Harvey orhetespti imeri tʼámu ermanuecheri. Imeri familia mítespti jurhimbikuani kʼéri ireta ma jimbo enga ióntki arhinhenga Midland Junction enga jini Australia Occidental jaka, uéxurhini 1930 jimbo jiáni enga paisirhu kánikua pobrinhapka. Harvey ístu niáraspti xénchani Jeobani ka 14 jatiri itsï atakuarhispti. Ísï tátsekua, jorhenguarhispti méntkisï jiókuarhini ánchikuarhitechani enga kúnguarhikuarhu intsïnhenga. Ma xanhari, enga ima útasï tumbi sapichuepka, arhisptiksï eska arhintapiringa jorhenguarhikuarhu Aianhpiri jingoni, ima no uékaspti jimboka eratsesïrenga eska no úpiringa sési úni. Joperu erachi ma enga uandontskuarhepka Harvey jingoni arhipti: “Jeobaeri kúnguarhikuarhu, engakini nema arhiaka parari úni ambe ma, jindeesti jimboka míteska eskari uáka ísï úni” (2 Kor. 3:5).

Juchiti nándi, juchiti ermana enga orheteka ka ji Inglaterra jorhenguarhiskachi jurhimbikua ambe. Juchiti táti no sáni jaiapanheantasïrendi Jeobaeri testiguechani, joperu tátsekua niáraspti Jeobani marhuakuani. Nájkiruka ima no uékenga, ji itsï atakuarhispka engani 9 jatiripka. Ambe engani uékenga, jindeespti orheta prekursoreni parani tátsekua misionereni. Joperurini papa no jurajkupirindi parani  prekursoreni astakani na 21 andangutapiringa. Ji no uékasïrenga xáni ióni erokuarhini. Ísï jimbo, engani 16 jatiripkia paparini jiarhitaspti parani Australia mótseni juchiti ermana sánderu kʼéri jingoni enga jini irekani japka. Ka engani na 18 andangutapkia uénaspkia marhuani komu prekursora.

Australia mítespka Harveyni. Tsimarhanchi uékasïrenga misionerueni. Uéxurhini 1951 jimbochi tembuperaspka. Engachi na májku kʼéri marhuapkia tsimani uéxurhini komu prekursoricha, pʼímarhisptijtsïni parachi sirkuitueri orhejtsïkutini. Imani iretechani engachi pʼorhembiauenga jini Australia Occidental, kánikuaksï kʼéraspti, ísï jimbochi jatsienga para karru jingoni nirani imani lugaricha jimbo engaksï aparhikuarhienga ka engaksï iauani japka.

Uéxurhini 1954 jimbo, pʼímarhisptijtsïni klaserhu 25 Galaadiri jorhentperakuarhu. ¡Úpiringachia iásï kʼóru misionerueni! Barku jimbochi niraspka Nueva York ka engachi niárapkia, uénaspkachi sánderu sési jorhenguarhini Bibliani. Galaadiri jorhentperakuarhu, jatsispkachi para jorhenguarhini utusï uandani, joperu Harvey úkua jukanchaspti jimboka no úsïrendi arhiani errechani.

Jorhentpirichajtsïni arhispti eska ne enga uékapiringa Japón nirani marhuani, apuntarikuarhipiringa para idioma japonesi jorhenguarhini. Jucha no uékaspka apuntarikuarhini jimbokachi uékasïrenga eskajtsïni organisasioni arhipiringa nanichi marhuapirini. Enga erachi Albert Schroeder, jorhentpiri ma Galaadiri, mítepka eskachi no apuntarikuarhispka, arhisptijtsïni: “Sési eratsenta je”. Ka enga exepka eskachi útasï no seguru jarhaspka, arhisptijtsïni: “Máteru jorhentpiricha ka ji apuntariskaksïnia. Exe je sintsï uá jorhenguarhini japonesi uandani”. Harvey sánderu no úkua jukanchaspti indeni idiomani jorhenguarhini.

Uéxurhini 1955 jimbochi niáraspka Japón. Jiánisï 500 aianhpirichajkuksïsï japti iámu paisirhu. Harvey 26 jatirispti ka ji 24. Ireta Kobe axanhaspkachi ka jimachi marhuaska tʼámu uéxurhini. Tátsekua, ménderujtsïni pʼímarhispti parachi sirkuitueri orhejtsïkutini ireta Nagoya no iauani ka inde ambejtsïni kánikua tsíperaspti. Kánikuachi tsitisïrenga Japón marhuani: erachicha jingoni jarhani, tʼirekua ka na enga xáni sési jándeka... Joperu ísï no ióni jimbo, ménderuchi jatsispka para xarhatani sinchi uékasïreni imani ambe úni enga Jeoba uékenga.

Engachi na marhuapkia tanimu uéxurhini komu sirkuitueri orhejtsïkuti, Japón anapu Betelijtsïni kurhamarhispti sinchi uékasïreni Taiwán nirani parachi imani ireta sapirhaticharhu aianhpini engaksï idioma  amis uandajka. Máru erachicha engaksï amis uandenga apostataksï úkuarhispti, jimbosï Taiwán anapu Beteli uékendi erachini ma enga jorhenapiringa japonesi uandani paraka úpiringa jarhuataani sési peentani ambe ma. * Kánikuachi tsitisïrenga juchari ánchikuarhita jini Japón, jimbochisï úkua jukanchani japka erakuni ambe úni. Joperu Harvey jorhenguarhisptia méntkisï jiókuarhini ánchikuarhita ma enga intsïnhapiringa, jimbochisï nípka.

Nobiembrini 1962 jimbo niáraspkachi Taiwán, jiáni 2,271 aianhpirichaksï jarhaspti. Sáno iáminduechaksï amis uandasïrendi. Iásïchi uétarhinchasïrengia chinu jorhenguarhini uandani ka solu libru májkuchisï jatsipka ka jorhentpirini ma enga no jorhenapka inglesi uandani. Joperuchi úspka jorhenguarhini.

Ísï no ióni jimbo engachi na niárapkia Taiwán, Harvey arhinhaspti para jima anapu Betelini orhejtsïkuni. Jima anapu Beteli no kʼéspti, jimbosï Harvey uéndi úni imeri ánchikuarhitani jima ka nirani aianhpini erachichani jingoni engaksï amis uandenga uánikua xanhari ma mesi jimbo. Ístu, ménichanisï nitamataraasïrendi arhijtsïkperatechani kʼéri tánguarhikuecharhu. Úpirindi nitamataraani arhijtsïkpetatechani japonesi jimbo ka erachicha engaksï amis uandenga úpirindiksï kurhangukuni, joperu jima anapu gobiernu solu jurajkuasïrendi eskaksï relijionicheri tánguarhikuecha chinu jimboepiringa. Ísï jimbo, Harvey chinu jimbo nitamatarasïrendi arhijtsïkperatani nájkiruka nótki sési uandenga indeni idiomani ka erachi ma tradusiripasïrendi amis jimbo.

Jini Taiwán lei ma uaxastanhaspti. Erachichaksï jatsisïrendi para permisu kurhajkuarhini paraksï úni jatsiani kʼéri tánguarhikuechani. Úkua jukasïrendi parachi intsïnhani permisu ka ménisïjtsïni polisia ióndasïrendi íntskuni. Enga ima semanengia para kʼéri tánguarhikua úkuarhini ka nótkichi intsïnhani jarhani permisu, Harvey nirasïrendi jusgadurhu ka jima uaxandisïrendi astakaksï íntskupiringa. Polisiechaksï kʼuratsesïrendi enga uérakua anapu ma jusgadurhu japiringa erokuarhini, indeni ambe úni marhuasïrendi.

Engachi nirenga erachicha jingoni aianhpini, sáno méntkisï ma ora o sánderu ióndasïrengachi karhamani juátecharhu ka riuechani parhikuani. Miásïnga engani primeru xanhari karhamapka juátarhu ma. Xarhentku ka sóntkuchi tʼirespka ka sinkuimedia autobusinchi ma jatapaska parachi ireta sapichurhu ma nirani enga iauani japka. Parhikuspkachi riuni ma ka karanharhikuspkachi juátani ma. Juáta kánikua karhanchimaspti jimbosï ima erachiri jantsiricha engareni orhepachini japka éskuecharhurini niárachendi.

Imani tsípa, Harvey jima anapu máru erachicha jingoni aianhpixapti ka ji jandiajku aianhpixapka ireta sapichurhu ma enga japonesi uandanhenga. A la unisï chkespkia jimbokani no tʼirexapka. Engachi exejperantapkia Harvey jingoni, erachichaksï tʼuini nintasptia. Harvey tanimu blankiiuechani intsïnhaspti máru rebistechani jimbo. Imarini jorhendaspti blankiiu tsírku arhani, tsimapuruchi pʼorhojtakuasïrenga ka xurundisïrengachi ma ladu jimbo. Nájkirukani no anhenchenga, arhaspka máechakua. Joperu, ¿ne apirinia máteruni? Ji arhaspka, jimbokarini Harvey no úpirindi kamanharhitini késkuntani juátarhu uératini engani sési mirikurhipiringa xáni kʼarhimani.

Ma xanhari, sirkuitueri kʼéri tánguarhikua ma jimbo, nitamanchaspka ambe ma engani no erokuarhini  japka. Erachi ma jingonchi pakaraspka enga Kʼumanchikua Reinuerirhu máekanda irekapka. Para kʼuiripuecha engaksï amis uandajka kánikua jukaparhakuesti jikuani. Jimbosï sirkuitueri orhejtsïkutiri témba iámu ambe listu jatsipti parachi jikuani. Jimboka Harvey kánikua ambe jatsispka para úni, arhisptirini eskani ji orheta nipiringia jikuani. Pirenchi jima jatsisptia tanimu ambe: ma kubeta itsï tsʼirapiti jingoni, máteru itsï jorhepiti jingoni ka urhani ma. Ískuni pakaraspka engani exepka eska kʼumanchikuarhu uérakua peeraspka imani ambe, nani engaksï eraakuarhini japka erachicha engaksï Kʼumanchikua Reinurirhu japka paraksï kʼéri tánguarhikueri ambe exeni. Arhispka eskarini kortina ma íntskupiringa, ¡joperurini kortina plastikueri ma íntskuspti enga iámindu ambe xarharenga! Exespka eskani úpiringa kʼumanchikuarhu tátsepani nirani, joperuksï jima jarhaspti gansuecha engaksï atajpini jámenga. Eratsespka: “Erachichaksï uánikua ambe úxati nójtsïni jamberi exeaati engani jikuani jauaka. Ístu, úpirindiksï no sési exeni engani no jikuaka”. Ísï jimbo jikuaspka.

Harvey exespti eskaksï erachicha no úsïrenga sánderu mintsikani Tata Diosïni jimbokaksï no jorhenaspka arhintani; ístu, nóksï jatsiaspti publikasionichani imecheri idioma jimbo. Enga nótki xáni iónipka enga uénanhaapka karanhani idioma amis jimbo, exespkachi eska sési japiringa jorhendaani erachichani paraksï úni arhintani imecheri idioma jimbo. Kʼéri ánchikuarhita máespti, joperu tátsekua erachichaksï úsïrendia jandiajku jorhenguarhini. Uéxurhini 1960 kʼamarhukunisï, uénasptiksïa uérani publikasionicha amis jimbo. Ka 1968 uénasptiksïa petani rebistani Aianhpiri.

Joperu jima anapu gobiernu no uékasïrendi eska etsakunhapiringa publikasionicha enga no idioma chinu jimboepiringa. Ísï jimbo, paraka no japiringa problema ambe, mámaruksï petaspti rebistani Aianhpiri amis jimbo. Por ejemplu, ma tiempu rebista Aianhpiri tsimani idioma jimbo karanhasïrendi: chino mandarín ka amis jimbo. Ini ambe úparini ísï xarharasïrendi eskachi chinu jorhendaaxapka kʼuiripuechani. Jiáni uératini Jeobaeri kúnguarhikua uánikua publikasionichani petaastia amis jimbo para jarhuataani kʼuiripuechani jorhenguarhini jurhimbikua ambe Bibliaeri (Uku. 10:34, 35).

Uéxurhinicha jimbo 1960 ka 1970 erachicha engaksï amis uandenga nóksï úsïrendi ambe engaksï  Tata Diosïri juramukuecha uandajka, jimbokaksï no úsïrenga sési kurhanguni ambe enga Biblia arhijka, máruksï ísku jándikua ambe niátasïrendi, kauisïrendiksï oksï tabaku itsutani oksï nuesi de areka (o de beteli) úrani. Harvey uánikua kúnguarhikuechani pʼorhembiaspti para jarhuataani erachichani kurhanguni na enga Jeoba exejka indeni ambe. Engachi pʼorhembipka kúnguarhikuani ma, imani ambechi nitamakuarhispka engaksïni uénakuarhu aianguka.

Erachicha engaksï kaxumbitiipka jurajkusptiksï indeni ambe, joperuksï uánikua no ísï úspti. 20 uéxurhini jimbo, jini Taiwán 900 aianhpirichaksï pakaraspti engaksï antesi jukari 2,450 aianhpirichepka. Kánikuachi no sési pʼikuarheraspka, joperuchi mítetixapka eska Jeoba no újchakurapiringa kúnguarhikuani ma enga no pímbinhasï japiringa (2 Kor. 7:1). Tiempu jingoni, erachichaksï ísï marhuakuxaptia Jeobani eska ima na uéjka. Jeobaeri kóntperata jimbo, iásïksï Taiwán jukari 11,000 aianhpirichaksï jarhastia.

Uéxurhini 1980 uératini kúnguarhikuarhu anapu erachicha engaksï amis uandajka, sánderuksï mintsikasïrendia Tata Diosïni. Ísï jimbo, Harvey úsptia sánderu tiempu jarhani imecha jingoni engaksï chinu uandajka. Sési pʼikuarheraspti enga úka jarhuaatani máru pirenchicheri uámbechani parakaksï niárapiringa Jeobaeri testigueni. Miásïnga na enga xáni tsípipka enga pirenchiri uámba ma primeru xanhari kómarhipka Jeobani. Jíjtuni kánikua sési pʼikuarherasïnga engani úka jorhendaani uánikua kʼuiripuechani Jeobaeri ambe. Ístuni kánikua sési pʼikuarherasïnga engani úpka marhuani Taiwán anapu Betelirhu pirenchiri tsimani uájpecha jingoni engani ji jorhendapka Bibliaeri ambe.

Nóteruni jatsiskia juchiti acheetini. 59 uéxurhinchi páxapkia temungurhirini ka 1 de eneru 2010 jimbo juchiti acheeti Harvey engani xáni xénchenga uarhisti kánseri jimbo. Sáno 60 uéxurhini marhuaspti tiempu kompletueri. Kánikua jirinhantasïnga. Joperuni kánikua tsípisïnga engani úka jarhuatani tsimani paisicha jimbo enga apenasi uénakuarhini japka aianhpinhani. Tsimani idioma Asia anapuechanchi jorhenguarhispka uandani engaksï kánikua úkua jukaka ka Harvey ístu jorhenguarhispti karaani.

Enga na nitamapkia máru uéxurhinicha enga Harvey uarhipka, Grupu enga Orhejtsïkuajka iámindu kúnguarhikuechani uandaspti eska sánderu sési japiringa para ji Australia kʼuanhatsentani jimbokani jatirispkia. Orheta eratsespka: “Uékasïnga Taiwán pakarani”. Joperurini Harvey jorhendaspti méntkisï jiókuarhini ambe engarini Jeobaeri kúnguarhikua arhipiringa. Ísï jimbo kʼuanhatsentaspka. Tiempu jingoni kurhanguspka eska sési jarhaspka engani kʼuanhatsentaka.

Iásï, lunesï a biernesï marhuasïngia Australasia anapu Betelirhu ka sábadu ka domingu kúnguarhikua ma jingoni uérasïnga aianhpini. Jira íntsaasïnga imechani engaksï Beteli jurhajka miiuni ka engaksï chinu o japonesi uandajka, ¡kánikua tsitisïnga! Joperu uékaxakaia eskaksï uarhiriicha tsíntaakia ísï eskajtsïni Jeoba na aiachika. Míteska eska no mirikurhiaka Harveyni jimboka ima méntkisï úspka ambe enga Jeoba kurhakupka (Juanu 5:28, 29).