1, 2. ¿Andichisï úpirini ísï pʼikuarherani enajki Tata Diosï Jeoba no mókuantajki juchaari kómarhikuechani?

 “Ú ESKA Jeoba jindeuaka chiiti sánderu kʼéri tsípikuarhita, ka imakeni íntskuati ambe enga chiiti mintsita sánderu tsitijka” (Sal. 37:4). ¡Xáni ambakiti aiatsperakua! ¿Joperu arhikuekajki i ambe eska Tata Diosï Jeoba sóntkujtsïni íntskuaka ambe engachi kurhakuaka? Sési jarhasti engachi kurhamarhikuarhiaka i ambe. ¿Andi? Eratsenta je ini ambe. Pirenchi ma enga no uambuchatini jaka arhisïndi Tata Diosï Jeobani eska uékasïnga nirani Jorhentperakuarhu para Aianhpiricha Reinueri, joperu ióni nitamasïndi ka nóksï pʼímarhisïndi. Erachi ma enga tumbiika ka enga pʼamenchani jaka, kurhakusïndi Jeobani eska jarhuataaka sési pʼikuarherantani para ima úni sánderu sési marhuani kúnguarhikuarhu, joperu ima no úsïndi sési pʼikuarherantani. Máru taatiichaksï kómarhisïndi Tata Diosï Jeobani paraka imeecheri uájpa seguiriuaka marhuakuni imani, joperu ima nóteru uékasïndia ísï úni.

² Jamberijtsï chá kurhakuka ambe ma Jeobani ka imaksïni no mókuchintani. I ambe úpirindi eskajtsï chá eratseaka eska Tata Diosï Jeoba kurhaasïnga máteruecheri kómarhikuechani, joperu chaari nómbe. O eskaksïni ima no mókuchintasïnga jimbokajtsï no sési ambe úska. Pirenchi ma enga Janice arhinhajka ísï pʼikuarheraspti. b Imeeri uámba jingoni arhisptiksï Tata Diosï Jeobani eskaksï uékasïreenga nirani Beteli. Janice uandantasïndi: “Segura jarhaspka eskajtsïni no ióndapiringa pʼímarhini”. Peru ióni nitamasptia ka nóksï pʼímarhiaspti. Janice uandantasïndi: “Kánikua kómu pʼikuarheraspka ka no mítespka ambe úni. Kurhamarhikuarhisïreenga ambe no sési úspi. Arhispka Tata Diosï Jeobani ambe engani uékeenga ka no mítespka andirenisï no mókuchentapi”.

3. ¿Ambechi exeni jaua ini artikulu jimbo?

 ³ Jamberichi ménisï kurhamarhikuarhika sini Jeoba kurhaasïni juchaari kómarhikuechani. Máru ióntki anapu Tata Diosï Jeobaeri ambakiti marhuariichaksï májkueni ambe kurhamarhikuarhispti (Job 30:20; Sal. 22:2; Hab. 1:2). ¿Andijtsïsï uaa seguru jarhani eska Tata Diosï Jeoba mókuantasïnga chaari kómarhikuechani? (Sal. 65:2). Parachi úni míteni, ju je orheta ini ambe exeni: 1) ¿Ambechi uékasïni eska uaaka Tata Diosï Jeoba? 2) ¿Ambe uékasïni Tata Diosï Jeoba eskachi uaaka jucha? 3) ¿Andichisï ménisï jatsipirini para mójtakuni ambe engachi kurhakujka?

4. Eska na arhijka Jeremías 29:​12, ¿ambejtsïni aiachisïni Tata Diosï Jeoba?

⁴ Tata Diosï Jeobajtsïni aiachisïndi eska kurhauaka juchaari kómarhikuechani (arhinta je Jeremías 29:12). Tata Diosï Jeoba xénchaasïndi imeeri marhuariichani, ka méntkisï kurhauati imeeri kómarhikuechani (Sal. 10:17; 37:28). Joperu i ambe no arhikuekasïndi eskajtsïni íntskuaka iámindu ambe engachi kurhakuaka. Jamberichi jatsiaka para erokuarhini asta jimbanhi parhakpinirhu parajtsïni Tata Diosï Jeoba íntskuni máru ambe engachi uékajka.

5. ¿Ambe miásïni Tata Diosï Jeoba jiáni enga kurhaajka juchaari kómarhikuechani?

⁵ Jiáni engajtsïni mókuchiantajka juchaari kómarhikuechani Tata Diosï Jeoba méntkisï miásïndi ambe enga uékajka úni (Is. 55:​8, 9). Ma ambe enga uéjka úni, jindeesti eska ixú echerirhu irekaakaksï kʼuiripuecha engaksï uékaaka eska ima juramukuauaka ka eskaksï tsípikua jingoni marhuakuaka májku kʼéri. Joperu Satanási uandaspti eskajtsïni sánderu sési nichepiringa engachi jandiajku juramukuarhipiringa (Gén. 3:​1-5). Para xarhatani eska chkuanderakua máeska ambe enga uandapka Noambakiti, Tata Diosï jurajkusti eskaksï kʼuiripuecha jandiajku juramukuarhipiringa. Ka i ambe ústi eskaksï uánikua uandanhiateechani jatsiauaka (Ecl. 8:9). Míteskachi eska Tata Diosï Jeoba no kénditauaka iásï indeni uandanhiateechani, enga ísï úpiringa máruksï úpirindi eratseni eskaksï kʼuiripuecha úsïnga jandiajku juramukuarhini ka eska sési nikuasïnga, ka eskaksï úsïnga kénditani uandanhiateechani engaksï xáni jaka.

6. ¿Andisï jukaparhakue eskachi seguru jauaka eska Tata Diosï Jeoba iámindu ambe uékperakua ka jurhimbikua jingoni úsïnga?

⁶ Tata Diosï Jeobajtsïni no méntkisï májkueni mókuchintaati iáminduechani. Pori ejemplu, enga rei Esekíasi uinhamu pʼamenchapka kurhakuspti Jeobani eska tsinapiringa ka Jeoba ísï úspti (2 Rey. 20:​1-6). Joperu enga apostoli Pablu kurhakupka eska kénditakupiringa ‘chekamikua ma kuerpurhu’ enga jamberi pʼamenchakua máepka, Tata Diosï Jeoba no ísï úspti (2 Kor. 12:​7-9). Ju je miáni ambe engaksï úkuarhinchapka Santiagu ka Pedru. Rei Erodesi uékasïreendi uándikuani, nájkirukaksï erachiicha kómarhipka Pedruni jimbo ka jamberi Santiaguni jimbo, Santiagunksï uándikuspti joperu Pedruni nómbe, jimboka Jeoba kuájchakuspka milagru ma jimbo (Úku. 12:​1-11). Jamberichi kurhamarhikuarhijka: ‘¿Andisï Jeoba kuájchakupi máechakuani ka máteruni nómbe?’. Nájkiruka Biblia no uandajka andisï ísï úpi. Uaakachi seguru jarhani eska Tata Diosï Jeoba jindeeska Diosï ma “enga no no sési ambe újka” ka eska májkueni xénchasïreenga Pedruni komueska Santiaguni (Deut. 32:4; Apok. 21:14). c Jamberi ménisï Tata Diosï Jeoba nójtsïni ísï mókuchintaati eskachi na uékajka, joperu nóchi no sési exesïnga na engajtsïni mókuchintajka jimbokachi míteska eska ima méntkisï úsïnga ambe ma uékperakua ka jurhimbikua jingoni (Job 33:13).

7. ¿Ambechi no jatsiski para úni, ka andi?

⁷ Ju je no terukutantani ambe engachi nitamakuarhini jaka imani ambe jingoni engaksï máteruecha nitamakuarhini jaka. Pori ejemplu,  úpiringachi kurhakuni Tata Diosï Jeobani eskajtsïni jarhuataaka imani ambe jingoni engachi nitamakuarhini jaka, ka imajtsïni no mókuchintani. Ka sánderu tátsekuachi míteni eska erachi ma sáno májkueni ambe kurhajkuarhiska eska jucha ka ísï xarharani eska Jeoba imani kʼóru mókukuntaska. Inde ambesï nitamanchapti pirenchi Ana, imeeri uámba Matthew kánseri pʼamenchaxapti ka Ana kómarhisïreendi paraka ima úpiringa ambakentani. Joperu ístuksï jarhaspti tsimani pirenchicha engaksï kánseri pʼamenchani japka ka engaksï jatiriipkia, Ana kánikua kómarhisïreendi taniperani jimbo, joperu Matthew uarhispti ka tsimani pirenchichaksï ambakentaspti. Ka Ana kurhamarhikuarhisïreendi sini Tata Diosï Jeoba úspi ambe ma parakaksï ima pirenchiicha tsinakuarhipiringa ka enga ísïipka, ¿andisï no májkueni úpi imeeri uámba jingoni? Nóchi míteska andiksïsï i pirenchicha tsinakuarhipi. Joperu ambe engachi kʼóru míteka jindeesti eska Tata Diosï Jeoba kénditaaka iámindu ambe engajtsïni no sési pʼikuastajka, uékasïndi tsítantaani imeeri marhuariichani (Job 14:15).

8. a) Eska na arhijka Isaías 43:​2, ¿ambe úsïni Tata Diosï Jeoba parajtsïni jarhuatani? b) ¿Nénajtsïni jarhuatasïni kómarhikua jiáni engachi no sési nitamakuarhini jarhajka? (Exe je bideuni Kómarhikuajtsïni jarhuatasïndi parachi úni orhepani uerani).

⁸ Tata Diosï Jeobajtsïni méntkisï jarhuataati. Tata Diosï Jeobajtsïni kánikua xénchasïndi ka no uékasïndi eskachi no sési nitamakuarhiaka (Is. 63:9). Joperu ima no úsïndi eskachi no jatsiauaka problemechani, enga Biblia ísï terukutantajka komueska iurhekuecha ka chpiri ambe (arhinta je Isaías 43:2). Joperu ambe engajtsïni aiachijka jindeesti eskajtsïni ima jarhuataaka ‘parhikuani’ imani uandanhiateechani engachi jatsiauaka ka no jurajkuati eskajtsïni inde ambe ójkutaaka parachi seguiriini marhuakuni. Ka ístujtsïni Tata Diosï Jeoba íntskuati imeeri espiritu santuni parachi úni tekaantani (Luk. 11:13; Filip. 4:13). Ísï jimbo, uaakachi seguru jarhani eska ima méntkisïjtsïni íntskuaka ambe engachi uétarhinchaaka parachi úni tekaantani ka no méni jurajkuni imani. d

9. ¿Néna xarhatasïni Santiagu 1:​6, 7 eska jukaparhakueska mintsikani eskajtsïni Tata Diosï Jeoba jarhuataaka?

⁹ Tata Diosï Jeoba uékasïndi eskachi mintsikaaka imani (Ebr. 11:6). Ménisïchi uaaka ísï pʼikuarherani eskaksï juchaari problemeecha kánikua úkua jukaska ka úndani eratseni eskajtsïni Tata Diosï Jeoba no jarhuataaka. Joperu Biblia uandasïndi eska “Tata Diosïiri uinhapikua jingoni úsïnga[chi] kʼéri barda ma jimbo karhanharhikuni” (Sal. 18:29). Ísï jimbo, ju je no méni eratseni eska Tata Diosï Jeoba nójtsïni jarhuataaka, sánderu sési ju je kómarhini iámu mintsita jingoni, mintsikaparini eskajtsïni ima mókuchiantauaka juchaari kómarhikuechani (arhinta je Santiagu 1:​6, 7).

10. ¿Nénachi uaa ísï úni eskachi na kómarhika? Uanda je ejemplu ma.

¹⁰ Tata Diosï Jeoba erokuarhisïndi eskachi jánguarhintaaka ísï úni eskachi na kómarhijka. Ju je eratseni eska erachi ma uékasïnga nirani kʼéri tánguarhikua rejioniri ma jimbo ka kurhakusïndi Tata Diosï Jeobani eska jarhuataaka paraka imeeri patroni jiánguaka. ¿Néna jarhuataa Tata Diosï Jeoba? Jamberi balori íntskuati para uandontskuarheni imeeri patronini jingoni. Jamberi erachi jatsiati para uánikua xanhari nirani uandontskuarheni imeeri patroni jingoni ka asta arhini eska uaaka ánchikuarhini máteru jurhiatikua jimbo nájkirukaksï no maiamuaka.

11. ¿Andichisï jatsi para méntku kómarhini jarhani?

¹¹ Tata Diosï Jeoba uékasïndi eskachi méntku kómarhini jauaka ima ambeeri engajtsïni uandanhiatajka (1 Tes. 5:17). Ini ambe jingoni enga Jesúsi uandapka, arhikuekaxapti eskajtsïni  Tata Diosï no jirejiresï mókuchintaaka ambe engachi kurhajkuarhiaka (Luk. 11:9). Ísï jimbo, ju je no kuatantani, ju je méntku kómarhini jarhani (Luk. 18:​1-7). Engachi méntku kómarhini jarhajka Tata Diosïni ambe ma jimbo, xarhatani jarhasïngachi eska inde ambe kánikua jukaparhakueska para jucha ka eskachi mintsikasïnga eskajtsïni ima uaaka jarhuatani.

12. a) ¿Ambechi úpirini kurhamarhikuarhini, ka andi? b) ¿Ambechi jatsiski para úni parachi janhanharhikua jingoni kómarhini? (Exe je rekuadruni “ ¿Xarhatasïnksï juchiiti kómarhikuecha eskani janhanharhisïnga Tata Diosï Jeobani?”).

¹² Engachi no intsïnhaska ima ambe engachi kómarhikuarhu kurhajkuarhika, úpiringachi i tanimu ambe kurhamarhikuarhini. Primeru: “¿Sési jarhaski ambe engani kurhajkuarhini jaka?”. Ménichani jucha ísï eratsesïnga eskachi míteskia ambe engachi uétarhinchani jarhajka. Joperu jamberi ambe engachi kurhajkuarhini jaka nójtsïni marhuacheati para sánderu orhepatini. Jamberichi kómarhini jaka paraka problema sési niántaaka ísï eskachi jucha na uéjka, joperu jamberichi úpiringa máteru ambe úni parachi sési peentani problemani, ka jamberichi imani ambe kurhajkuarhini jaka enga Tata Diosï Jeoba no jaiapanhintajka (1 Juanu 5:14). Pori ejemplu, taatiicha engachi primeru párrafu jimbo exeaka, kurhakusptiksï Tata Diosï Jeobani eska úpiringa eska imeecheri sapi seguiriipiringa marhuakuni imani. Úpirindi ísï xarharani eska ambakiti ambeespka ambe engaksï kurhajkuarhini japka, joperu Tata Diosï Jeoba no úsïndi eska nema afuersa marhuakuaka. Ima uékasïndi eskachi iáminduecha marhuakuaka jimbokachi uékasïnga ísï úni (Deut. 10:​12, 13; 30:​19, 20). Jimajkani, ¿taatiichaksï ambe úpirini kurhakuni Tata Diosï Jeobani? Eska jarhuatauaka mintsitarhu niárakuni imeeri uájpani paraka xénchaaka Tata Diosï Jeobani ka imeeri amigueni (Prov. 22:6; Éfes. 6:4).

13. Eska na arhijka Ebreu 4:​16, ¿na jatintsïni jarhuatasïni Tata Diosï Jeoba?

 ¹³ Máteru ambe engachi uaaka kurhamarhikuarhini jindeesti: “¿Exeni jaki Tata Diosï Jeoba eskachi uétarhinchaxakaia imani ambe engachi kurhajkuarhika?”. Jamberichi jucha eratsejka eskachi uétarhinchaxakaia imani ambe engachi kurhakuni jaka. Joperu Tata Diosï Jeobajkusï míteti na jatinchisï uétarhinchajki imeeri jarhuajperata (arhinta je Ebreu 4:16). Engajtsïni Tata Diosï Jeoba no mókuchintaaka jirejiresï ambe engachi kurhakuaka, jamberichi úpiringa eratsïni eskajtsïni no uékasïnga mókuchintani. Joperu jamberi ima exejti eskachi útasï nótki uétarhinchaxaka. Ju je tumbiiri ejempluni miántani enga kurhakuenga Tata Diosï Jeobani eska ambakerantapiringa. Enga Tata Diosï Jeoba ambakerantapiringa, Satanási úpirindi uandani eska i tumbi seguirixaka marhuakuni Tata Diosï Jeobani nomasi jimboka ima ambakerantaspka (Job 1:​9-11; 2:4). Joperu Tata Diosï Jeoba mítestia na enga jatini kʼamajkuauaka iámindu pʼamenchakuechani (Is. 33:24; Apok. 21:​3, 4). Ísï jimbo, nóchi jatsiska para erokuarhini eska Tata Diosï Jeoba uaauaka milagruechani para kénditaani pʼamenchakuechani. Jiájkani, ¿i tumbi ambe úpirini kurhakuni Tata Diosï Jeobani? Eska íntskuaka uinhapikua ka eska jarhuataaka para no xáni uandanhiani para úni seguiriini marhuakuni Tata Diosï Jeobani nájkiruka pʼamenchani jaka (Sal. 29:11).

14. ¿Ambeksïni jorhendasïni Janiceri ejemplu?

¹⁴ ¿Miásïntsï pirenchi Janiceni enga kómarhienga Tata Diosï Jeobani jimboka uékasïreenga Beteli nirani marhuani? Sinko uéxurhini nitamaspti paraka ima kurhangupiringa ambe enga úpka Jeoba para mókukuntani imeeri kómarhikuani. Ima uandantasïndi: “Imani tiempuni jimbo Tata Diosï Jeobareni uánikua ambe jorhendaspti ka jarhuatasptireni parani úni sánderu ambakiti kristianu máeni. Pori ejemplu, uétarhinchasïreenga sánderu mintsikani Tata Diosï Jeobani. Sánderu sési jorhenguarhini Biblieri ambe ka jorhenguarhini tsípikua jingoni irekani, nani uéjkisï engani marhuakuni japiringa  Tata Diosï Jeobani”. Sánderu tátsekua Janice ka imeeri uámba pʼímarhinhasptiksï paraksï sirkuitueri orhejtsïkutiini. Janice uandantasïndi: “Tata Diosï Jeoba mókuantaspti juchiiti kómarhikuechani, joperu no ísï eskani ji na erokuarhienga. Ióndaspka kurhanguni eska na engareni Tata Diosï Jeoba mókuchintapka kánikua sési jarhaspka, kánikua diosmaiamukua íntskuntasïnga Tata Diosï Jeobani jimbokani úspka pʼikuarherani na engareni xáni xénchajka ima”.

15. ¿Andisï ménisï uétarhijki máteru ambe kurhajkuarhini ka no imani ambe enga jucha uékajka? (Ístu exea je imajeniichani).

¹⁵ Terseru kurhamarhikua engachi uaaka úkuarhini jindeesti: “¿Uaa máteru ambe kurhajkuarhini ka no imani ambejku engani ji uékajka?”. Nájkiruka ménisï sési jarhajka kurhajkuarhini ambe engachi jucha uéjka, ménisï no uétarhisïndi indeni ambejku kurhajkuarhini parachi úni exeni ambesï uékajki Tata Diosï Jeoba para jucha. Ju je eratsentani pirenchini enga arhipka Tata Diosï Jeobani eska uékasïreenga nirani Jorhentperakua para Aianhpiricha Reinueri jimbo. Ima uékasïndi nirani ini jorhentperakuarhu jimbo para úni marhuani nani enga sánderu uétarhini jaka. Nájkiruka ima seguiriini jaka kómarhini iiri ambe, ¿ambe máteru ambe úpirini kurhakuni Tata Diosï Jeobani? Eska jarhuataaka exeni néna uaa sánderu marhuakuni Tata Diosï Jeobani (Úku. 16:​9, 10). Enga na kómarhiakia úpirindi kurhamarhini sirkuitueri orhejtsïkutini náki kúnguarhikua jimboksï uétarhixaki prekursoriicha. Ístu úpirindi karakuni Betelini para míteni nani sánderu jarhuajperata uétarhixaki para nirani aianhpini. e

16. ¿Ambeerichi uaa seguru jarhani?

¹⁶ Eskachi na jorhenguarhikia, uaakachi seguru jarhani eska Tata Diosï Jeoba mókuantauaka juchaari kómarhikuechani uékperakua jingoni ka jiáni enga ima sési exeaka (Sal. 4:3; Isa. 30:18). Jamberi ménisï no ísï mókuantauati juchaari kómarhikuechani eskachi na erokuarhijka. Joperu méntkisï mókuantauati juchaari kómarhikuechani, imajtsïni kánikua xénchasïndi ka nójtsïni méni jurajkuati (Sal. 9:10). Ísï jimbo, ju je méntkisï mintsikani Tata Diosï Jeobani ka mintsita jingoni kómarhini (Sal. 62:8).