1. Májkueni eska rei Dabidi, ¿ambeksï úpirini kurhamarhikuarhini máru kristianuecha?

IÁMINDUECHACHI uékasïnga sési irekani ka pínandikua jingoni. Joperu, nájkirukachi no tsitiaka, iáminduechachi jatsiasïnga uandanhiatechani. Máru kristianuechaksï jamberi niárasïndi ísï pʼikuarherani eska rei Dabidi enga kurhamarhipka Jeobani: “¿Na jatini jamberi jatsia parani tekaantani jarhani juchiti uandanhiata ambe jingoni ka na jatini jamberi jatsia parani no sési pʼikuarherani jarhani?” (Sal. 13:2).

2. ¿Ambechi exea ini jorhenguarhikua jimbo?

² Nájkirukachi no uáka no uandanhiani jarhani, uákachi úni máru ambe parachi no xáni uandanhiani. Ini jorhenguarhikua jimbochi exeaka máru ambe enga újka eskachi jukari uandanhiauaka. Tátsekuachi jorhenguarhiaka seisi ambe engajtsïni jarhuataaka parachi no jukari uandanhiani engachi problemechani jatsiauaka.

3. ¿Ambe jimbochi úpirini jukari uandanhiani, ka úsïnchi úni ambe ma para no ísï úkuarhini?

³ Uánikua ambe jarhasti engajtsïni uáka uandanhiatani ka ménisïchi jucha no ma ambe úsïnga úni para no ísï úkuarhini. Por ejemplu, mándani uéxurhini sánderu jukaparhasïndi tʼirekua, xukuparhakua ka kʼumanchikuecha. Ístuchi no ma ambe úsïnga úni engaksï juchari kompanieruecha ánchikuarhitarhu o eskuelarhu anapuecha uékapiringa parachi no jurhimbikua jingoni jámani o ísku jándikua ambe niátani. Ka nóchi uáka kénditani no sési jásï ambe enga úkuarhijka jimesïsï engachi jucha irekaka. Iámindu i ambe úkuarhisïndi jimbokaksï kʼuiripuecha no úsïnga ambe enga Biblia uandajka. Ístu Noambakiti enga jindeeka  i parhakpini anapu tata diosï, mítesti eska kʼuiripu no marhuakuaka Jeobani jimboka sánderu ‘pendienti paaka para iásï anapu ambe jimbo’ (Mat. 13:22; 1 Juanu 5:19). Jimbosï parhakpinirhu xáni uánikua problemecha jati engaksï kánikua uandanhiatajka kʼuiripuni.

4. ¿Ambe úpirini úkuarhini engachi kánikua uandanhiani jauaka problemecha jimbo?

⁴ Úpiringachi xáni uandanhiani jarhani problemecha jimbo engachi no úpiringa máteru ambe eratseni. Úpiringachi uandanhiani jimbokachi no jatsiska sentabu para ima ambe engachi uétarhinchajka, ochi pʼamenchani ka nóchi úni ánchikuarhini o astachi ánchikuarhitani tsïtani. Ístuchi úpiringa uandanhiani no úni orhepani uérakuni tsʼéjkukuani ma enga uáka eskachi no kurhajchaaka Jeobani. Ka ístuchi jamberi uandanhiajka ambechi uá jiáni enga Noambakiti úraaka kʼuiripuni para no sési kámani Tata Diosïri iretani. Jamberichi kurhamarhikuarhijka: “¿No sési jarhaski ini ambe jimbo uandanhiani?”.

5. ¿Ambe arhikuekaxapi Jesusi enga uandapka: “Asï jáma je jaakuarhini”?

⁵ Jesusi arhiaspti imeri chúxapatichani: “Asï jáma je jaakuarhini [o uadanhiani]” (Mat. 6:25). ¿Arhikuekaxapi eskachi no sáni jatsiska para uandanhiani? Nómbe. Máru ióntki anapu Jeobaeri marhuarichaksï niáraspti uandanhiani, joperu Jeoba seguirispti jaiapanheantani (1 Rey. 19:4; Sal. 6:3). * Sánderu sési, Jesusijtsïni sési pʼikuastantaxapti parakaksï problemecha no úpiringa eskachi nóteru uékapiringa sési marhuakuni Tata Diosïni. Ísï jimbo, ¿ambechi uá úni engachi jukari uandanhiani jauaka? (Exe je rekuadruni “ Néna ísï úni”).

6. Eska na arhijka Filipusʌ 4:6, 7, ¿ambejtsïni jarhuataa parachi no xáni uandanhiani?

⁶ 1) Méntku kómarhijpikuarhini ja je. Kánikuajtsï sési pʼikuarherantaaka engajtsï iámu mintsita jingoni kómarhiaka Jeobani jiáni engajtsï uandanhiani jauaka problemecha jimbo (1 Ped. 5:7). Jeoba uáti mókuantani chári kómarhikuechani íntskuparinksïni “Diosïri pínandikua enga no nema újka jánhaskani” (arhinta je Filipusʌ 4:6, 7). Jeoba úrasïndi imeri espiritu santuni enga kánikua uinhapitika parachi no xáni uandanhiani (Gal. 5:22).

7. ¿Ambechi jatsiski para miáni engachi kómarhini jauaka Tata Diosïni?

⁷ Engajtsï kómarhiaka Jeobani, iámu ambe uénhikuarhi je. Aiangu je ambe jimbojtsïsï uandanhiani jaki ka na engajtsï pʼikuarherajka. Enga jaka ambe ma para sési peentani problemani, kurhaku je Jeobani eskaksïni jarhuataaka jánhaskani ambe úni ka paraksïni íntskuni uinhapikua parajtsï úni indeni ambe. Enga nóteru ambe ma jauakia para úni, kurhaku je Jeobani eskaksïni jarhuataaka no xáni uandanhiani. Engajtsï meru arhiska ambe engajtsï uétarhinchajka, niáraakajtsï exeni na engaksïni Jeoba mókuchiantauaka kómarhikuechani. Engaksïni no jirejiresï mókuchintaaka, asï kuatanta je kómarhini. Jeoba uékasïndi eskajtsï arhiaka ambe engajtsï uétarhinchani jauaka, joperu ístu eskajtsï no kuatantaaka kómarhini (Luk. 11:8-10).

8. ¿Ambe ka ambejtsï uá uandani chári kómarhikuecharhu?

⁸ Engajtsï kómarhini jauaka Jeobani parajtsï aianguni ambe engaksïni uandanhiatani jaka, jukaparhakuesti diosmaiamukua arhini imani ambakiti ambe jimbo engajtsï jatsika. Eratsentani indeni ambe marhuachiatijtsïni nájkirukachi uandanhiatechani jatsiauaka. Ménisï úkua jukaati aiangukuarhini na engachi xáni no sési  pʼikuarherani jauaka. Miá je eskaksïni Jeoba uáka mókuchintani nájkirukajtsï solu uandaaka: “¡Jimboetakua, jarhuatarini!” (2 Crón. 18:31; Rom. 8:26).

9. ¿Ambechi uá úni engachi chéni jauaka?

⁹ 2) Mintsika je Jeobani ka no chájkumindu. Jiánisï enga profeta Isaiasi irekapka, ireta Judá kánikua chéxapti eskaksï asiriuecha ataapiringa ka eskaksï niárapiringa imecheri jántspirini, jimboksïsï jarhuajperata kurhakupti Ejiptu anapuechani (Is. 30:1, 2). Jeoba arhiaspti eska indeni ambe jimbo engaksï úpka no sési nikuapiringa (Is. 30:7, 12, 13). Isaiasini jimbo, Jeoba arhiaspti na engaksï úpiringa kuájchakukata jarhani. Isaías uandaspti: “Chájtsï uinhapiti jauaka engajtsï no sáni chéska ka engajtsï mintsinharhikua xarhataska” Jeobani jimbo (Is. 30:15b).

10. Uanda je máru ambe nani engachi uáka xarhatani eskachi mintsinharhisïnga Jeobani.

¹⁰ Ju je exeni máru ambe nani engachi uáka xarhatani eskachi mintsinharhisïnga Jeobani. Eranhaska je eskaksïni aiachisïnga ánchikuarhita ma nani engaksïni sési maiamuaka, joperujtsï nóteru xáni tiempu jatsinia parajtsï Tata Diosïni marhuakuni. Oksïni jamberi ánchikuarhitarhu anapu kompanieru ma enga no Jeobaeri testigueka tsitini ka uékanksïni uandajpani jámani. Jamberiksïni familiari ma engajtsï chá kánikua uékajka arhinksïni: “Erakukuarhi: o chíti Tata Diosï o ji”. No fásilisti ini ambe nitamakuarhini, joperu mándani ini ambe jimbo, Jeobajtsïni jarhuatasïndi parachi úni orhepani uérani (Mat. 6:33; 10:37; 1 Kor. 7:39). Joperu, ¿mintsikaachi Jeobani ka uáchi ambe engajtsïni ima arhijka?

11. ¿Náki Bibliaeri ejempluechajtsïni jarhuataa parachi no xáni uandanhiani jarhani engachi no sési kánhani jauaka?

¹¹ 3) Jorhenguarhi je imecheri ambe engaksï ióntki irekapka. Bibliarhuksï uánikua ejempluecha jarhasti, ambarhati ka no ambarhaticha engaksï xarhatajka na enga xáni jukaparhakueka no xáni uandanhiani ka méntkisï mintsinharhini Jeobani. Engajtsï ambakiti ejempluechani jorhenguarhiani jauaka, exe je ambe enga jarhuataapka paraksï no xáni uandanhiani nájkirukaksï no sési nitamakuarhini japka. Apostulichaksï no chérakuarhispti engaksï Judá anapu juesicha juramukuapka eskaksï nóteru jámapiringia aianhpini. Sánderu sési, no sáni chéparinksï uandaspti: “Uétarhisïndi eska jucha sánderu janhanharhiaka Diosïni ka eska kʼuiripuechani” (Uku. 5:29). Nóksï chéspti nájkirukaksï ataapka. ¿Andi? Jimbokaksï mítespka eska Jeoba imecha jingoni jarhaspka ka eska jaiapanheantasïrenga. Ísï jimbo, seguirisptiksï ambakiti ambe aianhpini (Uku. 5:40-42). Májkueni, jiáni engaksï uandikuni japka Estebanini, ima no chéxapti ni uandanhiani ka “ísï eranharhikukuarhisïrendi eska ma ánjeli” (Uku. 6:12-15). ¿Andi? Jimboka seguru jarhaspka eska Jeoba jaiapanhentasïrenga.

12. Eska na arhijka 1 Pedru 3:14 ka 4:14, ¿andichisï uá tsípikua jingoni irekani engachi no sési kánhani jauaka?

¹² Apostulichaksï sési mítespti eska Jeoba imecha jingoni jarhaspka, jimboka íntsaaspka uinhapikua paraksï milagruechani uáni (Uku. 5:12-16; 6:8). Nájkirukajtsïni iásï Jeoba no íntskujka uinhapikua parachi milagruechani uáni, uékperakua jingontsïni arhisïndi imeri Karakatarhu eskajtsïni jaiapanhentaaka ka íntskuntsïni imeri espiritu jiáni engachi no sési kánhaaka jimbokachi jurhimbitku úsïnga ambe ma (arhinta je 1 Pedru 3:14; 4:14). Ísï jimbo, nóchi jatsiska para méntku eratseni jarhani ambe úni jiáni engachi no sési kánhaaka sánderu orhepani, sánderu sésisti eskachi iásï exeaka ambechi uá úni parachi sánderu mintsikani Jeobani eskajtsïni jarhuataaka ka pʼímutantani. Ísï eskaksï ima Jesusiri chúxapaticha, jatsiskachi para miáni ambe enga Jesusi aiatspejka: “Arhistachiaka[ksïni]  uandakuechani, ka mámaru ambeksïni mítetarani para eskaksïni iámindu chári ikiatspiticha no uáka andani ka nijtuksïni ambe arhini”. Ístujtsïni arini ambe aiachisïndi: “Chári tekaantskua jimbo chájtsï andajkuarhiaka pʼímutantaani chári almechani [o tsípikuani]” (Luk. 21:12-19). Ka ju je no mirikurhini eska enga imeri marhuari ma uarhijka, Jeoba iámindu ambe miásïndi imeri ambe ka tsítantaati.

13. ¿Nénajtsïni marhuachea jorhenguarhini imecheri ejemplu engaksï no úpka orhepani uérakuani uandanhiatechani ka ni engaksï mintsikapka Jeobani?

¹³ Ístuchi uáka jorhenguarhini imecheri ambe engaksï no úpka orhepani uérakuani uandanhiatechani ka ni engaksï mintsikapka Jeobani. Jorhenguarhiani i ejempluechani jarhuataatijtsïni no májkueni ambe úni eska imecha. Por ejemplu, rei Asá enga uénani japka juramuni Judá mintsikaspti Jeobani jiáni enga kʼéri ejersitu ma jingoni uarhipepka ka Jeoba úspti eska ima andapiringa (2 Crón. 14:9-12). Joperu, ¿ambe úspi ísï tátsekua jiáni enga jatsipka para uarhipeni Israeli anapu rei Baasáeri ejersitu jingoni, engaksï sánderu namunituepka? No kurhakuspti Jeobani eska jarhuatapiringa ísï eska orheta na úpka, sánderu sési maiamuaspti Siria anapuechani paraksï jarhuatani (2 Crón. 16:1-3). Ka enga uinhamu pʼamenchapka ka uarhini jarhani, no kurhakuspti Jeobani eska jarhuatapiringa (2 Crón. 16:12).

14. ¿Ambechi uá jorhenguarhini imani ambe jingoni enga Asá no sési úpka?

¹⁴ Orheta, enga Asá uandanhiatechani jatsiauenga, Jeobani jarhuajperata kurhakusïrendi. Joperu tátsekua, nóteru ísï úsptia, sánderu sési, ima erakusïrendia néna úni ambe ma. Enga Asá asiriuechani jarhuajperata kurhakuapka, para Israeli jingoni nirani uarhiperani, úpirindi xarharani eska ambakiti ambespka. Joperu tiempu jingoni xarharaspti eska no ísïspka. Jeoba profetani ma axaspti para arhiani: “Jimbokari mintsikaska Siria anapu juramutini ka no chíti Tata Diosï Jeobani, nóteruri chíti jájki jimbo jatsiskia Siria anapu juramutiri ejersituni” (2 Crón. 16:7). Juchajtuchi jatsika para jingontku jámani parachi no mintsinharhikuarhini na engachi újka ambe ma ka nóchi jirinhani Jeobaeri jarhuajperatani imeri Karakatarhu. Ménisï jauati ambe ma enga jimbo uétarhiaka sóntku eratseni ambe úni. Joperu sánderu sésijtsïni nicheati engachi no xáni uandanhiauaka ka engachi mintsinharhiska Jeobani.

15. ¿Ambechi uá úni engachi Bibliani arhintani jauaka?

¹⁵ 4) Jorhenguarhia je Bibliarhu anapu karakatechani. Engajtsï exentaska máru karakatechani Bibliarhu engaksï xarhatajka na enga xáni jukaparhakueka no xáni uandanhiani ka mintsikani Jeobani, jánguarhintsï je patsajtsïani indeni karakatechani. Jamberiksïni jarhuataati engajtsï bosi alta jimbo arhiantaska o karaani ka mémindu arhiantani. Jeoba juramukuspti Josueni eska chúrikua ka jurhiakua arhintapiringa Leiri libruni paraka úpiringa jánhaskakua jingoni jámani. Inde ambe jarhuatapirindi paraka no chépiringa orhekupani Jeobaeri iretani (Jos. 1:8, 9). Tata Diosïri Karakatarhu, uánikua ambechi uáka exentani engajtsïni jarhuataaka parachi no xáni uandanhiani imani ambe jimbo engajtsïni úpiringa no sési pʼikuastani o chérani (Sal. 27:1-3; Prov. 3:25, 26).

16. ¿Néna úrasïni Jeoba kúnguarhikuani parachi no xáni uandanhiani ka mintsinharhini imani?

¹⁶ 5) Kúnguarhi je erachicha jingoni. Jeoba úraasïndi erachichani parajtsïni jarhuatani no xáni uandanhiani ka mintsinharhini imani. Juchari tánguarhikuecharhu, kánikuajtsïni marhuachesïndi ambe engajtsïni jorhendajka arhijtsïkperatechani jimbo, ambe engaksï erachicha mókuntajka ka engachi uandontskuarhejka imechani jingoni (Ebr. 10:24, 25). Ístujtsïni  uáti kánikua uinhaperantani engachi uénhikuarhiska kúnguarhikuarhu anapu erachi ma jingoni enga juchari amigueka. Ambakiti uandakua enga ambakiti amigu ma uandajka kánikuajtsïni sési úchiati ka jarhuataatijtsïni parachi nóteru xáni uandanhiania (Prov. 12:25).

17. Eska na arhijka Ebreu 6:19, erokani jarhani ambe enga uáka Tata Diosïri Reinu, ¿nénajtsïni jarhuataa nájkirukachi problemechani jatsiauaka?

¹⁷ 6) Asï méni mirikurhi je aiatsperakuani. Erokuarhini jarhani ambe enga juaaka Tata Diosïri Reinu “ísïsti para juchari almecha komueska ma ankla”, engajtsïni jarhuatajka jiáni engachi uandanhiatechani jatsiajka ka engachi no sési pʼikuarherani jarhajka (arhinta je Ebreu 6:19). Eratsenta je eska Jeoba aiatspesïnga eska sánderu orhepani nóteru nema uandanhiauakia (Is. 65:17). Eranhaska je eskajtsï jimbanhi parhakpinirhu jarhaskia, nani enga pínandikua jauaka ka nóteru úkuarhini no sési jásï ambe (Miq. 4:4). Máteru ambe engaksïni jarhuataaka no mirikurhini aiatsperakuani, jindeesti aianguani máteruechani indeni ambe. Ísï jimbo, jánguarhintsï je aianhpini ka Jesusiri chúxapatichani uáni. Engajtsï ísï uáka “asta kʼamarhutani jamberi” andajkuarhiakajtsï “pʼirani indeni ambe engajtsï erokani jaka” (Ebr. 6:11).

18. ¿Ambechi nitamakuarhinchaa sánderu orhepani, ka ambejtsïni jarhuataa parachi úni orhepani uérani?

¹⁸ Enga na axuterku jauakia para kʼamajkunhani i parhakpini, sánderu problemechani ka uandanhiatechanchi jatsiauaka ka úpiringachi sánderu no jánhaskani ambe úni. Karakata uéxurhini 2021 anapu, miátantasïndijtsïni eska parachi úni orhepani uérakuani problemechani ka parachi no xáni uandanhiani, jatsiskachi para mintsikani Jeobani ka no juchari uinhapikuani. Ini uéxurhini jimbo, eskachi iáminduecha xarhataaka juchari úkuecha jimbo eskachi mintsikaxaka ambe engajtsïni Jeoba aiachijka: “Chájtsï uinhapiti jauaka engajtsï no sáni chéska ka engajtsï mintsinharhikua xarhataska” (Is. 30:15).