Enga juchaari amigu ma pʼamenchakua ma kámajka mentirhu, jamberichi ménisï no jánhaskajka ambe úni. Joperuchi uaaka xarhatakuni na engachi xáni uékajka engachi jarhuataska orhepani uérani. ¿Nénachi uaa ísï úni?

“Jorhenguarhi je iáminduecha sóntku kurhandini” (SANTIAGU 1:19).

Ma ambe engajtsï uaaka úni parajtsï jarhuatani chaari amiguni, jindeesti kurhajchani jiáni enga ima uékaaka uandontskuarheni. Asï eratsi je eskajtsï méntkisï jatsiska para arhini ambe ma. Ambe enga sánderu jukaparhakueka, jindeesti eska chaari amigu exeaka eskajtsï kurhajchasïnga ka eskajtsï uandanhiasïnga imani jimbo. Jánguarhinta je kurhangukuni andisï ísï pʼikuarherajki ka asï jáma je arhinchani. Ístu miá je eska ménisï chaari amigu, no uaaka pʼímukukuarhini ka imani ambe uandaati enga no sési jaka ka tátsekua no sési pʼikuarherani jarhania imani ambe jimbo (Job 6:2, 3).

Uinhaperaanta je “imeechani engaksï no káni sési jámani jaka” (1 TESALONIKA 5:14 Táta Diósïri Uandakua Tata Jesukristueri Aiatsperakua [TDU]).

Jamberi chaari amigu no sési pʼikuarherani jati o jánguarhintani jarhani no ísï pʼikuarherani eska para no ma ambe marhuasïnga. Ísï jimbo, xarhataku je eskajtsï uandanhiasïnga imani jimbo. Ka uaakajtsï uinhaperantani ka sési pʼikuastantani chaari amiguni nájkirukajtsï no míteaka ambe arhini.

“Ambakiti amigu ma méntkisï uékpisïndi” (PROVERBIOS 17:17).

Arhi je chaari amiguni eskajtsï uékasïnga jarhuatani. Asï eratsi je eskajtsï míteskia ambe enga ima uétarhinchajka.  Sánderu sési, kurhamarhi je ambejtsï uaa úni imani jimbo. Ka enga chaari amigu no míteaka ambesï uétarhinchani jaki, uaakajtsï tsimarhani úni ambe ma, komu nirani xanharani. Ístujtsï uaaka arhini eskajtsï uaaka nirani piákuni ambe ma, jarhuatani ambantskantani kʼumanchikuarhu o máteru ambe úni (Galasia 6:2).

ʻIáminduechani tekaakuanta jeʼ (1 TESALONIKA 5:14, TDU).

Jamberi chaari amigu no méntkisï uékaati uandontskuarheni. Peru miátanta je eskajtsï méntkisï imani jingoni jauaka parajtsï kurhajchani enga ima uékaaka uandontskuarheni. Ka jamberi imeeri pʼamenchakua jimbo, chaari amigu uaati úni o imani ambeksïni arhini engaksïni no sési pʼikuastaaka, o nóteru uékania úni ambe engajtsï pakatperapkia o ikiani jarhani. Ísï jimbo, jiáni engajtsï jarhuatani jauaka chaari amiguni, tekaakunta je ka kurhanguku je (Proverbios 18:24).

“Jánguarhintasïnga parareni juchiiti amiga mintsinharhini. Ka nájkirukani no újka iámindu ambe jingoni jarhuatani, jánguarhintasïnga méntkisï kurhajchani enga ima uékaaka uandontskuarheni. Ménisï inde ambejkusï uétarhinchajti juchiiti amiga para sési pʼikuarherantani” (Fernanda, a enga amigani ma jatsika enga depresioni kámajka, ansiedadi ka pʼamenchakua ma enga arhinhajka trastornos alimentarios).

“Amigani ma kámasïnga engareni méntkisï ambakiti ambe arhini jarhajka ka sésirini kámani. Ma jurhiatikua pʼímarhisptirini para imeo nirani ka tʼirekuarini ma úchispti enga kánikua áspipka. Kánikua sési pʼikuarheraspka, jimbosïni aiangukuarhipka máru ambe. ¡Inde ambe úspti eskani kánikua sési pʼikuarherapiringa!” (Ha-eun, enga depresioni kámajka).

“Uétarhisïndi kánikua tekaantstiini. Enga juchiiti uarhiiti imani ambe újka engareni ikiatajka, jánguarhintasïnga miáni eska no uékaparini ísï úska, sino imeeri pʼamenchakua jimbo. Inde amberini jarhuatasïndi parani no ikiani ka parani sánderu kurhangukuni” (Jacob, imeeri témba depresioni kámasïndi).

“Juchiiti uarhiitirini kánikua jarhuatasïndi ka méntkisïrini sési pʼikuastantasïndi. Engani no nani máru pʼikuarherani jarhajka, imarini kurhanguchisïndi ka nórini méntku arhini jarhasïndi parani imani ambe úni engani no únchani jarhajka. Ka jíndeni jimbo, ménisï ima nóteru úsïndi imani ambe enga ima uékapiringa. Juchiiti uarhiiti kánikua sési kámpisïndi ka kánikuarini kurhanguchisïndi. ¡Ambakiti kʼuiripu máesti!” (Enrico, enga ansiedadi kámajka).