Pirenchi Lorraine Estados Unidos anapu, uandasïndi: “Engani komu pʼikuarherani jarhajka Tata Diosï Jeobareni sési pʼikuastantasïndi imeeri pirekuecha jimbo engaksï JW Broadcasting^® jimbo jaka”.

Tata Diosïiri marhuariichaksï méntkisï pireasïndi pirekuechani paraksï kʼéri ambe arhini Tata Diosï Jeobani (Kol. 3:16). Engajtsï jorhenguarhiaska pirekuechani, kánikuaksïni marhuacheati jiáni engajtsï no jatsiaka libru pirekuecheeri, selulari o tableta ma. Ixú jarhasti máru ambe engajtsï uaaka úni.

• Arhuta je tiempu parajtsï arhiantani pirekuechani ka kurhanguani. Engachi sési kurhangujka ambe ma, nóchi méni mirikurhisïnga indeni ambe. Pájina jw.org jimbo karakata jarhastiksï iámindu pirekuecha ka ístuksï jima jarhasti pirekuecha engaksï JW Broadcasting jimbo uerajka ka ima engaksï jindeeka para sapiicha. Parajtsï exeantani, incha je jima enga arhijka “Publikasionicha” ka tátsekua jima enga arhijka “Kústakua”.

• Kara je sïranda ma jimbo pirekuani. Inde ambeksï jarhuataati parajtsï úni jorhenguarhiani pirekuechani (Deut. 17:18).

• Uinhachaparini arhinta je. Someni arhinta je o pire je pirekuani.

• Exe je na engajtsï xáni újka miántani. Jánguarhinta je miántani pirekuani no exeparini letrani, parajtsï úni exeni nájtsï xáni miántaski.