Hulda úspti jatsini ambe enga xáni uékeenga
ENGAJTSÏ chá nipiringa ióntki sáni isla sapichu ma jimbo enga Sangir Besar arhinhajka enga Indonesia jaka, jamberijtsï plaiarhu exeapiringa juchaari tanimu pirenchiichani. Íksï pirenchiicha kánikua mítekateesti indeni isla jimbo jimbokaksï jorhentpisïnga Biblieri ambe, joperu iásïksï no jarhasti plaiarhu paraksï jorhentpini Biblieri ambe. ¿Andiksïsï nireeni jiájkani plaiarhu?
Sangir Besar (Indonesia nortisï).
Orhetaksï inchamisïreendi marirhu para jirinhaani tsakapuechani engaksï xánisï kʼénharhipiringa komueska futboliiri pelota, ka tátsekuaksï plaiarhu paasïreendi. Jimaksï uaxakasïreendi siia sapirhatiicha jimbo ka martiiu ma jimboksï kʼependurhiasïreendi astakaksï sánderu sapinharhipiringa eska blankiiu ma. Tátsekua, kubeta jimboksï paasïreendi indeni tsakapu sapinharhiichani imeo, joperuksï jatsisïreendi paraksï eskalerecha jimbo karhamantani. Jimaksï kostali jimbo jatsirasïreendi. Ka tátsekua kamioni ma nitamasïreendi para paani indeni kostaliichani para karreterechani uaani.
Hulda tsakapuechani taantaxati plaiarhu
Ma pirenchi enga ini ambe ueenga jindeespti Hulda. Ima úsïreendi sánderu ióni ánchikuarhini plaiarhu. Indeni ambe jingoni engaksï maiamuenga tsakapuecha jimbo, úsïreendi kéndani imeeri familiani. Peru iásï uékasïreendia úrani sentabu para máteru ambe jatsini: tablet ma para úni inchani aplikasionirhu JW Library®. Hulda mítespti eska bideuecha ka informasioni enga aplikasionirhu jaka jarhuatapiringa paraka úpiringa sánderu sési aianhpini ka sánderu sési kurhanguni Bibliani.
Hulda ma mesi ka terujkani ánchikuarhispti, tsimani ora pauani pauani. Xáni uánikua tsakapuechani kʼepekuaspti enga jamberi úpka uinirani kamioni sapichu ma. ¡Iásï kʼóru jatsisptia sentabu para tablet ma piákuarhini!
Hulda imeeri tablet jingoni
Hulda uandaspti: “Ísïisti eskani kánikua kuataraspka ka asta pʼamerhekuarheni jamberi xáni tsakapu kʼepekuani. Peru engani úpkia jatsini juchiiti tablet ka engani exepka eskani úsïreengia sánderu sési aianhpini ka sánderu sóntku prepararikuarhini tánguarhikuecha jingoni, sóntkuni mirikurhispka na engani xáni kuatarapka”. Ístu uandaspti eska tablet jarhuataspka enga na ueenapkia pandemia, jimboka iámindu ambe kúnguarhikuarhu iásï interneti jimbo úkuarhisïreengia. ¡Kánikuachi sési pʼikuarherasïnga enga Hulda úpkia jatsini ambe enga xáni uékeenga!
