1, 2. a) ¿Andisï ambakiti ambe para kʼuiripuecha enga Armajedoni úkuarhiaka? b) ¿Náki kurhamarhikuechanchi exeaua?

UÁNIKUA kʼuiripu ísï exesïndi eska Armajedoni no sési ambeska, komu kʼérati guerrecha o enga ma parhakpinirhu no sési ambe úkuarhiaka. Peru Biblia uandasïndi eska Armajedoni ambakiti ambe arhikuekasïnga engajtsïni sési pʼikuastajka (Jaŋ. 1:3). Enga Armajedoni úkuarhiaka no jindeuati para iámindu kʼuiripuni kʼamajkuni, sánderu sési, pʼímutantauati. ¿Néna uá ísï úni?

² Biblia uandasïndi eska jiáni enga Armajedoni úkuarhiaka, Tata Diosï kʼamajkuauaka parhakpini anapu juramutichani, no sési úrichani ka eska pʼímutantauaka imechani engaksï jurhimbitku jámajka ka no jurajkuati eska echeri ambendurhikuarheaka (Jaŋ. 11:18). Parachi sánderu sési kurhanguni ini ambe, ju je exeani tʼámu kurhamarhikuechani: ¿Ambe arhikuekasïni Armajedoni? ¿Ambe orheta úkuarhia saani sáni antesi de Armajedoni? ¿Ambechi jatsiski para úni parachi tsípiti pakarani? ¿Ka nénachi uá seguirini kurhajchani Jeobani enga jamberi ísï úkuarhiaka?

3. a) ¿Ambe arhikuekasïni Armajedoni? b) Eska na arhijka Jaŋaskuecha 16:14, 16, ¿andichisï uandajki eska Armajedoni no lugari máeska?

³ (Arhinta je Jaŋaskuecha 16:14, 16). Armajedoni, uandakua máesti enga ma xanharijku karakata jaka Bibliarhu ka ebreu jimbo jarhasti enga arhikuekajka “Juáta Meguido” (Jaŋ. 16:16). Meguido ireta máespti enga imani lugari jimbo japka nani engaksï israelitecha irekani japka (Jos. 17:11). Peru Armajedoni no meru lugari máesti. Sánderu sési, arhikuekasïndi engaksï iámindu parhakpini anapu reicha tánguarhintaaka paraksï uarhipini Tata Diosï jingoni (Jaŋ. 16:14). Joperu ini artikulu jimbochi ístu úraaka uandakua Armajedoni parachi guerrani arhikuekani enga jirejiresï uénakuarhiaka engaksï na tánguarhintaakia iámindu parhakpini anapu reicha. ¿Andichisï uandajki eska Armajedoni no lugari máeska? Orheta, jimboka juáta Meguido no nani  jarhaska. Tsimani úni jámani, jimboka no kánikua ambandeska nani enga ireta Meguido jaka, nóksï jatanhepirindi iámindu parhakpini anapu reicha, imecheri ejersitu ka ni uarhipetarakua ambe. Tanimu úni jámani, jimboka eskachi na exeaka ini artikulu jimbo, Armajedoni jiáni uénakuarhiati engaksï parhakpini anapu reicha uénaaka no sési kaani Tata Diosïri marhuarichani engaksï iápurisï irekani jaka echerirhu.

4. ¿Jeoba andisï Meguido jingoni terukutantapi imeri últimu kʼéri guerrani?

⁴ ¿Jeoba andisï Meguido jingoni terukutantapi imeri últimu kʼéri guerrani? Jimboka Meguido ka baie de Jesreeli enga jima no iauani japka, uánikua xanhariksï úkuarhispka guerrecha. Ménisï, Jeoba jarhuataspti imeri iretani uarhipeni. Por ejemplu, jimesïsï enga Meguido anapu itsï japka, Jeoba jarhuataspti Barakini enga juesipka Israeli para Sísaraeri ejersituni kʼamajkuni engaksï Kanaani anapuepka. Baraki ka Debora enga profeta máepka, jaiapanhikuntasptiksï Jeobani enga jarhuataapka andaani. Piresptiksï: “Jóskuechaksï auandarhu uératini [...] Sísara jingonksï uarhipesti [...]. Sisóni anapu iorhekua kʼamajkuasti” (Juec. 5:19-21).

5. ¿Andisï no májkueniua Armajedoni ka eska jiáni enga Baraki uarhipepka?

⁵ Baraki ka Debora arinksï uandakuecha jingoni kʼamaraspti pireni: “Eskaksï ísï niáraaka uarhini iámindu imecha engaksïni ikiachijka, oh Jeoba, peru eskaksï imecha engaksïni xénchajka niáraaka ísïni komueska jurhiata enga xáni uinhapikua jingoni andarajka” (Juec. 5:31). Jiáni enga Armajedoni úkuarhiaka, ístuksï uarhiati imecha engaksï ikiakujka Jeobani ka imecha engaksï xénchajka, pʼímutantskateuatiksï. Peru jarhasti ambe ma enga jiáni úkuarhipka enga Baraki uarhipepka ka enga Armajedonirhu no úkuarhiaka. Armajedoni jimbo, Tata Diosïri marhuarichaksï no uarhipeati. Níksï sikiera paa uarhipetarakua ambe. No ma ambe úni ka mintsikani Jeobani ka imeri ánjelichani, uáti eskaksï uinhapikua jatsiaka (Is. 30:15; Jaŋ. 19:11-15).

6. ¿Ambe uá úrani Jeoba para kʼamajkuani imeri ikiatspitichani jiáni enga Armajedoni úkuarhiaka?

⁶ ¿Néna kʼamajkuaua Jeoba imeri ikiatspitichani Armajedoni jimbo? Uáti mámaru ambe úni. Por ejemplu, jamberi uáti eska jencheaka, xanuani ka piritani (Job 38:22, 23; Ezeq. 38:19-22). Jamberi ístu uáti eskaksï imeri ikiatspiticha mismu uarhiperaaka (2 Crón. 20:17, 22, 23). Ka ístu jamberi úrauati imeri ánjelichani para kʼamajkuani no sési úrichani (Is. 37:36). No arhiparini ambe uéjki úni, andaati. Iámindu imeri ikiatspitichani kʼamajkuauati, peru iámindu imecha engaksï jurhimbitku jámajka tsípitiksï pakaraati (Prov. 3:25, 26).

7, 8. a) Eska na arhijka 1 Tesalonika 5:1-6, ¿ambeksï aianhpia parhakpini anapu juramuticha? b) ¿Andisï kʼéri chkuanderakua máeua?

⁷ Antesi de Jeobaeri jurhiatikua uénakuarhini uandanhaati “pínandisti ka sésichi irekaxaka” (arhinta je 1 Tesalonika 5:1-6). Ixú 1 Tesalonika 5:2, uandasïndi Jeobaeri jurhiatikua para kʼéri mískuarhitani arhikuekani (Jaŋ. 7:14, TNM). ¿Nénachi uá míteni na enga jatini uénaaka kʼéri mískuarhita? Biblia arhisïndi eska uandanhaaka ambe ma engachi jimbo uáka míteni.

⁸ Parhakpini anapu juramutichaksï uandaati “pínandisti ka sésichi irekaxaka”. ¿Andiksïsï ísï uadaa? ¿Inchaparakuaksï relijioniri orhejtsïkuticha? Jamberi jo. Peru enga inde ambe uandanhaaka jindeuati máteru demoniuecheri chkuanderakua. Ka í, kʼéri chkuanderakua máeuati jimboka uáka eska kʼuiripu eratsiaka eskaksï sési irekaxakaia, meru jiáni enga uénakuarhiaka sánderu kʼéri mískuarhita enga no méni úkuarhini japka. ¿Ka ambe úkuarhia Tata Diosïri ambakiti marhuaricha  jingoni? Jimbokaksï no míteska káni meru uénakuarhia kʼéri mískuarhita, jamberiksï ísku pakaraati enga uénaaka inde ambe úkuarhini, peruksï listu jauati.

9. ¿Ambe tsimani ambe uá Jeoba para Noambakitiri parhakpinini kʼamajkuni?

⁹ Jeoba no ma jimbojku kʼamajkuati Noambakitiri parhakpinini, ísï eska na úpka Noeri jurhiatikuecha jimbo. Orheta, Kʼéri Babiloniani kʼamajkuati, engaksï interu parhakpini anapu no jurhimbiti relijionicheka. Tátsekua enga uénaakia Armajedoni, kʼamajkuati iámindu Noambakitiri parhakpinini enga pakarani jauaka, komu politika ambe, kʼuiripuechani engaksï guerrarhu nirajka ka kʼérati negosiuechani. Ju je sánderu exeni ini tsimani amberi enga úkuarhiaka.

10. Eska na arhijka Jaŋaskuecha 17:1, 6, ka 18:24, ¿Jeoba andisï kʼamajkua Kʼéri Babiloniani?

¹⁰ “Na enga kastigarinhaaka ima uarhiiti enga jindeka ma kʼéri ísku jándi” (arhinta je Jaŋaskuecha 17:1, 6; 18:24). Kʼéri Babilonia kánikua no sési pakatastia Tata Diosïri nombrini. Chkuanderakua ambe jorhentpisti Jeobaeri ambe ka ísï jámasïndi komueska uarhiiti ísku jándi ma, jimboka jarhuataasïnga parhakpini anapu juramutichani ka no kurhajchasïndi Jeobani. Relijioni no jurhimbiti úrasti imeri juramukuani para tumina euakuarhiani kʼuiripuechani. Ka uáni kʼuiripuni uandikusti, ístu Tata Diosïri marhuarichani (Jaŋ. 19:2). ¿Néna kʼamajkua Jeoba Kʼéri Babiloniani?

11. ¿Ambe arhikuekasïni ‘animali charhapiti’ ka néna úraa Jeoba para Kʼéri Babiloniani kʼamajkuni?

¹¹ Jeoba “diesi sïuanguechani” úrauati ‘animali charhapitiri ma’ para kʼéri ísku jándini kʼamajkuni. I animali, grupuni ma arhikuekasïndi engaksï uánikua paisicha kúnguarhitini jaka (Organización de las Naciones Unidas) ka diesi sïuanguechaksï juramutichani arhikuekaasïndi engaksï iásï apoiarini jaka Kʼéri Babiloniani. Na enga jatini Tata Diosï uandaaka, i juramutichaksï no sési úkuati imani ísku jándini enga Babiloniani arhikuekajka. “Nóteruksï presia uátia, ka patsïki jásï jurajkuatiksï” euakuarhiparini iámindu ambe enga jatsikuarhipka ka uandantaatiksï ambe enga xáni no sési úka (Jaŋ. 17:3, 16). Na enga sóntku kʼamajkunhaaka,  komu ma jurhiatekua jimbojku, xáni arhatatini pakatauati imechani engaksï apoiariuenga, sánderu jimboka ima méntkisï kʼéramakuarhiska uandaparini: “Ji uaxakatixaka kʼéri uaxantsïkuarhu komueska ma kʼéri juramuti, ka no jandiajkueskani, ka no méni niáraaka no sési pʼikuarherakua jatsini” (Jaŋ. 18:7, 8).

12. ¿Tata Diosï ambe no jurajkua eskaksï uáka kʼuiripuecha ka andi?

¹² Tata Diosï no jurajkuati eskaksï kʼuiripuecha kʼamajkuauaka imeri marhuarichani, jimbokaksï imecha tsípikua jingoni aianhpisïnga imeri nombrini ka kurhajchasptiksï Tata Diosïni enga juramukuapka paraksï Kʼéri Babilonia uéntani (Uku. 15:16, 17; Jaŋ. 18:4). Ístuksï jánguarhintasti jarhuataani máteruechani paraksï májkueni úni. Ísï jimbo, nóksï ‘kastigarhinhaati’ ísï eska Kʼéri Babilonia.

13. a) ¿Ne jindeski Gog? b) Seguni Ezequiel 38:2, 8, 9, ¿néna jimbo niáraa Gog Armajedonirhu?

¹³ Enga Gog uénaaka no sési kámani Tata Diosïri iretani (arhinta je Ezequiel 38:2, 8, 9). Engaksï relijioni no jurhimbiticha na iámu kʼamajkunhaakia, Tata Diosïri ireta ísï jandiajku pakaraati komueska anhatapu ma enga na nitamajkia kʼéri janikua ma. Peru Noambakiti kánikua ikiani jauati. Ísï jimbo, imani ambe úraati enga demoniuecherika —“noambakitiri espirituecha engaksï uájka milagruechani”— paraksï úni eska grupu ma nasionicheri engaksï kúnguarhintaaka, no sési kámaaka Jeobaeri iretani (Jaŋ. 16:13, 14). I iretecha engaksï kúnguarhintaaka, arhinhasïndi ‘Gog enga Magog anapu echerirhu anapueka’. Engaksï kʼuiripuecha uénaakia no sési kámani Tata Diosïri iretani, niáraatiksïa jima enga arhinhajka Armajedoni (Jaŋ. 16:16).

14. ¿Amberi kuenta íntskukuarhia Gog?

¹⁴ Gog kʼuiripuechani mintsinharhiauati engaksï jindeka ejersiturhu anapuecha (2 Crón. 32:8). Peruchi jucha Tata Diosï Jeobani mintsinharhiaka. Kʼuiripuechaksï ini ambe ísï exeati eska no marhuauaka, jimboka Kʼéri Babiloniani, enga uinhapikua jatsipka, imeri diosïchaksï no jarhuataspka enga ‘animali’ ka “diesi sïuanguecha” no sési kámapka (Jaŋ. 17:16). Gog eratsiati eska fásiliuaka andani. Ísï uékaati no sési úkuni Jeobaeri iretani komueska  nubecha engaksï paisini ma ónharhikujka (Ezeq. 38:16). Peru sóntku kuenta íntskukuarhiati eska trampa máeska. Ísï eska faraoni na úkuarhinchapka mari Charhapitirhu, kuenta íntskukuarhiati eska Jeobani jingonisï uarhipeni jaka (Éx. 14:1-4; Ezeq. 38:3, 4, 18, 21-23).

15. ¿Ambe uá Jesusi jiáni enga Armajedoni úkuarhiaka?

¹⁵ Kristu ka imeri ánjelichaksï kuájpiauati Tata Diosïri marhuarichani ka kʼamajkuauatiksï iámindu imechani engaksï xáni Gog jingoni jaka (Jaŋ. 19:11, 14, 15). ¿Ka ambe úkuarhia Jeobaeri sánderu kʼéri ikiatspiti jingoni enga jindeka Noambakiti enga chkuanderakua ambe jingoni úka eskaksï kʼuiripuecha Armajedonirhu jamberi niárapiringa? Jesusi kʼuaninhaati Noambakitini ka demoniuechani kʼéri posurhu ma enga kánikua jauanhika, nani engaksï mili uéxurhini ónhakata jauaka (Jaŋ. 20:1-3).

16. a) ¿Ambechi jatsiski para úni parachi xarhatani eskachi míteska Tata Diosïni? b) ¿Ambeksï úkuarhinchaa imecha engaksï míteka Jeobani jiáni enga Armajedoni úkuarhiaka?

¹⁶ Nájkirukachi ióni páni jakaia marhuakuni Jeobani o nótki xáni, parachi no uarhini jiáni enga Armajedoni úkuarhiaka, jatsiskachi para xarhatani eskachi míteska Jeobani ka eskachi janhanharhisïnga “juchari tata Jesukristueri ambakiti eianhperakuani” (2 Tes. 1:7-9). Mítesïngachi Tata Diosïni engachi mítejka ambe jaiapanhintasïni ka ambe nómbe ka nákiskiksï imeri juramukuecha. Ka xarhatasïngachi eskachi míteska engachi xénchajka, kurhajchani ka kʼéri ambe arhini (1 Juanu 2:3-5; 5:3). Enga nema xarhatajka eska míteska Tata Diosïni, kóntperata máesti eska Tata Diosïjtu míteska imani ka inde ambe uáti eska tsípiti pakaraaka jiáni enga Armajedoni úkuarhiaka (1 Kor. 8:3). ¿Andi? Jimboka enga arhijka eska Tata “Diosï míteska imani”, arhikuekasïnga eska Jeoba jeiapanhintasïnga.

17. ¿Ambe arhikuekasïni kurhajchani “juchari tata Jesukristueri ambakiti eianhperakuani”?

¹⁷ ‘Juchari tata Jesukristueri ambakiti eianhperakua’ iámindu jurhimbikua ambesti enga Jesusi jorhentpika ka enga Bibliarhu jaka. Ka kumplirisïngachi indeni ambe engachi ísï újka juchari irekuarhu. I ambe arhikuekasïndi eskachi  sánderu jukaparharaaka Jeobani marhuakuni, ísï úni eskaksï imeri juramukuecha na uandajka ka uandantani Tata Diosïri Reinueri ambe (Mat. 6:33; 24:14). Ístu arhikuekasïndi jarhuataani erakukatechani engaksï Kristueri ermanueka engaksï jamberi imecha úni jauaka imecheri ánchikuarhitani (Mat. 25:31-40).

18. ¿Nénaksï uá erakukatecha ambakiti ambe íntsantaani “máteru karichichani” engaksï jarhuataapka?

¹⁸ No ióni jimbo, Tata Diosïri erakukatechaksï ambakiti ambe íntsantauati “máteru karichichani” jimbokaksï jarhuataaska (Juanu 10:16). ¿Nénaksï uá indeni ambe? Antesi de uénakuarhini Armajedoni, iámindu imecha engaksï 144,000 erakukatecha jingoni kuenta úkuarhijka tsíntaatiksï komueska espirituecha engaksï no méni uarhiaka. Imani ánjelicha jingonksï jauati engaksï kʼamajkuauaka kʼuiripuechani engajtsïni uéjka no sési úchini ka kuájchakuauatiksï “uánikua kʼuiripuechani” engaksï ísïka komueska karichicha, kaxumbitinksï (Jaŋ. 2:26, 27; 7:9, 10). Kʼéri kóntperata máeuati para uánikua kʼuiripuecha engaksï jarhuataapka Jeobaeri erakukatechani jiáni engaksï Echerirhu japka.

19, 20. Nájkirukachi no sési ambe nitamakuarhijka, ¿ambejtsïni jarhuataa seguirini jarhani kurhajchani Jeobani enga jamberi Armajedoni úkuarhiaka?

¹⁹ Ini últimu jurhiatikuecha jimbo enga xáni úkua jukaka, uánikua Tata Diosïri marhuarichachi no sési ambe nitamakuarhisïnga. Peruchi uáka tekaantani ka tsípikua jingoni irekani (Sant. 1:2-4). Ambe ma engajtsïni jarhuataaka, jindesti méntkisï kómarhini (Luk. 21:36). Ístuchi jatsiska para Bibliani arhintani ka eratsintani ambe enga uandajka, por ejemplu profesiauecheri ambe engaksï ini jurhiatikuecheri ambe uandajka (Sal. 77:12). Engachi iámindu ini ambe úska, sánderuchi niuaka aianhpini, juchari jakajkukua sánderu uinhapiti jauati ka nóchi jurajkuaka mintsikani ambe enga úkuarhiaka sánderu orhepani.

²⁰ Ju je eratsini na engachi xáni sési pʼikuarheraaka enga Kʼéri Babilonia kʼamajkunhaaka ka nitamania Armajedoni. Ka sánderu jukaparhakua ambe, ju je eranhaskani na engachi xáni tsípini jauaka enga Tata Diosïri nombri pímbinhasïntaaka ka eska imajkusï uáka juramuni (Ezeq. 38:23). Ísïsti, jiáni enga Armajedoni úkuarhiaka, ambakiti ambeuati para imecha engaksï míteaka Jeobani, kurhajchaaka imeri Uájpani ka tekaantanksï asta kʼamarhukuarhu jamberi (Mat. 24:13).