UÉXURHINI 670 jimbo ísï ante de Jesúsi, Asiria jindeespti enga sánderu uánikua iretechani juramukuani japka parhakpinirhu. Seguni pájina internetiri Museo Británico, asiriuecheri territoriu jindeespti “desde Chipre oesterhu asta Irán esterhu ka ma tiempu jimbo niáraspti asta Ejiptu jamberini”. Asirieri kapitali, Nínibe, jindeespti sánderu kʼéri ireta iámu parhakpinirhu. Kʼérati monumentuechaksï jarhaspti, sési járhati jardinicha, ambarhati kʼumanchikuecha ka kʼérati bibliotekecha. Ióntki anapu Nínibe jimbo, exenhantastiksï máru karakatecha paredicharhu engaksï xarhatajka eska rei Asurbanipali, májkueni eska máteru reicha, niáraspka arhikuarhini “parhakpini anapu rei”. Imani tiempuni jimbo, ísï xarharasïreendi eska no nema úpiringa andani Asiriani ka Nínibeni.

Joperu enga Asiria sánderu uinhapikua jatsipka, profeta Sofoníasi uandaspti ambe enga Tata Diosï Jeoba úpiringa: “Kʼamajkuati Asiriani. Kʼamajkuati Nínibeni; xáni kʼarhiri jurajkuati eska desiertu ma”. Ístu, máteru profeta Tata Diosï Jeobaeri enga Naúmi arhinheenga, uandaspti: “¡Pakuarhi je platani! ¡Pakuarhi je oruni! [...] ¡Nóteru nema jarhastia iretarhu, pínandisti ka kʼamajkunhasti! [...] Né uéjki engakeni exeaka uiriipaati sïpakuarhini ka uandaati: ‘¡Nínibe kʼamajkunhastia!’” (Sof. 2:13; Nah. 2:9, 10; 3:7). Engaksï kʼuiripuecha kurhaapka ini profesiechani, jamberiksï eratsepti: “¿Meru niáraa ísï úkuarhini? ¿Uaa nema andani Asiriani enga xáni uinhapitika?”. Jamberiksï eratsepti eska no úpiringa ísï úkuarhini.

Joperu ísï úkuarhispti. Uéxurhini 600 jimbo ísï ante de Jesúsi, babiloniuecha ka meduechaksï andaspti Asiriani. Tiempu jingoni, kʼuiripuechaksï nóteru irekaspti Nínibe, astaksï jamberi mirikurhispti iretani. Seguni publikasioni ma enga Museo de Arte Metropolitano enga Nueva York jaka, uandasïndi eska “uánikua uéxurhini tátsekua, nóteru nema irekaspkia iretarhu, túskukata pakaraspti ka Nínibe miánhantaspti imani ambe jimbojku enga Biblia uandajka”. Ka seguni Biblical Archaeology Society, no nema mítespti sini Asirieri kapitali meru jarhaspi. Joperu 1845 jimbo, arkeologu ma enga arhinheenga Austen Henry Layard, ueenaspti jarhakuni ka exentaspti ireta Nínibeni. Inde ambe enga exenhantapka xarhataspti eska Nínibe kʼéri ireta máespka.

Na engaksï úkuarhika profesiecha engaksï Níniberi ambe uandeenga, úsïndi eskachi mintsikaaka eskaksï úkuarhiaka iámindu Biblieri profesiecha engaksï xarhatajka eskaksï kʼamajkunhaaka iásï anapu kʼérati juramuticha (Dan. 2:44; Jaŋ. 19:15, 19-21).