1, 2. a) ¿Andiksïsï jatsi para mintsikani Tata Diosï Jeobani imeecha engaksï apenasi tembuperaka? (Salmo 37:3, 4). b) ¿Ambechi exea ini jorhenguarhikua jimbo?

¿APENASIJTSÏ tembuperaski o no ióni jimbojtsï tembuperaia? Enga ísïika seguruchi jarhaska eskajtsï uékasïnga tsípikua jingoni irekuarhini. Ísïisti, temungurhirikuarhu uandanhiatechaksï jarhasïndi ka ueenakuarhu jatsiskajtsï para uánikua ambe erakuni úni. Na engajtsï uaaka ini ambe, uaati úni eskajtsï uánikua uéxurhini sési o no sési irekuarhiaka. Engajtsï mintsinharhiska Tata Diosï Jeobani ka engajtsï ambakiti ambe erakuska úni, sánderujtsï sési pájperaaka temungurhiri ka tsípikua jingontsï irekuarhiaka. Engajtsï no ísï úska ambe ma eska Tata Diosï Jeoba na uandajka, niáraakajtsï jamberi uandanhiatechani jatsiani ka nójtsï xáni tsípikua jingoni irekuarhini (arhinta je Salmo 37:3, 4).

² Nájkiruka i jorhenguarhikua jindeeka para imeecha engaksï apenasi tembuperaka, exeakachi máru ambe engaksï úpiringa nitamanchani iámindu temungurhiricha. Exeakachi máru ejempluechani kʼuiripuecheri engaksï sési marhuakupka Tata Diosïni ka engaksï Bibliarhu jaka ka exeakachi ambe engajtsïni jorhendajka para juchaari irekuarhu ka ístu para temungurhirikuarhu. Ístuchi exeaka ambe engachi uaaka jorhenguarhini máru iásï anapu temungurhiricheri.

3, 4. ¿Náki uandanhiatechanksï úpirini jatsiani imeecha engaksï apenasi tembuperaka?

³ Máru lugaricha jimbo, kʼuiripuechaksï úpirindi arhiani imeechani engaksï apenasi tembuperaka eskaksï májkueni irekuarhiaka  eska sáno iáminduecha. Pori ejemplu, jamberi taaticha o máteru familiaricha úpirindiksï arhiani eskaksï sóntku kánguarhiauaka sapiichani. O jamberi máru amiguechaksï ambakiti ambe eratseparini, arhiani eskaksï kʼumanchikua ma piákuarhiaka ka eskaksï uánikua ambe piáka paraksï úni agustu irekuarhini.

⁴ Enga temungurhiri ma no jingontku jámaska, úpirindi imani ambe úni enga uaaka eskaksï kánikua sentabu kántspeaka. Ka paraksï úni kuerajchani, tsimarhanksï jatsipirindi para kánikua ánchikuarhini. Ísï jimbo, nóteruksï xáni tiempu jatsipirindia paraksï Bibliani jorhenguarhini, familieri jorhenguarhikua jatsini ka paraksï aianhpini. Jamberiksï asta niárapirindi tsïtakuarhiani máru tánguarhikuechani, jimbokaksï jatsipiringa para sánderu ánchikuarhini paraksï sánderu sentabu andani o paraksï no tsïtani imeecheri ánchikuarhitani. Ini ambe jimbo, úpirindiksï ambakiti ambe tsïtakuarhini paraksï sánderu sési marhuakuni Tata Diosï Jeobani.

5. ¿Ambejtsï jorhenguarhisïni chá Klaus ka Marisaeri ejemplu jingoni?

⁵ Uánikua ejempluechaksï jarhasti engaksï xarhatajka eska kánikua ánchikuarhini para jatsikuarhekua ambe jatsini, no úsïnga eska ma tsípikua jingoni irekuarhiaka. I ambeksïsï úkuarhinchapti Klaus ka Marisa. * Engaksï tembuperapka, interu semanaksï tsimarhani ánchikuarhisïreendi paraksï úni sési irekuarhini. Peruksï no tsípikua jingoni irekaspti. Klaus uandantasïndi: “Uánikua ambe jatsikuarhespka, asta sánderu jamberi eska ima ambe engachi uétarhincheenga, joperuchi no ma ambe úsïreenga parachi sánderu sési marhuakuni Tata Diosïni. Paraksïni jurhimbitku aianguni, uandanhiatechanchi jatsiasïreenga ka kuatantaspkachia”. Jamberijtsï chájtu kuenta íntskukuarhekia eska kánikua ánchikuarhini para jatsikuarhekua ambe jatsini, no úsïnga eska ma tsípikua jingoni irekuarhiaka. Peru asï chkétakuarhi je, máteruecheri ejempluksïni uaati jarhuatani. Orheta, exeakachi ambeksï uaa jorhenguarhini acheeticha rei Jeosafatiri ambe.

6. Eska na uandajka konseju enga Proverbios 3:5, 6 jimbo jaka, ¿néna orhepani uérakuspi rei Jeosafati uandanhiatani ma?

⁶ Acheeticha, ¿niárasïntsï ménisï kánikua uandanhiani xáni uánikua ambe jimbo engajtsï jatsika para úni? Enga ísïika, rei Jeosafatiri ejempluksïni jarhuataati. Ima jatsispti para kuájchakuni iretani. Ka para ísï úni, uaaspti kʼérati bardechani engaksï uirhipandapka Judá anapu iretechani ka tánantaspti kʼéri ejersituni ma engaksï jukari 1,160,000 sondaduepka (2 Crón. 17:12-19). Ísï tátsekua, kʼéri uandanhiata ma jatsispti. Jeosafati, imeeri familia ka ireta, úpirindiksï no sési úkuarhinchani, jimboka Ammóni anapuecha, Moabi ka Seíri anapuecha engaksï juátarhisï irekapka, uékasïrendiksï no sési úkuani (2 Crón. 20:1, 2). ¿Ambe úspi Jeosafati? Jarhuajperata kurhakuspti Tata Diosï Jeobani ka uinhapikua, ísï eska na uandajka ambakiti konseju enga Proverbios 3:5, 6 jimbo jaka (arhinta je). Ima kómarhikua  enga kaxumbikua jingoni úpka ka enga 2 Crónicas 20:5-12 jimbo jaka, xarhatasïndi na enga xáni mintsinharhienga Jeosafati imeeri Taati auandarhu anapuni enga xáni uékpitiika. ¿Néna mókukuspi Tata Diosï Jeoba?

7. ¿Néna mókuntaspi Tata Diosï Jeoba Jeosafatiri kómarhikuani?

⁷ Lebitani ma úraparini enga Jaasieli arhinheenga, Tata Diosï Jeoba mókukuspti Jeosafatini. Arhispti: “Ní je niárani chaari lugaricharhu, ísku pakara je ka exe je na engaksïni pʼímutantajka Tata Diosï Jeoba” (2 Crón. 20:13-17). ¡Arhispti eska úpiringa ambe ma enga no méni únheenga uarhiperata ma jimbo! Joperu i ambe no kʼuiripueri juramukua máespti, Tata Diosï Jeobasï arhini japti eska i ambe úpiringa. Jeosafati mintsinharhispti imeeri Tata Diosïni ka úspti ambe enga ima arhipka. Enga rei Jeosafati ka imeeri ireta nípkaksï uarhiperani imeeri enemiguecha jingoni, ima no orhepani peeraaspti sánderu ambakiti sondaduechani, sánderu sési, imeechani peeraspti engaksï no ma arma kámenga ka engaksï pirepani japka. Ísï eska Tata Diosï Jeoba na aiakupka Jeosafatini, andaspti imeeri enemiguni (2 Crón. 20:18-23).

8. ¿Ambeksï uaa jorhenguarhini acheeticha Jeosafatiri ejemplu jingoni?

⁸ Acheeticha, ¿ambejtsï uaa jorhenguarhini Jeosafatiri ejemplu jingoni? Chájtsï jatsiska para exeni eska chaari familia sési jauaka, jimbojtsïsï jánguarhintajka jarhuatani ka kuájchakuni. Ísï jimbo, engaksï uandanhiatecha jarhajka, jamberijtsï eratsejka eskajtsï uaaka jandiajku sési peuantani. Joperu asï méni eratsi je eskajtsï uaaka jandiajku orhepani uérani. Sánderu sési, jandiajku kómarhi je Tata Diosï Jeobani ka arhi je eskaksïni jarhuataaka. Ístu mintsita jingoni kómarhi je Tata Diosïni chaari uarhiiti jingoni. Exe je ambe enga uandajka Tata Diosï Jeoba Bibliarhu ka publikasionicharhu enga organisasioni petaajka ka tátsekua ísï ú je eska jimini na arhijka. Jamberiksï máru kʼuiripuecha no sési exeati engajtsï chá Bibliarhu jupindaskuarhiaka parajtsï exeni ambe engajtsï uaaka ka astaksïni arhini eska ísku ambeeska inde ambe. Jamberiksïni arhiati eska sánderu jukaparhakua ambe engajtsï uaaka íntskuni chaari familiani, jindeeska sentabu ka jatsikuarhekua ambe. Joperu miá je Jeosafatiri ejempluni, ima mintsikaspti Tata Diosï Jeobani ka úkuecha jingoni xarhataspti. Tata Diosï Jeoba no méni jurajkuspti ini xáni ambakiti acheetini ka ístuksïni no méni jurajkuati chánksïni (Sal. 37:28; Ebr. 13:5). ¿Ka ambeksï uaa úni temungurhiricha paraksï úni tsípikua jingoni irekani?

9. ¿Ambechi uaa uandani profeta Isaíasiri ka imeeri témbeeri?

⁹ Isaíasi ka imeeri uarhiiti méntkisïksï marhuakuspti Tata Diosï Jeobani. Isaíasi profetespti ka péringa imeeri témba sáno májkueni jásï ambe ueenga, jimboka Biblia arhisïnga “profetisa” (Is. 8:1-4). I temungurhiri sánderu jukaparharasïreendi kómarhini Tata Diosï Jeobani. Ísïisti, Isaíasi ka imeeri témba, ambakiti ejempluestiksï para iásï anapu temungurhiricha.

10. Paraka temungurhiri ma uékaaka sánderu marhuakuni Tata Diosï Jeobani, ¿néna jarhuataua engaksï márku jorhenguarhiaska Biblieri profesiechani?

¹⁰ ¿Ambeksï uaa úni temungurhiricha paraksï májkueni úni eska Isaíasi ka imeeri témba? Jánguarhintani sánderu marhuakuni Tata Diosï Jeobani. Paraksï sánderu mintsikani Tata Diosïni, uaatiksï tsimarhani Biblieri profesiechani jorhenguarhiani ka exeni na engaksï ícha méntkisï úkuarhijka (Titu 1:2). * Uaatiksï eratsentani na engaksï uaaka jarhuajpeni paraksï  kumplirikuarhini profesiecha, komu ima enga Jesúsi uandapka eska ambakiti aianhperakua, aianhpinhapiringa interu parhakpinirhu ante de jurhani kʼamajkukua (Mat. 24:14). Engaksï sánderu seguru jauaka eskaksï úkuarhixaka Biblieri profesiecha, sánderuksï uékaati marhuakuni Tata Diosï Jeobani.

11. ¿Ambeksï úspi úni Prisila ka Ákila, ka andi?

¹¹ Temungurhiricha engaksï sapichku jaka, uaatiksï uánikua ambe jorhenguarhini Prisileri ka Ákileri ambe, temungurhiri ma engaksï judiuepka ka engaksï Roma irekani japka. Engaksï kurhaapka ambakiti aianhperakua Jesúsiri ambe, kristianuksï úkuarhispti. Sésiksï pʼikuarhereendi na engaksï irekani japka. Joperu iámindu ambe mójtakurhispti enga Roma anapu juramuti Klaudiu uandapka eskaksï judiuecha nóteru úpiringia Roma irekani. Ju je eratsentani ambe enga arhikuekeenga i ambe para Ákila ka Prisila. Jatsisptiksï para jurajkuni jima engaksï irekani japka, máteru kʼumanchikua jirinhani ka máteru ireta jimboksï jatsini imeecheri negosiuni enga jindeepka kʼumanchikua sïkuiriri uaani. ¿Úspi i ambe eskaksï nóteru xáni jánguarhintapiringia Tata Diosïni marhuakuni? Míteskachi ambe engaksï úpka. Engaksï Korintu japkia ueenasptiksï jarhuatani kúnguarhikuani ka jarhuatasptiksï apostoli Pabluni uinhaperantaani erachichani. Sánderu tátsekua, mótsisptiksï máteru iretecha jimbo nani enga uétarhini japka eska aianhpinhapiringa (Uku. 18:18-21; Rom. 16:3-5). ¡Uánikua ambeksï úspti úni ka seguru eskaksï tsípikua jingoni irekapka!

12. ¿Andiksïsï temungurhiricha jatsi para uandontskuarheni ambeksï jatsiski para úni paraksï sánderu marhuakuni Tata Diosï Jeobani?

¹² Iásï anapu temungurhiricha, uaatiksï májkueni úni eska Prisila ka Ákila engaksï orheta peeraaska Tata Diosïri ambe. Sánderu sési jarhasti eskaksï uandontskuarheaka íri ambe, jiáni engaksï nobiueuaka. Enga temungurhiri ma sési eratsekata jatsijka ambe enga uaaka para sánderu marhuakuni Tata Diosïni Jeobani ka enga jánguarhintajka ísï úni, úsïndi exeni na enga jarhuajpejka espiritu santu (Ecl. 4:9, 12). Ju je exeni Russell ka Elizabethiri ejempluni. Russell uandasïndi: “Engachi nobiuepka, uandontskuarhesïrengachi ambe engachi úpiringa parachi sánderu marhuakuni Tata Diosï Jeobani”. Elizabeth uandasïndi: “Uandontskuarhesïrengachi íri ambe, paraka  jiáni enga tiempuepiringia parachi sánderu marhuakuni Tata Diosïni, no ma ambe japiringa engajtsïni ójkutapiringa”. I temungurhiri úspti mótsini Micronesia para jima marhuani nani enga uétarhini japka aianhpini.

13. Eska na uandajka Salmo 28:7, ¿ambe úkuarhia engachi mintsinharhiska Tata Diosï Jeobani?

¹³ Májkueni eska Russell ka Elizabethi, uánikua temungurhirichaksï eratsestia arisku sáni irekani paraksï sánderu tiempu úrani paraksï aianhpini ka jorhentpini. Enga temungurhiri ma eratsejka sánderu marhuakuni Tata Diosï Jeobani iámu mintsita jingoni ka engaksï jánguarhintajka ísï úni, uánikua kóntperatechanksï jatsiauati. Exeatiksï na enga Tata Diosï Jeoba kuidariuajka, sánderuksï mintsikaati ka tsípikua jingonksï irekaati (arhinta je Salmo 28:7).

14. ¿Néna xarhataspi apostoli Pedru ka imeeri témba eskaksï mintsikasïreenga ambe enga Tata Diosï aiatspijka jimini Mateu 6:25, 31-34 jimbo?

¹⁴ Máteru ambakiti ejemplu para temungurhiricha, jindeesti apostoli Pedru ka imeeri témba. Ma seisi kutsï o ma uéxurhinisï tátsekua enga Pedru mítepka Jesúsini, Pedru jatsispti para jukaparhakua ambe erakuni úni. Imeeri ánchikuarhita jindeespti kurucha pʼitamaani, ísï jimbo, enga Jesúsi pʼímarhipka paraka nipiringa imani chúxapani, Pedru jatsispti para eratseni néna jámapirini imeeri familia jingoni (Luk. 5:1-11). Niraspti Jesúsi jingoni aianhpini. ¡Ambakiti ambe erakuspti úni! Ka uánikua ambe jarhasti engachi jimbo uaaka jakajkuni eska imeeri témba apoiarispka. Biblia uandasïndi eska ísï tátsekua enga Jesúsi tsíntapka, Pedrueri témba niraspka pámbetani Pedruni ma tiempu (1 Kor. 9:5). Seguruchi jarhaska eska Pedrueri témba ambakiti ejemplu máespka, jimboka jarhuataspka Pedruni paraka úpiringa konseju íntskuani acheetichani ka ístu uarhiitichani (1 Ped. 3:1-7). Xarharasïndi eska Pedru ka imeeri témba, kánikuaksï mintsikasïreenga eska Tata Diosï Jeoba úpiringa íntskuani ambe engaksï uétarhinchapiringa engaksï imeecha orheta peerapiringa Tata Diosïri Reinuni (arhinta je Mateu 6:25, 31-34).

15. ¿Ambejtsï jorhenguarhisïni chá ambe enga nitamakuarhipka Tiago ka Estheri?

¹⁵ Ka engajtsï chá sáni ióni páni jakaia temungurhiri, ¿ambejtsï uaa úni parajtsï mintsita jingoni uékani marhuakuni Tata Diosïni? Exeparini ambe engaksï újka máteru temungurhiricha. Pori ejemplu, úpiringajtsï arhintani jorhenguarhikuechani engaksï arhinhajka “Tsípikua jingonksï aiatspekuarhesti para marhuani”. Indeni ambeksïsï úpti Tiago ka Estheri, temungurhiri ma engaksï Brasil anapueka. Inde jorhenguarhikuechaksï jarhuataasti parakaksï uékapiringa marhuani nani enga sánderu uétarhini japka. Tiago uandasïndi: “Arhintani na enga Tata Diosï Jeoba jarhuataani jaka imeeri marhuarichani iásï, ústi eskachi jucha uékapiringa exeni na engajtsïni Tata Diosï Jeoba jarhuatajka ka kuidarini”. Sánderu orhepatini, i temungurhiri Paraguay mótsispti ka jimaksï marhuaxati desde 2014 uératini, idioma portugués jimbo. Estheri uandasïndi: “Kánikuachi tsitisïnga ambe enga arhijka Efesu 3:20. Nani engachi jucha marhuani jaka, méminduchi exeskia eskaksï úkuarhiskia ambe enga uandajka inde karakata”. Apostoli Pablu karta ma jimbo enga karakuapka Efesu anapuechani, uandaspti eskajtsïni Tata Diosï Jeoba íntskupiringa sánderu ambe ka eska ima ambe engachi jucha kurhakujka ka i ambe méntkisï ísï úkuarhixati.

16. Temungurhiricha engaksï sapichku jaka, ¿neechanksï uaa konseju kurhakuani engaksï eratseni jaka sánderu marhuakuni Tata Diosïni?

¹⁶ Temungurhiricha engajtsï sapichku jaka, chájtsï uánikua ambe uaaka jorhenguarhini  imeecheri engaksï pʼindekia mintsinharhini Tata Diosï Jeobani. Máru temungurhirichaksï ióni páxatiia tiempu kompletueri marhuani. ¿Andisïjtsï no konseju kurhakuajki engajtsï uétarhinchani jauaka jarhuajperata parajtsï exeni nénajtsï uaa sánderu marhuakuni Tata Diosïni? I jindeesti ma ambe engajtsï jimbo uaaka xarhatani eskajtsï mintsikasïnga Tata Diosï Jeobani (Prov. 22:17, 19). Orhejtsïkutichajtuksïni ístu uaati jarhuatani parajtsï úni exeni nénajtsï uaa sánderu marhuakuni Tata Diosïni ka parajtsï niárani ísï úni.

17. ¿Ambeksï úkuarhinchaspi Klaus ka Marisa, ka ambechi jorhenguarhisïni imeecheri ejemplu jingoni?

¹⁷ Ménisï, engachi jucha eratsetini jarhajkia úni ambe ma parachi sánderu marhuakuni Tata Diosï Jeobani, jamberi inde ambe no ísï uéraati eskachi na erokuarhini japka. Ju je exeni ménderu Klaus ka Mariseri ejempluni engachi ueenakuarhu uandaapka. Tanimu uéxurhini tátsekua engaksï na tembuperapka, jurajkusptiksï imeecheri kʼumanchikuani ka nirasptiksï Finlandia anapu Betelirhu paraksï konstruksionirhu jarhuajpeni. Joperuksï tátsekua mítespti eskaksï no úpiringa jukari seisi kutsï pakarani. Ueenakuarhu kánikuaksï kómu pʼikuarheraspti, joperu ísï tátsekua, pʼímarhinhasptiksï para jorhenguarhini arabe uandani. Ka iásïksï kánikua tsípikua jingoni marhuaxatiia paisi ma jimbo enga arabe uandanhajka. Engaksï eratsentajka ambe engaksï xáni úkia, Marisa uandasïndi: “Ueenakuarhu, kánikuari chésïreenga jurajkuni iámindu ambe ka mintsita jingoni mintsikani Tata Diosï Jeobani, peruni kuenta íntskukuarheskia eskajtsïni ima méntkisï jarhuatasïnga, ménichani imani ambe jingoni engachi no erokuarhini jarhajka. Iámindu ini ambe exeparini, iásï sánderuni mintsikasïngia Tata Diosïni”. Eskachi na exekia, uaakachi seguru jarhani eskajtsïni Tata Diosï Jeoba méntkisï újchakuraaka jimbokachi jucha mintsita jingoni mintsikasïnga.

18. ¿Ambeksï uaa úni temungurhiricha paraksï seguirini mintsikani Tata Diosï Jeobani?

¹⁸ Temungurhirikua Tata Diosï Jeobaeri intsïmperakua máesti ka ima uékasïndi eskaksï temungurhiricha tsípikua jingoni irekaaka (Prov. 5:18; Mat. 19:5, 6). Temungurhiricha engaksï sánderu sapichku jaka, ¿andijtsïsï no eratsentajki ambejtsï úxaki chaari tsípikua jingoni? ¿Úxakijtsï ambe enga xáni uétarhijka parajtsï xarhatakuni Tata Diosï Jeobani eskajtsï agradesidu jarhaska imani ambe jimbo engaksïni xáni íntskuni jaka? Uandontskuarhi je Tata Diosï Jeoba jingoni, jirinha je imeeri Karakatarhu konsejuechani engaksïni uaaka jarhuatani ka ísï ú je eskaksïni ima na arhini jaka. Uaakajtsï seguru jarhani eska engajtsï orheta peeraska Tata Diosï Jeobani marhuakuni sánderujtsï tsípikua jingoni irekuarhiaka.