SEMANA 21
Ju je no jurajkuni eskajtsïni támisï jánhastaaka kʼuiripuecheri jorhentperakua
“Parhakpini anapu jorhengua ísku ambesti para Diosïni japarini” (1 KOR. 3:19).
PIREKUA 98 Tata Diosïni jimboesti ambe enga Karakata jaka
AMBE ENGACHI EXEAKA *
1. ¿Ambejtsïni jorhendasïni Tata Diosïri Karakata?
JEOBA jindesti juchari Ambakiti Jorhentpiri. Imeri jarhuajperata jingonchi uáka orhepani uérakuani náki uéjki uandanhiatechani (Is. 30:20, 21). Imeri Karakatajtsïni iámindu ambe jorhendasïndi ambe engachi mándani arhini uétarhinchajka parakachi “no ma ambe kueratanchaaka” ka parachi sési “jorhendakata jarhani para iámindu ambakiti ambe úni” (2 Tim. 3:17). Engachi újka ambe enga Biblia arhijka, sánderuchi mímixekua jingoni jámasïnga eska imecha engaksï jaiapanhintajka parhakpini anapu jorhentperakuani (Sal. 119:97-100; 1 Kor. 3:19).
2. ¿Ambechi exea ini artikuluru?
2 Eskachi na exeaka, sáno méntkisï ima ambe enga parhakpini jorhentpijka úsïndi eskachi imani ambe uáka parachi juchajkumindu sési uéranchani. Jamberichi jimbosï úkua jukanchajka no ísï eratsini ni ísï jámani eska parhakpini anapuecha. Ísï jimbo, Biblia arhisïndi: “Exeparini eskaksïni no nema kʼarhaaka [o enganiarini] mámaru járhati jorhenguechani jimbo ka chkuanderakua ambe jimbo enga no marhuajka, eska na jindeka kʼuiripuecheri jorhengua” (Kol. 2:8). Exeakachi tsimani ejempluechani enga jindeka “chkuanderakua ambe” o imani ambe engaksï kʼuiripuecha eratsijka enga no jurhimbitiika ka nénaksï jimbo niáraski nóteru no sési exenhania. Mándani ejemplu jimbochi exeaka andisï no marhuajki ambe engaksï kʼuiripuecha eratsijka ka andisï sánderu ambakiti ambe enga Biblia jorhentpijka eska ambe uéjki enga kʼuiripu eratsijka.
KʼUIRIPU MÉNDERUENI EXESÏRENDIA SEKSUERI AMBE
3, 4. Entre 1900 a 1930 ísï, ¿ambe kánikua mójtakurhispi?
3 Entre 1900 a 1930 ísï, kʼuiripu kánikua mójtakuspti na enga exenga seksueri ambe. Útasï jiáni jamberi, uánikuechaksï
eratsisïrendi eskaksï temungurhirichajkusï uénga relasioni seksuali jatsini ka eska no uandanhapiringa seksueri ambe uánikuechani japarini. Peru tátsekua, kʼuiripu nóteru májkueni eratsisïrendia níteru no sési exenia indeni ambe.4 Imani uéxurhinicha jimbo, kʼuiripu kánikua mójtakurhispti. Inbestigadora ma uandaspti: “Pelikulecha, dramecha, músika ambe, ka anunsiuecha para íntspikuarhini ambe ma, uénasptiksï sánderu ísku jándikueri ambe xarhatani”. Jiánisï, kʼuiripu uénasptia sánderu nánderkueni uarhani ka nóteru xáni sési xukuparhanhani. Ísï eska Biblia na uandarini japkia, imecha engaksï últimu jurhiatikuecha jimbo irekapiringa sánderuksï uékapirindi tsípikuarhini (2 Tim. 3:4).
Jeobaeri marhuarichaksï no uékasïndi májkueni exeni seksueri ambe eska parhakpini anapuecha. (Exe je párrafu 5). *
5. ¿Ambe úkuarhispi 1960 ísï?
5 Para 1960 ísï, kʼuiripu nóteru no sési exesïrendia enga tataka ma nanakeni jámapiringa, ambe uéjki jimbo jurajperani ka enga tataka ma májku kʼéri irekani japiringa nanaka ma jingoni ka nóksï sibilarikuarhitini jarhani. Uánikua ambe enga jindeka para tsípikuarhini, uénaspti sánderu xarhatani seksueri ambe. ¿Ambe niáraski úkuarhini indeni ambe jimbo? Nanaka ma enga kararika uandaspti eska engaksï iásï kʼuiripuecha nóteru uéjkia ambakiti jángua ma jatsini, úsïnga eska uánikua problemecha jauaka, komu táticha engaksï no familia jingoni irekajka, nándicha o táticha engaksï jandiajku tʼarhexerajka sapiichani, no sési pʼikuarherani ka pornografía ambe exeni. Xáni uánikua pʼamenchakua ambe enga niárajka kéritperanhani relasioni seksuali jimbo, por ejemplu, sida. Í ambe xarhatasïndi eska no marhuasïnga ísï irekani eska parhakpini na jorhentpejka (2 Ped. 2:19).
6. ¿Andisï Noambakiti uéjki eska kʼuiripu nánderkueni jámaaka?
6 Noambakiti uékasïndi eska kʼuiripu nánderkueni jámaaka. Ima tsitisïndi exeni engaksï kʼuiripuecha ísku jándikua ambe niátajka ka nóksï janhanharhini temungurhirikuani enga Tata Diosïri intsïmperakua máeka (Efes. 2:2). Imecha engaksï ísku jándikua ambe niátajka, no soluksï xarhatasïndi eskaksï no jukaparharasïnga Jeobaeri intsïmberakuani para sapiichani kaani, sino ístu eskaksï jamberi no jatsiaka kóntperatani para irekani para méntkisï (1 Kor. 6:9, 10).
AMBE ENGA BIBLIA ARHIJKA SEKSUERI AMBE
7, 8. ¿Andisï sánderu sési jaki ambe enga Biblia jorhentpijka seksueri ambe ka eska na engaksï exejka parhakpini anapuecha?
7 Kʼuiripuecha engaksï jaiapanhintajka ambe enga parhakpini jorhentpijka, no sésiksï exeasïndi juramukuechani engaksï Bibliarhu jaka ka uandasïndiksï eska iásï ménderueniskia. Jamberiksï kurhamarhikuarhijti, ¿andijtsïnisï Tata Diosï ísï kueraa parachi uékani relasioni seksuali jatsini ka jinijtsïni arhini eskachi pʼíngukurhiaka indeni ambe jimbo? Ísï eratsini no sési jarhasti, jimbokaksï kʼuiripuecha imani ambejkusï uéjka úni Kol. 3:5). Ístu, Tata Diosï ústi temungurhirikuani para acheeti ka uarhiiti úni relasioni seksuali jatsini ísï eska ima na jaiapanhintajka (1 Kor. 7:8, 9). Ísï, tsimarhanksï uáti relasioni seksuali jatsini no no sési pʼikuarheraparini ni chéparini eskaksï uáka pʼamenchakua ambe kérikuarhini.
ambe engaksï imecha tsitijka. Peru Biblia méntku máteru ambe arhisïndi. Uandasïndi eskachi uáka pʼíngukuarhini parachi no ikichakueni jásï ambe úni, ka ísïchi janhanharhinhaaka (8 Bibliajtsïni jorhendasïndi na engachi jatsika para exeni seksueri ambe ka no ísï eska parhakpini anapuecha na exejka. Uandasïndi eska relasioni seksuali jatsini ambe máeska enga sési pʼikuastpejka (Prov. 5:18, 19). Peru ístujtsïni arini konseju íntskusti: “Eskajtsï jorhenguarhiaka pʼíngukuarhini paraka chári kuerpuecha pímbinhaxeaka janhanharhikua jingoni, ka nójtsï jurajkutakuarhini para ísku ambe úni eska no jakajkuticha engaksï no sáni mítika Diosïni” (1 Tes. 4:4, 5).
9. a) Entre 1900 a 1930 ísï, ¿nénaksï jarhuanhaspi Jeobaeri marhuaricha paraksï imani ambe úni enga Biblia jorhentpijka? b) ¿Náki ambakiti konseju uandasïni 1 Juanu 2:15, 16? c) Eska na arhijka Roma 1:24-27, ¿náki ikichakueni jásï ambechi no jatsiski para úni?
9 Entre 1900 a 1930 ísï, Jeobaeri marhuarhichaksï no jurajkutakuarhispti paraksï támisï jánhastaani imecha engaksï uénapkia “ísku jándi úkuarhini” (Efes. 4:19). Sánderu sési, jánguarhintasptiksï kumpliriuani Tata Diosïri juramukuechani. I rebista 15 de maiu de 1926 enga inglesi jimbo uérapka, uandaspti eskaksï “tatakecha ka nanakecha jatsiska para pímbinhasï ambe úni ka eratsini, sánderia enga tataka ma nanaka ma jingoni japiringa o nanaka ma tataka ma jingoni”. Nájkiruka ima ambe úkuarhini japka parhakpinirhu, Jeobaeri marhuarichaksï imani ambakiti ambe úsïrendi enga Biblia jorhentpijka (arhinta je 1 Juanu 2:15, 16). Kánikuachi jaiapanhintasïnga engachi jatsika Tata Diosïri Karakatani ka imani jarhuajperatani engajtsïni Jeoba íntskujka jiáni engachi meru uétarhinchani jarhajka parachi no jiókuarhini ambe enga parhakpini jorhentpijka seksueri ambe * (arhinta je Roma 1:24-27).
KʼUIRIPU NIÁRASÏNDI SÁNDERU PENDIENTI PAKUARHINI
10, 11. ¿Ambe uandaspia Biblia eska úkuarhipiringa últimu jurhiatikuecha jimbo parachi jingontku jarhani?
10 Biblia uandaspti eskaksï kʼuiripuecha imechajkumindu “pendienti pakuarhi[piringa]” ini últimu jurhiatikuecha jimbo (2 Tim. 3:1, 2). Ísï jimbo, nójtsïni ísku pakatasïndi engachi exejka eskaksï kʼuiripuecha jukari uékakuarhisïnga. Libru ma arhisïndi eska uéxurhini 1970 ísï, “kánikuaksï mítikuarhispka libruecha para ma jandiajku jarhuatakuarhini”. Máru i libruechaksï “arhiasïrendi imechani engaksï arhiantauenga eskaksï mítipiringa ka jiókuarhini na engaksï jásï kʼuiripuepka, ka paraksï kʼéramakuarhini”. Por ejemplu, ma i libruecheri arhisïrendi kʼuiripuni eska xénchakuarhipiringa, jimboka sánderu sési jánharhispka, sánderu jukaparhakueni, sánderu sési pʼikuastpeni ka sánderu sési jáxeni ísï eska no nema. Ístu i libru arhisïndi eska májkusï jatsika para exeni néna jámani, imani ambe úni enga exeaka eska sési jarhaska ka eska marhuakuaka.
11 Jamberijtsïni i ambe miátantajti ambe ma. Satanasi sáno májkueni jásï ambe arhispti Ebani eska úpiringa. Arhispti eska úpiringa ísïni eska Tata Diosï, mítiparini ambe sésiski ka ambe nómbe (Gén. 3:5). Ini jurhiatikuecha jimbo, uánikua kʼuiripuechaksï xáni kʼéramakuarhisïndi engaksï eratsijka eska no nema uáka arhiani ambe sési jarhaski ka ambe nómbe, ni sikiera Tata Diosï. Ka ísï eratsini, úsïndi eska uánikua kʼuiripu no jukaparharaaka temungurhirikuani.
Tata Diosïri marhuarichaksï orheta perasïndi ambe engaksï máteruecha uétarhinchajka, sánderia témberi o uámberi ambe. (Exe je párrafu 12). *
12. ¿Ambeksï jorhentpisïni parhakpini anapuecha temungurhirikueri ambe?
12 Biblia arhiasïndi temungurhirichani eskaksï Gén. 2:24). Peru imecha engaksï jaiapanhintajka parhakpini anapu ambe, máteru ambeksï jorhentpisïndi ka uandasïndiksï eska uarhiiti o acheeti jatsiska para imeri ambejku pendienti páni. Libru ma enga diborsiueri ambe uandajka arhisïndi: “Jiáni engaksï máru tembuperajka, enbesi deksï aiatsperani májku kʼéri irekani astakaksï uarhiaka, aiatsperasïndiksï májku kʼéri irekani astakaksï nóteru uékperakia”. Ísï exeni temungurhirikuani, úsïndi eskaksï uánikua temungurhiricha jurajperaaka ka ístu eska familia kánikua no sési pʼikuarheraaka. Ísïsti, no ma ambe marhuasïndi engaksï parhakpini anapuecha újka eskaksï kʼuiripuecha no jukaparharaaka temungurhirikuani.
jatsiska para janhanharperani ka kumplirini imani ambe engaksï jiáni aiatsperaka engaksï tembuperapka. Ístu miátantaasïndi eskaksï no méni jatsiska para jurajperani. Jimbosï arhiajti: “Achati jurajkuati imeri táti jembani ka imeri amambani para kúnguarhini imeri uarhiiti jingoni, ka imaksï tsimarani májku kuerpueuati” (13. ¿Andisï Jeoba kurhunhiajki imechani engaksï kʼéramakuarhijka?
13 Biblia arhisïndi: “Iámindu imecha engaksï mintsita jingoni kʼéramakuarhijka, Jeoba kurhunhiasïndi” (Prov. 16:5). ¿Andisï Jeoba kurhunhiajki imechani engaksï kʼéramakuarhijka? Ma ambe jindesti eska imecha engaksï kʼéri ambe exekuarhijka ka únksï eskaksï máteruecha májkueni eratsiaka, xarhatasïndiksï na enga xáni kʼéramakuarhijka Noambakiti. Xáni kʼéramakuarhisïndi enga jakajkupka eska Jesusi enga jarhuataka Tata Diosïni iámindu ambe kueraani, jatsispka para tinguixurhikuni ka kʼéri ambe arhini (Mat. 4:8, 9; Kol. 1:15, 16). Na engaksï kʼéramakuarhijka kʼuiripuecha, xarhatasïndi andisï Tata Diosï uandajki eska méntku no marhuasïnga ambe enga parhakpini jorhentpijka.
AMBE ENGA ARHIJKA BIBLIA ENGA NEMA KʼÉRAMAKUARHIJKA
14. ¿Nénajtsïni jarhuatasïni ambe enga arhijka Roma 12:3, parachi sesku ísï jukaparharani juchari ambe?
14 Biblia arhisïndi eska no no sési jarhaska uékakuarhini. Por ejemplu, Jesusi uandaspti: “Uékakari máteruni eska tʼujkumindu na uékakuarhijka” (Mat. 19:19). I ambe arhikuekasïndi eskachi jatsiska para sesku ísï jukaparharani juchari ambe. Peru Bibliajtsïni no jorhendasïndi eskachi sánderu kʼéri ambeska eska máteruecha, sánderu sési, arhisïndijtsïni eskachi no ma ambe uáka “embidia jimbo o tepakarakuarhikua jimbo, sino kaxumbikua jingoni, ka sánderu kʼéri ambe exeani máteruechani” (Filip. 2:3; arhinta je Roma 12:3).
15. ¿Andijtsïnisï marhuachijki ambe enga Biblia arhijka parachi no kʼéramakuarhini?
15 Uánikua kʼuiripu engaksï arhinhajka eskaksï kʼéri ambeska, nóksï sési exesïndi ambe enga Biblia arhijka enga nema kʼéramakuarhijka. Uandasïndiksï eska sánderu kʼéri ambe exeani máteruechani, uáka eskachi no balori jukaaka ka eskajtsïni kʼuiripu no sési kámaaka. Peru ¿ambe úkuarhiski enga Noambakitiri parhakpini újka eskaksï kʼuiripuecha no uandanhiauaka máteruecha jimbo? Kʼuiripu enga imajkumindu pendienti pakuarhijka, ¿tsípikua jingoni irekasïni? ¿Imeri familia tsípikua jingoni irekasïni? ¿Ambakiti amiguechani jatsiasïni? ¿Ambakiti pájperakua ma jatsisïni Tata Diosï jingoni? Nájtsï exesïni, ¿sánderu marhuasïni ambe enga parhakpini jorhentpijka o ambe enga Tata Diosïri Karakata jorhentpijka?
16, 17. ¿Amberichi agradesidu jarhaski ka andi?
16 Imecha engaksï imani ambe újka engaksï parhakpini anapuecha jorhentpijka, ísïstiksï eska ima kʼuiripu enga miiuni nirajka nani ka máteru kʼuiripuni kurhamarhini enga májkueni tsïnchitini jámani jaka néna uá niárani lugari ma jimbo. Jesusi arini ambe uandaspti kʼuiripuecheri imeri jurhiatikuecha jimbo: “Sieguestiksï engaksï orhekuapajka máteru sieguechani, ka enga ma siegu orhekupaaka máteru sieguni, tsimarhanksï” uekanheati posurhu (Mat. 15:14). Ísïsti, ambe enga parhakpini jorhentpijka, méntku no marhuasïndi para Tata Diosïni japarini.
Kristianuechaksï sési pʼikuarherasïndi engaksï miájka imani tiempuni engaksï Jeobani marhuakuka. (Exe je párrafu 17). *
17 Ambakiti Bibliaeri konsejuechaksï méntkisï marhuasïndi “para jorhentpini, para jánhastpini, ka para arhistatspini ka para mítitarpini na enga jindeka para jurhimbitku jámani” (2 Tim. 3:16). Kánikuachi agradesidu jarhaska engajtsïni Jeoba kuájchakujka imeri organisasioni jimbo parachi no jiókuarhini ambe enga parhakpini jorhentpijka (Efes. 4:14). Imani jarhuajperata jimbo engajtsïni Jeoba íntskujka, úsïngachi kumpliriuani imeri juramukuechani. Kʼéri kóntperata máesti jatsini ambakiti jarhuajperata enga jindeka ambe enga Tata Diosïri Karakata jorhentpijka.
PIREKUA 54 Í jindesti xanharu
^ párr. 5 Ini artikulu jimbochi jorhenguarhiaka sánderu seguru jarhani eskajtsïni Jeobajkusï uáka ambakiti jorhentperakua íntskuni. Ístuchi jorhenguarhiaka eskajtsïni no sési nicheaka engachi imani ambe úska enga parhakpini jorhentpijka, peru eskajtsïni kánikua marhuachiaka imani ambe úni enga Tata Diosïri Karakata arhijka.
^ párr. 9 Por ejemplu, exea je kapitulu 24, 25 ka 26 bolumeni 1, librueri Lo que los jóvenes preguntan. Respuestas prácticas, ístu kapituluechani 4 ka 5 bolumeni 2, ka Mókuntskuecha para 10 kurhamarhikuecha tumbiicheri, kurhamarhikua 7, páj. 21 a 23.
^ párr. 50 AMBE ENGA XARHATAJKA IMAJENI. Temungurhiri ma engaksï Testigueka, arini ambeksï nitamakuarhisïndi.
^ párr. 52 AMBE ENGA XARHATAJKA IMAJENI. Uéxurhini 1960 ísï, predikarixatiksï.
^ párr. 54 AMBE ENGA XARHATAJKA IMAJENI. Uéxurhini 1980 ísï, acheeti kuidarixati témbani enga pʼamenchani jaka ka jima jarhasti imecheri nanaka sapichu. Iásï, temungurhiri miántaxati na engaksï xáni tsípikua jingoni marhuakuka Jeobani. Imecheri nanaka, tarhamba ka nimakua jemba, ístuksï tsípikuarhixati engaksï májku kʼéri jaka.