1. ¿Ambechi úpirini kurhamarhikuarhini?

¿NIÁRASÏNTSÏ sánisï cheeni engajtsï eratsentajka no sési jásï ambe enga úkuarhiaka no ióni jimbo, komu enga kʼamajkunhaaka relijioni no jurhimbiti, enga Gog Magog anapu uékaaka no sési úkuni Tata Diosïri iretani o enga Armajedoniri guerra úkuarhiaka? ¿Ménisïjtsï niárasïni kurhamarhikuarhini sintsï kánikua mintsikasïni Tata Diosïni parajtsï no jurajkuni enga i ambe úkuarhiaka? Enga ísïika, kánikuaksïni jarhuataati eratseantani Jesúsiri uandakuechani nani enga i jorhenguarhikua jupindaskuarhitini jaka. Jesúsi i ambe arhiaspti imeeri chúxapatichani: “Asï jáma je uandanhiani chaari mintsitarhu. Mintsika je Tata Diosïni” (Juan 14:1, TNM). Engachi kánikua mintsikaska Tata Diosïni, nóchi chéaka ambe enga úkuarhiaka sánderu orhepani.

2. ¿Nénachi uaa sánderu mintsikani Tata Diosïni, ka ambechi jorhenguarhia ini jorhenguarhikua jimbo?

² Ma ambe engajtsïni jarhuataaka sánderu mintsikani Tata Diosïni para jiáni engachi kʼérati tsʼéjkukuechani jatsiauaka, jindeesti na engachi orhepani uérakuajka iásï tsʼéjkukuechani. Ísïchi uaaka exeni nani engachi uétarhinchajka sánderu mintsikani Tata Diosïni. Méntkisï engachi orhepani uérakujka tsʼéjkukuani ma, sánderuchi mintsikasïnga Tata Diosïni. Ka i ambejtsïni jarhuataati parachi úni orhepani uérakuani uandanhiatechani engachi sánderu orhepani jatsiauaka. Ini jorhenguarhikua jimbo, exeakachi tʼámu ambe nani engaksï Jesúsiri chúxapaticha uétarhincheenga sánderu mintsikani Tata Diosïni. Ístuchi exeaka nénachi uaa orhepani uérakuani sáno májkueni járhati uandanhiatechani engaksï imeecha jatsiapka ka na engajtsïni i ambe jarhuataaka para sánderu orhepani.

3. Ambe enga uandapka Jesúsi jimini Mateu 6:30, 33, ¿ambejtsïni jarhuataski kurhanguni?

³ Familieri orhejtsïkutichaksï kánikua uandanhiasïndi paraksï tʼirekua, xukuparhakua ka kʼumanchikua ma íntskuni imeeri témbani ka  imeecheri sapiichani. I ambe no méntkisï fásilisïndi ini jurhiatikuecha jimbo. Jarhastiksï erachicha engaksï tsïtaka imeecheri ánchikuarhitani ka nájkirukaksï jánguarhintajka, nóksï úsïndi exentani máteru. Máteruechaksï no jiókuarhisti ánchikuarhita ma enga kristianu ma no uaaka úni. Enga i ambe úkuarhijka, uétarhinchasïngachi mintsikani eskajtsïni Tata Diosï Jeoba íntskuaka ambe engachi uétarhinchajka. Ka jiáni enga Jesúsi Juátarhu Arhijtsïkpipka uandaspti eskajtsïni Tata Diosï méntkisï íntskuaka ambe engachi uétarhinchajka (arhinta je Mateu 6:30, 33). Engachi seguru jauaka eskajtsïni Tata Diosï no méni jurajkuaka, uaakachi úni imani ambe enga sánderu jukaparhakueka: Tata Diosïri Reinueri ambe. Ka engachi exeaka na engajtsïni Tata Diosï Jeoba íntskujka ambe engachi uétarhinchajka, sánderuchi andarhieraaka imani ka sánderuchi mintsinharhiaka.

4, 5. ¿Ambe jarhuataxaki familiani ma paraksï úni jatsini ambe engaksï uétarhinchajka?

⁴ Ju je exeni ambe enga úkuarhinchapka familia Castro engaksï Venezuela anapueka. Imeechaksï exestia na enga Tata Diosï Jeoba jarhuataaka paraksï úni jatsini ambe engaksï uétarhinchani japka. I familia echeri ma ánchitasïreendi engaksï jatsipka ka ísïksï úsïreendi jatsikuarheni ambe engaksï uétarhincheenga. Joperu ma jurhiatikua, máru kʼuiripuecha engaksï armeechani káuenga, euakuarhiasptiksï echerini ka úsptiksï eskaksï imeecha uéakuntapiringa jima. Migueli, enga taatika, uandasïndi: “Iásïchi ánchitaxaka echeri sapichuni ma engachi kuánhetanhaka parachi úni jatsikuarheni ambe engachi uétarhinchajka. Ambe engani orheta újka pauani pauani, jindeesti kurhakuni Tata Diosï Jeobani eskajtsïni íntskuaka imani ambe engachi uétarhinchaaka para ima jurhiatikua”. Iásï familia Castro úkua jukanchasïndi jatsini ambe ma, joperuksï kánikua mintsikasïndi eska juchaari Taati enga xáni xénchpetika íntskuauaka ambe engaksï pauani pauani uétarhinchajka. Ka ísï jimbo, nóksï kueratasïndi tánguarhikuecharhu ka ni aianhpini. Imeechaksï orheta peerasïndi Tata Diosïri Reinueri ambe imeecheri irekuarhu ka Tata Diosï Jeoba kuidariuasïndi.

⁵ Iámindu indeni tiempu jimbo, Miguel ka imeeri uarhiiti Yurai, eratsentasïndiksï na enga Tata Diosï Jeoba kuidariuakia. Ménisï Tata Diosï Jeoba úraasti erachichani paraksï íntskuani máru ambe engaksï uétarhincheenga o paraksï jarhuatani Miguelini ánchikuarhita ma exentani. Ka ménichani úrasti Beteli anapu grupuni enga jarhuatajka erachichani engaksï no sési nitamakuarhini jarhajka, para úni íntskuni ini familiani ambe engaksï uétarhinchajka. Ima no méni jurajkuaxati. Ka indeni ambe jimbo, i familia sánderu mintsikasïndia Tata Diosïni. Engaksï na uandantapkia na enga Tata Diosï Jeoba jarhuataapka ma xanhari, Yoselini, Migueliri uájpa enga sánderu kʼériika, uandasïndi: “Mintsitarhurini niárachesïndi exeni na engajtsïni Tata Diosï Jeoba jarhuatani jaka. Ísï exesïnga komueska amigu ma enga méntkisï jima jauaka engani uétarhinchani jauaka”. Ka ístu uandasïndi: “Uandanhiatechani engachi iásï jatsiaka komu familia, prepararixatijtsïni parachi úni orhepani uérakuani imani uandaniatechani engaksï sánderu orhepani jauaka”.

6. Engajtsï chá no sési nitamakuarhini jaka sentabu jimbo, ¿nénajtsï uaa sánderu mintsikani Tata Diosïni?

⁶ ¿Úkua jukanchaxakijtsï sentabu jimbo? Nájkiruka kánikua úkua jukani jauaka, uaakajtsï úrani ini tiempuni parajtsï sánderu mintsinharhini Tata Diosïni. Kómarhi je Tata Diosï Jeobani,  arhintsï je ambe enga Jesúsi uandapka jimini Mateu 6:25-34 ka eratsenta je indeni ambe. Eratseanta je iásï anapu ejempluechani engaksï xarhatajka na enga Tata Diosï Jeoba kuidariuajka imeechani engaksï jánguarhintajka imani marhuakuni (1 Kor. 15:58). Inde ambe uaati eskajtsï sánderu mintsikaaka juchaari Taati auandarhu anapuni, eskaksïni jarhuataaka ísï eska na jarhuataakia imeechani engaksï sáno májkueni jásï ambe nitamakuarhika. Ima mítesti ambe engajtsï uétarhinchajka ka mítesti na engaksïni íntskuaka indeni ambe. Engajtsï exeaka na engaksïni Tata Diosï Jeoba jarhuatani jaka, sánderujtsï mintsikaaka ka uaakajtsï orhepani uérakuani uandanhiatechani engaksï sánderu orhepatini jauaka (Hab. 3:17, 18).

7. Eska na uandajka Mateo 8:23-26, TNM, jiáni enga kʼéri ma janipka ka tarhiani, ¿néna tsʼéjkunhaspi na engaksï xáni mintsikeenga Tata Diosïni Jesúsiri chúxapaticha?

⁷ Ma xanhari Jesúsi ka imeeri chúxapatichaksï barku ma jimbo niraxapti ka ueenaspti uinhamu janini ka tarhiani. Jesúsi úraspti i ambe para jorhendaani imeeri chúxapatichani eskaksï jatsispka para sánderu mintsikani Tata Diosïni (arhinta je Mateo 8:23-26, TNM). Xáni uinhamu janixapti ka tarhiani engaksï olecha ueenapka ójchakurani barkuni, peru Jesúsi ma agustu kʼuíxapti. Kánikua chéparini, Jesúsiri chúxapatichaksï nirasïndi tsínharhitani ka arhisïndiksï eska pʼímutantauaka. No sáni chéparini, Jesúsi arhiasïndi: “Achamasïcha engajtsï xáni sántku mintsikajka, ¿andijtsïsï xáni chéni jaki?”. Jesúsiri chúxapatichaksï jatsipirindi para kuenta íntskukuarheni eska Tata Diosï Jeoba úpiringa kuájchakuni Jesúsini ka iámindu imeechani engaksï imani jingoni japka. ¿Ambechi jorhenguarhisïni? Eska kánikua mintsikani Tata Diosïni, jarhuatasïngajtsïni parachi úni orhepani uérani jiáni enga no sési jánhaskuarhijka janikua jimbo o engachi kʼéri uandanhiata ma jatsijka.

8, 9. ¿Néna tsʼéjkunhaspi na enga xáni mintsikajka Anel Tata Diosïni, ka ambe jarhuataspi?

⁸ Ju je exeni na enga pirenchi Anel enga no uambuchatini jaka ka enga Puerto Rico irekaka, sánderu mintsikapka Tata Diosïni enga no sési ambe nitamakuarhipka. Kʼéri janikua ma jimbo no sési ambe úkuarhinchaspti. Uéxurhini 2017 jimbo, Puerto Rico kʼéri janikua ma úkuarhispti enga arhinheenga María, jiáni Anel tsïtaspti imeeri kʼumanchikuani ka imeeri ánchikuarhitani. Uandantasïndi: “Imani jurhiatikuecha jimbo, kánikua chésïreenga, peruni jorhenguarhiska Tata Diosï Jeobani andarhierani kómarhikua jimbo ka no jurajkuni eskani chétapu jimbo no jánhaskapiringa ambe úni”.

⁹ Anel uandasïndi máteru ambe enga jarhuatapka jiáni enga xáni no sési nitamakuarhini japka: Kurhandirani. Uandasïndi: “Úni ambe enga uandajka Tata Diosï Jeobaeri kúnguarhikua, jarhuatastirini parani no xáni chéni. Tata Diosï Jeoba erachichani úraaspti parajtsïni uinhaperantani ka parajtsïni íntskuni ambe engani uétarhinchani japka”. Ka ístu uandaspti: “Tata Diosï Jeobareni íntskusti asta imani ambe engani no erokuarhini japka ka i ambe ústi eskani sánderu mintsikaaka”.

10. ¿Ambejtsï uaa úni engajtsï kʼéri uandanhiata ma jatsika?

¹⁰ ¿Kʼéri uandanhiatajtsï ma jatsiski? Jamberijtsï no sési nitamakuarhini jaka desastre naturali ma jimbo. O jamberi jimbokajtsï uinhamu pʼamenchani jaka ka indeni ambe jimbojtsï uandanhiani  jarhani ka nójtsï míteni ambe úni. Jamberijtsï ménisï kánikua uandanhiajka, joperu asï jurajku je eska inde ambe uaaka eskajtsï nóteru mintsikaakia Tata Diosï Jeobani. Imani jingoni uénhekuarhi je. Parajtsï úni sánderu mintsikani Tata Diosï Jeobani, eratsenta je na engaksïni jarhuatakia (Sal. 77:11, 12). Uaakajtsï seguru jarhani eskaksïni ima no méni jurajkuaka iásï ni sánderu orhepani.

11. ¿Andisïchi jatsi para kurhajchaani imeechani engajtsïni orhechepajka?

¹¹ ¿Ambe máteru ambeksïni jarhuataa parajtsï úni orhepani uérakuani tsʼéjkukuechani? Eska na uandaka Aneli, kurhandirani. Jorhenguarhi je mintsinharhiani imeechani engaksï Tata Diosï Jeoba ka Jesúsi mintsinharhiajka. Ménichani imeecha engajtsïni orhechepajka arhiati eskachi uaaka imani ambe engachi jamberi no kurhanguaka andisï ísï úkuarhini jaki. Joperu miá je eska Tata Diosï Jeoba újchakuraasïnga imeechani engaksï kurhandijka. Imeeri Karakata ka ambe engaksï nitamakuarhika imeecha engaksï sési marhuakujka Tata Diosïni, jorhendasïndijtsïni eska úni ambe engachi arhinhaaka, úsïnga eskachi tsípiti pakaraaka (Éx. 14:1-4; 2 Crón. 20:17). Eratseanta je indeni ejempluechani ka ísïjtsï uékaaka úni ambe enga Tata Diosïri kúnguarhikua uandaaka iásï ka ístu sánderu orhepani (Ebr. 13:17). Ísï jimbo no ma ambe jauati engachi jimbo chéaka jiáni enga niárakia kʼéri mískuarhita (Prov. 3:25).

12. Eska na uandajka Lukasʌ 18:1-8, ¿néna terukuntasïni mintsikani Tata Diosïni ka no kuatantani engachi no sési kánhani jauaka?

¹² Jesúsi mítespti eska engaksï imeeri chúxapaticha no sési kánhapiringa, úpiringa úni eskaksï nóteru xáni mintsinharhipiringia Tata Diosïni. Para jarhuataani, Jesúsi aianguaspti uarhiiti tsïndiri ma enga méntku úndani japka kurhakuni juesini ma enga no jurhimbitku jámeenga, eska jarhuatapiringa. Ima tsïndi seguru jarhaspti eska enga no kuatantapiringa, juesi jarhuatapiringa. Ka ísï úkuarhispti. ¿Ambechi jorhenguarhisïni? Tata Diosï Jeoba jurhimbitku úsïndi iámindu ambe. Jimbosï, Jesúsi uandaspti: “¿Jimajkani [Tata] Diosï no jarhuataa iámindu imeeri erakukatechani engaksï chúrikua ka jurhiakua uandajpani jauaka?” (arhinta je Lukasʌ 18:1-8). Ístu tátsekua uandaspti: “Enga Uájpa acheetiri junguaka, chájtsï tantiarisïni eska ini parhakpinirhu exeantauaka imeechani engaksï mintsikani jauaka imani?”. Uaakachi xarhatani eskachi májkueni mintsinharhisïnga Tata Diosïni eska uarhiiti tsïndi, engachi tekaantskua xarhataska ka engachi no kuatantaska. Inde mintsinharhikuajtsïni jarhuataati parachi seguru jarhani eskajtsïni Tata Diosï Jeoba jarhuataaka. Ístuchi jatsiska para jakajkuni eska kómarhikua kánikua uinhapikua jatsiska. Ménichani juchaari kómarhikuechaksï ísï mókunhantaati na engachi jamberi no erokuarhienga.

13. ¿Néna jarhuataspi kómarhikua familiani ma enga no sési kánhani japka?

¹³ Ju je exeni ambe enga úkuarhinchapka pirenchi ma enga Vero arhinhajka ka enga República Democrática del Congo irekaka imeeri acheeti jingoni enga no Testigueka ka imeeri nanaka jingoni enga 15 uéxurhini jatiriika. Taniperanksï, uéakuntaspti imeecheri iretarhu jiáni engaksï niárapka máru sondaduecha paraksï no sési ambe úni iretarhu. Engaksï nirani japkia, kuperasptiksï máteru sondaduecha jingoni ka  imeechaksï anhaxustaaspti ka arhiasptiksï eskaksï uándikuapiringa. Vero ueenaspti uerani, peru imeeri nanaka jánguarhintaspti paraka nóteru uerapiringia ka bosi alta jimbo kómarhispti Tata Diosïni, mémindu úraspti Tata Diosï Jeobaeri nombrini. Enga na kʼamarapkia kómarhikua úni, sondadu enga juramukuauenga máteru sondaduechani, kurhamarhispti: “Uátsï, ¿nékini jorhendaski kómarhikua úni?”. Ka ima arhispi: “Juchiiti naandi, ísï úparini eska na arhijka Mateu 6:9-13”. Sondadu arhispti: “Ni pínandikua jingoni chiiti taaticha jingoni ka eskaksïni chiiti Tata Diosï Jeoba kuájchakuaka”.

14. ¿Ambe úpirini tsʼéjkuni na engachi xáni mintsikajka Tata Diosïni, ka ambejtsïni jarhuata parachi tekaantani?

¹⁴ Ambe enga i familia nitamakuarhika, jorhendasïndijtsïni eskachi jatsiska para kánikua jukaparharani kómarhikuani. Joperu, ¿engaksï chaari kómarhikuecha no xáni sóntku mókunhantaska o ísï eska na mókuminhantapka i familia? Májkueni eska uarhiiti tsïndi enga Jesúsi uandapka, seguiri je kómarhini mintsikaparini eskaksïni juchaari Tata Diosï no méni jurajkuaka ka eska mókuantauaka chaari kómarhikuechani jiáni ka ísï eska ima na sési exeaka. Seguiri je mintsita jingoni kurhakuni Tata Diosï Jeobani eskaksïni íntskuaka imeeri espiritu santuni (Filip. 4:13, TNM). Miá je eska no ióni jimbo, Tata Diosïksïni xáni uánikua kóntperatechani íntskuauaka engajtsï nóteru jamberi miáuakia ambe engajtsï xáni nitamakuarhika. Engajtsï orhepani uérakuaska uandanhiatechani Tata Diosï Jeobaeri jarhuajperata jimbo, sánderujtsï uaaka orhepani uérakuani uandanhiatechani engaksï jauaka sánderu orhepani (1 Ped. 1:6, 7).

15. Eska na uandajka Mateu 17:19, 20 TDU, ¿náki uandanhiataksï jatsispi Jesúsiri chúxapaticha?

¹⁵ Jesúsi jorhendaaspti imeeri chúxapatichani eska mintsikani Tata Diosïni jarhuataapiringa orhepani uérakuani uandanhiatechani (arhinta je Mateo 17:19, 20 Táta Diósïri Uandakua Tata Jesukristueri Aiatsperakua [TDU]). Nájkirukaksï imeecha uánikua xanhari kʼuiripuechani petarhitantaapkia demoniechani, ma xanhariksï no úspti ísï úni. ¿Andi? Jesúsi arhiaspti eskaksï uétarhinchasïreenga sánderu mintsikani Tata Diosïni. Arhiaspti eska engaksï imeecha kánikua mintsikapiringa, úpiringaksï orhepani uérakuani uandanhiatechani engaksï xáni kʼérapiringa komueska kʼéri juáta ma. Iásï, juchajtuchi úpiringa kʼérati uandanhiatechani jatsiani engachi ísï exeapiringa eskachi no uaaka orhepani uérakuani.

16. ¿Néna jarhuataski Geydini mintsikani Tata Diosïni para úni orhepani uérakuni imani xáni no sési jásï ambe enga nitamakuarhipka?

¹⁶ Ju je exeni Geydiri ejempluni, pirenchi ma enga Guatemala anapueka. Imeeri uámba Edini, uándikusptiksï engaksï kʼuanhatsentani japka tánguarhikuarhu uératini. Pirenchi uandasïndi eska mintsinharhini Tata Diosïni jarhuatasïnga para no xáni no sési pʼikuarherani, uandasïndi: “Kómarhikua jimbo, Tata Diosï Jeobani jurajkukuasïnga juchiiti uandanhiatechani ka i amberini jarhuatasïndi parani pínandikua jatsini. Exexaka na engareni ima kuidarini jaka úraparini juchiiti familiani ka erachichani. Marhuakuni Tata Diosïni, jarhuatasïndirini parani no xáni no sési pʼikuarherani ka parani úni orhepani uérani no uandanhiaparini ambe enga úkuarhiaka máteru  jurhiatikua jimbo. Ambe engani nitamakuarhika, jorhendastirini eska no arhiparini na uéjki jásï uandanhiata ma engani jatsiaka, uaaka orhepani uérakuni Tata Diosï Jeobaeri jarhuajperata jimbo, Jesúsiri ka imeeri kúnguarhikueri”.

17. ¿Ambechi uaa úni engachi uandanhiatechani jatsiauaka engaksï ísï xarharaaka komueska kʼéri juáta ma?

¹⁷ ¿Uarhiranchaskijtsï nemani? Parajtsï sánderu mintsikani eska jauaka tsíntskua, arhuta je tiempu parajtsï arhintani Bibliarhu ima kʼuiripuecheri engaksï tsítanhantapka. ¿Kómu pʼikuarheraxakijtsï jimboka chaari familiari ma petanhantaska kúnguarhikuarhu? Estudiari je parakajtsï seguru jarhani eska méntkisï sánderu sésiska na enga jurhimberpintajka Tata Diosï Jeoba. Náki uéjki uandanhiata engajtsï jatsika, ísï exe je komueska ambe ma engaksïni jarhuataaka parajtsï sánderu mintsinharhini Tata Diosïni. Aiangu je Tata Diosï Jeobani na engajtsï pʼikuarherajka. Asï jarharia je erachichani (Prov. 18:1). Ú je imani ambe engaksïni jarhuataaka parajtsï tekaantani, nájkiruka jindeuaka ueparini (Sal. 126:5, 6). Asï kuerata je tánguarhikuecharhu, aianhpi je ka arhinta je Bibliani. Ka seguiri je eratseantani kóntperatechani enga Tata Diosï Jeoba aiatspika eska juauaka. Engajtsï exeaka na engaksïni Tata Diosï Jeoba jarhuatani jaka, sánderu ka sánderujtsï mintsinharhiaka.

18. Engajtsï exeska eskajtsï uétarhinchasïnga sánderu mintsikani Tata Diosïni, ¿ambejtsï uaa úni?

¹⁸ Asï chkétakuarhi je engajtsï exeska eska tsʼéjkukua ma jimbo engajtsï ióntki jatsipka o engajtsï iásï jatsini jaka, xarhatacheska eskajtsï uétarhinchasïnga sánderu mintsikani Tata Diosïni. Ísï exe je eska ambe ma engaksïni jarhuataaka parajtsï sánderu mintsikani. Májkueni ambe kurhajkuarhi je eskaksï apostolicha na arhipka Jesúsini: “Jarhuatajtsïni parachi sánderu mintsikani” (Luc. 17:5, TNM). Ístu, eratseanta je ejempluechani engachi ini jorhenguarhikua jimbo exeaka. Májkueni eska Miguel ka Yurai, miá je namuni xanhariksïni jarhuataskia Tata Diosï Jeoba. Ísï eska Veroeri uájpa ka eska Aneli, mintsita jingoni kómarhi je Tata Diosï Jeobani ka sánderu jiáni engajtsï no sési nitamakuarhini jauaka. Ka ísï eska Geydi, jiókuarhi je jarhuajperata engaksïni Tata Diosï Jeoba íntskuaka úraparini chaari familiani o erachichani. Engajtsï jurajkuska eskaksïni Tata Diosï Jeoba jarhuataaka parajtsï orhepani uérakuani uandanhiatechani, sánderujtsï mintsikaaka eskaksïni jarhuataaka sánderu orhepatini.

19. ¿Amberi seguru jarhaspi Jesúsi, ka ambeerijtsï ístu uaa chá seguru jarhani?

¹⁹ Jesúsi uandaspti máru ambe nani engaksï imeeri chúxapaticha jatsipka para sánderu mintsikani Tata Diosïni, joperu seguru jarhaspti eska Tata Diosï Jeobaeri jarhuajperata jimbo, úpiringaksï orhepani uérakuani uandanhiatechani engaksï jatsiapiringa (Juan 14:1, TNM; 16:33). Ístu seguru jarhaspti eskaksï japiringa uánikua kʼuiripuecha engaksï tsípiti pakarapiringa kʼéri mískuarhitarhu, jimbokaksï mintsikapiringa Tata Diosïni (Jaŋ. 7:9, 14). ¿Chá jima jaua ini xáni uánikua kʼuiripuecha jingoni? Tata Diosï Jeobaeri kóntperata jimbo, uaakajtsï jima jarhani engajtsï jánguarhintaska sánderu mintsikani (Heb. 10:39, TNM).