JINI Jerusaleni, Museuru ma enga arhinhajka Tierras de la Biblia, tsakapu ma jarhasti enga karanharhikunhaka uéxurhinisï 700 ka 600 ísï ante de Jesusi. I tsakapu, kuebarhu ma exenhantasti enga úranhenga para uarhirichani jatsiantani, enga no iauani jaka ireta Ebroni uératini (Israel). Tsakapurhu arhisïndi “No sési ambe úkuarhinche Hagaf, Hagav uájpa Yahweh Sabaot jimbo”. I karakata xarhatasïndi eska ísïska ambe enga Biblia arhijka, jimboka xarhatasïnga eska Tata Diosïri arhinhakua, Jeoba o Yahweh, enga ióntki anapu ebreu jimbo arini letrecha jimbo karakuarhienga YHWH, kánikua mítekatespka Bibliaeri jurhiatikuecha jimbo ka eskaksï kʼuiripuecha méntkisï úrasïrenga. Ístuksï exenhantasti máteru karakatechani kuebecharhu engaksï jatsiantauenga uarhirichani enga xarhatajka eska imecha engaksï jima tánguarhienga o engaksï jima nirenga jirikuarhini, somenksï karanharhikusïrendi Tata Diosïri nombrini ka ístu máteru nombrichani engaksï sáno májkueni jáxepka eska Tata Diosïri arhinhakua.

Rachel Nabulsi enga idiomecheri ambe exejka ka enga Universidad de Georgia ánchikuarhijka, uandaspti i karakatecheri ambe: “Enga someni úrakuarhijka i nombri YHWH kánikua jukaparhakuesti [...]. I karakatechaksï [Bibliaeri] ka karakatecha engaksï exenhantaka xarhatasïndiksï na enga xáni jukaparhakuepka YHWH para Israeli ka Judá anapu kʼuiripuecha”. I ambe xarhatasïni eska ísïska ambe Biblia uandajka eska Tata Diosïri nombri, enga letra ebreuecha jimbo karakuarhijka YHWH uánikua xanhari jarhaska Bibliarhu. Uánikua kʼuiripuecheri nombricha ístuksï jukasïrendi Tata Diosïri nombrini.

Uandakuecha Yahweh Sabaot, engaksï tsakapuecharhu karakata jaka engachi antesi uandaakia, arhikuekasïndiksï “Jeoba ejersituecheri”. I ambe arhikuekasïndi eska kʼuiripuechaksï kánikua úrasïrenga Bibliaeri jurhiatikuecha jimbo Tata Diosïri nombri ka ístu “Jeoba ejersituecheri”. Ístu, xarhatasïndi eska ísïska enga Biblia úrajka “Jeoba ejersituecheri” enga jukari 250 xanhari karakata jaka Karakata Ebreuecha jimbo, sánderu uánikua xanhari jarhasti arini libruecha jimbo Isaías, Jeremías ka Zacarías.