Úni ambe enga sési jaka: Biblia jurhimbiti uandasïndi ambe engachi jatsika para úni

KURHAANI INI IDIOMA JIMBO

Engachi úska ambe engajtsïni juchaari konsiensia arhiska o ambe engaksï máteruecha eratsejka, nóchi méni uaaka erokuarhini eskajtsïni méntkisï sési nicheaka. Ka Bibliajtsïni arhisïndi andichisï ménisï no újka sési ambe erakuni, joperu ístujtsïni aiangusïndi ambe engajtsïni jarhuatajka tsípikua jingoni irekani. Jo, Biblia imani ambe uandasïndi enga jurhimbitkueka ka engajtsïni kánikua jarhuatajka.

UÉTARHINCHASÏNGACHI ESKAJTSÏNI TATA DIOSÏ JARHUATAAKA

Bibliarhu, arhisïndi eskachi jucha uétarhinchasïnga eskajtsïni Tata Diosï Jeoba a jarhuataaka; kʼuiripuechachi no ísï kueraakata jarhaska parachi jandiajku erakukuarhini ambe úni (Jeremías 10:23). Jimbojtsïnisï Tata Diosï Biblia jimbo arhijti ambechisï jatsi para úni parachi imani ambe úni enga sési jaka. Imajtsïni kánikua xénchasïndi ka no uékasïndi eskachi orheta tsʼéjkuaka ambe ma parachi úni exeni sini sési jarhaski o nómbe, jimboka no uékasïndi eskachi kánikua no sési nitamakuarhiaka ka uandanhiani (Deuteronomio 5:29; 1 Juanu 4:8). Tata Diosï kánikua jánhaskatiisti. Ka jimbokajtsïni ima kueraaska, sésijtsïni mítesti jimbojtsïnisï újti ambakiti konsejuechani íntskuani (Salmo 100:3; 104:24). Joperu ístu no uékasïndi eska nema afuersa kurhajchaaka.

Tata Diosï Jeoba iámindu ambe íntskuspti Adáni ka Ebani parakaksï imeecha sési irekuarhipiringa (Génesis 1:28, 29; 2:8, 15). Ka ístu no úkua jukaspti ambe enga arhiapka eskaksï úpiringa, joperu jurajkuaspti eskaksï imeecha erakupiringa sinkisï kurhajchapirini o nómbe (Génesis 2:9, 16, 17). Joperu xáni no sési enga Adáni ka Eba jandiajkuksï erakukuarhipka néna irekani ka no ísï eska Tata Diosï Jeoba na arhiapka (Génesis 3:6). ¿Ka juchaia? ¿Nénajtsïni nichesïni engachi jandiajku erakujka ambesï sési jaki ka ambe nómbe? ¿A no eskajtsïni kánikua no sési nichesïnga? Desde iónisïa, exeskachia eskachi no úsïnga pínandikua jatsini ni sési irekuarhini engachi no kurhajchaka ambe engajtsï Tata Diosï Jeoba arhijka (Eclesiastés 8:9).

Nani uéjkichi anapueni o nani uéjkichi irekani jarhani, Bibliajtsïni jarhuatasïndi néna erakuni imani ambe úni enga sési jaka (2 Timoteu 3:16, 17; exe je rekuadruni “ Libru ma para iámindu kʼuiripuecha”). Iásï, ju je exeni néna úrasïni Tata Diosï Bibliani parajtsïni jarhuatani.

Exe je andisï sési jaki uandani eska Biblia jindeeska Tata Diosïiri Uandakua (1 Tesalónika 2:13). Incha je pájinarhu jw.org ka jirinhanta je bideuni ¿Né kararkuarhiski Bibliani?

LIBRU MA PARA IÁMINDU KʼUIRIPUECHA

Jimboka juchaari Tata kuerajpiri kánikua jánhaskatiiska ka xénchantsïni, íntskustijtsïni iáminduechani ambe ma engajtsïni jarhuatajka sési jámani. Eratsenta je arini ambe:

Jukari 3,500 idiomecha jimbo Xáni uánikua idiomecha jimbo tradusidu jarhasti Biblia, ia sea iámu o ma parti. Ka i ambe xarhatasïndi eska no jarhaska máteru libru enga xáni uánikua idiomecha jimbo jaka.
Jukari 5,000 miioni kopiecha Xáni uánikua Bibliechaksï imprimirinhastia. Ka desde iónisïa no ma libru xáni etsakuarhistia.

Biblia no nani uandasïndi eska rasa ma, paisi ma o ireta ma sánderu ambakitiiska eska máteruecha. Biblia libru máesti para iámindu jásï kʼuiripuecha.

Uaakachi arhintani Bibliani pájinarhu jw.org (jukari 250 idiomecha jimbo jarhasti).

ANDIKSÏSÏ MÁRU ERATSEJKI ESKA BIBLIA NO JARHUAJPESÏNGA

Máruksï no jakajkusïndi eska Biblia uaaka jarhuataani paraksï ambakiti kʼuiripu máeni ka sési jámani. Máruksï ini ambe uandasïndi:

Máruksï uandasïndi: “Biblia no nani máru uandasïndi”.

Ambe enga ísïika: Engachi ma partijku arhintapiringa Bibliarhu, úpiringachi eratseni eska Biblia no nani máru uandasïnga. Joperu engachi exeska ambe sánderu uandasïni Biblia máteru partiichani jimbo, ístu na enga jatini karanhapka, na engaksï irekapka jiáni anapu kʼuiripuecha, ka na enga eratseenga ima enga Biblieri libruni ma karaka, uaakachi exeni eska iámindu ambe jatanhentasïnga.

Engajtsï uéjka exeani máru ejempluechani, incha je pájinarhu jw.org ka arhinta je artikuluni “¿Se contradice la Biblia?”.

Máruksï uandasïndi: “Ima kʼuiripu enga jakajkujka Bibliani, ístu no sési ambe niátasïndi, jimbosïni uandajka eska Biblia no jarhuajpesïnga paraka ma sési jámaaka”.

Ambe enga ísïika: Biblia no kulpa jatsisti eskaksï máru kʼuiripuecha no ísï uaaka eska jimini na uandajka. Sánderu sési, Biblia tʼuini uandasptia eskaksï uánikua kʼuiripuecha ka ístu imeecha engaksï relijioni no jurhimbitiichani orhejtsïkuajka nóksï ísï úpiringa eskaksï na jorhentpijka. Ka eska indeni ambe jimbo kʼuiripuechaksï no jakajkupiringa ambe enga Biblia jorhentpijka ka no sési ambeksï uandani (2 Pedru 2:1, 2).

Parajtsï exeni ejemplu ma na engaksï ima kʼuiripuecha engaksï relijioni no jurhimbitiichani orhejtsïkuajka nóteru sáni janhanharhijkia ambe enga Biblia jorhentpijka, incha je pájinarhu jw.org ka arhinta je artikuluni “La religión, ¿un gran negocio?”.

Máruksï uandasïndi: “Ima kʼuiripuecha engaksï jakajkujka Bibliani iámu ambeksï no sési exesïndi”.

Ambe enga ísïika: Bibliajtsïni arhisïndi eskachi jatsiska para janhanharhiani iáminduechani. Joperu kʼóru uandasïndi eska no sési jarhaska arini ambe úni:

Sánderu k’eri ambe exekuarhini eska máteruecha (Filipusï 2:3).
No sési kaani imeechani engaksï máteru ambe jakajkujka eska jucha o engaksï ménderueni kʼuiriperanhaka (1 Pedru 2:17).
Afuersa uékani eskaksï máteruecha ísï eratseaka eska jucha (Mateu 10:14).

• Biblia uandasïni eska Tata Diosï sési kaasïnga ka xénchani kʼuiripuechani, ka ima uékasïndi eskachi juchajtu májkueni uaaka (Roma 9:14).

Engajtsï uéjka sánderu ambe míteni, incha je pájinarhu jw.org ka arhinta je artikuluni “¿Nos ayuda la Biblia a ser tolerantes?”.

TATA DIOSÏ BIBLIANI ÚRASÏNDI PARAJTSÏNI JARHUATANI

Bibliajtsïni aiangusïndi na enga kaajka Tata Diosï kʼuiripuechani. Jimini úsïngachi arhintani na enga exejka Tata Diosï ambe ma, sini sési jarhaski o nómbe, ka ístu ambe engajtsïni uaaka marhuacheni ka ambejtsïni uaa no sési úchini (Salmo 19:7, 11). Ka engachi arhintajka, úsïngachi kurhanguni na engachi jatsika para jámani ka inde ambejtsïni méntkisï jarhuatasïndi.

Pori ejemplu, ju je exeni ambe enga uandajka Proverbios 13:20: “Ima enga jánhastiicha jingoni jámajka, jánhasti úkuarhiati, peru ima enga no ambarhatiichani jingoni jámajka no sési nikuati”. Ambe enga i karakata uandajka desde iónisï kánikua marhuastia ka iásï jamberi seguirixati marhuani. Ka no íjkuesti karakata engachi uaaka exentani Bibliarhu, ístuksï jarhasti máteru konsejuecha engajtsïni kánikua marhuachejka (exe je rekuadruni “ Ambakiti konsejuecha engaksï Bibliarhu jaka méntkisïksï marhuasïndi”).

Jamberijtsï uandajka: “¿Néna uaa seguru jarhani eska útasï marhuaxaka ambe enga Biblia jorhentpijka?”. Máteru artikulu jimbochi exeaka na enga Biblia jarhuataakia máru kʼuiripuecha.

a Tata Diosï arhinhasïndi Jeoba (Salmo 83:18).

AMBAKITI KONSEJUECHA ENGAKSÏ BIBLIARHU JAKA MÉNTKISÏKSÏ MARHUASÏNDI

Asta iásï jamberi Biblia seguiriixati marhuakuani kʼuiripuechani nájkiruka sáno 2,000 uéxurhiniikia enga karanhajka. Desde iónisïa, kʼuiripu méntkisï jánguarhintasïndi tsípikua jingoni irekani ka seguiriixati májkueni úni (Eclesiastés 1:9). Ka inde ambakiti konsejuecha enga Biblia uandaajka ka engaksï méntkisï marhuajka, úsïndijtsïni jarhuatani parachi tsípikua jingoni irekani.

Jurhimbiti jámani

“Uékasïngachi méntkisï jurhimbitku jámani” (Ebreu 13:18).
“Ima enga sïpajka nóteru jatsistia para sïpani jámani, sánderu sési, jatsisti para uinhamu ánchikuarhini”(Éfesu 4:28).

Sési pájperani máteruechani jingoni

“Ísï jimbo, ju je úni ambe enga jarhuatauaka máteruechani ka no para juchajku sési uéranchani” (1 Korintu 10:24).
“Seguirii je tekaatsperantani ka mintsita jingoni puátsperanta je” (Kolosasi 3:13).

Ambakiti ambe erakuni úni

“Kʼuiripu no jánhaskati ma iámindu ambe jakajkusïndi, peru ima enga jánhaskatiika jingontku exesïndi ambe” (Proverbios 14:15).
“Jánhaskati exesïndi ambe enga no sési úkuarhiaka ka kéndikukuarhisïndi, peru imeecha engaksï no jánhaskatiika nóksï ambe ma úsïndi ka no sési ambeksï úkuarhinchasïndi” (Proverbios 22:3).

AIANHPIRI