Tata Diosï Jeobajtsïni arhisïndi eskachi aiangukuarhiaka ambe engachi nitamakuarhini jaka ka ambe engajtsïni uandanhiatajka (Salmo 55:22). Na uéjkichi xáni uandanhiani jarhani, uaakachi aiangukuarhini Tata Diosïni. Engajtsïni ambe ma uandanhiatani jarhajka, Tata Diosï Jeobajtu uandanhiasïndi. Ka parachi nóteru xáni uandanhiania, orhetachi jatsika para kómarhini Tata Diosïni (Filipusʌ 4:6, 7).

Enga juchaari menti no sési jarhajka, jamberichi niárajka jandiajku pʼikuarherani, jimbokajtsïni máteruecha no méntkisï kurhanguchesïnga na engachi pʼikuarherani jarhajka (Proverbios 14:10). Peru Tata Diosï Jeobajtsïni kʼóru kurhanguchisïndi ka uaakachi aiangukuarhini na engachi pʼikuarherajka. Tata Diosï Jeobajtsïni exexati ka jingontku jarhasïndi engachi no sési pʼikuarherani jarhajka ka sési mítesti ambe engachi úkua jukanchajka úni, jimbosï uéjti eskachi kómarhiaka engachi uandanhiani jauaka (2 Crónicas 6:29, 30).

Engachi kómarhijka Tata Diosï Jeobani, sánderuchi mintsikasïnga eska ima uékasïnga eskachi sési jauaka. Ka uaakachi májkueni uandani eska Biblieri karari ma enga arhipka Tata Diosïni: Tʼuri “exeska na engani xáni kómu nitamakuarhini jaka, jingontkuri exexaka na engani no sési pʼikuarherani jaka” (Salmo 31:7). Míteni eska Tata Diosï Jeoba uandanhiasïnga juchantsïni jimbo, jarhuatasïndijtsïni parachi orhepani uérani. Joperu ima no solu exesïndi na engachi jucha kómu nitamakuarhini jarhajka. Ima sési kurhangusïndi ambe engachi nitamakuarhini jarhajka ka Bibliani úrasïndi parajtsïni sési pʼikuastantani ka uinhaperantani.