri enga ambakiti ejemplu ma íntspenga. Tata Diosï asta úspti eska arhiapiringa kristianuechani eskaksï májkueni úpiringa eska ima, ísï eska Pablu na májkueni uénga eska Kristu (1 Kor. 11:1). Ma xanhari uandaspti ambe enga uénga komu orhejtsïkuti: “Juchaksïni sési kámasïrenga kaxumbikua jingoni, eska ma amamba na kaajka tʼireraani imeri sapiichani” (1 Tes. 2:7). Ini jurhiatikuecha jimbo, engaksï ambakiti orhejtsïkuticha Bibliani úrajka paraksï uandontskuarhikuni imani enga uétarhinchani jarhajka jarhuajperata, iatsitakuarhu ka xénchperakua jingonksï úsïndi.

11. ¿Ambe xarhatasïni eskaksï no solu orhejtsïkuticha úsïnga sési pʼikuastpentani?

¹¹ No solu orhejtsïkutichaksï uáti uinhaperaantani imechani engaksï ísku ambe ma úminhaka. Iáminduechachi jatsiska para úni ambe enga ari karakata uandajka: “Uinhaperajpera je” (1 Tes. 4: 18, Táta Diósïri Uandakua Tata Jesukristueri Aiatsperakua). Pirenchicha engaksï ambakiti pájperakua ma jatsika Jeoba jingoni, uátiksï kánikua jarhuataani imani pirenchichani engaksï uétarhinchani jaka paraksï sési pʼikuastanhantani. Asta Jeoba ísï terukutakuarhintasïndi komu nándi ma enga uájpani sési pʼikuastantajka (Is. 66:13). Bibliarhuksï uánikua ejempluecha jarhasti nanakecheri engaksï jarhuataapka imechani engaksï kánikua uandanhiani japka (Job 42:11). Jeoba kánikua sési pʼikuarherasïndi exeani pirenchichani engaksï jarhuataajka imani pirenchichani engaksï no sési pʼikuarherani jarhajka. Ménisïksï orhejtsïkuticha uáti kurhamarhini ambakiti pirenchini ma sini uá jarhuatani máteru pirenchini enga no sési pʼikuarherani jaka. *

12. ¿Ambechi no jatsiski para úni engachi jarhuatani jámaaka erachini o pirenchini ma?

¹² Ísïsti, engachi jarhuatajka erachini o pirenchini ma, nóchi imani ambe kurhamarhisïnga enga ima no uéjka uandantani (1 Tes. 4:11). Jimajkani, ¿ambechi uá úni imecha jimbo engaksï uétarhinchajka ka uékanksï eskachi sési pʼikuastantauaka? Ju je exeni sinku ambe enga Bibliarhu pʼitakateka.

13. a) Seguni 1 Reyes 19:5-8, ¿ambe úspi Jeobaeri ánjeli Eliasini jimbo? b) ¿Nénachi uá májkueni úni eska ánjeli?

¹³ Ju je imani ambe úni enga marhuakuauaka máteruechani. Jiáni enga profeta Eliasi sïpakuarhini japka jimbokaksï uékasïrenga no sési úkuni, xáni no sési pʼikuarheraspti enga uékenguia uarhini. Jiájkani, Jeoba ánjeli uinhapitini ma axaspti para uinhaperantani. Ánjeli tʼirekua jorhepiti íntskuspti profetani ka arhispti eska apiringa (arhinta je 1 Reyes 19:5-8). I ejemplujtsïni ambakiti ambe jorhendasïndi, eska ménisï sapichitu ambe úni erachi ma jimbo enga no sési pʼikuarherani jaka, uáka kánikua jarhuatani. Por ejemplu, pʼímarhini tʼireni, sapichitu ambe ma intsïkuarhini o karakuni ambe ma, xarhatakuakachi eskachi xénchasïnga ka eskachi pendienti jarhaska imani jimbo. Uákachi ini ambe úni engachi no jánhaskaaka néna uandontskuarhini erachiri o pirenchiri ambe o imeri ambe enga no sési pʼikuastajka.

14. ¿Ambechi máteru ambe jorhenguarhisïni ambe enga Eliasi nitamakuarhipka?

¹⁴ Ju je úni eska sési ka seguru pʼikuarheraaka ima kʼuiripu engaksï ísku ambe ma úkuka. Ju je exeni ménderu Eliasiri ambe. Milagru ma jimbo, Jeoba uinhapikua íntskuspti profetani paraka nipiringa iámu imani xanharu jimbo asta niárani Orebi juáta jimbo, jima enga pakatperakua ma úpka imeri ireta jingoni uánikua uéxurhini antesi. Imani xáni iauani lugari jimbo, jamberi Eliasi seguru pʼikuarheraptia, jima engaksï nóteru úpiringuia no sési ambe úkuni. ¿Ambechi máteru ambe jorhenguarhisïni? Eska engachi uéjka jarhuataani imechani engaksï ísku ambe ma úminhaka, orhetachi jatsiska para úni eskaksï seguru pʼikuarheraaka. Por ejemplu, orhejtsïkutichaksï jatsisti para miáni eskaksï no iámindu kʼuiripuecha májkueniska. Jamberi pirenchi ma sánderu agustu ka segura pʼikuarheraati imeo té ma jingoni o máteru ambe jingoni, ka jamberi máteru pirenchi sánderu sési pʼikuarheraati uandontskuarhini Kʼumanchikua Reinuerirhu.

15, 16. ¿Ambe arhikuekasïni jingontku kurhajchaani máteruechani?

¹⁵ Ju je jingontku kurhajchaani. Bibliajtsïni arini ambakiti konseju íntskusïndi: “Jorhenguarhi je iáminduecha sóntku kurhandini, peru ióndantsï mókukuarhini” (Sant. 1:19). ¿Jorhenaskichi kurhajchaani máteruechani? Úpiringachi eratsini eska para kurhajchaani máteruechani, solu uétarhisïnga, no ma ambe uandani, exeni jarhani imani egajtsïni aianguni jaka ambe ma ka no ma ambe úni. Peru jingontku kurhajchaani, sánderu ambe arhikuekasïndi. Ju je exeni ambe enga úpka Jeoba Eliasi jingoni. Enga Eliasi na aiangukuarhipkia iámindu ambe enga xáni uandanhiatani japka, Tata Diosï jingontku kurhajchaspti. Jeoba kuenta íntskukuarhispti eska profeta chéxapka,  jandiajku pʼikuarheraxapka ka eratsini eska no ma ambe marhuaspka ambe enga xáni úpka. Jeoba uékperakua jingoni jarhuataspti paraka nóteru ísï pʼikuarherapiringuia. Indeni ambe úparini, xarhataspti eska jingontku jarhaspka ambe enga Eliasi xáni arhipka (1 Rey. 19:9-11, 15-18).

¹⁶ Engachi kurhajchani jauaka imani engaksï ísku ambe ma úkuka, ¿nénachi uá xarhatakuni eskachi pʼamojkusïnga ka xénchani? Ménisï, engachi ambakiti ambe arhiska, uáti eska mítiaka ambe engachi pʼikuarherajka. Uákachi arhini: “Xáni no sési ambe engari nitamakuarhika. No nema jatsisti para indeni ambe úkuni sapini ma”. ka parachi úni mítini eskachi meru kurhangukuxaka ambe engajtsïni aianguni jaka, jamberichi úpiringa arhini: “Engarini ini ambe aianguka, ísï kurhanguska..., ¿ísïski?”. Ini ambe kurhamarhini, xarhatakuakachi eskachi jingontku ka xénchperakua jingoni kurhajchaxaka ka eskachi jánguarhintaxaka kurhangukuni (1 Kor. 13:4, 7).

17. ¿Andichisï jatsi para tekantstiini ka no sóntku uandani ambe ma?

¹⁷ Peru jatsiskachi para ióndani mókukuarhini o no sóntku uandani ambe ma. Nóchi jatsiska para jiáni íntskuni konseju ma o jurhimberantani enga ima uandani jauaka. Ka ju je tekantskua xarhatani. Enga Eliasi aiangupkia Jeobani na enga pʼikuarherani japka, uandanhiaxapti ka kánikua kómu pʼikuarherani. Ka ísï tátsekua enga Jeoba na úpkia eska Eliasi sánderu mintsikapiringa, ima ménderu imani mismu ambe uandaspti ambe enga aiangupkia (1 Rey. 19:9, 10, 13, 14). Ini ambe jimbo, jorhenguarhisïngachi eskaksï máru kʼuiripuecha engaksï no sési pʼikuarherani jarhajka, no solu ma xanharijkuksï uétarhinchasïnga uandantani na engaksï pʼikuarherani jarhajka. Enga ima kʼuiripu indeni ambe uétarhinchajka, jatsiskachi para tekantskua xarhatani, ísï eska Jeoba. Ju je no jirejiresï arhiani ambe engaksï jatsika para úni, sánderu sési, ju je xarhatakuani eskachi pʼamojkuasïnga ka xénchaani (1 Ped. 3:8).

18. ¿Na járhati kómarhikuechaksï uá sési pʼikuastantaani imechani engaksï no sési pʼikuarherani jaka, ka andi?

¹⁸ Ju je mintsita jingoni kómarhini imecha jingoni engaksï no sési pʼikuarherani jaka. Ima enga kómu pʼikuarherani jaka, jamberi no uáti kómarhini. Jamberi ísï pʼikuarherajti eska no jukanchaska para kómarhini Jeobani. Engachi uéjka  jarhuatani, ju je imani jingoni kómarhini, úraparini imeri nombrini. Ju je arhini Jeobani na engachi xáni xénchajka jucha ka ístu kúnguarhikuarhu anapuecha imani enga no sési pʼikuarherani jaka. Ka kurhakunchi eska jarhuataaka imeri marhuarini sési pʼikuarherantani ka uinhaperantani. Ísï kómarhini Jeobani, uáti kánikua uinhaperantani (Sant. 5:16).

19. ¿Ambejtsïni jarhuataa listu jarhani parachi sési pʼikuastantani máteru nemani?

¹⁹ Ju je imani uandakuechani úraani engaksï sési pʼikuastpiaka ka uinhaperpintani. Ju je orheta eratsini ante de uandani. No eratsiparini uandani no sési pʼikuastpesïndi, peru uékperakua jingoni uandani, sési pʼikuastpentasïndi (Prov. 12:18). Ísï jimbo, ju je kómarhini Jeobani eskajtsïni jarhuataaka ambakiti ambe arhiani imechani engaksï no sési pʼikuarherani jaka paraksï sési pʼikuarherantani ka nóteruksï xáni uandanhiania. Ju je miáni eska ambe enga sánderu mintsitarhu niárakuauaka, jindeska Biblia, jimboka Jeobaeriska (Ebr. 4:12).

20. Máru engaksï ióntki no sési nitamakuarhika jimbokaksï ísku ambe ma úminhaska, ¿ambeksï niárasïni eratsini ka juchachi ambe uékasïni miátantaani?

²⁰ Máru engaksï ióntki no sési nitamakuarhika jimbokaksï ísku ambe ma úminhaska, jamberiksï niárajti eratsini eskaksï no jukanchaska paraksï jukaparharanhani, eskaksï no sési jáxeska ka eska no nema uékaasïnga. Astaksï jamberi eratsijti eskaksï no jukanchaska para nema xénchaani. Peru i ambe méntku no ísïsti. Ísï jimbo, ju je Biblia úrani para miátantaani eska Jeoba kánikua jukaparharaasïnga (exe je rekuadruni “ Bibliaeri karakatecha engaksï sési pʼikuastpentajka”). Ju je miántani enga profeta Danieli ísï pʼikuarherapka enajki nóteru uinhapepia ka kómu pʼikuarherani, Tata Diosï ánjelini ma axaspti para uinhaperantani, jimboka uékasïrenga eska Danieli mítipiringa eska ambakiti kʼuiripu máespka ka eska xénchanhasïrenga (Dan. 10:2, 11, 19). Jeoba ístu májkueni xénchaasïndi juchari erachichani ka pirenchichani engaksï no sési pʼikuarherani jarhajka.

21. a) ¿Ambeksï úkuarhinchaa imecha engaksï ísku ambe ma úkuajka máteruechani ka nóksï moantani? b) Mientrasi, ¿ambechi jatsiski para úni?

²¹ Engachi uinhaperantaajka máteruechani, miátantaasïngachi eska Jeoba Tata Diosï máeska enga uékpijka. Ka nóchi méni jatsiska para mirikurhini eska ístu jindeska Tata Diosï ma enga jurhimbitku újka ambe ma. Ima exesïndi enga kʼuiripu ma ísku ambe ma úkujka nemani. Iámindu ambe exesïndi, ka asegurarikuarhisïndi eska kastigarinhaaka ima enga ísku ambe ma útspijka ka no moantani (Núm. 14:18). Mientrasi, ju je úni xáni eskachi xáni uáka para xarhatakuani eskachi xénchaasïnga imechani engaksï ísku ambe ma úminhaka. Xáni engajtsïni uinhaperantajka mítini eska Jeoba sési pʼikuastantauaka imechani enga Noambakiti ka imeri parhakpini no sési úkuaka. No ióni jimbo, nóteruksï miáuatia ini xáni no sési jásï ambe engaksï nitamaka niksï no sési pʼikuarherani (Is. 65:17).