NO NO SÉSI jarhasti eskachi iáminduecha uékaaka parachi ísï exenhani eskachi ambakiti kʼuiripueska ka jurhimbitku jámani. Peru i jurhiatikuecha jimbo, no fásilisti xasïini. Uánikua kʼuiripu nómindu jeiapanhintasïndi “ambakiti ambe” (2 Tim. 3:3). Jamberiksï imani ambe újti engaksï imecha exejka eska sésiska o nómbe, seguni para imecha ‘ambakiti ambe, no sési ambesti’ ka ‘no sési ambe, ambakiti ambesti’ (Is. 5:20). Ístuchi úkua jukanchasïnga ambakiti ambe úni imani ambe jimbo engachi ióntki úka ka jimbokachi no perfektueska. Jamberichi jimbosï ísï pʼikuarherajka eska pirenchi ma enga ióni marhuakukia Jeobani, peru ima uandasïndi: “Meru úkua jukanchasïnga exeni eskani ambakiti kʼuiripu máeska”.

Peru kánikua sésisti eskachi iáminduecha úaka ambakiti kʼuiripu máeni. I ambe máesti enga Tata Diosïri espiritu santu úrpijka, enga sánderu uinhapitiika ka eska ambe uéjki engachi pʼikuarherajka o nitamakuarhini engajtsïni úpiringa ójkutani. Ju je exeni ambe arhikuekasïni ambakitiini ka ístu nénachi úa sánderu ambakiti kʼuiripu máeni.

Parachi sóntku kurhanguni, ambakitiini, arhikuekasïndi nemani enga ambakiti ambe újka, sési ka jurhimbitku jámani. Kʼuiripu ma enga ambakiti ambe újka, méntkisï jánguarhintasïndi exeni néna jarhuataani máteruechani ka úni ambe ma imecha jimbo.

Seguru eskachi mítiaka imechani engaksï jingontku jarhajka para ambakiti ambe úni imecheri familiaricha ka amiguecha jimbo. Peru ima enga Tata Diosï exejka eska ambakiti kʼuiripu máeska, no solu indeni ambejkusï újti. Ísïsti, no nema meru úsïndi sési xarhatani eska ambakiti kʼuiripu máeska, jimboka Biblia arhisïnga eska “no ma kʼuiripu jarhaska echerirhu enga jurhimbitiika ka enga méntkisï ambakiti ambe úni jauaka ka no pekarini” (Ecl. 7:20). Ka apostuli Pablu uandaspti: “Mítiskani eska no ma ambe ambakiti ambe jarhaska juchiti mintsitarhu” (Rom. 7:18). Ísï jimbo, engachi uéjka inde jásï kʼuiripu máeni, uétarhisïndi eskachi Jeobaeri ambe jorhenguarhiaka, ima enga újka eskachi xarhataaka indeni kualidadini.

Jeoba jindesti enga uandajka ambe enga ambakiti ambeka. Salmueri karari ma arhispti: “Tʼuri ambakitiska ka ambe engari újka ambakiti ambesti. Jorhendaarini chíti juramukuechani” (Sal. 119:68). Ju je exeni tsimani ambe enga ini karakatarhu arhijka eska Tata Diosï ambakitiska.

Jeoba ambakitisti. Jeoba ístu xarhatasïndi eska ambakitiska. Ju je exeni ambe enga úkuarhipka jiáni enga ima arhipka Moisesini: “Ji úaka eskari exeaka na engani xáni ambakitika”. Mientrasi enga xarharani japka na enga xáni kʼéri ambeka Jeoba ka ístu ambakitini, Moisesi ini ambe kurhaaspti: “Jeoba, Jeoba, Tata Diosï pʼamojpiti ma ka enga sési kámpijka, enga no sóntku ikiajka ka enga kánikua uékpijka ka jurhimbitiini, enga ambakiti uékperakua xarhatakuajka uánikuechani, enga puákuntajka imani enga no sési ambe újka ka imani enga no janhanharhijka leini ka imani enga pekarijka, peru enga kastigarijka imani enga ísï jukanchaka” (Éx. 33:19; 34:6, 7). I ambe sési xarhatasïndi eska Jeoba ambakitiska iámindu ambe jimbo. Enga Jesusi Echerirhu irekani japka, sési xarhataspti na enga jindeka para ambakitini. Ka nájkiruka ísïpka, ima uandaspti: “No nema jarhasti enga ambakitiika solu [Tata] Diosï” (Luk. 18:19).

Jeoba ambakiti ambe úsïndi. Iámindu ambe enga Tata Diosï újka, xarhatasïndi na enga xáni ambakitiika. Biblia arhisïndi: “Jeoba ambakitisti iáminduecha jingoni ka xarharasïndi na enga xáni pʼamojpijka iámindu  imani ambe jimbo enga ima újka” (Sal. 145:9). Jeoba xarhatasïndi eska ambakitiska enga iáminduechani májkueni kaajka ka úparini eskaksï irekaaka ka eskaksï iámindu ambe jatsiaka para tsípiti jarhani (Uku. 14:17). Ístu xarhatasïndi engajtsïni puáchiantaajka pekaduechani. Salmueri karari ma uandaspti: “Tʼu Tatá Jeobá ambakitiskari ka jingontkuri jarhaska para puátspentani” (Sal. 86:5). Úakachi seguru jarhani eska “Jeoba méntkisï ambakiti ambe íntsaua[ka] imechani engaksï jurhimbitku jámajka” (Sal. 84:11).

Komujtsïni Tata Diosï ísï kueraaka eska ima na jásïka, úsïngachi ambakiti kʼuiripu máeni ka ambakiti ambe úni (Gén. 1:27). Peru Bibliajtsïni arhisïndi juchantsïni engachi Tata Diosïni marhuakujka: “Jorhenguarhi je ambakiti ambe úni” (Is. 1:17). Ju je exeni tanimu ambe engachi úaka úni para sánderu ambakiti kʼuiripu máeni.

Orheta, kómarhini parachi imeri espiritu santu kurhakuni, engajtsïni úaka jarhuatani parajtsïni Tata Diosï exeni eskachi ambakiti kʼuiripueska (Gal. 5:22). Jo, Tata Diosïri espiritujtsïni jarhuatasïndi parachi tsitini ambakiti ambe ka no jiókuarhini imani ambe enga no sési jaka (Rom. 12:9). Ka Biblia arhisïndi eska Jeoba úaka parachi “ambakiti ambe úni ka ambakiti ambe uandani” (2 Tes. 2:16, 17).

Máteru ambe, jatsiskachi para arhintani Karakatani enga Tata Diosïni jimboeka. Engachi ísï újka, Jeobajtsïni jorhendasïndi imani “ambe enga újka eska ambakiti ambe únhaaka” ka arhistachisïndijtsïni parachi “ambakiti ambe úni” (Prov. 2:9; 2 Tim. 3:17). Engachi arhintajka imeri Karakatani ka eratsintani, ambakiti ambechi pérasïnga juchari mintsitarhu Tata Diosïri ambe ka ambe enga ima uéjka úni. I ambe niárasïndi jukaparhakua ambeni engajtsïni jarhutaaka jiáni enga uétarhiaka (Luk. 6:45; Efes. 5:9).

Últimu, jatsiskachi para jánguarhintani “úni indeni ambe enga sésiika” o ambakitiini (3 Juanu 11). Bibliarhuksï jarhasti ejempluecha engaksï xarhatapka eskaksï ambakitispka ka engachi juchajtu úaka májkueni úni. Peru sánderu ambakiti ejempluechaksï jindesti Jeobaeri ka Jesusiri. Ka ístuksï jarhasti máteru ambakiti ejempluecha. Jamberichi miáuajka Tabiteri ka Bernaberi (Uku. 9:36; 11:22-24). ¿Andichisï no jorhenguarhijki ambe enga Biblia arhijka indecheri ambe ka exenchi ambe engaksï úpka para jarhuataani máteruechani? Ju je eratsini ambe engachi úaka úni para jarhuatani nemani juchari familiarhu anapuni o kúnguarhikuarhu. Ju je exeni náki kóntperatechanksï intsïnhaaspi i tsimani kristianuecha engaksï ambakiti ambe úpka. Juchajtuchi úaka indeni ambe intsïnhani.

Ístuchi úaka eratsiani imechani engaksï iásï ambakiti ambe újka máteruecha jimbo. Por ejemplu, kúnguarhikuarhu anapu orhejtsïkutichaksï kánikua ánchikuarhisïndi ka tsitisïndiksï imani ambe enga ambakitiika. Ka ju je no mirikurhiani juchari pirenchichani engaksï sési marhuakujka Jeobani, engaksï  ‘jorhentpijka ambe enga ambakitiika’ imecheri uandakuecha ka úkuecha jingoni (Titu 1:8; 2:3). Pirenchi Roslyn uandasïndi: “Amigani ma jatsiska enga jánguarhintajka jarhuataani ka uinhaperantaani kúnguarhikuarhu anapu erachichani. Eratsisïndi na engaksï nitamakuarhini jarhajka ka pʼindesti sapichitu ambe íntsïkuarhiani o máteru ambe jingoni jarhuataani. Para ji kánikua ambakiti kʼuiripu máesti”.

Jeoba arhiasïndi imeri marhuarichani eskaksï jirhinhantaaka “imani ambe enga ambakitiika” (Amós 5:14). Engachi ísï úska, nochi solu xénchauaka imeri juramukuechani, sino ístuchi sánderu uékaaka imani ambe úni enga Jeoba jeiapanhintajka.

Peru nochi jatsiska para eratsini eska para ambakiti kʼuiripu máeni, uétarhisïnga kʼéri ambe úni. Ju je exeni ejemplu ma, paraka planta ma úaka kʼéni, nochi matirku kánikua jatsikusïnga itsï, sino someni sanhanitu. Májkueni, úakachi xarhatani eskachi ambakiti kʼuiripu máeska engachi someni úska sapichitu ambe máteruecha jimbo.

Biblia arhisïndi eskachi iáminduecha jatsiska para jingontku ka preparadu jarhani para ambakiti ambe úni (2 Tim. 2:21; Titu 3:1). Engachi jingontku jarhaska ambe enga máteru kʼuiripu nitamakuarhini jaka, seguru eskachi jánguarhintaaka exeni néna úni “ambakiti ambe enga sési pʼikuastaaka [...] para úni eska ima uinhapini pʼikuarheraaka” (Rom. 15:2). Jamberi uétarhiati parachi sáni íntspini imani ambe engachi jatsikuarhika (Prov. 3:27). Jamberichi úaka pʼimarhini nemani para ma ratu juchantsïni jingoni jarhani o parachi májku kʼéri arhani ambe ma. ¿Mítiskichi eska nema pʼamenchaxaka? Enga ísïka, úakachi tarjeta ma axakuni o mensaji ma, pʼorhembini o telefunu jimbo uandajpani. Ísïsti, uánikua ambe jarhasti engachi úaka arhijpini “enga marhoajka para uinhaperpintani [o ambakitiini], para eska imecha engaksïni kurhajchaaka, uinhapini p’ikuarheraaka imecheri mintsitecharhu” (Efes. 4:29).

Ísï eska Jeoba, jánguarhintasïngachi iámindu kʼuiripuechani ambakiti ambe úkuani. Ísï jimbo, iáminduechanchi májkueni kásïnga. Ma ambe jimbo engachi újka ísï úni, jindesti aianguani ambakiti ambe Reinueri. Ísï eska Jesusi na juramuka, jánguarhintasïngachi ambakiti ambe úni asta imecha jimbo engajtsïni ikiachijka (Luk. 6:27). Méntkisïjtsïni sési nicheati engachi sési kámpiska ka ambakiti ambechi úni máteruecha jimbo, jimboka “para i jásï ambe jimbo no jarhas[ka] lei” (Gal. 5:22, 23). Engachi ambakiti ambe úska, nájkirukajtsïni no sési kámaaka ochi uandanhiatechani jatsiani, jamberichi úaka eska kʼuiripu uékaaka andaparhakuerhani jurhimbikuarhu ka ísïchi kʼéri ambe arhiaka Tata Diosïni (1 Ped. 3:16, 17).

Biblia arhisïndi eska ambakiti kʼuiripu ma intsïnhaasïnga kóntperatechani imani ambe jimbo enga újka (Prov. 14:14). ¿Nákiskiksï máru kóntperatecha? Jamberijtsïni kʼuiripuecha sési kámaati. (Prov. 14:22). Ka nájkirukaksï no ísï úaka, engachi seguiriska ambakiti kʼuiripueni imecha jingoni, jamberiksï nóteru xáni ikiauatia ka ménderuenksï eratsinia (Rom. 12:20).

Uánikuaksï uandantasïndi na enga xáni marhuakuaka nóteru imani ambe únia enga no sési jaka ka imani ambe úni enga sési jaka. Ju je exeni ambe enga nitamakuarhika Nancy. Uandantasïndi: “Niáraspka kʼuiripu máeni engani no sáni responsablipka, ísku jándikua ambe niátani ka no janhanharpini. Peru engani jorhenguarhipka imani ambakiti ambe enga Tata Diosï juramujka ka engani ísï úpka, uénaspka sánderuni sési pʼikuarherani. Iásïjtsïni janhanharhisïndia”.

Ambe enga jimbo sánderu uétarhijka parachi ambakiti kʼuiripu máeni, jindesti jimbokachi ísï úsïnga Jeobani sési pʼikuastani. Ima exesïndi ambe engachi újka, nájkirukaksï máteruecha no exeaka. Ima jingontku jarhasïndi engachi ambakiti ambe eratsijka ka úni (Efes. 6:7, 8). ¿Ambe niárasïni úkuarhini? “Jeoba jaiapanhintasïndi ambakiti kʼuiripuni” (Prov. 12:2). Ísï jimbo, ju je seguirini sánderu ambakitiini. Jeoba aiatspisïndi: “Nema enga sési jámajka tʼíntskua intsïnhaati ka sési arhikateni ka pínandikua jatsini” (Rom. 2:10).