1. ¿Ambe tsimani ambe jimbochi uá seguru jarhani?

JEOBA xénchaasïndi imechani engaksï marhuakujka. Méntkisï ísï ústia ka méntkisï ísï uáti. Ístu, uékasïndi eska jurhimbitku úkuarhiaka ambe ma (Sal. 33:5). Jimajkani, seguruchi jarhaska tsimani ambe jimbo. Orheta, eska ima no sési pʼikuarherasïnga engaksï imeri marhuaricha kómu nitamakuarhijka jimbokaksï no jurhimbitku kánhasïnga. Ka tsimani úni jámani, eska ima uáka para jurhimbitku úkuarhini ambe ma. Primeru ini tʼámu artikuluecheri * jimbo, exeskachi eska ima Lei enga Jeoba Israelini íntskupka, jindespka paraka iámindu ambe uékperakua jingoni úkuarhipiringa ka eskaksï iáminduecha jurhimbitku kánhapiringa, asta imechani engaksï no jatsipka ne enga kuájpiapiringa (Deut. 10:18). I Lei xarhatasïndi na enga xáni pendienti pájka Jeoba imechani jimbo engaksï kómarhijka.

2. ¿Náki kurhamarhikuechanchi mókuantaua?

² Moisesiri Lei uéxurhini 33 jimbo kʼamakurhisti, jiáni enga kúnguarhikua uénaka jarhani. ¿Inde ambe arhikuekasïni eskaksï kristianuecha no jatsipiringa lei ma enga xarhatapiringa Jeobaeri uékperakua ka úni eska jurhimbitku úkuarhipiringa ambe ma? Nómbe. Kristianuechaksï jimbanhi lei ma jatsispti. Ini artikulurhu, orhetachi exeaka nákiski jimbanhi lei ka tátsekuachi arini ambe mókuntaaka: ¿Andichisï uandajki eska ini lei jingoni iámindu ambe uékperakua jimbo úkuarhisïnga? ¿Andichisï újki uandani eska úsïnga para iámindu ambe jurhimbitku úkuarhini? Ka ini leini úraparini, imecha engaksï juramukua jatsika, ¿nénaksï jatsiski para kámpeni?

3. Eska na arhijka Galasia 6:2, ¿ambe xáni arhikuekasïni “Kristueri mandamientu”?

³ (Arhinta je Galasia 6:2). Kristianuechaksï jatsisti para úni ambe enga “Kristueri mandamientu” arhijka. Jesusi no karaaspti leichani para imeri chúxapaticha, peru kʼóru arhiaspti ambe engaksï úpiringa, íntsaaspti juramukuechani ka prinsipiuechani engaksï jatsipka para úni. “Kristueri mandamientu” iámindu ima ambesti enga Jesusi jorhentpika. Parachi sánderu sési kurhanguni, ju je mókuantaani máru kurhamarhikuechani.

4, 5. a) ¿Néna jorhentpispi Jesusi? b) ¿Káni jorhentpispi?

⁴ ¿Néna jorhendaaspi Jesusi kʼuiripuechani? Orheta, imeri uandakuecha jingoni. Ambe enga uandenga mintsitarhu niáratspisïrendi, jimboka jurhimbitku jorhentpisïrenga Tata Diosïri ambe, ambe engachi jimbo kueraanhaka ka eska solu Tata Diosïri Reinu uáka kʼamajkuni kómu nitamakua ambe (Luk. 24:19). Jesusi ístu ejemplu jingoni jorhentpispti. Na enga ima irekapka, xarhatakuaspti imeri chúxapatichani na engaksï jatsipka para irekani (Juanu 13:15).

⁵ ¿Káni jorhentpispi Jesusi? Jiáni enga Echerirhu aianhpini jámani japka (Mat. 4:23). Ístu jorhendaaspti imeri chúxapatichani ísï tátsekua enga tsíntapkia. Por ejemplu, xarhakuaspti máru kʼuiripuechani, jamberi jukari kinientu ísï ka juramukuaspti paraksï jorhentpini (Mat. 28:19, 20; 1 Kor. 15:6). Komu orhejtsïkuti kúnguarhikueri, seguirixapti jorhendaani imeri chúxapatichani enga kʼuanhatsentapkia auandarhu. Por ejemplu, uéxurhini 96 jimbo ísï, úraspti apostuli Juanuni para uinhaperaantani ka konseju íntsaani erakukatechani (Kol. 1:18; Jaŋ. 1:1).

6, 7. a) ¿Nani karakata jarhaski ambe enga Jesusi jorhentpika? b) ¿Ambechi jatsiski para úni kurhajchani Kristueri mandamientuni?

⁶ ¿Nani karakata jarhaski ambe enga Jesusi jorhentpika? Tʼámu Ebanjeliuechaksï uánikua ambe uandasïndi enga Jesusi úpka ka uandani enga Echerirhu japka. Karakatecha engaksï Griegaecharhu jaka, jarhuatasïndijtsïni sánderu sési kurhanguni na enga eratsijka Jesusi, jimboka espiritu santu jarhuataaspka imechani engaksï karaaka, ka ísïksï eratsisïrendi eska Kristu (1 Kor. 2:16).

⁷ Jorhenguarhikua: Ambe enga Jesusi jorhentpika, marhuachisïndijtsïni para iámindu ambe jimbo. Ísï jimbo, jatsisïngachi para kumplirini Kristueri mandamientuni engachi kʼumanchikuarhu jarhajka, ánchikuarhitarhu o  eskuelarhu ka kúnguarhikuarhu. Jorhenguarhisïngachi ini mandamientueri ambe engachi arhiantaajka Karakata Griegaechani ka eratsintani ambe enga arhijka. Ka ístuchi kumplirisïnga úparini ambe engajtsïni arhistachijka, juramuchijka ka engachi úraajka prinsipiuechani engachi indeni parti jimbo exeantajka Bibliarhu. Kurhajchani Kristueri mandamientuni, juchari Tata Diosï Jeobanchisï kurhajchani jarhajka enga xáni uékpitiika, nani enga uérajka iámindu ambe enga Jesusi jorhentpika (Juanu 8:28).

8. ¿Ambe jimbo uaxastakata jarhaski Kristueri mandamientu?

⁸ Ima enga kʼumanchikuarhu ma irekani jaka enga sési úkata ka sési uaxastakata jaka, seguru pʼikuarherasïndi. Májkuenisti para ima enga kumplirijka ambakiti leini ma enga sési uaxastakata jaka. Jimajkani, Kristueri mandamientu sánderu ambakiti ambe jimbo uaxastakata jarhasti enga jindeka uékperakua. ¿Andichisï ísï uandajki?

9, 10. a) ¿Náki ejempluechaksï xarhatasïni eska Jesusi iámindu ambe uékperakua jimbo úspka? b) ¿Nénachi uá májkueni úni eska Jesusi?

⁹ Uénani jámani, jimboka Jesusi iámindu ambe uékperakua jimbo úska. Pʼamojperakua jimbo, jorhendaaspti kʼuiripuechani, tsinaani pʼamenchatichani, tʼireraani pobrichani ka tsítantaani uarhirichani, indeni ambe úparini, xarhataspti eska xénchpisïrenga (Mat. 14:14; 15:32-38; Mar. 6:34; Luk. 7:11-15). Ísïsti eska iámindu ini ambe úparini, kánikua tiempu úrasïrenga ka kuatarani. Peru tsípikua jingoni orheta jarhuataasïrendi máteruechani ambe engaksï uétarhinchani jarhenga. Ka sánderu kʼéri uékperakua enga xarhataka, jindesti imeri tsípikua íntspini máteruecha jimbo (Juanu 15:13).

¹⁰ Jorhenguarhikua: Uákachi ísï úni eska Jesusi engachi orheta jarhuataaska máteruechani ambe engaksï uétarhinchani jarhajka. Ístu, sánderu pʼamojkuani kʼuiripuechani aianhpikuarhu. Engachi pʼamojpiska ka niranchi aianhpini ka jorhentpeni, kumplirinchi jarhasïnga Kristueri mandamientuni.

11, 12. a) ¿Nénachi mítiski eska Jeoba pendienti pásïnga juchantsïni jimbo? b) ¿Nénachi uá májkueni uékpini eska Jeoba?

¹¹ Tsimani úni jámani, Jimboka Jesusi mítitarpispka na enga xáni uékpijka Táti jemba. Enga aianhpini jámani japka, xarhataspti na enga xáni pendienti pájka Jeoba imeri marhuaricha jimbo. Por ejemplu, jorhentpispti eskachi mándani arhini kánikua jukaparhakueska para juchari Táti auandarhu anapu (Mat. 10:31). Ístu uandantaspti na enga xáni uéjka Jeoba paraksï moantani ka kʼuanhatsïntani kúnguarhikuarhu imechani engaksï jarharika, para Jeoba tsípikua jingoni eroantani (Luk. 15:7, 10). Ka uandaspti eskajtsïni Jeoba xarhatachiska na engajtsïni xáni uéjka enga íntspika imeri Uájperi tsípikuani parajtsïni pʼímutantani (Juanu 3:16).

¹² Jorhenguarhikua: ¿Nénachi uá májkueni uékpini eska Jeoba? (Efes. 5:1, 2). Miáparini eskaksï juchari erachicha kánikua jukaparhakueska ka tsípikua jingonchi eroantani imechani engaksï jurajkupka Jeobani ka ménderuksï andarhientani (Sal. 119:176). Ju je jarhuataani erachichani, ísïchi xarhataaka eskachi xénchaasïnga, ka sánderu jiáni engaksï uétarhinchani jauaka ambe ma (1 Juanu 3:17). Engachi uékperakua jingoni kámpijka, kumplirinchi jarhasïnga Kristueri mandamientuni.

13, 14. a) ¿Náki Jesusiri mandamientu uandasïni Juanu 13:34, 35, ka andisï jimbanhi? b) ¿Nénachi kumplirisïni jimbanhi mandamientuni?

¹³ Tanimu úni jámani, jimboka Jesusi juramukuaspka imeri chúxapatichani eskaksï sánderu uékaapiringa máteruechani (arhinta je Juanu 13:34, 35). I juramukua jimbanhisti, jimboka no jarhaska imani Lei jimbo enga Jeoba Israelini íntskupka. Jesusi uandaspti eskachi jatsiska para xénchaani erachichani ísï eskajtsïni ima na xénchaka. Astachi jatsiska para sánderu xénchaani  eska jucha mismu na xénchakuarhijka, xáni engachi jamberi listu jauaka para íntspini juchari tsípikuani imecha jimbo, ísï eska Jesusi na úka. Ka para ísï úni, uétarhisïndi eskachi sánderu uékauaka máteruechani. *

¹⁴ Jorhenguarhikua: ¿Nénachi kumplirisïni jimbanhi juramukuani? Úparini ambe ma juchari erachichani jimbo. Nóchi solu listu jarhaska parachi kʼéri ambe úni komu uarhini imecha jimbo. Ístuchi listu jarhaska parachi máteru ambe úni. Por ejemplu, uáchi máteru xanharu jimbo nirani parachi pʼimani erachini ma enga jatirikia para nirani tánguarhikuarhu, nóteru únia ambe ma para erachini ma sési pʼikuastani o bakasioni kurhajkuarhini parachi jarhuajpeni nani enga no sési ambe úkuarhika. Ini ambe úparini, kumplirinchi jarhasïnga Kristueri mandamientuni ka úsïngachi eska kúnguarhikua jindeuaka nani engaksï iáminduecha seguru pʼikuarheraaka.

15-17. a) Ima ambe enga Jesusi xáni úpka, ¿néna xarhataspi ambe enga meru arhikuekajka jurhimbikua? b) ¿Nénachi uá májkueni úni eska Jesusi?

¹⁵ Enga Biblia úrajka uandakuani jurhimbikua, arhikuekasïndi úni ambe enga Tata Diosï uandajka eska sési jarhaska ka iámu ambe ísï úni. ¿Andichisï uandajki eska Kristueri mandamientu úsïnga eska jurhimbitku úkuarhiaka ambe ma?

¹⁶ Orheta, ju je exeni ambe enga xáni úpka Jesusi enga xarhatajka ambe enga meru arhikuekajka jurhimbikua. Imani jurhiatikuecha jimbo, judiuecha engaksï relijioniri orhejtsïkutipka, kurhunhiasïrendiksï kʼuiripuechani engaksï máteru iretarhu anapuepiringa, nóksï xénchaasïrendi pobrichani ka nóksï janhanharhiasïrendi nanakechani. Peru Jesusi iáminduechani májkueni kaaspti ka jurhimbikua jingoni. Jiókuarhiaspti máteru iretarhu anapuechani engaksï jakajkupka imani (Mat. 8:5-10, 13). Iáminduechani predikarikuaspti, jatsikuarhirichani ka pobrichani (Mat. 11:5; Luk. 19:2, 9). Méntkisï jiókuarhiaspti nanakechani ka no méni no sési kaaspti. Sánderu sési, janhanharhiaspti ka sési kaani, asta imechani engaksï máteruecha no xénchauenga (Luk. 7:37-39, 44-50).

¹⁷ Jorhenguarhikua: Uákachi májkueni úni eska Jesusi engachi pareju kámpiska ka predikarikuani iáminduechani engajtsïni kurhajchajka, no arhiparini sinksï jatsikuarhiriski óksï pobrini, óksï máteru relijioni jatsini. Ka erachichaksï májkueni úsïndi eska ima engaksï janhanharhikua jingoni kaajka nanakechani. Ini ambe úparini, kumplirinchi jarhasïnga Kristueri mandamientuni.

18, 19. ¿Ambe jorhentpespi Jesusi jurhimbikueri ambe ka ambechi jorhenguarhisïni íri ambe?

¹⁸ Tsimani úni jámani, ju je exeni ambe enga Jesusi uandapka jurhimbikueri ambe. Jorhendaaspti imeri chúxapatichani prinsipiuechani enga jarhuataapiringa paraksï jurhimbikua jingoni kámpeni. Por ejemplu, ju je eratsini arini ambe, ísï kámpini eskachi na uéjka eskachi kánhaaka (Mat. 7:12). Iáminduchi uékasïnga parachi jurhimbikua jingoni kánhani, ka ísïchisï jatsika para kámpeni. ¿Ambe úkuarhia engachi ísï kámpeska? Eskajtsïni máteruecha uékaaka jurhimbikua jingoni kámani. Peru ¿engajtsïni no jurhimbikua jingoni kámakia? Jesusi ístu jorhendaaspti imeri chúxapatichani mintsikani eska Jeoba uáka eskaksï niáraaka jurhimbikua jingoni kánhani imecha engaksï “chúrikua ka jurhiakua uandajpani” jaka Jeobani (Luk. 18:6, 7). Íksï uandakuecha aiatsperakua máesti: juchari Tata Diosï enga jurhimbitku újka ambe, sési mítisti ambe engachi xáni no sési nitamajka ini últimu jurhiatikuecha jimbo ka ima uáti eskachi jurhimbikua jingoni kánhaaka jiáni enga ima exeaka eska uétarhisïnga ísï úkuarhini (2 Tes. 1:6).

 ¹⁹ Jorhenguarhikua: Engachi ísï úska eska Jesusi na jorhentpika, jurhimbikua jingonchi kámpiaka. Ka engachi kómu nitamakuarhika jimbokachi no jurhimbikua jingoni kánhaska, sésichi pʼikuarherantasïnga mítini eska Jeoba enkargarikurhiaka parachi jurhimbikua jingoni kánhani.

20, 21. a) ¿Nénaksï jatsiski para kámpeni imecha engaksï juramukua jatsika? b) ¿Nénaksï xarhatasïni acheeticha eskaksï sánderu uékaasïnga témbechani? c) ¿Nénaksï jatsiski para kaani táticha uájpechani?

²⁰ Eskachi na exekia, Kristueri mandamientu uékperakua jimbo uaxastakata jarhasti. Ísï jimbo, ini leini úraparini, imecha engaksï juramukua jatsika, jatsistiksï para janhanharhiani ka xénchaani máteruechani. Jatsistiksï para miáni eska tata Jesukristu uékasïnga eskachi iámindu ambe uékperakua jimbo uáka.

²¹ Familiarhu. Acheetichaksï jatsisti para xénchaani témbechani ísï “eska Kristu na uéajka imeri jakajkutichani” (Efes. 5:25, 28, 29). Ísïksï úsïndi engaksï sánderu pendienti pájka ambe engaksï témbecha uétarhinchajka ka tsitini, ante de imecheri ambe. Máru acheetichaksï úkua jukanchasïndi xarhatani inde jásï uékperakua, jamberi jimbokaksï familiarhu ma tʼarhexeska engaksï no xaratakuauenga uékperakua ka nóksï jurhimbikua jingoni kaani máteruechani. Ka nájkirukaksï úkua jukanchaaka jurajkuani imecheri pʼindekuechani, jatsistiksï para mójtakurhini paraksï úni kumplirini Kristueri mandamientuni. Acheeticha engaksï sánderu uéajka témbechani, úsïndiksï eskaksï témbecha janhanharhiauaka. Ka táticha engaksï meru xénchaajka uájpechani, nóksï méni no sési úkuasïndi uandakuecha o úkuecha jingoni (Efes. 4:31). Sánderu sési, xarhatakuasïndiksï eskaksï xénchaasïnga ka jeiapanhiantani enga újka paraksï sapiicha seguru pʼikuarherani. Ísï, sapiichaksï xénchaasïndi ka mintsinharhiani táti jembechani.

22. Eska na arhijka 1 Pedru 5:1-3, ¿neriskiksï erachicha ka nénaksï jatsiski para kánhani?

²² Kúnguarhikuarhu. Orhejtsïkutichaksï jatsisti  para miáni eskaksï karichicha, o sea, erachicha no imecheriska (Juanu 10:16; arhinta je 1 Pedru 5:1-3). Ari uandakuechaksï ‘Diosïri karichicha’ ka ‘juchari Tateri kʼuiripuecha’, miátantaasïndi eskaksï Jeobaeriska. Ka ima uékasïndi eskaksï sési kánhaaka ka xénchanhani (1 Tes. 2:7, 8). Orhejtsïkuticha engaksï ísï kuidariuajka erachichani, úsïndiksï eska Jeoba jaiapanhiantauaka ka erachichaksï xénchaasïndi ka janhanharhiani.

23, 24. a) ¿Ambeksï jatsisïni para úni orhejtsïkuticha enga nema kʼéri pekadu ma uáka kúnguarhikuarhu? b) Enga inde ambe úkuarhijka, ¿ambe ka ambeksï exesïni orhejtsïkuticha?

²³ Imani Lei jimbo enga Jeoba Israelini íntskupka, juesicha ka orhejtsïkutichaksï jatsisïrendi paraksï jorhentpini Jeobaeri ambe, jarhuajpini problemecha ambe jingoni ka jusgarini enga ambe ma no sési úkuarhipiringa. Peru Kristueri mandamientu jingoni, orhejtsïkuticheri ánchikuarhita ménderuenistia. Enga nema kúnguarhikuarhu kʼéri pekadu ma újka, orhejtsïkutichaksï solu exesïndi néna jarhuatani para seguirini jarhani sési pájperani Jeoba jingoni. Mítistiksï eska Tata Diosï parhakpini anapu juramutichani íntsaaska ánchikuarhita paraksï exeani kʼuiripuecheri problemechani ka enga nema no sési ambe niátajka. Ísï jimbo, juramutichaksï jatsisti sésikua para multa euajpini o paraksï nemani ónhani (Rom. 13:1-4).

²⁴ Jiájkani, ¿ambeksï úsïni orhejtsïkuticha enga nema kʼéri pekadu ma újka? Biblianksï úrasïndi paraksï exeni ambe enga úkuarhika ka mítinksï ambe engaksï uáka. Miánksï jarhasïndi eska Kristueri mandamientu uékperakua jimbo uaxastakata jarhaska. Uékperakua jarhuataasïndi exeni ambe enga jatsika para úkuarhini paraksï jarhuatani kúnguarhikuarhu anapuni ma enga no sési ambe úka pekadueri kulpa jimbo. Ka uékperakua jarhuataasïndi orhejtsïkutichani paraksï exeni sini ima enga pekadu úka móantaskia ka sinksï uá jarhuatani para úni ménderu jatsini ambakiti pájperakua ma Jeoba jingoni.

25. ¿Ambechi exea máteru artikulurhu?

²⁵ Ísïsti, kánikuachi sési pʼikuarherasïnga kumplirini Kristueri mandamientuni. Engachi iáminduecha jánguarhintajka kumplirini, jarhuajpisïngachi eska kúnguarhikua jindeuaka nani engachi iáminduecha pʼikuarheraaka eskachi xénchanhasïnga, jukaparharanhani ka seguruchi pʼikuarherani. Peru irekaxakachi parhakpini ma jimbo nani enga kʼuiripu “sánderu ka sánderu no sési jáma[ni]” jaka (2 Tim. 3:13). Ísï jimbo, jatsiskachi para jingontku jarhani. ¿Nénaksï uá xarhatani kúnguarhikuarhu anapu erachicha Tata Diosïri jurhimbikuani engaksï jatsiaka para atenderini problema ma komu engaksï sapiichani ísku ambe ma úkuajka? Máteru jimbochi mókuntaaka ini ambe.