1. ¿Néna jarhuataspi tumbini ma arhijtsïkperata enga kʼéri tánguarhikuarhu nitamataranhapka 1935 jimbo?

TUMBI ma enga 18 uéxurhini jatiripka, 1926 jimbo itsï atakuarhispti. Imeri tátichaksï Bibliaeri jorhenguarhirispti, jiánisïksï ísï mítekatespti Jeobaeri testiguecha. Tanimu tatakechanksï kásïrendi ka tsimani nanakechani ka jorhendaasptiksï para Jeobani marhuakuani ka paraksï Jesusiri ejempluni chúxapani. I tumbi enga sési marhuakuni japka Tata Diosïni, mándani uéxurhini arhasïrendi kurhinda ka binuni Tateeri Senarhu májkueni eskaksï na uénga jiánisï iámindu Bibliaeri jorhenguarhiricha. Joperu iámu ambe mójtakurhispti enga kurhaapka imani ambakiti arhijtsïpkeratani enga arhinhenga “La grande muchedumbre”. Enga nitamatarapka erachi Joseph Rutherford kʼéri tánguarhikuarhu ma jimbo jini Washington (Estados Unidos) 1935 jimbo. ¿Ambe sánderu sési kurhangunhaspi i kʼéri tánguarhikua jimbo?

2. ¿Ambe ambakiti ambe uandaspi erachi Rutherford imeri arhijtsïkperata jimbo?

² Imeri arhijtsïkperata jimbo erachi Rutherford uandaspti néksï jindeepirini ima ‘uánikua kʼuiripuecha’ enga Jaŋaskuecha 7:9 arhijka. Asta ima jurhiatikua jamberi, Bibliaeri jorhenguarhirichaksï eratsesïrendi eskaksï i grupueri kʼuiripuecha, ístuksï auandarhu nipiringa peru eskaksï no xáni sési marhuaxapka eska erakukatecha. Erachi Rutherford úraspti Bibliani para xarhatani eska inde uánikua kʼuiripuecha nóksï erakukateska paraksï auandarhu nirani, sánderu sési, eskaksï jindeeska máteru karichicha * Kristueri engaksï tsípiti pakaraaka kʼéri mískuarhitarhu ka  engaksï Echerirhu irekaaka para méntkisï (Jaŋ. 7:14). Jesusi i ambe aiatspespti: “Ístuni jatsiaska máteru karichichani engaksï no ini korraliru anapueka, ka uétarhisïndi eskani imechantu juanguauaka. Ka kurhaatiksï juchiti uandakuani, ka ísïksï májku úkuarhintaati iáminduecha, ka ístu solu máechakua karichi eranguti jauati” (Juanu 10:16). I grupu jindeestiksï Jeobaeri testiguecha engaksï sési marhuakujka Tata Diosïni ka engaksï erokuarhini jaka Echerirhu irekani para méntkisï enga na paraisu máeuakia (Mat. 25:31-33, 46). Ju je exeni na enga i jimbanhi ambe engaksï kurhangupka mójtakukuapka tsípikua uánikua Jeobaeri testiguechani, asta imani erachini jamberi enga 18 uéxurhini jatiripka (Sal. 97:11; Prov. 4:18).

3, 4. Kʼéri tánguarhikua jimbo enga 1935 jimbo úkuarhika, ¿ambeksï úspi kurhanguni uánikua erachicha, ka andi?

³ Ma ambakiti ambe enga úkuarhipkia imani kʼéri tánguarhikua jimbo, jindeespti enga erachi Rutherford i ambe kurhamarhiapka imechani engaksï jima japka: “¿Uékapirintsï jimboetakua jauarani iámindu engajtsï erokuarhini jaka irekani para méntkisï Echerirhu?”. Nema enga jima japka uandasïndi eskaksï jima sáno 20,000 ísï jarhaspka ka eskaksï jukari terujkani jauaraspka. Tátsekua erachi Rutherford uandaspti: “¡I jindeesti grupu uánikua kʼuiripuecheri!”. Jimajkani, uénasptiksï uinhamu pasajkuni ka astaksï uinhachani xáni tsípini. Imecha engaksï anhandetini jápka, kurhangusptiksï eskaksï no erakunhaspka paraksï auandarhu nirani ka eskaksï no erakunhaspka espiritu santu jimbo. Pauandikua, itsï atakuarhisptiksï 840 imani kʼéri tánguarhikua jimbo ka sáno iáminduechaksï jindeespti máteru karichicheri grupueri.

⁴ Jima para orhepani, uánikua erachichaksï nóteru arhasptia kurhinda ka binuni Tateeri Senarhu, asta ima tumbi jamberi engachi uénakuarhu uandaka. Uánikuaksï ísï pʼikuarherasïrendi eska erachi kaxumbiti ma enga uandapka: “Últimu xanhari engani aka kurhinda ka binuni jindeespti Miántskuarhu enga 1935 jimbo úkuarhipka, jimbokani kuenta íntskukuarhispka eskarini Jeoba no erakuspka espiritu santu jimbo parani auandarhu nirani. Sánderu sési, erokuarhikua jatsiska Echerirhu irekani ka jarhuajpini para Echeri paraisu ma úkuarhintani” (Rom. 8:16, 17; 2 Kor. 1:21, 22). Jiáni uératini, uánikua kʼuiripuechaksï sánderu uánikua úkuarhixati ka márkuksï ánchikuarhixati erakukatecha jingoni engaksï útasï Echerirhu jaka.

5. ¿Néna exeasïni Jeoba imechani engaksï nóteru arhajkia kurhinda ka binuni?

⁵ ¿Néna exeasïni Jeoba imechani engaksï 1935 jimbo uénaka nóteru arhania kurhinda ka binuni? ¿Ka ambe úkuarhisïni enga Jeobaeri testigu ma arhajka kurhinda ka binuni jimboka meru jakajkusïnga eska erakukateska joperu tátsekua kuenta íntskukuarheni eska no ísïska? (1 Kor. 11:28). Máruksï arhasïrendi kurhinda ka binuni jimbokaksï ísï eratsesïrendi eskaksï auandarhu nipiringa. Joperu engaksï imecha jiókuarhiska eskaksï no sési úska ka nóteruksï arhania kurhinda ka binuni ka jánguarhintanksï sési marhuakuni Jeobani, ima jiókuarhiauati imani grupu jingoni engaksï jindeeka máteru karichicha. Ka nájkirukaksï nóteru arhajkia kurhinda ka binuni, seguirisïndiksï nirani Jesusiri uarhikuarhu Miántskuarhu jimbokaksï uékasïnga xarhatani eskaksï kánikua jaiapanhentasïnga ambe enga Jeoba ka Jesusi úka imecha jimbo.

6. ¿Ambe juramukuaski Jesusi ánjelichani?

⁶ Kʼéri mískuarhita axuterku jarhastia, jimbojtsïnisï uinhaperantaati sánderu kurhanguni ambe enga Jaŋaskuecha kapitulu 7 uandajka  kristianu erakukatecheri ambe ka ístu máteru karichicheri ambe. Jimini uandasïndi eska Jesusi juramukuasïnga ánjelichani eskaksï pʼínguauaka tʼámu tarhiateachani kʼamajkukueri. Nóksï jatsisti para jurajkuni eskaksï inde tarhiatecha tarhiauaka Echerirhu astakaksï na iámindu erakukatecha mínda jukaakia, i ambe arhikuekasïndi eska Jeoba sési jimbo jiókuarhisïngia (Jaŋ. 7:1-4). Ambe engaksï intsïnhajka erakukatecha jimbokaksï no méni jurajkuska Jeobani, jindeesti paraksï juramutini ka saserdotini Kristuni jingoni auandarhu (Jaŋ. 20:6). Jeoba, Jesusi ka ánjelichaksï kánikua tsípini jauati engaksï 144,000 erakukatecha intsïnhaakaksï tsípikua auandarhu.

7. Eska na arhijka Jaŋaskuecha 7:9, 10, ¿néchani exeaspi Juanu, ka ambeksï úxapi? (Exe je dibujuni enga uénakuarhu jaka i rebistarhu).

⁷ Enga Juanu na uandaajkia 144,000 juramutichani ka saserdotichani, ístu exeasïndi máteru ‘uánikua kʼuiripuechani’ engaksï tsípiti pakarajka Armajedonirhu. I grupu no májkuenisti eska primeru grupu, i grupu sánderu kʼésti ka no mítenhasti namuniskiksï (arhinta je Jaŋaskuecha 7:9, 10). Niraxatiksï “xukuparhakua urapiti jukarini”, i ambe arhikuekasïndi eskaksï no “kʼamanharhintskua jatsi[ska] parhakpini anapu ambe jimbo” enga Noambakitirika ka eskaksï ístu no jurajkuska Jeobani ka Jesusini (Sant. 1:27). Uinhachaparinksï uandasïndi eskaksï pʼímutantskata uéraska imani ambe jimbo enga Jeoba úka ka Jesusi, Tata Diosïri Karichi sapichu. Ístu, jájkirhuksï pásïndi palmeri chkurhi enga xarhatajka eskaksï tsípikua jingoni jiókuarhisïnga imani enga Jeoba erakuka para Juramutiini, Jesusini (terukutanta je Juanu 12:12, 13 jingoni).

8. ¿Ambe arhisïni Jaŋaskuecha 7:11, 12 eska úkuarhiaka Jeobaeri familia jingoni auandarhu?

⁸ Arhinta je Jaŋaskuecha 7:11, 12. ¿Ambe úkuarhispi auandarhu? Juanu exesïndi eskaksï iámindu auandarhu kánikuaksï tsípisïnga ka kʼéri ambeksï arhini Tata Diosïni engaksï exejka grupuni uánikua kʼuiripuecherini. Jeoba ka imeri familia auandarhu anapu kánikuaksï tsípini jauati engaksï exeaka na enga úkuarhika i jánhaskakua enga Biblia arhijka eska grupu uánikua kʼuiripuecheri tsípiti pakarasïnga kʼéri mískuarhitarhu.

9. Eska na arhijka Jaŋaskuecha 7:13-15, ¿ambe úxakiia grupu uánikua kʼuiripuecheri?

⁹ Arhinta je Jaŋaskuecha 7:13-15. Juanu uandasïndi eska ima grupu engaksï uánikua kʼuiripuecherika “Karichi sapichueri iurhiri jimbo jupaanta[s]ka imecheri xukuparhakuechani ka sésiksï úraperantaani”. I ambe arhikuekasïndi eskaksï no ma kʼamanharhintskua exeminhantaska ka eska Jeoba jaiapanhentaaska (Is. 1:18). Kristianuestiksï engaksï aiakukuarhekia Jeobani, itsï atakuarhini ka engaksï kánikua jakajkujka Jesusiri uarhikuani ka Jeobaeri amiguestiksï (Juanu 3:36; 1 Ped. 3:21). Iámindu ini ambe jimbo úsïndiksï Tata Diosïri orhepani jimbo jarhani “ka marhuakunksï jarhani chúrikua ka jurhiakua” ixú Echerirhu. Iásïksï jánguarhintaxatiia tsípikua jingoni aianhpini ka Jesusiri chúxapatichani uáni, jimboka Tata Diosïri Reinu jindeeska sánderu jukaparhakua ambe para imecha (Mat. 6:33; 24:14; 28:19, 20).

10. ¿Ambeeriksï seguru jarhaski ima grupu engaksï jindeeka uánikua kʼuiripuecheri, ka náki aiatsperakuaksï exea eska ísï úkuarhiaka?

¹⁰ Imecha engaksï grupuerika uánikua kʼuiripuecheri seguruksï jarhasti eska Tata Diosï seguirini jauaka kuidariuani enga na nitamaakia kʼéri mískuarhita jimboka Biblia arhisïndi eska “ima enga uaxakatini jaka kʼéri uaxantskuarhu, méntku jauati irekani imecha jingoni”. Ka ístu úkuarhiati i ambe engaksï xáni ióni erokuarhikia máteru karichicha: Tata Diosï “kutsunharhikuauati iámindu uekua, ka nóteru jauatia uarhikua, ka ni uandanhiata, ka nóteru nema ueraati o pʼamenchani” (Jaŋ. 21:3, 4).

11, 12. a) Eska na arhijka Jaŋaskuecha 7:16, 17, ¿náki kóntperatechanksï jatsiaua grupu uánikua kʼuiripuecheri? b) Tateeri Senarhu, ¿ambeksï uá úni máteru karichicha, ka andiksïsï ísï újki?

 ¹¹ Arhinta je Jaŋaskuecha 7:16, 17. Iáiasï máru Jeobaeri marhuarichaksï no jatsisti ambe tʼireni jimbokaksï no jatsikuarheska sentabu o no sési ambe úkuarhini jarhani jimesïsï engaksï irekaka ka guerra ambe jimbo. Máteruechaksï ónhakata járhasti imecheri jakajkujka jimbo. Joperu grupu uánikua kʼuiripuecheri, sésiksï pʼikuarherasïndi míteni eska jiáni engaksï tsípiti pakaraaka enga Noambakitiri parhakpini kʼamajkunhaaka, méntkisïksï jatsiaka kánikua tʼirekua ka eska Jeoba jorhendaauaka. Jiáni enga Jeoba kʼamajkuaka Noambakitiri parhakpinini, kuájchakuati grupuni uánikua kʼuiripuecherini imeri ikiatapueri enga ísïka komueska kánikua aparhikuarhini jarhani. Enga na nitamaakia kʼéri mískuarhita, Jesusi paauati imechani engaksï tsípiti pakaraaka “jima enga uérajka itsï tsípikueri”. Eranhaska je ini xáni ambakiti erokuarhikuani engaksï jatsika i grupu uánikua kʼuiripuecheri: Iámindu ima kʼuiripuecheri engaksï xáni irekakia ixú Echerirhu, íjkuksï uáti jindeeni engaksï no méni uarhiaka (Juanu 11:26).

¹² I máteru karichicha, kánikuaksï diosmaiamukua arhisïndi Jeobani ka Jesusini ini xáni ambakiti erokuarhikua jimbo. Nájkiruka Jeoba no erakuaka íichani paraksï auandarhu nirani, májkueni xénchaasïndi ka jukaparharaani eska erakukatechani. Máteru karichicha ka ístu erakukatechaksï úsïndi kʼéri ambe arhini Tata Diosïni ka ístu Kristuni engaksï nirajka Tateeri Senarhu.

13, 14. ¿Andichisï jatsi para iáminduecha nirani tata Jesukristueri uarhikueri Miántskuarhu?

¹³ Arini últimu uéxurhinicha jimbo engaksï nitamakia, mándani 1,000 kʼuiripuecheri, ma kʼuiripu arhasïndi kurhinda ka binuni Miántskuarhu. Sáno iámindu kúnguarhikuecharhu, no nema arhasïndi kurhinda ka binuni. Ísï jimbo, sáno iáminduecha engaksï nirajka Miántskuarhu erokuarhixatiksï irekani Echerirhu. Jimajkani, ¿andiksïsï nirajki? Imani mismu ambe jimbo engaksï uánikua kʼuiripuecha nirajka enga amigu ma tembuchajka. Nirasïndiksï jimbokaksï uékasïnga xarhatakuani nobiuechani eskaksï xénchaasïnga ka eskaksï uékasïnga imecha jingoni jarhani. Májkueni, máteru karichichaksï nirasïndi Miántskuarhu jimbokaksï uékasïnga xarhatakuni Kristuni ka  erakukatechani eskaksï xénchaasïnga ka eskaksï imecha jingoni jarhaska. Ísïksï xarhatasïndi eskaksï jukaparharasïnga Jesusiri uarhikuani enga újka eskaksï uáka irekani para méntkisï Echerirhu.

¹⁴ Máteru jukaparhakua ambe engaksï jimbo máteru karichicha nirajka Miántskuarhu, jindeesti para kurhajchani Jesusiri juramukuani. Enga ima uaxastapka Miántskuani imeri apostulicha jingoni, arhiaspti: “Ísïjtsï uáka jintsïni miántsparini” (1 Kor. 11:23-26). Ísï jimbo, máteru karichichaksï nirani jauati Tateeri Senarhu asta jiáni jamberi engaksï útasï jauaka erakukatecha ixú Echerirhu. Ístuksï pʼímarhiasïndi iámindu kʼuiripuechani paraksï pambitaani ini xáni ambakiti jurhiatikua jimbo.

15. ¿Nénachi uá mándani jucha kʼéri ambe arhini Tata Diosïni ka Kristuni, Miántskuarhu?

¹⁵ Miántskuarhu iáminduechachi uáka kʼéri ambe arhini Tata Diosïni ka Kristuni pirekupariani ka májku kʼéri kómarhiparini. Arhijtsïkperata i uéxurhiniri anapu arhinhasïndi: “Ju je xarhatani eskachi jukaparharasïnga ambe enga Tata Diosï ka tata Jesukristu úka juchantsïni jimbo”. Engachi kurhauaka ini arhijtsïkperatani, sánderuchi agradesidu jauaka Jeobani ka Jesusini jingoni. Engaksï jamberi nitamakuarhini jauaka kurhinda ka binu, iáminduechachi uáka miántani ambe engaksï arhikuekajka: Jesusiri kuerpu ka imeri iurhiri. Ístuchi miántaaka eska Jeoba jurajkuska eska imeri Uájpa uarhipiringa juchantsïni jimbo parachi úni tsípikua jatsini (Mat. 20:28). Iámindu ima enga xénchajka juchari Táti auandarhu anapuni ka imeri Uájpani niuatiksï Jesusiri uarhikueri Miántskuarhu.

16. ¿Ambe jimboksï májkueniski erakukatecha ka máteru karichicha?

¹⁶ Para Tata Diosï májkuenksï jukaparhakuesti erakukatecha ka ístu máteru karichicha. Májkueni xénchaasïndi tsimani grupuechani. Jimboka májkueni maianhpeska erakukatecha ka ístu máteru karichicha jimbo, imeri Uájperi tsípikua jingoni enga ima xáni xénchajka. Ambe engaksï jimbo no májkuenika, jindeesti eskaksï máru auandarhu niuaka irekani ka máteruecha Echerirhu, joperuksï tsimarhani jatsisti paraksï no méni jurajkuni Tata Diosïni ka ístu tata Jesukristuni (Sal. 31:23). Ka nóchi mirikurhiaka eska Tata Diosï úsïnga úni eska imeri espiritu santu májkueni jarhuatauaka iámindu imeri marhuarichani. Jeoba uáti íntskuni imeri espiritu santuni mándani kʼuiripuni eska na uétarhinchaaka, no arhiparini enga erakukateuaka o máteru karichiricherini.

17. ¿Ambeksï tsípikua jingoni erokuarhixaki erakukatecha eska úkuarhiaka?

¹⁷ Erakukatechaksï no andajpenusïndi imani erokuarhikua jingoni paraksï auandarhu nirani irekani, Jeobasï jatsijti para íntskuani indeni  erokuarhikuani. Eratsentasïndiksï imani erokuarhikuani engaksï jatsika, uandasïndiksï inderi ambe imecheri kómarhikuecharhu ka tsípikua jingonksï erokuarhixati eskaksï intsïnhaaka imecheri kóntperatani auandarhu. Nóksï jamberi úsïni eranhaskani na enga jáxeaka imecheri kuerpu enga espiritu máeuaka, joperuksï erokuarhixatiia Jeoba, Jesusi, ánjelicha ka máteru erakukatecha jingoni jarhani auandarhu anapu Reinurhu (Filip. 3:20, 21; 1 Juanu 3:2).

18. ¿Ambeksï kánikua tsípikua jingoni erokuarhixaki máteru karichicha?

¹⁸ Máteru karichichaksï erokuarhixati imani ambe engaksï kánikua tsitijka kʼuiripuecha: irekani para méntkisï Echerirhu (Ecl. 3:11). Kánikuaksï uékasïndi eska niáraakia ima jurhiatikua paraka interu parhakpini paraisu máeuaka ka únksï úkuarhiani kʼumanchikuechani, ikarani ambe ma ka sésiksï irekani imecheri familiecha jingoni no ma pʼamenchakua jingoni (Is. 65:21-23). Kánikuaksï uékaxatiia iámu parhakpini jimbo nirani, exeani juátechani ka marichani ka sánderu sési míteni Jeobaeri ambakiti kueraakata ambe. Joperu ambe enga sánderu sési pʼikuastajka, jindeesti míteni eskaksï sánderu sési pájperaaka Jeobani jingoni ka eskaksï pauani pauani uáka sánderu andarhierani.

19. ¿Ambechi uá úni Miántskuarhu mándani jucha, ka káni úkuarhia i uéxurhini?

¹⁹ Jeoba ambakiti erokuarhikua ma íntsaasti mándani imeri marhuarichani engaksï itsï atakuarhikia (Jer. 29:11). Jesusiri uarhikueri Miántskua, jindeesti nani engachi iáminduecha uáka kʼéri ambe arhini Tata Diosïni ka Kristuni inde ambe jimbo engaksï úka parachi úni irekani para méntkisï. Miántskua jindeesti tánguarhikua enga sánderu jukaparhakueka mándani uéxurhini para jurhimbitku kristianuecha. Uéxurhini 2021 jimbo, Miántskua úkuarhini jauati sábadu 27 de marsuni enga Jurhiata na inchajtsïkuakia. I uéxurhini, uánikuaksï uáti nirani no ma uandanhiata jingoni, máteruechaksï niuati nájkirukaksï no sési kánhaaka ka máteruechaksï úntaati nájkirukaksï ónhakata jauaka. Eska Jeoba, Jesusi ka Tata Diosïri familia auandarhu anapu exeani jauaka iámindu kúnguarhikuechani, grupuechani ka kʼuiripuechani engaksï Miántskuarhu jauaka.