Nigeria andajpenuska suresterisï 1948 jimbo ireta sapichu ma jimbo. Imani uéxurhiniicha jimbo juchiiti tiu Moustapha enga juchiiti taatiiri ermanu jémbeepka ka enga sánderu sapichuepka ka ístu Wahabi, juchiiti ermanu kꞌéri, Jeobaeri testiguksï úkuarhispti. Engani ji nuebe uéxurhini jatiripka juchiiti taati uarhispti. Kánikuarini no sési pʼikuastaspti enga ima ísï uarhipka. Juchiiti ermanurini arhispti eskachi úpiringa ménderu exentani juchaari taatini enga tsíntapiringa. Eratsentani ini xáni sési ambe jarhuatasptireni parani ji ueenani jorhenguarhini Bibliani. Itsï atakuarhispka 1963 jimbo ka máteru juchiiti tanimu ermanuechajtuksï ístu Jeobaeri testiguksï úkuarhispti.

Uéxurhini 1965 jimbo, mótsispka Lagos nani enga juchiiti ermanu Wilson irekapka. Jimachi kánikua sési nitamakuarhispka máru prekursori regulariicha jingoni engaksï kúnguarhikua Igbobi jimbo japka. Xarharasïreendi eskaksï kánikua tsípikuarhisïreenga jimbosïni jíjtuni ueenapka prekursori úkuarhini eneruni 1968 jimbo.

Erachi ma enga arhinheenga Albert Olugbebi ka enga marhuani japka Beteli, tánguarhikua ma úspti tumbiicha jingoni parajtsïni arhini eskaksï Nigeria norterisï prekursori espesialiicha uétarhixapka. Útasïni miásïnga na engajtsïni erachi Olugbebi kánikua tsípikua jingoni arhipka: “Chájtsï tumbiiska ka uaakajtsï úrani chaari tiempuni ka chaari uinhapikuani  parajtsï marhuakuni Jeobani. Jima kánikua ánchikuarhita jarhasti”. Ji uékasïreenga ísïini eska profeta Isaíasi ka nirani nani engareni Tata Diosï Jeoba axapiringa jimbosïni uininharhitapka solisitudi ma (Is. 6:8).

Maiuni 1968 jimbo, axasptijtsïni komu prekursori espesiali, ireta ma jimbo enga Kano arhinhajka enga norte de Nigeria jaka. Jiánisï úkuarhini japti guerra Biafra enga úkuarhipka desde 1967 asta 1970 jamberi. Kánikua no sési pakaraspti ima lugari guerra jimbo ka asta nortisï niáraspti guerra jarhani ima paisirhu. Erachi ma engareni uékeenga jarhuatani, arhisptirini eskani no nipiringa Kano. Joperuni ji arhispka: “Diosmaiamu, míteska eskari uandanhiasïnga jindeeni jimbo. Peru enga Jeoba uéjka eskani ji jini niuaka, seguru jarhaska eskarini ima no méni jurajkuaka”.

Ambe engani exepka engani niárapka Kano kánikuarini no sési pʼikuastaspti jimboka kánikua no sési pakaraspka ima lugari guerra jimbo. Engachi nirani jarhenga aianhpini ménisïchi exeasïreenga uarhiriichani. Nájkirukaksï uánikua kúnguarhikuecha japka Kano, sáno iámindu erachiichaksï sïpakuarhispti. No jamberi 15 aianhpiriichaksï pakaraspti ka kánikuaksï chéxapti ka kánikuaksï chkétakuarhitixapti. ¡Kánikuaksï sési pʼikuarheraspti engaksï niárapka seisi prekursori espesialiicha imani ireta jimbo! Engachi uinhaperaantapka kánikua sési úkuaspti. Jarhuataaspkachi parakaksï ueenapiringa ménderu tánguarhikuechani jatsiani, uéranksï aianhpini ka axanksï informini sukursalirhu ka parakaksï kurhajkuarhiapiringa publikasionichani.

Iámindu prekursori espesialiichachi uénaspka jorhenguarhini idioma hausa. Jimbokachi ini idioma jimbo aianhpisïreenga, uánikua kʼuiripuechajtsïni ueenaspti kurhajchani. Joperu máru kʼuiripuecha ima relijioniiri enga sánderu kʼériipka nóksï tsitisïreendi eskachi aianhpepiringa. Ísï jimbo jatsisïrengachi para jingontku jámani. Ma jurhiatikua juchiiti kompanieruni ka jíndeni, nirasptijtsïni andanguni acheeti ma kuchiu ma jingoni. Joperuchi jucha uinhamuchi uiriispka ka nójtsïni úspti andanguni. Ka ísï eska Salmo 4:8 na uandajka, Jeobajtsïni méntkisï kuájchakuspti ka inde ambe úspti eska sánhani arhipiringa sánderu aianhpiricha jarhani. Iásï, 11 kúnguarhikuechaksï jarhastia Kano ka jukari 500 aianhpiricha.

Agostuni 1968 jimbo, máru kutsï ísï tátsekua engachi na niárapkia Kano, máteru tsimani prekursori  espesialiichani ka jindeeni axasptijtsïni Niamey, enga jindeeka kapitali de la República de Níger enga África Occidental jimbo jaka. Sóntkuchi kuenta íntskukuarhespka eska Níger jindeeska nani enga sánderu aparhikuarhijka interu parhakpinirhu ka jucha jatsispka para pʼindeni ísï irekani ka ístuchi jorhenguarhiska francés uandani. Nájkiruka i ambe japka, mintsinharhipskachi Jeobani ka ueenaspkachi aianhpini kapitalirhu imani aianhpiricha jingoni engaksï jima irekapka. No ióni jimbo, sáno iámindu kʼuiripuecha Niamey engaksï jorhenapka arhintani jatsisptiksïa libruni engachi úreenga para Biblieri ambe jorhentpini: La verdad que lleva a vida eterna. Ka máru kʼuiripuechajtsïni nirasïreendi jirinhantani parajtsïni kurhacheni indeni libruni.

Sóntkuchi exespka eskaksï juramutiicha no uékaasïreenga Jeobaeri testiguechani. Juliu de 1969 jimbo, jatsispkachi primeru kʼéri tánguarhikua sirkuitueri imani paisi jimbo ka 20 kʼuiripuechaksï niraspti. Kánikuachi sési pʼikuarheraxapka jimbokaksï tsimani aianhpiricha itsï atakuarhipiringa. Primeru jurhiatikua kʼéri tánguarhikueri, niáraspti polisia ka nóterujtsïni jurajkusptia kʼéri tánguarhikuani jatsini. Pásptijtsïni juchantsïni engachi prekursori espesialiipka ka sirkuitueri orhejtsïkutini jima engaksï polisiecha jarhajka. Jimajtsïni mámaru ambe kurhamarhispti ka tátsekuajtsï arhispti eskachi kʼuanhatsentapiringa ménderu pauandikua. Jimbokachi no mítespka ambe engaksï úpiringa juramutiicha, úspkachi eska arhijtsïkperata para imeecha engaksï itsï atakuarhipiringa kʼumanchikua ma jimbo úkuarhipiringa ka eskaksï tátsekua riu ma jimbo itsï atakuarhipiringa.

Máru semanecha tátsekua, Ministerio del Interior arhisptijtsïni eskachi uéntapiringa paisirhu ji ka máteru sinko prekursori espesialiicha. Arhisptijtsïni eskachi 48 ora jatsispka para uéntani Níger. Ísïchi úspka ka niraspkachi Nigeria anapu Betelirhu. Ka jima uératintsïni máteru nani axaspti.

Jíndentsïni Orisunbare axaspti, ireta ma jimbo enga Nigeria jaka. Jima úspka aianhpini máru erachiicha jingoni engaksï jima anapuepka ka úspka jorhendaani máru kʼuiripuecha Biblieri ambe. Peru seisi kutsï ísï tátsekua, sukursalirini arhispti eskani kʼuanhatsentapiringa Níger; joperu jandiajku. Ueenakuarhu, i amberini ísku pakataspti ka úndaspka uandanhiani. Joperu ístuni uékaxapkia kʼuanhatsentani Níger parani exeani erachiichani.

Kʼuanhatsentaspka Niamey. Ísï pauandikua engani na niárapkia, achamasï ma enga negosiuechani jatsiapka Nigeria, kuenta íntskukuarhespti eskani Jeobaeri testiguespka ka ueenasptirini uánikua kurhamarhikuechani úchiani Biblieri ambe. Jorhendaspka Biblieri ambe ka enga na nóteru itsuteengia ka nijtu kauini, itsï atakuarhispti. Ístuni úspka uápurisï aianhpini imani paisi jimbo ka exeni na engaksï kʼuiripuecha sánhani arhienga jiókuarhini jurhimbikuani. Engani ji niárapka Níger, 31 testiguechaksï jarhaspti; peru engani nintapkia 69 jarhasptiksïa.

Disiembrini 1977 jimbo, kʼuanhatsentaspka Nigeria para kapasitasioni ma enga tanimu semana japiringa. Enga na kʼamarapkia kapasitasioni, ima enga Orhejtsïkujka Sukursalini, Malcolm Vigo, kartarini ma  íntskuspi enga Sierra Leona anapu Beteli axapka. Erachiichaksï jirinhaxapti prekursorini ma enga no tembuchatini japiringa ka enga no pʼamenchani japiringa ka enga uandapiringa inglés ka francés paraka jindeepiringa sirkuitueri orhejtsïkuti Guinea-Conakri. Erachi Vigo arhisptirini eskajtsïni jimbosï pʼímarhipka para ini kapasitasionirhu jarhani. Sésirini aianguspti eska no fasilipiringa ini ánchikuarhitani úni, jimborenisï arhipti: “Sési eratsenta ante deri jiókuarhini”. Peruni ji no jatsispka parani xáni eratsentani jarhani ka arhispka: “Jeobarinisï axani jati, jimbosïni niuaka”.

Abioni jimbo niraspka Sierra Leona ka jima tánguarhispka erachiicha jingoni engaksï sukursalirhu japka. Erachi ma enga orhejtsïkuenga imani sukursalini, arhisptirini: “Nóchi sési míteska na enga nirani jaka ánchikuarhita Guinea”. Nájkiruka i sukursali exeenga aianhpikuani enga Guinea úkuarhienga, nóksï úsïreendi uandontskuarheni aianhpiricha jingoni jimboka no sési jánhaskuarhixapka paisirhu politika jimbo. Méminduksï jánguarhintasptia axani nemani, peruksï no úspti ísï úni. Ísï jimbojtsïni arhipti eskani nipiringa Conakri enga jindeeka kapitali de Guinea ka eskani jánguarhintapiringa jima anapu sïrandeechani jatsiani.

Engani na niárapkia Conakri, niraspka Nigeria anapu embajadarhu ka jima tánguarhispka embajadori jingoni. Arhispka eskani uékasïreenga Tata Diosïiri ambe aianhpini Guinea, peru imarini arhispti eskani no ísï úpiringa jimbokajtsïni úpiringa ónhani, o no sési ambe úchini. Arhistirini: “Kʼuanhatsenta Nigeria ka jima aianhpi”. Ka ji arhispka: “Uékasïnga ixú pakarani”. Embajadori karta ma axakuspti Guinea anapu ministro Interiorini para kurhakuni eskarini jarhuatapiringa ka ima ísï úspti.

Ísï tátsekua kʼuanhatsentaspka Sierra Leona anapu Betelirhu ka aianguaspka erachiichani ambe enga uandapka ministru. Erachiichaksï kánikua tsípispti engaksï mítepka eskajtsïni Jeoba újchakuraspka ka eskajtsïni Juramutiicha sésikua íntskuspka parani Guinea pakarani.

Desde 1978 ka asta 1989 jamberi, sirkuitueri orhejtsïkutiispka Guinea ka Sierra Leona, ka Liberia niáraspka sirkuitueri sustitutueni. Ueenakuarhu kánikua pʼamenchasïreenga ka ménisï jiáni engani iauanisï nireenga pʼorhembiani erachiichani. Peru erachiichaksï kánikua jánguarhintasïreendi parajtsïni ospitalirhu páni.

Ma jurhiatikua uinhamu pʼamenchaspka malaria ka tsïrakuechani jataaspka. Engani sési pʼikuarherantapkia, mítespka eskaksï erachiicha eratsexapkia nani engajtsïni jatsintapiringa. Nájkirukani xáni no sési ambe nitamakuarhika engani jimbo úpiringa uarhini, no méni eratsespka ísï marhuakuni Jeobani. Ka iásï jamberini útasï seguru jarhaska eskajtsïni Jeoba kuájchakusïnga, nájkirukachi uarhiaka, jimbokajtsïni tsítantaaka.

Uéxurhini 1988 jimbo, mítespka Dorcasini prekursora ma enga kánikua kaxumbitiipka ka enga kánikua sési marhuakuni japka Tata Diosïni. Tembuperaspkachi ka seguirispka marhuani komueska sirkuitueri orhejtsïkuti. Dorcas kánikuarini jarhuatasïndi ka kánikuarini xénchasïndi ka uánikua ambe tekaantastia Jeobani jimbo. Parachi úni nirani kúnguarhikuechani pʼorhembiani ménisïchi jatsisïreenga para asta 25 kilometru (15 miia) xanharani ka méntkisïchi paasïreenga juchaari maletechani. Parachi úni niárani imani  kúnguarhikuecha jimbo engaksï sánderu iauani japka, úrasïreengachi ambe uéjkini parachi niárani. Nirasïreengachi xanharuecha jimbo enga kánikua atsïmu jarheenga ka no sési jándeni.

Dorcas no sáni chésïndi. Ménichanisï jatsisïrengachi para riuecharisï parhimeni nani engaksï uánikua kokodriluecha jarheenga. Ma xanhari engachi sinko jurhiatikua nipiringa, jatsispkachi para riuni ma parhimeni kanoa jimbo jimbokaksï puentiicha chkaririispka ka nóteruksï marhuasïreendia. Enga Dorcas anhandepka para kétsentani kanoarhu, itsïirhu uekamespti. Dorcas ka ji, nóchi jorhenaspka xarhiameni ka riurhu kokodriluchaksï jámasïreendi. Peru máru tumbiichaksï itsïirhu inchamespti ka pʼímantasptijtsïni. Ma tiempu, nóchi úsïreenga kʼuíni jimbokachi no sési tsánharhisïreenga imani ambe jimbo, peruchi seguirispka imani ánchikuarhitani úni.

Enga uéxurhini 1992 ueenani japka ambakiti sorpresachi ma intsïnhaspka: ¡Dorcas erokuarhixapti nanaka sapichuni ma! ¿Nóteruchi úpirinia marhuani tiempu kompletueri? Uandaspkachi: “I charhaku Tata Diosï Jeobaeri intsïmperata máesti”. Ísï jimbo, juchaari nanaka sapichu Jahgift arhinhaspti (enga arhikuekajka “Jaheri intsïmperata”). Ka tʼámu uéxurhini tátsekua, andapenuspti juchaari tataka sapichu Eric. Íksï tsimani sapiicha ambakiti regaluesti Jeobaeri. Jahgift jarhuajpespti ma tiempu Oficina Remota de Traducción ma jimbo enga Conakri jaka ka Eric sierbo ministerialiisti.

Nájkiruka tiempu jingoni Dorcas nóteru úpkia marhuani komu prekursora espesiali, seguirispti marhuani komu prekursora regulari, nájkirukaksï útasï sapiicha nótki kʼériuenga. Jeobaeri jarhuajperata jingoni ji úspka ísï marhuani jarhani eska prekursori espesiali. Engaksï juchaari sapiicha kʼépkia, Dorcas ménderu prekursora espesialiisptia ka iásïchi tsimarhani misionerueskia Conakri.

Méntkisï niraska nani engajtsïni Jeoba axaka. Mémindu juchiiti uarhiti ka ji exeskachia na engajtsïni Jeoba kuájchakujka ka na engajtsïni újchakurajka. Engachi mintsinharhijka Jeobani ka no mintsinharhini imani ambe enga parhakpini íntspijka, uánikua kóntperatechanchi intsïnhaasïnga ka nóchi jatsiasïnga xáni uandanhiateechani. Dorcas ka ji exeskachia na engajtsïni Jeoba jarhuataka, ima Tata Diosï engajtsïni kuájchakujka, imajkujtsïnisï újti kuájchakuni (1 Crón. 16:35). Seguru jarhaska eska Tata Diosï Jeoba kuájchakuasïnga imeecheeri tsípikuani engaksï mintsinharhijka ka ‘sésiksï kuájchakukata jauati sutupurhu enga tsípikuerika’ (1 Sam. 25:29).