1, 2. a) ¿Andisï uandapi apostoli Pablu eska uékperakuasï ʻsánderu jukaparhakuekaʼ? b) ¿Náki kurhamarhikuechanchi exeani jaua ini jorhenguarhikua jimbo?

 ENGA apostoli Pablu uandapka mintsikakueri, erokuarhikueri ka uékperakueri, kʼamaraspti uandaparini “joperu uékperakuasï sánderu jukaparhakueti” (1 Kor. 13:13). ¿Andisï ísï uandapi? Jimboka sánderu orhepatini nóteruchi uétarhinchaakia mintsikani Tata Diosïiri aiatsperakuechani jimbanhi parhakpinirhu jimboka ísï úkuarhiakia iámindu ambe. Joperuchi méntkisï jatsiaka para xénchani Tata Diosï Jeobani ka kʼuiripuechani, ka inde uékperakua seguiriuati kániipani para méntkisï.

² Jimbokachi méntkisï jatsiaka para xénchperani, ju je exeani tanimu kurhamarhikuechani. Orheta, ¿andichisï jatsi para xénchperani máteru ka máteruni jingoni? Segundu, ¿nénachi uaa xarhatani eskachi xénchperasïnga? Ka terseru, ¿nénachi uaa seguiriini kánikua xénchperani?

3. ¿Andichisï jatsi para xénchperani máteru ka máteruni jingoni?

³ ¿Andisï jukaparhakue eskachi xénchperaaka máteru ka máteruni jingoni? Jimboka engachi ísï úska, xarhataakachi eskachi sési jimbo kristianueska. Jesúsi arhiaspti imeeri apostoliichani: “Engajtsï ísï úska, iáminduechaksï míteati eskajtsï juchiiti chúxapatiiska: engajtsï xénchperaaka máteru ka máteruni jingoni” (Juanu 13:35). Ístu, uékperakua úsïndi eskachi márku úkuarhintatini jauaka, jimbosï Pablu uandapti eska “uékperakuasï újka eskaksï iáminduecha uaaka sési pájperani” (Kol. 3:14).  Jarhasti máteru ambe engachi jimbo jatsika para xénchperani. Apostoli Juanu karakuaspti imeeri erachi jémbeechani: “Ima enga xénchajka Tata Diosïni, ístu jatsisti para xénchani erachi jémbani” (1 Juanu 4:21). Engachi xénchajka juchaari erachiichani, xarhatani jarhasïngachi eskachi xénchasïnga Tata Diosï Jeobani.

4, 5. Uanda je ejemplu ma enga xarhatajka na engachi márku úkuarhintatini jaka, na engachi xáni xénchajka Tata Diosï Jeobani ka na engachi xénchajka juchaari erachiichani.

⁴ ¿Nénaksï márku úkuarhintatixaki uékperakua engachi Tata Diosï Jeobani jimbo jatsika ka uékperakua juchaari erachiicha jimbo? Parachi úni kurhanguni, ju je exeni na enga mintsita márku úkuarhintatini jaka máteru kuerpurhu anapu particha jingoni. Doktori ma úsïndi míteni na enga jarhajka juchaari mintsita enga p’ikuarkujka juchaari pulsuni jájkirhu. ¿Ambejtsïni jorhendasïni i ejemplu?

⁵ Májkueni eska doktori ma na újka míteni na enga xáni uinhapiti jarhajka juchaari mintsita engajtsïni pulsuni exechijka, juchajtuchi uaaka míteni na engachi xáni xénchajka Tata Diosï Jeobani engachi exejka na engachi xáni kánikua xénchajka juchaari erachiichani. Engachi exeaka eskachi nóteru xáni xénchaasïngia juchaari erachiichani i ambejtsïni arhikuekani jauati eskachi nóteru xáni xénchaxakaia Tata Diosï Jeobani. Joperu engachi méntkisï xarhatakuani jarhajka eskachi xénchaani jarhasïnga juchaari erachiichani inde ambe xarhatani jauati eskachi kánikua xénchasïnga Tata Diosï Jeobani.

6. ¿Andichisï jatsipirini para uandanhiani engachi nóteru xáni xénchaapiringia juchaari erachiichani? (1 Juanu 4:7-9, 11).

⁶ ¿Andichisï jatsipirini para uandanhiani engachi nóteru xáni xénchaapiringia juchaari erachiichani? Jimboka inde ambe arhikuekapirindi eskachi jarharixaka Tata Diosï Jeobani. Apostoli Juanu ini ambe uandaspti: “Ima enga no xénchajka erachi jémbani ka jini exeni jarhani, no uaati xénchani Tata Diosïni, imani enga no exejka” (1 Juanu 4:20). ¿Ambejtsïni jorhendasïni i ambe? Eskachi solu uaaka jaiapanherantani Tata Diosï Jeobani engachi xénchperaska máteru ka máteruni jingoni (arhinta je 1 Juanu 4:7-9, 11).

7, 8. ¿Nénachi uaa xarhatani eskachi xénchperasïnga?

⁷ Bibliarhu uánikua xanharichi exentasïnga ini juramukuani: “Eskajtsï xénchperaaka máteru ka máteruni jingoni” (Juanu 15:12, 17; Rom. 13:8; 1 Tes. 4:9; 1 Ped. 1:22; 1 Juanu 4:11). Joperu uékperakua p’ikuarhinhikua máesti enga mintsitarhu jaka, no nema úsïndi exeni. Jiájkani, ¿nénaksï uaa míteni máteruecha eskachi xénchasïnga? Juchaari uandakuecha ka úkuecha jingoni.

⁸ Uánikua ambe jimbochi uaaka xarhatakuani juchaari erachiichani eskachi xénchasïnga. Pori ejemplu, Bibliajtsïni arhisïndi: “Iáminduechajtsï jatsiska para jurhimbikua ambe aianguni máteru kʼuiripuni” (Éfe. 4:25). “Jánguarhinta je iáminduecha jingoni sési pájperani” (Mark. 9:50). “Chá ueena je janhanharhiani máteruechani” (Rom. 12:10). “Sési jiókaa je máteruechani” (Rom. 15:7). “Seguirii je [. . .] puátsperanta[ni]” (Kol. 3:13). “Seguirii je jarhuajperani engajtsï uandanhiata ambe jatsiaka” (Gal. 6:2). “Sési pʼikuastperanta je” (1 Tes. 4:18). “Seguirii je [...] jarhuajperani” (1 Tes. 5:11). “Kómarhijpikua je máteruechani ka eskaksïni imeechajtu kómarhijpicheaka” (Sant. 5:16).

9. ¿Andichisï xarhatakuani jarhajka juchaari erachiichani eskachi xénchasïnga engachi sési p’ikuastaantajka? (Ístu exea je imajeniichani).

⁹ Ju je exeni na engachi uaaka uékperakua xarhatakuani máteruechani. Pablu uandaspti:  “Sési pʼikuastperanta je”. ¿Andichisï uékperakua xarhatakuajka máteruechani engachi sési pʼikuastantajka? Libru ma enga Biblieri ambe uandajka, uandasïndi eska uandakua “sési pʼikuatsperantani” enga Pablu úrapka, griegu jimbo arhikuekasïndi “kʼuiripueri máekandu jarhani para uinhaperantani enga k’éri uandanhiata ma nitamakuarhini jauaka”. Ísï jimbo, engachi sési pʼikuastantajka erachini ma enga no sési nitamakuarhini jarhajka, jarhuatani jarhasïngachi paraka seguiriuaka sési marhuakuni Tata Diosï Jeobani. Ka méntkisï engachi sési pʼikuastantajka erachiichani xarhatakuani jarhasïngachi eskachi xénchaasïnga (2 Kor. 7:6, 7, 13).

10. ¿Andichisï uandajki eska pʼamojpeni ka sési pʼikuastpentani márkuksï úkuarhintatixaka?

¹⁰ Pʼamojpeni ka sési pʼikuastpentani, márkuksï úkuarhintatixati. ¿Andichisï ísï uandajki? Jimboka enga kʼuiripu ma pʼamojkujka nemani enga kómu nitamani jarhajka uékasïndi sési pʼikuastantani ka jarhuatani. Peruchi orheta pʼamojkusïnga ka inde ambe úsïndi eskachi uékaaka sési pʼikuastantani. Májkueni úkuarhisïndi Tata Diosï Jeoba jingoni, Pablu uandaspti eska pʼamojperakua enga Tata Diosï pʼikuarherajka kʼuiripuechani jimbo úsïnga eska uékaaka sési pʼikuastantani, ima uandaspti eska Tata Diosï Jeoba jindeeska “Taati enga xáni pʼamojpejka ka ima jindeesti Tata Diosï enga iámindu ambe jimbo sési pʼikuastpentajka” (2 Kor. 1:3). Jimajkani, jimboka ima jindeeska “Taati enga xáni pʼamojpejka” ka “Tata Diosï enga iámindu ambe jimbo sési pʼikuastpentajka”, jimbojtsïnisï ʼméntkisï sési pʼikuastantajti ambe uéjkichi nitamakuarhini jarhaniʼ (2 Kor. 1:4). Ísï eska itsï na újka sési pʼikuastantani nemani enga kánikua kʼarhichani jarhajka, Tata Diosï Jeobajtu sési pʼikuastantasïndi imeechani engaksï no sési nitamakuarhini jarhajka. ¿Ambejtsïni jarhuataa pʼamojpeni ka sési pʼikuastantaani máteruechani? Ísï eska Tata Diosï Jeoba na újka, xarhataani inde járhati kualidadichani engajtsïni jarhuataaka sési pʼikuastantani nemani. Ju je exeani máru kualidadichani.

11. Eska na arhijka Kolosasi 3:12 ka 1 Pedru 3:8, ¿ambejtsïni jarhuataa xénchani ka sési pʼikuastantani máteruechani?

¹¹ ¿Ambejtsïni jarhuataa parachi seguiriini xénchperani ka sési pʼikuastperantani? Jatsiani indeni kualidadichani, pori ejemplu, kurhangukuani máteruechani, xénchpeni ka sési kámpini (arhinta je Kolosasi 3:12; 1 Pedru 3:8). Engachi pʼamojkuauaka erachiichani ka uandanhiani imeechani jimbo, inde ambe úsïndi eskachi uékaaka jarhuataani engaksï no sési nitamakuarhini jarhajka. Jesúsi ísï uandaspti: “Kʼuiripu ma uandasïn[di] ambe enga xáni mintsitarhu jatsijka. Ambakiti kʼuiripu ma, ambakiti ambe uandasïndi jimboka ambakiti ambe jatsiska imeeri mintsitarhu” (Mat. 12:34, 35). Jiájkani, engachi sési pʼikuastantajka juchaari erachiichani xarhatakuani jarhasïngachi eskachi xénchaasïnga.

12. a) ¿Andichisï jatsi para jingontku jámani? b) ¿Náki kurhamarhikuanchi mókuntani jaua?

¹² Iáminduechachi uékasïnga kurhajchani ini juramukuani: “ju je seguiriini iáminduecha xénchperani” (1 Juanu 4:7). Joperu ju je méntkisï miáni ini ambe enga Jesúsi uandapka: “Sáno iáminduechaksï nóteru xénchpeatia” (Mat. 24:12). I uandakuechani jingoni Jesúsi no arhikuekaxapti eskaksï imeeri chúxapatiicha nóteru xénchperapiringia. Joperuchi jatsiska para jingontku jámani parachi no májkueni jámani eska parhakpinirhu anapuecha engaksï nóteru xénchperajkia. Ini ambe miáparini, ju je exeni ambejtsïni jarhuataa  parachi míteni na xánchi xénchaasïni juchaari erachiichani.

13. ¿Ambejtsïni jarhuataa míteni na xánchi xénchasïnga juchaari erachiichani?

¹³ Ma ambe engajtsïni jarhuataaka míteni na xánchi xénchasïni juchaari erachiichani, jindeesti exekuarhini ambechi úsïni jiáni enga úkuarhijka ambe ma (2 Kor. 8:8). Pori ejemplu, apostoli Pedru ini ambe uandaspti: “Joperu ambe engajtsï sánderu jatsika para úni jindeesti kánikua xénchperani, jimboka ima enga xénchpejka méntkisï puátspentasïndi” (1 Ped. 4:8) Jiájkani, jiáni xarharasïndi na engachi xáni xénchajka juchaari erachiichani engajtsïni imeecha no sési pʼikuastajka o engaksï no sési ambe újka.

14. Eska na arhijka 1 Pedru 4:8, ¿na jásï uékperakua uétarhinchasïnchi jatsini? Uanda je ejemplu ma.

¹⁴ Ju je exeni ambe enga uandapka Pedru. Pori ejemplu, bersikulurhu 8 ima uandasïndi: ‘kánikua xénchpera je’. Uandakua griegu jimbo enga Pedru úrapka para “kánikua”, arhikuekaxapti eska “kánipasïnga”. Segunda parti bersikulurhu uandasïndi ambe enga újka xénchperakua, úsïndi eskachi puákuantauaka juchaari erachiichani. Uékperakua ísïisti eska takusï ma enga újka kánikua pʼirakuarhini asta ójchakurani no solu ma echakua ni tsimani  pekaduechani, sino méntku xáni uánikua. Ixú uandakua ójchakurani arhikuekasïndi méntkisï puátspentani ísï eska takusï ma na ójchakurajka ambe ma enga jáxeka, uékperakua úsïndi eskachi puákuantauaka máteruechani.

15. Engachi kánikua xénchaska erachiichani, ¿ambechi uaa úni? (Kolosasi 3:13).

¹⁵ Jatsiskachi para kánikua xénchani juchaari erachiichani parachi úni puákuantani engaksï no sési uaaka, nájkirukachi ménisï úkua jukanchaaka ísï úni (arhinta je Kolosasi 3:13). Jiáni engachi puákuantajka máteruechani xarhatanchi jarhasïnga eskachi kánikua xénchaasïnga ka eskachi uékasïnga sési pʼikuastani Tata Diosï Jeobani. ¿Ambe máteru ambejtsïni jarhuataa parachi puákuantani máteruechani ka no sóntku ikiani imani ambe jimbo engaksï uaaka?

16, 17. ¿Ambe máteru ambejtsïni jarhuataa parachi no imantku ambe exeni engaksï máteruecha no sési ambe újka? Uanda je ejemplu ma. (Ístu exea je imajeniichani).

¹⁶ Jánguarhinta je sési jásï ambe exekuani máteruechani ka no imani ambejku engaksï no sési újka. Eranhaska je eska chá tsípikuarhixaka máru erachiichani jingoni ka fotuchi ma pʼitasïnga nani engaksï iámindu jaka ka jimboka chá uékasïnga ambakiti fotu ma jatsini, chájtsï tanimu fotuechani pʼitaasïnga. Perujtsï exesïnga eska fotu ma jimbo erachi ma no káni sési uéraska, ¿ambejtsï uaa chá imani fotu jingoni? Borrariuakajtsï ka imeechantsï  pakatauaka engaksï iáminduecha sési uéraka.

¹⁷ Fotuecha engachi patsajka ísïistiksï komueska ima ambe engachi miántajka. Sáno méntkisï miántasïngachi ambakiti ambe engachi nitamakuarhika juchaari erachiicha jingoni, peru ju je eranhaskani eska jiáni erachi ma uandaspka o úspka ambe ma enga no sési japka, ¿ambejtsï uaa chá? ¿Andichisï no mirikurhijki ísï eskachi na borrarijka fotu ma? (Prov. 19:11; Éfes. 4:32). Úsïngachi mirikurhini imani ambe enga juchaari erachi no sési úka jimbokachi sánderu miántasïnga na engachi sési nitamakuarhijka imani jingoni. Sánderu sésiisti miántani na engachi sési nitamakuarhika erachini jingoni.

18. ¿Ambechi jorhenguarhiska uékperakueri ambe ini artikuluni jimbo?

¹⁸ ¿Andichisï uéjki kánikua xénchani juchaari erachiichani? Eskachi na jorhenguarhikia, engachi xénchaska juchaari erachiichani xarhatani jauakachi eskachi ístu xénchasïnga Tata Diosï Jeobani. ¿Nénachi uaa xarhatani eskachi sánderu xénchasïnga juchaari erachiichani? Ma ambe engachi uaaka úni jindeesti sési pʼikuastantani ka parachi seguiriini ísï úni jatsiskachi para pʼamojpitiini. ¿Peru nénachi uaa seguiriini kánikua xénchperani? Jánguarhintaparini puákuantani máteruechani imani ambe jimbo engaksï no sési újka.

19. ¿Andisï xáni jukaparhakue eskachi xénchperaaka ini jurhiatikuechani jimbo?

¹⁹ ¿Andisï xáni jukaparhakue eskachi xénchperaaka ini jurhiatikuechani jimbo? Pedru i ambe uandaspti: “No ióni jimbo, iámindu ambe kʼamakurhiatia. Ísï jimbo, [...] kánikua xénchpera [je]” (1 Ped. 4:7, 8). Nóteru ióni kuerataxatiia paraka k’amajkunhaaka i parhakpini ka ¿ambechi úkuarhinchaa juchaia? Jesúsi i ambe uandaspti: “Iámindu ireteechaksïni kurhunhiati jíndeni jimbo” (Mat. 24:9). Jatsiskachi para májku k’éri jarhani parachi úni seguiriini marhuakuni Tata Diosï Jeobani nájkirukajtsïni ikiachiaka. Engachi sési jimbo xénchajka juchaari erachiichani, Satanási nójtsïni méni uaati jarharitani jimboka uékperakuasï újka eskachi “iáminduecha uaaka sési pájperani” (Kol. 3:14; Filip. 2:1, 2).