I ambeksï uandaspti máru kʼuiripuecha engaksï pʼamenchakua ma kámajka mentirhu. ¿Ménisïjtsï niáraski ísï pʼikuarherani, ojtsï míteski nemani enga ísï pʼikuarherajka?

Enga ísïika, ¿míteskijtsï eskajtsï no chájkueska engajtsï ísï pʼikuarherajka? Iámu parhakpinirhu, uánikua kʼuiripuechaksï pʼamenchakua ma kámasïndi mentirhu, oksï no sési pʼikuarherasïndi jimbokaksï imeecheeri parienti ma inde jásï pʼamenchakua ma kámasïnga.

Xarharasïndi eskachi irekaxaka “últimu jurhiatikuechani jimbo” ka eska kánikua ʻpeligru jarhaskaʼ o kánikua úkua jukani, ísï jimbosï xáni uánikua ambe jati enga újka eskachi uandanhiauaka ka no sési pʼikuarherani (2 Timoteo 3:1). Seguni ambe enga uandajka Organización Mundial de la Salud, sáno 1 de kada 8 kʼuiripu pʼamenchakua ma kámasïndi mentirhu. Ka uéxurhini 2020 COVID-19 jimbo, ma 26% kʼuiripuecheeri niárastiksï jukari uandanhiani jarhani, ka ma 28% kʼuiripuecheeri niárastiksï sánderu kómu pʼikuarherani jarhani o depresión grave kámani.

Ísïisti, jukaparhakuesti míteni eskaksï uánikuecha pʼamenchakua ma kámasïnga mentirhu. Peru sánderu jukaparhakuesti míteni ambe engajtsï uaaka úni chá, chaari familiariicha ka amiguecha parajtsï sánderu sési pʼikuarherani.

Enga kʼuiripu ma sési jarhajka mentirhu, sési pʼikuarherani jarhasïndi. Pauani pauani úsïndi sési úni ambe ma ka enga ambe ma uandanhiatajka úsïndi orhepani uérakuni, sési ánchikuarhisïndi ka sési pʼikuarherasïndi imani ambe jimbo enga újka.

• NO arhikuekasïndi eska kʼuiripu ma uékantku ísï jarhaska o eska no uinhapiska.

• JINDEESTI pʼamenchakua ma enga újka eska kʼuiripu ma kánikua uandanhiauaka, eska nóteru uaakia sési eratseni, pʼínguni na enga pʼikuarherajka nijtu na enga jámajka.

• I pʼamenchakua úsïndi eska ma nóteru uaakia ísï pájperani máteruecha jingoni eska antesi ka eska nóteru uaakia sési úni ambe enga pauani pauani ueenga.

•   Né uéjki uaati ini pʼamenchakua pʼirani na uéjki xáni jatiriini, nani uéjki anapueni, náki uéjki relijioni jimbo jámani, no arhiparini nani enga jamberi jámaka eskuela o sini jatsikuarheriiski o nómbe.

Enga kʼuiripu ma pʼamenchakua ma kámajka mentirhu, sáno méntkisï, ueenasïndi ménderueni jámani, no sési tʼiresïndi o kánikua tʼiresïndi, kánikua o sántku kʼuísïndi. O ménichani kánikua uandanhiani jarhasïndi o kómu pʼikuarherani. Enga chá ísï pʼikuarherajka o máteru nema enga chá míteka, jamberi uétarhiati eskajtsï niuaka doktori jingoni ka imaksïni jarhuataati míteni andijtsïsï ísï pʼikuarherajki ka ambe engajtsï uaaka úni parajtsï nóteru ísï pʼikuarherania.

Tata Jesukristu, achamasï ma enga sánderu jánhaskatiipka Echerirhu, uandaspti: “Imeecha engaksï no malu jarhajka, nóksï uétarhinchasïndi doktorini, solu imeecha engaksï malu jarhajka” (Mateu 9:12). Ima kʼuiripu enga ueenajka pʼamenchakua ma kámani mentirhu, uaati ménderu tsípikua jingoni irekani ka ménderu sési úni ambe ma enga niraska doktori ma jingoni enga inde jásï pʼamenchakua ambe exejka. Engajtsï exeska eskajtsï ióni paxakaia ísï pʼikuarherani o eskajtsï apenasi ueenaxaka, sési jauati eskajtsï sóntku jirinhaaka jarhuajperata. a

Biblia no jindeesti libru ma enga medisineeri ambe uandajka, joperu ambe enga arhijka uaatiksïni kánikua jarhuatani parajtsï sési pʼikuarherani chaari mentirhu. Máteru artikuluecha engaksï i rebista jimbo jaka, uandasïndiksï na engajtsïni Biblia jarhuatajka orhepani uérani engachi i jásï pʼamenchakua ma kámajka. Pʼímarhisïngaksïni parajtsï arhiantani.