1, 2. a) ¿Ambe úrasïni Jeoba para arhini ambe ma kʼuiripuni? b) ¿Ambechi exea ini artikulu jimbo?

JEOBA tsitisïndi juchantsïni jingoni uandontskuarhini. Ísï úsïndi parachi úni mítini ambe enga ima eratsijka ka úni. Ióntki úraaspti profetechani, ánjilichani ka imeri Uájpani, tata Jesukristuni parajtsïni úni mítitarani ambe enga ima eratsijka (Amós 3:7; Gal. 3:19; Jaŋ. 1:1). Ka iásï úrasïndi imeri Karakatani, Bibliani.

² Ístu, enga Jesusi Echerirhu japka, Jeoba tanimu xanhari uandaspti auandarhu uératini. Ju je exeni ambe uandaspi, ambechi jorhenguarhisïni imani uandakuecheri ka ambechi jatsiski para úni engachi úejka eskajtsïni marhuachiaka i ambe.

3. Seguni Markusʌ 1:9-11, ¿ambe uandaspi Jeoba enga Jesusi itsï atakuarhipka ka ambeksï xarhataspi ima uandakuecha?

³ (Arhinta je Markusʌ 1:9-11). I primeru xanharispti enga Jeoba auandarhu uératini uandapka: ‘Tʼuri jindeska juchiti Uátsï engani ji xáni uékajka’, “ka ji tʼungini jimbosïni xáni tsípini pʼikuarherajka”. Jesusi kánikua sési pʼikuarherapti enga meru kurhaapka imeri Tátini uandani eska xénchasïrenga ka mintsinharhini. Ju je exeni tanimu ambe enga Jeoba uandaka eska isïska ka enga meru jukaparhakueka: eska Jesusi imeri Uájpeska, eska xénchasïnga ka eska jeiapanhintasïnga.

4. Enga Jesusi itsï atakuarhipka, ¿ambeksï arhikuekasïreni Jeobaeri uandakuecha?

⁴ ‘Tʼuri jindeska juchiti Uátsï’. Ini uandakuecha jingoni Jeoba uandaspti eska imeri Uájpa, Jesusi, jimbanhi pájperakua ma jatsispkia imani jingoni. Enga Jesusi auandarhu japka komu espiritu ma, jindesptia ma Tata Diosïri uájpa. Peru enga itsï atakuarhipka, espiritu santu jingoni erakunhaspti. Jiáni uératini, Tata Diosï uandaspti eska iásï Jesusi imeri Uájpa erakukatespkia ka eska mintsikapiringa para kʼuanhatsintani auandarhu  para jindeni Rei ka Kʼéri Saserdoti enga Tata Diosï erakupka (Luk. 1:31-33; Ebr. 1:8, 9; 2:17). Ísï jimbo, jiáni enga Jesusi itsï atakuarhipka, imeri Táti jemba jatsispti rasoni para uandani: ‘Tʼuri jindeska juchiti Uátsï’ (Luk. 3:22).

5. Ísï eska Jeoba, ¿ambechi jatsiski para úni?

⁵ Tʼuri “jindeska [...] engani ji xáni uékajka”. Ísï eska Jeoba na xarhatakupka Jesusini uékperakua ka uinhaperantani, juchajtuchi jatsiska para májkueni úni máteruecha jingoni (Juanu 5:20). Sésichi pʼikuarherasïnga engajtsïni ima kʼuiripu engachi uéjka, xarhatachijka uékperakua ka felisitarintsïni ambe ma jimbo engachi sési újka. Juchari familia ka ístu kúnguarhikuarhu anapuechajtuksï uétarhinchasïndi eskachi xarhatakuauaka uékperakua ka eskachi uinhaperantauaka. Engachi ísï úska, jarhuatauakachi paraksï sánderu mintsikani Jeobani ka nóksï jurajkuni. Ka sánderu jukaparhakuesti eskaksï táticha uinhaperantauaka imecheri uájpechani ka mintsita jingonksï felisitariuani ka xarhatakuani uékperakua. Ísïksï jarhuatauati paraksï jánguarhintani xáni eskaksï xáni uáka.

6. ¿Andichisï úa mintsikani Jesukristuni?

⁶ “Ji tʼungini jimbosïni xáni tsípini pʼikuarherajka”. Enga ísï uandapka, Jeoba xarhataspti eska seguru jarhaspka eska Jesusi úpiringa ambe enga ima uéjka. Enga ima xáni mintsinharhienga imeri uájpani, juchajtuchi úaka meru seguru jarhani eska Jesusi kumpliriuauaka iámindu Jeobaeri aiatsperakuechani (2 Kor. 1:20). Engachi eratsijka Jesusiri ejempluni na enga kurhajchapka Jeobani, sánderuchi uékasïnga jorhenguarhini imeri ambe ka úni eska ima na úpka. Ka ístu, Jeoba mintsikasïndi eskaksï iámindu imeri marhuaricha seguirini jauaka jorhenguarhini imeri Uájperi ambe (1 Ped. 2:21).

7. Eska na arhijka Mateu 17:1-5, ¿káni ménderu uandaspi Jeoba auandarhu uératini ka ambe uandaspi?

⁷ (Arhinta je Mateu 17:1-5). Tsimani úni jámani enga Jeoba auandarhu uératini uandapka, jiánispti enga Jesusi ménderueni jáxentapka. Ima arhispti Pedruni, Santiagu ka Juanuni eskaksï pámbepiringa kʼéri juáta ma jimbo. Imechaksï jánhaskakua ma exespti enga ísku pakataapka. Jesusiri kanharhikua tʼintskaxapti ka imeri xukuparhakua meremerejkuxapti. Ka ísï xarharasïrendi enajki Moisesipi ka Eliasi engaksï uandontskuarheni japka Jesusi jingoni imeri uarhikueri ka tsíntskueri ambe. Nájkirukaksï tanimu apostulicha kʼuíni japka, exesptiksï imani jánhaskakuani engaksï sési tsinharhipkia (Luk. 9:29-32). Tátsekua, ójchakuraaspti nubi meremeresï ma ka jima uératini kurhakuarhispti Tata Diosïri uandakua. Májkueni eska na úpka jiáni enga Jesusi itsï atakuarhipka, Jeoba xarhataspti eska xénchasïrenga ka jeiapanhintani imeri Uájpani enga uandapka: “I jindesti juchiti Uátsï engani ji xáni uékajka, ka engani jimbo tsípikuarhijka”. Peru i xanhari, uandaspti: “Kurhajcha je”.

8. Ambe engaksï exepka jánhaskakua jimbo, ¿néna jarhuataspi Jesusini ka imeri chúxapatichani?

⁸ Ima jánhaskakua xarhataspti na enga kʼéri ambepiringa Jesusi ka uinhapikua jatsini jiáni enga reipiringia Tata Diosïri Reinueri jimbo. Seguru eska jarhuatapka ka uinhaperantani Jesusini para enga no sési kánhapiringa ka uándikunhani. Ístu, úspti eska imeri chúxapaticheri jakajkukua sánderu kʼépiringa ka íntsaaspti uinhapikua paraksï no méni jurajkuni jiáni engaksï tsʼéjkukuechani jatsiapiringa ka paraksï kʼéri ánchikuarhitani úni engaksï sánderu orhepani úpiringa. Ma treinta uéxurhinisï tátsekua, apostuli Pedru uandaspti ambe engaksï exepka jánhaskakua jimbo, inde ambe arhikuekasïndi eska útasï sési miáxapka (2 Ped. 1:16-18).

9. ¿Náki konsejuechani íntsaaspi Jesusi imeri chúxapatichani?

⁹ “Kurhajcha je”. Jeoba uandaspti eska uékasïnga eskachi kurhajchaaka ka úni ambe enga imeri Uájpa uandajka. Enga Jesusi Echerirhu japka, uánikua ambe uandaspti enga meru jukaparhakueka. Por ejemplu, jorhendaaspti imeri chúxapatichani paraksï nirani uandantani ambakiti ambe Reinueri ka someni arhiaspti eskaksï jingontku japiringa (Mat. 24:42; 28:19, 20). Ka ístu méntku úndaspti arhiani eskaksï jánguarhintapiringa xáni eskaksï xáni úpiringa ka eskaksï no kuatantapiringa (Luk. 13:24). Ístu arhiaspti eska uétarhisïrenga eskaksï uékperapiringa iáminduecha, márku jarhani ka eskaksï úpiringa ambe enga ima juramukuapka (Juanu 15:10, 12, 13). Ísïsti, ima konsejuechaksï jiáni kánikua marhuaspti ka iásï jamberiksï májkueni marhuaxati.

10, 11. ¿Nénachi xarhatasïni eskachi kurhajchasïnga Jesusini?

¹⁰ Jesusi uandaspti: “Iámindu ima enga tsitijka enga sési jimboeka kurhajchasïndirini” (Juanu 18:37). Xarhatasïngachi eskachi kurhajchasïnga ambe enga ima uandajka engachi újka ísï eska i konseju na arhijka: “Tekatsperanta je ka puatsperantani” (Kol. 3:13; Luk. 17:3, 4). Ístuchi ísï úsïnga engachi tsípikua jingoni aianhpijka Tata Diosïri ambe jiáni engachi agustu jarhajka ka ístu engachi no sési nitamakuarhini jarhajka (2 Tim. 4:2).

¹¹ Jesusi uandaspti eskaksï imeri karichicha kurhajchasïnga ambe enga ima uandajka (Juanu 10:27). Xarhatasïngachi eskachi kurhajchasïnga no solu kurhandiparini imeri uandakuechani, sino úni ambe enga ima uandajka. Nochi uékasïnga “sánderu tsitini iásï anapu ambe” (Luk. 21:34). Sánderu sési, exesïngachi eska sánderu jukaparhakueska ambe enga Jesusi juramuka, asta engachi úkua jukanchajka. Uánikua erachichaksï kʼérati problemechani jatsiasti  komu no sésiksï kánhani, meru no ma ambeksï jatsikuarhini ka desastre naturali ambe. Peru nóksï jurajkusïndi Jeobani ambe uéjki úkuarhini. Jesusi arini ambe aiakuasïndi iámindu imechani: “Ima enga jatsiaka juchiti mandamientuechani ka úni eskani ji na uandajka, ima jindesti engarini uékajka. Ka ima engarini uékajka jíndini, juchiti Tátijtu uékaati imani” (Juanu 14:21).

12. ¿Ístuchi néna úa xarhatani eskachi kurhajchasïnga Jesusini?

¹² Máteru ambe engachi úaka úni para xarhatani eskachi kurhajchasïnga Jesusini, jindesti jarhuataani imechani enga ima erakuaka parajtsïni orhechipani (Ebr. 13:7, 17). Últimu uéxurhinicha jimbo, Tata Diosïri organisasioni uánikua ambe mójtakusti. Por ejemplu, jimbanhi ambejtsïni arhistachesti ka íntskuni para aianhpikuarhu. Ístu mójtakusti na enga úkuarhenga tánguarhikua enga semana jimbo jarhajka ka na engaksï úajkia Kʼumanchikuechani Reinueri, sési jájkuantani ka kuidariuani. ¿A no eskachi jukaparharasïnga eskajtsïni xáni uékperakua jingoni arhistachiaka ka jánhaskakua jingoni? Úakachi seguru jarhani eskajtsïni Jeoba újchakuraaka engachi jánguarhintani jaka ísï úni eska organisasioni na uandajka.

13. ¿Nénajtsïni marhuachisïni kurhajchani Jesusini?

¹³ Úni iámindu ambe engajtsïni Jesusi jorhendaka, kánikuajtsïni marhuachisïndi. ¿Néna? Por ejemplu, ima arhiaspti imeri chúxapatichani eska ambe enga ima jorhentpipka, uinhaperataapiringa. Uandaspti: “Ka ísïksï mintsikuastanhaati chári almecha, jimboka juchiti uananchatarakua no kʼirhindikpisïnga, ka no kʼuetsapini engani ji pájka” (Mat. 11:28-30). Tata Diosïri Karakata —asta tʼámu ebanjeliuecha engaksï Jesusiri irekueri ka aianhpikueri ambe uandantajka— sésijtsïni pʼikuastasïndi ka úsïndi eskachi jánhaskatiuaka (Sal. 19:7; 23:3). Jesusi uandaspti: “Sánderuksï tsípisïndi imecha engaksï kurhandijka Diosïri uandakuani ka únksï eska na arhijka” (Luk. 11:28).

14, 15. a) Eska na arhijka Juanu 12:27, 28, ¿káni uandaspi Jeoba auandarhu uératini para tanimu xanharinia? b) ¿Andisï sési pʼikuastantapi ka uinhaperantani Jesusini ambe enga Jeoba uandapka?

¹⁴ (Arhinta je Juanu 12:27, 28). Juanueri Ebanjeliu taminu xanharini uandantasïndi enga Jeoba auandarhu uératini uandapka. Máru jurhiatikuecha ante de uarhini, Jesusi Jerusaleni jarhaspti para últimu Paskuani úntani. Ísï tátsekua enga uandapkia eska kánikua  uandanhiaxapka, kómarhikua ma jimbo kurhakuspti Tata Diosïni: “Táti, ú eska kʼéri ambe arhinhaaka chíti nombri”. Ka Jeoba auandarhu uératini mókukuntaspti: “Úskania eska kʼéri ambe arhinhaaka ka ménderuni ísï úaka”.

¹⁵ Ambe enga Jesusini uandanhiatani japka, jindespti eska kʼéri responsabilidadi ma jatsispka para kurhajchani Jeobani. Mítispti eskaksï kʼuikirhipiringa ka uándikuni (Mat. 26:38). Peru ambe enga sánderu jukaparharenga, jindespti Táti jemberi nombrini pímbinhajkuntani. Uandanhiaxapti enga imeri uarhikua jimbo no sési pakatapiringa Tata Diosïri nombrini, jimbokaksï arhispka eska ima no sési ambe uandaspka Tata Diosïri ambe. Peru ambe enga Táti jemba arhipka, úpti eska seguru japiringa eska Tata Diosïri nombri pímbinhasïntapiringa. Seguru eska i ambe úpka eska nóteru xáni uandanhiapiringia ka uinhaperantani para úni tekantani enga no sési kánhapiringa. Nájkiruka jamberi Jesusijku kurhangupka ambe engaksï arhikuekenga ima uandakuecha, Jeoba úspti eskaksï karakata pakarapiringa parajtsïni juchantsïni marhuachini (Juanu 12:29, 30).

16. ¿Andichisï úa ménisï uandanhiani eska Tata Diosïri nombri no sési exenhaaka?

¹⁶ Májkueni eska Jesusini, jamberijtsïni juchantsïntu uandanhiatajti eska Tata Diosïri nombri no sési exenhaaka. Jamberichi no sési kánhaaka, ísï eskaksï Jesusini na kámapka. O jamberichi uandanhiajka engaksï máru kʼuiripuecha chkuaderakua ambe etsakujka juchari ambe. Jamberichi eratsijka na engaksï xáni no sési pakatajka Jeobani ka imeri organisasionini.  Peru i ambejtsïni no jatsisti para uandanhiatani. Engachi ini ambe nitamakuarhini jauaka, kánikuajtsïni sési pʼikuastantasïndi ambe enga Jeoba arhipka Jesusini. Jeoba méntkisï pímbinhajkuntaati imeri nombrini. Úraati Reinuni para sési pʼikuastaantani imeri ambakiti marhuarichani imani ambe jimbo enga no sési úkuauaka Satanasi ka i parhakpini (Sal. 94:22, 23; Is. 65:17). Seguruchi jarhaska eskaksï i uandakuecha kumplirikuarhiaka: “Diosïri pínandikua enga no nema újka jánhaskani, kuájpiauati chári mintsitechani ka chári eratsikuechani Kristu Jesusini jimbo” (Filip. 4:6, 7).

17. Exeparini ambe enga uandajka Isaías 30:21, ¿ambe úrasïni iásï Jeoba parajtsïni arhini ambe ma?

¹⁷ Jeobajtsïni iásï jamberi seguirixati arhini ambe ma (arhinta je Isaías 30:21). Ísïsti, nochi kurhaasïnga imeri uandakuani auandarhu uératini. Peru arhisïndijtsïni ambe engachi úaka, úraparini imeri Karakatani, Bibliani. Ístu, espiritu santu jarhuatasïndi jántspirini parajtsïni seguirini jarhani jorhendani Tata Diosïri ambe komu publikasionicha jimbo, Interneti jimbo, bideuecha ka audiu jimbo (Luk. 12:42). ¿A no eskachi uánikua ambe intsïnhasïnga parachi jorhenguarhini Tata Diosïri ambe?

18. ¿Andiksïsï Jeobaeri uandakuecha újki eskachi sánderu jakajkuaka ka balori jukani?

¹⁸ Ju je no méni mirikurhini ambe enga Jeoba uandapka jiáni enga Jesusi Echerirhu japka. Eska imeri uandakuecha engaksï Bibliarhu karakata jaka, úaka eskachi mintsikaaka eska ima iámindu ambe sési mítitixakaia ambe enga úaka ka eskajtsïni sési pʼikuastantaaka ambe uéjki engajtsïni Satanasi ka i parhakpini úchiaka. Ju je jingontku kurhajchani Jeobani. Engachi ísï úska, úakachi tekantani engachi no sési ambe nitamakuarhiaka iásï o sánderu orhepani. Bibliajtsïni miátantasïndi: “Ka uétarhisïndi eskajtsï nómindu kuatantaaka para eska engajtsï úska eska Diosï na jeiapanhintajka, chájtsï intsïnhaaka ambe engajtsï eiaminhaka” (Ebr. 10:36).