1. ¿Nénaksïni pʼikuastasïndi Tata Diosïri uékperakua?

APOSTULI Juanu karaspti eska “Diosï jindeeska uékperakua” (1 Juanu 4:8). Míteskachi eska Tata Diosï kueraaska tsípikuani, joperu i namunitu uandakuechajtsïni miátantasïndi eska uékperakua imani jimboeska. Jeobajtsïni xénchasïndi, ka imeri uékperakua úsïndi eskachi seguru pʼikuarheraaka, tsípini ka eskachi sési pʼikuarheraaka.

2. a) Eska na arhijka Mateu 22:37-40, ¿nákiskiksï tsimani juramukuecha engaksï sánderu jukaparhakueka? b) ¿Andichisï úpirini sánderu úkua jukanchani kurhajchani segundu juramukuani?

² Para kristianuecha, juramukua máesti uékperakua xarhatani, no ambe ma engaksï uáka erakuni úni (arhinta je Mateu 22:37-40). Engachi sánderu mítejka Jeobani sánderuchi no úkua jukanchasïnga úni ambe enga uandajka primeru juramukua ka úsïngachi úni ini ambe jimboka Jeoba perfektueska ka méntkisïjtsïni sési kámasïndi ka xarhatachesïndijtsïni eska uandanhiasïnga juchantsïni jimbo. Joperuchi úpiringa sánderu úkua jukanchani kurhajchani segundu juramukuani. ¿Andi? Jimboka erachicha ka pirenchichaksï no perfektueska ka úpirindiksï úni o uandani ambe ma engajtsïni no sési pʼikuastaaka. Ini ambe eratseparini, Jeoba ústi eskaksï máru engaksï Bibliani karaka uandapiringa néna ka andisï uétarhijki uékperakua xarhatatsperani. Ma jindeespti Juanu (1 Juanu 3:11, 12).

3. ¿Amberi ambe sánderu uandaspi Juanu?

³ Libruechani enga Juanu karaaka, méntku úndaspti uandani eskachi kristianuecha jatsiska para uékperani. Asta imeri Ebanjeliu jimbo sánderu uánikua xanhari uandasïndi uékperakueri ambe eska máteru tanimu Ebanjeliuecha jimbo. Ima, ma 100 uéxurhini jatirisptia enga espiritu santueri jarhuajperata jimbo karapka  imeri Ebanjeliuni ka imeri tanimu kartechani. Ambe enga Juanu karaka xarhatasïndi eska ma uékperakua jimbosï jatsika para úni ambe ma (1 Juanu 4:10, 11). Joperu asta Juanu sáni ióndaspti ini ambe jorhenguarhini úni.

4. Uanda je káni no uékperakua jingoni kámpispi Juanu.

⁴ Enga Juanu tumbiipka, no méntkisï uékperakua xarhataspti. Ma xanhari enga Jesusi ka imeri chúxapaticha Samaria teruakuni japka paraksï Jerusaleni nirani, ireta sapichu ma jimbo jini Samaria nóksï sési eronhaspti. ¿Ambe úspi Juanu? Uékaspti úni eska auandarhu uératini uékorhipiringa chpiri para kʼamajkuani iámindu iretarhu anapuechani (Luk. 9:52-56). Máteru xanhari jimbo, Juanu no xarhatakuaspti uékperakua máteru apostulichani. Imeri ermanu jémba Santiagu jingoni úsptiksï eska imeri amamba kurhakupiringa Jesusini parakaksï uaxakapiringa imani jingoni auandarhu imeri Juramukuarhu. Engaksï máteruecha mítepka indeni ambe kánikuaksï ikiaspti (Mat. 20:20, 21, 24). Nájkiruka Juanu úpka ini ambe enga no sési japka, Jesusi xénchasïrendi (Juanu 21:7).

5. ¿Ambechi exea ini jorhenguarhikua jimbo?

⁵ Ini jorhenguarhikua jimbo, exeakachi ambechi uá jorhenguarhini Juanueri ambe ka ístu máteru amberi enga karapka uékperakueri ambe. Jorhenguarhiakachi nénachi uá xarhatakuani eskachi uékaasïnga juchari erachichani ka ístuchi exeaka jukaparhakua ambe engaksï uáka úni imecha engaksï orhejtsïkujka familiani ma paraksï úni uékperakua xarhatakuni imecheri familiani.

6. ¿Ambe úski Jeoba parajtsïni xarhatacheni eskajtsïni xénchasïnga?

⁶ Enga kʼuiripu ma xénchajka máteruni, no solu uandakuecha jingontku arhisïndi. Jatsisti para úkuecha jingoni xarhatani eska meru xénchasïnga (terukutanta je Santiagu 2:17, 26 jingoni). Por ejemplu, Jeobajtsïni xénchasïndi (1 Juanu 4:19). Ka xarhatachesïndijtsïni sési járhati uandakuecha jingoni engaksï Bibliarhu jaka (Sal. 25:10; Rom. 8:38, 39). Joperuchi míteska eskajtsïni Tata Diosï xénchasïnga no solu imani ambe jimbo engajtsïni arhijka, sino ístu imani ambe jimbo enga újka. Juanu karaspti: “Íni jimbo xarharasïndi na engajtsïni xáni uékajka Diosï, jimboka ima axaska imeri máechakua Uájpani parhakpinirhu paraka jucha jatsipiringa tsípikua imani jimbo” (1 Juanu 4:9). Jeoba jurajkuspti eska imeri Uájpa enga ima xáni xénchajka no sési nitamakuarhipiringa ka eska uarhipiringa juchantsïni jimbo (Juanu 3:16). Ísï jimbochisï seguru jaka eskajtsïni ima xénchasïnga.

7. ¿Néna xarhataski Jesusi eskajtsïni xénchasïnga?

⁷ Jesusi arhiaspti imeri chúxapatichani eska xénchaasïrenga (Juanu 13:1; 15:15). Ima  xarhatakuaspti na enga xáni xénchauenga imechani ka ístu juchantsïni no solu imeri uandakuecha jimbojku, sino ístu imani ambe jimbo enga úka. Jesusi uandaspti: “No nema jarhasti enga sánderu uékpijka ka eska ima enga tsípikua íntspiaka imeri amigu jémbechani jimbo” (Juanu 15:13). Engachi eratsentajka ambe enga Jeoba ka Jesusi úka juchantsïni jimbo, ¿ambechi jatsiski para úni?

8. Eska na arhijka 1 Juanu 3:18, ¿ambechi jatsiski para úni?

⁸ Xarhatasïngachi eskachi xénchasïnga Jeobani ka Jesusini engachi kurhajchaajka (Juanu 14:15; 1 Juanu 5:3). Ka Jesusijtsïni juramuchisti eskachi uékperaaka máteru ka máteruni jingoni (Juanu 13:34, 35). Jiájkani jatsiskachi para arhiani juchari erachichani eskachi xénchaasïnga ka ístu úkuecha jingoni xarhatakuani (arhinta je 1 Juanu 3:18). Joperu, ¿ambe ka ambechi uá úni parachi xarhatakuani eskachi xénchaasïnga?

9. ¿Ambe úspi Juanu xénchperakua jimbo?

⁹ Juanu úpirindi imeri táti jémba jingoni pakarani ka uánikua sentabu andani imecheri negosiu jimbo enga jindeepka kurucha pʼímaani. Joperu no ísï úspti, sánderu sési, úraspti imeri tsípikuani para jarhuataani máteruechani paraksï jorhenguarhini jurhimbikua ambe Jeobaeri ka Jesusiri ambe. Ambe enga erakupka úni imeri tsípikua jingoni no fásilispti. No sésiksï kámaspti ka enga kʼamarani jámengia primeru siglu, enga Juanu na jatiripkia iauani ísïksï páspti (Uku. 3:1; 4:1-3; 5:18; Jaŋ. 1:9). Nájkiruka ónhakata japka jimbo Jesusiri ambe aianhpisïrenga, xarhataspti eska xénchaasïrenga máteruechani. Jiáni enga islarhu japka enga Patmosi arhinhenga, karaspti imani jánhaskakuani enga intsïnhapka ka axakuaspti kúnguarhikuechani parakaksï mítepiringa “indeni ambe enga úkuarhiaka no ióni jimbo” (Jaŋ. 1:1). Tátsekua, enga na uéntapkia Patmosi, Juanu karaspti imeri Ebanjeliuni enga uandajka Jesusiri tsípikueri ambe ka imeri aianhpikueri ambe. Ístu, karasti tanimu kartechani para uinhaperantaani imeri erachichani. ¿Nénachi uá májkueni úni eska Juanu nájkirukachi no sési kánhaaka?

10. ¿Nénachi uá xarhatani eskachi xénchaasïnga kʼuiripuechani?

¹⁰ Uákachi xarhatani eskachi xénchaasïnga máteru kʼuiripuechani imani ambe jimbo engachi erakuska úni juchari tsípikuarhu. Noambakitiri parhakpini tsitipirindi eskachi úrapiringa iámu juchari tiempu ka uinhapikua parachi káni sentabu jatsikuarheni o parachi kánikua mítekateeni. Joperu interu parhakpinirhu, jarhastiksï kristianuecha engaksï aianhpini jaka ambakiti aianhperakuani ka engaksï jarhuataani jaka máteru kʼuiripuechani paraksï andarhierani Jeobani. Máruksï asta tiempu kompletu úsïndi i ambe.

11. ¿Nénaksï xarhatasïni uánikua erachicha eskaksï xénchasïnga Jeobani ka ístu erachichani?

¹¹ Uánikua kristianuechaksï jatsisti para interu semana ánchikuarhini paraksï kéndaani imecheri familiechani. Nájkirukaksï ísï újka, jánguarhintasïndiksï mámaru ambe jimbo jarhuajpini Tata Diosïri kúnguarhikuarhu. Por ejemplu, ánchikuarhitarhu para jarhuajpini, máteruechaksï konstruksionirhu ánchikuarhisïndi ka iáminduechachi uáka íntspini donasioni para ánchikuarhita enga ma parhakpinirhu úkuarhijka. Ini ambe jimboksï xarhatasïndi eskaksï xénchasïnga Tata Diosïni ka ístu kʼuiripuechani. Ístu, mándani semanachi xarhatakuasïnga uékperakua juchari erachichani engachi nirajka tánguarhikuecharhu nájkirukachi kuataratini jarhajka ka engachi partisiparijka nájkirukachi chéni jarhajka. Ka engachi jánguarhintajka uinhaperaantani máteruechani  antede tánguarhikua uénani ka ísï tátsekua, nájkirukachi juchajtu uandanhiatechani jatsiajka (Ebr. 10:24, 25). Kánikuachi jukaparharasïnga iámindu ambe engaksï újka juchari erachicha.

12. ¿Ambe máteru ambe úspi Juanu para xarhatani eska xénchaasïrenga imeri erachichani?

¹² Juanu xarhatakuaspti imeri erachichani eska xénchaasïrenga jimboka sési arhiasïrenga, ka jimboka konseju íntsaasïrenga. Por ejemplu, imeri kartecharhu sési ambe arhiaspti imecheri jakajkukua jimbo ka imecheri ambakiti úkuecha jimbo, joperu ístu arhiaspti eskaksï jingontku jámapiringa paraksï no pekadu ambe úni (1 Juanu 1:8–2:1, 13, 14). Májkueni eska Juanu, juchajtuchi jatsiska para sési ambe arhiani juchari erachicha imani ambe jimbo engaksï sési újka. Joperu engachi exeaka eska nema uénaxaka no sési jásï jángua ma xarhatani o uénani no sési ambe úni, uákachi xarhatakuni eskachi xénchasïnga engachi iatsitakuarhu arhiska ambe enga no sési úni jaka. Balori uétarhisïndi para i ambe úni, joperu Biblia uandasïndi eskaksï ambakiti amiguecha konseju íntsperasïnga (Prov. 27:17).

13. ¿Ambechi no jatsiski para úni?

¹³ Ístuchi uáka xarhatakuani eskachi xénchaasïnga juchari erachichani ka pirenchichani engachi no úska máru ambe, komu no sóntku ikiani imani ambe jimbo engaksï máteruecha uandaaka. Ju je miáni ambe enga úkuarhipka antede Jesusi uarhini. Ima arhiaspti imeri chúxapatichani eskaksï jatsipiringa para arhani imeri kʼuiripeta ka imeri iurhirini paraksï úni jatsini tsípikua para méntkisï (Juanu 6:53-57). Uánikua imeri chúxapatichaksï no tsitispti ambe enga uandapka ka nóteruksï chúxapasptia. Joperu imeri ambakiti amiguechaksï komueska Juanu nóksï jurajkuspti ka imani jingonksï pakaraspti. Nóksï kurhanguspti ambe enga Jesusi uandapka ka seguru eska inde ambe ísku pakataapka, joperuksï no ikiaspti niksï uandapi eska no sési jarhaspka ambe enga Jesusi uandapka. Sánderu sési, mintsikasptiksï Jesusini, jimbokaksï mítespti eska méntkisï jurhimbikua ambe uandasïrenga (Juanu 6:60, 66-69). Ísï jimbo, kánikua jukaparhakuesti eskachi no sóntku ikiauaka imani ambe jimbo engaksï juchari erachicha uandaaka, sino kurhamarhiani ambe engachi no kurhanguaka (Prov. 18:13; Ecl. 7:9).

14. ¿Andichisï no jatsi para kurhunhiani juchari erachichani?

¹⁴ Juanu ístujtsïni arhisti eskachi no jatsiska para kurhunhiani juchari erachichani. Engachi no ísï úska, imani ambechi úni japiringa  ambe enga Noambakiti uéjka (1 Juanu 2:11; 3:15). I ambeksï úkuarhinchaspti máru, jiáni enga primeru siglu kʼamarani jámengia. Imani tiempuni Noambakiti kánikua jánguarhintaxapti paraka Tata Diosïri marhuaricha kurhunhperapiringa ka paraksï no májku kʼéri jarhani. Enga Juanu karakuapkia ini kartechani, ima kʼuiripuecha engaksï ísï eratsenga eska Noambakiti tʼuinksï kúnguarhikuarhu jarhasptia. Komueska Diotrefesi, enga úni japka eska kúnguarhikua arhukurhipiringa. No sáni janhanharhiasïrendi imani orhejtsïkutichani engaksï nirenga pʼorhembiani kúnguarhikuechani enga Grupu enga Orhejtsïkuajka iámindu kúnguarhikuechani axauenga. Xáni kʼéramakuarhisïrendi enga jamberi uékenga petantaani kúnguarhikuarhu uératini imechani engaksï sési eroauenga imani erachichani enga Diostrefesi no jaiapanheantauenga (3 Juanu 9, 10). Ístu iásï, Noambakiti kánikua jánguarhintaxati paraka Tata Diosïri ireta arhukurhitini jauaka. Ju je no méni jurajkuni eskajtsïni kurhunhperakua arhukuaka.

15. ¿Ambeksï jatsiski para miáni familieri orhejtsïkuticha?

¹⁵ Ma ambe enga kánikua jukaparhakueka eska uáka familieri orhejtsïkuti ma para xarhatani eska xénchasïnga imeri familiani, jindeesti eska kéndauaka (1 Tim. 5:8). Joperu jatsisti para méntkisï miáni eska ambe enga sánderu jukaparhakueka, jindeeska jarhuatani imeri familia parakaksï ambakiti pájperakua ma jatsiaka Jeobani jingoni (Mat. 5:3, TNM). Ju je exeni Jesusiri ejempluni. Seguni eska na arhijka Juanueri Ebanjeliu, enga Jesusi cháparhakata japkia, ima útasï uandanhiaxapti imeri familiani jimbo. Juanu ka Jesusiri amamba Maria, jimaksï jarhaspti nani engaksï uandikuni japka Jesusini. Nájkiruka Jesusi xáni kómu nitamakuarhini japka, kurhakuspti Juanuni eska kuidaripiringa amambani (Juanu 19:26, 27). Maria kaasïrendi máteru uájpechani engaksï úpiringa kéndani, joperu péringa nótki ma Jesusiri chúxapatipka. Ísï jimbosï Jesusi uékendi nemani enga kuidaripiringa Mariani ka enga jarhuatapiringa para seguirini jarhani Jeobani marhuakuni.

16. Juanu, ¿ambe ka ambe jatsispi para úni?

¹⁶ Juanu uánikua ambe jatsispti para úni. Apostuli máespti ka ísï jimbo jatsispti para orhejtsïkuni aianhpikuani. Ístu, péringa tembuchatipka, enga ísïpka jiáni jatsispti para kéndani imeri familiani ka ístu jarhuataani paraksï  sési pájperani Tata Diosï jingoni (1 Kor. 9:5). ¿Ambeksï uá jorhenguarhini familieri orhejtsïkuticha imeri ambe?

17. ¿Andisï jukaparhakue eskaksï familieri orhejtsïkuticha jarhuatauaka imecheri familiechani sési jarhani Tata Diosï jingoni?

¹⁷ Familieri orhejtsïkutichajtuksï úpirindi uánikua ambe jatsini para úni enga jukaparhakua ambeeka. Jatsistiksï para sési ánchikuarhini paraka imecheri jángua jimbo kʼéri ambe arhinhaaka Jeoba (Efes. 6:5, 6; Titu 2:9, 10). Ístuksï úpirindi uánikua ambe úkua jatsini kúnguarhikuarhu, komu kuidariuani ka uinhaperaantani erachichani ka orhekupaani aianhpikuarhu. Joperu, ístu imasï jatsiti para méntku jorhendaani jarhani témba ka uájpechani Bibliaeri ambe. Ísï úparini, imecheri familiechaksï kánikua jukaparharaati jimbokaksï no ma ambe kueratanchaaka, sésiksï pʼikuarheraati ka sésiksï jauati Tata Diosï jingoni (Efes. 5:28, 29; 6:4).

18. ¿Amberi seguru jarhaspi Juanu?

¹⁸ Juanu ióni irekaspti ka ambakiti ambe nitamanchaspti. Ístu uánikua ambe nitamakuarhispti enga úpiringa úni eska nóteru xáni mintsikapiringia Tata Diosïni. Joperu méntkisï jánguarhintaspti ísï úni eskaksï Jesusiri juramukuecha na uandenga, komu xénchaani imeri erachichani. Juanu seguru jarhaspti eska Jeoba ka Jesusi xénchasïrenga ka eskaksï uinhaperantapiringa paraka úpiringa orhepani uérani na uéjki jásï uandanhiata ma jimbo (Juanu 14:15-17; 15:10; 1 Juanu 4:16). Noambakiti ka imeri parhakpini nóksï úspti eska Juanu no xénchaapiringa imeri erachichani ka xarhataspti i ambe uandakuecha ka úkuechani jimbo.

19. ¿Ambejtsïni pʼímarhisïni eskachi uáka 1 Juanu 4:7, ka andi?

¹⁹ Májkueni eska Juanu, Noambakitiri parhakpini jimbochi irekaxaka, enga kánikua kurhunhperanhajka (1 Juanu 3:1, 10). Ima uékasïndi eskachi nóteru xénchauakia juchari erachichani, joperu no uáti ísï úni engachi jucha no jurajkuska. Ísï jimbo, ju je jánguarhintani méntkisï xénchaani juchari erachichani ka xarhakuani juchari uandakuecha ka úkuecha jingoni. Engachi ísï úska kánikuachi sési pʼikuarheraaka kuenta úkuarhini Jeobaeri familia jingoni ka kánikuachi tsípikua jingoni irekaaka (arhinta je 1 Juanu 4:7).