1. ¿Ambe xarhatasïni eska ini jurhiatikuecha jimbo familiechaksï nóteru xénchperasïngia?

BIBLIA uandaspti eska últimu jurhiatikuecha jimbo, kʼuiripuechaksï no xarhatapiringa uékperakua imecheri familia jimbo (2 Tim. 3:1, 3). I ambe kumplirikuarhixati ini jurhiatikuecha jimbo. Por ejemplu, uánikua temungurhirichaksï diborsiarikuarhistia, tátichaksï no úsïndi sési pájperani ka sapiichaksï ísï pʼikuarherasïndi enajki no nema xénchaajki. Ka ístuksï jarhasti familiecha engaksï seguirini jaka márku irekani, joperuksï no uandajperani. Kʼuiripu ma enga i járhati familiechani jarhuataajka, uandasïndi: “Nándi, táti ka sapiicha nóksï uandontskuarhesïndi, sánderuksï komputadora, tableta, telefonu o bideojueguechani ambe úrani jarhasïndi. Nájkirukaksï márku irekani jaka, sántkuksïsï mítperajti”.

2, 3. a) Eska na arhijka Roma 12:10, ¿néchanchi jatsiski para xarhatakuani uékperakua? b) ¿Ambechi exea ini jorhenguarhikua jimbo?

² Nóchi uékasïnga nóteru xénchpenia eska iásï anapu kʼuiripuecha (Rom. 12:2). Sánderu sési, jatsiskachi para sánderu xarhatatsperani uékperakua no solu juchari familiarhu anapuechani jingontku, sino ístu kúnguarhikuarhu anapu erachichani jingoni (arhinta je Roma 12:10). ¿Na jásïski i uékperakua? Ima jásïsti engachi familiarhu anapuecha jimbo pʼikuarherajka engachi ambakiti pájperakua ma jatsijka ka engachi sési pʼikuarherajka imecha jingoni ka xénchperani. Ka inde ambechisï jatsika para pʼikuarherani juchari kúnguarhikuarhu anapu erachichani jimbo. Engachi xarhatatsperaaka i jásï uékperakua, jarhuajperasïngachi parachi seguirini májku kʼéri marhuakuni Jeobani (Miq. 2:12).

³ Ini jorhenguarhikuarhu, uánikua Bibliaeri ejempluechanchi exeauaka engajtsïni jarhuataaka sánderu xénchpeni.

4. ¿Nénajtsïni jarhuatasïni Salmo 103:8 parachi kurhanguni na engajtsïni xáni xénchajka Jeoba?

⁴ Biblia uandasïndi sési járhati Jeobaeri kualidadichani. Por ejemplu, arhisïndi eska Tata “Diosï jindeeska uékperakua” (1 Juanu 4:8). Ini ambe míteni, úsïndi eskachi uékaaka andarhierani imani. Joperu, ístu Biblia uandasïndi eska Jeoba ‘kánikua xénchpesïnga’ (arhinta je Salmo 103:8). ¡Íksï uandakuecha meru sési xarhatasïndi na engajtsïni xáni xénchajka Jeoba!

5. ¿Néna xarhatasïni Jeoba pʼamojperakua ka nénachi uá májkueni úni?

⁵ Ju je exeni eska Salmo 103:8 aparte de xénchperakua uandasïnga eska Jeoba pʼamojpitiska (Éx. 34:6). Ma ambe jimbo engajtsïni Jeoba xarhatachejka ini kualidadini jindesti engajtsïni puáchentajka jiáni engachi no sési ambe újka (Sal. 51:1). Ka Biblia ístu arhisïndi eska pʼamojperakua pʼikuarhinhekua máeska enga újka eska ma jarhuataaka nemani enga kómu nitamakuarhini jarhajka. Biblia uandasïndi eska ambe enga Jeoba pʼikuarherajka parajtsïni jarhuatani, sánderu kʼéska ka eska ambe enga nándi ma pʼikuarherajka imeri sapini jimbo (Is. 49:15). Jeobaeri pʼamojperakua úsïndi eskajtsïni jarhuataaka engachi kómu nitamakuarhini jarhajka (Sal. 37:39; 1 Kor. 10:13). Juchajtuchi uáka májkueni xarhatani pʼamojperakua engachi puákuantaska juchari erachichani ka engachi no jatanhekuaska engajtsïni no sési pʼikuastaaka (Efes. 4:32). Ma ambe jimbo engachi xarhatajka eskachi pʼamojkuasïnga jindeesti jarhuataani jiáni engaksï no sési nitamakuarhini jauaka. Enga uékperakua újka eskachi pʼamojpeaka, májkuenchi úni jarhasïnga eska Jeoba, enga jindeeka sánderu ambakiti ejemplu para xarhatatspini uékperakua (Efes. 5:1).

6. ¿Nénaksï xarhatatsperaspi eskaksï xénchperasïrenga Jonatani ka Dabidi?

⁶ Bibliarhu uandasïni uánikua kʼuiripuecheri engaksï xarhatatsperapka uékperakua. Ju je exeni Jonataniri ka Dabidiri ejemplu. Biblia arhisïndi eska “Jonatani ka Dabidi  uénasp[ka]ksï kánikua sési pájperani, ka Jonatani uénaspti ísï xénchani eska imajkumindu na xénchakuarhienga” (1 Sam. 18:1). Jeoba, Dabidini erakuspti para reiini enga na Sauli, Jonataniri táti jémba nóteru reipiringia. Sauli xáni ikiaspti ka enbidiarini enga uékenga Dabidini uandikuni, joperu Jonatani no jarhuataspti para ísï úni. Jonatani ka Dabidi uandasptiksï eskaksï méntkisï amiguepiringa ka eskaksï jarhuajperapiringa (1 Sam. 20:42).

7. ¿Náki jindeeski ma ambe engaksï jimbo Jonatani ka Dabidi no úpiringa amigueni?

⁷ Na engaksï xáni sési pájperenga Jonatani ka Dabidi ískujtsïni pakatasïndi jimboka uánikua ambe jarhaspka engaksï jimbo no úpiringa ambakiti pájperakua ma jatsini. Por ejemplu, Jonatani 30 uéxurhini sánderu kʼérispti Dabidi jingoni. Ísï jimbo, úpirindi eratseni eska no úpiringa pájperani nema jingoni enga sánderu sapichuepka ka enga nótki xáni ambe mítienga. Nájkiruka ísïpka, no méni ísï exespti ni kámani enajki ima sánderu kʼéri ambepi eska Dabidi.

8. ¿Ambe jimbojtsï exesïni eska Jonatani sési pájperasïrenga Dabidi jingoni?

⁸ Ístu, Jonatani úpirindi ikiakuni Dabidini ka inchandimintani para ima reiini jimboka Sauli uájpespka (1 Sam. 20:31). Joperu Jonatani kaxumbitispti ka no méni jurajkuspti Jeobani, jimbosï mintsita jingoni jiókuarhipti enga Jeoba, Dabidini erakupka para reiini. Ístu, no méni jurajkuspti Dabidini, nájkiruka inde ambe kánikua ikiatapka Saulini (1 Sam. 20:32-34).

9. ¿Andichisï míti eska Jonatani no enbidia pʼikuarherasïrenga Dabidini jimbo?

⁹ Jonatani xénchasïrenga Dabidini, jimbosï no enbidia pʼikuarherendi imani jimbo. Jonatani kánikua balori jukaspti ka uánikua xanhari niraspti uarhipeni ka kánikua sési úrasïrendi arkuni ka flechani. Uandanhasïrendi eska ima ka táti jémba sánderuksï “sóntku jámasïrenga eska aguilecha” ka ‘sánderuksï uinhapini eska leonicha’ (2 Sam. 1:22, 23). Ísï jimbo, Jonatani úpirindi kʼéri pʼikuarherani imani ambe jimbo enga úpka. Joperu no méni andaperani jámaspti Dabidi jingoni nijtu enbidia pʼikuarherapi imani ambe jimbo enga Dabidi úpka. Sánderu sési, sési exespti na enga xáni balori jukapka Dabidi ka na enga xáni mintsinharhienga Jeobani. Enga Dabidi uandikupka Goliatini, Jonatani jiáni uénaspti xénchani. ¿Nénachi uá májkueni xénchaani juchari erachichani?

10. ¿Ambe arhikuekasïni ‘kánikua uékperani’ mintsita jingoni?

¹⁰ Biblia arhisïndi: “Kánikua uékpera je [...] mintsita jingoni” (1 Ped. 1:22). Jeobajtsïni íntskusïndi ejemplu. Imajtsïni kánikua uékasïndi, engachi no méni jurajkuska, no ma ambejtsïni uáti jarharitani imani jingoni (Rom. 8:38, 39). Uandakua enga Griegu jimbo jindeeka “kánikua” úpirindi arhikuekani kánikua jánguarhintani para xarhatani uékperakua, ka jamberichi i ambesï jatsika para úni máru erachicha jimbo. Bibliajtsïni arhisïndi ambe engachi jatsika para úni engachi no sési pʼikuastanhaaka: “[Tekaatsperanta je] máteru ka máteru jingoni, indeni uékperakua jimbo engajtsï jatsika. Jimajkani jánguarhi je irekani sési pájperakua jingoni parakajtsï xarharaaka eskajtsï májku ambeeska espiritu santu jimbo, míteparini eskajtsï májkueranhantaskia” (Efes. 4:1-3). Engachi jánguarhintaska sési pájperani juchari erachicha jingoni, nóchi imani ambe exeni jauaka engaksï no sési újka, sinochi jánguarhintaaka ísï exeani eska Jeoba na exeajka (1 Sam. 16:7; Sal. 130:3).

11. ¿Andisï ménisï úkua jukajki uékperakua xarhatatspini?

¹¹ Ménisï úkua jukasïndi uékperakua xarhatakuani erachichani ka sánderia engachi imantku ambe exeni jauaka engaksï no sési újka.  I ambeksïsï úkuarhinchapti erachicha primeru sigluru. Por ejemplu, Ebodia ka Sintike sésiksï ánchikuarhisïrendi Pablu jingoni paraksï aianhpini “ambakiti aianhperakuani”. Joperuksï tsimarhani no úsïrendi sési pájperani ambe ma jimbo, jimbosï Pablu arhiapti: “Eskajtsï májku ambe eratseaka juchari Tatani jimbo” (Filip. 4:2, 3).

12. ¿Ambechi uá úni parachi xénchaani juchari erachichani?

¹² ¿Ambechi uá úni parachi xénchaani juchari erachichani? Jánguarhintani sánderu sési míteani. Ísïchi uáka sánderu sési kurhangukuani ka niáranchi xénchaani. Uákachi imecheri amigueni, no arhiparini na engaksï xáni jatiriuaka ka náki uéjki pʼindekuechanksï jatsiani. Ju je miáni eska Jonatani kánikua sési pájperaspka Dabidi jingoni, nájkiruka ima 30 uéxurhinisï sánderu kʼéripka Dabidi jingoni. ¿Andijtsïsï no jánguarhintajki imeri amigu úkuarhini kúnguarhikuarhu enga sánderu kʼérika o sapichuni eska chá? Engajtsï ísï úska, xarhatantsï jauaka eskajtsï uékaasïnga erachichani (1 Ped. 2:17).

13. ¿Andichisï uá máru kúnguarhikuarhu anapu erachicha jingoni sánderu sési pájperani?

¹³ Joperu, xénchaani erachichani, ¿arhikuekasïni eskachi májkueni sési pájperaaka iáminduecha jingoni? Nómbe, inde ambe no uáti ísï úkuarhini. Ístu, no no sési jarhasti eskachi máru erachicha jingoni sánderu sési pʼikuarheraaka jimbokachi sáno májkueni jásï ambe tsitisïnga. Por ejemplu, Jesusi iámindu imeri apostulichani ísï exeasïrendi komueska imeri amiguecha, joperu Juanuni kánikua xénchasïrendi (Juanu 13:23; 15:15; 20:2). Joperu Jesusi no sánderu sési kámaspti Juanuni eska máteruechani. Por ejemplu, jiáni enga Juanu ka imeri ermanu jémba Santiagu kurhakupka Jesusini eska ambakiti lugari ma íntsaapiringa Tata Diosïri Reinurhu, Jesusi arhiaspti: “Para eska chá uaxakaaka juchiti jurhijkandani ladu jimbo ka uikixkandani ladu jimbo, ji no jatsiska juramukua paraksïni íntskuni” (Mar. 10:35-40). Juchachi jatsiska para májkueni úni eska Jesusi ka no sánderu sési kaani imechani engachi jingoni sánderu sési pájperajka (Sant. 2: 3, 4).  Sánderu sési kaani máru erachichani úsïndi eskachi arhukurhitini jauaka ka inde ambe no jatsisti para úkuarhini kúnguarhikuarhu (Jud. 17-19).

14. Eska na arhijka Filipusʌ 2:3, ¿ambejtsïni jarhuataa parachi no andaperani jámani kúnguarhikuarhu?

¹⁴ Uékperakua xarhatatsperani, uáti eskachi no andaperani jámaaka kúnguarhikuarhu. Ju je miáni eska Jonatani no ísï pʼikuarheraspka eska sánderu sési úpiringa ambe ma ka eska Dabidi, ni uékeni reiini Dabidiri kuenta. Ju je májkueni úni ka no enbidiariuani erachichani imani ambe jimbo engaksï jorhenaka úni. Sánderu sési, ju je úni ambe enga Pablu uandapka: ‘Kaxumbikua jingoni, sánderu kʼéri ambe exea je máteruechani ka eska chájkumindu’ (arhinta je Filipusʌ 2:3). Ju je miáni eskaksï mándani arhini erachicha uáka jarhuajpini kúnguarhikuarhu. Engachi kaxumbitiska, uákachi sési járhati kualidadichani exeani juchari erachicheri ka imecheri ambakiti ejemplujtsïni jarhuataati (1 Kor. 12:21-25).

15. ¿Ambejtsï jorhenguarhisïni ima amberi enga Tanya ka imeri familia nitamakuarhipka?

¹⁵ Engachi no sési nitamakuarhini jarhajka, Jeobajtsïni uinhaperantasïndi imeri uékperakua jingoni ka erachicheri jarhuatani jingoni. Ju je exeni ambe enga nitamakuarhipka familia ma. Jurhiatikua sábadu ma jimbo engaksï níntani japkia kʼéri tánguarhikua internasionalirhu uératini enga arhinhenga “¡Uékperakua no méni kʼamakurhisïndi!” uéxurhini 2019 jimbo jini Estados Unidos. Tanya enga tanimu sapiichani kaajka, uandantasïndi eska engaksï na kʼuanhatsentani japkia otelirhu karru ma chokarispka imeri karru jingoni. Ima uandantasïndi: “No nema atakuarhispti, joperuchi uéraspka karrurhu, nóchi jánhaskasïrenga ambe úni ka karreterarhuchi jarhaspka. Kʼuiripu májtsïni uandajpaspti parachi  imeri karrurhu nirani ka ísïchi seguru jarhani. Erachi máespti enga ístu kʼamarapka uéntani kʼéri tánguarhikuarhu. Ka no imajkusï anhaxurhipti; ístuksï sinku Suecia anapu erachicha anhaxurhispti. Pirenchichaksï kánikua uékperakua jingoni kamapakuspti juchiti nanakani ka jíndeni. Indeni ambechisï uétarhinchani japka. Nájkirukachi arhiapka eskachi sési jarhaspka, juchantsïni jingonksï pakaraspti. Nóksï níntaspti ni jiáni engaksï niárapkia doktoricha parajtsïni exeni. Úsptiksï eskachi no ma ambe kueratanchapiringa. Imani tiempu engachi no sési nitamakuarhipka exespkachi na engajtsïni xáni xénchajka Jeoba. Engachi ini ambe nitamakuarhika ústi eskachi sánderu uékauakia erachichani. Ístu, sánderuchi uékasïngia Jeobani ka sánderuchi agradesidu jarhaskia imani jingoni”. ¿Miásïntsï eskaksïni ménisï erachi ma uékperakua jingoni kámaspka jiáni enga chá sánderu uétarhinchani japka?

16. ¿Ambe ka ambe jimbochi jatsiski para xarhatatsperani uékperakua?

¹⁶ Engachi xarhatatsperaska uékperakua, ¿nénajtsïni marhuachea? Uinhaperantauakachi juchari erachichani jiáni engaksï kómu nitamakuarhini jauaka ka uákachi eska Tata Diosïri ireta sánderu májku kʼéri jauaka. Ístuchi xarhataaka eskachi meru Jesusiri chúxapatiska ka inde ambe uáti eskaksï sánderu uánikua kʼuiripuecha engaksï ambakiti mintsita jataka, uékaaka marhuakuni Jeobani. Joperu ambe enga sánderu jukaparhakueka, jindeesti eskachi kʼéri ambe arhiaka Jeobani, “Táti enga pʼamojpijka ka Diosï enga uinhaperpintajka iámindu ambe jimbo” (2 Kor. 1:3). Ísï jimbo, ju je iáminduecha seguirini jarhani uékperani.