SEMANA 38
“Ju jejtsïni andarhierani [...] ka jíksïni mintsikuastaaka”
“Ju jejtsïni andarhierani cha engajtsï xáni kuatarajka ka mískuarhintsï, ka jíksïni mintsikuastaaka” (MAT. 11:28).
PIREKUA 17 Uékasïnga
AMBE ENGACHI EXEAKA *
1. Eska na arhijka Mateu 11:28-30, ¿ambe aiatspespi Jesusi?
JESUSI ambakiti aiatsperakua ma úspti uánikua kʼuiripuni japarini engaksï kurhajchani japka. Uandaspti: “Ju jejtsïni andarhierani [...] ka jíksïni mintsikuastaaka” (arhinta je Mateu 11:28-30). No ískusï aiatspepti ambe enga uandapka. Por ejemplu, ju je miáni ambe enga úpka uarhiiti ma jimbo enga xáni uinhamu pʼamenchani japka.
2. ¿Jesusi néna jarhuataspi uarhiitini ma enga pʼamenchani japka?
2 Uarhiiti meru uétarhinchaxapti eskaksï jarhuatapiringa. Nájkiruka uánikua doktoricha jingoni nípkia, útasï no úsïrendi sési pʼikuarherani. Dose uéxurhini pʼamenchasptia. Ístu, Lei uandasïrendi eska kʼuiripu máespka enga no pímbinhasï japka (Lev. 15:25). Jimajkani, uarhiiti mítespti eska Jesusi tsinajpisïrenga, jimbosï nípti jirinhantani. Enga exentapkia, pʼárhikuspti imeri xukuparhakuani ka jirejiresï tsinakuarhispti. Peru Jesusi no solu tsinaspti uarhiitini, sino úspti eskaksï janhanharhipiringa. Por ejemplu, xénchperakua ka janhanharhikua jingoni arhispti “ija”. Ima uarhiiti kánikua sési pʼikuarherantapti (Luk. 8:43-48).
3. ¿Náki kurhamarhikuechanchi mókuantaua?
3 Ju je exeni eska uarhiitisï uénapka úni ambe ma ka niraspti Jesusini jirinhantani. Juchajtuchi májkueni jatsiska para úni. Jatsiskachi para jánguarhintani Jesusini andarhierani. Ini jurhiatikuecha jimbo, Jesusi no uásïndi milagruechani para tsinaani imechani engaksï uéjka jorhenguarhini imeri ambe. Perujtsïni seguirixati pʼímarhini: “Ju jejtsïni andarhierani [...] ka jíksïni mintsikuastaaka”. Ini artikulu jimbochi, iúmu kurhamarhikuechani mókuantauaka: ¿Nénachi úsïni andarhierani Jesusini? ¿Ambe arhikuekaspi Jesusi enga uandapka “úra je juchiti uananchatarakuani”? ¿Ambechi jorhenguarhisïni Jesusiri ambe? ¿Andijtsïnisï sési pʼikuastajki úni imani ánchikuarhitani engajtsïni ima íntskuka? Ka ¿nénachi uá seguirini sési pʼikuarherani imeri uananchatarakua jingoni?
“JU JEJTSÏNI ANDARHIERANI”
4, 5. ¿Nénachi uá andarhierani Jesusini?
4 Ma ambe engachi uáka úni para Jesusini andarhierani, jindesti jorhenguarhini na engachi xáni uáka imani ambe enga ima úpka ka uandani (Luk. 1:1-4). Ísï jimbo, jatsiskachi para arhintani imani ambe enga imeri ambe uandajka. No nema uáti úni indeni ambe juchantsïni jimbo. Ístuchi andarhierasïnga Jesusini engachi erakujka imeri chúxapatiini ka itsï atakuarhini.
5 Máteru ambe engachi uáka úni para andarhierani Jesusini, jindesti kurhakuani jarhuajperata orhejtsïkutichani jiáni engachi uétarhinchani jauaka. Imechaksï Jesusiri intsïmperakua máesti enga úraajka paraksï imeri karichichani kuidariuani (Efes. 4:7, 8, 11, TNM; Juanu 21:16; 1 Ped. 5:1-3). Peru nóchi jatsiska para erokuarhini eskaksï orhejtsïkuticha míteaka ambe engachi eratsini jaka ka exenksï ambe engachi uétarhinchajka, sino juchachisï jatsika para andarhieraani ka kurhakuani jarhuajperata. Ju je exeni ambe enga uandajka erachi ma enga Julian arhinhajka: “Pʼamenchakua jimbo nóteruni úspkia Beteli marhuani ka amigurini ma arhispti eskani kurhakuapiringa jarhuajperata orhejtsïkutichani. Uénani jámani ísï eratsisïrenga eskani no uétarhinchasïrenga, peruni últimu arhiaspka eskajtsïni jarhuatapiringa ka sánderu ambakiti intsïmperakua máesti engani intsïnhaka”. Ambakiti orhejtsïkuticha, komueska imecha tsimani engaksï Julianini pʼorhembipka, uátijtsïni jarhuatani míteni “Kristueri eratsikuani”, i ambe arhikuekasïndi kurhanguni ka májkueni eratsini ka jámani eska Jesusi (1 Kor. 2:16; 1 Ped. 2:21). Ísïsti, kʼéri intsïmperakua máesti engajtsïni orhejtsïkuticha íntskujka engajtsïni jarhuatajka.
“ÚRA JE JUCHITI UANANCHATARAKUANI”
6. ¿Ambe arhikuekaspi Jesusi enga uandapka: “Úra je juchiti uananchatarakuani”?
6 Engajtsïni Jesusi pʼímarhijka parachi úrani imeri uananchatarakuani, jamberi arhikuekapti eskachi jatsiska para kurhajchani. Ístu, arhikuekapti parachi imani jingoni páni uananchatarakuani ka májku kʼérichi ánchikuarhini para Jeoba. Ambe uéjki arhikuekani, jatsiskachi para ánchikuarhini.
7. Eska na uandajka Mateu 28:18-20, ¿náki ánchikuarhitachi intsïnhaski ka amberichi uá seguru jarhani?
7 Jiókuarhisïngachi ini ambe engachi aiakukuarhijka Jeobani ka itsï atakuarhini. Jesusi iámindu kʼuiripuechani pʼímarhiasïndi. Ima jiókuarhiasïndi iáminduechani engaksï uéjka mintsita jingoni marhuakuni Tata Diosïni (Juanu 6:37, 38). Iámindu kristianuechachi jatsiska kóntperata para imani ánchikuarhitani úni enga Jeoba Jesusini íntskuka. Uákachi seguru jarhani eskajtsïni Jesusi méntkisï jarhuataaka úni ini ánchikuarhitani (arhinta je Mateu 28:18-20).
“JORHENGUARHI JE NA ENGANI JI ÚJKA”
Ju je sési pʼikuastantaani máteruechani ísï eska Jesusi na úpka. (Exe je párrafu 8 a 11). *
8, 9. a) ¿Andiksïsï kaxumbiticha uékeni Jesusini andarhierani? b) ¿Ambechi jatsiski para kurhamarhikuarhini?
8 Kʼuiripuecha engaksï kaxumbitipka, tsitisïrendiksï Jesusini andarhierani (Mat. 19:13, 14; Luk. 7:37, 38). ¿Andi? Ju je eratsini na engaksï xáni ménderuenipka fariseuecha. Ima relijioniri orhejtsïkutichaksï no sáni uékpisïrendi ka kʼéramakuarhinksï (Mat. 12:9-14). Peru Jesusi uékpisïrendi ka kaxumbitiini. Farisuechaksï kánikua tsitisïrendi jatsikuarhikua ambe ka kʼéramakuarhini paraksï mítekateni, peru Jesusi jorhendaasïrendi imeri chúxapatichani paraksï no xáni tsitini jatsikuarhikua ambe, kaxumbitinksï ka paraksï jarhuataani máteruechani (Mat. 23:2, 6-11). Kʼuiripuechaksï kurhajchaasïrendi fariseuechani jimbokaksï chérhiasïrenga (Juanu 9:13, 22). Peru Jesusi sési pʼikuastantaasïrendi jimboka sési kaasïrenga ka sési jásï ambe arhiani.
9 ¿Jorhenguarhiskichia ini ambe Jesusiri? Ju je kurhamarhikuarhini: “¿Ísï mítenhaski komueska kʼuiripu ma engani no sóntku ikiajka ka kaxumbitiini? ¿Uékaa imani ánchikuarhita ambe úni enga no xáni kʼéri ambeka parani máteruechani jarhuataani? ¿Sési kaasïni kʼuiripuechani?”.
10. ¿Nénaksï pʼikuarherasïreni kʼuiripuecha Jesusi jingoni ánchikuarhini?
10 Jesusi úspti eskaksï imeri chúxapaticha pínandikua jatsipiringa ka sésiksï pʼikuarherani ka ima tsípikua jingoni jorhendaasïrendi (Luk. 10:1, 19-21). Úspti eskaksï imeri chúxapaticha kurhamarhipiringa ambe ka jingontku kurhajchaasïrendi ambe engaksï uandenga (Mat. 16:13-16). Ísï eskaksï plantecha na ójchakuranhajka para no ataani iauakua ka únksï fruta jukani, Jesusi májkueni úspti imeri chúxapaticha jingoni, imechaksï jorhenguarhispti ambe enga Jesusi arhistakuapka ka ambakiti ambeksï úspti.
Ju je úni eskajtsïni máteruecha uékaaka andarhierani ka sési uandajpaani
Ju je tsípikua jingoni aianhpini
Ju je kaxumbitiini ka ánchikuarhiriini *
11. ¿Ambechi jatsiski para kurhamarhikuarhini?
11 Engachi jatsika sésikua para juramukuani máteruechani, ju je kurhamarhikuarhini: “¿Néna kaasïni ánchikuarhitarhu o kʼumanchikuarhu anapuechani? ¿Úsïni eskaksï iáminduecha sési pʼikuarheraaka? ¿Úsïni eskajtsïni máteruecha kurhamarhiaka ambe ma? ¿Listu jarhasïni parani kurhajchaani ambe engaksï uandajka?”. Ju je no méni ísïni eskaksï fariseuecha, engaksï ikiauenga enga nema kurhamarhiapiringa ambe ma ka no sésiksï kaani imechani engaksï méntku máteru ambe uandenga eska imecha (Mar. 3:1-6; Juanu 9:29-34).
MINTSIKUASTANHAAKAJTSÏ
12-14. ¿Andichisï sési pʼikuarherajki engachi imani ánchikuarhitani újka engajtsïni Jesusi íntskuka?
12 ¿Andichisï mintsikuastanhajki o sési pʼikuarherani engachi imani ánchikuarhitani újka engajtsïni Jesusi íntskuka? Ju je exeni máru ambe engachi jimbo ísï pʼikuarherajka.
13 Sánderu ambakiti orhejtsïkutichanchi jatsiaska. Nájkiruka Jeoba jindeka sánderu kʼéri orhejtsïkuti, no no sési kámpisïndi ka jukaparharasïndi ánchikuarhitani engachi újka (Ebr. 6:10). Ka íntskusïndijtsïni uinhapikua parachi úni indeni ánchikuarhitani engajtsïni ima íntskuka (2 Kor. 4:7; Gal. 6:5). Juchari Rei Jesukristujtsïni xarhatachesti sánderu ambakiti ejemplu na engachi jatsika para kámpini (Juanu 13:15). Ka kúnguarhikuarhu anapu orhejtsïkuticha engajtsïni kuidarijka, jánguarhintasïndiksï májkueni úni eska Jesusi enga ‘kʼéri karichi erangutika’ (Ebr. 13:20; 1 Ped. 5:2). Jánguarhintasïndijtsïni uinhaperantani ka sési kámani ka balori jingontsïni jorhendani ka kuájchakuni.
14 Sánderu ambakiti kʼuiripuecha jingonchi ánchikuarhisïnga. No nema jatsisti ánchikuarhita ma enga xáni sési pʼikuastpijka niksï xáni sési pájperani máteruecha jingoni ísï eska jucha. Ju je eratsini arini ambe: kʼéri kóntperata máesti imani kʼuiripuecha jingoni ánchikuarhini engaksï májkueni kurhajchaajka Tata Diosïri juramukuechani eska jucha, peruksï no sánderu kʼéri pʼikuarherasïndi eskaksï máteruecha. Jorhenastiksï sési úni ambe ma, peruksï kaxumbitisti ka eratsisïndiksï eskaksï máteruecha sánderu kʼéri ambeska eska imecha. Nójtsïni solu ísï exesïndi komueska imecheri kompanieruecha, sino komueska amiguecha. Ka kánikuajtsïni xénchasïndi engaksï jamberi uéjka íntspini imecheri tsípikua juchantsïni jimbo.
15. ¿Nénachi jatsiski para exeni ini ánchikuarhitani engachi újka?
15 Sánderu ambakiti ánchikuarhitachi úsïnga. Jurhimbitku ambechi jorhendasïnga kʼuiripuni Jeobaeri ambe ka xarhatasïngachi eska Noambakiti chkuandera máeska (Juanu 8:44). Noambakiti no sési pʼikuastaasïndi kʼuiripuechani chkuanderakuecha jingoni enga újka eskaksï no jánhaskaaka ambe úni. Por ejemplu, uékasïndi eskachi jakajkuaka eskajtsïni Jeoba no puáchintasïnga engachi no sési ambe újka ka eskachi no jukanchaska parachi xénchanhani. I ambe kʼéri chkuanderakua máesti ka meru no sési pʼikuastpesïndi. Engachi andarhierajka Kristuni, Jeobajtsïni puáchintasïndi imani ambe engachi no sési niátaka ka kánikuajtsïni xénchasïndi (Rom. 8:32, 38, 39). ¡Xáni engachi sési pʼikuarherajka jimbokachi jorhendaasïnga máteruechani mintsikani Jeobani ka exeni na engaksï sánderu sési irekajkia!
JU JE SEGUIRINI SÉSI PʼIKUARHERANI NO JURAJKUPARINI JESUSIRI UANANCHATARAKUANI
16. ¿Andisï no májkuenii ánchikuarhita engajtsïni Jesusi pʼímarhijka para úni eska máteru jásï ánchikuarhita engachi újka?
16 Ánchikuarhita engajtsïni Jesusi pʼímarhijka para úni, no májkuenisti eska máteru jásï ánchikuarhita ambe engachi újka. Por ejemplu, engachi na kʼamarajkia ánchikuarhini ma jurhiatikua, no soluchi kuatarasïnga, ístuchi no konformi pakarasïnga. Peru marhuakuni Jeobani ka Jesusini, úsïndi eskachi kánikua sési pʼikuarheraaka. Jamberichi kuataratini jauaka engachi na ánchikuarhiakia ma jurhiatikua ka jatsinchi para jánguarhintani nirani tánguarhikuarhu. Peru, ¿a no eskachi kánikua sési pʼikuarheraparini nintasïnga kʼumanchikuarhu ka uinhapikua jingoni? Ka májkueni úkuarhisïndi engachi jánguarhintajka nirani aianhpini o jatsini máeri jorhenguarhikua. Kóntperata engachi intsïnhajka, úsïndi eskachi sési pʼikuarheraaka engachi jánguarhintajka úni ambe ma.
17. ¿Ambechi jatsiski para kurhanguni ka ambechi jatsiski para jingontku eratsintani?
17 Jatsiskachi para jiókuarhini ka kurhanguni eskachi niárasïnga kuatarani. Ísï jimbo, ju je eratsini nénachi úraxaki juchari uinhapikuani. Por ejemplu, uákachi ísku úrani jarhani parachi jánguarhintani sánderu jatsikuarhini ambe. Ju je exeni ambe enga arhipka Jesusi, tumbini ma enga jatsikuarhiripka enga kurhamarhipka ambe úpirini úni para jatsini tsípikua para méntkisï. Ima tumbi janhanharhisïrendi Leini ka seguru eska ambakiti kʼuiripu máespka, jimboka Markusʌri Ebanjeliu uandasïnga eska Jesusi xénchaspka. Ísï jimbo, arhispti: “Ni ka íntspikuarhi iámindu ambe engari jatsikuarhika [...] ka júrini chúxapuni”. I tumbi uékasïrendi chúxapani Jesusini, peru úkua jukanchaspti jurajkuni imani mámaru ambe enga jatsikuarhipka (Mar. 10:17-22). Indeni ambe jimbo, no jiókuarhispti uananchatarakuani enga Jesusi aiakupka ka seguirispti jántspirini ‘jatsikuarhikueri’ ambe (Mat. 6:24). ¿Ambechi úpirini jucha?
18. ¿Ambechi jatsiski para úni ménisï ka andi?
18 Sésisti eskachi ménisï eratsintaaka ambe engachi orheta peerani jaka juchari irekuarhu. ¿Andi? Jimbokachi ísï uáka seguru jarhani eskachi sési úraxaka juchari uinhapikuani. Ju je exeni ambe enga nitamanchapka tumbi ma enga Mark arhinhajka. Ima uandasïndi: “Iónisï ísï exespka eskani ariskuni sáni irekaxapka. Peru, nájkirukani prekursoripka, méntkisï tuminani eratsini jarhasïrenga ka néna úni parani sánderu sési irekani. Kurhamarhikuarhisïrenga andisïni niárapi xáni úkua jukanchani. Jiájkani kuenta íntskukuarhispka eskani juchiti ambe orheta péraxapka ka eskani xántkuni marhuakuxapka Jeobani na engani xáni tiempu pakatenga”. Mark mójtakuspti na enga eratsienga ka na enga irekani japka para úni sánderu marhuakuni Jeobani. Uandasïndi: “Ménisï uandanhiasïnga tumina jimbo. Peru Jeobaeri ka Jesusiri jarhuajperata jingoni, seguirixaka marhuakuni Jeobani”.
19. ¿Andisï xáni jukaparakue ísï úni juchari ánchikuarhitani eska Jeoba na uéjka?
19 Engachi tanimu ambe úska, seguirinchi jauaka sési pʼikuarherani no jurajkuparini Jesusiri uananchatarakuani. Orheta, na engachi jatsika para exeni ánchikuarhitani engachi újka. Jeobaeri ánchikuarhitachi úsïnga, ísï jimbo, jatsiskachi para ísï úni eskajtsïni ima na arhijka. Juchachi ánchikuarhiriska ka ima Patronisti (Luk. 17:10). Engachi ísï uékaaka úni imeri ánchikuarhitani eskachi jucha na uéjka, niáraakachi no sési úkuarhinchani. Asta toru uinhapiti ma, no sési úkuarhinchaati uananchatarakua jingoni ka kuataraati enga afuersa uékaaka jimesïsï nirani nani enga ísï ima uéjka ka no nani enga ísï imeri dueniu uéjka páni. Peru engachi ísï úska eskajtsïni Jeoba na arhistachijka, uákachi ambakiti ambe úni ka orhepani uérakuani ójkutakuechani. Ju je miáni eska no nema uáka ójkutani para no úkuarhini ambe enga ima uéjka úni (Rom. 8:31; 1 Juanu 4:4).
20. ¿Andichisï uéjki Jesusiri uananchatarakua jingoni ánchikuarhini?
20 Tsimani úni jámani, eratsini andichisï uéjki úni ambe ma. Ambe engachi uéjka, jindesti kʼéri ambe arhini juchari Táti Jeobani enga uékpitiika. Primeru sigluni, jarhasptiksï kʼuiripuecha engaksï úpka ambe ma solu paraksï sánderu jatsikuarhirini. Inde ambe jingoni, nóksï tsípikua jingoni irekaspti ka jurajkusptiksï Jesusiri uananchatarakuani (Juanu 6:25-27, 51, 60, 66; Filip. 3:18, 19). Peruksï ístu jarhaspti máteruecha engaksï uékperakua jimbo úpka ambe ma para Tata Diosï ka para máteruecha, no ma ambe erokuarhiparini. Íchaksï tsípikua jingoni úspti ánchikuarhitani engaksï jamberi irekaka ixú Echerirhu ka erokuarhispitksï para májku kʼéri marhuani Jesusi jingoni auandarhu. Juchajtuchi sési pʼikuarheraaka engachi úraska Jesusiri uananchatarakuani ambakiti eratsikua ma jingoni.
21. Eska na arhijka Mateu 6:31-33, ¿ambechi erokuarhisïni eska uáka Jeoba?
21 Tanimu úni jámani, imani ambe erokuarhini enga ísïka. Erakuskachi jurajkuni máru ambe ka kʼéri ánchikuarhita ma úni. Ka Jesusijtsïni aianguspti eskachi no sési kánhapiringa. Peru uákachi mintsikani eskajtsïni Jeoba íntskuaka uinhapikua parachi úni orhepani uérakuni náki uéjki uandanhiatani. Engachi sánderu tekaantaska, sánderuchi uinhapiti jauaka (Sant. 1:2-4). Ístuchi uáka erokuarhini eskajtsïni Jeoba íntskuaka ambe engachi uétarhinchajka, eskajtsïni Jesusi kuidariuaka ka eskajtsïni juchari erachicha uinhaperantaaka (arhinta je Mateu 6:31-33; Juanu 10:14; 1 Tes. 5:11). Jatsiskachi iámindu ambe engachi xáni uétarhinchajka para úni orhepani uérakuni náki uéjki uandanhiatani.
22. ¿Ambe jimbochi úsïni sési pʼikuarherani?
22 Ima uarhiiti enga Jesusi tsinapka, imani mismu jurhiatikua jimbo sési pʼikuarherantaspti. Peru solu enga no jurajkupiringa Jesusini ka chúxapani, úpirindi sési pʼikuarherantani para méntkisï. ¿Ambe úpi ima uarhiiti? Enga erakupka úrani Jesusiri uananchatarakuani, ambakiti kóntperata ma intsïnhati: Jesusi jingoni marhuani auandarhu. Kóntperata enga intsïnhaka, sánderu kʼéri ambesti eska ambe uéjki enga ima úka. Jiájkani, no arhiparini ambe engachi erokuarhini jaka —ia sea auandarhu irekani para méntkisï o Echerirhu—, úsïngachi sési pʼikuarherani jimbokachi jiókuarhiska arini Jesusiri pʼímarperakuani: “Ju jejtsïni andarhierani”.
PIREKUA 13 Kristu juchari ejempluesti
^ párr. 5 Jesusijtsïni pʼímarhisïndi parachi andarhierani imani. ¿Ambe uétarhisïni úni para jiókuarhini imeri pʼímarperakuani? Ini artikulu jimbochi mókuntaaka ini kurhamarhikuani ka ístujtsïni miátantaati na engajtsïni sési pʼikuastajka Jesusi jingoni ánchikuarhini.
^ párr. 60 AMBE ENGA XARHATAJKA IMAJENI: Jesusi mámaru ambe úspti para sési pʼikuastantaani kʼuiripuechani.
^ párr. 66 AMBE ENGA XARHATAJKA IMAJENI: Erachi ma jánguarhintaxati májkueni úni eska Jesusi, enga mámaru ambe úni jaka para sési pʼikustaani máteruechani.
