1. ¿Ambe nitamakuarhixapi apostuli Juanu uéxurhini nobentaisinkuni ísï?

UÉXURHINI nobentaisinkuni ísï, apostuli Juanu no sési nitamakuarhixapti. Jatirisptia, ónhakata jarhaspti islarhu enga Pátmosi arhinhenga ka jamberi últimu apostulipti enga útasï tsípiti japka (Jaŋ. 1:9). Ima mítespti eska imecha engaksï no tsitienga jurhimbikua ambe, chkuanderakuaxapkaksï kúnguarhikuarhu anapuechani ka paraksï no májku kʼéri jarhani. Ísï xarharasïrendi enajkiksï no ióni jimbo, nóteru japirinia Jesusiri chúxapaticha engaksï jurhimbitipiringa (Jud. 4; Jaŋ. 2:15, 20; 3:1, 17).

2. Eska na arhijka Jaŋaskuecha 7:9-14, ¿náki ambakiti jánhaskua exespi Juanu? (Exe je dibujuni enga uénakuarhu jaka).

² Nájkiruka Juanu ini ambe nitamakuarhini japka, Tata Diosï ambakiti ambe aianguspti jánhaskua ma jimbo enga sánderu orhepani úkuarhipiringa. Imani jánhaskua jimbo, máru ánjelichaksï arhinhasïndi eskaksï pʼínguaka tarhiatani para no no sési ambe úni parhakpinirhu astakaksï ma grupu Tata Diosïri jántspiricha minda jatsikunhaaka (Jaŋ. 7:1-3). Ini grupu jimbo, 144,000 erachi ka pirenchichaksï jarhasti engaksï Jesusi jingoni juramuaka auandarhu (Luk. 12:32; Jaŋ. 7:4). Peru Juanu exespti máteru kʼéri grupuni enga uandapka: “Tátsekua jimbo exeaspkani uánikua kʼuiripuechani enga no nema úpka jamberi kuentuani ka engaksï kʼéri uaxantsïkuarhu orhepani japka Karichi sapichuni japarini [...]. Ka jindesptiksï iámindu nasionicharhu ka iámindu tribuecharhu ka iretecharhu anapuecha ka engaksï táchani jásï idioma uandaenga” (arhinta je Jaŋaskuecha 7:9-14). Kánikua sési pʼikuarherapti míteni eskaksï sánderu orhepani japiringa uánikua kʼuiripuecha engaksï kómarhini japiringa Jeobani.

3. a) ¿Andisï uá eska juchari jakajkukua sánderu kʼéaka imani ambe jimbo enga Juanu exepka? b) ¿Ambechi exea ini artikulu jimbo?

³ Ambe enga Juanu exepka jánhaskua jimbo, úspti eska imeri jakajkukua sánderu kʼépiringa. Ka juchari jakajkukua jatsisti para  sánderu kʼéni jimboka ambe enga Juanu exepka, iásï kumplirikuarhixaka. Exexakachi na enga xáni uáni kʼuiripu andaparhakuerani jaka Jeobaeri iretarhu engaksï uáka tsípiti pakarani kʼéri miskuarhitarhu ka irekani para méntkisï Echerirhu. Jukari ochenta uéxurhinistia enga Jeoba aiangupka imeri iretani néspiksï ima uánikua kʼuiripuecha ka ini artikulu jimbochi exeaka néna úspi. Ístu, tsimani ambechi exeaka ini grupueri: 1) na enga xáni kʼéka ka 2) eskaksï i grupurhu anapuecha interu parhakpini anapueska. I tsimani ambe uáti eska sánderu kʼéaka imecheri jakajkukua engaksï ini ambakiti grupurhu jauaka.

4. ¿Ambeksï no kurhangusïni relijionicha engaksï no jurhimbitika, peru ambeksï jakajkusïreni Bibliaeri Jorhenguarhiticha?

⁴ Sáno méntkisï, relijioni no jurhimbitichaksï no jorhentpisïndi eska Biblia uandasïnga eskaksï ambakiti kʼuiripuecha irekaaka para méntkisï ixú Echerirhu (2 Kor. 4:3, 4). Ini jurhiatikuecha jimbo, sáno iámindu relijionicha engaksï uandajka eskaksï jakajkusïnga Jesusini, jorhentpisïndiksï eskaksï auandarhu nirasïnga iámindu ambakiti kʼuiripuecha engaksï uarhijka. Peru 1879 ísï, ma grupu engaksï Bibliani jorhenguarhienga máteru ambeksï jakajkusïrendia ka etsakusïrendiksï rebistani enga iásï arhinhajkia Aianhpiri. Kurhangusptiksï eska Tata Diosï, Echerini paraisu ma úntaaka ka eska uánikua ambakiti kʼuiripu irekaaka ixú Echerirhu, no jini auandarhu. Nájkiruka ísïka, ióndasptiksï sési kurhanguni népirinksï i ambakiti kʼuiripuecha (Mat. 6:10).

5. ¿Nénaksï kurhangusïreni Bibliaeri Jorhenguarhiticha 144,000 kʼuiripuecheri ambe?

⁵ Ístu, Bibliaeri Jorhenguarhitichaksï kurhanguspti eska Biblia uandasïnga eskaksï máru kʼuiripuecha parhakpinirhu piántskatepiringa paraksï Jesusi jingoni juramuni auandarhu (Jaŋ. 14:3). Indeni grupu jimboksï 144,000 erachicha japirindi engaksï ióni ka tsípikua jingoni sési marhuakupiringa Tata Diosïni ixú Echerirhu. Peru jiájkani, ¿néchaksï kuenta úkuarhipirini uánikua kʼuiripuecha jingoni?

6. ¿Nénaksï kurhangusïreni Bibliaeri Jorhenguarhiticha imani uánikua kʼuiripuecheri ambe?

⁶ Juanu exespti ini uánikua kʼuiripuni “engaksï kʼéri uaxantsïkuarhu orhepani japka Karichi sapichuni japarini” (Jaŋ. 7:9). Ini uandakuecha jimbo, Bibliaeri jorhenguarhitichaksï ísï kurhanguspti eskaksï ima uánikua kʼuiripuecha ístu auandarhu nipiringa irekani ísï eskaksï 144,000. Peru engaksï i tsimani grupuecha auandarhu nipiringa irekani, ¿néna no májkuenispi ma grupu máteru jingoni? Para Bibliaeri Jorhenguarhiticha, ima uánikua kʼuiripuechaksï kristianuespti engaksï no kʼamakʼamasï kurhajchapka Tata Diosïni jiáni engaksï Echerirhu japka. Nájkirukaksï uénga imani ambe enga Biblia uandajka, jamberiksï máru seguirini japti relijioni no jurhimbiticha jingoni jámani. Ambe engaksï Bibliaeri Jorhenguarhiticha niárapka kurhanguni, jindespti eskaksï ima kʼuiripuecha no niáraspka xáni xénchani Tata Diosïni paraksï úni Jesusi jingoni juramuni. Indeni ambe jimbo, kʼéri uaxantsïkuarhu orhepanksï japirindi jini auandarhu peruksï no uaxakapirindi kʼéri uaxantsïkuecharhu.

7. a) Seguni Bibliaeri Jorhenguarhiticha, ¿néchaksï irekapirini Echerirhu mili uéxurhini? b) ¿Ambeksï kurhangusïreni imani ióntki anapu ambakiti achamasïcheri ambe?

⁷ Jimajkani, ¿néchaksï irekapirini Echerirhu? Seguni Bibliaeri Jorhenguarhiticha, ísï tátsekua engaksï na 144,000 ka ístu uánikua kʼuiripuecha auandarhu nipiringuia, uáni kʼuiripu úpirindi irekani Echerirhu ka intsïnhaanksï kóntperatechani engaksï jauaka jiáni enga Jesusi uénaakia Juramuni Mili Uéxurhini. Jakajkusïrendiksï eskaksï inde kʼuiripuecha jiáni jorhendanhaapiringa Tata Diosïri juramukuechani imani mili uéxurhini jimbo, ka nótkiksï sési kurhangusïrendi eskaksï inde kʼuiripuecha marhuakupiringa Jeobani antesi de inde ambe uénakuarhini. Tátsekua, imecha engaksï kurhajchapiringa Tata Diosïni úpirindiksï irekani para méntkisï Echerirhu,  peru eskaksï no sési úricha kʼamajkunhapiringa. Ka imecha engaksï niárapiringa orhejtsïkutini imani mili uéxurhini jimbo, Bibliaeri Jorhenguarhitichaksï ísï kurhangusïrendi eskaksï máru i kʼuiripuecha intsïnhapiringa kóntperata paraksï auandarhu nirani irekani enga na nitamapiringuia mili uéxurhini. Máru i kʼuiripuechaksï jindepirindi ióntki anapu ambakiti achamasïcha engaksï tsíntaaka, imecha engaksï antesi uarhika eska Jesusi (Sal. 45:16).

8. Bibliaeri Jorhenguarhiticha, ¿náki tanimu grupuechanksï jakajkuasïreni eskaksï jarhaspka?

⁸ Ísï jimbo, Bibliaeri Jorhenguarhitichaksï jakajkusïrendi eskaksï tanimu grupuecha jarhaspka: 1) ima 144,000 engaksï Jesusi jingoni juramupiringa uandarhu; 2) uánikua kʼuiripuecha engaksï no kʼamakʼamasï kurhajchapka Tata Diosïni engaksï kʼéri uaxantsïkuarhu orhepani japiringa ka Karichi sapichuni japarini jini auandarhu ka 3) uánikua kʼuiripuecha engaksï jorhendanhaapiringa Tata Diosïri juramukuechani ixú Echerirhu imani Mili Uéxurhini jimbo enga Jesusi Juramuaka. * Peru tátsekua, Jeoba jarhuataaspti paraksï sési kurhanguni indeni ambe (Prov. 4:18).

9. a) ¿Nénaksï uá uánikua kʼuiripuecha kʼéri uaxantsïkuarhu orhepani jarhani ka Karichi sapichuni japarini nájkirukaksï Echerirhu jauaka? b) ¿Andisï sési jaki ambe engachi niáraka kurhanguni ambe enga uandajka Jaŋaskuecha 7:9?

⁹ Uéxurhini 1935, Jeobaeri testiguechaksï sési kurhangusptia néspiksï ima uánikua kʼuiripuecha enga Juanu exeapka. Niárasptiksï kurhanguni eska i grupu no uétarhinchasïrenga auandarhu nirani para úni kʼéri uaxantsïkuarhu orhepani jarhani ka Karichi sapichini japarini ka eskaksï i uandakuecha arhikuekasïnga ambe ma. Nájkirukaksï uánikua kʼuiripuecha Echerirhu irekani jauaka, orhepanksï jauati kʼéri uaxantsïkuarhu engaksï jiókuarhiska eska Jeoba jindeska juramuti iámindu amberi ka uékanksï kurhajchani (Is. 66:1). Ka Karichi sapichuni japarinksï jauati engaksï jakajkuska Jesusiri uarhikuani. Mateu 25:31, 32, sáno májkueni jásï ambe arhisïndi. Jima uandasïndi eskaksï “iámindu kʼuiripuecha”, asta no sési úricha, tánguarhintaaka Jesusini japarini ka imeri kʼéri uaxantsïkuarhu enga tʼíntskua jingonika. Úsïngachi kurhanguni eskaksï i iámindu kʼuiripuecha Echerirhu jarhaska ka no auandarhu. Jiájkani, ísïsti ambe enga 1935 jimbo niárapka kurhangunhani. Xarhatasptiksï andisï Biblia no arhijki eskaksï uánikua kʼuiripuecha auandarhu niuaka. Solu ma grupu uáti irekani para méntkisï jini auandarhu: 144,000 engaksï Jesusi jingoni juramuaka ma parhakpini (Jaŋ. 5:10).

10. Ima kʼuiripuecha engaksï uánikuecha jingoni kuenta úkurhiaka, ¿andiksïsï jatsi para míteani Jeobaeri juramukuechani antesi de uénakuarhini Mili Uéxurhini?

¹⁰ Desde 1935 uératini, Jeobaeri testiguechachi jakajkusïnga eskaksï ima uánikua kʼuiripuecha enga Juanu jánhaskua jimbo exeapka, jindeskaksï ima ambakiti kristianuecha engaksï irekaaka para méntkisï ixú Echerirhu. Paraksï úni tsípiti pakarani enga kʼéri miskuarhita úkuarhiaka ka ‘sïpakorhenksï enga xáni ambe úkorheaka’, íksï kristianuecha jatsisti para míteani Jeobaeri juramukuechani ka xarhatani eskaksï kʼéri jakajkukua ma jatsiska antesi de Jesusi uénani Juramuni Mili Uéxurhini (Luk. 21:34-36, Táta Diósïri Uandakua Tata Jesukristueri Aiatsperakua).

11. ¿Andiksïsï Bibliaeri Jorhenguarhiticha jakajkueni eskaksï japiringa ambakiti achamasïcha engaksï auandarhu nipiringa enga na kʼamakurhipiringuia Mili Uéxurhini?

¹¹ Eskachi na exeka párrafu 7 jimbo, máru Bibliaeri Jorhenguarhitichaksï jakajkusïrendi eskaksï japiringa ambakiti achamasïcha engaksï auandarhu nipiringa enga kʼamakurhipiringuia Mili Uéxurhini. ¿Andiksïsï ísï jakajkueni? Jamberiksï ísï jakajkuendi imani ambe jimbo  enga rebistarhu La Atalaya del 15 de febreru de 1913 jimbo uérapka. Enga arhienga: engaksï auandarhu niuaka kristianuecha engaksï no kʼamakʼamasï kurhajchaka Tata Diosïni, ¿andiksïsï ióntki anapu ambakiti achamasïcha solu intsïnhaa kóntperata paraksï Echerirhu irekani? Buenu, niárasptiksï ísï uandani arini tsimani ambe jimbo enga no sési japka: 1) eskaksï ima uánikua kʼuiripuecha auandarhu irekapiringa ka 2) eskaksï i uánikua kʼuiripuecha, imechepiringa engaksï no kʼamakʼamasï kurhajchapiringa Tata Diosïni.

12, 13. ¿Ambeksï kurhangusïni erakukatecha ka ístu uánikua kʼuiripuecha imecheri kóntperata jimbo?

¹² Peru eskachi na exekia, Jeobaeri testiguechachi desde 1935 sési kurhanguskia eskaksï ima uánikua kʼuiripuecha enga Juanu exeapka, jindeskaksï engaksï tsípiti pakaraaka Armajedonirhu. Orhepanksï uéraati kʼéri miskuarhitarhu ixú Echerirhu ka uinhachaparinksï uandaati: “Pʼímutantskua juchari Diosïni jimboesti enga uaxakatini jaka kʼéri uaxantsïkuarhu, ka ístu Karichi sapichuni jimbo” (Jaŋ. 7:10, 14). Ístu, Biblia uandasïndi eska imecha engaksï auandarhu tsíntaaka, ‘sánderu ambakiti ambeksï’ intsïnhaaka ka eska ima ambakiti achamasïcha engaksï ióntki irekaka (Ebr. 11:40). Engaksï niárapka ini ambe kurhanguni, úspti eskaksï erachicha tsípikua jingoni uénapiringa pʼímarhini kʼuiripuni paraksï marhuakuni Jeobani ka irekani para méntkisï ixú Echerirhu.

¹³ Ambe engaksï erokuarhini jaka ima uánikua kʼuiripuecha, úsïndi eskaksï tsípikua jingoni irekaaka. Kurhangusïndiksï eska Jeobasï uandajka sini imeri ambakiti marhuari ma auandarhu irekaa o Echerirhu. Erakukatecha ka ístu uánikua kʼuiripuecha, kurhangusïndiksï eska imecheri kóntperata, jindeska jimboka Jeoba íntspiska Jesusiri tsípikuani para úni pʼímutaantani, nájkirukaksï no jukanchaka indeni ambe (Rom. 3:24).

14. Uéxurhini 1935 ísï tátsekua, ¿andiksïsï uánikuecha kurhamarhikuarhieni néna niárapirini kumplirikuarhini ambe enga Juanu exepka uánikua kʼuiripuecheri ambe?

¹⁴ Ísï tátsekua enga 1935 na eksplikarinhapkia néspiksï uánikua kʼuiripuecha, útasïksï uánikuecha kurhamarhikuarhisïrendi nénaksï niárapirini kʼéri grupu máeni ima erachicha engaksï jatsipka erokuarhikua para Echerirhu irekani. Por ejemplu, Ronald Parkin enga 12 jatiripka jiáni enga kurhangunhapka néspiksï ima uánikua kʼuiripuecha, miántaspti: “Jiánisï, ma 56,000 aianhpirichaksï jarhaspti interu parhakpini ka jamberi sáno iáminduechaksï erakukatespti. Ísï jimbo, ima uánikua kʼuiripuechaksï ísï xarharasïrendi eskaksï no xáni uánispka”.

15. Uandanta je nénaksï niáraspi sánderu uánini imecha engaksï Echerirhu irekaaka.

¹⁵ Peru ísï tátsekua, uápurisïksï axanhaspti misioneruecha ka Jeobaeri testiguechaksï  seguirixapti sánderu uánini. Uéxurhini 1968, uénasptiksï úrani libruni La verdad que lleva a vida eterna paraksï Bibliaeri ambe jorhentpini. Na enga xáni sési eksplikariuenga i libru Bibliaeri jurhimbikua ambe, úspti eskaksï sánderu kʼuiripuecha engaksï ambakiti mintsita ma jataka uékapiringa sánderu míteni. Tʼámu uéxurhini jimbo, jukari mediu miionksï Jesusiri chúxapaticha itsï atakuarhispti. Ka útasï, miioni jimboksï itsï atakuarhispti enga América Latina ka máteru paisicheri anapuechaksï uénapka nóteru xáni jakajkunia Iglesia katolikani ka ístu engajtsïni ménderu jurajkupkia úni juchari ánchikuarhitani jini Europa oriental ka máru lugaricha jimbo engaksï África jaka (Is. 60:22). Nótki xáni iónisti enga Jeobaeri kúnguarhikua uánikua ambe úni jaka para jarhuataani kʼuiripuechani míteni ambe enga Biblia uandajka. Seguruchi jarhaska eska uánikua kʼuiripu tánhantaxaka engaksï iásï jamberi jukari ochu miionikia.

16. ¿Naniksï xáni uéraxaki inde uánikua kʼuiripuecha?

¹⁶ Jánhaskua jimbo enga Juanu exepka, ima uánikua kʼuiripuechaksï “iámindu nasionicharhu ka iámindu tribuecharhu ka iretecharhu” anapuepirindiksï ka “engaksï táchani jásï idioma” uandapiringa. Profeta Sakariasi tʼuini sáno májkueni jásï ambe uandasptia. Karaspti: “Imani jurhiatikuecha jimbo, diesi acheetichaksï iámindu idiomecheri engaksï iretecharhu uandanhajka, jupikaatiksï, jo, uinhamuksï jupikakuati xukuparakua judiuni ma,  arhiparini: ‘Uékasïngachi chánksïni jingoni nirani, jimbokachi kurhaaska eska Tata Diosï chánksïni jingoni jarhaska’” (Zac. 8:23).

17. ¿Ambe úkuarhixaki paraksï jarhuatanhani iápurisï anapuecha ka engaksï mámaru jásï idioma uandajka?

¹⁷ Jeobaeri testiguechachi míteska eska ambakiti aianhperakua jatsiska para uánikua idiomecha jimbo aianhpinhani paraksï úni tánguarhintani kʼuiripuecha engaksï mámaru jásï idioma uandajka. Ísï jimbochisï jukari sientu treinta uéxurhini páni jakaia tradusiriuani publikasionichani engaksï Bibliarhu pʼitakateka. Ka nóchi méni xáni uáni idiomecha jimbo tradusirixapka eska no iásï, jimbokachi jukari sieni idiomecha jimbo tradusirisïnga. Xarharasïndi eska ini jurhiatikuecha jimbo Jeoba milagru ma úxaka: uánikua kʼuiripuni tántani engaksï iápurisï anapueka. Jimboka publikasionicha engaksï Bibliarhu pʼitakateka sánderu uáni idiomecha jimbo jarhaskia, íksï kʼuiripuecha engaksï mámaru jásï idioma uandajka úsïndiksï májku kʼéri marhuakuni Jeobani. Ka Testiguechaksï ísï mítenhasti eskaksï tsípikua jingoni aianhpisïnga ka xénchperanksï komueska erachicha. ¿A no eska iámindu i ambe úsïnga eska juchari jakajkukua sánderu kʼéaka? (Mat. 24:14; Juanu 13:35).

18. a) Eska na arhijka Isaías 46:10, 11, ¿andichisï seguru jaki eska Jeoba méntkisï kumplirisïnga ambe enga aiatspijka? b) ¿Andiksïsï no no sési pʼikuarherajki imecha engaksï Echerirhu irekaaka?

¹⁸ Uánikua ambe jimbochi sési pʼikuarherasïnga ini profesia jingoni. Jo, Jeoba méntkisï kumplirisïndi ambe enga aiatspijka (arhinta je Isaías 46:10, 11). I grupurhu anapuechaksï jukaparharasïndi ambe enga uáka Jeoba imechani jimbo sánderu orhepani. Nóksï no no sési pʼikuarherasïndi jimbokaksï no erakunhaska espiritu jingoni paraksï Jesusi jingoni marhuani auandarhu. Biblia uandaasïndi ambakiti acheetichani, komu Juanu el Bautista ka Dabidi, ka uarhiitichani enga espiritu santu jarhuataapka, peruksï no kuenta úkuarhisïndi 144,000 erakukatecha jingoni (Mat. 11:11; Uku. 2:34). Imecha ka ístu uánikuechaksï tsíntaati Paraisurhu. Imecha ka uánikua kʼuiripuechaksï uáti xarhatakuni Jeobani eskaksï kurhajchaaka ka eskaksï no jurajkuaka.

19. ¿Ambechi uá engachi sési kurhanguska imani jánhaskuani nani enga Juanu exeapka uánikua kʼuiripuechani?

¹⁹ Desde iónisï, Jeoba no méni xáni uánikua kʼuiripuechani taantaxapti iápurisï anapuechani paraksï kʼéri ambe arhini. No arhiparini sinchi erokuarhixaki auandarhu irekani o ixú Echerirhu, jatsiskachi para jarhuataani kʼuiripuechani na engachi xáni uáka paraksï máteru karichicha jingoni kuenta úkuarhini, engaksï jindeka uánikua kʼuiripuecha (Juanu 10:16). No ióni jimbo, Jeoba uáti eska uénakuarhiaka kʼéri miskuarhita enga kʼamajkuauaka iámindu parhakpini anapu juramutichani ka relijioni no jurhimbitichani engaksï újka eska kʼuiripu kómu nitamakuarhiaka. Iámindu imecha engaksï uánikua kʼuiripuecha jingoni kuenta úkuarhijka intsïnhaatiksï kʼéri kóntperata ma: marhuakuni Jeobani para méntkisï ixú Echerirhu (Jaŋ. 7:14, TNM).