1. Uanda je na enga pʼikuarherajka Jeoba kaxumbiticha jimbo.

JEOBA xénchaasïndi imechani engaksï kaxumbitiika. Solu imecha engaksï mintsita jingoni xarhatajka kaxumbikua, úsïndiksï imeri amigueni. Peru, no jiókuarhiasïndi “imechani engaksï teparakuarhijka” (1 Ped. 5:5). Iáminduechachi uékasïnga sési pʼikuastani Jeobani ka míteni na engajtsïni xáni xénchajka, ísï jimbo, jatsiskachi para jorhenguarhini kaxumbitiini.

2. ¿Náki kurhamarhikuechanchi mókuantaua?

² Ini artikulu jimbochi mókuantauaka tanimu kurhamarhikuechani. 1) ¿Ambeski kaxumbikua? 2) ¿Andichisï jatsi para kaxumbitiini? 3) ¿Ambe úpirini úni eskachi úkua jukanchapiringa kaxumbitiini? Eskachi na exeaka, kánikuachi sési pʼikuastasïnga Jeobani engachi kaxumbitijka ka marhuachisïndijtsïni (Prov. 27:11; Is. 48:17).

3. ¿Ambeski kaxumbikua?

³ Kaxumbikua méntku ménderuenisti eska kʼéramakuarhini ka sési xékuarhini. Biblia uandasïndi eska nema enga kaxumbitika jiókuarhisïnga eska Jeoba iauani sánderu kʼéri ambeska eska ima ka eska iámindu kʼuiripu sánderu sési úsïnga ambe ma ka eska ima (Filip. 2:3, 4).

4, 5. ¿Andichisï uandajki eska no solu uétarhisïnga ísï xarharani enajkichi kaxumbitii?

⁴ Máru kʼuiripuechaksï ísï xarharasïndi enajkiksï kaxumbitii. Jamberiksï no xáni uandarijti o astaksï janhanharpeni ka sési kámpeni jimbokaksï ísï jorhendanhaska desde sapichuetini, peru jiniksï mintsitarhu uératini kʼérakamakuarhini. Peru kʼóruksï niárasïndi xarharani na engaksï jásï kʼuiripueka (Luk. 6:45).

⁵ Ístu, kʼuiripuecha engaksï seguru jarhajka ambe engaksï  újka o engaksï mátirku arhijpijka ambe ma, no meru arhikuekasïndi eskaksï kʼéramakuarhisïnga (Juanu 1:46, 47). Nájkiruka ísïka, nóksï jatsisti para jukari mintsinharhikuarhini jimbokaksï jorhenaska sési úni ambe ma. No arhiparini na engachi jásï kʼuiripu máeka, iáminduechachi jatsiska para jánguarhintani mintsita jingoni kaxumbitiini.

6. Míteparini ambe enga arhijka 1 Korintu 15:10, ¿ambechi jorhenguarhisïni apostuli Pablueri ambe?

⁶ Ju je exeni apostuli Pablueri ejemplu. Jeoba imani úraspti para uápurisï uaxastaani kúnguarhikuechani. Jamberi no ma Jesusiri apostuli xáni uánikua ambe úpti aianhpikuarhu eska Pablu. Nájkiruka indeni ambe úpka, no ísï exespti eska sánderu kʼéri ambespka eska imeri ermanuecha, sánderu sési, kaxumbikua jingoni uandaspti: “Ji sánderu sapichitu ambeska ka eska iámindu apostulicha engani no jukanchaka arhinhani ma apostuli, jimbokani no sési kaasïrenga Diosïri tánguarhikuarhu anapuechani” (1 Kor. 15:9). Tátsekua, uandaspti eska Jeobaeri amiguespka peru no jimboka kʼéri ambepiringa o uánikua ambe úni, sino jimboka Tata Diosï ambakiti uékperakua xarhatakuspka (arhinta je 1 Korintu 15:10). Ísïsti, ambakiti ejemplu ma xarhataspti jiáni enga Korintu anapuechani karakuapka, nájkirukaksï máru imani kúnguarhikuarhu anapuecha arhinchenga (2 Kor. 10:10).

7. ¿Néna xarhataspi kaxumbikua erachi ma enga kánikua mítekatepka?

⁷ Uánikua Jeobaeri testiguechani sési pʼikuastantaaspti engaksï arhintapka erachi Karl Kleiniri eksperiensia, enga japka Grupurhu enga Orhejtsïkuajka iámindu kúnguarhikuechani. Ima, kaxumbikua jingoni uandantaspti eska ióni jamberi kánikua úkua jukanchaspka máru ambe jingoni. Ju je exeni máru ambe enga úkua jukanchapka. Uéxurhini 1920 ísï, uénaspti nirani aianhpini ka para ima xáni úkua jukaspti enga nóteru nípkia aianhpini tsimani uéxurhini. Tátsekua enga Beteli marhuani jápkia, no sési exespti enga erachi ma íntsaapka  máru konsejuechani. Ístu, pʼamenchaspti, kánikua kómu pʼikuarherasïrendi, peru niáraspti sési pʼikuarherantani. Joperu ístu uánikua kóntperatechani intsïnhaaspti. ¿A no eska i erachi enga xáni mítikatepka jatsispka para kánikua kaxumbitiini para úni uandantani na enga úkua jukanchapka máru ambe jingoni? Uánikua erachichaksï tsípikua jingoni miásïndi erachi Kleinini ka imeri ambakiti eksperiensiani enga xáni jurhimbitku uandantapka. *

8. ¿Nénajtsïni jarhuatasïni 1 Pedru 5:6 kurhanguni eska kaxumbiti ma sési pʼikuastasïnga Jeobani?

⁸ Ambe engachi jimbo jatsika para kaxumbitiini, jindesti eskachi sési pʼikuastasïnga Jeobani, ísï eska na uandapka apostuli Pedru (arhinta je 1 Pedru 5:6). Ambe enga Pedru uandapka, libru “Ven, sé mi seguidor” arhisïndi eska kʼéramakuarhini kánikua no sési útspisïnga. Asta ima kʼuiripu enga sési jorhenaka úni ambe ma joperu kʼéramakuarhini, para no ma ambe marhuakusïndi Jeobani. Peru ima kʼuiripu enga kaxumbitiika, kánikua sési marhuakusïndi Jeobani. Ístu libru arhisïndi eskajtsïni Tata Diosï tsípikua jingoni kóndintaaka engachi kaxumbitiuaka. * ¿A no eskachi iáminduecha exesïnga eska no jarhaska sánderu ambakiti ambe ka eska Jeobaeri mintsitani sési pʼikuastani? (Prov. 23:15).

9. ¿Andiksïsï kʼuiripuecha sési pʼikuarherajki kaxumbiticha jingoni jarhani?

⁹ Kaxumbitiini, sésichi pʼikuastasïnga Jeobani, ka ístujtsïni juchantsïni mismu marhuachisïndi. Úsïndi eskaksï máteruecha uékaaka juchantsïni jingoni jarhani. Parachi úni kurhanguni andichisï ísï uandajki, ju je eratsini na jásï kʼuiripuecha jingonchi uékasïni jarhani (Mat. 7:12). ¿No ísïski eskachi no sési pʼikuarherasïnga imecha jingoni jarhani engaksï uéjka eska méntkisï ima ambe úkuarhiaka ambe engaksï imecha uandajka ka nóksï jiókuarhini ambe engaksï máteruecha uandaaka? Peru, sésichi pʼikuarherasïnga imecha jingoni jarhani engaksï kurhangutspijka, xénchpijka, pʼamojpijka ka kaxumbitinksï (1 Ped. 3:8). Engachi jucha ísï pʼikuarherajka, máteruechajtuksï májkueni sési pʼikuarheraati juchantsïni jingoni jarhani engachi kaxumbitiska.

10. ¿Nénajtsïni jarhuatasïni kaxumbikua orhepani uérakuani uandanhiatechani?

¹⁰ Ístu kaxumbitiini, jarhuataatijtsïni orhepani uérakuani uandanhiatechani. Ménisïchi nitamakuarhiaka o exeni máru ambe enga no jurhimbikua jingoni úkuarhiaka. Rei Salomoni enga jánhaskatipka, uandaspti: “Exeaska jántspirichani kabaiu jatarini, peru prinsipechani  xanharakuarhiparinksï jámani jarhani komueska jántspiricha” (Ecl. 10:7). Nóksï méntkisï kʼéri ambe exenhasïndi imecha engaksï jorhenaka úni ambe ma ka ménisïksï sánderu kʼéri ambe exenhasïndi imecha engaksï no káni jorhenaka úni ambe. Peru Salomoni kurhanguspti eska sánderu sésiska jiókuarhini ambe engachi nitamakuarhini jarhajka ka no méntku imani ambe miáni jarhani engajtsïni no sési pʼikuastajka (Ecl. 6:9). Engachi kaxumbitiska, sánderuchi no úkua jukanchaaka jiókuarhini ambe engachi nitamakuarhini jauaka nájkirukachi no imani ambe uékapiringa.

11. ¿Andichisï jatsi para kaxumbitini engajtsïni nema konseju ma íntskuska?

¹¹ Pauani pauanchi mámaru ambe jimbo úsïnga xarhatani kaxumbikua. Ju je exeni néna. Engajtsïni nema konseju íntskujka. Jatsiskachi para miáni eska enga nema tiempu arhutajka parajtsïni jurhimberantani, jamberi jindeti jimboka no sapichitu ambeska ima ambe engachi úka. Engachi indeni ambe nitamakuarhijka, jamberichi uénani jámani úkua jukanchaaka jiókuarhini konsejuni. Jamberichi no sési exeaka imani engajtsïni jurhimberantaka o na engajtsïni íntskuka konseju. Peru engachi kaxumbitiska, jánguarhintaakachi mójtakurhini.

12. Eska na arhijka Proverbios 27:5, 6, ¿andichisï jatsi para jukaparharani engajtsïni nema konseju ma íntskujka? Jatsiku je ejemplu ma.

¹² Ima enga kaxumbitiika, jukaparharaasïndi konsejuechani. Ju je úrani ejemplu ma. Eranhaska je eskachi uandontskuarhixaka máru erachicha jingoni Kʼumanchikua Reinuerirhu. Jiájkani, nemajtsïni támu pásïndi ka sïpatikuarkujtsïni aianguni eskachi sïnicharhu tʼirekua pakajtsitaska. ¿A no eskachi kʼuratsesïnga? Peruchi sési pʼikuarherasïnga engajtsïni aiangujka. Uékapiringachi eskajtsïni nema antesi aiangupiringa. Májkuenisti, jatsipiringachi para kaxumbikua jingoni diosmeiamukua arhini erachini ma enga balori jukapka parajtsïni konseju ma íntskuni jiáni engachi uétarhinchani japka. Ju je ísï exeni eska juchari amigu ma engajtsïni xénchajka, no komu nema engajtsïni ikiachijka (arhinta je Proverbios 27:5, 6; Gal. 4:16).

13. ¿Nénachi xarhatasïni kaxumbikua engaksï máteru erachicha intsïnhajka ánchikuarhita ma kúnguarhikuarhu?

¹³ Engaksï máteru erachicha ánchikuarhita ma intsïnhajka. Orhejtsïkuti ma enga Jason arhinhajka, uandantasïndi: “Engani mítejka eskaksï máteruecha ánchikuarhita ma intsïnhaska paraksï sánderu marhuakuni Jeobani, ménisï kurhamarhikuarhisïnga andijtsïnisï no jíndeni íntskupi”. ¿Ménisïchi niáraski ísï pʼikuarherani? No no sési jarhasti engachi jánguarhintani jaka sánderu marhuakuni Jeobani  (1 Tim. 3:1). Peru jatsiskachi para jingontku jámani imani ambe jingoni engachi eratsijka, jimboka engachi no ísï úska, uénaakachi kʼéramakuarhini juchari mintsitarhu. Por ejemplu, erachi ma úpirindi uénani eratsini eska ima sánderu sési úsïnga úni ánchikuarhita ma kúnguarhikuarhu. O pirenchi ma jamberi úpirindi eratsini eska imeri uámba sánderu sési jorhenaska úni ambe ma ka eska máteru erachi. Engachi mintsita jingoni kaxumbitiska, nóchi jámaaka indeni ambe eratsini.

14. ¿Ambechi jorhenguarhisïni ambe enga úpka Moisesi engaksï máteruecha ánchikuarhita intsïnhapka?

¹⁴ Ju je exeni ambe enga úpka Moisesi engaksï máteruecha intsïnhapka ánchikuarhita ma ka ambe engachi uáka jorhenguarhini. Para ima kánikua jukaparhakua ambespti orhejtsïkuni ireta Israelini. ¿Peru ambe úspi enga Jeoba úpka eskaksï máteru israelitecha jarhuatapiringa imeri ánchikuarhita jingoni? No no sési pʼikuarheraspti (Núm. 11:24-29). Ístu, kaxumbikua xarhataspti enga jurajkupka eskaksï máteruecha jarhuatapiringa iretani jusgarini (Éx. 18:13-24). Engaksï sánderu uáni juesicha japkia, sánderuksï sóntku jarhuatasïrendi kʼuiripuni ka israelitechaksï no jatsisïrendi para xáni ióni erokuarhini. Moisesi sánderu jukaparharasïrendi eska ireta sési japiringa ka no eska ima kʼéri ambe exenhapiringa. ¿A no eska ambakiti ejemplu máeska para jucha? Ju je miáni eska parajtsïni Jeoba úni úrani, sánderu jukaparhakueska eskachi kaxumbitiuaka ka eska uánikua ambe jorhenani úni. Eska na arhijka 1 Pedru 5:5, Tata Diosï kóndiantaasïndi “imechani engaksï kaxumbitiika”.

15. ¿Néna mójtakurhiski irekua para uánikua erachicha ka pirenchicha?

¹⁵ Enga mójtakurhijka ambe ma juchari irekuarhu. Arini uéxurhinicha jimbo, uánikua erachicha engaksï ióni marhuakukia Jeobani, máteru ánchikuarhitaksï intsïnhastia. Por ejemplu, 2014 jimbo, Jeobaeri kúnguarhikua máteru ánchikuarhita íntsaaspti imechani engaksï distritueri orhejtsïkutipka ka témbechani.  Ka desde jiáni uératini, sirkuitueri orhejtsïkutichaksï jurajkusïndi indeni ánchikuarhitani engaksï 70 jatirijkia. Ístu, erachicha enga orhejtsïkuajka kúnguarhikuarhu anapu orhejtsïkutichani, jurajkusïndi indeni ánchikuarhitani enga 80 jatirijkia. Ka nótki xáni iónisïndi engaksï uánikua betelitecha pʼímarhinhaka paraksï prekursorini. Máteruksï nóteru ústia xáni marhuakuni Jeobani jimbokaksï pʼamenchaska, jatsiska para familiani kuidarini o máteru ambe jimbo.

16. ¿Nénaksï xarhataski kaxumbikua máru erachicha?

¹⁶ I erachichaksï úkua jukanchaspti máteru ánchikuarhita únia Jeobaeri kúnguarhikuarhu, jimbokaksï kánikua tsitisïrenga imani ánchikuarhitani engaksï uénga. Uánikuaksï ióni paxaptia imani ánchikuarhita jingoni. Máruksï kánikua kómu pʼikuarheraspti peruksï niáraspti pʼindeni. ¿Andi? Jimbokaksï xénchasïnga Jeobani, imanksïsï aiakukuarhipti ka no ánchikuarhitani ma Jeobaeri kúnguarhikuarhu (Kol. 3:23). Sésiksï pʼikuarherasïndi seguirini marhuakuni Jeobani kaxumbikua jingoni náki uéjki ánchikuarhita ma jingoni. I erachichaksï Tata Diosïni jurajkukuasïndi uandanhiatechani jimbokaksï míteska eska ima pendienti jarhasïnga imecha jimbo (1 Ped. 5:6, 7).

17. ¿Andichisï jukaparharajki engajtsïni Tata Diosïri Karakata arhijka eskachi jatsiska para kaxumbitiini?

¹⁷ Ísïsti, kánikuachi jukaparharasïnga engajtsïni Tata Diosïri Karakata arhijka eskachi jatsiska para kaxumbitiini. Kaxumbitiini, juchantsïni mismu marhuachisïndi ka ístu máteruechani. Úsïngachi orhepani uérakuani uandanhiatechani jimbokachi xarhatasïnga kaxumbikua, ka sánderu jukaparhakua ambe, ísïchi úsïnga andarhierani juchari Táti auandarhu anapuni. Xáni engachi sési pʼikuarherajka míteni eska Jeoba xénchaasïnga ka jukaparharaani imeri marhuarichani engaksï kaxumbitiika nájkiruka ima iótakuarhu jaka ka sánderu kʼéri ambeni (Is. 57:15).