1. ¿Ambe arhiaspi profeta Isaíasi israeliteechani?

 PROFETA Isaíasi uandaspti eska Jeoba, ‘Tata Diosï jurhimbitiiska’. Uandakua enga ebreu jimbo úrakuarhejka para “jurhimbikua” arhikuekasïndi “améni” (Is. 65:​16, nota). Ka améni arhikuekasïndi “eska ísï úkuarhiaka”. Bibliarhu, uánikua xanhari úrakuarhesïndi uandakua améni para xarhatani eska ísïiska ambe enga Tata Diosï Jeoba o Jesúsi uandajka. Ísï jimbo, ambe enga Isaíasi uékeenga arhiani Israeliteechani jindeespti: eska méntkisï ísï úkuarhisïnga ambe enga Tata Diosï Jeoba uandajka. Tata Diosï Jeoba xarhatastia eska i ambe ísïiska jimboka kumplirisïnga ambe enga aiatspejka.

2. ¿Andichisï uaa mintsikani eska niáraaka ísï úkuarhini ambe enga Tata Diosï Jeoba aiatspejka para sánderu orhepatini? ¿Náki kurhamarhikuechanchi mókuantani jaua?

² ¿Ka juchaia? ¿Uaachi mintsikani eska Tata Diosï Jeoba uaaka ambe enga aiatspeka para sánderu orhepatini? Sáno 800 uéxurhinisï tátsekua enga profeta Isaíasi irekapka, apostoli Pablu uandaspti andichisï uaa seguru jarhani eska ambe enga Tata Diosï Jeoba aiatspejka niáraaka ísï úkuarhini. Uandaspti: “Ima no chkuanderasïndi” (Ebr. 6:18). Ísï eska kupandeeri anhatapu ma na no újka turasu jukani, Tata Diosï Jeobajtu, enga jurhimbitiika, no úsïndi chkuanderani. Ísï jimbo uaakachi mintsikani eska iámindu ambe enga Tata Diosï Jeoba uandajka niáraaka ísï úkuarhini ka ístu ambe enga aiatspeka para sánderu orhepatini. Ini jorhenguarhikua jimbo mókuantani jauakachi i kurhamarhikuechani: ¿ambe aiatspeski Tata Diosï para sánderu orhepatini? ka ¿ambe úxaki para xarhatani eska niáraaka úni ambe enga aiatspejka?

3. a) ¿Náki aiatsperakuanchi kánikua jukaparharasïni? (Apokalipsisi 21:​3, 4). b) ¿Ambeksï uandasïni máru kʼuiripuecha i aiatsperakueri ambe?

³ I aiatsperakua engachi uandani jauaka kánikua jukaparhakuesti  para iámindu Tata Diosïiri marhuariicha (arhinta je Apokalipsisi 21:​3, 4). Tata Diosï Jeoba aiatspesïndi: “uarhikua nóteru jauatia, nóteru nema kómu pʼikuarheraatia ka nóteru nema ueraatia nijtu no sési pʼikuarherani”. Aianhpikuarhu kánikuachi úrasïnga ini karakatani para sési pʼikuastantaani kʼuiripuechani ka para arhiani nénachi irekaa Paraisurhu. Peru, ¿ambeksï uandasïni kʼuiripuecha iiri ambe? Máruksï uandasïndi eska no méni niáraaka ísï úkuarhini.

4. a) ¿Ambe tsimani ambe mítespi Tata Diosï Jeoba? b) Tata Diosï Jeoba aiatsperakua ma úspti, ¿peru ambe máteru ambe úspi?

⁴ Jiáni enga Tata Diosï Jeoba úrapka apostoli Juanuni paraka karapiringa Paraisueri aiatsperakueri ambe, mítespti eskachi íni jurhiatikuechani jimbo úrapiringa aianhpikuarhu. Ístu eska uánikua kʼuiripu úkua jukanchapiringa jakajkuni “jimbanhi ambe” enga aiatspejka (Is. 42:9; 60:2; 2 Kor. 4:​3, 4). Jiájkani, ¿nénachi uaa jarhuatani máteruechani paraksï mintsikani eska ísï úkuarhiaka ambe enga Apokalipsisi 21:​3, 4 arhijka? ¿Ka juchachi ambe uaa úni parachi sánderu mintsikani Tata Diosï Jeobani ka imani ambe engajtsïni aiachijka? Tata Diosï Jeobajtsïni no nomasi aiachisïndi ambakiti ambe, ístujtsïni arhisïndi andichisï uaa mintsikani ini aiatsperakuani. Joperu, ¿ambe jimbochi uaa mintsikani eska i ambe ísï úkuarhiaka?

5. ¿Náki karakateechajtsïni jarhuatasïni mintsikani imani ambe engajtsïni Jeoba aiachijka, ka ambeksï uandasïni?

⁵ Ini karakateechani jimbo exeni jauakachi andichisï uaa mintsikani Tata Diosï Jeobaeri aiatsperakuani paraisueri ambe. Jimini arhisïndi: “Ima enga kʼéri uaxantskuarhu uaxakatini japka, uandaspti: ‘¡Exe! Jimbanhi úntaxaka iámindu ambe’. Ístu uandaspti: ‘Karaa ini uandakuechani jimbokaksï mintsinharhikueska ka jurhimbikua ambeesti’. Ka arhisptirini: ‘¡Inde ambe ísï úkuarhistia! Ji jindeeska Alfa ka Omega, ueenakua ka kʼamarhukua’” (Apok. 21:​5, 6a).

6. ¿Nénajtsïni jarhuatasïni Apokalipsisi 21:​5, 6 parachi sánderu mintsikani imani ambe engajtsïni Tata Diosï Jeoba aiachijka?

⁶ ¿Andiksïsï i uandakuecha újki eskachi sánderu mintsikaaka ambe engajtsïni Tata Diosï Jeoba aiachijka? Libru Apocalipsis b i ambe uandasïndi inde bersikulueecheri ambe: “Ísïisti enajki Tata Diosï Jeoba sïranda ma firmarini jaki nani enga uandajka eska uaaka ambe enga aiatspejka”. Apokalipsisi 21:​3, 4 jimbo arhisïndi ambe enga Tata Diosï Jeoba aiatspejka, ka bersikulu 5 ka 6 jimbo, ísïisïndi enajki Tata Diosï Jeoba firmariia ka ísï xarhatani eska niáraaka ísï úkuarhini ambe enga aiatspekia. Ju je sánderu ambe exeni i ambeeri enga Tata Diosï uandajka.

7. ¿Né ueenasïni uandani bersikulu 5 jimbo, ka andisï xáni jukaparhakue inde ambe?

⁷ Tata Diosï ini uandakuechani jingoni xarhatasïndi eska kumpliriuaka ambe enga aiatspejka: “Ima enga kʼéri uaxantskuarhu uaxakatini japka, uandaspti” (Apok. 21:5a). Tata Diosï Jeoba tanimu xanhari uandasïndi libru de Apokalipsisi jimbo ka i jindeesti ma xanhari, jimboksïsï xáni jukaparhakueti i uandakuecha. Ísï jimbo Tata Diosï Jeobasï aiatspeni jati ini ambe, no ánjeli ma, ni Jesúsi. Ka i ambe úsïndi eskachi seguiriuaka mintsikaani uandakuechani engaksï jimini seguirijka arhini, jimboka Tata Diosï Jeoba ‘no chkuanderasïnga’ (Titu 1:2). Ísï jimbo, uaakachi mintsikani ambe enga Apokalipsisi 21:​5, 6 uandajka.

8. ¿Ambe uandaspi Tata Diosï Jeoba para xarhatani eska úkuarhiaka ambe enga ima aiatspejka? (Isaías 46:10).

⁸ Iásï ju je exeni uandakuani “¡Exe!” (Apok. 21:5). Uandakua enga griegu jimbo tradusirikuarhika “¡Exe!” uánikua uelta jarhasti libru de Apokalipsisi jimbo. Karakata ma uandasïndi eska  i uandakua ménisï úrakuarhesïnga “paraka ima enga arhintani jauaka uékaaka sánderu míteni ambe seguirisïni arhini”. ¿Ka ambe seguirisïni arhini? Tata Diosï uandasïndi: “Jimbanhi úntaxaka iámindu ambe”. Nájkiruka Tata Diosï Jeoba sánderu orhepatinisï uaaka iámindu ini ambe, ima xáni seguru jarhasti eska i ambe úkuarhiaka jimbosï ísï uandajti iiri ambe enajki úkuarhini jakiia (arhinta je Isaías 46:10).

9. a) ¿Ambe arhikuekasïni “jimbanhi úntaxaka iámindu ambe”? b) ¿Ambe úkuarhia “auanda” ka “echeri” jingoni enga iásï jaka?

⁹ Iásï ju je exeni máteru ambe enga uandajka Apokalipsisi 21:5: “Jimbanhi úntaxaka iámindu ambe”. I kapitulu úsïndi eskachi eratsentaaka tsimani ambe enga Tata Diosï Jeoba uaaka: kénditani ka jimbanhi úntani ambe ma. Orhetachi exeaka ambe enga kénditaaka. Apokalipsisi 21:1 arhisïndi: “Auanda enga ióntki japka, nóteru jarhasptia ka nijtu ima echeri enga ióntki japka”. “Auanda enga ióntki japka” arhikuekaasïndi juramutiichani engaksï újka ambe enga Satanási ka demoniuecha uékajka (Mat. 4:​8, 9; 1 Juanu 5:19). Bibliarhu, ménichani uandakua echeri úrakuarhesïndi para kʼuiripuechani arhikuekaani (Gén. 11:1; Sal. 96:1). Ísï jimbo, “echeri enga ióntki japka” imani kʼuiripuechani arhikuekaasïndi engaksï iásï kánikua no sési úriika. I ambe arhikuekasïndi eska Tata Diosï Jeoba no sántkisï ambe mójtakukuaka i “auandani” ka “echerini”, sino eska méntku kʼamajkuauaka ka peentaani “jimbanhi auanda ma ka jimbanhi echeri ma”, enga jindeeka eska jimbanhi juramuti ma juramukuauaka kʼuiripuechani engaksï jurhimbitiika.

10. ¿Ambe máteru ambe jimbo ʻjimbanhi úntaa iámindu ambeʼ Tata Diosï Jeoba?

¹⁰ ¿Ambe máteru ambe jimbo jimbanhi úntaa iámindu ambe Tata Diosï Jeoba? (Apokalipsisi 21:5). Tata Diosï Jeoba sési jájkuntaati echerini ka uaati eskaksï kʼuiripuecha perfektueuaka. Ísï eska na uandapka profeta Isaíasi, iámu parhakpini paraisu máeuati o ísï xáni sési jándeati eska jardini de Edéni. Ka mándani juchajtuchi jimbanhintaaka. Ka ístu, Tata Diosï Jeoba tsinaauati imeechani engaksï no újka xanharani, no újka exeni ka no újka kurhaani, ka tsítantauati uarhiriichani (Is. 25:8; 35:​1-7).

11. ¿Ambe arhispi Tata Diosï Jeoba Juanuni eska úpiringa, ka andi?

¹¹ ¿Ístu ambe máteru ambe uandaspi Tata Diosï para xarhatani eskachi uaaka imani mintsikani? Tata Diosï Jeoba arhispti Juanuni: “Karaa ini uandakuechani jimbokaksï mintsinharhikueska ka jurhimbikua ambeesti” (Apok. 21:5). Tata Diosï no solu arhispti Juanuni eska karaapiringa ini uandakuechani, sino arhispti andisï jatsipi para ísï úni. Arhispti: “Jimbokaksï mintsinharhikueska ka jurhimbikua ambeesti”, enga arhikuekajka, eska Tata Diosïiri uandakuecha mintsinharhikueska ka jurhimbitiini. ¡Juanu kánikua sési ústi enga kurhajchapka ka karani ambe enga Jeoba juramukupka! Ka jimboka ima ísï úspka, úsïngachi arhintani Tata Diosïiri aiatsperakuani enga Paraisueri ambe uandajka ka eratseantani iámindu ambakiti kóntperatechani engachi jatsiauaka sánderu orhepatini.

12. ¿Andisï Tata Diosï Jeoba újki uandani “¡Inde ambe ísï úkuarhistia!”?

¹² ¿Ístu ambe uandaspi Tata Diosï Jeoba? “¡Inde ambe ísï úkuarhistia!” (Apok. 21:6). Tata Diosï Jeoba ixú ísï uandaxati enajki úkuarhia ambe enga ima aiatspeka Paraisueri ambe. Ka ísï uandasïndi jimboka no ma ambe jarhaska enga uaaka ójkutani para ima no úni ambe enga eratsetini jaka. Ístu, Tata Diosï Jeoba uandasïndi máteru ambe enga xarhatajka eska niáraaka ísï úkuarhini ambe enga aiatspekia.

13. ¿Andisï Tata Diosï Jeoba uandajki “Ji jindeeska Alfa ka Omega”?

¹³ Eskachi na exekia Tata Diosï Jeoba tanimu  xanhari uandasti bisioniicharhu enga Juanu jatsiapka (Apok. 1:8; 21:​5, 6; 22:13). Iámindu xanhari enga Jeoba uandapka, uandaspti: “Ji jindeeska Alfa ka Omega”. Alfa primeru letreesti grieguecheeri abesedariu jimbo, ka omega, últimu letra. Enga Tata Diosï Jeoba uandani jaka eska ima jindeeska “Alfa ka Omega”, arhikuekaxati eska enga ima ueenajka úni ambe ma, méntkisï kʼamarasïnga úni.

14. a) Uanda je ejemplu ma de na enga jatini Tata Diosï Jeoba uandapka “Alfa” ka na enga jatini uandaaka “Omega”. b) Ísï eska na arhijka Génesis 2:​1-3, ¿ambejtsïni aiachisïni Tata Diosï Jeoba?

¹⁴ Enga Tata Diosï Jeoba na kueraapkia Adáni ka Ebani, arhiaspti ambe enga eratsetini japka úni Echerini jingoni ka ambe enga uékeenga para kʼuiripuecha. Biblia arhisïndi: “Tata Diosï újchakuraaspti ka arhiaspti: ‘Kánguaria je sapiichani, ka uánikua úkuarhi je, ka uinira je echerini ka ánchita je’” (Gén. 1:28). Enga arhiapkia ambe enga uékeenga úni ísïispti enajki arhiani japi “Alfa”. Ma jurhiani Adáni ka Ebaeri desendientiicha engaksï perfektueuaka ka kurhandini, uiniraatiksï Echerini ka paraisuksï ma úntaati. Ima jurhiatikua, Tata Diosï Jeoba uaati uandani, “Omega”. Enga na kʼamarapkia kueraani ‘auandani, echeri ka iámindu ambe enga auandarhu ka echerirhu jaka’, Tata Diosï Jeoba uandaspti eska úkuarhipiringa ambe enga ima aiatspepka eska úkuarhipiringa. ¿Néna ísï úspi? Enga uandapka eska septimu jurhiatikua pímbinhasïispka (arhinta je Génesis 2:​1-3). ¿Ambe arhikuekasïni i ambe? Eska Tata Diosï Jeoba arhutaspka septimu jurhiatikuani paraka úpiringa úkuarhini ambe enga ima eratsetini jaka úni para Echeri ka para kʼuiripuecha. Enga na kʼamarapiringia septimu jurhiatikua, úkuarhipirindia ambe enga ima eratsetini jaka úni.

15. ¿Andisï úpirini ísï xarharani eska Tata Diosï Jeoba nóteru úpiringuia kumplirini ambe enga eratsetini japka?

¹⁵ Engaksï Adáni ka Eba ísï no kurhajchapka Tata Diosï Jeobani, pekarisptiksï ka inde  ambe úspti eskaksï imeecheri desendientiicha pekadu jingoni andajpenupiringa ka niáranksï uarhini (Rom. 5:12). ¿Úpirini inde ambe úni eska Tata Diosï nóteru úpiringuia ambe enga eratsetini japka, uinirani Echerini kʼuiripuecha jingoni engaksï kurhajchapiringa ka perfektuenksï? ¿Úspi Satanási eska Tata Diosï Jeoba nóteru úpiringuia ambe enga eratsetini japka? Úpirindi ísï xarharani. Jamberi Satanási eratsepti eska Tata Diosï Jeoba nóteru ambe ma úpiringuia úni. Pori ejemplu, Tata Diosï Jeoba úpirindi uándikuni Adáni ka Ebani, ka máteru temungurhirini ma úntani para kumplirini ambe enga eratsetini japka. Joperu enga Tata Diosï Jeoba ísï úpiringa, Satanási úpirindi uandani eska ima chkuandera máeska. ¿Andi? Jimboka, Génesis 1:28 jimbo, Tata Diosï Jeoba arhispka Andani ka Ebani eskaksï imeecheri desendientiicha uinirapiringa Echerini.

16. ¿Andisï Satanási jamberi úpirini eratseni eska Tata Diosï Jeoba no úpiringa kumplirini ambe enga eratsetini japka?

¹⁶ ¿Ambe máteru ambe eratsepi Satanási? Jamberi eratsepti eska Tata Diosï Jeoba jurajkupiringa eskaksï Adáni ka Eba kánguarhiapiringa uájpeechani, joperu eskaksï imeecha no méni niárapiringa perfektueni (Ecl. 7:20; Rom. 3:23). Enga ísï úkuarhipiringa, Satanási úpirindi uandani eska Tata Diosï Jeoba chkuandera máespka. ¿Andi? Jimboka no kumplirikuarhipiringa ambe enga ima eratsetini japka, eskaksï Echerirhu irekapiringa kʼuiripu perfektuecha.

17. ¿Ambe úspi Tata Diosï Jeoba para sési peentani jiáni enga Satanási, Adáni ka Eba nóksï kurhandipka, ka néna kʼamakurhia i ambe? (Exe je imajenini).

¹⁷ Satanási no méni úpirindi eratseni ambe enga úpiringa Tata Diosï Jeoba, ima mítetixaptia néna sési peentani para kumplirini ambe enga eratsetini japka úni, nájkiruka Satanási, Adáni ka Eba nóksï kurhandipka (Sal. 92:5). Enga Tata Diosï jurajkupka eska Adáni ka Eba kánguarhiapiringa uájpeechani, xarhataspti eska no chkuandera máeska, sino eska méntkisï kumplirikuarhisïnga ambe enga ima uandajka. Ka ístu xarhataspti eska Tata Diosï Jeoba méntkisï úsïnga ambe enga ima eratsetini jarhajka. ¿Néna? Úspti ambe ma paraka úkuarhipiringa ambe enga ima eratsetini japka, úspti eska japiringa desendensia ma enga pʼímutantapiringa iámindu Adáni ka Ebaeri uájpeechani engaksï kurhandirapiringa (Gén. 3:15; 22:18). Satanási no méni eratsespti eska Tata Diosï Jeoba pʼimutantaapiringa kʼuiripuechani euajpintskua jimbo. ¿Andi? Enga Tata Diosï Jeoba ísï úpka xarhataspti na enga xáni xénchajka kʼuiripuni (Mat. 20:28; Juanu 3:16). Ka Satanási xáni no ambakisti enga no újka xénchpeni. Joperu, ¿ambe úkuarhia euajpintskua jimbo?  Enga na kʼamakurhiakia 1,000 uéxurhini, iámindu ima kʼuiripuecha engaksï kurhajchaaka Tata Diosï Jeobani perfektueuatiksï ka irekaatiksï Echerirhu enga paraisu máeuaka. Ka jiáni enga na ísï úkuarhiakia, Tata Diosï Jeoba uaati uandani “Omega”.

18. ¿Ambe tanimu ambejtsïni arhisïni Tata Diosï Jeoba parachi mintsikani ambe engajtsïni aiachijka? (Ístu exe je rekuadruni “ Tanimu ambe engajtsïni arhijka Tata Diosï Jeoba parachi mintsikani ambe engajtsïni aiachijka”).

¹⁸ Ini jorhenguarhikua jimbo exeskachia máru ambe enga xarhatajka eska Echeri paraisu máeuaka. ¿Ambechi uaa arhiani máteruechani parakaksï mintsikaaka eska kumplirikuarhiaka ambe enga Tata Diosï Jeobajtsïni aiachijka? Primeru, jimboka Tata Diosï Jeobaeska engajtsïni aiachini jaka. Apokalipsisi arhisïndi: “Ima enga kʼéri uaxantskuarhu uaxakatini japka, uandaspti: ʻ¡Exe! Jimbanhi úntaxaka iámindu ambe’”. Tata Diosï Jeoba úsïndi kumplirini ambe enga aiatspejka ka jatsisti jánhaskakua ka uinhapikua para ísï úni. Segundu, Tata Diosï Jeoba ísï uandasïndi enajki úkuarhini jakiia i ambe, jimboka seguru jarhaska eska ísï úkuarhiaka. Jimbosï ima ini ambe uandajti: “Jimbokaksï mintsinharhikueska ka jurhimbikua ambeesti”. Ka ístu uandasïndi: “¡Inde ambe ísï úkuarhistia!”. Ka terseru, jimboka Tata Diosï Jeoba méntkisï kʼamarasïnga ambe enga ueenajka úni. I uandakuechaksï xarhatasïndi eska ísïiska “ji jindeeska Alfa ka Omega”. Tata Diosï Jeoba xarhataati eska Satanási chkuandera máeska ka eska para no ma ambe marhuasïnga.

19. ¿Ambejtsï uaa úni engaksïni nema arhiska eska Echeri no méni niáraaka paraisu máeni?

¹⁹ Méntkisï engajtsï aianguaka nemani ambe enga Tata Diosï Jeoba uaaka para kumplirini ambe engajtsïni aiachika, inde ambe uaati eskajtsï sánderu mintsikaaka imani. Ísï jimbo, engajtsï arhikuntaska nemani ambe enga arhijka Apokalipsisi 21:​4, ka ima uandani “Inde no méni niáraati ísï úkuarhini”, ¿ambejtsï úpirini úni? Úpiringajtsï arhikuntani ka sési aianguni ambe enga arhijka bersikulu 5 ka 6. Xarhataku je kʼuiripuni eska Tata Diosï Jeoba kumpliriuaka ambe engajtsïni aiachijka (Is. 65:16).