1. Eska na arhijka 1 Pedru 3:8, ¿andichisï sési pʼikuarherajki imecha jingoni jarhani engaksï pendienti pájka ambe engachi pʼikuarherajka ka ístu parachi sési jarhani?

IÁMINDUECHACHI sési pʼikuarherasïnga imecha jingoni jarhani engaksï pendienti pájka ambe engachi pʼikuarherajka ka ístu parachi sési jarhani. I járhati kʼuiripuechaksï jánguarhintasïndi kurhanguni ambe engachi nitamakuarhini jarhajka ka kurhangunksï ambe engachi eratsijka ka pʼikuarherani. Exesïndiksï ambe engachi uétarhinchani jarhajka ka jarhuatasïndijtsïni, ka astaksï ménisï ísï úsïndi ante dechi kurhakuani. Jukaparharaasïngachi imechani engaksï kurhangutspijka o engaksï “májku ambe pʼikuarhejka” eska máteruecha, * ísï eska na arhijka 1 Pedru 3:8 (arhinta je).

2. ¿Andichisï úpirini úkua jukanchani kurhangukuani máteruechani?

² Iámindu kristianuechachi uékasïnga kurhangukuani máteruechani. Peru uétarhisïndi miáni eskachi ménisï úkua jukanchasïnga ísï úni. ¿Andi? Ma ambe jindesti jimbokachi no perfektueska ka jimbochisï jatsika para jánguarhintani no solu juchari ambejku pendienti páni (Rom. 3:23). Ka jamberichi máru kánikua úkua jukanchajka pendienti páni máteruecha jimbo, jimbokachi no ísï kʼuiriperanhaska ka imani ambe jimbo engachi nitamakuarhika. Ka ístu, jamberijtsïni máteru kʼuiripuecha pájtamajti, jimboka ini últimu jurhiatikuecha jimbo, uánikuaksï no pendienti pásïnga na engaksï pʼikuarherajka máteruecha, sino imechajkuminduksïsï uékakuarhijti (2 Tim. 3:1, 2). ¿Ambejtsïni úa jarhuatani parachi nóteru indeni ambe úni ka pendienti páni máteruecha jimbo?

3. a) ¿Ambejtsïni jarhuataa parachi kurhangukuani máteruechani? b) ¿Ambechi exea ini artikulu jimbo?

 ³ Ma ambe engajtsïni jarhuataaka sánderu kurhangukuani máteruechani, jindesti ísï úni eska Jeoba ka imeri Uájpa, Jesusi. Jeoba jindesti Tata Diosï enga uékperakueka ka imajtsïni sánderu ambakiti ejemplu xarhatachisïndi (1 Juanu 4:8). Ka Jesusi sési xarhataspti na enga jásïka imeri Táti jemba (Juanu 14:9). Enga Echerirhu japka, exespti eskaksï kʼuiripuecha úsïnga xarhatani pʼamojperakua. Orhetachi exeaka nénaksï xarhataspi Jeoba ka Jesusi eskaksï pendienti pásïnga na engaksï pʼikuarherajka máteruecha ka tátsekuachi exeaka nénachi úa májkueni úni.

4. ¿Néna xarhatasïni Isaías 63:7-9 eska Jeoba uandanhiasïnga na engaksï pʼikuarherajka imeri marhuaricha?

⁴ Bibliarhu arhisïndi eska Jeoba uandanhiasïnga na engaksï pʼikuarherajka imaecha engaksï marhuakujka. Por ejemplu, ju je exeni na enga pʼikuarherapka engaksï israelitecha no sési nitamakuarhini japka. Tata Diosïri Karakata arhisïndi: “Iámu imani tiempu jimbo engaksï xáni uandanhiani japka, imajtu kánikua uandanhiaxapti” (arhinta je Isaías 63:7-9). Ísï tátsekua, Jeoba úraspti profeta Sakariasini para uandani eska engaksï no sési kámani japka imeri iretani, ísïspka eska imani no sési kámani. Arhiaspti imeri marhuarichani eska né uéjki enga uékapiringa no sési ambe úkuani, ísïpiringa komu imani pʼonharhikuni jarhani (Zac. 2:8). ¡Ískujtsïni pakatasïndi na enga xáni pendienti pájka Jeoba imeri marhuaricha jimbo!

5. Jatsiku je ejemplu ma enga xarhatajka ambe enga úpka Jeoba para jarhuataani imeri marhuarichani engaksï no sési nitamakuarhini japka.

⁵ Engaksï Tata Diosïri marhuaricha no sési nitamakuarhini jarhajka, ima no solu pʼamojkuasïndi, sino úsïndi ambe ma para jarhuataani. Por ejemplu, engaksï israelitecha kómu nitamakuarhini japka Ejiptu, Jeoba kurhangukuaspti, inde ambe úspti eska pʼímutantaapiringa. Jeoba arhispti Moisesini: “Meru exeska na enga xáni no sési nitamakuarhini jaka juchiti ireta [...], ka kurhauaska na engajtsïni uinhachaparini kómarhini jaka [...]; jimbokani sési mítiska na engaksï xáni no sési nitamakuarhini jaka. Ka niraxaka kétsini parani euajpiantani ejipsiuecheri jájki jimbo” (Éx. 3:7, 8). Jimboka pʼamojkuasïrenga, pʼimutantaaspti paraksï nóteru jántspirinia. Ísï ióni jimbo, engaksï jima japkia Echerirhu engaksï Aiaminhapka,  imecheri ikiatspitichaksï no sési úkuaspti. ¿Ambe úspi Tata Diosï? Biblia arhisïndi eska ima no sési pʼikuarherasïrenga engaksï imecha kómu nitamakuarhini jarhenga imecheri kulpa jimbo engaksï no sési káuenga. Ménderu, jarhuataaspti jimboka kurhangukuasïrenga ka juesichani axaaspti parakaksï imecheri ikiatspiticha no no sési úkuapiringa (Juec. 2:16, 18).

6. Uandanta je ejemplu ma enga xarhatajka na enga Jeoba kurhangukupka ambe enga pʼikuarherani japka kʼuiripu ma enga imani ambe eratsini japka enga no ísïpka.

⁶ Jeoba exesïndi na engaksï pʼikuarherani jarhajka imeri marhuaricha asta engaksï imani ambe eratsini jauaka enga no ísïjka. Ju je exeni ambe enga nitamakuarhipka Jonasi enga profeta máepka. Jeoba arhispti eska nipiringa Nínibe anapuechani aianguani eskaksï kʼamajkunhapiringa. Peru jima anapuechaksï moantaspti, jimbosï Tata Diosï puákuantapti. I ambe no sési pʼikuastaspti Jonasini enga niárapka kánikua ikiani jimboka no ísï úkuarhispka eska ima na aianhpipka. Peru Jeoba tekantskua xarhatakuspti imeri profetani ka jarhuataspti para ménderueni eratsini (Jon. 3:10–4:11). Tiempu jingoni, Jonasi kurhanguspti ambe enga úkuarhipka ka asta Tata Diosï úspti eska Jonasi karapiringa ambe enga nitamakuarhipka parajtsïni jarhuatani (Rom. 15:4). *

7. Na enga kaapka Jeoba imeri marhuarichani, ¿amberichi úa seguru jarhani?

⁷ Ambe enga Jeoba úpka ini ka máteru ejempluecha jingoni, úsïngachi seguru jarhani eska Jeoba kurhangukuasïnga imeri marhuarichani. Pendienti jarhasïndi mándani arhini juchantsïni jimbo engachi no sési nitamakuarhini jarhajka. Sési mítisti, na engaksï pʼikuarhejka kʼuiripuecha (2 Crón. 6:30). kurhanguchisïndijtsïni iámindu ambe engachi pʼikuarherajka, ístu imani ambe engachi no újka úni. Ka aiachisïndijtsïni eska no jurajkuaka eskachi sánderu tsʼéjkunhaka engachi no úaka tekaantani (1 Kor. 10:13). ¿A no eskajtsïni sési pʼikuastantasïnga mítini ini ambe?

8-10. ¿Ambe ka ambe jarhuatapi Jesusini pendienti páni máteruecha jimbo?

⁸ Enga Jesusi Echerirhu japka, kánikua pendienti pasïrendi máteruecha jimbo. Ka para ísï úni, tanimu ambe jarhuataspti. Uénani jámani, eskachi na exekia, sési xarhataspti na enga jásïka imeri Táti jemba. Májkueni eska Jeoba, xenchaasïrendi kʼuiripuechani. Nájkiruka sési pʼikuastenga iámindu ima ambe enga Táti jembani jarhuatapka úni, sánderu xénchaasïrendi kʼuiripuechani (Prov. 8:31). Uékperakua úspti eska uandanhiapiringa na engaksï pʼikuarherajka kʼuiripuecha.

⁹ Tsimani úni jámani, májkueni eska Jeoba, Jesusi úsïrendi mítini ambe enga jarhenga kʼuiripuecheri mintsitarhu, i ambe arhikuekasïndi eska úsïrenga mítini ambe engaksï kʼuiripuecha pʼikuarherani jarhenga ka andiksïsï ísï úeni ambe ma (Mat. 9:4; Juanu 13:10, 11). Ísï jimbo, enga Jesusi kuenta íntskukuarhienga eskaksï kʼuiripuecha no sési ka kómu pʼikuarherani jarhasïrenga, sési pʼikuastantaasïrendi jimboka kurhangukuasïrenga (Is. 61:1, 2; Luk. 4:17-21).

¹⁰ Últimu, Jesusi mismu nitamakuarhiaspti máru uandanhiatechani enga kʼuiripu jatsiapka. Por ejemplu, jamberi familiarhu ma tʼarhexepti engaksï no jatsikuarhiripka. Komu ánchikuarhipka Jose jingoni, ima enga táti jembepka ixú echerirhu, jorhenguarhispti imani ánchikuarhita ambe úni enga uétarhenga uinhapikua (Mat. 13:55; Mar. 6:3). Ka jamberi pʼikuarherapti na enga xáni no sési pʼikuarherakuarhijka uarhiranchani nemani, jimboka a lo mejori Jose  jiáni uarhipti ante de ima uénani aianhpini. Ístu, mítispti na enga pʼikuarherakuarhijka familiarichani jatsiani engaksï no májkueni ambe jakajkujka (Juanu 7:5). I ambe ka ístu máteru ambe enga xáni nitamakuarhipka, jarhuataspti para kurhangukuani máteruechani engaksï uandanhiatechani jatsiauenga ka ambe engaksï pʼikuarherenga.

11. ¿Náki ejempluechaksï xarhatasïni eska Jesusi kurhangukuasïrenga kʼuiripuechani? (Exe je dibujuni enga uénakuarhu jaka).

¹¹ Jesusi xarhataspti eska pendienti pásïrenga máteruecha jimbo imani milagruecha jimbo enga úapka. No solu úspti indeni ambe jimboka jatsispka para ísï úni, sino jimboka pʼamojkuasïrenga imechani engaksï kómu nitamakuarhini jarhenga (Mat. 20:29-34; Mar. 1:40-42). Por ejemplu, ju je eranhaskani na enga pʼikuarherani japka jiáni enga acheeti kandini iauani jarharitapka kʼuiripuecheri para úni tsinani o jiáni enga tsítantapka uarhiiti tsïndiri uájpani (Mar. 7:32-35; Luk. 7:12-15). Jesusi kurhangukuaspti na engaksï pʼikuarherenga ima kʼuiripuecha ka uékaspti jarhuataani.

12. Eska na arhijka Juanu 11:32-35, ¿néna xarhataspi Jesusi eska kurhangukuspka Martani ka Mariani?

¹² Jiáni enga Lasaru uarhipka, Jesusi kurhangukuaspti imeri pirembechani, Martani ka Mariani. Enga exeapka na engaksï xáni no sési pʼikuarherani japka, “pʼiaraspti uérani” (arhinta je Juanu 11:32-35). Ima no ueraspti solu jimboka nóteru exepiringia imeri amigu jembani. Jimboka mítispka eska tsítantapiringa. Jesusi ueraspti jimboka no sési pʼikuarheraspka exeani imeri amigechani kómu nitamakuarhini jarhani.

13. ¿Andichisï sési pʼikuarherajki jorhenguarhini na enga Jesusi xarhatapka eska kurhangutspisïrenga?

¹³ Nájkirukachi no perfektueka ísï eska Jesusi, kánikuajtsïni marhuachisïndi jorhenguarhini na enga kurhangutspenga ima. Ka xénchasïngachi jimboka pʼamojperakua jingoni káspka máteruechani (1 Ped. 1:8). Kánikuajtsïni sési pʼikuastasïndi mítini eska iásï Reiskia Tata Diosïri Reinuerirhu ka eska no ióni jimbo kʼamajkuaka kómu nitamakuani.

14. Arhintaparini Efesu 5:1, 2, ¿ambechi uékasïni úni?

¹⁴ Engachi jorhenguarhijka Jeobaeri ka Jesusiri ejemplu, uékasïngachi sánderu kurhangutspini (arhinta je Efesu 5:1, 2). Ísïsti, juchachi no úsïnga mítini ambe enga kʼuiripuecheri mintsitarhu jarhajka, peruchi úaka kurhangukuani ambe engaksï pʼikuarherajka ka uétarhinchani (2 Kor. 11:29). Máteru kʼuiripuechaksï imecheri ambe jimbojku uandanhiasïndi, peru juchachi jánguarhintasïnga ísï úni eska Pablu na uandapka: “No solu pendienti páni para chájkumindu sési uérani, sino ístu pendienti páni para máteruecha” (Filip. 2:4).

15. ¿Néchaksï jatsiski para sánderu kurhangutspini?

¹⁵ Kúnguarhikuarhu anapu orhejtsïkutichaksï jatsisti para sánderu kurhangutspini. Mítistiksï eskaksï jatsiaka para kuenta íntskuntani Jeobani na engaksï kájka imechani enga ima enkargariuaka (Ebr. 13:17). Paraksï úni jarhuataani erachichani, jatsistiksï para kurhangukuani. ¿Nénaksï úa ísï úni?

16. ¿Ambeksï úsïni orhejtsïkuticha engaksï kurhangutspijka ka andisï jukaparhakue eskaksï ísï úaka?

¹⁶ Orhejtsïkuticha engaksï kurhangutspijka, úrasïndiksï tiempu para erachichani jarhuataani. Kurhamarhiasïndiksï ambe ma ka jingontkuksï kurhajchaasïndi ka tekantskua jingoni. I ambe kánikua jukaparhakuesti para ísï úni, sánderia enga erachi o pirenchi ma enga Jeoba xénchajka uéjka aiangukuarhiani ambe ma orhejtsïkutichani, peru no jánhaskani néna aianguani (Prov. 20:5). Engaksï erachicha listu jarhajka para úrani tiempu para erachichani jarhuataani, niárasïndiksï mintsinharperani, sési pájperani ka uékperani (Uku. 20:37).

17. Uánikua erachichaksï ¿ambe sánderu jukaparharasïni orhejtsïkuticheri? Jatsiku je ejemplu ma.

 ¹⁷ Uánikua erachichaksï uandasïndi eska ambe engaksï sánderu jukaparharajka orhejtsïkuticheri, jindeska na engaksï xáni pendienti pájka ambe engaksï pʼikuarherajka máteruecha. ¿Andi? Adelaide uandasïndi: “Sánderuri no úkua jukachasïnga imecha jingoni uandontskuarheni, jimbokari mítisïnga eskaksïni kurhanguchiaka”. Ístu uandasïndi: “Na engaksïni kámajka, kuentari íntskukuarhisïnga eskaksïni kurhanguchisïnga engari aianguajka ambe ma”. Ka erachi ma miántasïndi jeiapanhintaparini: “Engani orhejtsïkutini ma problema ma aianguni japka, exespka eska uenhenchaspka. No méni mirikurhiaka imani ambe” (Rom. 12:15).

18. ¿Nénachi úa xarhatani eskachi kurhangukuasïnga máteruechani?

¹⁸ Ísïsti, iáminduechachi úaka kurhangutspini, no solu orhejtsïkuticha. ¿Néna? Ju je jánguarhintani kurhangukuani ambe engaksï nitamakuarhini jaka juchari familiarhu anapuecha ka erachicha. Ju je jarhuataani tumbiichani, imechani engaksï pʼamenchani jaka, engaksï jatirikia ka imechani engaksï uarhiranchaka nemani. Ju je kurhamarhiani nénaksï jámaxaki ka jingontku kurhajchaani ambe engajtsïni aianguaka. Ju je xarhatakuani eskachi meru kurhangukuasïnga ambe engaksï nitamakuarhini jaka. Ka aiakukuarhinchi para jarhuataani na engachi xáni úaka. Engachi ini ambe újka, ambakiti uékperakuachi xarhatasïnga (1 Juanu 3:18).

19. ¿Andichisï jatsi para kurhangukuani engachi uékaaka jarhuataani máteruechani?

¹⁹ Engachi jarhuataani jauaka máteruechani, ju je jánguarhintani kurhangukuani, jimbokaksï no iáminduecha májkueni ambe pʼikuarherasïnga engaksï uandanhiatechani jatsiajka. Maruksï no úkua jukanchasïndi uandantani uandanhiatecheri ambe, peru máruksï kʼuratsesïndi. Ísï jimbo, nájkirukachi uékaaka jarhuataani, nochi imani ambe kurhamarhiauaka enga no sési pʼikuastauaka (1 Tes. 4:11). Jamberichi no májkueni eratsiaka eska ima engajtsïni aiangukuarhijka na enga pʼikuarherani jaka. Peruchi jatsiska para kurhanguni eska ísïska ambe enga ima pʼikuarherani jaka. Ísï jimbo, jatsiskachi para jingontku kurhajchaani ka jurajkuni eskaksï uandaaka (Mat. 7:1; Sant. 1:19).

20. ¿Ambechi exea máteru artikulurhu?

²⁰ Aparti dechi kúnguarhikuarhu anapuechani kurhangukuani, ístuchi jatsiska para ísï úni aianhpikuarhu. ¿Nénachi úa xarhatani ini ambe aianhpikuarhu ka engachi jarhuataajka máteruechani Jesusiri chúxapatini? Ini ambechi exeaka máteru artikulurhu.